Toʼoneʼ utiaʼaloʼon Jéeoba chéen yoʼolal u yutsil

«Utiaʼaloʼon Yuumtsil.» (ROM. 14:8)

1, 2. 1) ¿Baʼax jatsʼuts páajtalil yantoʼon? 2) ¿Baʼax kʼáatchiʼiloʼob ken k-il u núukiloʼob?

JÉEOBAEʼ tu yaʼalaj tiʼ le israelitaʼoboʼ: «Bíin a beetabaʼex in yéeybil kaajal ichil tuláakal kaajoʼob» (Éxo. 19:5). ¿Máasaʼ jach jatsʼuts le baʼax tu yaʼalajtiʼoboʼ? Bejlaʼeʼ yaan toʼon xan u jatsʼuts páajtalil u tiaʼalintkoʼon Dios (1 Ped. 2:9; Apo. 7:9, 14, 15). Lelaʼ jeʼel u taasiktoʼon utsiloʼob mantatsʼeʼ.

² Baʼaleʼ le máaxoʼob ku tiaʼalintaʼaloʼob tumen Jéeobaoʼ yaan uláakʼ baʼax kʼaʼabéet u beetkoʼob. Le oʼolal maʼ xaaneʼ, yaan máax jeʼel u tuklikeʼ: «¿Jeʼel wa u páajtal in beetik tuláakal le baʼaxoʼob ku kʼáatik Jéeobaoʼ? ¿Jeʼel wa u seguer u kʼamken kex ka lúubuken tiʼ upʼéel kʼebaneʼ? Wa kin kʼubik in kuxtal tiʼ Jéeobaeʼ, ¿maʼ wa kun pʼáatal jach mix baʼal kun páajtal in beetik?». U jaajileʼ lelaʼ maʼ kʼaas ka u tukult máakiʼ, le oʼolal maʼalob ka k-il u núukiloʼob. Baʼaleʼ táanileʼ koʼoneʼex ilik u núukil le kʼáatchiʼaʼ: ¿baʼax utsiloʼob ku kʼamik le máaxoʼob ku kʼubik u kuxtaloʼob tiʼ Jéeobaoʼ?

U kʼubik u kuxtal máak tiʼ Jéeobaeʼ ku taasik kiʼimak óolal

3. ¿Baʼax utsiloʼob tu kʼamaj Rahab úuchik u yokol ichil u kaajal Jéeoba?

³ ¿Jach wa tu jaajil ku taasik utsil u kʼubik u kuxtal máak tiʼ Jéeoba? ¡Jach ku taasik! Tuukulnakoʼon tiʼ Rahab, utúul koʼolel kajaʼan kaʼach tu kaajil Jericó ku núupkʼebankúunskuba, yéetel maʼ xaaneʼ ku adorartik u diosoʼob le  cananeoʼoboʼ. Kex beyoʼ kʼuch u naʼateʼ Jéeobaeʼ letiʼ u jaajil Dios yéetel letiʼ áantik le israelitaʼob u ganartoʼob le máaxoʼob pʼekmiloʼoboʼ. Le oʼolal tu yáantaj le israelitaʼob kex u yojel jeʼel tak u kíimsaʼaleʼ, beyoʼ tu yeʼesaj u kʼáat u salvartuba. Le Bibliaoʼ ku yaʼalik: «Jajal Dioseʼ tu kʼamaj [Rahab] bey jun[túul] koʼolel tojeʼ tu yoʼolal le utsil meyaj tu beetajoʼ ikil tu [kʼamil] maʼalob le máaxoʼob túuxtaʼaboʼoboʼ, yéetel ikil tu yáantilakoʼob jóokʼol tiʼ uláakʼ bej» (Sant. 2:25). Úuchik u yokol ichil u kaajil Israeleʼ tu taasaj yaʼab utsiloʼob tiʼ, tumen upʼéel kaaj limpio yéetel kaʼansaʼan u yeʼes yaabilaj yéetel justicia, jeʼex u yaʼalik u Ley Dioseʼ. ¡Bukaʼaj wal úuchik u kiʼimaktal u yóol ka tu pʼataj le kʼaakʼas kuxtal yantiʼ kaʼachoʼ! Ka máan kʼiineʼ tsʼoʼok u beel yéetel utúul israelita yéetel yanchaj utúul u hijo tu kʼaabaʼtaj Booz [wa Boaz], utúul máax jach tu beetaj baʼax utstutʼaan Dios (Jos. 6:25; Rut 2:4-12; Mat. 1:5, 6).

