Unaj k-eʼesik yaabilaj tiʼ k-sukuʼunoʼob kóoktakoʼoboʼ

U KAAJAL Dioseʼ bey upʼéel nojoch familia tuʼux jach yaʼab sukuʼunoʼob yéetel kiikoʼob yanoʼobiʼ. Tuláakloʼobeʼ tsʼoʼok u kaambaloʼob tiʼ le máaxoʼob jach chúukpaj u yóol u meyajtoʼob Dios úuchjeakiloʼ, jeʼex Samuel, David, Sansón, Rahab, Moisés, Abraham, Sara, Noé yéetel Abel. Ichil le máaxoʼob meyajtik Dios bejlaʼaʼ yaʼab sukuʼunoʼob kóoktakoʼob yaniʼ. Jeʼex tu luʼumil Mongoliaeʼ, le yáax kaʼatúul máaxoʼob káajs u meyajtikoʼob Jéeobaoʼ utúul sukuʼun yéetel u yatan, letiʼobeʼ kóoktakoʼob. Yéetel yoʼolal le chúukaʼan óolal tu yeʼesaj le sukuʼunoʼob kóoktakoʼob yanoʼob Rusiaoʼ, páajchaj k-ganartik upʼéel juicio tu táan le Tribunal Europeo de Derechos Humanosoʼ.

Teʼ kʼiinoʼobaʼ, «le palitsil chúukpajaʼan u yóol yéetel yaan u naʼat[oʼ]» tsʼoʼok u beetik jóoʼsaʼaniloʼob ich péeksajkʼab tʼaan. Tsʼoʼok xan u káajsik múuchʼuliloʼob yéetel ku beetik asambleaʼob ich péeksajkʼab tʼaan (Mat. 24:45). Le baʼaloʼobaʼ tsʼoʼok u yáantik le máaxoʼob kóoktakoʼoboʼ. * Táanil tiʼ u káajal u jóoʼsaʼal le áantajoʼobaʼ, ¿tsʼoʼok wa a tuklik bukaʼaj talmil úuchik u kankoʼob baʼax utstutʼaan Dios yéetel u tsʼáaik u yóol u meyajtoʼob? ¿Tsʼoʼok wa a tuklik bix jeʼel u páajtal a wáantik le máaxoʼob kóoktakoʼob yanoʼob teʼ tuʼux kajaʼanechoʼ?

Táanil tiʼ u káajal u beetaʼal jóoʼsaʼaniloʼob ich péeksajkʼab tʼaan

Wa ka kʼáat tiʼ jujuntúul sukuʼunoʼob kóoktakoʼob úuch joʼopʼok u meyajtkoʼob Dios bix úuchik u kʼaj óoltikoʼob u jaajileʼ, ¿baʼax ka tuklik jeʼel u núukikoʼobeʼ? Maʼ xaaneʼ, yaan u yaʼalkoʼobtech bix tu yuʼubilubaʼob yéetel bix úuchik u kʼexpajal u kuxtaloʼob le ka tu yojéeltoʼob Dioseʼ yaan u kʼaabaʼ. Maʼ xaan xaneʼ, yaan u yaʼalikoʼobtech bix úuchik u yáantaʼaloʼob utiaʼal maʼ u xuʼulul u meyajtkoʼob Dios táanil tiʼ u beetaʼal videoʼob ich péeksajkʼab tʼaan utiaʼal u maas kaambaloʼob. Yéetel maʼ xaaneʼ, yaan u yaʼalikoʼobtech bix tu yuʼubilubaʼob táanil tiʼ u káajal u suʼutul ich péeksajkʼab tʼaan le baʼaxoʼob ku kaʼansaʼal teʼ muchʼtáambaloʼoboʼ. Utiaʼal u naʼatikoʼob kaʼach le baʼax ku kaʼansaʼaloʼ, ku kutal utúul wa máax tu tséeloʼob utiaʼal u tsʼíibtik tiʼ upʼéel chan juʼun le baʼax ku yaʼalaʼaloʼ. Utúul sukuʼuneʼ siete jaʼaboʼob xáanchaj chéen tsʼíibtbil u beetaʼaltiʼ le baʼax ku kaʼansaʼal teʼ muchʼtáambaloʼob tak ka kʼuch utúul sukuʼun u yojel péeksajkʼab tʼaan utiaʼal u yáantik.

