«Juulnakeʼex yéetel le kiliʼich muukʼoʼ»
«Juulnakeʼex yéetel le kiliʼich muukʼoʼ»
«Maʼ maʼakʼóoltaleʼex tiʼ baʼax ka beetkeʼex, juulnakeʼex yéetel le kiliʼich muukʼoʼ. Meyajteʼex Jéeoba bey palitsileʼ.» (ROM. 12:11, NM)
1. ¿Baʼaxten ku kʼubik kaʼach le israelitaʼob kíimsbil baʼalcheʼob yéetel uláakʼ siibaloʼoboʼ?
JÉEOBAEʼ jach ku kiʼimaktal u yóol ken k-beet tuláakal le ku páajtal utiaʼal k-eʼesik jach k-yaabiltmoʼ. Úuchjeakileʼ, le israelitaʼoboʼ ku kʼubkoʼob kíimsbil baʼalcheʼob yéetel uláakʼ siibaloʼob jeʼex u yaʼalik u Ley Moisés ka beetaʼakeʼ. Le siibaloʼobaʼ ku meyaj utiaʼal u tsʼáaikoʼob nib óolal tiʼ Dios yéetel utiaʼal ka perdonartaʼak u kʼebanoʼob. Bejlaʼeʼ Jéeobaeʼ maʼatech u kʼáatik ka k-kʼub kíimsbil baʼalcheʼob tiʼ, baʼaleʼ jeʼex u yaʼalik apóstol Pablo teʼ capítulo 12 tiʼ Romailoʼoboʼ, Dioseʼ ku kʼáatik ka k-kʼub uláakʼ siibaloʼob tiʼ. Koʼoneʼex ilik baʼax siibaliloʼob ku kʼáatik.
Kʼub a kuxtaleʼex bey upʼéel kuxaʼan siibaleʼ
2. ¿Baʼax k-ilik beetik yéetel k-kuxtal, yéetel baʼax táakaʼan ichil k-beetik beyoʼ?
2 (Xokaʼak Romailoʼob 12:1, 2.) Teʼ yáax capituloʼob tiʼ Romailoʼoboʼ, Pablooʼ tu yeʼeseʼ maʼ letiʼe baʼax ku beetik le máaxoʼob yéeyaʼanoʼob utiaʼal u binoʼob kaʼan beetik u kʼaʼamloʼoboʼ, baʼaxeʼ u fejoʼob (Rom. 1:16; 3:20-24). Tsʼoʼoleʼ teʼ capítulo 12 ku tsolkeʼ unaj k-kʼubik k-kuxtal bey upʼéel siibal utiaʼal k-tsʼáaik nib óolal tiʼ Jéeobaeʼ. Baʼaleʼ táanileʼ unaj k-kʼexik k-tuukul. ¿Baʼaxten? Tumen tiaʼanoʼon yáanal «u yaʼalmaj tʼaan le kʼeban ku taasik kíimiloʼ» (Rom. 8:2). Le oʼolal unaj k-túumbenkunsik k-kuxtal yéetel k-tuukul, jeʼex u yaʼalik le Biblia ka k-beetoʼ, lelaʼ u kʼáat u yaʼaleʼ unaj k-kʼexik bix k-tuukul bey xan baʼaxoʼob k-tsʼíiboltik (Efe. 4:23). Utiaʼal k-beetik tuláakal lelaʼ, kʼaʼabéettoʼon u yáantaj Dios bey xan u kiliʼich muukʼ. Baʼaleʼ jach unaj xan k-kanáantik maʼ u kʼaskúuntaʼal k-tuukul tumen le bix u tuukul le máakoʼob teʼ kʼasaʼan yóokʼol kaabaʼ bey xan tumen le náaysaj óoloʼoboʼ (Efe. 2:1-3).
3. ¿Baʼaxten k-táakpajal ichil le baʼaxoʼob ku beetaʼal utiaʼal u adorartaʼal Diosoʼ?
