¿Baʼax ku yeʼesik a payalchiʼob?
¿Baʼax ku yeʼesik a payalchiʼob?
«[¡]Tumen ka wuʼuyik payalchiʼ! Tuláakal yóokʼol kaab ku taal tiʼ teech.» (SAL. 65:2)
1, 2. ¿Baʼax k-ojel ken payalchiʼinakoʼon?
JÉEOBAEʼ mix utéen ku makik u xikin utiaʼal maʼ u yuʼubik u payalchiʼ le máaxoʼob meyajtik yéetel chúukaʼan óolaloʼ. Toʼoneʼ jach k-ojel letiʼeʼ ku yuʼubik k-payalchiʼ. Kex tak u millonesi J-jaajkunajoʼob ka payalchiʼinak cada utúul tiʼ upʼéeliliʼ súutukileʼ, mix utúul ku pʼáatal maʼ u yuʼubaʼal tumen Jéeobaiʼ.
2 Davideʼ jach u yojel ku yuʼubaʼal u payalchiʼ tumen Dios, le oʼolaleʼ tu yaʼalaj: «[¡]Tumen ka wuʼuyik payalchiʼ! Tuláakal yóokʼol kaab ku taal tiʼ teech» (Sal. 65:2). Letiʼeʼ uʼuyaʼab u payalchiʼ, tumen jach chúukpaj u yóol u meyajt Jéeoba. Le oʼolaleʼ maʼalob ka k-tukleʼ: «Le payalchiʼob kin beetkoʼ, ¿ku yeʼesikoʼob wa jach kin kʼubik in wóol tiʼ Dios yéetel kin tsʼáaik táanil in meyajtik? ¿Baʼax ku yeʼesik le payalchiʼob kin beetkoʼ?».
Unaj k-natsʼikba tiʼ Jéeoba yéetel kabal óolal
3, 4. 1) ¿Bix unaj k-payalchiʼ utiaʼal ka uʼuyaʼak tumen Dios? 2) ¿Baʼax unaj k-beetik wa tsʼoʼok k-lúubul tiʼ upʼéel nojoch kʼeban yéetel ku joʼopʼol u chiʼichnakkúuntkoʼon k-tuukul?
3 Wa k-kʼáat ka uʼuyaʼak k-payalchiʼ tumen Jéeobaeʼ, unaj k-natsʼikba tu yiknal yéetel kabal óolal (Sal. 138:6). Unaj k-kʼáatik tiʼ ka u yil jach baʼax yaan t-puksiʼikʼal, jeʼex tu beetil Davideʼ, letiʼeʼ tu yaʼalaj: «In [Dios], xakʼalteniʼ, kʼaj óolt in puksiʼikʼaliʼ; tsʼáaen tiʼ túuntajil, kʼaj óolt in tuukuloʼob; il, wa táan in bin tiʼ u bejil kʼaaseʼ, bisen tu beelil minaʼan u xuul» (Sal. 139:23, 24). Baʼaleʼ maʼ chéen unaj k-payalchiʼiʼ, baʼaxeʼ unaj xan k-kʼamik le nuʼuktaj ku tsʼáaik Diosoʼ bey xan le tsolnuʼukoʼob ku tsʼáaik teʼ Bibliaoʼ. Kʼaʼajaktoʼoneʼ letiʼeʼ jeʼel u nuʼuktikoʼon «tu beelil minaʼan u xuul[eʼ]», lelaʼ u kʼáat u yaʼaleʼ jeʼel u yáantkoʼon utiaʼal ka k-beet baʼax maʼalob utiaʼal ka k-kʼam le kuxtal minaʼan u xuuloʼ.