4. ¿Baʼax utsiloʼob tu kʼamaj Rut úuchik u meyajtik Jéeoba?

⁴ Uláakʼ utúul koʼolel tu meyajtaj xan Jéeobaeʼ Rut, utúul x-moabil. Maʼ xaaneʼ, tu x-lóoʼbaynileʼ tu adorartaj Quemós bey xan uláakʼ u diosoʼob le moabiloʼoboʼ. Baʼaleʼ tu kʼaj óoltaj u jaajil Dios yéetel tsʼoʼok u beel yéetel utúul israelita bin kajtal tu luʼumil Moab (xokaʼak Rut 1:1-6). Ka máan kʼiineʼ, letiʼ yéetel Orfa [wa Orpá], uláakʼ utúul u yilib Noemieʼ, kíim u yíichamoʼob, ka jóokʼ u bimbaloʼob yéetel u suegraʼob tu kaajil Belén. Le táan u binoʼoboʼ, Noemieʼ tu yaʼalajtiʼob ka suunakoʼob tu kaajaloʼob, tumen jeʼel u talamtaltiʼob u kuxtaloʼob tu luʼumil Israeleʼ. Orfa túuneʼ suunaj «tu kaajal yéetel tiʼ u diosoʼob». Baʼaleʼ Ruteʼ tu chaʼaj u nuʼuktaʼal tumen u fe yéetel tu yeʼesaj u kʼáat u seguert u meyajtik Dios. Le oʼolal tu yaʼalaj tiʼ Noemí: «¡Maʼ a kʼáat óoltik tiʼ teen ka in pʼatech yéetel ka in jumpáaykuntimba tiʼ tech! Teneʼ bíin xiʼiken jeʼel tuʼuxak ka xiʼikecheʼ bíin kajlaken xan jeʼel tuʼuxak ka kajlakecheʼ. A kaajaleʼ letiʼ bíin in kaajalte, a [Dioseʼ] letiʼ xan bíin in [Diosinte]» (Rut 1:15, 16). Yoʼolal le baʼax tu beetaʼ tu kʼamaj le utsiloʼob ku yaʼalik le Ley unaj u tsʼaʼabal tiʼ le koʼoleloʼob kimen u yíichamoʼoboʼ, le óotsiloʼoboʼ yéetel le máaxoʼob minaʼan u luʼumoʼoboʼ. Úuchik u meyajtik Jéeobaeʼ yanchaj kiʼimak óolal tiʼ yéetel kanáantaʼabi.

5. ¿Baʼax k-tsʼáaik cuenta ken tsikbalnakoʼon yéetel le máaxoʼob úuch joʼopʼok u meyajtkoʼob Jéeobaoʼ?

⁵ Maʼ xaaneʼ yaan sukuʼunoʼob k-kʼaj óol úuch joʼopʼok u meyajtkoʼob Jéeoba. Maʼalob ka k-kʼáattiʼob baʼax utsiloʼob tsʼoʼok u kʼamikoʼob desde ka tu kʼubaj u kuxtaloʼob tiʼ. Ken tsikbalnakoʼon yéeteloʼobeʼ yaan k-ilkeʼ, kex ku muʼyajoʼobeʼ, jach jaaj le baʼax ku yaʼalik le salmistaaʼ: «Kiʼimak [u] yóol le kaaj u Jajal Dioseʼ letiʼe Yuumtsiloʼ» (Sal. 144:15, LSM).

Jéeobaeʼ maʼ tu kʼáatik ka k-beet upʼéel baʼax maʼ tu béeytal

6. ¿Baʼaxten maʼ unaj k-tukultik maʼ kun béeytal k-beetik baʼax ku kʼáatiktoʼon Jéeobaiʼ?

