Le kaʼansaj ku tsʼáaik Diosoʼ letiʼ u maas maʼalobil
Le kaʼansaj ku tsʼáaik Diosoʼ letiʼ u maas maʼalobil
«Tuláakal baʼax ku páajtal u yantalteneʼ kin tukultikeʼ bey jumpʼéel baʼal minaʼan u tojoleʼ tu tséel le nojoch náajal yaan tiʼ teen in kʼaj óoltmail Cristo [Jesusoʼ].» (FILI. 3:8)
1, 2. ¿Baʼax tsʼoʼok u chʼaʼatuklik u beetik jujuntúul sukuʼunoʼob, yéetel baʼaxten?
TU CHICHNIL Roberteʼ jach maʼalob u bintiʼ tu xook. Ka tu tsʼáaj ocho jaʼaboʼob tiʼeʼ, utúul tiʼ u profesoraʼobeʼ bin tu yotocheʼ ka tu yaʼalajtiʼ jeʼel u chukpachtik jeʼel baʼalak u kʼáateʼ, tu yaʼalaj xan tiʼeʼ jach yaan u kiʼimaktal u yóol ken u yil tsʼoʼok u chukik u doctori. Ka nojochchajeʼ láayliʼ jach maʼalob calificacionoʼob ku jóoʼsikeʼ, le oʼolal jeʼel u páajtal kaʼach u yokol xook tiʼ jeʼel máakalmáak universidadileʼ. Baʼaleʼ Roberteʼ tu chʼaʼatuklaj maʼ u bin tu paach le baʼaxoʼob ku tsʼíiboltaʼal tumen u maasiloʼ, baʼaxeʼ tu beetaj u precursor regulari.
2 Jeʼex Roberteʼ, yaʼab sukuʼunoʼob jejeláas u jaʼabiloʼobeʼ tsʼoʼok u yantal u páajtalil u maas kaʼantal u xookoʼob, baʼaleʼ yanoʼobeʼ maʼ tu beetoʼobiʼ, baʼaxeʼ tu maas tsʼáaj u yóol u meyajtoʼob Dios (1 Cor. 7:29-31). ¿Baʼaxten maas ku tsʼáaik u yóoloʼob teʼ meeyjil kʼaʼaytajoʼ? Tumen u yaabiltmoʼob Jéeoba yéetel tumen letiʼobeʼ maas jach koʼoj u yilkoʼob le kaʼansaj ku tsʼáaik Jéeobaoʼ. ¿Tsʼoʼok wa a máansik ta tuukul bix jeʼel u bintech ichil a kuxtal wa maʼ a kʼaj óoltik kaʼach le baʼaxoʼob ku kaʼansik le Bibliaoʼ? Maʼalob ka tuukulnakoʼon tiʼ jujumpʼéel tiʼ le utsiloʼob k-kʼamik yoʼolal le kaʼansaj ku tsʼáaiktoʼon Jéeobaoʼ. Beyoʼ yaan k-maas yaabiltik le maʼalob péektsiloʼ yéetel yaan k-maas tsʼáaik k-óol teʼ kʼaʼaytajoʼ.
Unaj k-kʼamik yéetel kiʼimak óolal u kaʼansajoʼob Jéeoba
3. ¿Bix k-ojéeltik Jéeobaeʼ u kʼáat u kaʼans le kʼeban wíinikoʼoboʼ?
