Bix jeʼel u yáantaʼal le paalaloʼob u aktáantoʼob le talmiloʼoboʼ

TEʼ KʼIINOʼOBAʼ jach yaʼab baʼax chiʼichnakkúuntik le táankelem paalaloʼ. Kuxaʼanoʼob tiʼ upʼéel yóokʼol kaab jach tsʼoʼok u kʼastal yéetel kʼaʼabéet u kanik u controlartoʼob «u kʼaakʼas tsʼíibolaloʼob le táankelmiloʼ» (2 Tim. 2:22; 1 Juan 5:19). Kex beyoʼ ku yilik u kʼaʼajskoʼob máax beetmailoʼob, le oʼolal ku chúukpajal u yóol u meyajtoʼob kex ku yaʼalaʼaltiʼob baʼal yéetel kex ku burlartaʼaloʼob tumen máaxoʼob maʼatech u adorarkoʼob Dios (Ecl. 12:1). Utúul sukuʼun Víctor u kʼaabaʼeʼ ku yaʼalik baʼax ku beetaʼaltiʼ le táan u bin xook kaʼachoʼ: «Maʼatech u xuʼulul in molestartaʼal yéetel u yaʼalaʼalten baʼal tumen J-jaajkunajen. Jach ku yaatal in wóol yoʼolal baʼax ku beetaʼalten, le oʼolal yaan kʼiin maʼ taak in bin xookiʼ». *

Uláakʼ baʼax beetik u chiʼichnaktal le táankelem paalaloʼ letiʼe u taaktal u beetkoʼob baʼax ku beetik u maasiloʼ. Utúul x-chʼúupal Katy u kʼaabaʼeʼ, ku yaʼalik: «Jach ku yaatal u yóol máak ken  u yil óoliʼ mix máak taak u biskuba tu yéetel». Alan, utúul xiʼipaleʼ ku yaʼalik xan: «In wéet xookoʼobeʼ cada ku yaʼalkoʼobten ka xiʼiken xíimbal tu yéeteloʼob tu jóokʼbal le semanaoʼ, yéetel u jaajileʼ jach ku taaktal in bin tu yéeteloʼob». Yanoʼob xaneʼ jach ku taaktal u yookloʼob báaxal tiʼ wa baʼax equipoi yaan teʼ tuʼux ku xookoʼoboʼ, baʼaleʼ maʼatech u beetkoʼob tumen yojloʼob jach yaʼab tiempo ken u máansoʼob yéetel máaxoʼob maʼatech u meyajtkoʼob Dios. Taniaeʼ ku yaʼalik: «Teneʼ jach utstinwich in báaxal. Tsʼoʼoleʼ le maestroʼob teʼ escuelaoʼ jach ku yaʼalkoʼobten ka okoken báaxal tiʼ upʼéel equipo. Le oʼolal maʼ chéen chʼaʼabil in waʼaliktiʼob maʼataniʼ».

Taatatsileʼex, ¿bix jeʼel a wáantik a paalaleʼex u aktáantoʼob le chiʼichnakiloʼob ku yantaltiʼoboʼ? Jéeobaeʼ u tsʼaamajeʼex utiaʼal ka a nuʼukteʼexoʼob (Pro. 22:6; Efe. 6:4). Le beetikeʼ unaj a wáantik a paalaleʼex utiaʼal ka u yaabiltoʼob Jéeoba (Pro. 6:20-23). Beyoʼ yaan u kanik u aktáantoʼob le talmil ku máanskoʼob kex minaʼaneʼex tu yiknaloʼoboʼ.

Maʼ chéen chʼaʼabil u náajaltaʼal baʼaxoʼob kʼaʼabéet tiʼ le familiaoʼ, u líiʼsaʼal le paalaloʼoboʼ yéetel u beetaʼal le meyajoʼob teʼ múuchʼuliloʼ. Tsʼoʼoleʼ yaan taatatsiloʼobeʼ chéen tu juunaloʼob ku beetkoʼob tuláakal lelaʼ, tumen tsʼoʼok u pʼáatal minaʼan u núupoʼob wa tumen maʼatech u meyajtkoʼob Jéeoba. Baʼaleʼ Jéeobaeʼ ku páaʼtik xan ka jóoʼsaʼak tiempo tumen le taatatsiloʼob utiaʼal u nuʼuktik yéetel u yáantik u paalaloʼob. Le taatatsiloʼoboʼ, ¿bix túun jeʼel u yáantik u paalaloʼob utiaʼal ka u kan u aktáantoʼob le talmiloʼob ku yantaltiʼob teʼ escuelaoʼ?