3 Pabloeʼ tu yaʼalaj xan ka meyajnaktoʼon k-tuukul utiaʼal k-ilik «le baʼax maʼaloboʼ, baʼax utstutʼaan» Dios «yéetel baʼax jach tubeel». ¿Baʼaxten k-xokik le Biblia sáamsamal yéetel k-tuukul tiʼ baʼax ku yaʼalikoʼ? ¿Baʼaxten k-payalchiʼ? ¿Baʼaxten k-bin teʼ muchʼtáambaloʼob yéetel k-jóokʼol kʼaʼayt u maʼalob péektsilil le Reinooʼ? ¿Chéen wa tumen ku sen aʼaliktoʼon le ancianoʼob ka k-beetoʼ? U jaajileʼ letiʼobeʼ ku líiʼskoʼob k-óol utiaʼal ka k-beete, yéetel k-tsʼáaik u diosboʼotikil tiʼob ilik u beetkoʼob. Baʼaleʼ letiʼe kiliʼich muukʼ péekskoʼon k-eʼes tiʼ Jéeoba jach tu jaajil k-yaabiltmoʼ. Tsʼoʼoleʼ, k-beetik tumen tsʼoʼok k-naʼatik letiʼe baʼax u kʼáat ka k-beetoʼ (Zac. 4:6; Efe. 5:10). Jach ku taasiktoʼon kiʼimak óolal k-ojéeltik Dioseʼ jach ku kiʼimaktal u yóol ken u yil táan k-kuxtal jeʼex u kʼáateʼ.
Jejeláas páajtaliloʼob
4, 5. ¿Bix unaj u meyaj tiʼ le ancianoʼob le páajtalil tsʼaʼantiʼoboʼ?
4 (Xokaʼak Romailoʼob 12:6-8, 11.) Pabloeʼ ku yaʼalikeʼ «Jajal Dioseʼ u tsʼaamajtoʼon jejeláas páajtaliloʼob, jeʼel bix tu yóoltaj u tsʼáa tiʼ cada juntúuleʼ». Yaan máaxeʼ tsʼaʼan páajtalil tiʼ utiaʼal «u líiʼsik u yóol uláakʼoʼob» yéetel utiaʼal u «nuʼuktik bix unaj u beetaʼal wa baʼax», le meyajoʼobaʼ maases letiʼe ancianoʼob beetkoʼ, le oʼolal ku yaʼalaʼaltiʼob ka u yil u beetkoʼob tubeel.
5 Pabloeʼ ku yaʼalikeʼ le ancianoʼoboʼ unaj u kaʼansajoʼob yéetel unaj u meyajtkoʼob u maasil. ¿Máaxoʼob túun le unaj u meyajtkoʼoboʼ? Yoʼolal le baʼaxoʼob tu yaʼaloʼ k-ilkeʼ letiʼe sukuʼunoʼob teʼ múuchʼuliloʼ, letiʼeʼ tu ketoʼob yéetel jumpʼéel «wíinklil» (Rom. 12:4, 5). U libroi Beetaʼanoʼob 6:4 ku tʼaan tiʼ baʼax tu beetaj le apostoloʼoboʼ: «Toʼon túuneʼ; k-kʼubikba utiaʼal k-payalchiʼ yéetel utiaʼal k-kaʼansik u maʼalob péektsil Jajal Dios» wa «utiaʼal k-meyajtik u maasil, NM». Ichil le meyaj tu beetoʼobaʼ táakaʼan le úuchik u líiʼskoʼob u yóol le sukuʼunoʼob teʼ múuchʼuliloʼ. K-ilik túuneʼ le ancianoʼoboʼ ku meyajtkoʼob u maasil ken u kaʼansoʼob. Wa ku xakʼal xookoʼob yéetel ku payalchiʼobeʼ yaan u páajtal yáantkoʼob, u kaʼanskoʼob yéetel u kanáantkoʼob le sukuʼunoʼoboʼ. Unaj u yilik u meyajtiʼob le páajtalil tsʼaʼantiʼob utiaʼal u kanáantkoʼob le múuchʼulil «yéetel kiʼimak óolal[oʼ]» (Rom. 12:7, 8; 1 Ped. 5:1-3).
