Dioseʼ tu tsʼáaj le Mesías utiaʼal u salvartikoʼonoʼ
Dioseʼ tu tsʼáaj le Mesías utiaʼal u salvartikoʼonoʼ
«Jeʼel bix tuláakal ku kíimil tu yoʼolal Adaneʼ, bey xan tiʼ tuláakal kun yantal kuxtal tu yoʼolal Cristo.» (1 COR. 15:22)
1, 2. 1) ¿Baʼax tu beetaj Andrés yéetel Felipe ka tu kʼaj óoltoʼob Jesús? 2) ¿Baʼaxten k-aʼalikeʼ maas yaan baʼax oʼolal k-creertik Jesuseʼ letiʼ le Mesíasoʼ?
ANDRESEʼ jach tu creerta Jesús, le Nazaretiloʼ, letiʼ le Máax yéeyaʼan tumen Diosoʼ. Le oʼolaleʼ tu yaʼalaj tiʼ Pedro, u sukuʼun: «Tsʼoʼok [k-]nuptáantik le Mesíasoʼ». Felipe xaneʼ jach tu creerta, le oʼolal bin u kaxt Natanael, u amigo, utiaʼal u yaʼaltiʼ: «Tsʼoʼok k-ilik le máak tu yoʼolal máax tsʼíibnaj Moisés tiʼ u tsʼíibaʼan juʼunil le aʼalmajtʼaanoʼ, tu yoʼolal máax tsʼíibnajoʼob xan le [profetaʼoboʼ]. Letiʼeʼ Jesús, u paal José, tiʼ u kaajil Nazaret» (Juan 1:40, 41, 45).
2 ¿Kux túun teech? ¿Ka creertik wa xan Jesuseʼ letiʼe Mesías aʼalaʼan u taal kun tsʼáaiktoʼon salvacionoʼ? (Heb. 2:10.) Toʼon bejlaʼeʼ maas yaan baʼax oʼolal k-creertik ke le disipuloʼob teʼ yáax siglooʼ. Le baʼaxoʼob ku yaʼalik le Biblia tiʼ bix úuchik u síijil Jesús tak úuchik u kaʼa kuxtaloʼ ku yáantkoʼon k-il jach letiʼ le Cristo wa Mesíasoʼ (xokaʼak Juan 20:30, 31). Tsʼoʼoleʼ le Bibliaoʼ ku yaʼalikeʼ Jesuseʼ yaan u seguer u beetik u Mesíasi teʼ kaʼanoʼ (Juan 6:40; xokaʼak 1 Corintoiloʼob 15:22). Le oʼolaleʼ, jeʼel xan u páajtal k-aʼalikeʼ «tsʼoʼok [k-]nuptáantik le Mesíasoʼ». Baʼaleʼ táanileʼ koʼoneʼex ilik bix úuchik u tsʼáaik cuenta le disipuloʼob Jesuseʼ letiʼe Mesíasoʼ.
Jujumpʼíitil ojéeltaʼabik máax le Mesíasoʼ
3, 4. 1) ¿Baʼax áant le disipuloʼob u kʼaj óoltoʼob le Mesíasoʼ? 2) ¿Baʼaxten k-aʼalik chéen tiʼ Jesús béeychaj tuláakal le profecíaʼob tʼaanajoʼob tiʼ le Mesíasoʼ?
3 ¿Baʼax áant le yáax disipuloʼob u creertoʼob Jesuseʼ letiʼ le Mesíasoʼ? Letiʼe baʼax tu yaʼalaj le profetaʼob túuxtaʼaboʼob tumen Jéeobaoʼ. Utúul máax xokik u tʼaaniloʼob le Bibliaoʼ tu ketaj le baʼaxoʼob tu yaʼalaj le profetaʼob yéetel u cheʼiloʼob upʼéel naj. Tu yaʼaleʼ, wa u jaats máakoʼob maʼ u kʼaj óolubaʼob ku taaskoʼob upʼéel cheʼ cada utúul, jach le bukaʼaj chowakil kʼaʼabéet utiaʼal u beetaʼal le najoʼ, ¿máasaʼ jeʼel k-tuklik yaan máax aʼaltiʼob jach baʼax cheʼi unaj u biskoʼob bey xan bukaʼaj chowakileʼ? Lelaʼ bey u yúuchul yéetel le baʼaxoʼob tu yaʼalaj le profetaʼoboʼ, tumen tu yaʼaloʼob jach bix kun kʼaj óoltbil le Mesíasoʼ.
