Unaj k-ilik nojoch baʼal le meyaj k-beetik teʼ múuchʼuliloʼ
Unaj k-ilik nojoch baʼal le meyaj k-beetik teʼ múuchʼuliloʼ
«Jajal Dioseʼ tu tsʼáaj tiʼ u jujumpʼéel u xéexetʼal le wíinkliloʼ jeʼel tuʼuxak tu yóoltajeʼ.» (1 COR. 12:18)
1, 2. 1) ¿Bix unaj k-ilik le meyaj ku beetik cada utúul teʼ múuchʼuliloʼ? 2) ¿Baʼax kʼáatchiʼiloʼob kun núukbil teʼ xookaʼ?
DESDE tu kʼiinil le israelitaʼoboʼ, tiʼ Jéeobaeʼ ku meyaj le múuchʼulil utiaʼal u nuʼuktik yéetel u kaʼansik u kaajaloʼ. Jeʼex le ka tsʼoʼok u chʼaʼabal u noj kaajil Hai tumen le israelitaʼoboʼ, Josueeʼ «tu xokaj tu jujumpʼéelil u tʼaaniloʼob u juʼunil le aʼalmajtʼaanoʼ, jeʼel bix le kiʼtʼaanoʼoboʼ, bey xan le loolobtʼaanoʼob [...] tu táan u kaajil Israel[oʼ]» (Jos. 8:34, 35).
2 Teʼ yáax siglooʼ, apóstol Pabloeʼ tu yaʼalaj tiʼ Timoteoeʼ, le múuchʼuliloʼ u yotoch Dios bey xan «u yokmil yéetel u chuumpakʼil le jaajoʼ» (1 Tim. 3:15). Teʼ kʼiinoʼobaʼ, u yotoch Dioseʼ letiʼe múuchʼuliloʼob yanoʼob tiʼ tuláakal yóokʼol kaaboʼ. Teʼ capítulo 12 tiʼ yáax tiʼ Corintoiloʼoboʼ, Pabloeʼ tu ketaj le múuchʼulil yéetel u wíinklil máakoʼ. Letiʼeʼ tu yaʼaleʼ cada u xéetʼ tiʼ le wíinkliloʼ yaanal u meyaj, baʼaleʼ tuláakloʼob jach kʼaʼabéetoʼob. Letiʼeʼ tu tsʼíibtaj: «Jajal Dioseʼ tu tsʼáaj tiʼ u jujumpʼéel u xéexetʼal le wíinkliloʼ jeʼel tuʼuxak tu yóoltajeʼ». Yéetel tu yaʼaleʼ «u xéexetʼal le wíinklil k-tuklik maʼ tsikbeʼenoʼoboʼ k-tsʼáaik k-óol k-búukbesikoʼob» (1 Cor. 12:18, 23). Bejlaʼa xaneʼ, le meyaj ku beetik cada utúul ichil u kaajal Diosoʼ jach kʼaʼanan. Le oʼolaleʼ, ¿bix unaj k-ilik le meyaj k-beetik teʼ múuchʼuliloʼ? ¿Baʼaxoʼob jeʼel u yáantkoʼon k-il baʼax meyajil jeʼel u páajtal k-beetikeʼ? Yéetel ¿baʼax unaj k-beetik «utiaʼal ka páatak u yilaʼal tumen tuláakaleʼ bix [k-bin] táanil»? (1 Tim. 4:15).
Bix jeʼel k-eʼesik jach nojoch baʼal k-ilik le meyaj tsʼaʼantoʼonoʼ
3. ¿Bix jeʼel k-eʼesik nojoch baʼal k-ilik le meyaj k-beetik teʼ múuchʼuliloʼ?