3 Yoʼolal u yutsil Jéeobaeʼ, u kʼáat u kaʼans le kʼeban wíinikoʼoboʼ. Ka tʼaanaj Isaías yoʼolal le máaxoʼob yéeyaʼanoʼob utiaʼal u binoʼob kaʼanoʼ, tu yaʼalaj: «Teneʼ bíin in kaʼambes tuláakal a paalal, tuláakaloʼob bíin yanak yaʼabkach u ayikʼaliloʼob» (Isa. 54:13). Le tʼaanoʼobaʼ ku béeychajloʼob xan tiʼ le uláakʼ u taamanoʼob Cristooʼ (Juan 10:16). ¿Bix k-ojéeltik lelaʼ? Yoʼolal baʼax ku yaʼalik upʼéel profecía táan u béeytal teʼ kʼiinoʼobaʼ. Isaíaseʼ tu yilaj tiʼ upʼéel náay bix u taal yaʼabach máakoʼob tiʼ jejeláas luʼumiloʼob u adorartoʼob Dios. Jeʼex u yaʼalik le profecíaoʼ, letiʼobeʼ ku yaʼalikoʼob: «Koʼoteneʼex, naʼakakoʼon tu wits Yuumtsil, tu [templo] u Dios Jacob, utiaʼal ka u yeʼestoʼon u beeloʼob utiaʼal ka k-xíimbaltej» (Isa. 2:1-3). Jeʼex túun k-ilkoʼ, yaan u kaʼansaʼaloʼob tumen Jéeoba. ¿Máasaʼ jach jatsʼuts le baʼax ken u beetoʼ?
4. ¿Baʼax unaj k-beetik utiaʼal ka kaʼansaʼakoʼon tumen Jéeoba?
4 ¿Baʼax unaj k-beetik utiaʼal ka kaʼansaʼakoʼon tumen Jéeoba? Upʼéel baʼax unaj k-beetkeʼ k-eʼesik kabal óolal yéetel k-chaʼik k-kaʼansaʼal. Le salmista Davidoʼ tu yaʼalaj: «Le Yuumtsiloʼ uts yéetel toj; letiʼeʼ [...] ku bisik tiʼ maʼalob bej le j-kabal óoloʼoboʼ» (Sal. 25:8, 9). Jesús xaneʼ tu yaʼalaj: «Kin kiʼikiʼtʼantikech in Taata, u Yuumtsil kaʼan yéetel luʼum, tumen le baʼaloʼob ta weʼesaj tiʼ le mejen paalaloʼoboʼ ta taʼakaj tiʼ le kaambalnajoʼob yéetel kaʼanal u naʼatoʼoboʼ» (Luc. 10:21). ¿Máasaʼ maʼ talam jeʼel u yaabiltaʼal utúul Dios «ku tsʼáaik u siibal utsil tiʼ le máaxoʼob kabal u yóoloʼoboʼ»? (1 Ped. 5:5.)
5. ¿Bix úuchik k-kʼaj óoltik Dios?
5 ¿Chéen wa t-juunal t-kʼaj óoltaj u jaajil yéetel t-tsʼáaj cuenta letiʼe bej unaj k-xíimbaltikoʼ? Maʼatech; chéen t-juunaleʼ maʼ tu páajtal k-kʼaj óoltik kaʼach Dios. Jesuseʼ tu yaʼalaj: «Mix máak ku páajtal u taal tiʼ teen wa maʼ tu taasaʼal tumen le Taata máax túuxtenoʼ» (Juan 6:44). Jeʼex túun k-ilkoʼ, Jéeoba natsʼik ichil u kaajal le máaxoʼob ku keʼetloʼob yéetel «ayikʼaliloʼo[boʼ]», le máaxoʼob beyoʼob tamanoʼoboʼ; lelaʼ ku beetik ikil u kʼaʼaytaʼal le maʼalob péektsiloʼ bey xan yéetel u yáantaj u kiliʼich muukʼ (Ageo 2:7). ¿Maʼ wa kiʼimak a wóol úuchik u natsʼkech Jéeoba tu yiknal u Hijoiʼ? (Xokaʼak Jeremías 9:23, 24.)
Ku yáantik máak u kʼex u kuxtal
6. ¿Baʼax utsiloʼob ku yilik le máaxoʼob kʼamik le kaʼansaj ku tsʼáaik Jéeobaoʼ?
