¿K-ilik wa Jéeoba bey k-Taataeʼ?

UTÉENJEAKILEʼ utúul u disipulo Jesuseʼ tu yaʼalaj: «Yuumtsil, kaʼansoʼon payalchiʼ». Letiʼeʼ tu yaʼalajtiʼ: «Ken payalchiʼinakeʼexeʼ aʼaleʼex beyaʼ: K-Yuum yanech teʼ kaʼanoʼ, kiliʼichkuntaʼak a kʼaabaʼ» (Luc. 11:1, 2). Jesuseʼ utiaʼal u tʼanik u Taataeʼ maʼ meyajnaj tsikbeʼen kʼaabaʼob tiʼiʼ, jeʼex u «[Diosil] tuláakal páajtalil», «j-Kaʼambesaj», le Máax «beetmail tuláakal yóokʼol kaab[oʼ]», «juntúul Nuxib» wa «Jajal Dios yaan u naʼat» (Gén. 49:25; Isa. 30:20; 40:28; Dan. 7:9; 1 Tim. 1:17). Baʼaxeʼ letiʼeʼ tu yaʼalajtiʼ «k-Yuum». ¿Baʼaxten? Maʼ xaaneʼ tumen u kʼáat ka k-natsʼba yiknal le Máax beetmil tuláakal baʼal, jeʼex u náatsʼal utúul chan paal yiknal u taataeʼ.

Baʼaleʼ yaan máaxeʼ talam u yilik Jéeoba bey u Taataeʼ. Utúul kiik ku kʼaabaʼtik Atsukoeʼ * ku yaʼalik: «Kex tsʼoʼok in wokjaʼeʼ, máan yaʼab jaʼaboʼob talam in wilik in natsʼkimba yiknal Jéeoba yéetel in waʼalik Taatai tiʼ». Tsʼoʼoleʼ ka tu yaʼalaj baʼaxten: «Maʼ kʼajaʼanten mix utéen u yeʼesikten yaabilaj in taataiʼ».

Teʼ tu tsʼook kʼiinoʼob jach talamtakaʼ, yaʼab taatatsiloʼobeʼ maʼatech u yeʼeskoʼob «yaakunaj» tiʼ u paalaloʼob (2 Tim. 3:1, 3). Le oʼolal yaʼab máakoʼobeʼ ku yuʼubikubaʼob jeʼex Atsukooʼ. Baʼaleʼ jach ku líiʼsik k-óol ojéeltik jach yaan baʼax oʼolal k-ilik Jéeoba bey utúul Taatatsil jach u yaabiltmoʼoneʼ.

Jéeobaeʼ ku tsʼáaik tuláakal baʼax kʼaʼabéettoʼon

Utiaʼal k-ilik Jéeoba bey k-Taataeʼ, táanileʼ unaj k-kʼaj óoltik bix letiʼ. Baʼaleʼ ¿bix jeʼel u páajtal k-kʼaj óoltikeʼ? Jesuseʼ ku yaʼalik: «Mix máak u kʼaj óol tu jaajil le Paaloʼ, chéen le Taataoʼ; mix máak xan u kʼaj óol tu jaajil le Taataoʼ, chéen le Paaloʼ, yéetel le máax tsʼaʼantiʼ tumen le Paal ka u kʼaj óoltoʼ» (Mat. 11:27). Jeʼex túun k-ilkoʼ utiaʼal k-kʼaj óoltik k-Taata yaan teʼ kaʼanoʼ, kʼaʼabéet k-tuukul tiʼ le baʼax tu kaʼansaj Cristooʼ. ¿Baʼaxoʼob tu kaʼansaj tu yoʼolal u Taata?

Táanileʼ tu yaʼaleʼ Dios tsʼaamil u kuxtal, le oʼolal tu yaʼalaj: «Teneʼ kuxaʼanen tu yoʼolal» (Juan 6:57). Toʼoneʼ bey xan unaj k-aʼalikoʼ (Sal. 36:9; Hch. 17:28). ¿Baʼaxten tu tsʼáajtoʼon Jéeoba le kuxtaloʼ? Tumen u yaabiltmoʼon. Le oʼolal unaj k-yaabiltik xan.