⁶ Maʼ xaaneʼ, yaan máax jeʼel u tuklikeʼ maʼ kun béeytal u tsʼoʼokbesik le baʼaxoʼob ku kʼáatik Jéeobaoʼ. Maʼ xaan xaneʼeʼ, jeʼel k-uʼuyik  bey maʼ tu páajtal k-meyajtik, k-beetik baʼax ku yaʼalik mix k-tʼaan tiʼ letiʼ. Lelaʼ bey úuchik tiʼ Moisés, letiʼeʼ tu yuʼubaj maʼ tu páajtal u bin Egipto u yaʼal tiʼ le israelitaʼob yéetel tiʼ faraón le baʼaxoʼob ku yaʼalik Jéeobaoʼ. Baʼaleʼ Jéeobaeʼ u yojel jeʼel u páajtal u beetkeʼ. Tsʼoʼoleʼ tu yaʼalaj xan tiʼ: «Bíin in [nuʼuktech] baʼax unaj a beetik» (xokaʼak Éxodo 3:11 yéetel 4:1, 10, 13-15). Bey túunoʼ, yéetel u yáantaj Dioseʼ, Moiseseʼ páajchaj u beetik yéetel kiʼimak óolal le baʼax aʼalaʼabtiʼoʼ. Jéeobaeʼ bey xan u beetik t-éeteloʼ. U yojel chéen kʼebanoʼon, le oʼolal u kʼáat u yáantoʼon (Sal. 103:14). K-meyajtik jeʼex tu beetil Cristooʼ maʼ talmiʼ, tsʼoʼoleʼ lelaʼ ku tsʼáaiktoʼon u páajtalil k-kiʼimakkúuntik u yóol bey xan k-eʼesik yaabilaj tiʼ u maasil. Wa k-beetkeʼ k-ilik jach jaaj le baʼax tu yaʼalaj Jesusaʼ: «Koʼoteneʼex tiʼ teen, [...] teen bíin in beet a jeʼeleʼex. Biseʼex in kuch ta wóokʼoleʼex, yéetel kaambalneneʼex tiʼ teen, tumen teneʼ chúukaʼan in wóol yéetel kabal u yóol in puksiʼikʼal» (Mat. 11:28, 29).

7. ¿Bix k-ojéeltik Jéeobaeʼ jeʼel u yáantkoʼon k-beet baʼax ku yaʼalikeʼ?

⁷ Wa k-kʼáatik áantaj tiʼ Dioseʼ, letiʼeʼ jeʼel u yáantkoʼoneʼ. Ka yéeyaʼab Jeremías u beet u profetaileʼ sajakchaji, baʼaleʼ áantaʼab tumen Dios. Letiʼeʼ tu yaʼalaj: «¡Yuumtsil! ¡Teneʼ jach paalen maʼ xan in wojel tʼaaniʼ!». Yéetel ka máan kʼiineʼ tu yaʼalaj: «Maʼ bíin suunaken tʼaan tu kʼaabaʼ» «Yuumtsiliʼ» (Jer. 1:6; 20:9). Kex beyoʼ páajchaj u kʼaʼaytik ich cuarenta jaʼaboʼob baʼax ken u beet Dios kex maʼ utstutʼaan le máakoʼoboʼ. ¿Bix páajchajik u beetik? Páajchaj yoʼolal le áantaj tsʼaʼab tiʼ tumen Jéeobaoʼ. Letiʼeʼ tu yaʼalajtiʼ: «Teen bíin yanaken ta wéetel utiaʼal in kanáantech» (Jer. 1:8, 19; 15:20).

8. ¿Bix jeʼel k-eʼesik k-kʼubik k-óol tiʼ Jéeobaeʼ?

⁸ Bejlaʼeʼ Jéeobaeʼ ku yáantkoʼon xan k-beet le baʼaxoʼob ku yaʼalikoʼ, jeʼex úuchik u yáantik Moisés yéetel Jeremíasoʼ. Baʼaleʼ unaj k-beetik le baʼax ku yaʼalik le proverbioaʼ: «Okes a wóol tiʼ Yuumtsil yéetel tuláakal a puksiʼikʼal[,] maʼ a walab óoltik le naʼat yaan tiʼ techoʼ. Maʼ a tuʼubsik Yuumtsil tiʼ tuláakal baʼax ka beetik, letiʼ túuneʼ bíin u bisech tiʼ u tojil bej» (Pro. 3:5, 6). ¿Bix jeʼel k-eʼesik k-kʼubik k-óol tiʼ Dioseʼ? Letiʼe ken k-beet le baʼax ku yaʼalik le Bibliaoʼ bey xan ken k-beet le baʼax ku yaʼalik le sukuʼunoʼob nuʼuktik le múuchʼuliloʼ. Wa k-chaʼik u nuʼuktikoʼon Jéeobaeʼ mix baʼal jeʼel u luʼsik le kiʼimak óolal yantoʼonoʼ.