3 Upʼéel bix jeʼel k-eʼesik nojoch baʼal k-ilik le meyaj k-beetik teʼ múuchʼuliloʼ, letiʼe ka k-beet yéetel kiʼimak óolal le baʼax ku yaʼalik le Cuerpo Gobernante ku tʼaan tu kʼaabaʼ «le palitsil chúukpajaʼan u yóol yéetel yaan u naʼat[oʼ]» (xokaʼak Mateo 24:45-47). Le oʼolaleʼ, kʼaʼabéet k-ilik wa jach tu jaajil táan k-beetik le baʼax ku yaʼalik le palitsil chúukpajaʼan u yóoloʼ. Le palitsilaʼ úuch joʼopʼok u yaʼalik bix unaj k-vestirtikba, tiʼ baʼaxoʼob maʼ unaj k-náaysik k-óoliʼ yéetel bix unaj k-kanáantikba ken meyajnaktoʼon Internet. ¿K-beetik wa le baʼaxoʼob ku yaʼalik utiaʼal u maʼ k-náachtal tiʼ Diosoʼ? Tsʼoʼok xan u yaʼaliktoʼoneʼ ka k-jóoʼs u súutukil utiaʼal k-adorartik Dios ich familiai. ¿K-beetik wa jeʼex u yaʼalikoʼ? ¿K-jóoʼsmaj wa u kʼiinil utiaʼal k-adorar ich familiai? Wa maʼ tsʼokaʼan k-beeleʼ, ¿k-jóoʼsik wa xan u kʼiinil utiaʼal k-xakʼalxoktik le Bibliaoʼ? Wa k-beetik le baʼaxoʼob ku yaʼaliktoʼon le palitsiloʼ, Jéeobaeʼ yaan u yáantkoʼon utiaʼal ka xiʼiktoʼon utsil bey xan tiʼ k-familia.
4. ¿Baʼaxoʼob unaj k-chʼaʼik en cuentai táanil tiʼ k-beetik wa baʼax uts t-ich?
4 Maʼ xaaneʼ, yaan máax jeʼel u yaʼalikeʼ mix máak unaj u yaʼaliktiʼ bix unaj u vestirkuba yéetel tiʼ baʼaxoʼob unaj u náaysik u yóol. Baʼaleʼ le máaxoʼob nojoch baʼal u yilkoʼob le meyaj ku beetkoʼob teʼ múuchʼuliloʼ maʼatech u beetkoʼob chéen baʼax u kʼáatoʼob. Baʼaxeʼ ku yilik u chʼaʼikoʼob en cuentai le baʼaxoʼob ku yaʼalik Jéeoba ichil le Bibliaoʼ. Le baʼaxoʼob ku yaʼalikoʼ bey upʼéel «x-tʼuchub sáas» utiaʼal k-ookeʼ yéetel bey upʼéel «sáasil» utiaʼal k-beeleʼ (Sal. 119:105). Tsʼoʼoleʼ unaj k-ilik wa le baʼax ken k-chʼaʼatukult k-beetkoʼ maʼ ken u taastoʼon talamil teʼ múuchʼuliloʼ bey xan yéetel uláakʼ máaxoʼob maʼatech u meyajtkoʼob Jéeoba (xokaʼak 2 Corintoiloʼob 6:3, 4).
5. ¿Baʼaxten unaj k-kanáantik maʼ u yantaltoʼon le tuukul jeʼex le yaan tiʼ le máaxoʼob maʼatech u meyajtkoʼob Diosoʼ?