Le ka tu tsʼáaj u kuxtal u Hijo utiaʼal u salvarkoʼon tiʼ le kʼebanoʼ tu yeʼesaj jach u yaabiltmoʼon. Beyoʼ kex kʼebanoʼoneʼ, jeʼel u páajtal k-bisikba tu yéeteleʼ (Rom. 5:12; 1 Juan 4:9, 10). Tsʼoʼoleʼ tumen k-ojel ku béeykuntik tuláakal baʼax ku yaʼalikeʼ, jach k-ojel yaan u tsʼáaiktoʼon «u nojbeʼen jáalkʼabtajil u paalaloʼob Jajal Dios» (Rom. 8:21).

Uláakʼ bix u yeʼesik u yaabilaj Jéeobaeʼ letiʼe u «beetik u jóokʼol kʼiin tu yóokʼol [tuláakal máak]» sáamsamaloʼ (Mat. 5:45). U jaajileʼ óoliʼ mix máak ku payalchiʼ utiaʼal ka jóokʼok le Kʼiinoʼ. Baʼaleʼ tuláakloʼon jach ku kiʼimaktal k-óol ken k-il u jóokʼol. K-Taata yaan teʼ kaʼanoʼ jach ku tsʼáaik tuláakal baʼax kʼaʼabéettoʼon, letiʼeʼ u yojel baʼaxoʼob kʼaʼabéettoʼon táanil tiʼ k-aʼaliktiʼ. Toʼoneʼ unaj k-tuukul tiʼ le baʼaxoʼob u beetmoʼ bey xan tiʼ bix u kanáantik (Mat. 6:8, 26).

Le Taatatsil jach kanáantkoʼonoʼ

Profeta Isaíaseʼ tu tsʼíibtaj baʼax tu yaʼalaj Dios tiʼ u kaajal úuchjeakil: «Kex ka kʼexpajak tu kúuchil le puʼukoʼob kex xan jenchajak le múuloʼoboʼ, in yaabilaj tiʼ techeʼ maʼ bíin  kʼexpajakiʼ mix bíin pʼáatak x-maʼ biilal in jeetsʼel núuptʼaaniʼ. Bey u yaʼalik Yuumtsil máax chʼaʼik tech óotsilil» (Isa. 54:10). Ichil le payalchiʼ tu beetaj Jesús teʼ tu tsʼook áakʼab táanil tiʼ u kíimsaʼaloʼ tʼaanaj tiʼ le nojoch yaabilaj ku yeʼesik Diosoʼ. Letiʼeʼ tu yaʼalaj: «Letiʼobeʼ yaan u pʼáataloʼob way yóokʼol kaabeʼ. Teneʼ táan in bin utiaʼal in wantal ta wiknal. In kiliʼich Yuum, kanáant[oʼob] yéetel u páajtalil a kʼaabaʼ» (Juan 17:11, 14). Bejlaʼeʼ Jéeobaeʼ ku kanáantik le máaxoʼob meyajtik jeʼex kʼáataʼabik tiʼ tumen Jesusoʼ.

Upʼéel bix u kanáantkoʼon tiʼ u léechoʼob Satanaseʼ letiʼe u tsʼáaiktoʼon le kaʼansaj ku keʼetel yéetel janal ku tsʼaʼabal jach tu yorai tumen «le palitsil chúukpajaʼan u yóol yéetel yaan u naʼat[oʼ]» (Mat. 24:45). Wa k-tséentikba yéetel le janal ku tsʼáaikoʼ jeʼel u páajtal k-búukintik le «u nuʼukulil baʼateʼel ku tsʼáaik[toʼon] Jajal Diosoʼ». Tuukulnakoʼon chéen tiʼ upʼéel tiʼ le nuʼukuloʼob unaj u yantaltoʼonoʼ, le Bibliaoʼ ku yaʼalik: «Le [fejoʼ] bey jeʼel bix jumpʼéel pixibeʼ, utiaʼal ka páatak a tupikeʼex tuláakal u tʼabaʼan juluboʼob Kʼaasilbaʼal» (Efe. 6:11, 16). U jaajileʼ le fejoʼ ku yáantkoʼon utiaʼal maʼ u xuʼulul k-meyajtik Jéeoba, lelaʼ upʼéel bix u kanáantkoʼon.