6. ¿Bix jeʼel u páajtal k-beetik le baʼax ku yaʼalik Romailoʼob 12:11 le tuʼux jóoʼsaʼan le xookaʼ?
6 Pabloeʼ ku yaʼalik xan: «Maʼ maʼakʼóoltaleʼex tiʼ baʼax ka beetkeʼex, juulnakeʼex yéetel le kiliʼich muukʼoʼ. Meyajteʼex Jéeoba bey palitsileʼ». Wa k-ilik táan u pʼáatal maʼ k-jach tsʼaamaj k-óol teʼ meeyjil kʼaʼaytajoʼ, maʼ xaaneʼ unaj k-ilik wa táan k-jóoʼsik u súutukil utiaʼal k-xook yéetel wa k-kʼáatik u kiliʼich muukʼ Jéeoba mantatsʼ. Beyoʼ maʼ kun pʼíittal k-meyajtik Jéeoba, baʼaxeʼ yaan k-maas tsʼáaik k-óol meyajte (Luc. 11:9, 13; Apo. 2:4; 3:14, 15, 19). Le kiliʼich muukʼoʼ tu yáantaj le yáax cristianoʼob utiaʼal ka tʼaanakoʼob tiʼ «u kiʼichkelem meyajoʼob Jajal Dios[oʼ]» (Hch. 2:4, 11). Bejlaʼa xaneʼ jeʼel u yáantkoʼon utiaʼal ka k-beet tuláakal le ku páajtal utiaʼal ka maas táakpajkoʼon teʼ meeyjil kʼaʼaytajoʼ.
Unaj k-eʼesik kabal óolal
7. ¿Baʼaxten unaj k-eʼesik kabal óolal?
7 (Xokaʼak Romailoʼob 12:3, 16.) Jeʼel baʼalak páajtalil yantoʼoneʼ u «siibal utsil» Jéeoba. Pabloeʼ tu yaʼalaj tiʼ le corintoiloʼoboʼ: «Tuláakal baʼax k-beetikeʼ tiʼ Jajal Dios u taal» (2 Cor. 3:5). Le oʼolaleʼ maʼ unaj k-nojbaʼalkúuntikba yoʼolal le meyajoʼob k-beetkoʼ. Unaj k-ilkeʼ tuláakal le meyajoʼob tsʼaʼantoʼon k-beet ichil u kaajal Diosoʼ, maʼ chéen tumen jach k-ojel k-beet le oʼolal tsʼaʼantoʼoniʼ, baʼaxeʼ tsʼaʼantoʼon chéen tumen ku yeʼesik u yutsil Dios tiʼ toʼon (1 Cor. 3:6, 7). Pabloeʼ ku yaʼalik: «Mix juntúul ka u tukult tu yoʼolaleʼ maanal tiʼ le unaj u tukultikoʼ». U jaajileʼ ku kiʼimaktal u yóol máak ken tsʼaʼabak upʼéel meyaj u beete. Baʼaleʼ maʼ unaj u tuʼubul tiʼ máakeʼ yaan baʼaxoʼob maʼ tu páajtal u beetik, lelaʼ ku yáantaj utiaʼal maʼ u tuklik chéen letiʼ beetik jach maʼalob tuláakal. Utúul máax meyajtik Dioseʼ «unaj u tuukul yéetel kabal óolal».
8. ¿Baʼax jeʼel u yáantkoʼon utiaʼal maʼ k-tuklik «jach kaambalnajaʼan[oʼoneʼ]»?
