¿A jóoʼsmaj wa u yorai utiaʼal a xokik le Bibliaoʼ?

TEʼ JAʼAB máanikoʼ, le Cuerpo Gobernanteoʼ tu tsʼáaj ojéeltbil upʼéel kʼeex beetaʼab tiʼ bix u yantal le muchʼtáambaloʼoboʼ, lelaʼ ku beetik u maas yantal u tiempoi k-xokik le Biblia ich familiailoʼ. Wa taatatsilech bey xan wa maamatsilecheʼ, ilawil a xokik cada semana yéetel a paalal upʼéel baʼax jeʼel u líiʼsik u yóoloʼobeʼ. Wa maʼ tsʼokaʼan a beeleʼ, jeʼel u páajtal a jóoʼsik u tiempoi utiaʼal a xook ta juunaleʼ.

Yaʼab sukuʼunoʼobeʼ tsʼoʼok u yaʼalikoʼob jach kiʼimak u yóoloʼob úuchik u pʼaʼatal upʼéel áakʼab utiaʼal u adorarkoʼob Dios ich familiai. Utúul anciano ku kʼaabaʼtik Kevineʼ * ku yaʼalik: «Tuláakloʼon teʼ múuchʼuliloʼ jach kiʼimak k-óol yoʼolal le kʼeex beetaʼaboʼ. Yaan horaeʼ teen yéetel u maasil ancianoʼobeʼ k-tsikbal tiʼ bix k-xook ich familiai, jeʼex úuchik u yaʼalik le Cuerpo Gobernante ka beetaʼakoʼ».

Jenny, u yatan utúul sukuʼun tsʼaʼan u beet u ancianoi teʼ múuchʼuliloʼ, ku yaʼalik: «Yaan óoxtúul k-hijaʼob: utúuleʼ yaan 15 jaʼaboʼob tiʼ, uláakʼeʼ 11 yéetel u yóoxtúuloʼ 2. Maʼ jach úucheʼ máanoʼon tiʼ upʼéel u múuchʼulil péeksajkʼab tʼaan, le oʼolaleʼ jach yaʼab tiempo ku bisiktoʼon k-líiʼsikba utiaʼal tuláakal le muchʼtáambaloʼoboʼ. Baʼaleʼ yéetel le kʼeex beetaʼabaʼ, yantoʼon uláakʼ upʼéel áakʼab utiaʼal k-adorartik Dios ich familiai».

John yéetel JoAnn, u yatneʼ, precursor regularoʼob, letiʼobeʼ ku yaʼalikoʼob: «Kaʼacheʼ jach talam k-ilik k-jóoʼsik u súutukil utiaʼal k-múul xokik le Biblia cada semanaoʼ, tumen jach yaʼab meyajoʼob k-beetik teʼ múuchʼuliloʼ. Le oʼolaleʼ le kʼeex beetaʼaboʼ k-ilik bey upʼéel siibal ku taal tiʼ Jéeobaeʼ, baʼaleʼ jach unaj k-ilik u meyajtoʼon maʼalob le tiempooʼ».

Tony, utúul xiʼipal maʼ tsʼokaʼan u beel yaan kex 25 jaʼaboʼob tiʼeʼ, u jóoʼsmaj u áakʼabiloʼob martes utiaʼal u xokik le Bibliaoʼ yéetel ku jóoʼsik uláakʼ súutukiloʼob utiaʼal u líiʼskuba yéetel le baʼaxoʼob kun ilbil teʼ muchʼtáambaloʼoboʼ. Letiʼeʼ ku yaʼalik: «Jach kin tsʼíiboltik ka u chuk martes utiaʼal in xook. Kin wilik bey upʼéel áakʼab jach jaʼtseʼ, tumen letiʼe in jóoʼsmaj utiaʼal in tsʼáa tiʼ Jéeobaoʼ. Kin máansik kex kaʼapʼéel hora táan in xokik baʼaxoʼob jeʼel u yáantken in maas bisimba tu yéeteleʼ, tsʼoʼoleʼ tumen maas yanten tiempoeʼ maas ku páajtal in tuukul tiʼ le baʼaxoʼob kin xokik teʼ Bibliaoʼ». ¿Baʼax utsiloʼob tsʼoʼok u kʼamik Tony? Letiʼeʼ ku yaʼalik: «Bejlaʼeʼ le baʼax kin xokikoʼ maas ku kʼuchul tin puksiʼikʼal, jeʼex teʼ libro Perspicaciaoʼ tin xokaj tiʼ bix úuchik u biskuba David yéetel Jonatán, jach yaʼab baʼax tin kanaj tiʼ Jonatán tumen letiʼeʼ maʼ tu kaxtaj chéen u yutsiliʼ. Beyoʼ páajchaj in naʼatik jach baʼax unaj u beetik utúul maʼalob amigo. Jach kin páaʼtik u kʼuchul cada martes utiaʼal in kanik uláakʼ baʼaloʼob jatsʼutstak jeʼex lelaʼ».

Jeʼex túun k-ilkoʼ, tuláakal le máaxoʼob meyajtik Jéeobaoʼ jach jeʼel u jóoʼskoʼob utsil tiʼ le tiempo pʼataʼab utiaʼal k-xokik le Biblia ken adorart Dios ich familiailoʼ.

[Tsolajiloʼob]