Unaj k-eʼesik jach tu jaajil táan k-meyajtik Dios
Unaj k-eʼesik jach tu jaajil táan k-meyajtik Dios
«Tuláakal maʼalob cheʼeʼ ku tsʼáaik maʼalob ich, baʼaleʼ le kʼaakʼas cheʼeʼ kʼaakʼas ich ku tsʼáaik.» (MAT. 7:17)
1, 2. ¿Bix u kʼaj óoltaʼal jach máaxoʼob tsaypachtik Jesús?
JESUSEʼ tu yaʼaleʼ le baʼaxoʼob ku beetik yéetel ku kaʼansik le máakoʼoboʼ le kun eʼesik máaxoʼob jach tu jaajil tsaypachtik (Mat. 7:15-17, 20). U jaajileʼ le baʼaxoʼob ku beetik máakoʼ yaan baʼax u yil yéetel baʼaxoʼob ku yuʼubik bey xan yéetel baʼaxoʼob yaan tu puksiʼikʼal (Mat. 15:18, 19). Le oʼolal le máaxoʼob ku kaʼansaʼal baʼaloʼob maʼ jaajtak tiʼoboʼ jeʼel u páajtal u yaʼalaʼaleʼ ku tsʼáaikoʼob «kʼaakʼas ich», yéetel le máaxoʼob kanik u jaajiloʼ ku tsʼáaikoʼob «maʼalob ich».
2 Teʼ tu tsʼook kʼiinoʼobaʼ maas chíikaʼan u yilaʼal máaxoʼob beetik baʼax tu yaʼalaj Jesús (xokaʼak Daniel 12:3, 10). Le maʼ jaajil cristianoʼoboʼ maʼ u yojloʼob u jaajil yoʼolal Diosiʼ yéetel maʼatech u adorartkoʼob jeʼex unajeʼ, baʼaleʼ le máaxoʼob u kʼaj óoloʼob Diosoʼ ku chaʼik u nuʼuktaʼaloʼob tumen le kiliʼich muukʼ utiaʼal u adorarkoʼob Jéeoba jeʼex utstutʼaaneʼ, yéetel ku yilik u kuxtaloʼob jeʼex Cristoeʼ (Juan 4:24; 2 Tim. 3:1-5). Baʼaleʼ ¿bey wa k-beetik cada utúul tiʼ toʼonoʼ? Teʼ xookaʼ yaan k-ilik cinco baʼaxoʼob eʼesik jach máax u disipuloʼob Jesús. Ken k-il cada upʼéeleʼ maʼalob ka k-tukle: «¿Kin beetik wa baʼax utstutʼaan Dios yéetel kin kaʼansik chéen le baʼax ku yaʼalik le Bibliaoʼ? Yoʼolal bix in kuxtaleʼ, ¿kin péeksik wa u maasil utiaʼal ka okok ichil u kaajal Dios?».
Unaj k-kuxtal jeʼex u yaʼalik le Bibliaoʼ
3. ¿Baʼax kiʼimakkúuntik u yóol Jéeoba, yéetel baʼax unaj u péekskoʼon k-beet leloʼ?
3 Jesuseʼ tu yaʼalaj: «Maʼ tuláakal le máaxoʼob ku yaʼalikoʼobten: Yuumtsil, Yuumtsil, bíin oojkoʼob tu [reinoi] kaʼan[iʼ], baʼaleʼ chéen le máaxoʼob ku beetikoʼob [baʼax u kʼáat] in Taata yaan teʼ kaʼanoʼ» (Mat. 7:21). Bey túunoʼ, le baʼax beetik u kiʼimaktal u yóol Jéeobaoʼ maʼ chéen u yaʼalik máak táan u tsaypachtik Cristoiʼ, baʼaxeʼ kʼaʼabéet u yeʼesik yéetel baʼax ku beetik. Le máax tsaypachtik Cristooʼ ku chaʼik u nuʼuktaʼal tak tiʼ baʼaloʼob yaan yil yéetel taakʼin, meyaj, náaysaj óolal, baʼaxoʼob suukaʼan u beetaʼal, le tsʼoʼokol beeloʼ bey xan yéetel máaxoʼob ku biskuba. Baʼaleʼ le máaxoʼob chéen ku yaʼalikoʼob táan u tsaypachkoʼob Cristooʼ ku tuukuloʼob yéetel ku kuxtaloʼob jeʼex u yaʼalik le yóokʼol kaab táan u bin u maas kʼastaloʼ (Sal. 92:7).
