«Le kiliʼich muukʼ yéetel le atantsiloʼ ku yaʼalikoʼob: Koʼoten»
«Le kiliʼich muukʼ yéetel le atantsiloʼ ku yaʼalikoʼob: Koʼoten»
«Le kiliʼich muukʼ yéetel le atantsiloʼ ku yaʼalikoʼob: Koʼoten. [...] Le máax ukʼajeʼ yéetel u kʼáateʼ, taalak ka u yukʼ x-maʼ boʼolileʼ u jaʼil le kuxtaloʼ.» (APO. 22:17)
1, 2. ¿Baʼax unaj k-tsʼáaik táanil ichil k-kuxtal?
¿BAʼAX unaj k-tsʼáaik táanil ichil k-kuxtal? Jesuseʼ tu yaʼalaj tiʼ u disipuloʼob: «Kaxteʼex táanil u [reino] Jajal Dios [...], tuláakal túun le baʼaloʼobaʼ bíin tsʼaʼabakteʼex» (Mat. 6:33). Tsʼoʼoleʼ tu ketaj le Reino yéetel upʼéel perla jach koʼoj u tojloʼ, letiʼeʼ tu yaʼaleʼ utúul j-koonoleʼ «ku konik tuláakal baʼal yantiʼeʼ, ku tsʼoʼokoleʼ ku manik le perlaoʼ» (Mat. 13:45, 46). Toʼoneʼ unaj k-ilik jach nojoch baʼal k-táakpajal xan teʼ kʼaʼaytaj yéetel k-kaʼansik uláakʼ máakoʼoboʼ.
2 Teʼ kaʼapʼéel xook tsʼoʼok k-ilkoʼ, t-kaneʼ le kiliʼich muukʼoʼ ku yáantkoʼon utiaʼal maʼ k-chʼaʼik saajkil kʼaʼaytaj yéetel ku yáantkoʼon utiaʼal ka meyajnaktoʼon tubeel le Bibliaoʼ. Teʼ xookaʼ yaan k-ilik bix u yáantkoʼon utiaʼal maʼ u xuʼulul k-táakpajal teʼ kʼaʼaytajoʼ. Koʼoneʼex ilik bixi.
Tuláakal máak ku invitartaʼal
3. ¿Baʼax jaʼi ku invitartaʼal tuláakal máak u yukʼe?
3 Yéetel u yáantaj le kiliʼich muukʼoʼ ku tsʼaʼabal upʼéel invitación tiʼ tuláakal máak (xokaʼak Apocalipsis 22:17). Tiʼ tuláakal ku yaʼalaʼal: «Koʼoten» a wukʼ upʼéel jaʼ jach maʼalob. Baʼaleʼ lelaʼ maʼ letiʼe jaʼ suukaʼan k-ukʼikoʼ. Baʼaxeʼ táan u tʼaan láayliʼ tiʼ le baʼax tu yaʼalaj Jesús tiʼ le samaritana tu jáal upʼéel chʼeʼenoʼ: «Le máax ku yukʼik le jaʼ kin tsʼáaiktiʼoʼ, mix bikʼin ku kaʼa suut yuʼub ukʼaj; tumen le jaʼ kin tsʼáaiktiʼoʼ yaan u tuul bey jumpʼéel sayab ichil letiʼeʼ, utiaʼal u tsʼáaik kuxtal minaʼan u xuul tiʼ» (Juan 4:14). Jeʼex túun k-ilkoʼ, táan k-invitartaʼal utiaʼal ka k-ukʼ le jaʼ ku tsʼáaik kuxtal minaʼan u xuuloʼ.
4. ¿Baʼax le u jaʼi le kuxtaloʼ, yéetel baʼaxten kʼaʼabéetchaji?
