Unaj u yantaltoʼon le yaabilaj mix bikʼin u kíimloʼ

«Le yaakunajoʼ mix bikʼin ku kíimil.» (1 COR. 13:7, 8)

1. 1) ¿Baʼax ku yaʼalaʼal yoʼolal le yaabilajoʼ? 2) ¿Baʼax ku maas yaabiltaʼal tumen le máakoʼoboʼ?

BEJLAʼEʼ yaʼab máakoʼob ku tʼaanoʼob jatsʼuts tiʼ le yaabilajoʼ. Jeʼex le kʼaayoʼob, le novelaʼob yéetel le peliculaʼob kun sen koʼonloʼob bejlaʼaʼ ku tʼaanoʼob jatsʼuts tiʼ le yaabilajoʼ wa ku yeʼeskoʼob bey upʼéel baʼal maʼ tu páajtal u yantal tiʼ máakeʼ. U jaajileʼ teʼ tu tsʼook kʼiinoʼobaʼ óoliʼ mix máak yaabiltik Dios mix u yéet máaki. Jeʼex u yaʼalik le Bibliaoʼ, u maas yaʼabil «máakoʼobeʼ bíin tsʼuʼutchajkoʼob», «bíin u yaabiltoʼob taakʼin» yéetel «bíin u yaabiltoʼob u kʼaakʼas tsʼíibolaloʼob baʼaleʼ maʼ bin u yaabiltoʼob Jajal Diosiʼ» (2 Tim. 3:1-5).

2. ¿Baʼaxoʼob ku yaʼalik le Biblia maʼ unaj k-yaabiltkoʼ?

² U jaajileʼ tuláakal máak yaan u páajtalil u yeʼesik yaabilaj, baʼaleʼ le Bibliaoʼ ku yaʼalikeʼ unaj k-kanáantik maʼ k-yaabiltik baʼax maʼ unajiʼ, yéetel ku yaʼalik baʼax talmil jeʼel u taasik wa ka úuchuktoʼon beyoʼ (1 Tim. 6:9, 10). Tuukulnakoʼon tiʼ Demas, utúul máax meyajnaj yéetel  Pablo, letiʼeʼ tu xulaj u meyajtik Dios tumen tu yaabiltaj le baʼaxoʼob ku tsʼáaik le yóokʼol kaabaʼ (2 Tim. 4:10). Apóstol Juaneʼ ku yaʼalik kʼaʼabéet k-kanáantikba tiʼ le baʼaloʼobaʼ (xokaʼak 1 Juan 2:15, 16). Lelaʼ ku yeʼesiktoʼoneʼ wa k-yaabiltik le baʼaxoʼob ku tsʼáaik le yóokʼol kaabaʼ maʼ tu páajtal k-yaabiltik Dios mix le baʼaxoʼob ku taal tiʼ letiʼoʼ.

3. ¿Baʼax maʼ maʼalob jeʼel u joʼopʼol k-beetkeʼ, yéetel baʼax kʼáatchiʼiloʼob ken k-núuk teʼ xookaʼ?

³ U jaajileʼ maʼatech k-oksikba tiʼ u baʼalubaʼob le yóokʼol kaabaʼ, baʼaleʼ tiʼ kuxaʼanoʼoniʼ, le oʼolal jeʼel u joʼopʼol k-yaabiltik xan le baʼaxoʼob ku yaabiltik u maasil máakoʼ. Le oʼolaleʼ maʼalob ka tuukulnakoʼon tiʼ le kʼáatchiʼobaʼ: ¿Máaxoʼob unaj k-yaabiltik? ¿Bix jeʼel u yantaltoʼon le yaabilaj ku muʼyajtik tuláakal baʼal yéetel mix bikʼin kun kíimloʼ? Wa k-eʼesik le yaabilajaʼ, ¿baʼax utsiloʼob jeʼel k-kʼamik bejlaʼa bey xan teʼ kʼiinoʼob ku taaloʼ? Koʼoneʼex ilik baʼax ku yaʼalik Dios unaj k-beetik sáamsamal.

Unaj k-ilik yaabiltik Jéeoba

4. ¿Baʼax jeʼel u yáantkoʼon k-maas yaabilt Dioseʼ?