6 Profeta Isaíaseʼ tʼaanaj tiʼ bix ken u kʼexil u kuxtal yaʼab máakoʼob bejlaʼeʼ. Yaʼab máakoʼob séebaʼan u pʼuʼujloʼob kaʼacheʼ bejlaʼeʼ maʼ beyoʼobiʼ (xokaʼak Isaías 11:6-9). Yaʼab xan máaxoʼob ku pʼektikubaʼob kaʼach yoʼolal u razaʼob wa u luʼumoʼobeʼ tsʼoʼok u kanik u bisubaʼob yéetel kiʼimak óolal. Jeʼel u páajtal u yaʼalaʼaleʼ tsʼoʼok u sutik u espadaʼob bey «u nuʼukulil meya[jeʼ]» (Isa. 2:4). ¿Baʼax áantoʼob u kʼex u kuxtaloʼob? Letiʼe baʼax tsʼoʼok u kanikoʼob tiʼ Jéeobaoʼ yéetel tsʼoʼok u tsʼáaikoʼob ichil u kuxtaloʼoboʼ. Kex le máaxoʼob meyajtik Dios láaj kʼeban wíinkoʼoboʼ ku biskubaʼob tubeel. Bejlaʼeʼ u jejeláasil máaxoʼob kʼamik le maʼalob péektsiloʼ, yéetel le utsil ku kʼamkoʼob ikil u tsʼáaikoʼob ichil u kuxtaloʼoboʼ ku yeʼesik jach maʼalob le kaʼansaj ku tsʼáaik Jéeobaoʼ (Mat. 11:19).
7, 8. 1) ¿Baʼax le «nukuch pakʼil najoʼob» ku nikaʼal tumen le baʼax ku kaʼansik Diosoʼ? 2) ¿Baʼax eʼesik le kaʼansaj ku tsʼáaik Jéeobaoʼ ku beetik u maas tsʼaʼabal nojbeʼenil tiʼ?
7 Apóstol Pabloeʼ tu ketaj le meyaj ku beetik le máaxoʼob meyajtik Dios yéetel upʼéel baʼateloʼ. Letiʼeʼ tu yaʼalaj: «U nuʼukuliloʼob k-baʼateleʼ maʼ yóokʼol kaabiloʼobiʼ, baʼaleʼ u nuʼukuliloʼob k-baʼateleʼ yaan u páajtalil Jajal Dios tiʼob utiaʼal u xuʼulsikoʼob nukuch pakʼil najoʼob. Bey túunoʼ, k-xuʼulsik le tak pooloʼoboʼ bey xan jeʼel baʼalak ka líikʼik yéetel kaʼanal ichil utiaʼal u [xuʼulsik] u kʼaj óoltaʼal Jajal Dioseʼ» (2 Cor. 10:4, 5). ¿Baʼax le «nukuch pakʼil najoʼob» ku nikaʼal tumen le baʼax ku kaʼansik Diosoʼ? Letiʼe baʼaxoʼob maʼ jaajtak ku kaʼansik u maasil religionoʼoboʼ yéetel le «luʼumkabil tuukuloʼob» ku kaʼansaʼaloʼ (Col. 2:8). Le baʼaxoʼob ku kaʼansik Jéeobaoʼ ku yáantik le máaxoʼob kʼamik utiaʼal ka u pʼatoʼob le baʼaloʼob kʼaastakoʼ (1 Cor. 6:9-11). Tsʼoʼoleʼ ku yáantaj utiaʼal u biskuba máak maʼalobil ichil u yotoch yéetel ku tsʼáaik u beelal u kuxtal máak. Lelaʼ letiʼe kaʼansaj jach kʼaʼabéet tiʼ máak teʼ kʼiinoʼobaʼ.
