Yaʼab baʼax ku beetkoʼob baʼaleʼ kiʼimak u yóoloʼob ikil u meyajtkoʼob Dios

JÉEOBAEʼ u kʼáat ka yanaktoʼon kiʼimak óolal (Sal. 100:2). Baʼaleʼ u suukaʼanileʼ óoliʼ tuláakloʼon jach yaʼab meyaj k-beetik. Maʼ xaaneʼ táanil tiʼ k-okjaʼeʼ maas maʼ jach yaʼab baʼax k-beetkiʼ, baʼaleʼ bejlaʼeʼ ku kʼaʼabéettal k-jóoʼsik xan u tiempoi k-beetik uláakʼ meyajoʼob ichil le múuchʼuliloʼ. Maʼ xaaneʼ yaan kʼiineʼ k-uʼuyik bey maʼ tu páajtal k-beetik tuláakleʼ. ¿Baʼax jeʼel u yáantkoʼon utiaʼal maʼ u xuʼulul u yantaltoʼon «u kiʼimak óolal» Jéeobaeʼ? (Neh. 8:10.)

Tumen jach talam le kʼiinoʼob kuxlikoʼon yéetel jach yaʼab meyajoʼob kʼaʼabéet k-beetikeʼ, jach unaj k-ilik bix jeʼel k-jóoʼsik u tiempoi utiaʼal k-beetkoʼobeʼ. Apóstol Pabloeʼ ku yaʼalik: «Ilawileʼex bix a xíimbaleʼex. Maʼ a kuxtaleʼex bey máaxoʼob minaʼan u naʼatoʼobeʼ baʼaleʼ bey máaxoʼob yaan u naʼatoʼobeʼ. Maʼ a chéen máansaj kʼiineʼex tumen kʼasaʼan le kʼiinoʼoboʼ» (Efe. 5:15, 16).

¿Máasaʼ jach maʼalob le baʼax tu yaʼaloʼ? Le oʼolaleʼ, jach maʼalob ka k-il bix jeʼel k-jóoʼsik u tiempoi utiaʼal k-xokik le Biblia t-juunaloʼ, k-xook ich familiai, k-jóokʼol kʼaʼaytaj, k-meyaj yéetel k-ilik bix ken k-beetil uláakʼ baʼaloʼob kʼaʼanantak.

Maʼ xaaneʼ, kʼajaʼantech bix úuchik u kiʼimaktal a wóol ka ta kʼubaba a meyajt Dios yéetel ka okjaʼanajech. ¿Baʼax beet u jach kiʼimakchajal a wóol? Tuláakal le baʼaxoʼob ta kanaj tiʼ Jéeobaoʼ bey xan le baʼaxoʼob ku yaʼalik u beetikoʼ. Maʼ xaaneʼ, máan wa jaypʼéel mesoʼob ka kʼuchech a jach naʼat tubeel le baʼaxoʼob ku kaʼansik le Bibliaoʼ, baʼaleʼ jach tu taasajtech kiʼimak óolal, tumen tu yáantech a kʼex a kuxtal.

Baʼaleʼ utiaʼal maʼ u xuʼulul u yantaltech kiʼimak óolaleʼ unaj u seguer a kaambal tiʼ Dios. Le oʼolaleʼ, wa jach talam a wilik a jóoʼsik u súutukil utiaʼal a xakʼalxoktik le Biblia tumen jach yaʼab baʼaxoʼob ka beetikoʼ, ilawil baʼax jeʼel u yáantkech a jóoʼsik u súutukileʼ. Kex chéen wa jaypʼéel minuto ka xooknakech sáamsamal yéetel ka tuukulnakech tiʼ le baʼax ka xokikoʼ, jeʼel u yáantkech utiaʼal ka maas bisaba yéetel Jéeobaeʼ yéetel ka yanaktech kiʼimak óolal.

Yaʼab tiʼ le máaxoʼob meyajtik Diosoʼ ku pʼatkoʼob le baʼaxoʼob maʼ jach kʼaʼabéet utiaʼal u beetikoʼob le baʼaxoʼob maas jach kʼaʼabéetoʼ. ¿Kux túun teech? Tukulte: «¿Bukaʼaj tiempo kin máansik táan in xokik uláakʼ revistaʼob wa periodicoʼob, táan in chaʼantik televisión, táan in wuʼuyik paax wa táan  in beetik uláakʼ baʼaxoʼob utstinwich?». Kex ku náaysik u yóol máak le baʼaloʼob beyaʼ, kʼaʼabéet u tsʼaʼabal u pʼiis (1 Tim. 4:8). Wa ka tsʼáaik cuenta yaʼab baʼaxoʼob ka beetik maʼ jach kʼaʼanantakeʼ, ilawil a tsʼáaik táanil le baʼaxoʼob maas kʼaʼanantakoʼ.