Le sukuʼunoʼob kóoktakoʼob tsʼoʼok u chan yantal u jaʼabiloʼoboʼ ku kʼaʼajskoʼob bix u talamtaltiʼob kaʼach u táakpajloʼob teʼ kʼaʼaytaj yéetel u tsikbaloʼob yéetel utúul máax maʼ kóokiʼ. Yéetel upʼéel u kʼabeʼ ku tichʼik upʼéel chan juʼun tuʼux tsʼíibtaʼan baʼax taak u yaʼalik tiʼ u yuumil naj, tuláakʼ upʼéeleʼ tiʼ u machmaj u maas túumbenil u revistailoʼob U Pʼíich Tulumil Kanan yéetel ¡Despertad! Uláakʼ baʼax jach talam u yilkoʼobeʼ letiʼe u tsʼáaikoʼob xook tiʼ utúul máax kóok xanoʼ, tumen le jóoʼsaʼaniloʼob ku meyajtiʼob utiaʼal u tsʼáaikoʼob xookoʼ mix utúul tiʼ letiʼob jach naʼatkiʼ. Maʼ xaan xaneʼ, yaʼab tiʼ le sukuʼunoʼob kóoktakoʼoboʼ ku kʼaʼajskoʼob bix u lúubul u yóoloʼob kaʼach ken u yiloʼob maʼ tu naʼataʼal le baʼax taak u yaʼalikoʼoboʼ yéetel ken u yiloʼob maʼ tu páajtal u seguer u tsikbaloʼob tiʼ le baʼaxoʼob ku kaʼansik le Bibliaoʼ. Tsʼoʼoleʼ kex letiʼob jach u yaabiltmoʼob Jéeobaeʼ maʼ u jach yojeloʼob wa maʼalob bix u naʼatikoʼob le baʼax ku xokikoʼob utiaʼal ka u tsʼaʼob ichil u kuxtaloʼoboʼ.

Kex beyoʼ, le sukuʼunoʼob kóoktakoʼoboʼ tsʼoʼok u chúukpajal u yóol u meyajtoʼob Jéeoba (Job 2:3). Tu páaʼtoʼob yéetel chúukaʼan óolal ka áantaʼakoʼob tumen Dios (Sal. 37:7). Bejlaʼeʼ Jéeobaeʼ tsʼoʼok u tsʼáaiktiʼob tak baʼaloʼob mix utéen tu tukloʼob wa jeʼel u yilkoʼobeʼ.

 Tuukulnen tiʼ le baʼaxoʼob tu beetaj utúul sukuʼun kóok tsʼokaʼan u beel yéetel yaan u paalal. Táanil tiʼ u káajal u jóoʼsaʼal videoʼob ich péeksajkʼab tʼaaneʼ, le sukuʼunaʼ ku yilik ka yanaktiʼob u xookil ich familia. U hijoeʼ ku yaʼalik: «In papaeʼ jach ku talamtal u yilik kaʼach u nuʼuktik le xook ich familiailoʼ, tumen minaʼan jóoʼsaʼaniloʼob ich péeksajkʼab tʼaan utiaʼal u beetik. U suukaʼanileʼ maʼatech u naʼatik le baʼax ku xokikoʼ. Tsʼoʼoleʼ, tumen chéen paalaloʼoneʼ, maʼatech k-áantik kaʼachi. Ken u tsoltoʼon upʼéel baʼal yaanal bixeʼ k-jáan aʼaliktiʼ maʼ beyiʼ. Kex beyoʼ, in papaeʼ maʼ tu xulaj u tsʼáaiktoʼon xookiʼ, utiaʼal letiʼeʼ maas kʼaʼanan ka k-kʼaj óolt Jéeoba, le oʼolal ku yilik u xook t-éetel kex maʼatech u jach naʼatik tubeel le inglesoʼ».

Richard, utúul sukuʼun yaan maas tiʼ 70 jaʼaboʼob tiʼeʼ, yéetel tiʼ kajaʼan tu noj kaajil Brooklyneʼ (Nueva York) láayliʼ xan tsʼoʼok u chúukpaj u yóol u meyajt Jéeobaeʼ. Kex chʼóop yéetel kóokeʼ, letiʼeʼ jach kʼaj óoltaʼan tumen mantatsʼ ku bin tiʼ tuláakal le muchʼtáambaloʼoboʼ. Utiaʼal u bin teʼ muchʼtáambaloʼoboʼ tu juunal ku yilik u chʼaʼik le metrooʼ, utiaʼal maʼ u saʼatleʼ ku xokik jaytéen ku jeʼelel le metro utiaʼal u yojéeltik tuʼux unaj u yéemloʼ. Utéenjeakileʼ pʼáat maʼ beetaʼab le muchʼtáambaloʼ tumen jach keʼelchaji yéetel joʼopʼ tak u kʼáaxal nieve. Tiʼ u maasil sukuʼunoʼobeʼ aʼalaʼabtiʼob, baʼaleʼ maʼ páajchaj u yaʼalaʼal tiʼ Richardiʼ. Le ka kʼaʼaj tiʼ le sukuʼunoʼoboʼ bin u yiloʼob, ka kʼuchoʼob tu jool le Najil Reinooʼ tiʼ waʼalakbaliʼ, táan u páaʼtik u jeʼebel. Le ka kʼáataʼabtiʼ baʼaxten jóokʼ kex jach kʼaʼam u yiikʼal le keʼeloʼ, letiʼeʼ tu núukaj: «Tumen jach in yaabiltmaj Jéeoba».

