Kʼáatchiʼob ku beetaʼal

¿Baʼax ku kaʼansiktoʼon le baʼax ku yaʼalik Proverbios 24:27?

U libroi Proverbioseʼ ku yaʼalik tiʼ le táankelem paaloʼoboʼ: «Táan óolt a baʼalubaʼob bej, beet xan u meeyjuloʼob a kool, ku tsʼoʼokoleʼ beyoʼ jeʼel u páajtal a beetik a najileʼ». ¿Baʼax u kʼáat u yaʼal le versiculoaʼ? U kʼáat u yaʼaleʼ le táankelem paaloʼ unaj u tuukul tiʼ baʼax ku páaʼtaʼal tiʼ utúul máax tsʼokaʼan u beel, lelaʼ unaj u beetik táanil tiʼ u tsʼoʼokol u beel.

Ku tuklaʼal kaʼacheʼ le versiculoaʼ táan u yaʼalikeʼ le taatatsiloʼ maʼ chéen unaj u tsʼáaik baʼax kʼaʼabéet ichil u familiaiʼ, jeʼex le baʼaxoʼob utiaʼal jaantbiloʼ, baʼaxeʼ kʼaʼabéet xan u «beetik [u] najil», wa u líiʼsik u yóol u familia yéetel u yáantik u maas yaabiltoʼob Dios. Kex tu jaajil kʼaʼabéet u beetaʼal tumen le taatatsil le baʼaloʼobaʼ, le versiculoaʼ yaanal tiʼ baʼax ku tʼaan. ¿Baʼaxten k-aʼalik lelaʼ? Koʼox ilik kaʼapʼéel baʼax oʼolal.

Yáaxeʼ, le tʼaan hebreo ku suʼutul «a beetik a najil», jeʼel u tsʼáaik naʼatbil u jach beetaʼal upʼéel najeʼ, baʼaleʼ jeʼel xan u tsʼáaik naʼatbil u tsʼoʼokol u beel máak yéetel u yantal u paalaleʼ. U jaajileʼ, le proverbioaʼ maʼ táan u chʼaʼachiʼitik utúul máax tsʼokaʼan u beeliʼ, baʼaxeʼ táan u tʼaan tiʼ utúul máax ku tuklik u tsʼoʼokol u beel.

U kaʼapʼéeleʼ, le versiculooʼ táan u yaʼalik ka beetaʼak tuláakal baʼal tu tsoolol. Óoliʼ jeʼex ka u yaʼal: «Táanileʼ beet lelaʼ, ku tsʼoʼoleʼ ka beetik le uláakʼ upʼéelaʼ». Tsʼoʼoleʼ le proverbiooʼ maʼ táan u yaʼalik ka tsʼaʼabak táanil u kaxtaʼal baʼaxoʼob kʼaʼabéet tiʼ máak yéetel ka pʼaʼatak paachil u meyajtaʼal Diosiʼ.

Úuchjeakileʼ, wa utúul máak taak u «beetik [u] najil», wa taak u tsʼoʼokol u beeleʼ, táanileʼ unaj u tuklik wa jeʼel u páajtal u kanáantik yéetel u tsʼáaik baʼaxoʼob kʼaʼabéet tiʼ u yatan yéetel tiʼ u paalal ken yanakeʼ. Táanil tiʼ u tsʼoʼokol u beeleʼ unaj u yáax meyajtik u kool. Le oʼolaleʼ upʼéel Bibliaeʼ bey u sutik le proverbioaʼ: «Táanil tiʼ a beetik a wotocheʼ beet a kool yéetel ilawil wa a beetmaj a meyaj tu tsoolol» (La Palabra de Dios para Todos). ¿Láayliʼ wa unaj u beetaʼal le baʼax ku yaʼalik le proverbioaʼ?

Láayliʼeʼ. Le máax taak u tsʼoʼokol u beeleʼ unaj u yáax ilik wa jeʼel u páajtal u tsʼoʼokbesik tuláakal le baʼaxoʼob ku kʼáataʼal tiʼ le máaxoʼob tsʼokaʼan u beeloʼoboʼ. Wa tʼaʼaj yéetel toj u yóoleʼ unaj u meyaj. Tsʼoʼoleʼ kʼaʼabéet u tsʼáaik baʼaxoʼob kʼaʼabéet tiʼ u familia, le Bibliaoʼ ku yaʼalikeʼ letiʼe íichamtsil unaj u tsʼáaik baʼaxoʼob kʼaʼabéet ichil u yotochoʼ yéetel letiʼ unaj u yilik u yáantkoʼob u maas tsʼáa u yóoloʼob u meyajtoʼob Dios, wa maʼ u beetkeʼ maas kʼaas yanil tiʼ utúul máax minaʼan u fe (1 Tim. 5:8). Le oʼolal le táankelem paal taak u tsʼoʼokol u beeloʼ, maʼalob ka u tukle: «¿Jeʼel wa u páajtal in tsʼáaik baʼax kʼaʼabéet tiʼ in watan yéetel tiʼ in paalaleʼ? ¿Jeʼel wa u páajtal in wáantkoʼob utiaʼal ka u maas tsʼáa u yóol u meyajtoʼob Dioseʼ? ¿Jeʼel wa u páajtal in nuʼuktik mantatsʼ le xook ich familiailoʼ?». Le Bibliaoʼ ku yaʼalikeʼ jach unaj u beetaʼal le baʼaloʼobaʼ (Deu. 6:6-8; Efe. 6:4).

Le oʼolaleʼ le xiʼipalaloʼob taak u tsʼoʼokol beeloʼoboʼ jach unaj u tuukuloʼob tiʼ le baʼax ku kaʼansik Proverbios 24:27. Baʼaleʼ le koʼoleloʼob xanoʼ unaj u tuklikoʼob wa jeʼel u páajtal u tsʼoʼokbesikoʼob le baʼax ku kʼáatal tiʼ utúul atantsil yéetel tiʼ utúul maamatsiloʼ. Tsʼoʼoleʼ wa utúul íichamtsil yéetel u yatan ku tuklik u yantal u paalaloʼobeʼ, unaj u jach ilkoʼob wa jeʼel u páajtal u líiʼskoʼob tubeeleʼ (Luc. 14:28). U beetaʼal baʼax ku yaʼalik Dios utiaʼal le kuxtal ich familiailoʼ ku yáantaj utiaʼal maʼ u sen yantal talmil tiʼob yéetel ka yanak kiʼimak óolal ichiloʼob.

[U tsolajil le oochel teʼ táan juʼun 12]

¿Baʼax unaj u tuklik utúul táankelem paal wa taak u tsʼoʼokol u beel?