Unaj u jach biskubaʼob yéetel Jéeoba

Le táankelem paalaloʼoboʼ unaj u creerkoʼobeʼ Jéeobaeʼ utúul Dios jach kuxaʼan. Le oʼolaleʼ unaj u yáantaʼaloʼob u tsʼáa u fejoʼob tiʼ le «Dios maʼ táan u yilaʼaloʼ» (Heb. 11:27). Víctor, le t-aʼalaj tu káajbaleʼ, ku yaʼalikeʼ jach áantaʼab tumen u taataʼob utiaʼal ka u natsʼuba tiʼ Jéeoba. Letiʼeʼ ku yaʼalik: «Tu kaʼansoʼobten jach kʼaʼabéet in payalchiʼ tiʼ Dios. Kʼajaʼanten desde tin chichnileʼ,  táanil tiʼ in chital weenleʼ kin payalchiʼ. Teneʼ kin wilik Jéeoba bey utúul Dios jach kuxaʼaneʼ». Kux túun teʼex, ¿ka payalchiʼex wa yéetel a paalaleʼex? ¿Ka wuʼuykeʼex wa bix u payalchiʼob tiʼ Jéeoba? ¿Chéen wa upʼéeliliʼ baʼax ku yaʼalikoʼob? Le baʼax ku yaʼalkoʼob ich payalchiʼoʼ, ¿ku yeʼesik wa u yaabiltmoʼob Jéeoba? Wa ka wuʼuykeʼex bix u payalchiʼobeʼ yaan a wilkeʼex wa táan u maas natsʼkubaʼob tiʼ Jéeoba.

U xookil le Bibliaoʼ ku yáantik xan máak utiaʼal ka u maas natsʼuba tiʼ Jéeoba. Katy, le máax tiʼ tsʼoʼok k-yáax tʼaaneʼ, ku yaʼalik: «Úuchik in láaj xokik le Biblia tin paaliloʼ tu yáanten in wileʼ kex yaan máaxoʼob ku tsʼáaikubaʼob tin contraeʼ, Jéeobaeʼ ku yáantken». ¿U jóoʼsmaj wa a paalal u yorai utiaʼal u xokkoʼob le Bibliaoʼ? (Sal. 1:1-3; 77:12.)

U jaajileʼ cada paaleʼ yaanal bix u kʼamik le tsolnuʼuk ku tsʼaʼabaltiʼoʼ, yéetel yaan xan baʼax u yil u jaʼabil utiaʼal ka séebchajak u kaambal. Wa maʼ tu yáantaʼal le táankelem paalaloʼ jach jeʼel u talamtaltiʼob u yilkoʼob Jéeoba bey utúul Dios jach kuxaʼaneʼ. Le taatatsiloʼoboʼ unaj u kaʼansik tiʼ u paalal baʼax ku yaʼalik Dios, beyoʼ jeʼel tuʼuxak ka yanakoʼobeʼ mantatsʼ ken u beetoʼob baʼax utstutʼaan (Deu. 6:6-9). A paalaleʼexeʼ unaj u yojéeltkoʼobeʼ Jéeobaeʼ u kʼáat ka xiʼik utsil tiʼob.