Adam, utúul anciano yaan óoxtúul u paalaleʼ ku yaʼalik baʼax áantik u beet tuláakal le meyajoʼob unaj u beetikoʼ: «Kin wilik maʼ in talamkúuntik in kuxtal. Maʼatech in náaysik in wóol yéetel baʼaloʼob ku bisik yaʼab tiempo tiʼ máak mix tech in manik baʼaloʼob ku bisik yaʼab tiempo u kanáantaʼal. Maʼ u kʼáat u yaʼal wa maʼatech in kiʼimakkúunsik in wóoliʼ. Baʼaxeʼ kin wilik in beetik baʼaloʼob maʼatech u biskoʼob yaʼab tiempo tiʼ máak».

¿Máasaʼ tsʼoʼok u taasiktoʼon yaʼab utsiloʼob ikil k-meyajtik Jéeoba? K-tuukul tiʼ le utsiloʼob k-ilkoʼ jeʼel u yáantkoʼon utiaʼal ka kiʼimakchajak k-óoleʼ. Lelaʼ bey u yeʼesik le baʼax tu beetaj Mariusz, letiʼ xaneʼ anciano yéetel yaan óoxtúul u paalal. Letiʼeʼ ku yaʼalik: «Ka káaj in xokik le Bibliaoʼ xuʼul in jach chiʼichnaktal yoʼolal le talmiloʼob kin máansikoʼ. Baʼaleʼ leloʼ maʼ u kʼáat u yaʼal wa maʼatech in muʼyajtik talmiloʼob bejlaʼeʼ, yaʼab utéeneleʼ chéen Jéeoba u yojel baʼax kin muʼyajtik. Jach kin tsʼáaik nib óolal tiʼ, tumen ku yáantken in páaʼt yéetel kiʼimak óolal le baʼax ku taal u kʼiinoʼ».

Jeʼex tsʼoʼok k-ilkoʼ, u tuukul máak tiʼ le baʼaxoʼob maʼalobtak ku taal u kʼiinoʼ, maʼatech u luʼsik tuláakal le baʼaxoʼob taasik chiʼichnakiloʼ, baʼaxeʼ ku yáantik máak u aktáant le talmiloʼoboʼ yéetel ka yanak kiʼimak óolal tiʼ. Le Bibliaoʼ ku yaʼalik: «Utiaʼal le máax yaan yaayaj óolal tiʼeʼ, minaʼan kʼiin uts utiaʼal; utiaʼal le máax yaan kiʼ óolal tiʼeʼ, sáamsamal [upʼéel kʼiimbesaj] utiaʼal» (Pro. 15:15). Wa k-tuukul tiʼ le yaabilaj ku yeʼesiktoʼon Diosoʼ yaan k-maas yaabiltik yéetel yaan xan u yantaltoʼon kiʼimak óolal (Mat. 22:37).

U tsʼaʼabal táanil u meyajtaʼal Jéeobaeʼ ku yáantaj utiaʼal ka yanak kiʼimak óolal ichil le familiaoʼ. Wa tuláakal ku tsʼáaik ichil u kuxtal le baʼaxoʼob ku yaʼalik le Bibliaoʼ, maʼ kun jach yantal talmiltiʼob yéetel yaan u maas biskubaʼob tubeel. Bey túunoʼ, ichil u yotoch máakeʼ jach yaan u yantal kiʼimak óolal yéetel yaan u biskubaʼob tubeel (Sal. 133:1).

Tsʼoʼoleʼ jach maʼalob xan ka múuchʼ táakpajak tuláakal le familia utiaʼal u maasil meyajoʼob ku beetaʼal teʼ múuchʼuliloʼ. Mariuszeʼ ku yaʼalik: «Teneʼ jach kʼaʼanan in wilik le súutukil kin máansik yéetel in familiaoʼ», yéetel ku yaʼalik: «In watneʼ jach ku yilik u yáantken. K-ilik k-múul jóokʼol kʼaʼaytaj, wa ku páajtaleʼ ku bin tin wéetel ken xiʼiken utiaʼal u limpiartaʼal le tuʼux ku beetaʼal le asambleaʼoboʼ, yéetel ken xiʼiken in máans upʼéel tsoltʼaan tuláakʼ múuchʼuliloʼobeʼ ku bin xan tin wéetel. Jach ku líiʼsik in wóol ikil u beetik beyoʼ».