8 Maʼ maʼalob ka k-taasba nojbaʼalil yoʼolal le meyajoʼob k-beetik teʼ múuchʼuliloʼ, tumen Dios tsʼaamiltoʼon ka k-beete (1 Cor. 3:7). Pabloeʼ tu yaʼaleʼ tiʼ cada utúul sukuʼun wa kiikeʼ ku tsʼaʼabal meyaj u beet «jeʼel bix u pʼiʼisil le oksaj óolal tsʼaʼantiʼ tumen Jajal Diosoʼ». Le oʼolaleʼ, maʼ unaj k-tuklik wa maas maʼaloboʼon tiʼ u maasiliʼ, baʼaxeʼ unaj k-kʼaʼajskeʼ cada utúuleʼ ku beetik le bukaʼaj ku páajtaleʼ. Pabloeʼ tu yaʼalaj xan: «Bisabaʼex maʼalob ta baatsileʼex». Tiʼ uláakʼ cartaeʼ ku yaʼalikeʼ maʼ k-beetik «mix baʼal chéen utiaʼal [k-utsil]», baʼaxeʼ ka k-il yéetel kabal óolal u maasil «bey [maas] maʼaloboʼob» tiʼ toʼoneʼ (Fili. 2:3). U jaajileʼ kʼaʼabéet kabal k-óol utiaʼal k-ilik yaan tiʼ baʼax maas maʼalob u maasil sukuʼunoʼob tiʼ toʼon. Baʼaleʼ lelaʼ jeʼel u yáantkoʼon utiaʼal maʼ k-tuklik «jach kaambalnajaʼan[oʼoneʼ]». Maʼ xaaneʼ le máaxoʼob tsʼaʼan upʼéel nojoch meyaj u beetoʼob ichil u kaajal Diosoʼ, k-ilik yaan hora bey maas maʼalob bix u tratartaʼaloʼobeʼ, baʼaleʼ tuláakloʼon unaj u kiʼimaktal k-óol yéetel jeʼel baʼalak meyajil tsʼaʼantoʼon k-beet, kex yaan kʼiin maʼatech u yilaʼal tumen u maasileʼ (1 Ped. 5:5).
Unaj k-múuchʼ meyaj
9. ¿Baʼaxten tu ketaj Pablo le máaxoʼob yéeyaʼanoʼob utiaʼal u binoʼob kaʼan yéetel upʼéel wíinkliloʼ?
9 (Xokaʼak Romailoʼob 12:4, 5, 9, 10.) Pabloeʼ tu ketaj le máaxoʼob yéeyaʼanoʼob utiaʼal u binoʼob kaʼan yéetel upʼéel wíinklil ku chaʼik u nuʼuktaʼaloʼob tumen u pooloʼ (Col. 1:18). Jeʼex upʼéel wíinklil yaan yaʼab u xéexetʼal yéetel cada upʼéel yaanal u meyajeʼ, le máaxoʼob yéeyaʼanoʼob utiaʼal u binoʼob kaʼanoʼ, kex yaʼaboʼobeʼ, chéen jumpʼéeliliʼ wíinklil nupaʼanoʼob tiʼ Cristo, u Pooliloʼob. Pabloeʼ tu yaʼalaj tiʼ le sukuʼunoʼob yanoʼob Efesooʼ: «Unaj k-chʼíijil tiʼ tuláakal baʼal nupaʼanoʼon tiʼ Cristo, máax u poolil le wíinkliloʼ. Tu yoʼolal Cristoeʼ tuláakal le wíinkliloʼ maʼalob taablil yéetel kʼaxaʼanil tu baatsil tu yoʼolal nupaʼanil tuláakal u xéexetʼaloʼob; yéetel wa cada junxéetʼ le wíinklil ku meyaj maʼaloboʼ, tuláakal ku bin u nojochtal yéetel ku bin u chʼíijil ich yaakunaj» (Efe. 4:15, 16).
10. ¿Máaxoʼob unaj u yuʼubaʼal u tʼaanoʼob tumen le «uláakʼ j-tamanoʼob[oʼ]»?