Unaj a kankeʼex tsikbal yéetel a paalaleʼex

Utiaʼal u yáantik u paalal máakeʼ kʼaʼabéet u tsikbal tu yéeteloʼob. Baʼaleʼ leloʼ maʼ u kʼáat u yaʼal chéen unaj u tʼaan máak tu yéeteloʼobiʼ, baʼaxeʼ unaj u beetaʼal kʼáatchiʼ tiʼob yéetel u jach chʼenxikintaʼal baʼax ku núukikoʼob, kex yaan hora le baʼax ku yaʼalikoʼoboʼ maʼ letiʼe baʼax u kʼáat u yuʼub le taatatsiloʼoboʼ. Anne, u maama kaʼatúul xiʼipalaleʼ, ku yaʼalik: «Kin beetik kʼáatchiʼ tiʼob utiaʼal in wojéeltik bix u yuʼubkubaʼob yéetel wa yaan baʼax beetik u chiʼichnaktaloʼob». A paalaleʼexeʼ, ¿ku tsʼáaikoʼob wa cuenta ka chʼenxikintkeʼexoʼob? Tania, le máax tiʼ  tsʼoʼok k-yáax tʼaanoʼ, ku yaʼalik: «In taataʼobeʼ ku jach chʼenxikintkenoʼob yéetel ku kʼaʼajskoʼob le baʼaxoʼob kin waʼaliktiʼoboʼ. U yojloʼob bix u kʼaabaʼ in wéet xookoʼob, ku kʼáatkoʼobten bix yaniloʼob yéetel ku kaʼa tʼaanoʼob tiʼ baʼaxoʼob in yáax tsikbaltmajtiʼob». Bey túunoʼ utiaʼal ka tsikbalnak maʼalob le taatatsiloʼob yéetel u paalaloʼoboʼ unaj u chʼenxikintkoʼob yéetel u kʼaʼajskoʼob le baʼax ku yaʼalik u paalaloʼoboʼ.

Yaʼab familiaʼobeʼ tsʼoʼok u yilkoʼobeʼ u yorai le jaanloʼ jach maʼalob utiaʼal u yúuchul tsikbal. Victoreʼ ku yaʼalik: «Toʼoneʼ jach jatsʼuts k-ilik múul janal. Ku páaʼtaʼal ka yanakoʼon tuláakloʼon tu yorai le jaanloʼ. Teʼ súutuk jeʼeloʼ maʼatech k-chaʼantik televisión, mix k-uʼuyik radio yéetel maʼatech k-xook. Baʼaleʼ tumen tuláakloʼon kiʼimak k-óol táan k-tsikbaleʼ, tu yorai le jaanloʼ maʼ chiʼichnak in wuʼuykimbaeʼ, ku tuʼubulten tuláakal le baʼaxoʼob beetik in chiʼichnaktal teʼ escuelaoʼ». Ku yaʼalik xan: «Tumen suukaʼan in tsikbal yéetel in taataʼob tu yorai le jaanloʼ, maʼatech u talamtalten in waʼaliktiʼob le baʼaxoʼob ku yúuchultenoʼ».

Tukult lelaʼ: «¿Jaytéen ichil le semana kin múul janal yéetel tuláakal in familiaoʼ?». Wa ka maas beetkeʼexeʼ, yaan a wilkeʼexeʼ yaan u páajtal a maas tsikbaleʼex yéetel a paalaleʼex.

Unaj a ensayareʼex yéetel a paalaleʼex

U beetaʼal cada semana le adoración ich familiailoʼ ku yáantaj xan utiaʼal u maas kʼaj óoltik máak u paalal bey xan utiaʼal ka u kan u aktáantoʼob le talmiloʼoboʼ. Alan, le máax tiʼ tsʼoʼok k-yáax tʼaanoʼ, ku yaʼalik: «In taataʼobeʼ jach ku aprovecharkoʼob le xookil ich familiai utiaʼal u yilik u yojéeltkoʼob baʼaxoʼob chiʼichnakkúuntkoʼon. Ku tsikbaloʼob tiʼ baʼaloʼob yaan yil yéetel le talmiloʼob táan k-aktáantikoʼ». U maama Alaneʼ ku yaʼalik: «Ken yanaktoʼon le xook ich familiailoʼ k-jóoʼsik u súutukil utiaʼal k-ensayartik yéetel k-paalal baʼax jeʼel u beetkoʼob utiaʼal u aktáantkoʼob upʼéel talmileʼ. Leloʼ le áant k-paalal utiaʼal u yeʼeskoʼob jach jaaj le baʼax ku creerkoʼoboʼ yéetel utiaʼal maʼ u chʼaʼikoʼob saajkil u aktáantoʼob le talmiloʼoboʼ».