Ken tuukulnakoʼon tiʼ le baʼaxoʼob tu beetaj Cristo way Luʼumeʼ ku yáantkoʼon k-maas naʼat le yaabilaj ku yeʼesiktoʼon k-Taata yaan teʼ kaʼanoʼ. Teʼ Marcos 10:13 tak 16 k-ilik le baʼax tu yaʼalaj Jesús tiʼ u disipuloʼoboʼ: «Chaʼex u taal le mejen paalaloʼob tin wiknaloʼ». Le ka náatsʼ túun le mejen paalaloʼob tu yiknaloʼ tu méekʼoʼobeʼ ka tu kiʼikiʼtʼantoʼob. ¡Bukaʼaj wal úuchik u kiʼimaktal u yóoloʼobeʼ! Jéeobaeʼ bey xan u yeʼesik jatsʼuts modosoʼ. Letiʼeʼ u kʼáat ka u natsʼuba le máakoʼob tu yiknaloʼ. ¿Bix k-ojéeltik lelaʼ? Tumen Jesuseʼ tu yaʼalaj: «Le máax ku yilken teneʼ ku yilik le Taataoʼ» (Juan 14:9).

Jéeobaeʼ minaʼan u xuul u yeʼesik yaabilaj. Ku tsʼáaik tuláakal baʼaxoʼob kʼaʼabéettoʼon, ku kanáantkoʼon yéetel u kʼáat ka náatsʼkoʼon tu yiknal (Sant. 4:8). ¿Máasaʼ minaʼan uláakʼ taatatsil jeʼex letiʼeʼ?

Uláakʼ utsiloʼob

Wa k-kʼubik k-óol tiʼ Jéeoba bey utúul Taatatsil jach yaan u yaabilajeʼ yaan k-kʼamik yaʼab utsiloʼob (Pro. 3:5, 6). Jesuseʼ yaʼab utsiloʼob tu kʼamaj úuchik u kʼubik u yóol tiʼ Dios yéetel tuláakal u puksiʼikʼal. Le oʼolal tu yaʼalaj tiʼ u disipuloʼob: «Maʼ táan in pʼis óol tin juunal, le Taata máax túuxtenoʼ ku pʼis óol junmúuchʼ tin wéetel» (Juan 8:16). Letiʼeʼ u yojel yaan u yáantaʼal mantatsʼ. Jeʼex tu kʼiinil ka okjaʼanajeʼ tu yuʼubaj u yaʼalaʼaltiʼ tumen u Taata: «Lelaʼ in paal in yaabilaj, tu yoʼolal máax jach kiʼimak in wóol» (Mat. 3:15-17). Yéetel táanil tiʼ u kíimleʼ tu yaʼalaj: «In Yuum, ta kʼab kin kʼubéentik in [kuxtal]» (Luc. 23:46). Tak teʼ súutukoʼob jach talamtakoʼ maʼ tu tuklaj wa maʼ kun áantbiliʼ.

Toʼon xaneʼ bey unaj k-beetkoʼ. Wa tiaʼanoʼon naatsʼ tiʼ Dioseʼ minaʼan baʼax oʼolal k-sajaktal (Sal. 118:6). Atsuko, le máax tiʼ tʼaanajoʼon tu káajbaleʼ, suuk kaʼach u aktáantik chéen tu juunal le talmiloʼoboʼ. Baʼaleʼ tu xokaj le baʼaxoʼob tu beetaj Jesús, maases le bix úuchik u biskuba yéetel Jéeobaoʼ. ¿Baʼax utsil túun tu kʼamaj? Letiʼeʼ ku yaʼalik: «Tin wilaj jatsʼuts u kʼubik u yóol máak tiʼ utúul Taatatsil. Jach kiʼimakchaj in wóol yoʼolal leloʼ. U jaajileʼ minaʼan baʼax oʼolal u jach chiʼichnaktal máak yoʼolal le baʼaxoʼob ku muʼyajtikoʼ».