4, 5. ¿Bix unaj u yáantikoʼon le baʼax ku yaʼalik Malaquías 3:18?
4 Le profeta Malaquías xanoʼ tu yaʼalaj: «Bíin a kʼaj óolteʼex u jelaʼanil máax uts tiʼ máax kʼasaʼan bey xan máax [adorartik] Yuumtsil tiʼ máax maʼ tu [adorartik]» (Mal. 3:18). Lelaʼ unaj u péekskoʼon tukulte: «¿Kin wilik wa in kuxtal jeʼex le máaxoʼob maʼatech u meyajtkoʼob Diosoʼ, wa kin wilik in kuxtal jeʼex u kʼáat Dioseʼ? ¿Kin beetik wa jeʼel baʼaxak utiaʼal in lúubul utsil tiʼ in wéet xookoʼob wa tiʼ in wéet meyajoʼobeʼ? ¿Kin beetik wa baʼax utstutʼaan Dios, yéetel ken páajchajkeʼ, kin waʼalik wa baʼaxten bey in kuxtaloʼ?» (xokaʼak 1 Pedro 3:16). Lelaʼ maʼ u kʼáat u yaʼal wa jach santoʼoniʼ, baʼaleʼ unaj u yilaʼal maʼ beyoʼon jeʼex le máaxoʼob maʼatech u meyajtkoʼob Jéeobaoʼ.
5 Wa ka wilik yaan baʼax kʼaʼabéet a wutskíintik ichil a kuxtaleʼ, kʼáat áantaj tiʼ Jéeoba, xok le Bibliaoʼ, payalchiʼinen yéetel ilawil a bin tiʼ tuláakal le muchʼtáambaloʼoboʼ. Jeʼex u bin a maas naʼatik le baʼax ku kaʼansik le Bibliaoʼ yaan u yilaʼal ichil a kuxtal le «maʼalob ich» ku tsʼáaikoʼ, yéetel yaan a «kiʼikiʼtʼantik u kʼaabaʼ» Dios teʼ kʼaʼaytajoʼ (Heb. 13:15).
Unaj k-tsʼáaik kʼaj óoltbil u Reino Dios
6, 7. ¿Baʼax uláakʼ chíikbesik jach máaxoʼob tsaypachtik Cristo?
6 Jesuseʼ tu yaʼalaj: «Kʼaʼabéet in tsʼáaik u maʼalob péektsilil u [reino] Jajal Dios tiʼ uláakʼ kaajoʼob xan, tumen le u biilal túuxtaʼabilaken» (Luc. 4:43). ¿Baʼaxten Jesuseʼ maases tiʼ le Reino tʼaanaj ka kʼaʼaytajnajoʼ? Tumen u yojel letiʼ ken u beet u Reyil le Reinooʼ, u yojel xaneʼ, yéetel u yáantaj le máaxoʼob yéeyaʼanoʼob utiaʼal u binoʼob kaʼanoʼ, yaan u beetkoʼob u xuʼulul le muʼyajiloʼ, tumen yaan u xuʼulskoʼob tiʼ Satanás yéetel tiʼ le kʼebanoʼ (Rom. 5:12; Apo. 20:10). Le oʼolal tu yaʼalaj tiʼ u disipuloʼob ka u kʼaʼaytoʼob le Reino tak ken kʼuchuk le xuʼulsajiloʼ (Mat. 24:14). Le máaxoʼob yanoʼob ichil u maasil religionoʼoboʼ maʼatech u beetkoʼob le meyajaʼ, tumen maʼ tu béeytaloʼob. ¿Baʼaxten? Yoʼolal óoxpʼéel baʼal. Yáaxeʼ, tumen maʼ tu páajtal u tsikbaltikoʼob upʼéel baʼax maʼ tu naʼatikoʼob. U kaʼapʼéeleʼ, tumen minaʼan kabal óolal tiʼob, saajkoʼob u chʼaʼapachtaʼaloʼob yéetel u pʼaʼastaʼaloʼob yoʼolal le maʼalob péektsiloʼ (Mat. 24:9; 1 Ped. 2:23). U yóoxpʼéeleʼ, tumen minaʼantiʼob u kiliʼich muukʼ Jéeoba (Juan 14:16, 17).