Le ken túulchʼintaʼak utúul paal tumen u yéet xookoʼob u beet upʼéel baʼax maʼ maʼalobeʼ, yaan horaeʼ maʼ chéen unaj u yaʼalik maʼ ken u  beetiʼ yéetel ku tsʼoʼoleʼ ku lukʼuliʼ. Kʼaʼabéet xan u kanik u tsol baʼaxten maʼ tu beetik yéetel unaj xan u yojéeltik baʼax ken u beet ken aʼalaʼak baʼal tiʼ yoʼolal u religión. Wa maʼeʼ jeʼel u chʼaʼik saajkil u defendert le baʼaxoʼob ku creertikoʼ. Le u ensayar máak tu yéeteloʼoboʼ jeʼel u yáantkoʼob utiaʼal maʼ u chʼaʼikoʼob saajkileʼ.

Teʼ cuadro yaan teʼ táan juʼun 18 ku yeʼesik bey baʼax jeʼel u páajtal a ensayarkeʼex yéetel a paalaleʼex ken yanakteʼex le Adoración ich Familiailoʼ. Ken u tsʼaʼob u núukil upʼéel kʼáatchiʼeʼ beet uláakʼ kʼáatchiʼtiʼob ka tuklik jeʼel u beetaʼaltiʼob tumen u yéet xookoʼobeʼ. Maʼalob xan ka a xakʼalteʼex baʼax tu beetaj jujuntúul tiʼ le máaxoʼob tu adorartoʼob Jéeoba úuchjeakiloʼ. Wa ka beetik beyaʼ yaan a wáantik a paalal u aktáantoʼob le talmiloʼob ku yantaltiʼob teʼ escuelaoʼ wa tiʼ uláakʼ tuʼux.

¿Yaan wa jeetsʼelil ta wotoch?

Le ken jóoʼkoʼob tu xookoʼob a paalaleʼexeʼ, ¿ku taaktal wa u séeb kʼuchloʼob ta wotocheʼex? Wa ichil a wotocheʼex yaan jeetsʼelileʼ leloʼ yaan u yáantkoʼob utiaʼal u aktáantkoʼob le talmiloʼob ku yantaltiʼoboʼ. Utúul kiik táan u meyaj Beteleʼ, ku yaʼalik: «Tin wotocheʼ jach yaan jeetsʼelil kaʼachiʼ, leloʼ jach tu yáanten tu kʼiiniloʼob táan in xook. Kex yaʼab baʼax beetik in chiʼichnaktal teʼ escuelaoʼ, in wojel ken kʼuchken tin wotocheʼ yaan u kiʼimaktal in wóol tumen yaan jeetsʼeliliʼ». ¿Yaan wa jeetsʼelil ta wotoch? ¿Suuk wa u yantal kʼuuxil yéetel baʼateʼel ichil a wotoch wa yaan yaabilaj yéetel kiʼimak óolaliʼ? (Gal. 5:19-23.) Wa ka wilkeʼex maʼ jach yaan jeetsʼelil ichil a wotocheʼexeʼ, maʼalob ka wil a beetkeʼex tuláakal le ku páajtal utiaʼal ka yanak kiʼimak óolaliʼ.

Uláakʼ bix jeʼel u yáantaʼal le paalaloʼoboʼ, letiʼe u invitartaʼal sukuʼunoʼob utiaʼal ka tsikbalnakoʼob tu yéeteloʼoboʼ. Jeʼel u páajtal a invitartik sukuʼunoʼob yiijchajaʼan u naʼatoʼob ken a beeteʼex wa baʼax utiaʼal a náaysik a wóoleʼexeʼ. Maʼ xaaneʼ jeʼel u páajtal a invitartik le superintendente tiʼ circuitooʼ, le precursoroʼob wa uláakʼ sukuʼunoʼob utiaʼal ka xiʼikoʼob janal ta wotocheʼ. ¿A kʼaj óol wa jujuntúul misioneroʼob wa betelitaʼob jeʼel u tsikbaloʼob yéetel a paalal tiʼ carta, tiʼ correo electrónico wa tiʼ teléfono, kex chéen wa baʼax kʼiineʼ? U biskuba a paalal yéetel le sukuʼunoʼobaʼ yaan u yáantkoʼob utiaʼal u bin utsil tiʼob yéetel utiaʼal ka u chʼaʼatukloʼob u maas tsʼáaik u yóol u meyajtoʼob Dios. Kʼaʼajakteʼex le utsiloʼob tu jóoʼsaj Timoteo úuchik u biskuba yéetel le apóstol Pablooʼ (2 Tim. 1:13; 3:10). Timoteoeʼ tu amigotaj Pablo, lelaʼ le áant utiaʼal ka chúukpajak u yóol u meyajt Dios (1 Cor. 4:17).

