Kʼáatchiʼob ku beetaʼal

¿Baʼax oʼolal jeʼel u páajtal u tuklik máak unaj u kaʼa okjaʼeʼ?

Maʼ xaaneʼ yaan máakeʼ jeʼel u tuklikeʼ kʼaʼabéet u kaʼa okjaʼ. Maʼ xaaneʼ, tumen le ka okjaʼanajoʼ láayliʼ táan u beetik baʼaloʼob kʼaastak jeʼel u beetik u jóoʼsaʼal máak ichil le múuchʼuliloʼ. Le oʼolaleʼ, ¿unaj wa kaʼach u kʼubik u kuxtal tiʼ Jéeoba? Maʼatech. Utiaʼal ka kʼaʼamak tumen Jéeobaeʼ unaj u pʼatik tuláakal baʼax kʼaas. Le máaxoʼob beetik kaʼach baʼaloʼob kʼaastak ka okjaʼanajoʼoboʼ, maʼalob ka u tukultoʼob u yokjaʼob tu kaʼatéen.

Beoraaʼ tuukulnakoʼon tiʼ utúul j-kʼaʼaytaj maʼ táan u beetik baʼaloʼob kʼaastak ka okjaʼanajiʼ, baʼaleʼ maʼ úuch okjaʼanakeʼ ka tu beetaj upʼéel baʼax kʼaas ku náajmatik ka tsoʼolok u nuʼuk tiʼ tumen upʼéel comité judicial. ¿Jeʼel wa u páajtal u yaʼalik maʼ kʼambeʼen úuchik u yokjaʼ tumen maʼ jach u naʼatmaj wa kʼaas le baʼax ku beetkoʼ? Le ancianoʼob yanoʼob ichil le comité judicialoʼ maʼ unaj u yaʼalkoʼobtiʼ maʼ kʼambeʼen úuchik u yokjaʼiʼ mix u beetkoʼob u tuklik kʼaʼabéet u kaʼa okjaʼ. Tumen le kʼiin ka okjaʼanajoʼ tu yuʼubaj u máansaʼal upʼéel tsoltʼaan ku yeʼesik baʼaxoʼob táakaʼan ichil u yokjaʼ máak. Yéetel le ka tsʼoʼok le tsoltʼaanoʼ tu núukaj le kaʼapʼéel kʼáatchiʼob yaan yil yéetel u kʼubik u kuxtal máak tiʼ Jéeoba bey xan yéetel le okjaʼoʼ. Ka tsʼoʼokeʼ tu kʼexaj u nookʼ, ka bin utiaʼal ka okjaʼanak. Le oʼolal jeʼel u páajtal k-aʼalikeʼ u naʼatmaj baʼax unaj u beetik, le oʼolal le ancianoʼoboʼ unaj u yilkoʼob bey utúul sukuʼun tsʼoʼok u yokjaʼeʼ.

Wa utúul máax taak u yojéeltik wa kʼambeʼen úuchik u yokjaʼeʼ, le ancianoʼoboʼ maʼalob ka u yaʼaloʼobtiʼ ka u xok le revista La Atalaya 15 tiʼ agosto tiʼ 1960, táan juʼun 511, yéetel 15 tiʼ julio tiʼ 1964, táan juʼun 443 tak 446. Baʼaleʼ wa yaan máax ku tuklik kʼaʼabéet u kaʼa okjaʼ (maʼ xaaneʼ, tumen maʼ u jach naʼatmaj le baʼaxoʼob ku kaʼansik le Biblia le ka yáax okjaʼanajoʼ) leloʼ upʼéel baʼax unaj u chʼaʼatuklik cada utúul máak.

¿Baʼaxoʼob unaj u chʼaʼik en cuentai máak wa yaan u kajtal uláakʼ máakoʼob tu yotoch?

Bejlaʼeʼ yaʼab máakoʼobeʼ minaʼan u yotochoʼob. Yoʼolal le kʼojaʼaniloʼoboʼ, u pʼáatal minaʼan meyaj wa yoʼolal uláakʼ baʼaloʼobeʼ yaʼab máakoʼobeʼ ku yilkoʼob u kʼaʼabéetil u máanoʼob kajtal u múuchʼ yéetel máaxoʼob maʼ jach u láakʼtsiloʼobiʼ. Yaan tuʼuxoʼobeʼ maʼ jelaʼan u yilaʼal u múuchʼ kajtal jejeláas familiaʼob chéen tiʼ upʼéeliliʼ najiʼ.

U kaajal Jéeobaeʼ maʼatech u yaʼalik tuláakal baʼaxoʼob unaj u beetik máak tiʼ baʼaloʼob yaan yil yéetel u kajtal uláakʼ máakoʼob tu yotoch. Baʼaleʼ ku yaʼalik tiʼ tuláakal le máaxoʼob meyajtik Dios ka u chʼaʼob en cuentai baʼaxoʼob ku yaʼalik le Biblia tiʼ baʼaloʼob yaan yil yéetel lelaʼ. ¿Máakalmáak jujumpʼéel tiʼ le baʼaxoʼob ku yaʼalik le Bibliaoʼ?

