Le adoración ich familiailoʼ jach kʼaʼabéet utiaʼal k-salvartikba

¿JEʼEL wa u páajtal a máansik ta tuukul bix le «u baʼatelil u nojoch kʼiinil [...] Jajal Dios, tiʼ máax yaan tuláakal páajtalil[oʼ]»? (Apo. 16:14.) Profeta Miqueaseʼ tu yaʼalaj jach baʼaxoʼob kun úuchul teʼ kʼiin jeʼeloʼ: «Bíin yíibik le puʼukoʼoboʼ jeʼel bix u yíibil kib tsʼaʼan teʼ kʼáakʼoʼ, le táax kʼóom luʼumoʼob xanoʼ bíin jeʼepajak kaʼa búujil jeʼel bix u buʼujul tumen u yáalkab sen yaʼab jaʼeʼ» (Miq. 1:4). ¿Baʼax kun úuchul tiʼ le máaxoʼob maʼatech u adorartkoʼob Jéeobaoʼ? Yaan u xuʼulsaʼal tiʼob. Le Bibliaoʼ ku yaʼalik: «Le máaxoʼob [kun kíimsbil tumen] Yuumtsil tiʼ le kʼiinoʼ, bíin pʼáatakoʼob jayakbal tu nakʼliloʼob le luʼumaʼ» (Jer. 25:33).

Le oʼolal le taatatsiloʼob, tak le chéen tu juunaloʼob ku líiʼsik u paalaloʼoboʼ, unaj u tuklikoʼob wa yaan u salvartikuba u paalal tsʼoʼok u chan nuuktaloʼoboʼ. Le Bibliaoʼ ku yaʼalikeʼ yaan u chʼaʼabal en cuentai kaʼapʼéel baʼal utiaʼal u salvarkubaʼob: yaan u yilaʼal wa ku tsʼáaik u yóol u meyajtoʼob Dios bey xan jaypʼéel jaʼab yantiʼob (Mat. 24:21).

¿Baʼaxten jach unaj u jóoʼsik máak u tiempoi utiaʼal u adorartik Jéeoba ich familiai?

Taatatsileʼex, unaj a beetkeʼex tuláakal le ku páajtal utiaʼal a líiʼsik a paalaleʼex «tiʼ jumpʼéel toj kuxtal yéetel tiʼ u kaʼansajil Yuumtsil» (Efe. 6:4). U jaajileʼ maʼ chéen kunel u kʼaʼajsaʼal tiʼ máak u kʼaʼabéetil u xokik le Biblia yéetel u paalaloʼ. K-tsʼíiboltik ka beetaʼak tumen le táankelem paalal jeʼex le sukuʼunoʼob yanoʼob kaʼach Filiposoʼ, Pabloeʼ tu yaʼalajtiʼobeʼ jach tu jaajil u yóoloʼob táan u meyajtkoʼob Jéeoba. Tu yaʼalajtiʼob: «Sukuʼuneʼex, jeʼel bix ta tsʼoʼokbesajileʼex in tʼaan mantatsʼ le ka yanjien ta wéeteleʼexoʼ, tsʼoʼokbeseʼex in tʼaan maas maʼalob bejelaʼa náach yanen tiʼ teʼexoʼ. Tsʼáa a wóoleʼex [utiaʼal a salvartikabaʼex] yéetel kabal óolal yéetel sajakil» (Fili. 2:12).

A paalaloʼobeʼ, ¿ku beetkoʼob wa baʼax utstutʼaan Jéeoba wa minaʼanech tu yiknaloʼob? ¿Ku beetkoʼob wa baʼax maʼalob tu escuelaʼob? ¿Bix jeʼel a wáantkoʼob u yiloʼobeʼ maas maʼalob ka u beetoʼob baʼax ku yaʼalik Jéeoba kex minaʼanech tu yiknaloʼob?

Le adoración ich familiailoʼ jeʼel u yáantik a paalal utiaʼal ka muʼukʼaʼanchajak u fejoʼobeʼ. Koʼox ilik óoxpʼéel baʼal jeʼel u yáantaj utiaʼal a maas jóoʼskeʼex utsil ken xooknakeʼex ich familiaileʼ.

Maʼ u xuʼulul a beetik

Le Bibliaoʼ ku yaʼalikeʼ Dioseʼ u tsʼaamaj u súutukil utiaʼal u muchʼik le angeloʼoboʼ (Job 1:6). Techeʼ jeʼel u páajtal a beetik xan beyoʼ. Jóoʼs u kʼiinil yéetel u yorai utiaʼal le Adoración ich Familiailoʼ. Tsʼoʼoleʼ yéey uláakʼ kʼiin utiaʼal a xookeʼex wa maʼ tu béeytal teʼ kʼiin a yáax jóoʼsmeʼexoʼ.