4 ¿Baʼaxten kʼaʼabéet u yukʼik máak u jaʼi le kuxtaloʼ? Ken k-xok le Bibliaoʼ k-ilkeʼ Adán yéetel Evaeʼ tu tsʼáajubaʼob tu contra Jéeoba (Gén. 2:16, 17; 3:1-6). Le oʼolal jóoʼsaʼaboʼob teʼ jardín tuʼux kajaʼanoʼob kaʼachoʼ. ¿Baʼaxten? Le Bibliaoʼ ku yaʼalik: «Bik xiʼik [Adán] u chʼaʼa xan u yich u cheʼil kuxtal, ka u jaanteʼ, ka kuxlak utiaʼal jaʼaboʼob minaʼan u xuul» (Gén. 3:22). Yoʼolal le baʼax tu beetaj le yáax máakoʼoboʼ, tuláakal máak ku kíimil (Rom. 5:12). Baʼaleʼ Dioseʼ yaan baʼax tsʼoʼok u beetik utiaʼal u jáalkʼabtik tiʼ le kʼeban yéetel tiʼ le kíimil le máaxoʼob beetik baʼax ku yaʼalikoʼ yéetel utiaʼal ka yanak kuxtal minaʼan u xuul tiʼob way Luʼumeʼ. Tuláakal lelaʼ yaan u béeytal yoʼolal u kuxtal Jesús tu kʼuboʼ, lelaʼ letiʼe ku keʼetel yéetel le jaʼ ku tsʼáaik kuxtaloʼ (Mat. 20:28; Juan 3:16; 1 Juan 4:9, 10).
5. ¿Máax aʼalik «koʼoten» tiʼ tuláakal máak yéetel «ukʼ x-maʼ boʼolileʼ u jaʼil le kuxtaloʼ»? Tsol baʼaxten bey a núukikoʼ.
5 ¿Máax aʼalik tiʼ le máakoʼob «koʼoten» yéetel «ukʼ x-maʼ boʼolileʼ u jaʼil le kuxtaloʼ»? Le baʼaxoʼob ku yaʼalik u káajbal yéetel u tsʼoʼokbal le capítulo 22 tiʼ Apocalipsisoʼ ku yeʼesik táan u tʼaan tiʼ le Mil jaʼaboʼob kun reinar Cristooʼ, teʼ kʼiinoʼob jeʼeloʼ u kajnáaliloʼob le Luʼumaʼ yaan u kʼamikoʼob u yutsil le baʼaxoʼob tu beetaj Jéeoba le úuchik u kʼubik u kuxtal u Hijo tu yoʼolaloʼoboʼ. Le utsiloʼobaʼ ku chíikbesaʼaloʼob yéetel «jumpʼéel áalkab jaʼ sak u jaʼil, lelaʼ u jaʼil kuxtal. Sáaskʼaleʼen bey cristaleʼ». Le tekstooʼ ku yaʼalikeʼ le jaʼoʼ ku jóokʼol «tu jalaʼach kʼáancheʼ Jajal Dios yéetel tu jalaʼach kʼáancheʼ le j-Tamanoʼ» (Apo. 22:1). ¿Baʼax ku yeʼesik lelaʼ? Ku yeʼesikeʼ tiʼ Jéeoba Dios u taal u jaʼi le kuxtaloʼ (Sal. 36:9). Yéetel ku tsʼáaiktoʼon yoʼolal Jesucristo, le «j-Tamanoʼ» (Juan 1:29). Le «áalkab jaʼ» ku taal tiʼ Jéeobaoʼ yaan u meyaj utiaʼal u yutskíintik tuláakal le baʼaxoʼob kʼaschaj le ka kʼebanchaj Adanoʼ. Jeʼex túun k-ilkoʼ Jéeoba aʼaliktoʼon «Koʼoten».
6. ¿Baʼax kʼiin ka káaj u yantal le «áalkab jaʼ» ku tsʼáaik kuxtaloʼ?
6 Kex le utsiloʼob ku tsʼáaik le «áalkab jaʼ» yaan u maas ilaʼaloʼob teʼ Mil jaʼaboʼob kun reinar Jesusoʼ, yaan tiʼ le utsiloʼob káaj u yilaʼaloʼob tu jaʼabil 1914, le jaʼab ka káaj «u kʼiinil Yuumtsil[oʼ]» bey xan le ka beetaʼab Reyil le «j-Taman» teʼ kaʼanoʼ (Apo. 1:10). Desde teʼ kʼiinoʼob jeʼeloʼ jejeláas baʼax tsʼoʼok u beetaʼal utiaʼal ka yanak kuxtal minaʼan u xuul tiʼ tuláakal wíinik. Ichil le baʼaloʼobaʼ táakaʼan le baʼaxoʼob ku kaʼansik le Biblia ku keʼeteloʼob yéetel jaʼoʼ (Efe. 5:26). Teʼ tu kʼiiniloʼob Yuumtsilaʼ táan u kʼaʼaytaʼal le maʼalob péektsiloʼ, le máaxoʼob kʼamikoʼ ku natsʼkubaʼob u yukʼoʼob u jaʼi le kuxtaloʼ. Baʼaleʼ ¿máaxoʼob bisik le invitacionaʼ?