8 Le kaʼansaj ku tsʼáaik Jéeobaoʼ ku yáantik máak u beet baʼax maʼalob, lelaʼ bey u yeʼesik upʼéel baʼax úuchaʼ (Heb. 13:18). Tu luʼumil Indiaeʼ, utúul koʼoleleʼ káaj u xokik le Bibliaoʼ, ka máan kʼiineʼ káaj u jóokʼol kʼaʼaytaj. Utéenjeakil le táan u suut tu yotoch tsʼoʼok u meyaj tiʼ upʼéel u Najil Reino táan u beetaʼaleʼ, tu kaxtaj upʼéel soguilla de oro teʼ tuʼux ku páaʼtaʼal camionoʼ, le soguillaoʼ ku tojoltik 800 dolaroʼob. Kex óotsileʼ tu chʼaʼatuklaj u sutik, ka tu yaʼalaj tiʼ utúul anciano ka láakʼintaʼak u bis tiʼ le policíaʼoboʼ. Le policía tʼaanaj tu yéeteloʼoboʼ jelaʼan úuchik u yilik le baʼax tu beetoʼoboʼ. Uláakʼ utúul policíaeʼ tu kʼáataj tiʼ le x-kʼaʼaytajoʼ baʼaxten tu sutaj le soguillaoʼ, letiʼ túuneʼ tu núukajtiʼ: «Tumen le baʼaxoʼob ku kaʼansik le Bibliaoʼ tsʼoʼok u yáantken in kʼex in kuxtal. Bejlaʼeʼ kin wilik in beetik baʼax maʼalob». Le policía túunoʼ tu yaʼalaj tiʼ le ancianooʼ: «Teʼ tuʼux kajaʼanoʼonaʼ yaan treintaiocho millones u kajnáaliloʼob. Wa ka wáantik kex diez máakoʼob u beetoʼob jeʼex le koʼolelaʼ, lelaʼ upʼéel baʼax jach maʼalob». Le kaʼansaj ku tsʼáaik Jéeobaoʼ tsʼoʼok u yáantik u millonesi máakoʼob u beetoʼob baʼaloʼob maʼalobtak. ¿Máasaʼ lelaʼ ku péekskoʼon k-maas nojbeʼenkúunt Jéeoba?
9. ¿Baʼaxten le máaxoʼob kʼamik le kaʼansajoʼob ku tsʼáaik le Bibliaoʼ jeʼel u páajtal u beetkoʼob kʼeexoʼob ichil u kuxtaloʼobeʼ?
9 U kiliʼich muukʼ Jéeoba bey xan le baʼaxoʼob ku kaʼansik le Bibliaoʼ ku yáantik yaʼabach máakoʼob u kʼex u kuxtaloʼob (Rom. 12:2; Gal. 5:22, 23). Colosailoʼob 3:10 ku yaʼalik: «Búukbe[sabaʼex] yéetel le túumben kuxtaloʼ, tu yoʼolal lelaʼ ku bin a túumbenchajleʼex utiaʼal a béeytaleʼex jeʼel bix le Jajal Dios máax beeteʼexoʼ, tak ken a kʼaj óolteʼex maʼalob letiʼ». Le baʼax ku kaʼansik le Bibliaoʼ ku yáantik máak u yeʼes jach baʼax yaan tu puksiʼikʼal yéetel u kʼex u tuukul (xokaʼak Hebreob 4:12). Tsʼoʼoleʼ ken u naʼat máak le baʼax ku xokik teʼ Biblia yéetel ken joʼopʼok u tsʼáaik ichil u kuxtaleʼ, ku yáantaj utiaʼal ka u bisuba máak yéetel Dios yéetel ka u tsʼáa u fe tiʼ le kuxtal minaʼan u xuuloʼ.
Le kaʼansaj ku tsʼáaik Jéeobaoʼ jeʼel u yáantkoʼon utiaʼal k-salvartikbaeʼ
10. 1) ¿Baʼaxten chéen Jéeoba jeʼel u kaʼansikoʼon k-aktáant le baʼax ku taal u kʼiinoʼ? 2) ¿Baʼaxoʼob jach taʼaytak u yúuchloʼob?