10 Kex le «uláakʼ tamanoʼob» maʼ táakaʼanoʼob ichil u «wíinklil» Cristoeʼ, yaan baʼax ku kanikoʼob tiʼ le baʼax tu yaʼalaj Pablooʼ (Juan 10:16). Letiʼeʼ tu yaʼaleʼ Jéeobaeʼ «tu tsʼáaj tuláakal baʼal yáanal u yook Cristo, yéetel Cristoeʼ tsʼaʼab tiʼ le [múuchʼuliloʼ] jeʼel bix u pool tuláakal baʼaleʼ» (Efe. 1:22). Ichil le baʼaxoʼob u tsʼaamaj Dios yáanal u nuʼuktaj u Hijooʼ, tiaʼan le uláakʼ tamanoʼoboʼ. Tsʼoʼoleʼ, le u múuchʼ máakoʼobaʼ tiaʼanoʼob xan ichil «tuláakal baʼax yaan tiʼ» le Hijo tu kʼubaj tiʼ «le palitsil chúukpajaʼan u yóol yéetel yaan u naʼat[oʼ]» (Mat. 24:45-47). Bey túunoʼ, le máaxoʼob táan u páaʼtik u kuxtaloʼob utiaʼal minaʼan u xuul way Luʼumaʼ, unaj u chaʼik u nuʼuktaʼaloʼob tumen Jesús, bey u Pooliloʼobeʼ. Tsʼoʼoleʼ unaj xan u beetkoʼob baʼax ku yaʼalik le palitsil chúukpajaʼan u yóol yéetel yaan u naʼatoʼ, le Cuerpo Gobernanteoʼ bey xan le ancianoʼoboʼ (Heb. 13:7, 17). Tuláakal lelaʼ ku yáantaj utiaʼal ka múuchʼ meyajnak tuláakal le sukuʼunoʼob teʼ múuchʼuliloʼ.
11. 1) ¿Baʼax péekskoʼon múuchʼ meyaj? 2) ¿Baʼax uláakʼ tsolnuʼukiloʼob tu tsʼáaj Pablo?
11 Le yaabilajoʼ ku péeksik máak utiaʼal ka múuchʼ meyajnak, tumen le yaabilajoʼ «ku nupik [...] tuláakal baʼal» (Col. 3:14). Teʼ capítulo 12 tiʼ Romailoʼoboʼ, Pabloeʼ tu yaʼaleʼ unaj k-eʼesik yaabilaj yéetel «x-maʼ kaʼapʼéel ichil», yéetel unaj k-eʼesik u «yaakunajil sukuʼuntsiloʼob», tsʼoʼoleʼ tu yaʼalaj: «Unaj a yaabiltikabaʼex ta baatsileʼex». Tuláakal lelaʼ ku yáantaj utiaʼal u paklan biskuba máak tubeel. Le apostoloʼ tu yaʼalaj xan: «Táanilkunteʼex uláakʼoʼob yéetel ka a [tsikabaʼex] ta baatsileʼex». Baʼaleʼ, maʼ unaj k-mutsʼik k-ich tiʼ baʼaxoʼob maʼ maʼalobtak ku beetaʼal teʼ múuchʼuliloʼ. Baʼaxeʼ unaj k-ilik u pʼáatal limpioi mantatsʼ. Le oʼolaleʼ, Pabloeʼ tu yaʼalaj tiʼ le máaxoʼob eʼesik yaabilajoʼ: «Pʼekteʼex le kʼaasoʼ, beeteʼex le utsoʼ».
Unaj k-kʼamik tubeel le máaxoʼob xíimbaltkoʼonoʼ
12. ¿Baʼax ku kaʼansiktoʼon le baʼax tu beetaj le sukuʼunoʼob yanoʼob Macedoniaoʼ?
12 (Xokaʼak Romailoʼob 12:13.) Le yaabilajoʼ ku péekskoʼon k-beet tuláakal le ku páajtal utiaʼal k-áantik k-sukuʼunoʼob yéetel baʼaxoʼob kʼaʼabéettiʼoboʼ. Kex yaan kʼiin chéen upʼíit baʼaxoʼob yantoʼoneʼ, maʼalob ka k-jóoʼs upʼíit utiaʼal k-tsʼáaiʼ. Pabloeʼ tu yaʼalaj tiʼ le sukuʼunoʼob yanoʼob Macedoniaoʼ: «Le baʼaloʼob talamtak úuchtiʼob tu taasaj jumpʼéel nojoch túuntaj óolal tiʼobeʼ, jach kiʼimak u yóoloʼob, ku tsʼoʼokoleʼ kex tumen jach táaj óotsiloʼobeʼ tu tsʼáajoʼob u siibaloʼob yéetel kiʼ óolal bey ayikʼaloʼobeʼ. Teen jaajkúuntik, tu jaajil u yóoloʼobeʼ, tu tsʼáajoʼob jeʼel bix ku páajtaloʼobeʼ yéetel maas yaʼab tiʼ le ku páajtaloʼobeʼ. Tu jach kʼáat óoltoʼobtoʼon ka k-chaʼa u yáantajoʼob utiaʼal le sukuʼunoʼob [yanoʼob Judeaoʼ]» (2 Cor. 8:2-4). Kex óotsiloʼobeʼ, jach tu yeʼesaj u yutsiloʼob. Jach kiʼimakchaj u yóoloʼob úuchik u yáantkoʼob le sukuʼunoʼob yanoʼob Judeaoʼ.