Le «atantsiloʼ» ku yaʼalik: «Koʼoten»
7. ¿Máaxoʼob yáax bis le invitación tu noj «kʼiinil Yuumtsil[oʼ]» yéetel máaxoʼob tu invitartoʼob?
7 Le «atantsil» wa le sukuʼunoʼob yéeyaʼanoʼob utiaʼal u binoʼob kaʼanoʼ, letiʼob yáax aʼalik «Koʼoten». Baʼaleʼ ¿tiʼ máaxoʼob ku yaʼalik? Le invitacionaʼ ku yaʼalikoʼob tiʼ le máaxoʼob kun antaltiʼob kuxtal minaʼan u xuul way Luʼum ken tsʼoʼokok u baʼateʼel «le máax yaan tuláakal páajtalil[tiʼoʼ]» (xokaʼak Apocalipsis 16:14, 16).
8. ¿Baʼaxoʼob eʼesik le máaxoʼob yéeyaʼanoʼoboʼ káaj u biskoʼob le invitación ku tsʼáaik Jéeoba desde tu jaʼabil 1918?
8 Le sukuʼunoʼob yéeyaʼanoʼob utiaʼal u binoʼob kaʼanoʼ joʼopʼ u biskoʼob le invitación tu jaʼabil 1918. Teʼ jaʼab jeʼeloʼ tu máansoʼob upʼéel tsoltʼaan tu kʼaabaʼtaj: «U millonesi máakoʼob kuxaʼanoʼob bejlaʼeʼ maʼ xaaneʼ maʼ kun kíimloʼob», lelaʼ tu yeʼesaj yaʼabach máakoʼob kun pʼáatloʼob kuxtal teʼ Luʼum kun sutbil Paraísoi ken tsʼoʼokok le Armagedonoʼ. Yéetel tu jaʼabil 1922, le Máaxoʼob Xokik le Bibliaoʼ tu beetoʼob upʼéel asamblea tu luʼumil Estados Unidos (tu noj kaajil Cedar Point, Ohio), teʼ asambleaoʼ líiʼsaʼab u yóol tuláakal utiaʼal ka u kʼaʼaytoʼob le Rey yéetel u Reinooʼ. Lelaʼ tu péeksaj u maasil le sukuʼunoʼob yéeyaʼanoʼob utiaʼal ka u yil u invitarkoʼob u maasil máakoʼoboʼ. Ka máan wa jaypʼéel jaʼaboʼobeʼ, jóoʼsaʼab ich inglés le xook ku kʼaabaʼtik «Upʼéel jatsʼuts invitación», lelaʼ ku tʼaan tiʼ le baʼax ku yaʼalik Apocalipsis 22:17, yéetel tu yaʼalaj: «Le u yaalab le máaxoʼob yéeyaʼanoʼoboʼ táan u tsʼáaikoʼob le jatsʼuts invitación [ku taal tiʼ Jéeobaoʼ] yéetel ku yaʼalikoʼob: “Koʼoten”. Le maʼalob péektsilaʼ unaj u kʼaʼaytaʼal tiʼ le máaxoʼob u kʼáat u beetoʼob baʼax maʼalob yéetel u kʼáat u kʼaj óoltoʼob u jaajiloʼ. Lelaʼ unaj u beetaʼal bejlaʼeʼ» (The Watchtower 15 tiʼ marzo tiʼ 1929). Tak bejlaʼeʼ le atantsiloʼ láayliʼ táan u tsʼáaik le invitacionaʼ.
«Le máax ku yuʼubajeʼ u yaʼal: Koʼoten»
9, 10. ¿Bix líiʼsaʼabik u yóol le «yaʼabach máakoʼob» u bisoʼob xan le invitacionoʼ?