Le Bibliaoʼ ku yaʼalik tiʼ le máaxoʼob meyajtik Diosoʼ ka u tsʼaʼob tuláakal baʼaxoʼob kʼaʼabéet ichil u yotochoʼob (1 Tim. 5:8). Baʼaleʼ wa le meyaj k-beetik jach yaʼab tiempo ku luʼsiktoʼon yéetel jach ku beetik k-kaʼanaleʼ, jeʼel u beetik u xuʼulul u kiʼimaktal k-óol ikil k-meyajtik Dioseʼ. Wa ku yúuchultoʼon beyaʼ unaj k-kʼáatik u yáantaj Jéeoba (Sal. 55:22). Yaan sukuʼunoʼobeʼ tsʼoʼok u kʼexik tuʼux ku meyajoʼob utiaʼal maʼ u xuʼulul u tsʼáaikoʼob táanil u Reino Dios. Le máaxoʼob meyajtik Diosoʼ maʼ unaj u tsʼáaikoʼob táanil upʼéel meyaj kex jach maʼalob u boʼotaʼal wa ku beetik u pʼáatal maʼ u yantal tiempo utiaʼal u beetaʼal le meyajoʼob kʼaʼabéet ichil le múuchʼuliloʼ (Pro. 22:3).

Wa ka wilik bey u yúuchultechoʼ, maʼ xaaneʼ maʼalob ka tsʼíibt le utsiloʼob bey xan le talmiloʼob jeʼel u taasiktech upʼéel meyajoʼ. Kex maʼ kʼaas ka yanaktech upʼéel meyaj maʼalob u boʼotaʼaleʼ, unaj a wilik wa maʼ táan u beetik u xuʼulul a wáantik a familia u meyajt Diosiʼ. Tuukulnen tiʼ tuláakal le baʼaloʼobaʼ yéetel chʼaʼatukult a beetik upʼéel baʼax jeʼel u yáantkech utiaʼal maʼ u xuʼulul a biskaba yéetel Jéeobaeʼ.

Wa le meyaj yantech maʼ tu jach chaʼik a maas meyajtik Dioseʼ unaj a wilik a kʼexik. Yaʼab sukuʼunoʼobeʼ tsʼoʼok u beetkoʼob yaʼab kʼeexoʼob ichil u kuxtaloʼob utiaʼal u páajtal u maas meyajtkoʼob Jéeoba. Utúul sukuʼun kajaʼan tu luʼumil Poloniaeʼ, ku yaʼalik: «Le tuʼux kin meyaj kaʼachoʼ jach yaʼab in túuxtaʼal in beet meyajoʼob tuláakʼ tuʼux, leloʼ ku beetik u pʼáatal minaʼanten tiempo utiaʼal in meyajtik Dios bey xan utiaʼal in máans yéetel in familia. Le oʼolal yanchaj in pʼatik». Le meyaj ku beetik le sukuʼun bejlaʼoʼ maas maʼ yaʼab tiempo ku bisik tiʼiʼ yéetel maʼatech u beetik u sen kaʼanal.

Le kiʼimak óolal ku taasik u yáantaʼal u maasiloʼ

Jesuseʼ tu yaʼalaj: «Yaan [maas] kiʼimak óolal u tsʼaʼabal wa baʼax tiʼ u kʼaʼamal wa baʼax» (Hch. 20:35). Toʼoneʼ jach yaʼab súutukiloʼob yaan utiaʼal k-beetik beyoʼ. Yaan kʼiineʼ jeʼel u páajtal k-beetik u kiʼimaktal u yóol u maasil tak chéen ka  cheʼejnakoʼon ken tʼaanakoʼon yéeteloʼobeʼ, ka k-saludartoʼob yéetel kiʼimak óolal wa ka k-tsʼáa u diosboʼotikil yoʼolal wa baʼax meyajil tu beetaj teʼ múuchʼuliloʼ. Le baʼaloʼob beyaʼ jeʼel u beetik u kiʼimaktal k-óoleʼ.