5 Le tuukul yaan tiʼ le máaxoʼob maʼatech u beetkoʼob baʼax ku yaʼalik Diosoʼ bey jeʼex le iikʼ tuláakal tuʼux yanoʼ (Efe. 2:2). Le tuukul beyaʼ jeʼel u beetik k-creertik maʼ kʼaʼabéettoʼon le nuʼuktaj ku tsʼáaik u kaajal Jéeobaoʼ. Mix utúul tiʼ toʼon k-kʼáat k-beet jeʼex tu beetil Diotrefeseʼ, letiʼeʼ maʼ tu kʼamaj yéetel tsiikil le baʼax tu yaʼalaj apóstol Juanoʼ (3 Juan 9, 10). Le oʼolaleʼ, unaj k-kanáantik maʼ k-beetik chéen le baʼaxoʼob k-kʼáatoʼ. Mix utéen unaj k-tʼaan kʼaas yoʼolal le bix u nuʼuktik u kaajal Jéeoba teʼ kʼiinoʼobaʼ (Núm. 16:1-3). Baʼaxeʼ unaj k-múul meyaj yéetel le palitsil chúukpajaʼan u yóoloʼ yéetel unaj k-beetik baʼax ku yaʼalik le sukuʼunoʼob nuʼuktik le múuchʼuliloʼ (xokaʼak Hebreob 13:7, 17).
6. ¿Baʼaxten unaj k-ilik wa jach táan k-tsʼáaik k-óol meyajt Jéeoba?
6 ¿Bix uláakʼ jeʼel k-eʼesik nojoch baʼal k-ilik le meyaj k-beetik teʼ múuchʼuliloʼ? Unaj k-ilik wa táan k-nojbeʼenkúuntik Jéeoba teʼ múuchʼuliloʼ (Rom. 11:13). Yaaneʼ jeʼel u páajtal u beetik u precursorileʼ. Yaan xaneʼ ku beetik u misioneroiloʼob, u superintendentei tiʼ circuitoiloʼob wa ku binoʼob meyaj Betel. Yaʼab xaneʼ ku yáantajoʼob utiaʼal u líiʼsaʼal u Najiloʼob Reino. Kex yaʼab sukuʼunoʼob maʼ tu páajtal u beetkoʼob le meyajoʼob beyaʼ, ku beetkoʼob tuláakal le ku páajtal utiaʼal u yáantkoʼob u familiaʼob utiaʼal u maas meyajtkoʼob Jéeoba yéetel utiaʼal u maas táakpajloʼob teʼ kʼaʼaytaj cada semanaoʼ (xokaʼak Colosailoʼob 3:23, 24). Maʼ u tuʼubul toʼoneʼ, wa k-meyajtik Jéeoba yéetel u jaajil k-óoleʼ, letiʼeʼ mantatsʼ yaan u chʼaʼikoʼon en cuentai ichil u kaajal.
Baʼaxoʼob eʼesik baʼax meyajil jeʼel u páajtal k-beetik teʼ múuchʼuliloʼ
7. ¿Baʼaxten maʼ upʼéeliliʼ meyaj ku beetik le sukuʼunoʼob teʼ múuchʼuliloʼ?
7 Maʼalob ka k-il jach bukaʼaj jeʼel u páajtal k-beetik utiaʼal k-maas meyajtik Jéeobaeʼ. Jeʼex teʼ múuchʼuliloʼ maʼ upʼéeliliʼ meyaj ku páajtal u beetik utúul sukuʼun yéetel utúul kiikiʼ. Tsʼoʼoleʼ yaneʼeʼ tsʼoʼok u chan yantal u jaʼabiloʼob wa kʼojaʼanoʼob. Proverbios 20:29 ku yaʼalikeʼ u jaʼtsil «le táankelemoʼoboʼ tiʼ yaan tu muukʼoʼobeʼ», baʼaleʼ «u tsikbeʼenil nuxiboʼobeʼ tiʼ yaan tu sakil u pooloʼobeʼ». Lelaʼ ku yeʼesikeʼ, le táankelmoʼoboʼ maas yaan u muukʼoʼob utiaʼal u beetkoʼob wa baʼax meyajil teʼ múuchʼuliloʼ, baʼaleʼ le tsʼoʼok u chan yantal u jaʼabiloʼoboʼ jach yaʼab áantaj ku tsʼáaikoʼob xaniʼ, tumen yaʼab baʼax u yojloʼob. Baʼaleʼ maʼ unaj u tuʼubultoʼoneʼ, le meyaj k-beetik teʼ múuchʼuliloʼ Jéeoba tsʼáaiktoʼon yoʼolal u yutsil (Hch. 14:26; Rom. 12:6-8).