Jéeobaeʼ ku kanáantik cada utúul tiʼ le máaxoʼob meyajtikoʼ

9, 10. Jeʼex u yaʼalik le Salmo 91, ¿bix u kanáantik Jéeoba le máaxoʼob meyajtikoʼ?

⁹ Yaan máaxeʼ ku sajaktal u kʼub u kuxtal tiʼ Jéeoba, tumen ku tuklik jeʼel u beetik baʼax kʼaas ka tak xuʼuluk u kʼaʼamal tumen Jéeobaeʼ. Baʼaleʼ leloʼ maʼ unaj u tuklik máakiʼ, tumen letiʼeʼ ku yáantik tuláakal le máaxoʼob meyajtik utiaʼal maʼ u náachtaloʼob tiʼ letiʼoʼ. Koʼoneʼex ilik teʼ Salmo 91 bix u kanáantikoʼon Jéeobaoʼ.

¹⁰ «Le máax kajakbal tu yáanal u boʼoyil [Jéeoba,] le Sen Kaʼanaloʼ tiʼ yaan tu yáanal u kanan le Máax yaan tuláakal páajtalil tiʼoʼ. Letiʼeʼ ku yaʼalik tiʼ Yuumtsil: “Teech in balbáail, in toksajil, in Jajal Dios máax tiʼ [in tsʼaamaj] in wóol”. Chéen letiʼ ku jáalkʼabtikech tiʼ léechoʼob.» (Sal. 91:1-3, LSM.) Le salmoaʼ ku yeʼesikeʼ Dioseʼ ku kanáantik le máaxoʼob yaabiltmi yéetel ku kʼubik u yóoloʼob tiʼoʼ (xokaʼak Salmo 91:9, 14). Baʼaleʼ ¿u kʼáat wa túun u yaʼaleʼ ku kanáantik maʼ u yúuchul mix upʼéel loob tiʼ le máaxoʼob meyajtikoʼ? U jaajileʼ yanchaj máaxoʼob tu kanáantaj úuchjeakil, lelaʼ tu beetaj utiaʼal u síijil le Mesías jach teʼ chʼiʼibal u yaʼalmoʼ. Baʼaleʼ tu chaʼaj u kʼaʼalal, u jaʼajatsʼaʼal yéetel u kíimsaʼal yaʼab tiʼ le máaxoʼob meyajtik tumen le máaxoʼob beetik baʼax utstutʼaan le Kʼaasilbaʼaloʼ (Heb. 11:34-39). Kex beyoʼ tu yáantoʼob utiaʼal ka chúukpajak u yóoloʼob u beetoʼob baʼax ku yaʼalik. Bey túunoʼ jeʼex u yaʼalik le Salmo 91, Jéeobaeʼ ku kanáantik le máaxoʼob meyajtik utiaʼal maʼ u náachtaloʼob tiʼoʼ.

11. ¿Baʼax u kʼáat u yaʼal u yantal máak «yáanal u boʼoy» Jéeoba, yéetel máaxoʼob ku kanáantaʼaloʼobiʼ?

¹¹ ¿Baʼax u kʼáat u yaʼal u yantal máak «yáanal u boʼoy» Jéeoba, jeʼex u yaʼalik le salmistaoʼ? U kʼáat u yaʼal u yantal máak tiʼ upʼéel tuʼux mix baʼal jeʼel u beetik u xuʼulul u yaabiltik  yéetel u tsʼáaik u fe tiʼ Dioseʼ (Sal. 15:1, 2; 121:5). Le máaxoʼob maʼatech u meyajtkoʼob Diosoʼ maʼ u kʼaj óoloʼob le tuʼux ku kanáantik máakoʼ. Letiʼobeʼ maʼ tu páajtal u kʼaj óoltikoʼob, tumen Jéeobaeʼ chéen ku kʼamik le máaxoʼob ku yaʼalikoʼobtiʼ: «Teech in [...] Jajal Dios máax tiʼ [in tsʼaamaj] in wóol». Wa maʼ k-jóokʼol teʼ tuʼux ku kanáantikoʼon Diosoʼ, maʼ ken lúubul tiʼ le léechoʼob ku tsʼáaik Satanás utiaʼal u náachkuntkoʼon tiʼ Diosoʼ.