4 ¿Jeʼel wa u páajtal u béeykuntik chéen jeʼel máaxak tuláakal le baʼaxoʼob ku yaʼalik le profecíaʼoboʼ? Maʼatan. Utúul máak kaʼanchajaʼan u xookeʼ tu yaʼaleʼ «wa maʼ Jesús le Mesíasoʼ maʼ tu páajtal u béeykuntik le baʼaxoʼob tu yaʼalaj le profetaʼoboʼ». Ka tsʼoʼokeʼ tu yaʼaleʼ «jach chéen Jesús» béeykunt tuláakal le baʼaxoʼob aʼalaʼab tu yoʼolal le Mesíasoʼ.
5, 6. 1) ¿Bix kun xuʼulsbil tiʼ Satanás? 2) ¿Bix úuchik u bin u yojéeltaʼal jach máax le «chʼiʼibal» aʼalaʼanoʼ?
5 Le profecíaʼob tʼaanajoʼob tiʼ le Mesíasoʼ letiʼe baʼax «u taʼakmaj Jajal Diosoʼ» (Col. 1:26, 27; Gén. 3:15). Baʼaleʼ le baʼax u taʼakmaj Diosoʼ maʼ chéen tiʼ upʼéel baʼal ku tʼaaniʼ. Upʼéel tiʼ le baʼax ku yaʼalikoʼ ku yeʼesik bix kun xuʼulsbil tiʼ «le nojoch kaan» wa Satanás, le máax beet u kʼebantal yéetel u kíimil máakoʼ (Apo. 12:9). ¿Bix túun kun xuʼulsbil tiʼ? Jéeobaeʼ tu yaʼaleʼ u «chʼiʼibal» «le koʼoleloʼ» yaan u «kiimbesik» tu pool le «kaanoʼ», lelaʼ u kʼáat u yaʼaleʼ yaan u xuʼulsik tiʼ le máax beet u náachtal máak tiʼ Diosoʼ, le máax beetik u kʼojaʼantal yéetel u kíimil máakoʼ. Baʼaleʼ táanil tiʼ u yúuchul lelaʼ, Dioseʼ yaan u chaʼik u chiʼibil u tuunkuy u «chʼiʼibal» «le koʼolel» tumen le Kʼaasilbaʼaloʼ.
6 Le «chʼiʼibal» aʼalaʼanoʼ jujumpʼíitil úuchik u bin u yojéeltaʼal jach máaxiʼ. Yáaxeʼ Jéeobaeʼ tu yaʼalaj tiʼ Abraham: «Tuláakal xan u múuchʼ kaajiloʼob yóokʼol kaabeʼ bíin kiʼtʼantaʼakoʼob tu [yoʼolal a chʼiʼibal]» (Gén. 22:18). Ka máan kʼiineʼ, Moiseseʼ tu yaʼaleʼ le «chʼiʼibal» aʼalaʼanoʼ yaan u beetik u profetai, baʼaleʼ maas nojoch tiʼ letiʼ (Deu. 18:18, 19). Ka máan kʼiin xaneʼ, aʼalaʼab tiʼ David tu chʼiʼibal kun síijil le Mesíasoʼ, yaan u kutal tu trono yéetel yaan u gobernar utiaʼal mantatsʼ, lelaʼ bey aʼalaʼabik xan tumen uláakʼ profetaʼoboʼ (2 Sam. 7:12, 16; Jer. 23:5, 6).
¿Baʼaxoʼob eʼesik Jesuseʼ letiʼ le Mesíasoʼ?
7. ¿Baʼaxten k-aʼalikeʼ Jesuseʼ taal tiʼ u chʼiʼibal «le koʼoleloʼ»?
7 Le «chʼiʼibal» aʼalaʼanoʼ taal tiʼ «le koʼolel» ku chíikbesaʼal tumen tuláakal le angeloʼoboʼ. Le u yáax Paal Diosoʼ «tu pʼataj juntséelil le baʼax utiaʼal» teʼ kaʼanoʼ ka síij bey utúul wíinik minaʼan u kʼeebaneʼ (Fili. 2:5-7; Juan 1:14). María, u maama Jesuseʼ, pixaʼab tumen le kiliʼich muukʼoʼ, le oʼolal ku yaʼalaʼal Jesuseʼ u «kiliʼich [...] Paal Jajal Dios» (Luc. 1:35).