¿Baʼax jeʼel u páajtal a beetik utiaʼal a wáantaj xaneʼ?

Wa yaan máaxoʼob kóoktakoʼob teʼ tuʼux kajaʼanechoʼ, maʼalob ka a wil a kanik tak chéen upʼíit péeksajkʼab tʼaan. Le máakoʼob beyaʼ jach utsoʼob yéetel jach chúukaʼan u yóol u yáantoʼob uláakʼ máakoʼob u kan le péeksajkʼab tʼaanoʼ. Maʼ xaaneʼ, ken jóoʼkech kʼaʼaytajeʼ jeʼel a kʼuchul tu yotoch utúul máak kóokeʼ. ¿Baʼax jeʼel u páajtal a beetkeʼ? Ilawil a tsikbal tu yéetel. Eʼes yéetel u táan a wich baʼax taak a waʼalik, péeks a kʼab, tsʼíibt tiʼ upʼéel chan juʼun le baʼax taak a waʼalikoʼ yéetel meyajnaktech dibujoʼob wa fotoʼob. Kex wa u yuumil naj ka wilik bey maʼ u kʼáat u yojéelt u maasil tiʼ le Bibliaoʼ, tsʼáa u yojéelt utúul sukuʼun kóok wa u yojel péeksajkʼab tʼaan utiaʼal ka xiʼik xíimbaltbil. ¿Baʼaxten? Tumen maas jeʼel u taaktal u kaambal wa ku tsikbaltaʼaltiʼ le maʼalob péektsil ich péeksajkʼab tʼaanoʼ.

Maʼ xaaneʼ techeʼ táan a kanik péeksajkʼab tʼaan yéetel táan a wáantaj tiʼ upʼéel múuchʼulil ichil le tʼaanil jeʼeloʼ. ¿Baʼax jeʼel u yáantkech a maas kaneʼ? Letiʼe a wilik u maas meyajtech chéen péeksajkʼab tʼaan utiaʼal a tsikbal tak yéetel le sukuʼunoʼob maʼ kóoktakoʼoboʼ. Lelaʼ yaan u yáantkech tuukul ich péeksajkʼab tʼaan. Maʼ xaaneʼ, yaan kʼiineʼ yaan u taaktal a tʼaan utiaʼal a tsikbal. Baʼaleʼ jeʼex u yúuchul utiaʼal u kanaʼal uláakʼ tʼaaneʼ, kʼaʼabéet u tsʼáaik u yóol máak utiaʼal u kanik tubeel.

Wa ka wilik u meyajtech le péeksajkʼab tʼaanoʼ, yaan a weʼesik yaabilaj yéetel tsiikil tiʼ le sukuʼunoʼob kóoktakoʼoboʼ. Chéen tukult bix u yuʼubikubaʼob sáamsamal tumen maʼ tu naʼatkoʼob baʼax ku yaʼalik u yéet meyajoʼob wa u yéet xookoʼob. Utúul tiʼ letiʼobeʼ ku yaʼalik: «Le tuʼux kin máan sáamsamaloʼ, le máakoʼoboʼ táan u tʼaanoʼob. Baʼaleʼ kin wuʼuykimba jach tin juunal yéetel mix baʼal in wilaʼal, leloʼ ku beetik  in kʼuuxil. U jaajileʼ maʼ tin kaxtik bix jeʼel in waʼalik jach bix in wuʼuykimbaeʼ». Bey túunoʼ, unaj k-beetik tuláakal le ku páajtal utiaʼal u yuʼubikuba maʼalobil le sukuʼunoʼob kóokoʼob teʼ muchʼtáambaloʼoboʼ, beyoʼ maʼ chéen kun binoʼob utiaʼal u kaambaloʼob tiʼ le Bibliaoʼ, baʼaxeʼ utiaʼal ka tsikbalnakoʼob xan yéetel u maasil (Juan 13:34, 35).