9 Baʼaleʼ ¿baʼax unaj u beetik le máaxoʼob kʼamik le invitación ku bisaʼal tumen le sukuʼunoʼob yéeyaʼanoʼoboʼ? Unaj xan u biskoʼob le invitacionoʼ. Le revista La Torre del Vigía tiʼ noviembre tiʼ 1932 (táan juʼun 174) tu yaʼalaj: «Le sukuʼunoʼob yéeyaʼanoʼoboʼ unaj u líiʼskoʼob u yóol le máaxoʼob u kʼáatoʼob táakpajal u kʼaʼaytoʼob u maʼalob péektsilil le reinooʼ. Utiaʼal u beetkoʼob le meyajaʼ maʼ pʼis wa yéeyaʼanoʼob tumen Yuumtsil utiaʼal u binoʼob kaʼaniʼ. Jach kiʼimakchaj u yóol u j-jaajkunajoʼob Jéeoba úuchik u tsʼaʼabaltiʼob u páajtalil u biskoʼob u jaʼi le kuxtal tiʼ le máaxoʼob kun yantaltiʼob le kuxtal minaʼan u xuul way luʼum ken tsʼoʼokok le Armagedonoʼ».
10 Tu jaʼabil 1934, le revista U Pʼíich Tulumil Kanan ich inglesoʼ tu tsoleʼ le sukuʼunoʼob bisik xan le invitación ku kʼaʼaytaʼal tumen le atantsiloʼ ku chíikbesikoʼob Jonadab [wa Jehonadab], yéetel letiʼobeʼ «unaj u binoʼob tu paach Jehú, wa le sukuʼunoʼob yéeyaʼanoʼob utiaʼal u binoʼob kaʼanoʼ, yéetel unaj u kʼaʼaytikoʼob u reino Jéeoba kex maʼ [...] yéeyaʼanoʼob utiaʼal u binoʼob kaʼaniʼ». (Le xookaʼ jóoʼsaʼab ich kastlan teʼ revista La Torre del Vigía tiʼ enero tiʼ 1935, táan juʼun 12.) Yéetel tu jaʼabil 1935 naʼataʼab xaneʼ letiʼob le «yaʼabkach máakoʼob» ku yaʼalik Apocalipsis 7:9-17. Lelaʼ áantajnaj utiaʼal ka maas bisaʼak le invitación ku taal tiʼ Diosoʼ. Desde teʼ kʼiinoʼob jeʼeloʼ, tsʼoʼok u maas yaʼabtal máak okol ichil le «yaʼabkach máakoʼob[oʼ]»; bejlaʼeʼ tsʼoʼok u chukik maas tiʼ siete millones utúulaloʼob. Bey túunoʼ, le máaxoʼob kʼamik le maʼalob péektsiloʼ, tsʼoʼok u kʼubik u kuxtaloʼob tiʼ Dios yéetel tsʼoʼok u yokjaʼob, tsʼoʼoleʼ u múuchʼ yéetel le atantsiloʼ táan u yaʼalikoʼob tiʼ tuláakal máak ka taalak «u yukʼ x-maʼ boʼolileʼ u jaʼil le kuxtaloʼ».
«Le kiliʼich muukʼoʼ ku yaʼalik: «Koʼoten»
11. ¿Bix úuchik u yáantaj le kiliʼich muukʼ teʼ yáax siglooʼ?
11 Teʼ yáax siglooʼ le kiliʼich muukʼoʼ jach áantajnaj utiaʼal u kʼaʼaytaʼal le maʼalob péektsiloʼ. Utéenjeakileʼ Jesuseʼ kʼaʼaytajnaj tu sinagogai Nazaret. Teʼeloʼ tu chʼaʼaj u rolloi u tsʼíib profeta Isaíaseʼ ka tu xokaj: «U [kiliʼich muukʼ] Yuumtsileʼ tiʼ yaan tin wóokʼoleʼ, tumen u jumpáaykunsmajen utiaʼal in tsʼáa maʼalob péektsil tiʼ le óotsiloʼoboʼ, u túuxtmajen in tsʼáa toj óolal tiʼ le ku mukʼyaj u puksiʼikʼaloʼoboʼ, utiaʼal in kʼaʼayt jáalkʼabil tiʼ le kʼalaʼanoʼoboʼ, utiaʼal in tsʼáa u sáasil le chʼóopoʼoboʼ, utiaʼal in jáalkʼabt le loobiltaʼanoʼoboʼ, yéetel utiaʼal in [kʼaʼayt] u maʼalob kʼiinil Yuumtsil». Ka tsʼoʼokeʼ tu yaʼalaj: «Bejlaʼeʼ tsʼoʼokpajaʼan ta táaneʼex le tsʼíiboʼobaʼ» (Luc. 4:17-21). Yéetel le jach taʼaytak u suut kaʼanoʼ tu yaʼalaj tiʼ u disipuloʼob: «Le ken taalak le kiliʼich [muukʼ] ta wóokʼoleʼexeʼ, yaan a kʼamikeʼex páajtalil utiaʼal ka jóokʼokeʼex a [kʼaʼayteʼex] in kʼaabaʼ tak [teʼ] kúuchiloʼob yaan tu xuul yóokʼol kaaboʼ» (Hch. 1:8).