8. Le baʼax k-kʼáat beetoʼ, ¿baʼaxten jach yaan yil yéetel le meyaj k-beetik teʼ múuchʼuliloʼ?
8 Baʼaleʼ le baʼax k-kʼáat beetoʼ yaan baʼax yil yéetel le meyaj k-beetik teʼ múuchʼuliloʼ. Koʼox ilik baʼax tuukulil yanchaj tiʼ utúul kiik yéetel tiʼ u yíitsʼin. Tu kaʼatúulaloʼobeʼ upʼéeliliʼ bix líiʼsaʼabikoʼob yéetel ku líiʼsaʼal xan u yóoloʼob tumen u taataʼob utiaʼal ka u beet u precursorailoʼob ken tsʼoʼokok u xookoʼob. Ka tu tsʼáaj 18 jaʼaboʼob tiʼobeʼ tu tsʼoʼoksaj u xookoʼob; utúuleʼ tu beetaj u precursorai, baʼaleʼ uláakʼ utúuleʼ ook meyaj bulkʼiin. ¿Baʼaxten maʼ upʼéeliliʼ baʼax tu beetoʼobiʼ? Tumen cada utúuleʼ yaanal baʼax u kʼáat u beete. U jaajileʼ óoliʼ tuláakal máakeʼ ku beetik chéen baʼax u kʼáat. Le oʼolaleʼ, maʼalob ka k-jach tukult baʼax unaj k-beetik utiaʼal k-maas meyajtik Dios. ¿Jeʼel wa u páajtal k-maas meyajtik Jéeoba, kex ka kʼaʼabéetchajak u xuʼulul k-bin tu paach chéen baʼaxoʼob uts t-icheʼ? (2 Cor. 9:7.)
9, 10. ¿Baʼax unaj k-beetik utiaʼal k-maas tsʼáaik k-óol k-meyajt Jéeoba?
9 ¿Chéen wa unaj u líiʼsaʼal k-óol utiaʼal ka maas meyajnakoʼon teʼ múuchʼuliloʼ? Pabloeʼ tu yaʼalaj tiʼ le filiposiloʼoboʼ: «Jajal Dios máax tsʼáaikteʼex le maʼalob tsʼíibolaloʼoboʼ, yéetel ku yáantikeʼex utiaʼal a tsʼoʼokbesikeʼex». Jeʼex túun k-ilkoʼ, Jéeobaeʼ jeʼel u yáantkoʼon utiaʼal ka k-maas tsʼáa k-óol k-meyajteʼ (Fili. 2:13; 4:13).
10 ¿Máasaʼ lelaʼ letiʼe baʼax maas kʼaʼabéet k-kʼáatiktiʼoʼ? Rey Davideʼ bey tu beetiloʼ, letiʼeʼ tu yaʼalaj: «Yuumtsil, eʼesten a beeloʼob; bisen tiʼ a tʼuʼutʼul bejoʼob; bisen, beet in xíimbal tiʼ a jaajil, tumen teech in [Dios], ta tokajen. ¡Tiʼ teech mantatsʼ in kʼubmaj in wóol!» (Sal. 25:4, 5). Toʼon xaneʼ, unaj k-kʼáatik tiʼ Jéeoba ka u yáantoʼon k-beet baʼax utstutʼaan. Jéeoba yéetel Jesuseʼ jach ku kiʼimaktal u yóoloʼob ken k-beet tuláakal le ku páajtal utiaʼal k-maas meyaj teʼ múuchʼuliloʼ (Mat. 26:6-10; Luc. 21:1-4). Lelaʼ ku péekskoʼon xan k-kʼáat tiʼ Dios ka u yáantoʼon k-beet uláakʼ meyajoʼob ichil u kaajal. Unaj k-beetik jeʼex tu beetil Isaíaseʼ. Ka tu yaʼalaj Jéeoba: «¿Máax bíin in túuxte? ¿Máax bíin u beetuba k-bisaj tʼaan?», le profetaoʼ tu núukaj: «Jeʼelenaʼ, [túuxteniʼ]» (Isa. 6:8).