12. ¿Baʼaxoʼob jeʼel u beetik k-náachtal tiʼ Dioseʼ?

¹² ¿Baʼaxoʼob jeʼel u beetik k-náachtal tiʼ Jéeobaeʼ? Le salmistaoʼ ku yaʼalikeʼ letiʼe «báan kíimiloʼob ku kʼuchuloʼob ich éekʼjochʼeʼenil[oʼ]», yéetel «le xuʼulsajoʼob [ku taaloʼob] kex yéetel kʼiin[oʼ]» (Sal. 91:5, 6). Lelaʼ u kʼáat u yaʼaleʼ Satanaseʼ ku yoksik tu tuukul máak u kaxtik chéen u yutsil yéetel u beetik chéen baʼax u kʼáat (2 Cor. 11:3). Ku beetik xan u tsʼíiboltik máak yaʼab baʼaloʼob, ka u taasuba máak noj baʼalil yéetel ku beetik u bin máak tu paach ayikʼaliloʼob. Ku beetik u tuklik máak maas maʼalob u luʼumil tiʼ u maasil, ku beetik u creertaʼal chéen bey úuchik u yantal tuláakal baʼaloʼ bey xan ku tusik máak yéetel le religionoʼob maʼatech u kaʼanskoʼob u jaajiloʼ (Col. 2:8). Tsʼoʼoleʼ ku beetik u lúubul tiʼ núupkʼeban yaʼab máakoʼob. Lelaʼ letiʼe baʼaxoʼob tsʼoʼok u meyajtiʼ utiaʼal u náachkuntik tiʼ Dios yaʼabkach máakoʼoboʼ (xokaʼak Salmo 91:7-10; Mat. 24:12).

Baʼax jeʼel u yáantkoʼon utiaʼal maʼ u xuʼulul k-yaabiltik Dioseʼ

13. ¿Bix u yáantkoʼon Jéeoba utiaʼal maʼ k-lúubul tiʼ baʼaloʼob jeʼel u beetik k-náachtal tiʼ letiʼeʼ?

¹³ ¿Bix u yáantkoʼon Jéeoba utiaʼal maʼ k-lúubul tiʼ le baʼaloʼobaʼ? Le salmistaoʼ ku yaʼalik: «Letiʼeʼ bíin u túuxt u angeloʼob utiaʼal u kanáantechoʼob jeʼel tuʼuxak ka xiʼikecheʼ» (Sal. 91:11). Le angeloʼobaʼ ku nuʼuktikoʼonoʼob yéetel ku kanáantikoʼonoʼob utiaʼal k-kʼaʼaytik le maʼalob péektsiloʼ (Apo. 14:6). Tsʼoʼoleʼ Dioseʼ u tsʼaamaj le ancianoʼob utiaʼal u kanáantikoʼonoʼ, letiʼobeʼ ku meyajtiʼob le Biblia utiaʼal u kaʼansajoʼob teʼ múuchʼuliloʼ, beyoʼ ku yáantkoʼonoʼob utiaʼal maʼ k-tuʼusul. Wa ku yilkoʼob utúul sukuʼun táan u joʼopʼol u tuukul jeʼex le máaxoʼob maʼatech u meyajtkoʼob Diosoʼ ku yilik u yáantkoʼob (Tito 1:9; 1 Ped. 5:2). Tsʼoʼoleʼ Jéeobaeʼ u tsʼaamaj «le palitsil chúukpajaʼan u yóol yéetel yaan u naʼat» utiaʼal u tsʼáatoʼon le kaʼansaj jeʼel u yáantkoʼon utiaʼal maʼ u joʼopʼol k-tuklik xan chéen bey úuchik u yantal tuláakal baʼaloʼ, utiaʼal maʼ k-lúubul tiʼ núupkʼeban bey xan utiaʼal maʼ k-bin tu paach ayikʼaliloʼob yéetel uláakʼ baʼaxoʼob maʼ maʼalobtakiʼ (Mat. 24:45). Le oʼolal maʼalob ka k-tukle: «¿Baʼaxoʼob tsʼoʼok u yáantken utiaʼal maʼ in lúubul tiʼ baʼaloʼob beyaʼ?».

14. ¿Bix u yáantkoʼon Dios?