12. ¿Bix u yáantkoʼon le kiliʼich muukʼ utiaʼal k-invitartik le máakoʼob bejlaʼoʼ?
12 ¿Bix u yáantkoʼon le kiliʼich muukʼ utiaʼal k-invitartik le máakoʼob bejlaʼoʼ? Jeʼex tsʼoʼok k-ilkoʼ, tiʼ Jéeoba u taal le kiliʼich muukʼoʼ yéetel ku meyajtiʼ utiaʼal u yáantik le sukuʼunoʼob yéeyaʼanoʼob utiaʼal ka u naʼatoʼob le baʼax ku kaʼansik le Bibliaoʼ. Tsʼoʼoleʼ ku meyajtiʼ utiaʼal u líiʼsik u yóoloʼob utiaʼal u biskoʼob le invitacionoʼ yéetel utiaʼal ka u kaʼansoʼob u jaajil tiʼ le máaxoʼob u kʼáatoʼob kuxtal teʼ Paraísooʼ. Ken kʼaʼamak tumen le máakoʼob le maʼalob péektsiloʼ, ku péeksaʼaloʼob xan tumen u kiliʼich muukʼ Dios utiaʼal ka u bisoʼob le invitacionoʼ. Yéetel ken okjaʼanakoʼob «tu kʼaabaʼ [...] le kiliʼich [muukʼoʼ]» ku yeʼeskoʼob táan u chaʼik u nuʼuktaʼaloʼob tumen le kiliʼich muukʼoʼ (Mat. 28:19). Tsʼoʼoleʼ le maʼalob péektsil ku kʼaʼaytkoʼob yéetel le sukuʼunoʼob yéeyaʼanoʼoboʼ teʼ Biblia u taaloʼ. Tuláakal lelaʼ ku yeʼeskeʼ le invitacionoʼ ku beetaʼal yáanal u nuʼuktaj le kiliʼich muukʼoʼ. K-ojéeltik lelaʼ, ¿bix unaj u yáantkoʼon teʼ kʼaʼaytajoʼ?
«Ku yaʼalikoʼob: Koʼoten»
13. ¿Baʼax u kʼáat u yaʼal le Biblia ken u yaʼal «le kiliʼich [muukʼ] yéetel le atantsiloʼ ku yaʼalikoʼob: Koʼoten»?
13 «Le kiliʼich [muukʼ] yéetel le atantsiloʼ» maʼ chéen wa baʼax kʼiin ku tsʼáaikoʼob le invitacionoʼ. Le tʼaan griego ku suʼutul «ku yaʼalikoʼob», ku yeʼeskeʼ táan u beetkoʼob mantatsʼ. Le oʼolal le Biblia ich mayaoʼ ku yaʼalik: «Le kiliʼich [muukʼ] yéetel le atantsiloʼ ku yaʼalikoʼob: Koʼoten». Lelaʼ ku yeʼeskeʼ maʼatech u xuʼulul u biskoʼob le invitacionoʼ. Yéetel jeʼex tsʼoʼok k-ilkoʼ, le máaxoʼob kʼamikoʼ maʼatech xan u xuʼulul u yaʼalikoʼob: «Koʼoten». Le Bibliaoʼ ku yaʼalikeʼ le yaʼabach máakoʼoboʼ «táan u meyajtikoʼob bul kʼiin yéetel bul áakʼab» (Apo. 7:9, 15). ¿Baʼax u kʼáat u yaʼal u meyajtikoʼob Dios «bul kʼiin yéetel bul áakʼab»? U kʼáat u yaʼaleʼ táan u beetkoʼob mantatsʼ, jeʼex beetaʼabik tumen profetisa Ana yéetel tumen apóstol Pabloeʼ (xokaʼak Lucas 2:36, 37, Beetaʼanoʼob 20:31 yéetel 2 Tesalonicailoʼob 3:8).