⁴ Toʼoneʼ unaj k-ilik yaabiltik Dios. Jeʼex utúul j-kolnáaleʼ, ¿baʼaxoʼob ku beetik táanil tiʼ u paakʼáal? Ku limpiartik le luʼumoʼ tsʼoʼoleʼ ku pakʼik (Heb. 6:7). Toʼoneʼ, ¿bix túun jeʼel u páajtal k-maas yaabiltik Dioseʼ? Unaj k-limpiartik xan k-puksiʼikʼal, le tuʼux paakʼal u semillai le baʼax ku kaʼansik le Bibliaoʼ. Le oʼolal kʼaʼabéet k-xakʼalxoktik le Biblia utiaʼal ka kʼuchkoʼon k-kʼaj óolt maʼalob Jéeobaoʼ (Col. 1:10). Uláakʼ baʼax jeʼel u yáantkoʼoneʼ letiʼe ka xiʼikoʼon yéetel ka táakpajkoʼon tiʼ tuláakal le muchʼtáambaloʼoboʼ. Maʼalob ka tukle: «¿Kin wilik wa in naʼatik le baʼaxoʼob talamtak ku kaʼansik le Bibliaoʼ?» (Pro. 2:1-7).

5. 1) ¿Bix jeʼel k-maas kʼaj óoltik u jatsʼuts modosoʼob Jéeobaeʼ? 2) ¿Baʼax jeʼel u yáantkoʼon k-maas kʼaj óolt u justicia, u naʼat yéetel u páajtalil Dioseʼ?

⁵ Jéeobaeʼ ku yeʼesiktoʼon u jatsʼuts modos ichil le Bibliaoʼ. Le oʼolal le ken k-xokeʼ ku bin k-maas kʼaj óoltik Dios, tsʼoʼoleʼ yaan xan k-maas kʼaj óoltik u justicia, u naʼat, u páajtalil yéetel u yaabilaj. Ken k-il le baʼaxoʼob ku beetik bey xan le leyoʼob u tsʼaamoʼ k-naʼatik bix u yeʼesik justicia (Deu. 32:4; Sal. 19:7). Ken tuukulnakoʼon tiʼ le baʼaxoʼob u beetmoʼ k-ilik bukaʼaj nojchil u naʼat (Sal. 104:24). Yéetel ken k-il le baʼaxoʼob u beetmaj teʼ kaʼanoʼ k-tsʼáaik cuenta jach minaʼan u xuul u páajtalil (Isa. 40:26).

6. ¿Baʼax tu beetaj Dios utiaʼal u yeʼesik jach u yaabiltmoʼon, yéetel baʼax unaj k-beetik utiaʼal k-kʼamik u yutsil le baʼax tu beetoʼ?

⁶ Baʼaleʼ ¿baʼax jeʼel u páajtal u yaʼalaʼal yoʼolal le yaabilaj, le maas nojoch modos ku yeʼesik Jéeobaoʼ? Jéeobaeʼ u kʼáat u yeʼes u yaabilaj tiʼ u maas yaʼabil máak ku páajtal. U jaajileʼ tuláakal máak jeʼel u kʼamik le utsil ku taal tiʼ u yaabilajoʼ. Yoʼolal lelaʼ tu tsʼáaj upʼéel boʼol utiaʼal u páajtal u tokikoʼon tiʼ le kʼebanoʼ (xokaʼak Romailoʼob 5:8). Lelaʼ tuláakal máak jeʼel u páajtal u kʼamik u yutsileʼ, baʼaleʼ unaj u yaabiltik máak Dios yéetel unaj u tsʼáaik u fe tiʼ u Hijo (Juan 3:16, 36). U jaajileʼ Jéeobaeʼ jach ku náajmatik ka k-yaabilt yoʼolal u kuxtal Jesús tu kʼubaj utiaʼal u boʼotik k-kʼeebanoʼ.

7, 8. 1) ¿Bix jeʼel k-eʼesik k-yaabiltmaj Dioseʼ? 2) ¿Bix u yilik yaʼab máakoʼob le kʼaʼaytaj k-beetkoʼ?