¹⁴ ¿Baʼax unaj k-beetik utiaʼal maʼ k-lukʼul «yáanal u boʼoy» Jéeoba? Unaj u k-kanáantikba, jeʼex k-beetik utiaʼal maʼ u yúuchultoʼon loobeʼ, utiaʼal maʼ k-oklaʼal wa utiaʼal maʼ u tsaʼayaltoʼon upʼéel talam kʼojaʼanil. Utiaʼal maʼ k-náachtal tiʼ Dioseʼ, unaj k-beetik le baʼaxoʼob ku yaʼalik teʼ jóoʼsaʼaniloʼoboʼ, teʼ muchʼtáambaloʼoboʼ yéetel teʼ asambleaʼoboʼ. Tsʼoʼoleʼ kʼaʼabéet k-kʼáatik áantaj tiʼ le ancianoʼoboʼ yéetel k-eʼesik jatsʼuts modos  jeʼex u beetik uláakʼ sukuʼunoʼobeʼ. ¿Máasaʼ jach yaʼab bix u yáantkoʼon le sukuʼunoʼob teʼ múuchʼuliloʼ? (Pro. 13:20; xokaʼak 1 Pedro 4:10.)

15. ¿Bix k-ojéeltik Jéeobaeʼ jeʼel u kanáantkoʼon utiaʼal maʼ k-náachtal tiʼ letiʼeʼ?

¹⁵ Tiʼ Jéeobaeʼ yaan u páajtalil utiaʼal u kanáantkoʼon tiʼ jeʼel baʼalak jeʼel u beetik k-náachtal tiʼ letiʼeʼ (Rom. 8:38, 39). Tuukulnakoʼon tiʼ bix tsʼoʼok k-chʼaʼapachtaʼal tumen u nuuktakil le religionoʼob yéetel le politicoʼoboʼ. Yaʼab utéeneleʼ letiʼobeʼ maʼ u kʼáat u kíimsoʼonoʼobiʼ, baʼaxeʼ u kʼáatoʼob ka xuʼuluk k-meyajtik Dios. Baʼaleʼ Jéeobaeʼ ku kanáantkoʼon, lelaʼ ku yeʼesiktoʼon jach jaaj le baʼax ku yaʼalikaʼ: «Maʼ yanak máax beetik u nuʼukul baʼateʼel utiaʼal a xuʼulsaʼaliʼ» (Isa. 54:17).

¿Máax jach tu jaajil jeʼel u jáalkʼabtikoʼoneʼ?

16. ¿Baʼaxten maʼ tu páajtal u tsʼáaiktoʼon jáalkʼabil le yóokʼol kaaboʼ?

¹⁶ Wa k-kʼubik k-kuxtal tiʼ Jéeobaeʼ, ¿yaan wa u pʼáatal jach mix baʼal kun páajtal k-beetik? Maʼatan. Baʼaxeʼ wa k-táakpajal tiʼ u baʼalubaʼob le yóokʼol kaab náachchajaʼan tiʼ Jéeobaoʼ, yaan k-palitsiltaʼal tumen Satanás, letiʼeʼ utúul dios jach kʼasaʼan yéetel maʼatech u chʼaʼik óotsil tiʼ máak (Juan 14:30). ¿Baʼax ku meyajtiʼ utiaʼal u palitsiltik máak? Ku meyajtiʼ le baʼaloʼob yaan yil yéetel taakʼinoʼ (ket yéetel Apocalipsis 13:16, 17). Tsʼoʼoleʼ ku beetik u yilik máak bey maʼ kʼaas le kʼebanoʼ (Juan 8:34; Heb. 3:13). Le oʼolal kex ku yilik máak bey jáalkʼab utiaʼal u beetik chéen baʼax utstutʼaaneʼ maʼ jaaj wa jáalkʼabiʼ. Tumen le baʼaxoʼob ku beetkoʼoboʼ ku bin tu contra le baʼaxoʼob ku yaʼalik Jéeobaoʼ, le oʼolal ku maas palitsiltaʼaloʼob tumen le kʼebanoʼ yéetel ku maas kʼastal bix u kuxtaloʼob (Rom. 1:24-32).

17. ¿Tiʼ baʼax ken u jáalkʼabtoʼon Jéeoba?