14, 15. ¿Bix tu yeʼesil Daniel jach kʼaʼanan u yilik u meyajtik Dios mantatsʼ?
14 Uláakʼ máak tu meyajtaj Dios mantatsʼeʼ profeta Daniel (xokaʼak Daniel 6:4-10, 16). Letiʼeʼ mix baʼal beet u kʼexik bix u adorartik Dios, baʼaxeʼ «jeʼel bix suuk u beetikeʼ, óoxtéen tiʼ jumpʼéel kʼiin» ku payalchiʼ. Maʼ tu yóotaj u pʼat kex chéen ichil upʼéel mesiʼ, kex ka yanchajak u puʼulul ichil u sajkab le leonoʼoboʼ. Beyoʼ tu yeʼeseʼ, utiaʼal letiʼeʼ maas kʼaʼanan u adorartik Dios mantatsʼ (Mat. 5:16).
15 Ka tsʼoʼok u máansik upʼéel áakʼab ichil u sajkab le leonoʼoboʼ, le reyoʼ bin u yileʼ ka tu yaʼalajtiʼ: «Daniel u palitsil kuxaʼan [Dios], ¿páatchaj wa u tokikech tiʼ le leonoʼob a [Dios] máax ka meyajtik yéetel sen chukaʼan óolaloʼ?». Letiʼeʼ tu núukajtiʼ: «¡Kuxlak mantatsʼ a tsikbeʼenil! In [Dioseʼ] tu túuxtaj u ángel, letiʼeʼ tu nupʼaj u chiʼ le leonoʼob utiaʼal maʼ u beetikoʼob tiʼ ten mix jumpʼéel loob, tumen [Dioseʼ] u yojel minaʼan in siʼipil, mix xan in beetmaj mix baʼal kʼaas tiʼ a tsikbeʼeniliʼ». Jéeobaeʼ tu kanáantaj Daniel, tumen letiʼeʼ tu meyajtaj yéetel «chukaʼan óolal» (Dan. 6:19-22).
16. Ken tuukulnakoʼon tiʼ le baʼax tu beetaj Danieloʼ, ¿baʼax kʼáatchiʼi maʼalob ka beete?
16 Danieleʼ kex u yojel jeʼel tak u kíimsaʼaleʼ, maʼ tu xulaj u adorartik Dios jeʼex suukaʼanil u beetkeʼ. ¿Kux túun toʼon? ¿Baʼaxoʼob k-beetik, wa jeʼel k-beetik utiaʼal u chúukpajal k-óol k-kʼaʼayt le maʼalob péektsiloʼ? Jeʼel baʼaxak ka úuchkeʼ, maʼ unaj u máan upʼéel mes maʼ k-tsikbaltik tiʼ wa máax baʼax ku yaʼalik Jéeobaiʼ. Baʼaxeʼ wa ku páajtaleʼ unaj k-táakpajal teʼ kʼaʼaytaj cada semanaoʼ. Tsʼoʼoleʼ wa kʼojaʼanoʼon bey xan wa táan k-muʼyajtik uláakʼ wa baʼaxeʼ, jeʼel u páajtal k-kʼaʼaytaj kex chéen quince minutoseʼ, tsʼoʼoleʼ unaj k-kʼubik. ¿Baʼaxten? Tumen maʼ k-kʼáat ka xuʼuluk k-múul meyaj yéetel le kiliʼich muukʼ bey xan yéetel le atantsil utiaʼal k-bisik le invitacionoʼ. Jeʼex túun k-ilkoʼ, kʼaʼabéet k-beetik tuláakal le ku páajtal utiaʼal maʼ u máan mix upʼéel mes maʼ k-kʼaʼaytik u maʼalob péektsilil le Reinooʼ.
17. ¿Tiʼ baʼax súutukiloʼob jeʼel u páajtal k-kʼaʼaytajeʼ?