⁷ Baʼaleʼ ¿bix jeʼel u páajtal k-eʼesik k-yaabilmaj Jéeoba yéetel k-tsʼáaik u nib óolalil tiʼ yoʼolal tuláakal le baʼaxoʼob u beetmoʼ? Le Bibliaoʼ ku yaʼalik: «Tumen u yaabiltaʼal Jajal Dioseʼ u yuʼubajtʼantaʼal u yaʼalmajtʼaanoʼob; yéetel  u yaʼalmajtʼaanoʼobeʼ maʼ talamoʼobiʼ» (1 Juan 5:3). Jeʼex túun k-ilkoʼ, wa k-yaabiltma Jéeobaeʼ yaan k-beetik tuláakal baʼax ku yaʼaliktoʼon. Lelaʼ upʼéel tiʼ le baʼaxoʼob péekskoʼon k-tsʼáa kʼaj óoltbil u kʼaabaʼoʼ yéetel k-kʼaʼayt u Reino; le meyajaʼ ku taasik yaʼab utsiloʼob tiʼ le máaxoʼob kʼamkoʼ. Wa k-puksiʼikʼal péekskoʼon utiaʼal ka jóoʼkoʼon kʼaʼaytajeʼ k-eʼesik jach tu jaajil k-óol k-kʼáat beet baʼax ku yaʼalik Dios (Mat. 12:34).

⁸ Yaʼab máakoʼobeʼ maʼatech u kʼamkoʼob le maʼalob péektsiloʼ. Baʼaleʼ toʼoneʼ k-ilik beetik tuláakal le ku páajtal utiaʼal k-tsʼáaik kʼaj óoltbil le baʼaxoʼob ku yaʼalik Jéeoba, jeʼex u beetik u maasil sukuʼunoʼob tiʼ tuláakal yóokʼol kaaboʼ, yéetel k-ilik k-tsʼoʼokbesik xan uláakʼ baʼaxoʼob ku yaʼalik ka k-beetoʼ (2 Tim. 4:5).

Baʼaxten unaj k-yaabiltik Jesucristo

9. ¿Baʼax talmiloʼob tu aktáantaj Jesús, yéetel baʼaxten?

⁹ Le yaabilaj k-uʼuyik yoʼolal Diosoʼ ku péekskoʼon k-yaabilt Jesús, u Hijo. Baʼaleʼ yaan uláakʼ baʼax péekskoʼon yaabilte. Kex mix utéen k-il Jesuseʼ, ku páajtal k-maas kʼaj óoltik ken k-xok baʼaxoʼob tu beetaj, lelaʼ ku péekskoʼon k-maas yaabilte (1 Ped. 1:8). ¿Baʼax talmiloʼob tu aktáantaj? Letiʼeʼ tu beetaj baʼax utstutʼaan u Taata, baʼaleʼ pʼektaʼab kex mix baʼal kʼaas tu beetaj, chʼaʼapachtaʼabi, aʼalaʼab baʼaloʼob maʼ jaajtak tu contraiʼ, poʼochʼi yéetel jach mixbaʼalkúuntaʼabi (xokaʼak Juan 15:25). Chúukpaj u yóol u aktáant le baʼaloʼobaʼ, tumen u yaabiltmaj u Taata. Lelaʼ letiʼ péeks u tsʼáa u kuxtal tu yoʼolal yaʼabach máakoʼob (Mat. 20:28).

10, 11. ¿Baʼax ku péekskoʼon k-beet le yaabilaj tu yeʼesajtoʼon Cristooʼ?

¹⁰ Ken tuukulnakoʼon tiʼ le baʼaxoʼob tu beetaj Jesusoʼ, ku péekskoʼon k-maas yaabilte. Toʼoneʼ u disipuloʼon, le oʼolal k-ilik k-eʼesik yaabilaj jeʼex tu beetiloʼ. Lelaʼ le áantkoʼon utiaʼal ka chúukpajak k-óol kʼaʼayt u maʼalob péektsilil le Reinooʼ yéetel utiaʼal ka k-kaʼans u maasil (Mat. 28:19, 20).