Baʼaleʼ, ken máanak kʼiineʼ, maʼ xaaneʼ jeʼel u pʼáatal chéen wa baʼax kʼiin ka xookeʼex ich familiaileʼ, le oʼolal jach unaj a wilik maʼ u xuʼulul a beetkeʼex. Maʼ u tuʼubultecheʼ a paalaleʼ letiʼe j-xoknáaloʼob maas unaj a tsʼáaik a wóol a kaʼansoʼoboʼ yéetel letiʼob le maas séeb jeʼel u lúubloʼob teʼ léechoʼob ku tsʼáaik Satanasoʼ (1 Ped. 5:8). Wa ku pʼáatal maʼ xookeʼex ich familiai chéen utiaʼal a chaʼantkeʼex televisión wa chéen utiaʼal a beetkeʼex uláakʼ wa baʼax maʼ jach kʼaʼananeʼ, leloʼ ku yeʼesikeʼ tsʼoʼok a chaʼik tiʼ Satanás u jóokʼol yéetel baʼax u kʼáat (Efe. 5:15, 16; 6:12; Fili. 1:10).

Ilawil u kaambal a paalaleʼex ken xooknakeʼex

Le adoración ich familiailoʼ unaj u beetaʼal utiaʼal u yáantaʼal tuláakal maas kaambal. Baʼaleʼ ¿bix jeʼel u páajtal u beetaʼaleʼ? Jeʼel u páajtal u xokaʼal baʼaloʼob yaan yil yéetel le baʼaxoʼob ken u beet a paalal tuláakʼ kʼiin wa tuláakʼ semanaoʼ. Tsʼoʼoleʼ jeʼel u páajtal a líiʼskaba tu yéeteloʼob utiaʼal u yilkoʼob baʼax jeʼel u yaʼalikoʼob ken jóoʼkoʼob kʼaʼaytajeʼ. Maʼ u tuʼubultecheʼ, le paalaloʼoboʼ maas utstutʼaan u beetkoʼob baʼaxoʼob u yojel u  beetoʼob tubeel. Le oʼolal jeʼel u yuʼubkubaʼob maas maʼalobil wa ku yilkoʼob baʼax jeʼel u yaʼalikoʼob ken jóoʼkoʼob kʼaʼaytajeʼ bey xan baʼax jeʼel u núukikoʼob wa yaan máax maʼ u kʼáat u kʼam le maʼalob péektsiloʼ (2 Tim. 2:15).

Tsʼoʼoleʼ jeʼel xan u páajtal u ensayarkoʼob baʼax jeʼel u beetkoʼob wa ka joʼopʼok u túulchʼintaʼaloʼob u beetoʼob baʼax maʼ maʼalob tumen uláakʼ táankelem paalaloʼobeʼ. Le capítulo 15 tiʼ le libro Lo que los jóvenes preguntan. Respuestas prácticas (u kaʼapʼéel libro) ku yeʼesik bix jeʼel u beetaʼaleʼ. Teʼ jaats ku kʼaabaʼtik “Estrategia contra la presión de grupo” (táan juʼun 132 yéetel 133) ku yeʼesik jejeláas baʼax jeʼel u páajtal u beetaʼaleʼ. Aʼal tiʼ a táankelem hijo ka u tukult baʼax jeʼel u beetik tiʼ cada upʼéel túuntajil ka u aktáanteʼ. Tu jóokʼbal le táan juʼun 133, ku yaʼalik: «Ensayart yéetel utúul a láakʼtsil wa utúul nojoch máak ka biskaba tu yéetel». Lelaʼ ku yeʼesiktoʼoneʼ jach maʼalob ka beetaʼak le ensayoʼob bey ichil le adoración ich familiailoʼ.

Le adoración ich familiailoʼ ku tsʼáaik tuʼux u yáantaʼal le paalaloʼob utiaʼal ka u maas tsʼáa u yóol u meyajtoʼob Diosoʼ. Teʼ capítulo 38 tiʼ le u kaʼapʼéel libro Los jóvenes preguntan, ku kʼaabaʼtik “¿Qué haré con mi vida?”, teʼelaʼ ku yáantik máak u yil jejeláas bix jeʼel u beetkeʼ. Ken a xokeʼexeʼ, áant a paalal u naʼatoʼobeʼ le baʼax maas maʼalob jeʼel u beetkoʼob ichil u kuxtaloʼoboʼ letiʼe ka u meyajtoʼob Jéeobaoʼ. Áantoʼob utiaʼal ka taakchajak u beetik u precursoriloʼob, ka xiʼikoʼob meyaj Betel, ka xiʼikoʼob teʼ Escuela tiʼ Entrenamiento Ministerialoʼ wa ka u beetoʼob uláakʼ baʼaloʼob jeʼel u yáantkoʼob u maas tsʼáa u yóol u meyajtoʼob Dioseʼ.

