«Le derecho yaan tiʼ le paalal utiaʼal u kʼaj óoltikoʼob Diosoʼ»

LELAʼ bey tu kʼaabaʼtaj upʼéel asamblea beetaʼab tumen le Academia Sueca de Derechos del Niño. Lelaʼ beetaʼab tu kʼiinil 9 tiʼ diciembre tiʼ 2008, teʼeloʼ tu muchʼuba u nuuktakiloʼob u Iglesiai Suecia yéetel uláakʼ religionoʼob tiʼ le cristiandadoʼ, tiʼ le islamoʼ bey xan tiʼ le movimiento humanistaoʼ.

Utúul u nojchil le iglesiaoʼ tu yaʼalaj: «Minaʼan tʼaanoʼob utiaʼal u yaʼalaʼal bukaʼaj u kʼaʼabéetil u yáantaʼal le paalaloʼob u naʼatoʼob le baʼaxoʼob ku yaʼalik le Biblia utiaʼal u kʼaj óoltikoʼob Diosoʼ». ¿Bix u yáantik le mejen paalal le tsikbaliloʼob yaan teʼ Bibliaoʼ?

Letiʼeʼ ku yaʼalik: «Le baʼaxoʼob ku tsikbaltik le Bibliaoʼ ku yáantaj utiaʼal u beetaʼal u tuukul le mejen paalaloʼoboʼ». Letiʼeʼ ku yaʼalikeʼ «u tsikbalil Adán yéetel Eva, Caín yéetel Abel, David yéetel Goliat, u tsikbalil Jesús tu paalil, Zaqueo, utúul máax ku cobrar impuestoʼob kaʼachi, u kettʼaanil le hijotsil ku kaʼa suut tu yotochoʼ yéetel u kettʼaanil le utsul samaritanooʼ» ku kaʼansiktiʼob «maʼ maʼalob u traicionartik máak uláakʼiʼ, ku kankoʼob perdonar, maʼ u pʼektikoʼob mix máak, maʼ u beetkoʼob baʼaloʼob kʼaastak, ka u yeʼesoʼob yaabilaj yéetel ka u bisubaʼob tubeel yéetel u maasil». Tsʼoʼoleʼ tu yaʼalaj: «Le Bibliaoʼ ku yeʼesik bix jeʼel u tsʼáaikoʼob ichil u kuxtaloʼob sáamsamal le baʼax ku kankoʼoboʼ».

Jeʼex túun k-ilkoʼ, jach maʼalob ka xokaʼak le Bibliaoʼ. Baʼaleʼ ¿jeʼel wa u páajtal u naʼatik le paalaloʼob chéen tu juunaloʼob le baʼax ku xokikoʼoboʼ?

Le Bibliaoʼ ku yaʼalikeʼ tak le nukuch máakoʼoboʼ kʼaʼabéet u yáantaʼaloʼob utiaʼal ka u naʼatoʼob le baʼax ku xokikoʼoboʼ. Jeʼex le etíope tu kʼamaj áantaj utiaʼal u naʼatik le baʼax ku xokikoʼ. Le Bibliaoʼ ku yaʼalikeʼ letiʼeʼ táan kaʼach u xokik u profecíai Isaías, baʼaleʼ maʼ tu naʼatik le baʼax ku yaʼalikoʼ, le oʼolal jach maʼalob úuchik u yilik le áantaj tsʼaʼabtiʼ tumen disipulo Felipeoʼ (Hch. 8:26-40). Bejlaʼa xaneʼ bey u yúuchloʼ. U jaajileʼ tuláakal máak unaj u yáantaʼal u naʼat le baʼax ku yaʼalik le Bibliaoʼ, baʼaleʼ maases le mejen paalaloʼoboʼ.

Le Bibliaoʼ ku yaʼalik: «Maʼ naʼatileʼ u tsʼeʼetsʼek tuukul táankelemil» (Pro. 22:15). Le oʼolal kʼaʼabéet u yáantaʼal le mejen paalaloʼob u kʼaj óoltoʼob Dios yéetel ka u beetoʼob baʼax maʼaloboʼ. ¿Máaxoʼob túun unaj u tsʼáaiktiʼob le áantajaʼ? U taataʼob, utiaʼal lelaʼ jeʼel u páajtal u meyajtiʼob le baʼax ku kaʼansik le Bibliaoʼ bey xan le baʼax ku kaʼansaʼal teʼ múuchʼuliloʼ. U jaajileʼ le mejen paalaloʼoboʼ yaan u derechoi tiʼob u kaʼansaʼaloʼob u kʼaj óoltoʼob Dios. Desde tu chichniloʼobeʼ unaj u yáantaʼaloʼob yéetel le Biblia u kʼaj óoltoʼob Diosoʼ. Beyoʼ ken nojochchajkoʼobeʼ yaan «u kanikoʼob pʼis óolal tumen tsʼoʼok u suuktaltiʼob u chʼaʼanuʼuktikoʼob baʼax le utsoʼ bey xan baʼax le kʼaasoʼ» (Heb. 5:14).