Bix jeʼel k-maas meyajtik Dioseʼ
11. 1) ¿Baʼaxten jach kʼaʼabéet u maasil sukuʼunoʼob nuʼuktaj teʼ múuchʼuliloʼoboʼ? 2) ¿Baʼax unaj u beetik utúul sukuʼun utiaʼal ka tsʼaʼabak uláakʼ meyaj u beet teʼ múuchʼuliloʼ?
11 Chéen teʼ tu jaʼabil meeyjil kʼaʼaytaj 2008, okjaʼanaj 289,678 máakoʼob tiʼ tuláakal yóokʼol kaab, leloʼ ku yeʼeskeʼ jach kʼaʼabéet uláakʼ sukuʼunoʼob utiaʼal nuʼuktaj teʼ múuchʼuliloʼoboʼ. ¿Baʼax ku páaʼtaʼal ka u beet le sukuʼunoʼob teʼ múuchʼuliloʼ? Ka u yil u beetkoʼob le baʼaxoʼob ku yaʼalik le Biblia utiaʼal ka tsʼaʼabak u beet u siervo ministerialiloʼob wa u ancianoiloʼob (1 Tim. 3:1-10, 12, 13; Tito 1:5-9). Utiaʼal leloʼ kʼaʼabéet u maas táakpajloʼob teʼ kʼaʼaytajoʼ, ka u beetoʼob maʼalob le meyaj tsʼaʼantiʼob teʼ múuchʼuliloʼ, ka u líiʼsubaʼob maʼalob utiaʼal u núukikoʼob le kʼáatchiʼob ku beetaʼal teʼ muchʼtáambaloʼoboʼ yéetel ka u tsʼaʼob le áantaj kʼaʼabéet tiʼ le sukuʼunoʼoboʼ. Wa ku beetkoʼob beyoʼ yaan u yeʼeskoʼob jach u kʼáatoʼob áantaj teʼ múuchʼuliloʼ.
12. ¿Bix jeʼel u yeʼesik le táankelmoʼob taak u maas meyajkoʼob Diosoʼ?
12 ¿Baʼax jeʼel u páajtal u beetik le táankelmoʼob utiaʼal u maas meyajtkoʼob Dios teʼ múuchʼuliloʼ? Unaj u kʼaj óolkoʼob tubeel le baʼax ku yaʼalik le Bibliaoʼ utiaʼal ka yanaktiʼob «kʼaj óolal yéetel pixanbeʼen naʼat» (Col. 1:9). Utiaʼal lelaʼ kʼaʼabéet u xakʼalxoktikoʼob le Bibliaoʼ yéetel u táakpajloʼob teʼ muchʼtáambaloʼoboʼ. Tsʼoʼoleʼ maʼalob xan ka u yil u beetkoʼob le baʼaxoʼob kʼaʼabéet utiaʼal u yookloʼob teʼ «kóokoch jool naj utiaʼal u meeyjul Yuumtsil[oʼ]» (1 Cor. 16:9). Wa ku tsʼáaikoʼob táanil ichil u kuxtaloʼob u meyajtkoʼob Jéeobaeʼ, jach yaan u kiʼimaktal u yóoloʼob yéetel yaan u kʼamkoʼob yaʼab utsiloʼob (xokaʼak Eclesiastés 12:1).
13, 14. ¿Bix jeʼel u yeʼesik le kiikoʼob jach nojoch baʼal u yilkoʼob le meyaj ku beetkoʼob teʼ múuchʼuliloʼ?