Apóstol Pabloeʼ tu yaʼalaj tiʼ le sukuʼunoʼoboʼ: «Líikʼseʼex u yóol le máaxoʼob luubul u yóoloʼoboʼ ka a wáanteʼex le máaxoʼob luubul u muukʼoʼoboʼ» (1 Tes. 5:14). Le máaxoʼob jach lubaʼan u yóoloʼoboʼ, maʼ xaaneʼ, ku tuklikoʼob maʼ kun béeytal u aktáantikoʼob tu juunaloʼob le talmiloʼoboʼ. ¿Bix jeʼel u páajtal k-áantkoʼobeʼ? Wa ka wilik utúul sukuʼun táan u lúubul u yóol u meyajt Jéeobaeʼ, líiʼs u yóol. Wa ka beetikeʼ tak teech kun líikʼil a wóol. U jaajileʼ, yaan talmiloʼob maʼ tu béeytal k-utskíintik. Teʼ súutukiloʼob beyoʼ unaj k-eʼesik tiʼ le sukuʼun k-naʼatik bix u yuʼubikubaoʼ. Kʼaʼajstiʼeʼ wa ku kʼubik u yóol tiʼ Jéeobaeʼ yaan u yáantaʼal (Sal. 27:10; Isa. 59:1).

Tsʼoʼoleʼ jeʼel u páajtal k-aʼaliktiʼ ka jóokʼok t-éetel kʼaʼaytajeʼ. Le ka túuxtaʼab le 70 disipuloʼob kʼaʼaytaj tumen Jesusoʼ, letiʼeʼ «tu túuxtajoʼob kaʼakatúulil» (Luc. 10:1). Lelaʼ tu tsʼáaj tuʼux u paklan líiʼsik u yóoloʼob. Toʼon xaneʼ, ken jóoʼkoʼon kʼaʼaytaj yéetel u maasileʼ ku yantal tuʼux k-paklan líiʼsik k-óol.

Jeʼex tsʼoʼok k-ilkoʼ, bejlaʼeʼ jach yaʼab talmiloʼob ku muʼyajtik máak. Baʼaleʼ jach yaan baʼax oʼolal k-beetik le baʼax tu yaʼalaj Pabloaʼ: «Kiʼimakchajak a wóoleʼex tiʼ Yuumtsil mantatsʼ. Kin kaʼa aʼalik: Kiʼimakchajak a wóoleʼex» (Fili. 4:4). Le baʼax jach ku tsʼáaik u beelal k-kuxtal yéetel ku kiʼimakkúuntik k-óoloʼ letiʼe yaabilaj k-eʼesik tiʼ Diosoʼ, k-beetik tuláakal baʼax ku yaʼalik, yéetel k-ilik u jach chúukpajal k-óol beet le meyaj u kʼubéentmajtoʼonoʼ. Tsʼoʼoleʼ letiʼeʼ ku yáantikoʼon utiaʼal k-aktáantik le talmiloʼoboʼ (Rom. 2:6, 7).

Le fe yantoʼonoʼ ku yáantkoʼon k-il naatsʼ yanil le túumben Luʼum ku yaʼalik Dios u tsʼáaikoʼ. ¿Máasaʼ jach yaʼab utsiloʼob yéetel kiʼimak óolal ku taal u kʼiin k-ilik? (Sal. 37:34.) Le oʼolaleʼ, maʼ unaj k-chaʼik u lúubul k-óoliʼ. Tuukulnakoʼon mantatsʼ tiʼ le utsiloʼob ku tsʼáaiktoʼon Jéeoba teʼ kʼiinoʼobaʼ. Wa k-beetik beyoʼ yaan k-adorartik Jéeoba «yéetel kiʼimak óolal» (Sal. 100:2).

[U tsolajil le oochel teʼ táan juʼun 8]

Utiaʼal maʼ u xuʼulul u yantaltoʼon kiʼimak óolaleʼ unaj k-ilik k-beetik baʼaxoʼob kʼaʼanantak

LE NÁAYSAJ ÓOLALOʼ

LE FAMILIAOʼ yéetel U YOTOCH MÁAK

LE MEYAJOʼ

LE MUCHʼTÁAMBALOʼOBOʼ

U XOOK MÁAK TU JUUNAL

U JÓOKʼOL MÁAK KʼAʼAYTAJ

[U tsolajil le oochel teʼ táan juʼun 10]

¿Jeʼel wa u páajtal a wáantik le sukuʼunoʼob lubaʼan u yóoloʼoboʼ?