¹⁷ Baʼaleʼ wa k-kʼubik k-kuxtal tiʼ Jéeobaeʼ, letiʼeʼ jeʼel u jáalkʼabtikoʼon tiʼ jeʼel baʼalak jeʼel u beetik k-náachtal tiʼ letiʼeʼ. Jeʼex utúul maʼalob doctor jach u yojel operar jeʼel u luʼsiktoʼon le baʼax beetik k-muʼyajoʼ, Jéeobaeʼ jeʼel u páajtal u luʼsiktoʼon le kʼebanoʼ. Chéen wa k-kʼubik kuxtal tiʼ Jéeoba yéetel wa k-tsʼáaik fe tiʼ u kuxtal Jesús tu kʼuboʼ jeʼel u jáalkʼabtkoʼonoʼob tiʼ le muʼyajiloʼob ku taasik le kʼebanoʼ yéetel jeʼel u yantaltoʼon le kuxtal minaʼan u xuuloʼ (Juan 3:36). Jeʼex wa k-ojel jach maʼalob u operar utúul doctoreʼ, maʼ ken sajaktal ka u operartoʼon, k-maas kaambal xan tiʼ Jéeobaeʼ yaan u yáantkoʼon k-maas tsʼáa k-fe tiʼ letiʼ. Le oʼolaleʼ unaj k-jach tsʼáaik k-óol xok le Bibliaoʼ, tumen jeʼel u yáantkoʼon k-maas kʼaj óolt yéetel k-maas yaabilt Dioseʼ, yéetel yaan u yáantkoʼon utiaʼal maʼ k-chʼaʼik saajkil k-kʼub k-kuxtal tiʼ letiʼ (1 Juan 4:18).

18. ¿Baʼax utsiloʼob ku kʼamik le máaxoʼob ku kʼubik u kuxtaloʼob tiʼ Jéeobaoʼ?

¹⁸ Jéeobaeʼ u tsʼaamajtoʼon u páajtalil k-yéeyik baʼax ken k-beete. Le oʼolal ku yaʼaliktoʼon: «Yéeyeʼex túun le kuxtal utiaʼal ka kuxlakeʼex yéetel a chʼiʼibaleʼexoʼ; yaabilteʼex Yuumtsil a [Dioseʼex]» (Deu. 30:19, 20). Letiʼeʼ u kʼáat ka k-chʼaʼatukult t-juunal k-meyajtik utiaʼal k-eʼesiktiʼ k-yaabiltmaj. Bey túunoʼ, ken k-kʼub k-kuxtal tiʼeʼ maʼ táan u pʼáatal mix baʼal ku páajtal k-beetkiʼ, baʼaxeʼ ku yantaltoʼon upʼéel kiʼimak óolal mix utéen yanaktoʼon.

19. ¿Baʼaxten maʼatech k-náajaltik ka u tiaʼalintoʼon Jéeoba?

¹⁹ Tumen kʼebanoʼoneʼ, maʼatech k-náajaltik ka u tiaʼalintoʼon Dios, tumen letiʼeʼ kiliʼich. Chéen tumen ku yeʼesiktoʼon u yutsileʼ ku páajtal k-kʼubik k-kuxtal tiʼ (2 Tim. 1:9). Pabloeʼ ku yaʼalik: «Tumen wa kuxaʼanoʼoneʼ, kuxaʼanoʼon utiaʼal Yuumtsil, wa k-kíimileʼ, k-kíimil utiaʼal Yuumtsil. Bey túunoʼ, wa kuxaʼanoʼoneʼ[,] wa kimenoʼoneʼ utiaʼaloʼon Yuumtsil» (Rom. 14:8). Wa k-kʼubik k-kuxtal tiʼ letiʼeʼ mix bikʼin kun yaatal t-óol.

¿Baʼax jeʼel a núukikeʼ?

• ¿Baʼax utsiloʼob ku kʼamik máak ikil u kʼubik u kuxtal tiʼ Jéeoba?

• ¿Bix k-ojéeltik jeʼel u páajtal k-beetik le baʼaxoʼob ku yaʼalik Diosoʼ?

• ¿Bix u kanáantik Jéeoba le máaxoʼob meyajtikoʼ?

[U kʼáatchiʼiloʼob le xookoʼ]

[U tsolajil le oochel teʼ táan juʼun 8]

Kʼáat tiʼ uláakʼ sukuʼunoʼob baʼax utsiloʼob tsʼoʼok u kʼamikoʼob úuchik u kʼubik u kuxtaloʼob tiʼ Jéeoba

[U tsolajil le oochel teʼ táan juʼun 10]

¿Bix u kanáantkoʼon Jéeoba?