Yáaxeʼ unaj u yilik máak wa maʼ ken u taas talmil tiʼ u máan kajtal uláakʼ máak tu yotoch.  Maʼalob ka u tukult máak: ¿Bix u kuxtaloʼob? ¿Ku meyajtikoʼob wa Jéeoba? ¿Ku kuxtaloʼob wa jeʼex u yaʼalik le Bibliaoʼ? Unaj u yilik máak maʼ u tuʼubul tiʼ le baʼax tu yaʼalaj apóstol Pabloaʼ: «Maʼ a chaʼikeʼex a tuʼusleʼex. Jeʼel bix ku yaʼalik le kettʼaanoʼ: Le kʼaakʼas éet xíimbaloʼoboʼ ku kʼaskúuntikoʼob le maʼalob kuxtaloʼ» (1 Cor. 15:33).

Tsʼoʼoleʼ le Bibliaoʼ ku yeʼeskeʼ Jéeobaeʼ ku pʼektik le núupkʼebanoʼ (Heb. 13:4). Letiʼeʼ maʼ maʼalob u yilik u kajtal utúul xiib yéetel utúul x-chʼúupal tiʼ upʼéeliliʼ naj ka tak tuklaʼak tsʼokaʼan u beeloʼobiʼ. Utúul máax meyajtik Dioseʼ maʼ unaj u pʼáatal kajtal tuʼux maʼ kʼaas u yilaʼal le núupkʼebanoʼ.

Le Bibliaoʼ ku yaʼalik tiʼ le máaxoʼob u kʼáatoʼob u beetoʼob baʼax ku yaʼalik Diosoʼ: «Púutsʼeneʼex, túun tiʼ le núupkʼebanoʼ» (1 Cor. 6:18). Le oʼolal maʼ maʼalob ka kajlak máak tiʼ upʼéel naj jeʼel u tsʼáaik tuʼux u lúubul tiʼ núupkʼebaneʼ. Jeʼex wa yaʼab máaxoʼob kajaʼanoʼob tiʼ upʼéeliliʼ najeʼ, yaan kʼiineʼ jeʼel u yantal tuʼux u beetaʼal baʼax maʼ maʼalobeʼ. ¿Baʼax jeʼel u yúuchul wa maʼ kulaʼan u maasil ka pʼáatak utúul xiib yéetel utúul koʼolel maʼ tsʼokaʼan u beeloʼob teʼ najoʼ? Maʼ maʼalob xan ka pʼáatak chéen tu juunal tiʼ upʼéeliliʼ naj utúul xiib yéetel utúul koʼolel táan u biskubaʼobiʼ. Jeʼex túun k-ilkoʼ, maʼalob ka u yil máak maʼ u tsʼáaik tuʼux u lúubul tiʼ kʼeban.

Tak le máaxoʼob u divorciarmubaʼoboʼ maʼ maʼalob ka seguernak u pʼáatloʼob múul kajtal tiʼ upʼéeliliʼ najiʼ. Tumen suukaʼan u biskubaʼob kaʼacheʼ, séebaʼan jeʼel u lúubloʼob tiʼ núupkʼebaneʼ (Pro. 22:3).

Tsʼoʼoleʼ unaj u chʼaʼabal en cuentai baʼax ku tuklik le máaxoʼob kajaʼanoʼob naatsʼoʼ. Kex utúul máax meyajtik Dios maʼ kʼaas u yilik ka kajlak tu yotoch uláakʼ máakoʼobeʼ, maʼ xaaneʼ maʼ maʼalob jeʼel u yilaʼal tumen u maasileʼ. Toʼoneʼ maʼ k-kʼáat ka úuchuk lelaʼ, tumen maʼ k-kʼáat ka aʼalaʼak baʼaloʼob kʼaastak tiʼ Jéeoba yoʼolal le baʼaxoʼob k-beetkoʼ. Baʼaxeʼ unaj k-beetik le baʼax tu yaʼalaj Pabloaʼ: «Maʼ a tsʼáaikeʼex tiʼ mix máak baʼax oʼolal u lúubul: mix tiʼ le judíoʼoboʼ, mix tiʼ le máaxoʼob yanoʼob tu [múuchʼulil] Jajal Diosoʼ. Teneʼ táan in tsʼáaik in wóol in lúubul utsil tu táan tuláakal máak tiʼ jeʼel baʼalak ka in beeteʼ. Maʼ táan in kaxtik in wutsil tin juunal baʼaleʼ u yutsil uláakʼ máakoʼob utiaʼal ka toʼokokoʼob» (1 Cor. 10:32, 33).

U jaajileʼ, yaan kʼiineʼ maʼ chéen chʼaʼabil jeʼel u tsʼoʼokbesik máak le baʼaxoʼob ku yaʼalik Jéeobaoʼ. Baʼaleʼ tuláakal le máaxoʼob meyajtik Diosoʼ unaj u jach ilkoʼob «baʼax uts tu táan Yuumtsil». Unaj u yilkoʼob maʼ u beetaʼal baʼaloʼob kʼaastak tu yotochoʼob (Efe. 5:5, 10). Utiaʼal lelaʼ maʼalob ka u kʼáatoʼob u nuʼuktaj Dios yéetel ka u beetoʼob tuláakal le ku páajtal utiaʼal u kanáantik bix u kuxtaloʼob utiaʼal maʼ u beetkoʼob u yaʼalaʼal baʼal tu contra Jéeoba.