Kʼáatchiʼob ku beetaʼal

¿Kʼaʼabéet wa u pixik u pool le kiikoʼob sutik ich péeksajkʼab tʼaan le tsoltʼaanoʼob ku máansaʼal teʼ muchʼtáambaloʼob wa teʼ asambleaʼoboʼ?

U jaajileʼ tuláakal le kiikoʼob unaj u pixik u pooloʼob ken u beetoʼob wa baʼax unaj u beetaʼal tumen u yíicham wa tumen utúul sukuʼun teʼ múuchʼuliloʼ. Lelaʼ bey u yeʼesik le baʼax tu yaʼalaj apóstol Pablooʼ: «Juntúul koʼolel maʼ tu pixik u pool kaʼalikil táan u payalchiʼ wa kaʼalikil táan u [kaʼansajeʼ] subtsil utiaʼal u pool». ¿Baʼaxten? Tumen «le íichamoʼ u pool u yatan» (1 Cor. 11:3-10). Le oʼolaleʼ, le koʼolel ku pixik u pool yéetel upʼéel nookʼ teʼ súutukiloʼob beyaʼ ku yeʼesik ku tsʼáaikuba yáanal u páajtalil le máaxoʼob tsʼaʼan autoridad tiʼob tumen Dios teʼ múuchʼuliloʼ (1 Tim. 2:11, 12). *

¿Unaj wa túun u pixik u pool le kiik sutik ichil uláakʼ tʼaanil upʼéel tsoltʼaan ku máansaʼal tumen utúul sukuʼunoʼ? Le kiik sutik ichil uláakʼ tʼaanil le baʼax ku tsoʼolol tumen le sukuʼunoʼ, maʼ letiʼ ku kaʼansajiʼ. Lelaʼ bey u yúuchul ken máansaʼak upʼéel tsoltʼaan ku suʼutul ichil yaanal tʼaan, le sukuʼun máansik le tsoltʼaanoʼ letiʼ ku paktaʼal ken joʼopʼok u kaʼansaj, bey túunoʼ chéen ku yuʼubaʼal le bix u suʼutul tumen le kiikoʼ. Le oʼolaleʼ, le kiikoʼob sutik le tsoltʼaanoʼ maʼ letiʼob ku paktaʼaloʼobiʼ. Bey túunoʼ, yaan kʼiineʼ ku páajtal u yantaloʼob aktáan tiʼ le sukuʼun máansik le tsoltʼaanoʼ wa ku kutaloʼob xan. Le oʼolaleʼ maʼ tsaj ka u pix u pooloʼobiʼ. Baʼaleʼ le bix u sutaʼal upʼéel tsol tʼaan ich péeksajkʼab tʼaanoʼ yaanal bix u beetaʼal.

Le máaxoʼob sutik ich péeksajkʼab tʼaan le tsoltʼaanoʼoboʼ letiʼob ku maas paktaʼaloʼob,  tumen ku chíikpajloʼob tiʼ upʼéel nojoch pantalla, baʼaleʼ le sukuʼun máansik le tsoltʼaanoʼ maʼatech u paktaʼal. Le oʼolaleʼ, le kiikoʼob sutik le tsoltʼaan ich péeksajkʼab tʼaanoʼ unaj u pixik u pooloʼob utiaʼal u yeʼesikoʼob tsiikil.

Yoʼolal le baʼax tsʼoʼok k-aʼalikaʼ, ¿baʼax túun unaj u beetaʼal ken sutaʼak ich péeksajkʼab tʼaan le tsoltʼaanoʼob ku máansaʼaloʼob teʼ Kaambalil utiaʼal Kaʼansaj, le ken máansaʼak upʼéel eʼesajil (demostración) wa le ken núukaʼak le kʼáatchiʼob tu muchʼtáambalil u Xookil le Biblia teʼ Múuchʼuliloʼ, tu Muchʼtáambalil Kʼaʼaytaj bey xan teʼ tu xookil U Pʼíich Tulumil Kananoʼ? ¿Kʼaʼabéet wa xan u pixik u pool le kiik sutik ich péeksajkʼab tʼaanoʼ? Yaan jujumpʼéel súutukiloʼobeʼ maʼ jach kʼaʼabéet u pixik u pooliʼ, tumen le máaxoʼob muchʼukbaloʼoboʼ yaan u yilkoʼob maʼ letiʼ nuʼuktik le muchʼtáambaloʼ. Jeʼex ken sutaʼak ich péeksajkʼab tʼaan le baʼax ku yaʼalik le sukuʼunoʼob ken u núukoʼob le kʼáatchiʼoboʼ, ken máansaʼak le eʼesajiloʼob bey xan le jaats ku máansaʼal tumen le kiikoʼoboʼ. Baʼaleʼ kʼaʼabéet u pixik u pool ken u sutoʼob ich péeksajkʼab tʼaan le tsoltʼaan ku máansaʼal tumen le sukuʼunoʼoboʼ, u xookil U Pʼíich Tulumil Kanan, u Xookil le Biblia teʼ Múuchʼuliloʼ bey xan le kʼaayoʼob ku beetaʼal teʼ muchʼtáambaloʼoboʼ. Maʼ xaaneʼ ichil tuláakal le muchʼtáambaloʼ yaan u kʼaʼabéettal u sutik ich péeksajkʼab tʼaan le baʼax ku yaʼalik le sukuʼunoʼoboʼ, le kiikoʼoboʼ, le paalaloʼoboʼ yéetel le ancianoʼoboʼ. Le oʼolaleʼ le kiikoʼob sutik ich péeksajkʼab tʼaanoʼ maas maʼalob ka u pix u pooloʼob tu yorai tuláakal le muchʼtáambaloʼ.

[Tsolajiloʼob]