13. ¿Baʼax u kʼáat u yaʼal le tʼaan «kʼameʼex maʼalob le máaxoʼob ku xíimbaltikeʼexoʼ»?
13 Le tʼaan griego ku suʼutul «kʼameʼex maʼalob le máaxoʼob ku xíimbaltikeʼexoʼ» ku tsʼáaik naʼatbil u péek máak u beet kex maʼatech u kʼáataʼaltiʼ. Le Biblia Le Tumben Nuptʼanoʼ ku yaʼalik: «Kʼameʼex ta naileʼex uʼulaʼob». Upʼéel bix jeʼel k-beetik le baʼax ku yaʼalik le tekstoaʼ letiʼe k-invitartik wa máax janal t-otochoʼ, lelaʼ upʼéel bix u yeʼesaʼal yaabilaj. U jaajileʼ yaan uláakʼ bix jeʼel u páajtal k-kʼamik maʼalob le máaxoʼob xíimbaltkoʼonoʼ. Baʼaleʼ wa maʼ tu páajtal k-invitartik janal wa máaxeʼ, maʼ xaaneʼ jeʼel u páajtal k-invitartik u yukʼ kʼeyem, refresco wa café. Leloʼ táakaʼan ichil u kʼamik máak le máaxoʼob xíimbaltikoʼ.
14. 1) ¿Baʼax kaʼapʼéel tʼaanil ku meyaj ich griego utiaʼal u suʼutul le tʼaan «kʼameʼex maʼalob le máaxoʼob ku xíimbaltikeʼexoʼ»? 2) ¿Bix jeʼel k-eʼesik yaabilaj tiʼ le j-táanxel luʼumiloʼoboʼ?
14 U kʼamik máak maʼalob le máaxoʼob ku xíimbaltikoʼ ku chíikbesik baʼax tuukulil yantiʼ. Ich griegoeʼ ku meyaj kaʼapʼéel tʼaanoʼob utiaʼal u yaʼalaʼal lelaʼ, yáaxeʼ «yaabilaj», uláakʼoʼ «máax maʼ kʼaj óolaʼaniʼ». Toʼoneʼ, ¿k-eʼesik wa yaabilaj tiʼ le máaxoʼob maʼ k-kʼaj óoloʼob, jeʼex le máaxoʼob táanxel luʼumil u taaloʼoboʼ? Le sukuʼunoʼob ku yilik u kankoʼob le tʼaan ku beetik le j-táanxel luʼumiloʼob yanoʼob teʼ tuʼux ku kʼaʼaytajoʼoboʼ ku yeʼeskoʼob táan u kʼamkoʼob maʼalob le máaxoʼob maʼ u kʼaj óoloʼoboʼ. U jaajileʼ maʼ tuláakloʼon jeʼel u páajtal k-beetik beyoʼ. Baʼaleʼ jeʼel u páajtal u meyajtoʼon le folleto Buenas nuevas para gente de todas las naciones, utiaʼal k-áantkoʼob, le folletoaʼ ku taasik le maʼalob péektsil ich jejeláas tʼaaniloʼoboʼ. ¿Yaan wa máax tsʼoʼok a wáantik yéetel le folletoaʼ?
Unaj k-naʼatik bix u yuʼubikuba u maasil
15. ¿Bix úuchik u beetik Jesús le baʼax ku yaʼalik Romailoʼob 12:15?