10 Tumen Jéeoba u yojel baʼax taʼaytak u yúuchleʼ, chéen letiʼ jeʼel u páajtal u kaʼanskoʼon utiaʼal k-aktáantikeʼ. Letiʼeʼ tsʼoʼok u yaʼalik baʼax ku taal u kʼiin tiʼ tuláakal máak (Isa. 46:9, 10). Le Bibliaoʼ ku yaʼalikeʼ «¡tsʼoʼok u náatsʼal u noj kʼiinil Yuumtsil!» (Sof. 1:14). Teʼ kʼiin jeʼeloʼ yaan u béeytal le baʼax ku yaʼalik Proverbios 11:4: «Le ayikʼaliloʼ mix baʼal u biilal tu kʼiinil xotʼ kʼiin, baʼaleʼ [u beetik máak baʼax tojeʼ] ku toksaj tiʼ kíimil». Ken xuʼulsaʼak u kʼasaʼan yóokʼol kaab Satanás tumen Dioseʼ chéen máaxoʼob ku biskubaʼob tu yéetel kun salvartbiloʼob. Kex jeʼel bukaʼaj taakʼin ka yanaktoʼoneʼ maʼ ken u yáantoʼon, tumen Ezequiel 7:19 ku yaʼalik: «Bíin u puloʼob tiʼ bejoʼob u plataʼob; bíin u puloʼob u oroʼob jeʼel bix u puʼulul u taʼ míiseʼ». K-ojéeltik lelaʼ ku yáantkoʼon k-chʼaʼatukult maʼalob baʼax ken k-beete.
11. Aʼal upʼéel bix u yáantkoʼon le kaʼansaj ku tsʼáaik Jéeoba utiaʼal k-salvartikbaoʼ.
11 Upʼéel bix u yáantkoʼon le kaʼansaj ku tsʼáaik Jéeoba utiaʼal k-salvartikba tu kʼiinil le xuʼulsajiloʼ letiʼe u yeʼesiktoʼon baʼaxoʼob unaj k-maas tsʼáaik táanil ichil k-kuxtaloʼ. Apóstol Pabloeʼ tu yaʼalaj tiʼ Timoteo: «Le máaxoʼob yaan u ayikʼalil yóokʼol kaab tiʼoboʼ, túuxttiʼob maʼ u kaʼanaltal u yichoʼob, mix u tsʼáaikoʼob u alab óolaloʼob tiʼ le ayikʼaliloʼ, tumen jach máanalbeʼen. Baʼaleʼ ka u tsʼaʼob u alab óolaloʼob tiʼ le kuxaʼan Jajal Diosoʼ». Le baʼax tu yaʼalaj Pabloaʼ jeʼel u yáantkoʼon xan kex maʼ ayikʼaloʼoneʼ. U kʼubik u yóol máak tiʼ Dios maʼ tiʼ le ayikʼaliloʼoboʼ u kʼáat u yaʼal u beetik máak baʼax uts, yéetel u ayikʼaltal «tiʼ maʼalob meyajoʼob». Wa k-tsʼáaik táanil k-meyajtik Dioseʼ yaan «u tsʼáaik tuʼux [k-jéetsʼel] maʼalob utiaʼal le kʼiinoʼob bíin taalakoʼ» (1 Tim. 6:17-19). Wa k-beetik beyoʼ k-eʼesik yantoʼon naʼatil, tumen Jesuseʼ tu yaʼalaj: «¿Baʼax u biil tiʼ máak wa ku náajaltik tuláakal yóokʼol kaab ku tsʼoʼokoleʼ ku saʼatal u [kuxtal]?» (Mat. 16:26, 27). Tumen jach natsʼaʼan u kʼiinil Jéeobaeʼ, cada utúul tiʼ toʼoneʼ maʼalob ka u tukle: «¿Tuʼux táan in líiʼsik ayikʼaliloʼob? ¿U palitsilen wa Dios wa u palitsilen le ayikʼaliloʼoboʼ?» (Mat. 6:19, 20, 24).
12. ¿Baʼaxten maʼ unaj u lúubul k-óol kex yaan máaxoʼob taasik bey mix baʼalil le «maʼalob meyajoʼob» k-beetkoʼ?