8. ¿Baʼax profecíailoʼob béeychajoʼob tiʼ Jesús le ka tsʼaʼab u yokjaʼ tumen Juanoʼ?
8 Le profecíaʼoboʼ tu yaʼaloʼobeʼ le Mesíasoʼ tu kaajil Belén kun síijil, Jesús xaneʼ jach tiʼ síijiʼ (Miq. 5:2). Baʼaleʼ ku yaʼalikoʼob xan jach baʼax kʼiin ken chíikpajak le Mesíasoʼ. Le oʼolaleʼ, le judíoʼob teʼ yáax siglooʼ jach táan u páaʼtikoʼob u chíikpajal le Mesíasoʼ. Yaan tak tiʼ letiʼobeʼ ku «tukultikoʼob kaʼacheʼ [...] Juaneʼ letiʼ [le] Cristo[oʼ]». Baʼaleʼ Juaneʼ tu yaʼalajtiʼob: «Táan u taal juntúul [...] maanal tipʼaʼanil u páajtalil tiʼ teen» (Luc. 3:15, 16). Ka tu tsʼáaj 30 jaʼaboʼob tiʼ Jesuseʼ bin tu yiknal Juan utiaʼal ka tsʼaʼabak u yokjaʼ. Le ka bin tu yiknaloʼ maʼ yaʼab mesoʼob u bin u jóokʼol u jaʼabil 29 tiʼ le yáax siglooʼ, le jaʼab aʼalaʼan kun chíikpajal le Mesíasoʼ (Dan. 9:25). Le ka tsʼoʼok u yokjaʼ Jesuseʼ káaj u kʼaʼaytaj táan u yaʼalik: «Tsʼoʼok u kʼuchul u kʼiinil. Naatsʼ yanil u [reino] Jajal Dios» (Mar. 1:14, 15).
9. Kex yaan baʼaxoʼob maʼ tu jach naʼatkoʼob kaʼach yoʼolal le Mesíasoʼ, ¿baʼax jach u yojel le disipuloʼoboʼ?
9 Kex le máakoʼob tu yaʼaloʼob Jesús utúul reyeʼ, maʼ tu naʼatoʼob wa maʼ kʼuchuk u kʼiiniliʼ mix tu naʼatoʼob wa teʼ kaʼan kun reinaroʼ (Juan 12:12-16; 16:12, 13; Hch. 2:32-36). Kex beyoʼ, le ka tu kʼáataj Jesús tiʼ u disipuloʼob: «Kux teʼex, ¿baʼax ka waʼalikeʼex? ¿Máaxen teen?», Pedroeʼ tu núukaj túun tiʼ: «Techeʼ letiʼ le Cristo, u Paal le kuxaʼan Jajal Diosoʼ» (Mat. 16:13-16). Lelaʼ bey xan tu yaʼalil le ka xuʼul u tsaypachtaʼal Jesús tumen yaʼab tiʼ le máaxoʼob maʼ tu naʼatoʼob le baʼaxoʼob tu kaʼansoʼ (xokaʼak Juan 6:68, 69).
Unaj u yuʼubikoʼob u tʼaan le Mesíasoʼ
10. ¿Baʼaxten tu yaʼalaj Jéeoba ka uʼuyaʼak u tʼaan u Hijo?
10 Le u yáax Hijo Diosoʼ, yaʼab páajtalil tsʼaʼantiʼ kaʼach teʼ kaʼanoʼ, le oʼolal le ka taal way Luʼumeʼ tu yaʼalaj: «Tiʼ Jajal Dios taalajaʼanen» (Juan 16:27, 28). Yéetel tu yaʼalaj xan: «In kaʼansajeʼ maʼ in tiaʼaliʼ baʼaleʼ utiaʼal le máax túuxtenoʼ» (Juan 7:16). Tak tu kʼiinil le transfiguracionoʼ, Jéeobaeʼ tu yaʼaleʼ Jesuseʼ letiʼ le Máax u yéeymoʼ yéetel tu yaʼalaj xan: «Uʼuyeʼex u tʼaan» (Luc. 9:35). Bey túunoʼ le disipuloʼoboʼ unaj u yuʼubikoʼob u tʼaan, wa u beetikoʼob le baʼax ku yaʼalik Jesusoʼ. Unaj u tsʼáaik u fejoʼob tiʼ letiʼ yéetel u beetkoʼob baʼaloʼob maʼalobtak, beyoʼ jeʼel u lúubloʼob utsil tiʼ Dioseʼ yéetel jeʼel u tsʼaʼabal le kuxtal minaʼan u xuul tiʼoboʼ (Juan 3:16, 35, 36).