7 Baʼaleʼ le máaxoʼob jach tu jaajil u disipuloʼob Cristooʼ u yojloʼob baʼax u Reino Dios yéetel baʼax ken u beete. Le oʼolal ku tsʼáaikoʼob táanil ichil u kuxtaloʼob, tsʼoʼoleʼ yéetel u yáantaj le kiliʼich muukʼoʼ ku kʼaʼaytikoʼob tiʼ tuláakal yóokʼol kaab (Zac. 4:6). ¿Bey wa k-beetik cada utúul tiʼ toʼonoʼ? ¿K-táakpajal wa mantatsʼ teʼ kʼaʼaytajoʼ? ¿K-ilik wa k-maas táakpajal teʼ kʼaʼaytaj yéetel k-ilik wa k-beetik u maas maʼalobil ku páajtal? Tsʼoʼoleʼ, tumen «u tʼaan [Dios] kuxaʼan yéetel yaan u páajtalil[eʼ]», ¿k-ilik wa u maas meyajtoʼon tubeel? Apóstol Pabloeʼ bey tu beetiloʼ, letiʼeʼ meyajnajtiʼ le Kiliʼich Tsʼíiboʼob utiaʼal u yáantik le máaxoʼob uʼuy u tsikbaloʼ (Heb. 4:12; Hch. 17:2, 3).
8, 9. 1) ¿Baʼaxoʼob eʼesik jach maʼalob ka xoʼokok le Biblia tiʼ u yuumil najoʼ? 2) ¿Bix jeʼel u meyajtoʼon tubeel le Biblia teʼ kʼaʼaytajoʼ?
8 Utúul sukuʼun jokʼaʼan kʼaʼaytaj joonaj joonaileʼ tu xokaj Daniel 2:44 tiʼ utúul católico, ka tsʼoʼokeʼ tu tsolajtiʼ u Reino Dioseʼ yaan u beetik u yantal jeetsʼelil yéetel yaan u beetik u xuʼulul u yantal saajkilil. Le máak túunoʼ tu yaʼalajtiʼ: «Jach diosboʼotiktech úuchik a xokikten teʼ Bibliaoʼ, techeʼ maʼ chéen ta tsolajteniʼ». Utúul sukuʼun táan u kʼaʼaytaj xan yéetel u yatneʼ, tu xokaj upʼéel teksto tiʼ utúul koʼolel ku bin tiʼ upʼéel Iglesia Ortodoxa Griega. Le koʼoleloʼ tu beetaj yaʼab kʼáatchiʼob, le sukuʼun yéetel u yatnoʼ meyajnajtiʼob le Biblia utiaʼal u núukikoʼob tiʼoʼ. Ka tsʼoʼokeʼ le koʼoleloʼ tu yaʼalajtiʼob: «¿A wojeleʼex wa baʼaxten tin wóotaj tsikbal ta wéeteleʼex? Tumen a chʼaʼamaj a Bibliaʼex ka taaleʼex a xíimbalteneʼex yéetel ta xokeʼex in wuʼuye».
9 Le jóoʼsaʼaniloʼob ku meyajtoʼon teʼ kʼaʼaytajoʼ jach ku yáantik le máakoʼoboʼ, baʼaleʼ maas unaj u meyajtoʼon le Bibliaoʼ. ¿Suukaʼan wa u meyajtech teʼ kʼaʼaytajoʼ? Wa maʼatecheʼ, ilawil u meyajtech. Maʼ xaaneʼ maʼalob ka yéey le tekstoʼob ku tʼaanoʼob tiʼ le Reinooʼ yéetel bix ken u xuʼulsik tiʼ tuláakal le baʼaloʼob chiʼichnakkúuntik le máaxoʼob yanoʼob teʼ tuʼux ka kʼaʼaytajoʼ, yéetel ilawil a xokik u yuʼuboʼob ken kʼaʼaytajnakech wa ka wilik jeʼel u páajtaleʼ.
Unaj k-ilik nojoch baʼal k-bisik u kʼaabaʼ Dios
10, 11. ¿Bix u jelaʼanil u tuukul Jesús yoʼolal u kʼaabaʼ Dios tiʼ le bix u tuukul yaʼab tiʼ le máaxoʼob ku yaʼalikoʼob táan u tsaypachtikoʼ?