12 U kʼaʼaytaʼal u maʼalob péektsilil le Reino yéetel u kaʼansaʼal uláakʼ máakoʼoboʼ táakaʼanoʼob ichil le «maʼalob meyajoʼob» ku yaʼalik le Biblia ka beetaʼakoʼ (Mat. 24:14; 28:19, 20). Baʼaleʼ jeʼex úuchik teʼ yáax siglooʼ, bejlaʼeʼ yaan máaxoʼob taasik bey mix baʼalil le «maʼalob meyajoʼob» k-beetkoʼ (1 Cor. 1:18-21). Baʼaleʼ leloʼ maʼ u kʼáat u yaʼal wa mix baʼal u beelal le maʼalob péektsil k-kʼaʼaytikoʼ mix xan u kʼáat u yaʼal wa maʼ unaj k-kʼaʼaytik teʼ tu tsʼook kʼiinoʼobaʼ (Rom. 10:13, 14). Tsʼoʼoleʼ wa k-áantik u maasil u kʼamoʼob le kaʼansaj ku tsʼáaik Jéeobaoʼ, yaan xan k-kʼamik yaʼab utsiloʼob.
U maas tsʼáaik u yóol máak u meyajt Dioseʼ ku taasik utsiloʼob
13. ¿Baʼax yanchaj u beetik apóstol Pablo tu yoʼolal le maʼalob péektsiloʼ?
13 Tu táankelmil apóstol Pabloeʼ tu kʼamaj upʼéel kaʼansaj jeʼel u yáantik kaʼach utiaʼal ka xiʼik utsil tiʼ ichil le judíoʼoboʼ. Mix 13 jaʼaboʼob yantiʼ ka lukʼ Tarso, u kaajal, ka bin kajtal Jerusalén, teʼeloʼ bin xook tu yiknal Gamaliel, utúul máak jach u kʼaj óol maʼalob le Leyoʼ (Hch. 22:3). Pabloeʼ jach kaambalnaj maʼalob, wa maʼ u pʼatik u kaambaleʼ tsʼoʼok kaʼach u tsʼaʼabal u beet u nojchil ichil le judíoʼoboʼ (Gal. 1:13, 14). Baʼaleʼ le ka tu kʼamaj le maʼalob péektsil yéetel ka káaj u kʼaʼaytajoʼ, tu pʼataj paachil tuláakal lelaʼ. ¿Yaachaj wa tu yóol yoʼolal le baʼax tu beetoʼ? Maʼatech. Letiʼeʼ ku yaʼalik: «Tuláakal baʼax ku páajtal u yantalteneʼ kin tukultikeʼ bey jumpʼéel baʼal minaʼan u tojoleʼ tu tséel le nojoch náajal yaan tiʼ teen in kʼaj óoltmail Cristo Jesús in Yuumtsiloʼ. Tu yoʼolal Cristoeʼ tsʼoʼok in satik tuláakal, sojol in tiaʼalinte» (Fili. 3:8).
14, 15. ¿Baʼax utsiloʼob ku kʼamik le máaxoʼob ku «múul meyaj[oʼob] yéetel Dios[oʼ]»?
14 Jeʼex Pabloeʼ, toʼoneʼ yaan baʼaxoʼob tsʼoʼok xan k-pʼatik tu yoʼolal le maʼalob péektsiloʼ (Mar. 10:29, 30). ¿Yaan wa baʼax ku bineltiktoʼon yoʼolal lelaʼ? Tuukulnakoʼon tiʼ baʼax ku yaʼalik Robert, le máax t-chʼaʼachiʼitaj tu káajbaleʼ, le baʼaxoʼob tu yaʼaloʼ ku yeʼesik bix u tuukul yaʼab sukuʼunoʼob: «Maʼ tu yaatal tin wóol yoʼolal baʼaxoʼob tsʼoʼok in pʼatik. In beetik in precursorileʼ ku taasikten kiʼimak óolal. Tsʼoʼok u yáantken in wil bukaʼaj utsil Jéeoba tin wéetel. Cada ken in pʼat wa baʼax utiaʼal in maas meyajtik Jéeobaeʼ letiʼeʼ ku tsʼáaikten u maas yaʼabil tiʼ le tin pʼatoʼ. Ken tsʼoʼokokeʼ kin wilkeʼ bey maʼ in pʼat mix baʼaleʼ, tumen maas yaʼab baʼax kin kʼamik» (Sal. 34:8; Pro. 10:22).