Baʼaleʼ yaan taatatsiloʼob u kʼáat u yutsil u paalaloʼobeʼ, ku chʼíikloʼob tuukul chéen tiʼ le baʼaxoʼob u kʼáatoʼob ka beetaʼak tumen u paalaloʼoboʼ, maʼatech u beetkoʼob u cuentai le baʼaxoʼob táan u beetkoʼob beoraaʼ. U jaajileʼ maʼalob ka líiʼsaʼak u yóol le paalaloʼob ka u tsʼíiboltoʼob bin meyaj Betel, ka u beet u misioneroiloʼob wa uláakʼ bix jeʼel u maas meyajtkoʼob Dioseʼ. Baʼaleʼ wa cada ka sen aʼaliktiʼobeʼ jeʼel a náaksik u yóoloʼobeʼ wa jeʼel a beetik u xuʼulul u tsʼíiboltik u beetkoʼobeʼ (Col. 3:21). Aʼal tiʼ a paalal jach kiʼimak a wóol yoʼolal le bix u tsʼaamil u yóol u meyajtoʼob Diosoʼ, maʼ chʼíikil a wil chéen le baʼaxoʼob maʼ táan u beetkoʼoboʼ. Kʼaʼajaktecheʼ a paaloʼobeʼ unaj u meyajtkoʼob Jéeoba tumen u yaabiltmoʼob, maʼ chéen utiaʼal u beetkoʼob baʼax utstatʼaaniʼ (Mat. 22:37). Áant u yiloʼob tuláakal le baʼaxoʼob tsʼoʼok u beetik Jéeoba tu yoʼolaloʼoboʼ yéetel chaʼa u péeksaʼaloʼob tumen u yaabilajoʼob tiʼ letiʼ utiaʼal ka u meyajtoʼob.

Ilawil maʼ u pʼáatal nak óol le xookoʼ

Le u yóoxpʼéel baʼax jeʼel u yáantaj utiaʼal ka jóoʼsaʼak utsil tiʼ le xook ich familiailoʼ letiʼe ka beetaʼak upʼéel bix ka utsak tu yich le familiaoʼ. ¿Bix jeʼel u páajtal a beetikeʼ? Maʼ xaaneʼ jeʼel u páajtal a wuʼuykeʼex upʼéel dramaeʼ wa a chaʼantkeʼex upʼéel tiʼ le videoʼob jóoʼsaʼan tumen u kaajal Jéeobaoʼ. Tsʼoʼoleʼ jeʼel xan u páajtal a múuchʼ xokikeʼex le Bibliaoʼ, utiaʼal lelaʼ jeʼel u páajtal a waʼalik tiʼ cada utúul baʼax jaatsil ken u xokeʼ.

U revistai U Pʼíich Tulumil Kanan yéetel ¡Despertad!, ku taaskoʼob jaatsoʼob jach maʼalob ka xoʼokok ich familiai. Jeʼex teʼ táan juʼun 31 tiʼ ¡Despertad! ku taasik le jaats “¿Qué respondería usted?”. Tsʼoʼoleʼ le U Pʼíich Tulumil Kanan ku meyaj utiaʼal le kʼaʼaytajoʼ, yaan kʼiineʼ ku taasik le jaats ku  kʼaabaʼtik «Utiaʼal xiʼipalaloʼob yéetel chʼúupalaloʼob», lelaʼ upʼéel jaats ku yáantik máak utiaʼal u xakʼalxook, le jaats xan ku kʼaabaʼtik «Kaʼans a paalaleʼex» ku jóoʼsaʼal utiaʼal u yáantaʼal le paalaloʼoboʼ.

Wa táan u táankelemtal wa u x-lóoʼbayantal a paalaleʼ, jach maʼalob ka xokeʼex le jaats ku kʼaabaʼtik “Los jóvenes preguntan”, ku taasik le revista ¡Despertad!, bey xan le u kaʼapʼéel libroi Los jóvenes preguntan. Ken a xokeʼex le libroaʼ xakʼalteʼex xan le cuadro yaan tu tsʼoʼokbal cada capítulo ku kʼaabaʼtik “Y tú, ¿qué piensas?”, le cuadroaʼ maʼ chéen ku meyaj utiaʼal u kʼaʼajsaʼal le baʼax kanaʼab teʼ capitulooʼ, baʼaxeʼ utiaʼal u tsikbal le taatatsiloʼob yéetel u paalaloʼoboʼ.