13 Le kiikoʼoboʼ unaj u yilkoʼob jach nojoch baʼal le meyaj ku beetkoʼob xanoʼ, tumen táan u tsʼoʼokbeskoʼob le baʼax ku yaʼalik Salmo 68:11: «Yuumtsileʼ tu tsʼáa jumpʼéel tʼaan utiaʼal bisbil; yaʼabkach koʼoleloʼobeʼ tu kʼaʼaytajoʼob». Upʼéel bix u yeʼeskoʼob jach nojoch baʼal u yilkoʼobeʼ, letiʼe u táakpajloʼob utiaʼal u kaʼansaʼal uláakʼ máakoʼoboʼ (Mat. 28:19, 20). Jeʼex túun k-ilkoʼ, ken u beetoʼob tuláakal le ku páajtal utiaʼal u maas táakpajloʼob teʼ kʼaʼaytajoʼ ku yeʼeskoʼob jach nojoch baʼal u yilkoʼob le meyaj ku beetkoʼob teʼ múuchʼuliloʼ.
14 Pabloeʼ tu yaʼalaj tiʼ Tito: «Le [x-]chʼijaʼan koʼoleloʼoboʼ unaj u kuxtaloʼob ich kiliʼichil [...]. Unaj u yeʼesikoʼob jumpʼéel maʼalob kuxtal, utiaʼal u kaʼansikoʼob tiʼ le x-lóoʼbayan koʼoleloʼoboʼ u yaabiltoʼob u yíichamoʼob, u yaabiltoʼob u paalaloʼob, u tojtal u tuukuloʼob, u kanáant u kuxtaloʼob, u táan óolt u yotochoʼob, uts u puksiʼikʼaloʼob, ka yanakoʼob yáanal u tʼaan u yíichamoʼob, utiaʼal maʼ u poʼochʼol u tʼaan Yuum Jajal Dios» (Tito 2:3-5). Jeʼex túun k-ilkoʼ, le kiikoʼob kʼanchajaʼan u tuukuloʼoboʼ jach jeʼel u yáantkoʼob u maasileʼ. Letiʼobeʼ ku yeʼeskoʼob tsiikil tiʼ le sukuʼunoʼob nuʼuktik le múuchʼuliloʼ, tsʼoʼoleʼ ku yéeykoʼob maʼalob tiʼ baʼax ken u náays u yóoloʼob yéetel bix ken u vestirtubaʼob. Beyoʼ ku biskoʼob upʼéel maʼalob kuxtal tu táan u maasil yéetel ku yeʼeskoʼob jach nojoch baʼal u yilkoʼob le meyaj ku beetkoʼob teʼ múuchʼuliloʼ.
15. ¿Baʼax jeʼel u yáantik le kiikoʼob maʼ tsʼokaʼan u beeloʼob ku yuʼubkubaʼob chéen tu juunaloʼoboʼ?
15 Yaan kʼiineʼ le kiikoʼob maʼ tsʼokaʼan u beeloʼoboʼ ku yuʼubkoʼob bey mix baʼal ku páajtal u beetkoʼob ichil u kaajal Jéeobaeʼ. Utúul kiikeʼ ku yaʼalik: «Yaan kʼiineʼ kin wuʼuykimba jach chéen tin juunal». Ka kʼáataʼabtiʼ baʼax áantik ken u yuʼububa beyoʼ, letiʼeʼ tu yaʼalaj: «Le payalchiʼ yéetel u xookil le Bibliaoʼ ku kʼaʼajsikten kʼaʼanan le meyaj kin beetik teʼ múuchʼuliloʼ. Kin kaxtik jóoʼsaʼaniloʼob ku yeʼeskoʼob le yaabilaj ku yuʼubik Jéeoba tin woʼolaloʼ, tsʼoʼoleʼ kin wilik bix jeʼel in wáantik u maasil teʼ múuchʼuliloʼ. Leloʼ ku yáantken utiaʼal maʼ in jach tuukul chéen tin woʼolal». Teʼ Salmo 32:8, Jéeobaeʼ tu yaʼalaj tiʼ David: «In wichoʼobeʼ táan u paktikechoʼob». Jeʼex túun k-ilkoʼ, Jéeobaeʼ jach u yaabiltmaj cada utúul tiʼ le máaxoʼob meyajtikoʼ, tak le kiikoʼob maʼ tsʼokaʼan u beeloʼoboʼ. Jéeobaeʼ yaan u yáantkoʼon k-beet tubeel le meyaj u tsʼaamajtoʼon ichil u kaajaloʼ.
