Maʼ unaj k-chʼaʼik saajkil tʼaan tu kʼaabaʼ Diosiʼ

«Chuʼupoʼob yéetel kiliʼich muukʼeʼ ka joʼopʼ u kaʼanskoʼob x-maʼ saajkilil le baʼax ku yaʼalik Diosoʼ.» (HCH. 4:31, NM)

1, 2. ¿Baʼaxten unaj k-ilik k-kʼaʼaytaj tubeel?

ÓOXPʼÉEL kʼiin táanil tiʼ u kíimil Jesuseʼ, tu yaʼalaj tiʼ u disipuloʼob: «U maʼalob péektsil le [reinooʼ] bíin [kʼaʼaytaʼak] tiʼ tuláakal yóokʼol kaab, utiaʼal ka kʼaj óoltaʼak tumen tuláakal kaajoʼob; letiʼ túun ken taalak u xuul». Ka tsʼoʼok u kaʼa kuxtal, le jach taʼaytak u suut teʼ kaʼanoʼ, tu yaʼalajtiʼob: «[Beeteʼex] j-kaambaloʼob [...], yéetel kaʼanseʼexoʼob u tsʼoʼokbesoʼob tuláakal baʼax in waʼalmaj tiʼ teʼex». Ka tsʼoʼokeʼ tu yaʼalaj xan tiʼob: «Teneʼ tiʼ yanen ta wéeteleʼex tuláakal kʼiinoʼob tak tu xuul yóokʼol kaab[eʼ]» (Mat. 24:14; 26:1, 2; 28:19, 20).

² Teʼ kʼiinoʼobaʼ, toʼoneʼ k-kʼaʼaytik u maʼalob péektsilil le Reinooʼ yéetel k-kaʼansik uláakʼ máakoʼob, jeʼex beetaʼabik teʼ yáax siglooʼ. Minaʼan uláakʼ meyaj maas jeʼel u yáantik le máakoʼob utiaʼal ka u salvartubaʼoboʼ. Le oʼolal unaj k-tsʼáaik k-óol k-beet tubeel. Teʼ xookaʼ yaan k-ilik bix u yáantkoʼon le kiliʼich muukʼ utiaʼal k-kʼaʼaytaj yéetel x-maʼ saajkil, teʼ tu láakʼ kaʼapʼéeloʼ yaan k-ilik bix u yáantkoʼon utiaʼal k-kaʼansaj tubeel yéetel utiaʼal ka chúukpajak k-óol kʼaʼaytaj mantatsʼ.

Kʼaʼabéet maʼ k-chʼaʼik saajkil

3. ¿Baʼaxten maʼ unaj u chʼaʼik saajkil máak u kʼaʼayt le maʼalob péektsiloʼ?

³ Dioseʼ u tsʼaamajtoʼon u jatsʼuts páajtalil k-kʼaʼaytik u Reino. Baʼaleʼ yaan kʼiineʼ ku chan talamtal k-beetik. Kex yaan máaxoʼob utstutʼaan u yuʼubikoʼob le maʼalob péektsiloʼ, u maas yaʼabil le máakoʼoboʼ maʼatech u kʼamikoʼob, jeʼex tu kʼiiniloʼob Noeiʼ; Jesuseʼ tu yaʼaleʼ  «maʼ tu naʼatajoʼob mix baʼaliʼ tak le kʼiin ka taal le búulkabaloʼ ka láaj» xuʼulsaʼaboʼob (Mat. 24:38, 39). Yanoʼobeʼ ku pʼaʼastikoʼonoʼob wa ku pʼektikoʼonoʼob (2 Ped. 3:3). Yaan kʼiineʼ jeʼel k-chʼaʼapachtaʼal tumen le autoridadoʼoboʼ, tumen k-éet xookoʼob, k-éet meyajoʼob wa tumen k-láakʼtsiloʼob. Tsʼoʼoleʼ yaan kʼiineʼ chan suʼlakoʼon wa saajkoʼon maʼ u kʼaʼamal le maʼalob péektsil k-kʼaʼaytikoʼ. U jaajileʼ jejeláas baʼaxoʼob talamkúuntik k-kʼaʼaytik le maʼalob péektsiloʼ. ¿Baʼax jeʼel u yáantkoʼon utiaʼal u seguer k-tʼaan «yéetel páajtalil» bey xan yéetel «x-maʼ saajkil[eʼ]»? (Efe. 6:19, 20.)