4 ¿Baʼax unaj k-beetik wa tsʼoʼok k-lúubul tiʼ upʼéel nojoch kʼeban yéetel ku joʼopʼol u chiʼichnakkúuntkoʼon k-tuukul? (Xokaʼak Salmo 32:1-5.) Maʼ unaj u pʼáatal maʼ k-beetik u cuentai baʼax ku yaʼaliktoʼon k-concienciaiʼ, tumen wa maʼeʼ jeʼel u kʼojaʼankúuntikoʼoneʼ, jeʼex u yooxol le kʼiin ku tikinkúuntik le cheʼoboʼ. Davideʼ jach yaachaj u yóol yoʼolal u kʼeeban, maʼ xaaneʼ kʼojaʼanchaj tu yoʼolal. Baʼaleʼ le ka tu «káantaj», wa ka tu yaʼalaj tiʼ Dioseʼ, tu yuʼububa maʼalobil. Chéen tukult bukaʼaj úuchik u kiʼimaktal u yóol ka tu yojéeltaj tsʼoʼok u perdonartaʼal. Toʼon xaneʼ jeʼel u k-uʼuyikba maʼalobil wa k-káantik k-kʼeebanoʼob tiʼ Dioseʼ. Tsʼoʼoleʼ le ancianoʼoboʼ jeʼel u yáantkoʼonoʼob utiaʼal k-kaʼa natsʼikba tiʼ Jéeobaeʼ (Pro. 28:13; Sant. 5:13-16).
Unaj k-kʼáat óolal tiʼ Dios yéetel unaj k-tsʼáaik nib óolal tiʼ
5. ¿Baʼax unaj k-beetik ken yanaktoʼon chiʼichnakiloʼob?
5 Jeʼel baʼaxak ka u beet k-muʼyajeʼ, unaj k-beetik le baʼax ku yaʼalik Pabloaʼ: «Maʼ a sen sen tuukuleʼex tu yoʼolal mix baʼal, baʼaleʼ tuláakal baʼax kʼaʼabéetteʼexeʼ aʼaleʼex mantatsʼ tiʼ Jajal Dios ich payalchiʼ, kʼáat óolneneʼex tiʼ yéetel tsʼaʼex gracias tiʼ xan» (Fili. 4:6). Ken joʼopʼok k-chʼaʼapachtaʼal wa ken joʼopʼok k-aktáantik baʼaloʼob jach talamtakeʼ, maas jach unaj k-kʼáat óoltik tiʼ Jéeoba ka u yáantoʼon yéetel ka u nuʼuktoʼon.
6, 7. ¿Baʼaxoʼob k-kʼamik tiʼ Dios unaj u péekskoʼon k-tsʼáa nib óolal tiʼ?
6 Baʼaleʼ ¿baʼax jeʼel u yeʼesik wa k-payalchiʼ chéen ken kʼaʼabéetchajaktoʼon wa baʼaxeʼ? Pabloeʼ tu yaʼaleʼ ken payalchiʼinakoʼoneʼ unaj k-tsʼáaik «gracias» tiʼ Dios. U jaajileʼ jach yaʼab baʼax oʼolal unaj k-tsʼáaik nib óolal tiʼ Jéeoba, jeʼex tu beetil Davideʼ, letiʼeʼ tu yaʼalaj: «¡Yuumtsil a tiaʼal, le nojochiloʼ, le páajtaliloʼ, le nojbeʼeniloʼ, le méekʼtáaniloʼ yéetel le tsikbeʼeniloʼ! Tumen tuláakal le baʼax yaan kaʼan yéetel luʼumeʼ, a tiaʼal. A tiaʼal xan le [reinooʼ], tumen techeʼ Yuumtsil [maas] nojochech tiʼ tuláakal máak. [...] Le oʼolaleʼ, [k-Dios], bejelaʼeʼ, k-tsʼáaik tiʼ teech nib óolal yéetel k-kiʼikiʼtʼantik a nojbeʼen kʼaabaʼ» (1 Cró. 29:11-13).
7 Jesuseʼ suuk u tsʼáaik kaʼach nib óolal tiʼ u Taata yoʼolal le janal ku tsʼaʼabaltiʼoʼ. Jeʼex le ka tu káajsaj u Janal Yuumtsileʼ, tu tsʼáaj nib óolal yoʼolal le waaj yéetel le vino meyajnajtiʼoʼ (Mat. 15:36; Mar. 14:22, 23). Toʼon xaneʼ unaj k-tsʼáaik nib óolal tiʼ Jéeoba yoʼolal le janal ku tsʼáaiktoʼonoʼ, baʼaleʼ unaj xan k-tsʼáaik «nib óolal tiʼ [...] yoʼolal le uts ku beetik tiʼ le máakoʼoboʼ» yéetel «yoʼolal u tojil [u] tsoltʼaanoʼob» ku tsʼáaiktoʼon teʼ Bibliaoʼ (Sal. 107:15; 119:62, 105).