Maʼ u xuʼulul a beetik le meyaj tsʼaʼantech teʼ múuchʼuliloʼ
16, 17. 1) ¿Baʼaxten le úuchik k-kʼamik u invitación Jéeobaoʼ letiʼe baʼax maas maʼalob tsʼook k-beetkoʼ? 2)¿Baʼax unaj k-beetik utiaʼal k-uʼuyikba maʼalob ichil u kaajal Jéeoba?
16 Yoʼolal u nojoch yaabilaj Jéeobaeʼ ku tsʼáaiktoʼon u páajtalil k-bisikba tu yéetel. Jesuseʼ tu yaʼalaj: «Mix máak ku páajtal u taal tiʼ teen wa maʼ tu taasaʼal tumen le Taata máax túuxtenoʼ» (Juan 6:44). Ichil u millonesi máakoʼob kuxaʼanoʼob teʼ kʼiinoʼobaʼ, Dioseʼ tsʼoʼok u invitarkoʼon utiaʼal ka yanakoʼon ichil u kaajal. Le úuchik k-kʼamik u invitacionoʼ, letiʼe baʼax maas maʼalob tsʼoʼok k-beetikoʼ, tumen leloʼ ku yáantkoʼon utiaʼal ka yanak u beelal k-kuxtal. ¿Máasaʼ jach ku taasiktoʼon kiʼimak óolal le meyajoʼob k-beetik teʼ múuchʼuliloʼ?
17 Le salmistaoʼ tu yaʼalaj: «Yuumtsil, teneʼ in yaakuntmaj, le [naj] tuʼux kajaʼanechoʼ». Yéetel tu yaʼalaj xan: «Maʼalob waʼalakbalilen; ¡yaan in wutsiltʼantik Yuumtsil tu táan u kaajal!» (Sal. 26:8, 12). Ichil u kaajal Jéeobaeʼ yaan meyajoʼob jeʼel u páajtal u beetik cada utúul tiʼ toʼoneʼ. Le oʼolaleʼ mantatsʼ unaj k-chaʼik u nuʼuktikoʼon u kaajal yéetel unaj k-jach tsʼáaik k-óol meyajte, beyoʼ mantatsʼ ken k-uʼuyba maʼalobil teʼ múuchʼuliloʼ.
¿Kʼajaʼan wa tech?
• ¿Baʼaxten ku páajtal k-aʼalikeʼ cada utúul máax meyajtik Dioseʼ yaan meyaj jeʼel u páajtal u beetik teʼ múuchʼuliloʼ?
• ¿Bix jeʼel k-eʼesik nojoch baʼal k-ilik le meyaj k-beetik ichil u kaajal Diosoʼ?
• ¿Baʼaxoʼob eʼesik baʼax meeyjil jeʼel u páajtal k-beetik teʼ múuchʼuliloʼ?
• ¿Bix u yeʼesik le táankelmoʼob yéetel le tsʼoʼok u yantal u jaʼabiloʼob kiʼimak u yóoloʼob yoʼolal le meyaj ku beetkoʼob ichil u kaajal Diosoʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 16]
¿Baʼax unaj u beetik le sukuʼunoʼob utiaʼal ka tsʼaʼabak u maasil meyajtiʼob teʼ múuchʼuliloʼ?
[U tsolajil le oochel teʼ táan juʼun 17]
¿Bix jeʼel u yeʼesik le kiikoʼob jach nojoch baʼal u yilkoʼob le meyaj ku beetkoʼob teʼ múuchʼuliloʼ?