4. 1) ¿Baʼax ku tsʼáaik naʼatbil le tʼaan «x-maʼ saajkiloʼ»? 2) ¿Máax áant Pablo utiaʼal maʼ u sajaktal kʼaʼaytaj tu kaajil Tesalónica?

⁴ Le tʼaan griego ku suʼutul «x-maʼ saajkil[oʼ]» ku tsʼáaik naʼatbil xan «u yaʼalik máak u jaajil» yéetel «u tʼaan máak yéetel u jaajil u yóol». Baʼaleʼ ken tʼaanak máak yéetel x-maʼ saajkileʼ kʼaʼabéet u yeʼesik tsiikil (Col. 4:6). Kex maʼ sajak máakeʼ kʼaʼabéet u tʼaan yéetel jeetsʼelil (Rom. 12:18). Ken k-kʼaʼayt u maʼalob péektsilil le Reinooʼ, unaj k-ilik maʼ k-beetik u kʼuuxil mix máak. Lelaʼ ku yeʼesiktoʼoneʼ ku kʼaʼabéettal k-eʼesik uláakʼ jatsʼuts modos ken tʼaanakoʼon yéetel x-maʼ saajkilil. Jeʼex k-ilkoʼ utiaʼal k-eʼesik jatsʼuts modoseʼ kʼaʼabéettoʼon áantaj. Tuukulnakoʼon le ka bin apóstol Pablo yéetel uláakʼ sukuʼunoʼob kʼaʼaytaj tu kaajil Tesalónica. Letiʼeʼ ku yaʼalikeʼ tu kʼaʼaytoʼob «le maʼalob péektsiloʼ yéetel tuláakal kʼub óolal». Jéeobaeʼ tu yáantoʼob utiaʼal u kʼaʼaytajoʼob yéetel x-maʼ saajkilil. ¿Baʼaxten kʼaʼabéetchaj maʼ u chʼaʼikoʼob saajkil? Pabloeʼ ku yaʼalik: «[Tumen] poʼochʼoʼon yéetel jaʼajatsʼaʼaboʼon tu kaajil Filipos». ¿Máax túun áantoʼob utiaʼal maʼ u chʼaʼikoʼob saajkil? Pabloeʼ ku yaʼalik: «Jajal Dioseʼ tu yáantoʼon» (1 Tes. 2:2). Jeʼex túun k-ilkoʼ Jéeobaeʼ jeʼel u páajtal u luʼsik t-puksiʼikʼal le saajkil jeʼex tu beetil teʼ yáax siglooʼ.

5. ¿Bix úuchik u yáantaʼal Pedro, Juan yéetel uláakʼ disipuloʼob tumen Jéeoba?

⁵ Tuukulnakoʼon tiʼ le baʼax tu yaʼalaj Pedro yéetel Juan tu táan «u nuuktakiloʼob le judíoʼoboʼ, le ancianoʼoboʼ yéetel u j-kaʼambesajiloʼob le aʼalmajtʼaanoʼ». Letiʼobeʼ tu yaʼaloʼob: «Tukulteʼex baʼax maʼalob tu táan Jajal Dios: k-uʼuyik a tʼaaneʼex wa k-uʼuyik u tʼaan Yuum Jajal Dios. Tumen toʼoneʼ maʼ tu páajtal u jáawal k-aʼalik le baʼaloʼob k-ilmaj yéetel k-uʼuymajoʼ». Letiʼobeʼ maʼ tu kʼáatoʼob tiʼ Jéeoba ka u beet u xuʼulul u chʼaʼapachtaʼaloʼobiʼ, baʼaxeʼ tu yaʼaloʼob: «Chʼenxikint le baʼaxoʼob ku yaʼalikoʼob utiaʼal u sajakkúuntkoʼonoʼoboʼ, yéetel tsʼáa u páajtalil tiʼ a palitsiloʼob utiaʼal maʼ u chʼaʼikoʼob saajkil u kaʼansoʼob le baʼax ka waʼalikoʼ, NM» (Hch. 4:5, 19, 20, 29). ¿Bix úuchik u yáantaʼaloʼob tumen Jéeoba? (Xokaʼak Beetaʼanoʼob 4:31.) Tu tsʼáaj u kiliʼich muukʼ tiʼob utiaʼal maʼ u chʼaʼikoʼob saajkil. Bejlaʼeʼ bey xan u yáantikoʼonoʼ. Baʼaleʼ ¿baʼax unaj k-beetik utiaʼal u tsʼáaiktoʼon u kiliʼich muukʼ teʼ kʼaʼaytajoʼ?