¹¹ Le yaabilaj tu yeʼesaj Cristo tiʼ tuláakal máakoʼ ku péekskoʼon k-beet tuláakal le ku páajtal utiaʼal k-bisik le maʼalob péektsil tuláakal tuʼux táanil tiʼ u kʼuchul le xuʼulsajiloʼ (xokaʼak 2 Corintoiloʼob 5:14, 15). Maʼ unaj xan u tuʼubultoʼoneʼ, letiʼe yaabilaj péeksik Jesús u béeykunt tuláakal le baʼaxoʼob u tukulmaj u beetik Jéeoba tu yoʼolal wíinikoʼ. Kʼaʼajaktoʼoneʼ chéen wa k-beetik jeʼex Jesusoʼ, jeʼel u béeytal k-tsʼoʼokbesik xan le meyaj kʼubéentaʼantoʼonoʼ. Baʼaleʼ utiaʼal ka páajchajak k-beetik beyoʼ unaj k-jach yaabiltik Dios (Mat. 22:37). Wa k-beetik le baʼaxoʼob tu kaʼansaj yéetel tu yaʼalaj Cristo ka k-beetoʼ, k-eʼesik k-yaabiltmaj, yéetel k-kʼáat k-tsʼáakba tu tséel u gobernación Dios kex jeʼel baʼalak ka úuchuktoʼoneʼ (Juan 14:23, 24; 15:10).

Seguernak k-máan teʼ «bej [maas] maʼalob[oʼ]»

12. ¿Baʼax tu yóotaj u yaʼal Pablo yéetel le tʼaan «jumpʼéel bej [maas] maʼalob[oʼ]»?

¹² Pabloeʼ jach tu beetaj jeʼex úuchik u beetik Cristooʼ, le oʼolal páajchaj u yaʼalik tiʼ le corintoiloʼob ka u beetoʼob jeʼex tu beetiloʼ (1 Cor. 11:1). Letiʼeʼ tu yaʼalajtiʼob ka u yil u tsʼaʼabaltiʼob u páajtalil u beetkoʼob milagroʼob,  u páajtalil u tʼaanoʼob ich yaanal tʼaanil yéetel u tsʼakikoʼob kʼojaʼanoʼob, baʼaleʼ tu yaʼalajtiʼob yaan upʼéel baʼax maas unaj u yantaltiʼob. Tu yaʼalajtiʼob: «Bin in kaʼaj in weʼesteʼex «jumpʼéel bej [maas] maʼalob» (1 Cor. 12:31). Ken k-xok le uláakʼ versiculoʼoboʼ k-ilikeʼ táan u tʼaan tiʼ le yaabilajoʼ. Baʼaleʼ ¿baʼaxten tu yaʼalaj «jumpʼéel bej [maas] maʼalob»? Lelaʼ k-maas naʼatik ken k-xok upʼéel kettʼaan tu beetaj le apostoloʼ (xokaʼak 1 Corintoiloʼob 13:1-3). Letiʼeʼ tu yaʼaleʼ wa ku beetik nukuch meyajoʼob, baʼaleʼ wa maʼ tu yeʼesik yaabilajeʼ, mix baʼal u beelal. ¿Máasaʼ jach maʼalob le baʼax tu yaʼaloʼ?

13. 1) ¿Máakalmáak u tekstoi u jaʼabil 2010? 2) Tsol baʼax u kʼáat u yaʼal le tʼaan «le yaakunajoʼ mix bikʼin ku kíimil».

¹³ Pabloeʼ tu yaʼalaj le baʼaxoʼob ku beetik le yaabilajoʼ yéetel le baʼaxoʼob maʼatech u beetikoʼ (xokaʼak 1 Corintoiloʼob 13:4-8). Cada utúul tiʼ toʼoneʼ unaj u yilik wa táan u beetik le baʼax ku yaʼalik le tekstoaʼ. Baʼaleʼ beoraaʼ tuukulnakoʼon tiʼ le baʼax ku yaʼalik u tsʼoʼokbal le versículo 7 yéetel u káajbal le versículo 8, tuʼux jóoʼsaʼan u tekstoi u jaʼabil 2010: Le yaakunajoʼ tuláakal ku muʼyajtik. Le yaakunajoʼ mix bikʼin ku kíimil. Teʼ versículo 8 xanoʼ tu chʼaʼachiʼitaj u tʼaan máak ichil u láakʼ tʼaanil, u naʼatik máak baʼax ku taal kʼiin yéetel uláakʼ páajtaliloʼob ku taal tiʼ le kiliʼich muukʼ tsʼaʼab tiʼ le sukuʼunoʼob teʼ yáax siglooʼ. Pabloeʼ tu yaʼaleʼ le baʼaloʼobaʼ yaan u xuʼulul, baʼaleʼ le yaabilajoʼ maʼ kun xuʼulul. Jéeobaeʼ letiʼ le yaabilajoʼ, letiʼeʼ mix bikʼin u kíimil, le oʼolal le yaabilajoʼ mix bikʼin xan kun kíimil. Le yaabilaj yaan tiʼ Diosoʼ mix bikʼin kun xuʼulul (1 Juan 4:8).