Unaj k-payalchiʼ tu yoʼolal u maasil
8, 9. ¿Baʼaxten kʼaʼabéet k-payalchiʼ tu yoʼolal le sukuʼunoʼoboʼ?
8 Toʼoneʼ maʼ chéen t-oʼolal unaj k-payalchiʼiʼ, baʼaxeʼ unaj k-beetik tu yoʼolal k-sukuʼunoʼob, tak le maʼ k-kʼaj óoloʼoboʼ. Jeʼex Pabloeʼ, kex maʼ wal u kʼaj óol tuláakal le máaxoʼob meyajtik Dios yanoʼob kaʼach tu kaajil Colosasoʼ, tu yaʼalaj: «Mantatsʼ k-tsʼáaik nib óolal tiʼ Jajal Dios, u taata k-Yuumtsil Jesucristoeʼ, le ken payalchiʼinakoʼon ta woʼolaleʼex. Tumen tsʼoʼok u kʼuchultoʼon u péektsilil a woksaj óolaleʼex tiʼ Cristo Jesús, yéetel le yaakunaj yaan teʼex utiaʼal le máaxoʼob utiaʼaloʼob Jajal Diosoʼ» (Col. 1:3, 4). Pabloeʼ payalchiʼinaj xan tu yoʼolal le máaxoʼob meyajtik Dios yanoʼob kaʼach tu kaajil Tesalonicaoʼ (2 Tes. 1:11, 12). Le payalchiʼob beyaʼ ku yeʼeskoʼob jach baʼax yaan t-puksiʼikʼal yéetel bix k-ilik le sukuʼunoʼob teʼ múuchʼuliloʼ.
9 Le payalchiʼob k-beetik yoʼolal le sukuʼunoʼob, jeʼex le k-beetik yoʼolal le máaxoʼob yéeyaʼanoʼob utiaʼal u binoʼob kaʼan wa yoʼolal le «uláakʼ tamanoʼob[oʼ]», ku yeʼesikoʼob bix k-ilik u kaajal Dios (Juan 10:16). Pabloeʼ tu yaʼalaj tiʼ le sukuʼunoʼob yanoʼob Efesooʼ ka payalchiʼinakoʼob tu yoʼolal «utiaʼal ka tsʼaʼabak [...] tʼaanoʼob» tiʼ tumen Jéeoba yéetel utiaʼal ka u «tsʼáa ojéeltbil u taʼakbeʼen baʼalil le maʼalob péektsiloʼ» (Efe. 6:17-20). ¿Techeʼ suuk wa a payalchiʼ tu yoʼolal le sukuʼunoʼoboʼ?
10. ¿Bix jeʼel u yáantkoʼon le payalchiʼ k-beetik yoʼolal u maasiloʼ?
10 Wa k-payalchiʼ yoʼolal u maasileʼ jeʼel u yáantkoʼon k-kʼex bix k-ilkoʼobeʼ. Wa yaan utúul sukuʼun maʼ jach maʼalob u lúubul toʼoneʼ, ¿máasaʼ maʼ tu páajtal k-payalchiʼ tu yoʼolal ku tsʼoʼoleʼ k-tratartik maʼ maʼalobiʼ? (1 Juan 4:20, 21). Jeʼex túun k-ilkoʼ, le payalchiʼob beyaʼ jach ku yáantik máak u bisuba yéetel u maasil. Tsʼoʼoleʼ ku yáantkoʼon k-eʼes yaabilaj jeʼex úuchik u beetik Cristoeʼ (Juan 13:34, 35). Le yaabilajaʼ táakaʼan ichil le modos ku taal tiʼ le kiliʼich muukʼoʼ. ¿K-kʼáatik wa tiʼ Jéeoba ka u tsʼáatoʼon u kiliʼich muukʼ? ¿K-kʼáatik wa tiʼ ka u yáantoʼon utiaʼal k-eʼesik yaabilaj, kiʼimak óolal, jeetsʼelil, nojoch chúukaʼan óolal, maʼalob bisajbail, utsil, fe, maʼ k-séeb kʼuuxil yéetel ka k-controlartba? (Luc. 11:13; Gal. 5:22, 23.) Wa k-kʼáatikeʼ, le baʼaxoʼob k-aʼalik yéetel k-beetikoʼ yaan u yeʼesik táan k-máan yéetel táan k-kuxtal jeʼex u nuʼuktik le kiliʼich muukʼoʼ (xokaʼak Galaciailoʼob 5:16, 25).