10 Jéeobaeʼ ku yaʼalik: «Teʼex in j-jaajkunajeʼex» (Isa. 43:12). ¿Máax u maas nojchil u j-jaajkunaj Jéeoba? Jesucristo. Letiʼeʼ jach nojoch baʼal u yilik u bisik yéetel u tsʼáaik kʼaj óoltbil u kʼaabaʼ u Taata (xokaʼak Salmo 148:13 yéetel Mateo 6:9). Le oʼolal le Bibliaoʼ ku yaʼalikeʼ Jesuseʼ letiʼe «máax ku jaajkunaj yéetel chúukaʼan óolaloʼ» (Apo. 1:5, TN, Versión Popular).
11 Baʼaleʼ u maas yaʼabil tiʼ le máaxoʼob ku yaʼalikoʼob ku tʼaanoʼob tu kʼaabaʼ Jesús yéetel tu kʼaabaʼ u Taataeʼ maʼatech u tsʼáaikoʼob nojbeʼenil tiʼ, tsʼoʼok tak u luʼskoʼob u kʼaabaʼ Dios ichil u Bibliaʼob. Maʼ sen úucheʼeʼ aʼalaʼab tiʼ le obispoʼob catolicoʼoboʼ: «U kʼaabaʼ Dios jeʼex le ku tsʼíibtaʼal yéetel le tetragrammaton YHWH maʼ unaj u meyaj tiʼ máakiʼ mix u chʼaʼachiʼitaʼal [tu yorai le cultooʼ]». * ¿Máasaʼ jach maʼ maʼalob le baʼax ku beetkoʼoboʼ?
12. ¿Baʼax tu beetaj le máaxoʼob meyajtik Dios tu jaʼabil 1931 utiaʼal u biskoʼob u kʼaabaʼoʼ?
12 Jeʼex tu beetil Jesús yéetel uláakʼ «máaxoʼob tsʼoʼok u yeʼesikoʼob u yoksaj óolaloʼobeʼ», le máaxoʼob jach tu jaajil táan u tsaypachtikoʼob Cristo teʼ kʼiinoʼobaʼ jach nojoch baʼal u yilkoʼob u meyajtiʼob u kʼaabaʼ Dios (Heb. 12:1). Le oʼolal tu jaʼabil 1931 tu chʼaʼatukloʼob u kʼaabaʼtikoʼob u j-jaajkunajoʼob Jéeoba (xokaʼak Isaías 43:10-12). Bey túunoʼ letiʼobeʼ kʼuch u beetubaʼob «jumpʼéel kaaj» ku bisik u kʼaabaʼ Dios (Hch. 15:14, 17).
13. ¿Baʼax unaj u beetik le máaxoʼob bisik u kʼaabaʼ Diosoʼ?
13 ¿Baʼax unaj u beetik le máaxoʼob bisik u kʼaabaʼ Diosoʼ? Yáaxeʼ unaj u tʼaanoʼob tu kʼaabaʼ. Pabloeʼ tu yaʼalaj: «Tuláakal le máax chʼaʼachiʼitik u kʼaabaʼ [Jéeobaeʼ] bíin toʼokok. Baʼaleʼ ¿bix kun u chʼaʼachiʼitoʼob u kʼaabaʼ wa maʼ yoksaj óoltoʼobiʼ? ¿Bix kun u yoksaj óoltoʼob wa maʼ u yuʼuboʼob u yúuchul tʼaan tu yoʼolaliʼ? ¿Bix kun u yuʼubiloʼob wa minaʼan mix máak utiaʼal [kʼaʼaytiktiʼob] le maʼalob péektsiloʼ? ¿Bix ku bin u [kʼaʼaytoʼob] le maʼalob péektsiloʼ wa minaʼan mix máak túuxtikoʼob?» (Rom. 10:13-15). Tsʼoʼoleʼ kʼaʼabéet k-áantik u maasil u kʼaj óoltoʼob tubeel Jéeoba, yéetel ka u yiloʼob maʼ jaaj le kaʼansajoʼob jeʼex le infiernooʼ, tumen lelaʼ upʼéel kaʼansaj ku beetik u tuklaʼal Dioseʼ jach kʼasaʼan jeʼex le Kʼaasilbaʼaloʼ (Jer. 7:31; 1 Juan 4:8; ket yéetel Marcos 9:17-27).