Baʼax jeʼel u yáantkoʼon utiaʼal maʼ k-chʼaʼik saajkileʼ

6, 7. ¿Baʼax unaj u beetik máak utiaʼal ka tsʼaʼabak le kiliʼich muukʼ tiʼoʼ? Tʼaanen tiʼ upʼéel baʼax eʼesik leloʼ.

⁶ Utiaʼal u tsʼáaiktoʼon u kiliʼich muukʼ Dioseʼ unaj k-kʼáatiktiʼ. Jesuseʼ tu yaʼalaj: «Wa teʼex, kex kʼaakʼas máakeʼex, a wojel a tsʼaʼex maʼalob baʼaloʼob tiʼ a paalaleʼexeʼ, jach tu jaajil a Taataʼex yaan teʼ kaʼanoʼ bíin u tsʼáa le kiliʼich [muukʼ] tiʼ le máaxoʼob kʼáatiktiʼeʼ» (Luc. 11:13). Le tʼaanoʼobaʼ ku yeʼesik u kʼaʼabéetil k-kʼáatik mantatsʼ tiʼ Jéeoba ka u tsʼáatoʼon u kiliʼich muukʼ. Lelaʼ jeʼel u páajtal k-beetik ken kʼaʼaytajnakoʼon teʼ bejoʼoboʼ, ken kʼaʼaytajnakoʼon kex maʼ le jokʼaʼanoʼon k-beetiʼ bey xan ken kʼaʼaytajnakoʼon teʼ tuʼuxoʼob ku yúuchul koonoloʼ (1 Tes. 5:17).

⁷ Lelaʼ bey tu beetil utúul kiik ku kʼaabaʼtik Rosa. * Upʼéel kʼiin tiaʼan teʼ escuela tuʼux ku meyajoʼ, tu yilaj utúul profesoraeʼ táan u xokik upʼéel baʼax ku yaʼalik upʼéel escuela yoʼolal bix u maltratartaʼal le mejen paalaloʼoboʼ. Le profesoraoʼ jach kʼuuxilnajeʼ ka tu yaʼalaj: «¡Tuʼux ken tsʼoʼokol beyaʼ!». Le kiikoʼ tu tsʼáaj cuentaeʼ leloʼ u súutukil utiaʼal u tsikbaltik le maʼalob péektsil tiʼoʼ. ¿Baʼax áant utiaʼal maʼ u sajaktal u beete? Letiʼeʼ ku yaʼalik: «Tin kʼáataj tiʼ Jéeoba ka u tsʼáaten  u kiliʼich muukʼ». Bey túunoʼ páajchaj u tsikbal yéetel le profesoraoʼ, yéetel tu yaʼalajtiʼ yaan u kaʼa tsikbaloʼob tuláakʼ kʼiin. Lelaʼ bey xan úuchik tiʼ Milane, yaan cinco jaʼaboʼob tiʼ, kajaʼan tu noj kaajil Nueva York. Letiʼeʼ ku yaʼalik: «Táanil tiʼ in bin xookeʼ, in maamaeʼ suuk u payalchiʼ tin wéetel». ¿Baʼax ku kʼáatik u maama tiʼ Jéeoba? Ka tsʼaʼabak u muukʼil tiʼ Milane u beetik baʼax maʼalob yéetel ka tʼaanak tiʼ u Dios. U maamaeʼ ku yaʼalik: «Yoʼolal lelaʼ in hijaeʼ tsʼoʼok u páajtal u tsolik baʼax ku tuklik yoʼolal kʼiin kʼaabaʼob bey xan yoʼolal uláakʼ kʼiimbesajoʼob, yéetel tsʼoʼok u yilik maʼ u táakpajliʼ». Lelaʼ ku yeʼesik u kʼaʼabéetil u kʼáatik máak áantaj ich payalchiʼ utiaʼal maʼ u sajaktal.