Lelaʼ bey xan unaj u beetaʼal teʼ múuchʼuliloʼob tuʼux ku múul yantal sukuʼunoʼob kóoktakoʼob yéetel le maʼ kóoktakoʼoboʼ. Le oʼolaleʼ ku kʼaʼabéettal u suʼutul ich péeksajkʼab tʼaan le baʼax ku yaʼalaʼal teʼ muchʼtáambaloʼoboʼ. Utiaʼal u naʼatkoʼob tubeel le baʼaxoʼob ku yaʼalaʼaloʼ, le sukuʼunoʼob kóoktakoʼoboʼ ku kutaloʼob táanil, beyoʼ ku páajtal u paktikoʼob le sukuʼun máansik le tsoltʼaanoʼ bey xan le sukuʼun sutik ich péeksajkʼab tʼaanoʼ. Tsʼoʼok u yilaʼaleʼ, le múuchʼuliloʼob tuʼux ku beetaʼal beyaʼ séeb u suuktal u yilkoʼob le péeksajkʼab tʼaan ku beetaʼaloʼ, le oʼolaleʼ ku pʼáatal maʼatech u beetaʼal u náayal u yóoloʼob. Lelaʼ bey xan u beetaʼal teʼ asambleaʼob tuʼux ku kʼaʼabéettal u suʼutul ich péeksajkʼab tʼaan le baʼax ku kaʼansaʼaloʼ. Le sukuʼunoʼob sutik ich péeksajkʼab tʼaan le kaʼansajoʼ jach maʼalob meyaj ku beetkoʼob, tumen jach ku tsʼáaik u yóoloʼob utiaʼal ka naʼataʼak tubeel le kaʼansaj, jeʼex u beetaʼal tumen utúul sukuʼun kóokeʼ.

Maʼ xaaneʼ, le múuchʼulil tuʼux yanechoʼ yaan sukuʼunoʼob kóoktakoʼobiʼ, le oʼolaleʼ ku kʼaʼabéettal u suʼutul le baʼax ku kaʼansaʼal teʼ muchʼtáambaloʼob ich péeksajkʼab tʼaanoʼ. ¿Baʼax jeʼel u páajtal a beetik utiaʼal a weʼesik taak a wáantik le sukuʼunoʼobaʼ? Maʼ xaaneʼ jeʼel u páajtal a invitarkoʼob ta wotocheʼ, yéetel wa ku béeytaleʼ, ilawil a kanik kex chéen upʼíit péeksajkʼab tʼaan. Maʼ tuklik wa maʼ tu páajtal a kanik. Wa ka tsʼáaik a wóoleʼ jeʼel a kanikeʼ, yéetel ken a weʼes a wutsil tiʼobeʼ yaan a máansik yaʼab súutukiloʼob jatsʼutstak yéeteloʼob (1 Juan 4:8). Jach yaʼab baʼax jeʼel k-kanik tiʼ le sukuʼunoʼob kóoktakoʼoboʼ. Letiʼobeʼ jach utstutʼaan u tsikbaloʼob, jach yaan u naʼatoʼob yéetel utstutʼaan u báaxaltʼaanoʼob. Utúul sukuʼun kóok u papá yéetel u maamaeʼ, ku yaʼalik: «Teneʼ tiʼ líikʼen ichil máakoʼob kóoktakoʼobeʼ, jach yaʼab baʼax tsʼoʼok in kanik tiʼ letiʼob mix bikʼin jeʼel u páajtal in sutik u jeel tiʼobeʼ. Jach yaʼab baʼaxoʼob jeʼel u páajtal k-kanik tiʼ le sukuʼunoʼob kóoktakoʼoboʼ».

Jéeobaeʼ jach u yaabiltmaj le máaxoʼob meyajtikoʼ, kex kóoktakoʼob bey xan wa maʼ kóoktakoʼobiʼ. U jaajileʼ, le sukuʼunoʼob kóoktakoʼob meyajtik Jéeoba yéetel chúukaʼan óolal yéetel muʼukʼaʼan u fejoʼoboʼ jach ku jatsʼutskíintikoʼob u kaajal Dios. Le oʼolaleʼ, ¡jach unaj k-yaabiltkoʼob!

[Tsolajiloʼob]

[U tsolajil le oochel teʼ táan juʼun 31]

Maas séeb jeʼel u kʼaʼamal le maʼalob péektsil tumen le kóokoʼob wa ku kʼaʼaytaʼal tiʼob ich péeksajkʼab tʼaanoʼ

[U tsolajil le oochel teʼ táan juʼun 32]

Le muchʼtáambaloʼoboʼ unaj u meyaj utiaʼal u líiʼsaʼal u yóol le sukuʼunoʼob kóoktakoʼoboʼ