14. ¿Bix u yuʼubikuba jujuntúul máaxoʼob ken u kʼaj óoltoʼob u kʼaabaʼ Dios?
14 Techeʼ ¿nojoch baʼal wa a wilik a bisik u kʼaabaʼ Dios yéetel ka wilik wa a tsʼáaik kʼaj óoltbil? Utúul koʼolel kajaʼan tu kaajil Pariseʼ, tu yojéeltaj u j-jaajkunajoʼob Jéeobaeʼ u yojloʼob bix u kʼaabaʼ Dios. Ka tu yilaj jeʼel u páajtaleʼ, tu kʼáataj tiʼ utúul tiʼ letiʼob ka eʼesaʼaktiʼ u kʼaabaʼ Dios teʼ Bibliaoʼ. Ka eʼesaʼab tiʼ le baʼax ku yaʼalik le Salmo 83:18, jach kiʼimakchaj u yóol ka tu yóotaj ka tsʼaʼabak xook tiʼ yéetel le Bibliaoʼ, bejlaʼeʼ letiʼeʼ ku kʼaʼaytaj tuʼux maas kʼaʼabéet áantaj yaanal luʼumil. Utúul koʼolel católica kajaʼan tu luʼumil Australiaeʼ okʼolnaj ka tu yilaj u kʼaabaʼ Dios teʼ Bibliaoʼ. Joʼopʼ u meyajtik Dios yéetel tu beetuba precursorai. Maʼ jach úuch xaneʼ, kaʼatúul sukuʼunoʼob tu luʼumil Jamaicaeʼ tu yeʼesoʼob tiʼ utúul koʼolel tu Bibliaeʼ u kʼaabaʼ Dioseʼ, Jéeoba, le koʼoleloʼ okʼolnaj xan ka tu yilaj. Bey túunoʼ, jach unaj k-ilik nojoch baʼal k-bisik u kʼaabaʼ Dios, yéetel jeʼex tu beetil Jesuseʼ, unaj k-tsʼáaik kʼaj óoltbil tuláakal tuʼux.
«Maʼ a yaabiltikeʼex yóokʼol kaab»
15, 16. 1) ¿Bix k-ilik le yóokʼol kaabaʼ? 2) ¿Baʼax kʼáatchiʼi unaj k-beetik cada utúul tiʼ toʼon?
15 Le Bibliaoʼ ku yaʼalik: «Maʼ a yaabiltikeʼex yóokʼol kaab, mix le baʼaloʼob yaan yóokʼol kaaboʼ. Wa yaan máax ku yaabiltik yóokʼol kaabeʼ, maʼ u yaabiltmaj Jajal Dios le Taataoʼ» (1 Juan 2:15). Le yóokʼol kaab yéetel le baʼaxoʼob yanoʼoʼ ku bin tu contra Jéeoba bey xan tu contra u kiliʼich muukʼ. Le máaxoʼob meyajtik Jéeobaoʼ ku yilkoʼob maʼ u táakpajloʼob tiʼ u baʼalubaʼob le yóokʼol kaabaʼ yéetel ku yilik u pʼektikoʼob jach tu jaajil u yóoloʼob, tumen u yojloʼob baʼax ku yaʼalik disipulo Santiago, «u bisikuba máak yéetel yóokʼol kaabeʼ ku beetikuba u [enemigo] Jajal Dios» (Sant. 4:4).
16 Teʼ kʼiinoʼob jach yaʼab u beetaʼal baʼaxoʼob kʼaastakaʼ, maʼ chéen chʼaʼabil jeʼel u beetik máak le baʼax ku yaʼalik Santiagooʼ (2 Tim. 4:10). Le oʼolal Jesuseʼ payalchiʼinaj tu yoʼolal u disipuloʼob: «Maʼ táan in kʼáatiktech ka a lukʼesoʼob tiʼ le yóokʼol kaabaʼ, táan in kʼáatik ka a tokoʼob tiʼ Kʼaasilbaʼal. Jeʼel bix maʼ yóokʼol kaabileneʼ bey xan letiʼob maʼ yóokʼol kaabiloʼobiʼ» (Juan 17:15, 16). Maʼalob ka k-tukle: «¿Kin wilik wa maʼ in táakpajal tiʼ u baʼalubaʼob yóokʼol kaab? Le máaxoʼob u kʼaj óolenoʼoboʼ, ¿u yojloʼob wa baʼax kin tuklik yoʼolal le kʼiimbesajoʼob yéetel uláakʼ baʼaxoʼob suukaʼan u beetaʼal tumen u maasil religionoʼoboʼ?» (2 Cor. 6:17; 1 Ped. 4:3, 4).