8. ¿Baʼax ku kaʼansiktoʼon le baʼax úuch tiʼ Jeremíasoʼ?

⁸ Tuukulnakoʼon tiʼ bix úuchik u yáantaʼal Jeremías utiaʼal u xuʼulul u sajaktal. Le ka yéeyaʼab tumen Jéeoba utiaʼal ka u beet u profetaileʼ, letiʼeʼ tu yaʼalaj: «¡Yuumtsil! ¡Teneʼ jach paalen[,] maʼ xan in wojel tʼaaniʼ!» (Jer. 1:4-6). Baʼaleʼ ka máan kʼiineʼ tu kʼaʼaytaj yéetel x-maʼ saajkil le baʼaxoʼob ku yaʼalik Jéeoba u beetkoʼ, le oʼolal le máakoʼoboʼ tu yiloʼob bey maʼ táan u kaxtik u yutsil le kaajoʼ (Jer. 38:4). Tu beetaj le meyaj tsʼaʼabtiʼ ichil maas tiʼ sesentaicinco jaʼaboʼoboʼ. Letiʼeʼ jach kʼaj óoltaʼab tumen maʼatech u chʼaʼik saajkil kʼaʼaytaj, le oʼolal tu kʼiiniloʼob Jesuseʼ, le máakoʼoboʼ tu tukloʼob Jeremías tsʼoʼok u kaʼa kuxkíintaʼal, tumen Jesuseʼ jach maʼ sajakchaj xan kʼaʼaytajiʼ (Mat. 16:13, 14). ¿Baʼax áant Jeremías utiaʼal u xuʼulul u suʼlaktal yéetel u sajaktal? Letiʼeʼ ku yaʼalik: «Tin puksiʼikʼal túuneʼ [u tʼaan Jéeobaeʼ] ku suut jumpʼéel kʼáakʼ ku láaj tóok. Kin wuʼuyik tak tin baakeloʼob. Kin tsʼáaikimba in tupe, baʼaleʼ maʼ tin páajtal» (Jer. 20:9). Jeʼex túun k-ilkoʼ, u tʼaan Jéeoba péeks utiaʼal maʼ u sajaktal kʼaʼaytaj.

9. ¿Baʼax ku péekskoʼon beet le baʼax xokik teʼ Bibliaoʼ?

⁹ Tu cartai Hebreobeʼ Pabloeʼ tu yaʼalaj: «U tʼaan Jajal Dioseʼ kuxaʼan yéetel yaan u páajtalil, [maas] yaan u yej tiʼ jeʼel máakalmáak máaskabil kaʼapʼéel u yejeʼ, yéetel ku yokol tak tu maas taamil u yóol yéetel u [kuxtal] máak, tak tiʼ le baʼax [jach] taʼakbeʼen tiʼ máakoʼ; yéetel ku jóokʼesik tiʼ sáasil u tuukuloʼob yéetel baʼaxoʼob u kʼáat u beet le puksiʼikʼaloʼ» (Heb. 4:12). Le baʼax ku yaʼalik Diosoʼ ku yáantkoʼon jeʼex úuchik u yáantik Jeremíaseʼ. Kʼaʼajaktoʼoneʼ maʼ chéen u tuukul wíinik tsʼíibtaʼan ichil le Bibliaoʼ. Kex chéen wíinik tsʼíibteʼ, Dios nuʼuktoʼob utiaʼal u beetkoʼob. Lelaʼ bey u yaʼalik 2 Pedro 1:21: «Le [profetaʼoboʼ] maʼ tʼaanajoʼob mix juntéen chéen tu juunal u yóoloʼobiʼ. Maʼ beyiʼ, baʼaleʼ máakoʼob nuʼuktaʼanoʼob tumen kiliʼich [muukʼeʼ]; tʼaanajoʼob tu yoʼolal Jajal Dios». Le oʼolal ken k-xok le Bibliaoʼ, k-oksik t-tuukul le baʼax aʼalaʼab yáanal u nuʼuktaj le kiliʼich muukʼoʼ (xokaʼak 1 Corintoiloʼob 2:10). Le baʼax xokikoʼ k-uʼuyik bey «jumpʼéel kʼáakʼ» ichil k-puksiʼikʼaleʼ, le oʼolal maʼatech k-xulik k-tʼaan tiʼ baʼax ku yaʼalik Dios.