¿Baʼax uláakʼ utsil ku taasik k-ilik Jéeoba bey k-Taataeʼ? U suukaʼanileʼ le paalaloʼoboʼ ku yaabiltik u taataʼob yéetel ku beetkoʼob baʼax utstutʼaanoʼob. Jesuseʼ jach u yaabiltmaj u Taata yaan teʼ kaʼanoʼ, le oʼolal tu yaʼalaj: «Teneʼ mantatsʼ kin beetik le baʼax utstutʼaanoʼ» (Juan 8:29). Wa k-yaabiltmaj Dioseʼ yaan k-beetik baʼax utstutʼaan yéetel yaan k-kiʼikiʼtʼantik tu táan u maasil máakoʼob, jeʼex tu beetil Jesuseʼ (Mat. 11:25; Juan 5:19).

«Tsʼoʼok in machikech ta kʼab»

Jéeoba, le Taatatsil yaan teʼ kaʼanoʼ ku tsʼáaik áantaj yéetel u kiliʼich muukʼ, jeʼex tu  yaʼalaj Jesuseʼ yaan u yáantkoʼon k-kʼaj óolt u jaajil (Juan 14:15-17; 16:12, 13). Lelaʼ ku yeʼesiktoʼoneʼ yaan u yáantkoʼon k-kʼaj óolt tubeel le Taataoʼ. Tsʼoʼoleʼ yaan u yáantkoʼon k-luʼs t-puksiʼikʼal kaʼansajoʼob maʼ jaajtak ku keʼetloʼob yéetel «nukuch pakʼil najoʼob», beyoʼ yaan u yantaltoʼon «u tuukul Cristo, utiaʼal [k-uʼuyik] u tʼaan» (2 Cor. 10:4, 5). Bey túunoʼ unaj k-kʼáatik u kiliʼich muukʼ Dios utiaʼal ka u yáantoʼon, tumen jeʼex tu yaʼalil Jesuseʼ «[k-]Taataʼex yaan teʼ kaʼanoʼ bíin u tsʼáa le kiliʼich [muukʼ] tiʼ le máaxoʼob kʼáatik tiʼeʼ» (Luc. 11:13). Tsʼoʼoleʼ unaj k-kʼáatik u yáantaj u kiliʼich muukʼ utiaʼal k-maas bisikba tu yéetel.

Le mejen paalaloʼoboʼ ku pʼáatal maʼ saajkoʼob yéetel ku yuʼubikoʼob kanáantaʼanoʼob ken maʼachak u kʼaboʼob tumen u taataʼob. Wa k-ilik Jéeoba bey k-Taataeʼ, yaan k-kʼubik k-óol tiʼ le baʼax ku yaʼalikaʼ: «Teen Yuumtsil a [Dioseʼ], tsʼoʼok in machikech ta kʼab; teneʼ tin waʼalaj tiʼ tech: Maʼ a sajaktal, teen áantikech» (Isa. 41:13). Jeʼex túun k-ilkoʼ yantoʼon u jatsʼuts páajtalil k-xíimbal yéetel Dios wa k-beetik baʼax ku yaʼalik mantatsʼ (Miq. 6:8). Wa maʼ u xuʼul k-beetik baʼax utstutʼaaneʼ yaan u yaabiltkoʼon, yaan u kiʼimaktal k-óol yéetel yaan k-uʼuyikba kanáantaʼanoʼon tumen Jéeoba, k-Taata yaan teʼ kaʼanoʼ.

[Tsolajiloʼob]