11. ¿Baʼaxten maʼ kʼaas ka k-aʼaltiʼ u maasil ka payalchiʼinakoʼob t-oʼolaliʼ?
11 Le taatatsiloʼob xanoʼ jach unaj u payalchiʼob yoʼolal u paalaloʼob. Jeʼex wa utúul taatatsil ku yojéeltik u paalaleʼ ku taaktal u copiarkoʼob u eksamen u yéet xookoʼobeʼ, maʼalob ka payalchiʼinak tu yoʼolaloʼob yéetel ka u yáantoʼob yéetel le Biblia utiaʼal ka u naʼatoʼob maʼ maʼalob ka u beetoʼobiʼ, kex ka taakchajak u beetkoʼob. Pabloeʼ tu yaʼalaj tiʼ le sukuʼunoʼob yanoʼob Corintooʼ: «K-payalchiʼ tiʼ Jajal Dios utiaʼal maʼ a beetikeʼex mix jumpʼéel baʼax kʼaas» (2 Cor. 13:7). K-payalchiʼ yéetel kabal óolal yoʼolal u maasileʼ ku kiʼimakkúuntik u yóol Jéeoba, tsʼoʼoleʼ ku yeʼesik jach baʼax yaan t-puksiʼikʼal (xokaʼak Proverbios 15:8). Tsʼoʼoleʼ, jeʼel xan u páajtal k-aʼalik tiʼ u maasil ka payalchiʼinakoʼob t-oʼolal, jeʼex tu beetil Pabloeʼ. Letiʼeʼ tu yaʼalaj: «Payalchiʼineneʼex t-oʼolal, tumen maʼalob k-ojelileʼ jach jeetsʼel u yanil k-tuukul, tumen k-kʼáat xíimbal maʼalob tiʼ tuláakal baʼal» (Heb. 13:18).
Yaan uláakʼ baʼax ku yeʼesik k-payalchiʼob
12. ¿Baʼaxoʼob maʼ unaj u tuʼubul k-chʼaʼachiʼitik ken payalchiʼinakoʼoniʼ?
12 Le baʼaxoʼob k-aʼalik ken payalchiʼinakoʼonoʼ, ¿ku yeʼeskoʼob wa táan k-meyajtik Jéeoba yéetel kiʼimak óolal? ¿K-chʼaʼachiʼitik wa ichil k-payalchiʼob le kʼaʼaytajoʼ, le bix ken u béeykuntil Dios baʼax u tukulmaj u beetik, le bix ken u yeʼesil chéen tiʼ letiʼ yaan u derechoi u gobernar yéetel bix ken u kiliʼichkúuntik u kʼaabaʼ? Mix utéen unaj u tuʼubultoʼon k-payalchiʼ yoʼolal le baʼaloʼobaʼ. Lelaʼ bey u yeʼesiktoʼon le payalchiʼ tu kaʼansaj Jesús tiʼ u disipuloʼoboʼ, letiʼeʼ tu yaʼalaj: «K-Yuum yanech teʼ kaʼanoʼ, kiliʼichkúunsaʼak a kʼaabaʼ. Taalak a [reino]. Beetaʼak baʼax a kʼáat way luʼumeʼ jeʼel bix u beetaʼal teʼ kaʼanoʼ» (Mat. 6:9, 10).
13, 14. ¿Baʼax uláakʼ ku yeʼesik le payalchiʼob k-beetkoʼ?