«Tuláakal ku muʼyajtik»

14, 15. 1) ¿Bix jeʼel u yáantik máak le yaabilaj ken u aktáant talmiloʼoboʼ? 2) ¿Baʼaxten maʼ tu xulaj u meyajtik Dios utúul táankelem sukuʼuniʼ?

¹⁴ ¿Baʼax jeʼel u yáantkoʼon aktáant wa baʼax talmileʼ? Letiʼe yaabilaj nuʼuktaʼan tumen le baʼaxoʼob ku yaʼalik le Bibliaoʼ. Le yaabilajaʼ maʼ chéen ku péekskoʼon k-xupba yoʼolal le Reinooʼ. Baʼaxeʼ ku péekskoʼon utiaʼal ka chúukpajak k-óol tsaypacht Cristo bey xan ka k-kʼub k-kuxtal tu yoʼolal wa ku kʼaʼabéettal (Luc. 9:24, 25). Lelaʼ bey tu beetil le J-jaajkunajoʼob kʼaʼaloʼob wa bisaʼaboʼob tiʼ kúuchiloʼob tuʼux sen beetaʼab u muʼyajoʼob yéetel u meyajoʼob tu kʼiinil le u kaʼapʼéel nojoch baʼateltáambaloʼ bey xan le tsʼoʼok le baʼateloʼ.

¹⁵ Tuukulnakoʼon tiʼ le baʼax úuch tiʼ Wilhelm, utúul J-jaajkunaj alemán. Tumen maʼ tu yóotaj u xul u meyajtik Dioseʼ, aʼalaʼabtiʼ tumen le naziʼob yaan u tsʼoʼonol utiaʼal ka kíimsaʼakoʼ. Teʼ tu tsʼook carta tu tsʼíibtoʼ tu yaʼalaj tiʼ u láakʼtsiloʼob: «Toʼoneʼ unaj k-yaabiltik Dios, jeʼex tu yaʼalil Jesucristo ka k-beetoʼ. Wa k-tsʼáaikba tu tséeleʼ, letiʼeʼ yaan u tsʼáaiktoʼon le kuxtaloʼ». Ka máan kʼiineʼ, utúul tiʼ u láakʼtsiloʼobeʼ, tu yaʼalaj baʼax áant utiaʼal ka chúukpajak u yóol u aktáan le talmiloʼoboʼ: «Toʼoneʼ k-chʼaʼatukultmaj ich familiai k-tsʼáaik táanil k-yaabiltik Dios». Lelaʼ letiʼe baʼax péeksik le sukuʼunoʼob kʼalaʼanoʼob Armenia, Corea del Sur yéetel Eritrea, utiaʼal maʼ u xuʼulul u yaabiltkoʼob Jéeobaoʼ.

16. ¿Baʼaxoʼob tu sen muʼyajtaj le sukuʼunoʼob yanoʼob Malauioʼ?

¹⁶ Tuláakʼ tuʼuxoʼobeʼ jejeláas bix u túuntaʼal u yóol le sukuʼunoʼoboʼ. Ich veintiseis jaʼaboʼobeʼ, le sukuʼunoʼob kajaʼanoʼob Malauioʼ chʼaʼapachtaʼaboʼob tumen le gobiernooʼ, pʼektaʼaboʼob yéetel jejeláas bix úuchik u beetaʼal u muʼyajoʼob. Baʼaleʼ le úuchik u chúukpajal u yóoloʼoboʼ tu taasaj utsiloʼob. Ka káaj u chʼaʼapachtaʼaloʼobeʼ chéen 18,000 utúulaloʼob,  baʼaleʼ ka máan treinta jaʼaboʼobeʼ tsʼoʼok u chukik 38,393 utúulaloʼob. Lelaʼ bey xan u yúuchul tuláakʼ luʼumiloʼoboʼ.