Líiʼs u yóol a paalal

Jéeobaeʼ ku kiʼimaktal u yóol ken u yil u beetaʼal tumen le paalaloʼob baʼax utstutʼaan kex kuxaʼanoʼob tiʼ upʼéel yóokʼol kaab jach tsʼoʼok u kʼastaloʼ (Sal. 147:11; Pro. 27:11). Teʼex xaneʼ, ¿máasaʼ jach ku kiʼimaktal a wóoleʼex ken a wileʼex u beetkoʼob baʼax maʼalob? (Pro. 10:1). Aʼaleʼex tiʼ a paalaleʼex jach a yaabiltmeʼexoʼob yéetel aʼaleʼextiʼob maʼalob baʼax ku beetkoʼob. Jéeobaeʼ bey tu beetiloʼ. Le ka okjaʼanaj Jesuseʼ, tu yaʼalajtiʼ: «Teech in yaabilaj Paal jach kiʼimak in wóol ta woʼolal» (Mar. 1:11). Le baʼax tu yaʼalaj Diosaʼ jach tu líiʼsaj u yóol Jesús utiaʼal u aktáantik le bukaʼaj baʼaloʼob ken u muʼyajt kaʼachoʼ. Bey xan unaj a beetkeʼexoʼ: aʼaleʼex tiʼ a paalaleʼex jach a yaabiltmeʼexoʼob yéetel jach kiʼimak a wóoleʼex yoʼolal le baʼax ku beetkoʼoboʼ.

U jaajileʼ maʼ kun béeytal a kanáantkeʼexoʼob tiʼ tuláakal le baʼaloʼob ken u aktáantoʼob teʼ escuelaoʼ. Baʼaleʼ jeʼel u páajtal a wáantkeʼexoʼob utiaʼal ka u kan u aktáantoʼobeʼ. Áanteʼexoʼob utiaʼal ka u natsʼubaʼob tiʼ Jéeoba. Kaneʼex tsikbal tu yéeteloʼob. Ilawileʼex ka áantaʼak a paalaleʼex tumen le xook ka beetkeʼex ich familiailoʼ yéetel ilawileʼex ka yanak jeetsʼelil ta wotocheʼex. Wa ka beetkeʼex lelaʼ, a paalaleʼexeʼ yaan u kankoʼob u aktáantoʼob le talmiloʼoboʼ.

[Tsolajiloʼob]

[U tsolajil le oochel teʼ táan juʼun 18]

KEN ENSAYARNAKEʼEX

Teʼelaʼ ku yeʼesaʼal bey baʼax jeʼel u páajtal a ensayarkeʼex ken yanakteʼex le Adoración ich Familiailoʼ.

▸ Utúul maestroeʼ ku yaʼalik tiʼ a hija ka okok báaxal tu equipoi le escuelaoʼ.

▸ Le táan u suut a hijo ta wotocheʼ, utúul u yéet xookeʼ ku tsʼáaik upʼéel chamal tiʼ utiaʼal ka u tsʼuʼutsʼe.

▸ Jujuntúul paaloʼobeʼ ku yaʼalkoʼob tiʼ a hijo yaan u loʼoloxkoʼob wa ku kaʼa ilkoʼob táan u kʼaʼaytaj.

▸ Ken tʼaanak a hija tiʼ upʼéel naj le táan u kʼaʼaytajoʼ, ku jóokʼol utúul u yéet xook.

▸ Ku yaʼalaʼal tiʼ a hija ka u tsol tu táan u yéet xookoʼob baʼaxten maʼatech u saludartik le banderaoʼ.

▸ Utúul paaleʼ ku jach burlartik a hijo tumen j-jaajkunaj tiʼ Jéeoba.

[U tsolajil le oochel teʼ táan juʼun 17]

¿U jóoʼsmaj wa a paalal u yorai u xokkoʼob le Bibliaoʼ?

[U tsolajil le oochel teʼ táan juʼun 19]

¿Ka invitarkeʼex wa uláakʼ sukuʼunoʼob utiaʼal ka u láakʼinteʼexoʼob ken a náays a wóoleʼex?