15 (Xokaʼak Romailoʼob 12:15.) Le baʼax tu yaʼalaj Pablo teʼ versiculoaʼ ku yeʼesik u kʼaʼabéetil k-naʼatik bix u yuʼubikuba u maasil. Ken k-il kiʼimak u yóoloʼob wa yaachajaʼan u yóoloʼobeʼ k-uʼuyikba xan beyoʼ. Wa k-tsʼáaik k-óol áantajeʼ, uláakʼ máakoʼobeʼ yaan u tsʼáaikoʼob cuenta k-kʼáat u yutsiloʼob yéetel k-naʼatik bix u yuʼubkubaʼob. Jesuseʼ bey tu beetiloʼ. Letiʼeʼ múul kiʼimakchaj u yóol yéetel le 70 disipuloʼob tu túuxtoʼob kʼaʼaytajoʼ. Le ka tu tsikbaltoʼob bix biniktiʼobeʼ, «sen kiʼimakchaj u yóol Jesús tu yoʼolal kiliʼich [muukʼ]» (Luc. 10:17-21). Baʼaleʼ le ka kíim Lázaro, u amigoeʼ, okʼolnaj yéetel le máaxoʼob ku yokʼoloʼoboʼ (Juan 11:32-35).
16. ¿Bix jeʼel k-eʼesik naʼatik bix u yuʼubkuba u maasileʼ, yéetel máaxoʼob maases unaj u beetkoʼob?
16 Unaj k-ilik beetik jeʼex tu beetil Jesusoʼ. Unaj u kiʼimaktal k-óol yéetel le sukuʼunoʼob kiʼimak u yóoloʼoboʼ, baʼaleʼ unaj u yaatal k-óol yéetel le ku muʼyajoʼoboʼ. Le baʼax jeʼel u yáantik utúul sukuʼun táan u muʼyajoʼ letiʼe ka k-uʼuy baʼax ku yaʼalikoʼ yéetel ka k-il naʼatik bix u yuʼubikuba. Maʼ xaaneʼ, yaan kʼiineʼ k-okʼol yéetel le ku muʼyajoʼob ken joʼopʼok u yaʼalikoʼob baʼax ku yúuchultiʼoboʼ (1 Ped. 1:22). Le ancianoʼoboʼ jach unaj u yilik u naʼatkoʼob bix u yuʼubkuba u maasil, jeʼex tu yaʼalil apóstol Pablooʼ.
17. ¿Baʼax t-kanaj teʼ capítulo 12 tiʼ Romailoʼoboʼ, yéetel baʼax ken k-kan teʼ tuláakʼ xookoʼ?
17 Le versiculoʼob tsʼoʼok xakʼaltik tiʼ le capítulo 12 tiʼ Romailoʼoboʼ ku taaskoʼob tsolnuʼukoʼob unaj k-tsʼáaik ichil k-kuxtal sáamsamal yéetel jeʼel u yáantkoʼon k-bisba tubeel yéetel k-sukuʼunoʼobeʼ. Teʼ tuláakʼ xookoʼ yaan k-xakʼaltik uláakʼ versiculoʼob tiʼ le capítulo 12, leloʼobaʼ yaan u yáantkoʼon k-il bix unaj k-tratartik le máaxoʼob maʼatech u meyajkoʼob Diosoʼ wa le máaxoʼob chʼaʼapachkoʼonoʼ.
Kʼaʼajsaj
• ¿Bix jeʼel k-eʼesik táan k-juul yéetel le kiliʼich muukʼoʼ?
• ¿Baʼaxten kʼaʼabéet k-meyajtik Dios yéetel kabal óolal?
• ¿Bix jeʼel k-eʼesik k-naʼatik bix u yuʼubkuba k-sukuʼunoʼobeʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 4]
¿Baʼaxten k-táakpajal ichil baʼaxoʼob ku beetaʼal utiaʼal u adorartaʼal Dios?
[U tsolajil le oochel teʼ táan juʼun 6]
¿Bix jeʼel k-áantik le j-táanxel luʼumiloʼob utiaʼal ka u kʼaj óoltoʼob le maʼalob péektsiloʼ?