11, 12. 1) ¿Baʼaxten yaʼab judíoʼobeʼ maʼ tu creertoʼob wa Jesuseʼ letiʼ le Mesíasoʼ? 2) ¿Máaxoʼob tu tsʼáaj u fejoʼob tiʼ Jesús?
11 Kex jach yaʼab baʼaxoʼob eʼes Jesús letiʼ le Mesíasoʼ, yaʼab tiʼ le judíoʼoboʼ maʼ tu creertoʼobiʼ. ¿Baʼaxten? Yoʼolal bix u tuukuloʼob. Letiʼobeʼ ku tuklikoʼob kaʼacheʼ letiʼe Mesías kun jáalkʼabtikoʼob tiʼ le romailoʼoboʼ (xokaʼak Juan 12:34). Baʼaleʼ le profecíaʼoboʼ ku yeʼesikoʼobeʼ, le Mesíasoʼ maʼ kun kʼambil, yaan u «mukʼyaj», yaan u jaʼajatsʼaʼal yéetel yaan u kíimsaʼal. Letiʼobeʼ maʼ tu kʼamkoʼob utúul máak beyoʼ (Isa. 53:3, 5). Tak jujuntúul tiʼ u disipuloʼob Jesuseʼ lúub u yóoloʼob ka tu yiloʼob maʼ tu jáalkʼabtaj u kaajil Israel tiʼ Romai. Kex beyoʼ, maʼ tu xulaj u tsaypachkoʼobiʼ, le oʼolal ka máan kʼiineʼ kʼuch u naʼatoʼob tuláakal le baʼaxoʼob ku yaʼalik le profecíaʼoboʼ (Luc. 24:21).
12 Yaʼab máakoʼob xaneʼ maʼ tu creertoʼob wa Jesuseʼ letiʼ le Mesíasoʼ, tumen tu yiloʼob bey jach talam jeʼel u beetikoʼob le baʼaxoʼob tu yaʼaloʼ. Jesuseʼ tu yaʼaleʼ utiaʼal ka okok máak tu Reino Dioseʼ kʼaʼabéet u pʼektikuba, u «jaantik u wíinklil» yéetel u «yukʼik u kʼiʼikʼel» Cristo, u «síijil tu kaʼatéen» yéetel maʼ u yantal mix baʼal u yil yéetel «yóokʼol kaab» (Mar. 8:34; Juan 3:3; 6:53; 17:14, 16). Le máaxoʼob ayikʼaloʼob, le jach noj baʼal u taaskubaʼob yéetel le maʼatech u beetkoʼob le baʼaxoʼob ku kaʼanskoʼoboʼ jach talam úuchik u yilkoʼob le baʼax tu yaʼalaj Jesús ka beetaʼakoʼ. Baʼaleʼ le judíoʼob kabal u yóoloʼoboʼ séeb úuchik u kʼaj óoltikoʼob Jesuseʼ letiʼ le Mesíasoʼ. Tak jujuntúul tiʼ le samariailoʼoboʼ bey tu beetiloʼoboʼ, letiʼobeʼ tu yaʼaloʼob: «Jach tu jaajil letiʼ le Cristooʼ, [le máax kun salvartik] yóokʼol kaa[boʼ]» (Juan 4:25, 26, 41, 42; 7:31).
13. ¿Bix úuchik u chiʼibil Jesús tu tuunkuy?