17. ¿Baʼaxoʼob ku muʼyajtik jujuntúul sukuʼunoʼob ichil u familiaʼob, yéetel baʼax áantkoʼob u aktáantoʼob?

¹⁷ Wa talam u yilik máak u chʼaʼapachtaʼal tumen u maasil máakoʼobeʼ, maas talam ken pʼektaʼak tumen u láakʼtsiloʼob. Baʼaleʼ ¿maʼ wa u yaʼalmaj Jesús yaniliʼi u yúuchul lelaʼ? U yaʼalmaj. Bejlaʼeʼ yaʼab sukuʼunoʼobeʼ tsʼoʼok u yilkoʼob jach jaaj le baʼax tu yaʼaloʼ (Mat. 10:35, 36). Yaan táankelem paalaloʼobeʼ ku pʼektaʼaloʼob tumen u taataʼob ikil u meyajtkoʼob Jéeoba. Yaan tiʼ letiʼobeʼ ku jóoʼsaʼaloʼob tu yotochoʼob yéetel ku binoʼob kajtal tu yotoch uláakʼ sukuʼunoʼob. Yaan sukuʼunoʼob xaneʼ tsʼoʼok u pʼáatal maʼatech u chʼaʼabloʼob en cuentai tumen u láakʼtsiloʼob. ¿Baʼax áantkoʼob utiaʼal ka chúukpajak u yóol u aktáantoʼob le baʼaxoʼob ku beetaʼaltiʼoboʼ? U yaabilajoʼob tiʼ Jéeoba, tiʼ Jesús yéetel tiʼ u maasil sukuʼunoʼob (1 Ped. 1:22; 1 Juan 4:21).

18. ¿Bix u yáantik le tsʼokaʼan u beeloʼob le yaabilaj «tuláakal ku muʼyajtik[oʼ]»?

¹⁸ Yaan uláakʼ súutukiloʼob tuʼux jach kʼaʼabéet u yeʼesik máak le yaabilaj ku muʼyajtik tuláakal baʼaloʼ. Jeʼex le máaxoʼob tsʼokaʼan u beeloʼoboʼ, unaj u beetkoʼob le baʼax tu yaʼalaj Jesusaʼ: «Mix máak unaj u jatsik le baʼax nupaʼan tumen Jajal Dioseʼ» (Mat. 19:6). Le ken yanak «yaayaj óolal tiʼob tiʼ le kuxtalaʼ», kʼaʼabéet u chʼaʼikoʼob en cuentai Jéeoba (1 Cor. 7:28). Ichil le Bibliaoʼ Jéeobaeʼ ku yaʼalikeʼ le yaabilajoʼ «tuláakal ku muʼyajtik». Le oʼolaleʼ, wa le íichamtsil yéetel le atantsil ku yeʼeskoʼob le jatsʼuts modosaʼ, yaan u kanik u aktáantoʼob jeʼel baʼalak talmileʼ yéetel maʼ ken u pʼatubaʼob (Col. 3:14).

19. ¿Baʼax ku beetik u j-jaajkunajoʼob Jéeoba ken úuchuk nukuch loobiloʼob?

¹⁹ Le yaabilajoʼ ku yáantkoʼon xan tak ken yanak uláakʼ talmiloʼob. Lelaʼ bey úuchik le ka tu tíituba le luʼum tu noojol u kaajil Perú yéetel ka máan le chak ikʼal Katrina tu jáal u luʼumil Estados Unidos yéetel u golfoi México. Yaʼab sukuʼunoʼobeʼ kʼaschaj u yotochoʼob yéetel tu peʼertoʼob u nuʼukuloʼob, baʼaleʼ u j-jaajkunajoʼob Jéeobaeʼ tu séebaʼanileʼ tu túuxtoʼob áantaj tiʼ le sukuʼunoʼoboʼ, yéetel yaʼab uláakʼ sukuʼunoʼobeʼ binoʼob utiaʼal u yutskíintkoʼob u yotoch le sukuʼunoʼoboʼ bey xan u Najiloʼob Reino. Le baʼaxoʼob úuchoʼobaʼ ku yeʼesikeʼ toʼoneʼ k-paklan yaabiltikba yéetel k-paklan kanáantikba tuláakal súutukil (Juan 13:34, 35; 1 Ped. 2:17).