13 Le baʼax k-aʼalik ken payalchiʼinakoʼonoʼ ku yeʼesik baʼax yaan t-tuukul yéetel baʼax k-kʼáat beete. Jéeobaeʼ jach u kʼaj óoloʼon maʼalob. Proverbios 17:3 ku yaʼalik: «Oro yéetel plataeʼ kʼáakʼ beetik u yojéeltaʼal wa maʼaloboʼob wa maʼ; le tuukuloʼoboʼ Yuumtsil beetik u yojéeltaʼal». Le tekstoaʼ ku tsʼáaik naʼatbileʼ Jéeobaeʼ u kʼaj óol baʼax yaan t-tuukul (1 Sam. 16:7). U yojel baʼax k-tuklik yoʼolal le sukuʼunoʼoboʼ, le muchʼtáambaloʼoboʼ yéetel le kʼaʼaytajoʼ. U yojel xan baʼax k-tuklik yoʼolal le sukuʼunoʼob yéeyaʼanoʼob utiaʼal u binoʼob kaʼanoʼ (Mat. 25:40). Letiʼeʼ yojel wa jach tu jaajil k-kʼáat ka u tsʼáatoʼon le baʼax k-kʼáatiktiʼoʼ wa chéen tsʼoʼok u suuktal k-aʼalik upʼéeliliʼ baʼal ken payalchiʼinakoʼon tiʼ letiʼ. Jesuseʼ tu yaʼalaj: «Ken payalchiʼinakecheʼ, maʼ a babal aʼalik [chéen upʼéeliliʼ baʼal], jeʼel bix u beetik le máaxoʼob maʼ u kʼaj óoloʼob [Diosoʼ], tumen ku tukultikoʼobeʼ tu yoʼolal u sen tʼaanoʼobeʼ bíin uʼuyakoʼob» (Mat. 6:7).
14 Le baʼax k-aʼalik ken payalchiʼinakoʼonoʼ ku yeʼesik wa k-jach kʼubik k-óol tiʼ Dios. Davideʼ tu yaʼalaj tiʼ Jéeoba: «Teech in taʼakbesajil; ¡beyech jumpʼéel muʼukʼaʼan tulumeʼ, ku tokiken tiʼ in [enemigoʼob]! In kʼáat kajtal mantatsʼ ta wotoch, balaʼanen tu yáanal a xiikʼoʼob» (Sal. 61:3, 4). Le Bibliaoʼ ku yaʼalikeʼ Dioseʼ jach ku kanáantkoʼon (Apo. 7:15). Jach ku líiʼsik k-óol k-ojéeltik jeʼel u páajtal k-payalchiʼ tiʼ Jéeobaeʼ, tumen k-ojel «[t-éetel] yaan» kex jeʼel baʼalak talmil ka k-aktáanteʼ (xokaʼak Salmo 118:5-9).
15, 16. Wa k-kʼáat ka tsʼaʼabaktoʼon u maasil meyaj teʼ múuchʼuliloʼ, ¿bix jeʼel u yáankoʼon le payalchiʼ utiaʼal ka k-il jach baʼax péekskoʼon k-tsʼíiboltoʼ?
15 Wa k-payalchiʼ yéetel u jaajil k-óoleʼ yaan u yáankoʼon k-il baʼax péekskoʼon k-kʼáat tiʼ Jéeoba upʼéel wa baʼax. Jeʼex wa k-kʼáat ka tsʼaʼabkoʼon k-beet k-ancianoi teʼ múuchʼuliloʼ, maʼalob ka k-tukle: «¿Jach wa tu jaajil in k-kʼáat in beet le meyaj tumen taak in wáantik le sukuʼunoʼob yéetel tumen in k-kʼáat in beet u maasil meyaj yoʼolal le Reinooʼ? ¿Wa chéen tumen in kʼáat in beet in maas nojchil tiʼ u maasil, wa ka yanakten páajtalil yóokʼol u maasil?». Ichil u kaajal Jéeobaeʼ maʼ unaj u beetaʼal baʼaloʼob beyaʼ (xokaʼak 3 Juan 9, 10 yéetel Lucas 22:24-27). Wa k-payalchiʼ tu jaajil k-óol tiʼ Jéeobaeʼ, letiʼeʼ jeʼel u yáantkoʼon k-il jach baʼax péekskoʼon k-kʼáat wa baʼax tiʼeʼ yéetel wa maʼ maʼalob bix k-tuukuleʼ jeʼel u yáankoʼon k-kʼex táanil tiʼ u kʼuchul t-puksiʼikʼaleʼ.
16 Yaʼab kiikoʼob tsʼokaʼan u beeloʼobeʼ u kʼáatoʼob ka u beet u siervo ministeriali u yíichamoʼob yéetel ken máanak kʼiineʼ ka u beet u ancianoiloʼob. Utiaʼal túun u yáantik u yíichamoʼobeʼ unaj u payalchiʼob tu yoʼolal, baʼaleʼ unaj xan u yeʼeskoʼob jatsʼuts modos. Lelaʼ upʼéel baʼax jach kʼaʼabéet, tumen le baʼax ku yaʼalik yéetel ku beetik u yatan bey xan u paalaleʼ ku beetik u yúuchul tʼaan maʼalob wa kʼaas tu yoʼolal le íichamtsil teʼ múuchʼuliloʼ.