13 Jesuseʼ tu yaʼaleʼ u nuuktakil le j-kʼiinoʼob kun aʼalik ka kíimsaʼakoʼ, yaan u chʼuykíintaʼal tiʼ upʼéel cheʼ tumen máakoʼob maʼ judíoʼobiʼ yéetel tu yóoxpʼéel kʼiineʼ yaan u kaʼa kuxtal (Mat. 20:17-19). Le ka tu yaʼalaj tu táan le Sanedrín letiʼ «le Cristo» yéetel letiʼ «u Paal Jajal Dios[oʼ]», aʼalaʼab chéen táan u kʼaakʼas tʼaan tu contra Dios (Mat. 26:63-66). Tsʼoʼoleʼ, ka bisaʼab tu táan Pilatoeʼ, letiʼeʼ tu yileʼ Jesuseʼ «mix baʼal u beetmaj utiaʼal ka u náajmat u kíimsaʼal», baʼaleʼ tumen le judíoʼob tu yaʼaloʼob táan u beetik u pʼuʼujul le kaajoʼ, ka tu kʼubajtiʼob (Luc. 23:13-15, 25). Letiʼobeʼ maʼ tu kʼamoʼob «le máax ku tsʼáaik kuxtaloʼ», baʼaxeʼ tu yiloʼob bix ken u kíimsoʼob kex jach yaʼab baʼaxoʼob eʼesik letiʼ le Máax túuxtaʼab tumen Diosoʼ (Hch. 3:13-15). Jach jeʼex aʼalaʼabikoʼ, luʼsaʼab «u kuxtal» le ka chʼuykíintaʼab tiʼ upʼéel cheʼ tu kʼiinil le Pascua tiʼ u jaʼabil 33 tiʼ le yáax siglooʼ (Dan. 9:26, 27; Hch. 2:22, 23). Le úuchik u kíimsaʼaloʼ bey ka chiʼibik u tuunkuy jeʼex aʼalaʼabik tu profecíai Génesis 3:15.
¿Baʼaxten kʼaʼabéetchaj u kíimsaʼal le Mesíasoʼ?
14, 15. 1) ¿Baʼaxten Jéeobaeʼ tu chaʼaj u kíimsaʼal Jesús? 2) ¿Baʼax tu beetaj Jesús ka tsʼoʼok u kaʼa kuxtal?
14 Jéeobaeʼ tu chaʼaj u kíimsaʼal u Hijo yoʼolal kaʼapʼéel baʼal. Le yáaxoʼ, utiaʼal ka chíikpajak le máax táakpajaʼan ichil «u taʼakbil baʼaloʼob» Dios kun béeykuntik le baʼaxoʼob u yaʼalmoʼ. Úuchik u chúukpajal u yóol Jesús tak ka kíimoʼ, tu yeʼeseʼ utúul máak minaʼan u kʼeebaneʼ jeʼel u páajtal u chúukpajal u yóol u meyajt Dios yéetel u tsʼáaikuba tu tséel u gobernación kex ka sen beetaʼak u muʼyaj tumen Satanaseʼ (1 Tim. 3:16). U kaʼapʼéel baʼax óolaleʼ letiʼe baʼax tu yaʼalaj Jesusoʼ: «U Paal Máak[eʼ] [...] taal utiaʼal [...] u tsʼáa u kuxtal bey jumpʼéel boʼol utiaʼal u jáalkʼabtaʼal yaʼabkach máakoʼobeʼ» (Mat. 20:28). Jeʼex túun k-ilkoʼ, «Jesucristoeʼ tu kʼubjuba tiʼ kíimil utiaʼal u boʼotik u tojol» k-jáalkʼabtaʼal tiʼ le kʼeban yanchaj tu yoʼolal Adanoʼ. Tsʼoʼoleʼ ku tsʼáaik u páajtalil u yantaltoʼon kuxtal minaʼan u xuul wa k-kʼamik Jesús bey le máax túuxtaʼab tumen Dios utiaʼal u tsʼáaik salvacionoʼ (1 Tim. 2:5, 6).
15 Cristoeʼ kaʼa kuxlaj tu yóoxpʼéel kʼiinil kíimik, yéetel ichil cuarenta kʼiinoʼobeʼ tu chíikbesuba tiʼ u disipuloʼob utiaʼal u yeʼesiktiʼob jach tu jaajil tsʼoʼok u kaʼa kuxtal yéetel utiaʼal u yaʼaliktiʼob uláakʼ baʼaloʼob kʼaʼanantak (Hch. 1:3-5). Ka tsʼoʼokeʼ bin teʼ kaʼan utiaʼal u kʼubik tu táan Jéeoba le u tojol u kuxtal tsʼoʼok u tsʼáaikoʼ. Kex yanchaj u páaʼtik u kʼuchul u kʼiinil u tsʼaʼabal u beet u Reyil tiʼ u Reino Dioseʼ, yaan uláakʼ meyajoʼob tu beetaj le táan u páaʼtik le kʼiin jeʼeloʼ.