Baʼaleʼ ilawil maʼ a sen beetik kʼáatchiʼ tiʼ a paalal tu yorai le xookoʼ. Maʼ kʼáatiktiʼob ka u xokoʼob le baʼax tu tsʼíibtoʼob teʼ jaats ku kʼaabaʼtik “Tus reflexiones”, mix tiʼ uláakʼ jaatsoʼob teʼ libro tuʼux ku yaʼalaʼal ka u tsʼíibtoʼob baʼax ku tuklikoʼoboʼ. Tu yóoxpʼéel táan juʼunil le librooʼ ku yaʼalaʼal tiʼ le taatatsiloʼoboʼ: «Wa a kʼáateʼex ka u tsʼíibt a paalaleʼex jach baʼax ku tuklikoʼobeʼ, jach kʼaʼabéet a waʼalikeʼextiʼob maʼ ken a xokeʼex le baʼax ken u tsʼíibtoʼoboʼ. Wa ka beetkeʼex jeʼex a waʼalikeʼextiʼoboʼ, maʼ xaaneʼ tu juunaloʼob ken u yóot u tsikbaltoʼobteʼex le baʼaxoʼob tu tsʼíibtoʼoboʼ».

Wa ka wilik maʼ u xuʼulul a xokeʼex, ka wilik u kaambal a paalaleʼex yéetel ka wilik maʼ u pʼáatal nak óol le xookoʼ Jéeobaeʼ jach u yaan u yeʼesik teʼex u yutsil. Le jatsʼuts súutukiloʼob ku jóoʼsaʼal utiaʼal u muchʼkuba le familia u adorartoʼob Jéeobaoʼ ku yáantaj utiaʼal u maas muʼukʼaʼantal u fe tuláakal.

[U tsolajil le oochel teʼ táan juʼun 31]

Ilawil bix jeʼel u maas jatsʼutstaleʼ

«Ken xooknakoʼon kaʼach yéetel k-mejen k-hijaʼobeʼ, teen yéetel in wíichameʼ k-líiʼsikba yéetel le baʼaxoʼob kun ilbil teʼ muchʼtáambaloʼoboʼ, ken tsʼoʼokokeʼ k-aʼaliktiʼob ka u beetoʼob upʼéel dibujo utiaʼal u yeʼesikoʼob baʼax tu kanoʼob tiʼ le baʼax t-xokaj yéeteloʼoboʼ. Yaan kʼiineʼ k-beetik upʼéel drama utiaʼal k-eʼesik le baʼax tsʼoʼok k-xokikoʼ wa k-ensayartik baʼax jeʼel k-aʼalik ken jóoʼkoʼon kʼaʼaytajeʼ. K-chʼaʼik en cuenta jaypʼéel jaʼab yaan tiʼ k-mejen hijaʼob, le oʼolal k-ilik k-beetik upʼéel bix ka utsak tu yichoʼob yéetel ka kaambalnakoʼob.» (J. M., Estados Unidos.)

«Utúul koʼolel k-tsʼáaik xook tiʼeʼ yaan utúul u chan hijo, toʼoneʼ k-kʼáat k-eʼes tiʼ le chan xiʼipaloʼ bix u meyaj le rolloʼob úuchjeakiloʼ. Ka t-chʼaʼatuklaj k-beetik u rolloi u libroi Isaías. Meyajnajtoʼon upʼéel computadora utiaʼal k-imprimirtik tuláakal le librooʼ, baʼaleʼ t-luʼsaj u numeroi u capituloiloʼob yéetel u versiculoiloʼob. Tsʼoʼoleʼ ka t-takʼaj cada u wáal utiaʼal k-tsayláantikoʼob, ka tsʼoʼokeʼ t-takʼaj cada punta tiʼ upʼéel tubo. T-aʼalaj tiʼ le chan paal ka u beet jeʼex tu beetil Jesús tu sinagogai Nazaretoʼ. Lucas 4:16-21 ku yaʼalikeʼ Jesuseʼ tu wachʼaj u rolloi Isaíaseʼ ka tu kaxtaj le jaats u kʼáat u xokoʼ (Isa. 61:1, 2). Baʼaleʼ le chan paaloʼ jach istikia úuchik u kaxtik, tumen jach chowak le rollooʼ. Leloʼ tu yáantaj u naʼateʼ Jesuseʼ jach u kʼaj óol tubeel le Kiliʼich Tsʼíiboʼoboʼ. Jach utschaj tu tʼaaneʼ ka tu yaʼalaj: “¡Minaʼan uláakʼ máak jeʼel bix Jesuseʼ!”.» (Y. T., Japón.)

[U tsolajil le oochel teʼ táan juʼun 30]

Le baʼax jeʼel u yáantik le paalaloʼoboʼ letiʼe ka u ensayartoʼob baʼax jeʼel u beetkoʼob ken joʼopʼok u túulchʼintaʼaloʼob u beetoʼob baʼax maʼ maʼaloboʼ

[U tsolajil le oochel teʼ táan juʼun 31]

Ilawil a beetik le Adoración ich Familiai upʼéel bix ka utsak tu yich tuláakaloʼ