17. ¿Baʼax jeʼel u péeksik le máakoʼob uts u puksiʼikʼaloʼob u natsʼubaʼob tiʼ Jéeobaoʼ?
17 U jaajileʼ u maasil máakoʼobeʼ jelaʼan u yilkoʼob le baʼaxoʼob k-beetkoʼ, baʼaleʼ yaan tiʼ letiʼobeʼ jeʼel u taaktal u yojéeltikoʼob baʼaxten bey k-kuxtaloʼ. Yaʼab tiʼ letiʼobeʼ ku tsʼáaikoʼob cuenta letiʼe baʼax ku yaʼalik le Biblia nuʼuktik k-fe yéetel k-kuxtaloʼ, le oʼolal ku joʼopʼol u kʼamkoʼob le baʼax ku kaʼansik le sukuʼunoʼob yéeyaʼanoʼob utiaʼal u binoʼob kaʼanoʼ. Ken u beetoʼob lelaʼ bey ka u yaʼaloʼobeʼ: «K-kʼáat bin ta wéeteleʼex tumen tsʼoʼok k-uʼuyik tiʼ yaan [Dios] ta wéeteleʼexeʼ» (Zac. 8:23).
Unaj k-eʼesik yaabilaj
18. ¿Bix le yaabilaj unaj k-eʼesik tiʼ Jéeoba yéetel tiʼ k-éet máakiloʼ?
18 Jesuseʼ tu yaʼalaj: «Yaabilt Yuumtsil a Jajal Dios yéetel tuláakal a puksiʼikʼal, yéetel tuláakal a wóol, yéetel tuláakal a naʼat», ka tsʼoʼokeʼ ka tu yaʼalaj: «Yaabilt a láakʼ jeʼel bix ka yaabiltkabaeʼ» (Mat. 22:37, 39). Le yaabilaj beyaʼ (ich griego agápe) ku nuʼuktaʼal tumen le baʼax ku yaʼalik le Biblia utiaʼal u yeʼesik u yutsil tiʼ u maasil yéetel ku yáantik máak u yeʼes jatsʼuts modos. Baʼaleʼ tu puksiʼikʼal máak ku síijil. Lelaʼ upʼéel yaabilaj ku yeʼesik máak jach tu jaajil u yóol (1 Ped. 1:22). Le yaabilajaʼ maʼatech u kaxtik chéen u yutsil, tsʼoʼoleʼ ku yeʼesaʼal yéetel baʼax ku yaʼalik máak bey xan yéetel baʼaxoʼob ku beetik (xokaʼak 1 Corintoiloʼob 13:4-7).
19, 20. Tsikbalt baʼaxten maas maʼalob ka k-eʼes yaabilaj.
19 Le yaabilajoʼ ku taal tiʼ le kiliʼich muukʼoʼ, le oʼolal ku yáantik le máaxoʼob meyajtik Dios u beetoʼob baʼaxoʼob maʼ tu páajtal u beetaʼal tumen u maasil, jeʼex u yaabiltaʼal le máaxoʼob yaanal u luʼumiloʼob wa yaanal baʼaxoʼob suuk u beetkoʼoboʼ (xokaʼak Juan 13:34, 35; Gal. 5:22). Le máaxoʼob uts u puksiʼikʼaloʼoboʼ jach ku péek u yóoloʼob ken u yiloʼob bix u yeʼesaʼal le yaabilajaʼ. Lelaʼ bey úuchik tiʼ utúul xiʼipal judío, tu kaajil Israel, le ka yáax bin tiʼ upʼéel muchʼtáambaleʼ péeknaj u yóol ka tu yilaj u múuchʼ yanil le judíoʼob yéetel le arabeʼob utiaʼal u adorarkoʼob Jéeobaoʼ. Leloʼ le áant u kʼam ka tsʼaʼabak xook tiʼ yéetel le Bibliaoʼ yéetel ka seguernak u bin teʼ muchʼtáambaloʼoboʼ. ¿Bey wa le yaabilaj k-eʼesik tiʼ le sukuʼunoʼoboʼ? ¿K-kʼamik wa tubeel le máaxoʼob káajal ku beetik u taaloʼob teʼ Najil Reino, kex jeʼel tuʼuxak u taaloʼob, jeʼel baʼalak coloril u wíinkliloʼob yéetel kex ayikʼaloʼob wa óotsiloʼob?