«Le yaakunajoʼ mix bikʼin ku kíimil»

20, 21. 1) ¿Baʼaxten le yaakunajoʼ maas nojoch tiʼ u maasil modosoʼoboʼ? 2) ¿Baʼaxten maʼ unaj u xuʼulul k-bin teʼ «bej [maas] maʼalob[oʼ]»?

²⁰ Ichil u kaajal Jéeobaeʼ jejeláas bix k-ilik u yeʼesaʼal le yaabilaj ku keʼetel yéetel upʼéel «bej [maas] maʼalob[oʼ]». Jeʼex tsʼoʼok k-ilkoʼ le yaabilajoʼ letiʼe modos maas nojchoʼ. Koʼoneʼex ilik bix tu yaʼalil Pablo lelaʼ. Yáaxeʼ tu yaʼaleʼ le páajtaliloʼob ku tsʼáaik le kiliʼich muukʼoʼ yaan u xuʼulul ken muʼukʼaʼanchajak le múuchʼuliloʼ. Ka tsʼoʼokeʼ tu yaʼalaj: «Bey túunoʼ, le oksaj óolaloʼ, le alab óolaloʼ yéetel le yaakunajoʼ mix bikʼin u xuʼululoʼob. Baʼaleʼ u [maas] nojochil ichil le óoxpʼéelaʼ letiʼ le yaakunajoʼ» (1 Cor. 13:13).

²¹ Ken máanak kʼiineʼ le baʼaxoʼob tiʼ k-tsʼáaik k-fejoʼ yaan u láaj béeytaloʼob, ken tsʼoʼokokeʼ yaan u pʼáatal maʼ kʼaʼabéet k-tsʼáaik k-fe tiʼobiʼ. Bey xan le ken túumbenchajak tuláakal baʼaleʼ, yaan u béeychajal tuláakal le baʼaxoʼob úuch joʼopʼok k-páaʼtikoʼoboʼ, le ken úuchuk lelaʼ yaan u xuʼulul k-páaʼtikoʼob. Baʼaleʼ ¿kux túun le yaabilajoʼ? Jeʼex tsʼoʼok k-ilkoʼ, mix bikʼin kun kíimil, yaan u pʼáatal utiaʼal mantatsʼ. Le ken yanaktoʼon le kuxtal minaʼan u xuuloʼ, yaan k-maas naʼatik bix le yaabilaj ku yeʼesik Jéeobaoʼ. Bey túunoʼ, koʼoneʼex beetik tuláakal le ku páajtal utiaʼal meyajtik Dios yéetel u seguer k-bineʼex teʼ «bej [maas] maʼalob[oʼ]». Wa k-beetik beyoʼ yaan k-kuxtal utiaʼal minaʼan u xuul (1 Juan 2:17).

¿Baʼax jeʼel a núukikeʼ?

• ¿Baʼax maʼ maʼalob ka k-yaabiltiʼ?

• ¿Baʼax talmiloʼob jeʼel u yáantkoʼon k-aktáant le yaabilajoʼ?

• ¿Baʼax u kʼáat u yaʼal «le yaakunajoʼ mix bikʼin ku kíimil»?

[U kʼáatchiʼiloʼob le xookoʼ]

[U tsolajil le oochel teʼ táan juʼun 27]

U tekstoi u jaʼabil 2010: Le yaakunajoʼ tuláakal ku muʼyajtik. Le yaakunajoʼ mix bikʼin ku kíimil (1 Cor. 13:7, 8).

[U tsolajil le oochel teʼ táan juʼun 25]

K-yaabilaj tiʼ Dioseʼ ku péekskoʼon k-kʼaʼayt le maʼalob péektsiloʼ

[U tsolajil le oochel teʼ táan juʼun 26]

Le yaabilaj mix bikʼin u kíimloʼ le áant le sukuʼunoʼob yanoʼob Malaui u aktáantoʼob le talmiloʼoboʼ