Le meyaj tsʼaʼab u beet le Mesíasoʼ maʼ yaʼab u bin u tsʼoʼoliʼ
16, 17. ¿Baʼax meyajiloʼob tsʼoʼok u beetik Jesús desde le ka suunaj teʼ kaʼanoʼ?
16 Tuláakal le jaʼaboʼob tsʼoʼok u máan desde kaʼa kuxlak Jesusoʼ, letiʼ gobernartik yéetel nuʼuktik le meyajoʼob ku beetaʼal teʼ múuchʼuliloʼ (Col. 1:13). Baʼaleʼ kʼuch u kʼiinil utiaʼal u beetik u Reyil tiʼ u Reino Dios. Le profecíaʼob yéetel le baʼaxoʼob ku yúuchloʼob teʼ yóokʼol kaabaʼ ku yeʼeskoʼobeʼ Jesuseʼ káaj u beetik u Reyil tu jaʼabil 1914, yéetel teʼ jaʼab jeʼeloʼ tiʼ káaj xan u taal u tsʼoʼokol tiʼ le yóokʼol kaabaʼ (Mat. 24:3; Apo. 11:15). Maʼ úuch tiʼ leloʼ, Jesús yéetel u angeloʼobeʼ tu jóoʼsoʼob Satanás yéetel u kʼasaʼan angeloʼob teʼ kaʼanoʼ (Apo. 12:7-10).
17 Le kʼaʼaytaj yéetel le kaʼansaj káaj u beetik Jesús tu jaʼabil 29 tiʼ le yáax siglooʼ jach taʼaytak u tsʼoʼokol. Maʼ kun xáantaleʼ letiʼeʼ yaan u juzgartik u kajnáaliloʼob le yóokʼol kaabaʼ. Le máaxoʼob tu kʼamoʼob Jesús bey le máax túuxtaʼab utiaʼal u tsʼáaik salvacionoʼ yaan u tsʼaʼabaltiʼob «le [reino] nuʼuktaʼan [utiaʼaloʼob] le ka tu beetaj Jajal Dios yóokʼol kaaboʼ» (Mat. 25:31-34, 41). Baʼaleʼ le máaxoʼob maʼ tu kʼamoʼob Jesusoʼ yaan u xuʼulsaʼaltiʼob tumen Jesús yéetel u angeloʼob, bey ken u xuʼulsik tiʼ le baʼaxoʼob kʼaastakoʼ. Jesús túuneʼ yaan u kʼaxik Satanás yéetel yaan u pulik paʼteʼ yéetel u kʼasaʼan angeloʼob ichil le «taamkach chʼeʼenoʼ» (Apo. 19:11-14; 20:1-3).
18, 19. ¿Baʼaxoʼob ken u beet le Mesíasoʼ, yéetel baʼax utsiloʼob ken u taas tiʼ le máaxoʼob beetik baʼax ku yaʼalikoʼ?
18 Ichil le mil jaʼaboʼob kun Reinar Jesusoʼ, yaan u béeykuntik tuláakal le baʼaxoʼob aʼalaʼan tu yoʼolaloʼ, yaan u beetik u «jach maʼalob J-tsolnuʼuk[il], NM, [Dios] maʼ ilajbeʼeniʼ, u Yuumbil [wa Taata] minaʼan xuʼulul tiʼ, u [Principei] jéetsʼel» (Isa. 9:6, 7). Yáanal u gobernacioneʼ yaan u luʼsik u kʼeeban tuláakal wíinik, tak le kun kaʼa kuxtaloʼoboʼ (Juan 5:26-29). Le Mesíasoʼ yaan u nuʼuktik le máakoʼob tak tu «sayabiloʼob u jaʼil kuxtal», lelaʼ yaan u tsʼáaik u páajtalil u biskubaʼob maʼalob yéetel Jéeoba (xokaʼak Apocalipsis 7:16, 17). Baʼaleʼ, ken tsʼoʼokok le u tsʼook túuntaj óoloʼ, yaan u kiimbesik «le kaan» tu pooloʼ, Satanás túun yéetel u kʼasaʼan angeloʼob, paʼteʼ yéetel le máaxoʼob ken u tsʼáaubaʼob tu tséeloʼ, yaan u puʼululoʼob «ichil u kʼáakʼil azufre» (Apo. 20:10).