20 Toʼoneʼ k-ilik eʼesik yaabilaj tiʼ tuláakal máak. Utúul koʼolel católica kajaʼan tu luʼumil Salvador, yaan 87 jaʼaboʼob tiʼeʼ, úuch joʼopʼok u xokik le Biblia yéetel utúul x-lóoʼbayan jaajkunaj tiʼ Jéeoba, baʼaleʼ maʼ u chʼaʼatukult u xulik u bin tu iglesiaiʼ. Upʼéel kʼiineʼ jach kʼojaʼanchajeʼ ka oksaʼab hospital. Ka jóoʼsaʼabeʼ, ichil upʼéel meseʼ bin xíimbaltbil tumen le sukuʼunoʼoboʼ yéetel tu bisoʼob baʼal u jaante. Baʼaleʼ mix utúul tiʼ u yéet religionil bin xíimbaltik, ka tu chʼaʼatuklaj u jóoʼsik u imagenoʼob tu yotoch, jóokʼ ichil u religión ka tu seguertaj u xokik le Bibliaoʼ. Jeʼex túun k-ilkoʼ, le yaabilajoʼ maas ku péeksik máak ke le baʼaxoʼob k-aʼalikoʼ.
21. ¿Baʼax unaj k-beetik utiaʼal k-ilik u béeytal le baʼaxoʼob ku yaʼalik Diosoʼ?
21 Maʼ kun xáantaleʼ Jesuseʼ yaan u yaʼalik tiʼ le maʼ jaajil cristianoʼoboʼ: «Mix bikʼin in kʼaj óolteʼex; ¡tselabaʼex tin táan, teʼex ta beetajeʼex baʼaloʼob kʼaastak!» (Mat. 7:23). Baʼaleʼ yéetel le baʼaxoʼob k-beetikoʼ k-tsʼáaik nojbeʼenil tiʼ Jéeoba yéetel tiʼ Jesús. Le oʼolaleʼ, tuukulnakoʼon mantatsʼ tiʼ le baʼax tu yaʼalaj Cristoaʼ: «Le máax ku yuʼubik in tʼaan yéetel ku beetik baʼax kin waʼalikeʼ, bey juntúul máak yaan u naʼat tu beetaj u yotoch tu yóokʼol tuunicheʼ» (Mat. 7:24). Bey túunoʼ, wa k-eʼesik yéetel baʼaxoʼob k-beetik jach tu jaajil u disipuloʼon Cristoeʼ, yaan u kʼamkoʼon Dios yéetel yaan u kʼuchul u kʼiinil k-ilik u béeytal le baʼax ku yaʼalikoʼ.
[Tsolajiloʼob]
^ xóot’ol 11 Yaʼab tiʼ le jóoʼsaʼaniloʼob ku meyaj tiʼ le catolicoʼob teʼ kʼiinoʼobaʼ ku meyajtiʼob «Yahvé» utiaʼal u sutikoʼob ich kastlan le Tetragramatonoʼ, jeʼex le Biblia de Jerusalén Latinoamericana.
¿Kʼajaʼan wa tech?
• ¿Baʼax u jelaʼanil le máaxoʼob jach tu jaajil táan u tsaypachtikoʼob Jesusoʼ?
• Aʼal jujumpʼéel baʼaxoʼob ku beetik le máaxoʼob meyajtik Diosoʼ.
• ¿Baʼaxoʼob t-ilaj maas unaj k-tsʼáaik ichil k-kuxtal?
[U kʼáatchiʼiloʼob le xookoʼ]
[U tsolajil le oochel teʼ táan juʼun 13]
¿Suuk wa u meyajtoʼon le Biblia teʼ kʼaʼaytajoʼ?
[U tsolajil le oochel teʼ táan juʼun 15]
¿U yojel wa u maasil maʼatech in táakpajal tiʼ le kʼiimbesajoʼob ku bin tu contra le baʼax ku yaʼalik Diosoʼ?