Ken payalchiʼinakoʼon tu táan uláakʼoʼob
17. ¿Baʼaxten maʼalob ka k-jóoʼs u súutukil utiaʼal k-payalchiʼ t-juunal?
17 Jesuseʼ tu kaxtaj súutukiloʼob utiaʼal u payalchiʼ tu juunal (Mat. 14:13; Luc. 5:16; 6:12). Toʼon xaneʼ maʼalob ka k-beet beyoʼ. Ken payalchiʼinakoʼon tuʼux mix baʼal beetik u náayal k-óoleʼ maas maʼ talam jeʼel k-chʼaʼatuklik k-beetik baʼax utstutʼaan Dioseʼ, tsʼoʼoleʼ ku yáantaj utiaʼal k-maas natsʼikba tiʼ letiʼ. Baʼaleʼ Jesuseʼ payalchiʼinaj xan tu táan uláakʼ máakoʼob. Wa ku yaʼalaʼaltoʼon ka payalchiʼinakoʼon tu táan u maasileʼ, ¿bix unaj k-beetik?
18. ¿Baʼax maʼ unaj u tuʼubsik le sukuʼunoʼob ku máanoʼob payalchiʼ teʼ muchʼtáambaloʼoboʼ?
18 Teʼ muchʼtáambaloʼoboʼ yaan sukuʼunoʼob ku máanoʼob payalchiʼ tu táan u maasil (1 Tim. 2:8). Ken tsʼoʼokok le payalchiʼoʼ tuláakal le muchʼukbaloʼoboʼ unaj u yaʼalkoʼob “amén”, lelaʼ u kʼáat u yaʼaleʼ «ka béeyak». Baʼaleʼ utiaʼal ka páajchajak u yaʼalkoʼobeʼ kʼaʼabéet maʼalob xan u yilkoʼob le baʼax tsʼoʼok u yaʼalaʼaloʼ. Teʼ tu payalchiʼi le padrenuestrooʼ, Jesuseʼ maʼ tu yaʼalaj mix baʼal beet u yuʼubkuba maʼ maʼalobil u maasiliʼ (Luc. 11:2-4). Tsʼoʼoleʼ maʼ tʼaanaj tiʼ le talmil yaan tiʼ le máaxoʼob yanoʼoboʼ mix tiʼ le baʼaxoʼob kʼaʼabéettiʼoboʼ. Le baʼaloʼob beyaʼ chéen ken payalchiʼinakoʼon t-juunal unaj chʼaʼachiʼitkoʼob, maʼ ken payalchiʼinakoʼon tu táan uláakʼoʼobiʼ. Yéetel ken payalchiʼinakoʼon xan tu táan u maasileʼ kʼaʼabéet k-kanáantik maʼ k-aʼalik baʼaxoʼob maʼ unaj u yojéeltaʼal tumen tuláakal máakiʼ.
19. ¿Baʼaxoʼob maʼ unaj u beetik máak ken beetaʼak payalchiʼ teʼ múuchʼuliloʼ?
19 Ken beetaʼak payalchiʼ teʼ muchʼtáambaloʼoboʼ unaj k-eʼesik k-chʼaʼik maʼalob «sajakilil tiʼ Jajal Dios» (1 Ped. 2:17). Yaan baʼaxoʼob suukaʼan u beetaʼaleʼ maʼ kʼaastakiʼ, baʼaleʼ maʼ maʼalob ka beetaʼak tu yorai le muchʼtáambaloʼoboʼ (Ecl. 3:1). Jeʼex wa ka aʼalaʼak tumen utúul wa máax ka u mach u kʼab tuláakal le muchʼukbaloʼob le ken beetaʼak le payalchiʼoʼ, maʼ xaaneʼ yaan tiʼ le máaxoʼob yanoʼob teʼ muchʼtáambal, jeʼex le káajal ku beetik u taaloʼoboʼ, maʼ maʼalob ken u yiloʼobiʼ. Maʼ xaaneʼ, utúul sukuʼuneʼ ku machik u kʼab u yatan, wa ku yilik maʼ tu beetik u náayal u yóol u maasil, baʼaleʼ wa ku méekʼikeʼ, maʼ xaaneʼ jeʼel u beetik u tʼóochpajal wa máaxeʼ. Tumen maʼ xaaneʼ jeʼel u beetik u tuklaʼal maas u yaabiltmaj u yatan tiʼ Jéeobaeʼ. Le oʼolaleʼ, kʼaʼabéet k-eʼesik tsiikil yéetel unaj k-beetik «tuláakal utiaʼal u nojbeʼenil Jajal Dios» yéetel unaj k-kanáantik maʼ k-beetik u tʼóochpajal mix máak (1 Cor. 10:31, 32; 2 Cor. 6:3).