17 ¿Máasaʼ jach nojoch baʼal k-ilik k-aʼalik tiʼ uláakʼ máakoʼob «koʼoten» yéetel «ukʼ x-maʼ boʼolileʼ u jaʼil le kuxtaloʼ»? Le oʼolal maʼ chéen ken jóoʼkoʼon joonaj joonai unaj kʼaʼaytikiʼ. Baʼaxeʼ unaj kʼaʼaytik ken k-il jeʼel u páajtaleʼ, jeʼex ken xiʼikoʼon maan, xíimbal, teʼ tuʼux k-meyajoʼ wa teʼ escuelaoʼ. Tak wa ka aʼalaʼak tumen le gobiernoʼob ka xuʼuluk k-kʼaʼaytajoʼ unaj k-ilik bix jeʼel u páajtal k-beetkeʼ, maʼ xaaneʼ jeʼel u páajtal k-tʼaan tiʼ upʼéel najeʼ tsʼoʼoleʼ k-bin tʼaan tiʼ uláakʼ naj chan náach yanik tiʼ yéetel jeʼel u páajtal k-kʼaʼaytaj kex maʼ le jokʼaʼanoʼon k-beetiʼ.
Maʼ u xuʼul k-aʼalik: «Koʼoten»
18, 19. ¿Bix jeʼel k-eʼesik jach nojoch baʼal k-ilik k-múul meyaj yéetel Dioseʼ?
18 Ich maas tiʼ noventa jaʼaboʼobeʼ, le kiliʼich muukʼ yéetel le atantsiloʼ táan u yaʼalikoʼob tiʼ le máaxoʼob taak u kʼaj óoltikoʼob Diosoʼ: «Koʼoten». ¿Kux túun teech? ¿Tsʼoʼok wa a kʼamik le invitacionaʼ? Wa tsʼoʼokeʼ ilawil a bisik xan tiʼ uláakʼ máakoʼob.
19 Maʼ k-ojel bukaʼaj tiempo pʼaatal utiaʼal u bisaʼal le invitacionaʼ. Baʼax k-ojeleʼ, wa k-bisik le invitacionoʼ táan k-múul meyaj yéetel Dios (1 Cor. 3:6, 9). ¿Máasaʼ k-kʼáat eʼes jach nojoch baʼal k-ilik k-beetik le meyajaʼ? Le oʼolaleʼ «unaj k-kiʼikiʼtʼantik mantatsʼ Jajal Dios» teʼ kʼaʼaytajoʼ (Heb. 13:15). Wa tiʼ yanoʼon ichil le sukuʼunoʼob yéeyaʼanoʼob utiaʼal u binoʼob kaʼan bey xan wa tiʼ yanoʼon ichil le yaʼabkach máakoʼob kun pʼáatloʼob kuxtal way Luʼumaʼ, maʼ unaj u xuʼulul k-aʼalik «Koʼoten», beyoʼ yaʼab uláakʼ máakoʼob jeʼel u taal u yukʼoʼob x-maʼ boʼolil u jaʼi le kuxtaloʼ.
¿Baʼaxoʼob tsʼoʼok k-kanik?
• ¿Tiʼ máaxoʼob ku yaʼalaʼal: «Koʼoten»?
• ¿Baʼaxten k-aʼalik le invitacionaʼ tiʼ Jéeoba u taal?
• ¿Bix u yáantaj le kiliʼich muukʼ utiaʼal u bisaʼal le invitación tiʼ le máakoʼoboʼ?
• ¿Baʼaxten unaj k-ilik k-táakpajal mantatsʼ teʼ kʼaʼaytajoʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 16]
«Ku yaʼalikoʼob: Koʼoten»
1914
5,100 kʼaʼaytajoʼob
1918
Yaʼab máak kun pʼáatal kuxtal mantatsʼ teʼ Paraísooʼ
1922
«Kʼaʼayteʼex, kʼaʼayteʼex, kʼaʼayteʼex le Rey yéetel u reinooʼ»
1929
U yaalab le sukuʼunoʼob yéeyaʼanoʼoboʼ ku yaʼalikoʼob: «Koʼoten»
1932
Maʼ chéen le sukuʼunoʼob yéeyaʼanoʼob ku invitartaʼaloʼoboʼ
1934
Le sukuʼunoʼob chíikbes Jonadaboʼ aʼalaʼabtiʼob ka kʼaʼaytajnakoʼob
1935
Naʼataʼab máaxoʼob yanoʼob ichil le «yaʼabkach máakoʼob[oʼ]»
2009
7,313,173 j-kʼaʼaytajoʼob