15 Wa tsʼoʼok u xáantal joʼopʼok a kʼaʼaytik le maʼalob péektsil yéetel a kaʼansik uláakʼ máakoʼobeʼ, maʼ xaaneʼ techeʼ tsʼoʼok xan a wilik bukaʼaj utsil Jéeoba ta wéetel. ¿Tsʼoʼok wa a wilik bix u yáantkech le kiliʼich muukʼ teʼ kʼaʼaytajoʼ? ¿Tsʼoʼok wa a wilik bix u kiʼimaktal u yóol le máakoʼob ken péeksaʼakoʼob u kʼamoʼob le maʼalob péektsiloʼ? (Hch. 16:14.) ¿Tsʼoʼok wa u yáantkech a aktáant wa baʼax talamil utiaʼal a maas táakpajal teʼ kʼaʼaytajoʼ? ¿Tsʼoʼok wa a wilik bix u tsʼáaiktech u muukʼil utiaʼal maʼ xulik a beetik baʼax maʼalob jach teʼ súutukil ka ta wuʼuyaj bey maʼ ta tsaʼayal kaʼachoʼ? (Fili. 4:13.) Ken k-il bix u yáantkoʼon Jéeoba teʼ kʼaʼaytajoʼ, k-kʼuchul k-maas kʼaj óolte yéetel k-maas natsʼikba tu yiknal (Isa. 41:10). ¿Máasaʼ jach nojoch baʼal k-ilik «k-múul meyaj yéetel Dios» utiaʼal k-tsʼáaik kʼaj óoltbil le maʼalob péektsiloʼ? (1 Cor. 3:9, NM.)
16. ¿Baʼax ka tuklik yoʼolal le meyaj ka beetik utiaʼal u bisaʼal le kaʼansaj ku tsʼáaik Dios teʼ kʼiinoʼobaʼ?
16 Yaʼabach máakeʼ ku taaktal u beetik upʼéel baʼax utiaʼal u kʼaʼajsaʼal mantatsʼ. Baʼaleʼ, jeʼex k-ojlileʼ tuláakal baʼax ku beetaʼal teʼ yóokʼol kaabaʼ, kex jach nuuktak wa jatsʼutstakoʼobeʼ ku tuʼubsaʼaloʼob. Baʼaleʼ le baʼaxoʼob ku beetik Jéeoba utiaʼal u nojbeʼenkúuntik u kʼaabaʼoʼ maʼ kun tuʼubsbil mix bikʼin (Pro. 10:7; Heb. 6:10). Le oʼolaleʼ unaj k-ilik jach nojoch baʼal k-bisik le kaʼansaj ku tsʼáaik Dios teʼ kʼiinoʼobaʼ.
¿Baʼax jeʼel a núukikeʼ?
• ¿Baʼax unaj k-beetik utiaʼal ka kaʼansaʼakoʼon tumen Jéeoba?
• ¿Bix k-ojéeltik le kaʼansaj ku tsʼáaik Jéeobaoʼ ku yáantik máak u kʼex bix u kuxtal?
• ¿Baʼax utsiloʼob k-kʼamik ikil k-áantik u maasil u kʼamoʼob le kaʼansaj ku tsʼáaik Diosoʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 23]
Le máaxoʼob ku kaʼansaʼaloʼob tumen Jéeobaoʼ ku biskubaʼob tubeel kex jejeláas u razaʼob
[U tsolajil le oochel teʼ táan juʼun 24]
¿Máasaʼ jach nojoch baʼal k-ilik «k-múul meyaj yéetel Dios»?