¿Baʼax unaj k-kʼáatik?
20. ¿Bix jeʼel a tsolik le baʼax ku yaʼalik Romailoʼob 8:26, 27?
20 Maʼ xaaneʼ, ken payalchiʼinakoʼon t-juunaleʼ maʼatech k-kaxtik baʼax jeʼel k-kʼáatik tiʼ Jéeobaeʼ. Pabloeʼ ku yaʼalik: «Tumen maʼ k-ojel payalchiʼ jeʼel bix unajeʼ, baʼaleʼ le kiliʼich [muukʼoʼ] ku kʼáat óolal tiʼ Jajal Dios t-oʼolal, yéetel áakamoʼob maʼ tu páajtal u yaʼalaʼal yéetel tʼaanoʼob. Jajal Dios máax ku xakʼaltik le puksiʼikʼaloʼoboʼ, u yojel baʼax u kʼáat u yaʼal le kiliʼich [muukʼoʼ]» (Rom. 8:26, 27). Jéeobaeʼ tu beetaj u tsʼíibtaʼal yaʼab payalchiʼob teʼ Bibliaoʼ. Le oʼolaleʼ, u yojel jach baʼax tu yóotaj u yaʼal le máaxoʼob tsʼíibtoʼ. Tsʼoʼoleʼ letiʼeʼ jach u kʼaj óoloʼon. Le oʼolaleʼ, wa ku meyajtoʼon le payalchiʼob tsʼíibtaʼanoʼob teʼ Bibliaoʼ, Jéeobaeʼ ku yilik bey toʼon aʼalikeʼ yéetel ku núukikoʼob. Jéeobaeʼ ku núukik k-payalchiʼob ken «kʼáat óol[nak]» le kiliʼich muukʼ t-oʼolaloʼ. Wa maas k-ojel baʼax ku yaʼalik le Bibliaoʼ, maas maʼ talam jeʼel k-ilik baʼax unaj k-kʼáatik ken payalchiʼinakoʼoneʼ.
21. ¿Baʼax ken k-il teʼ tuláakʼ xookoʼ?
21 Jeʼex tsʼoʼok k-ilkoʼ, le payalchiʼob k-beetkoʼ ku yeʼeskoʼob wa naatsʼ yaniloʼon tiʼ Dios bey xan wa k-kʼaj óol maʼalob le baʼax ku yaʼalik le Bibliaoʼ (Sant. 4:8). Teʼ tuláakʼ xookoʼ yaan k-ilik jujumpʼéel payalchiʼob yéetel tʼaanoʼob ku tsʼáaikoʼob nojbeʼenil tiʼ Dios ku taasik le Bibliaoʼ, yéetel yaan k-ilik bix jeʼel u yáantkoʼonoʼob ken payalchiʼinakoʼoneʼ.
¿Baʼax jeʼel a núukikeʼ?
• ¿Bix unaj k-payalchiʼ utiaʼal ka uʼuyaʼak tumen Dios?
• ¿Baʼaxten unaj k-payalchiʼ tu yoʼolal k-sukuʼunoʼob?
• ¿Baʼax ku yeʼesik le payalchiʼob k-beetikoʼ?
• ¿Baʼaxoʼob maʼ unaj k-beetik ken beetaʼak le payalchiʼob teʼ muchʼtáambaloʼoboʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 4]
¿Suuk wa a tsʼáaik nojbeʼenil yéetel nib óolal tiʼ Jéeoba?
[U tsolajil le oochel teʼ táan juʼun 6]
Le baʼaxoʼob k-beetik ken beetaʼak le payalchiʼob teʼ muchʼtáambaloʼoboʼ unaj u tsʼáaik nojbeʼenil tiʼ Jéeoba