19 Jeʼex tsʼoʼok k-ilkoʼ, Jesús, le Mesíasoʼ, jach táan u béeykuntik tuláakal le meyajoʼob tsʼaʼan u beetoʼ. Le oʼolaleʼ, tuláakal le Luʼumaʼ yaan u suʼutul Paraísoi utiaʼal u kajtal tuláakal le máaxoʼob ken u salvartubaʼoboʼ, yéetel yaan u páajtal u kuxtaloʼob ich kiʼimak óolal yéetel toj óolal utiaʼal mantatsʼiʼ. Tsʼoʼoleʼ, yaan u chíikpajal maʼ jaajtak tuláakal le baʼaxoʼob aʼalaʼab tu contra u kʼaabaʼ Dios yéetel yaan u chíikpajal chéen tiʼ letiʼ yaan u derechoi u gobernar. ¿Máasaʼ jach jatsʼuts le baʼaxoʼob ku páaʼtik le máaxoʼob beetik le baʼaxoʼob ku yaʼalik le Mesíasoʼ?
¿Tsʼoʼok wa a «nuptáantik le Mesíasoʼ»?
20, 21. ¿Baʼaxten jach unaj k-áantik u maasil u naʼatoʼob Jesuseʼ letiʼ le Mesíasoʼ?
20 Desde tu jaʼabil 1914 tiʼ kuxaʼanoʼon teʼ kʼiinoʼob ku kʼaabaʼtik parousía, wa le kʼiinoʼob way yaan Cristo yéetel u páajtalil le Reinooʼ. Kex maʼ tu páajtal u yilaʼal Cristo teʼ kʼiinoʼobaʼ, le bix u béeytal le profecíaʼoboʼ ku yeʼesikoʼob jach tu jaajil way yaneʼ (Apo. 6:2-8). Kex beyoʼ, u maas yaʼabil le máakoʼoboʼ maʼ u kʼáatoʼob u creertoʼob, jeʼex tu beetil le judíoʼob teʼ yáax siglooʼ. Láayliʼ táan u páaʼtikoʼob utúul mesías ku yoksikuba tiʼ política, wa utúul máax ka u nuʼukt u gobiernoiloʼob le yóokʼol kaabaʼ. Baʼaleʼ toʼoneʼ k-ojel Jesuseʼ tsʼoʼok u káajal u gobernar. ¿Bix úuchik k-uʼuyikba le ka t-ojéeltaj lelaʼ? Maʼ xaaneʼ t-aʼalaj jeʼex úuchik u yaʼalik le yáax disipuloʼoboʼ: «Tsʼoʼok [k-]nuptáantik le Mesíasoʼ».
21 Teʼ kʼiinoʼobaʼ maas jach unaj k-áantik le máakoʼob u naʼatoʼob baʼax meyajil ku beetik Jesús, le Mesíasoʼ. Techeʼ, ¿táan wa a beetik? Wa táaneʼ, yaan a wilik jach maʼalob le baʼaxoʼob tsʼoʼok u beetikoʼ yéetel le baʼaxoʼob ken u beet maʼ kun xáantal yoʼolal tuláakal máakoʼ. Jeʼex Andrés yéetel Felipeiʼ, maʼ xaaneʼ techeʼ tsʼoʼok xan a tsikbaltik tiʼ a láakʼtsiloʼob yéetel tiʼ a amigoʼob le baʼaxoʼob tsʼoʼok a kanik tiʼ Cristooʼ. K-kʼáat óoltik ka u yáantech le baʼaxoʼob tsʼoʼok k-ilik teʼ xook utiaʼal ka seguernak a wáantik le máakoʼob u naʼatoʼobeʼ Jesuseʼ letiʼe Mesías aʼalaʼab kun tsʼáaik salvacionoʼ.
¿Jeʼel wa u páajtal a tsolkeʼ?
• ¿Bix úuchik u páajtal u kʼaj óoltaʼal le Mesías tumen le yáax disipuloʼoboʼ?
• ¿Baʼax oʼolal kʼaʼabéetchaj u kíimil Jesús?
• ¿Baʼax ken u beet le Mesías maʼ kun xáantaloʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 21]
¿Baʼaxten le judíoʼob teʼ yáax siglooʼ jeʼel u páajtal u kʼaj óoltikoʼob Jesuseʼ letiʼe Mesías aʼalaʼanoʼ?
[U tsolajil le oochel teʼ táan juʼun 23]
¿K-kaʼansik wa tiʼ u maasil le baʼaxoʼob ku beetik Jesús, le Mesíasoʼ?