10, 11. 1) ¿Baʼax jeʼel u yáantkoʼon utiaʼal maʼ k-sajaktal kʼaʼaytajeʼ? 2) Aʼal upʼéel baʼax unaj a beetik utiaʼal a maas maʼalobkíintik a xook ta juunal.

 ¹⁰ Utiaʼal ka béeyak k-tsʼáaik ichil k-kuxtal le baʼax k-xokikoʼ kʼaʼabéet u kʼuchul t-puksiʼikʼal. Tuukulnakoʼon tiʼ Ezequiel. Tiʼ upʼéel náayeʼ, aʼalaʼabtiʼ tumen Jéeoba ka u jaant upʼéel rollo tuʼux ku yaʼalik le baʼax ku páaʼtik u kʼasaʼan kaajil Israeloʼ. Le baʼax ku yaʼalik Jéeobaoʼ unaj u yokol ichil u wíinklil. Chéen bey jeʼel u yilik le meyaj jach kiʼ bey jeʼex le kaaboʼ (xokaʼak Ezequiel 2:8–3:4, 7-9).

¹¹ Toʼoneʼ tsʼaʼan xan upʼéel meyaj k-beet jeʼex le tsʼaʼab tiʼ Ezequieloʼ. U jaajileʼ maʼ chéen chʼaʼabil u kʼaʼaytaʼal le baʼax ku yaʼalik Jéeobaoʼ, tumen yaʼab máakeʼ maʼ u kʼáat u yuʼubiʼ. Utiaʼal u chúukpajal k-óol k-beet le meyajaʼ, jach unaj k-xokik le Bibliaoʼ yéetel k-naʼatik baʼax ku yaʼalik. Tsʼoʼoleʼ maʼ chéen wa baʼax kʼiin unaj k-xokikiʼ, baʼaxeʼ unaj k-ilik k-xokik sáamsamal. Unaj k-beetik jeʼex le salmistaaʼ, letiʼeʼ tu yaʼalaj: «Ka kʼambeʼenchajak tiʼ tech in tʼaanoʼob yéetel in tuukuloʼob, Yuumtsil u kúuchil in taʼakbesikimba, in toksajil» (Sal. 19:14). Kʼaʼabéet k-tuukul tiʼ le baʼax k-xokik teʼ Bibliaoʼ utiaʼal ka kʼuchuk t-puksiʼikʼal. Jeʼex túun k-ilkoʼ, tuláakloʼon unaj k-ilik bix jeʼel k-maas maʼalobkíintik k-xook t-juunaleʼ. *

12. ¿Baʼaxten unaj k-bin teʼ muchʼtáambaloʼoboʼ?

¹² Uláakʼ baʼax unaj k-beetik utiaʼal k-kʼamik le kiliʼich muukʼoʼ letiʼe ka k-kaxt «bix jeʼel u páajtal k-áantikba t-baatsileʼ utiaʼal ka yanaktoʼon yaakunaj yéetel utiaʼal k-beetik baʼax uts. Maʼ unaj k-ketikba yéetel le máaxoʼob suuktiʼob maʼ u taaloʼob muchʼtal t-éeteliʼ» (Heb. 10:24, 25). Le baʼax ku meyaj utiaʼal k-nuʼuktaʼal tumen le kiliʼich muukʼoʼ letiʼe múuchʼuliloʼ, le oʼolal wa k-kʼáat ka u nuʼuktoʼoneʼ unaj k-bin tiʼ tuláakal le muchʼtáambaloʼoboʼ, k-uʼuyik le baʼax ku kaʼansaʼaloʼ yéetel k-tsʼáaik ichil k-kuxtal (xokaʼak Apocalipsis 3:6).

Le utsiloʼob ku taasik le maʼ u chʼaʼik saajkil máakoʼ

13. ¿Baʼax ku yáantkoʼon k-il le bix úuchik u kʼaʼaytaj le cristianoʼob teʼ yáax siglooʼ?

¹³ Le kiliʼich muukʼoʼ, letiʼe muukʼ maas yaan u páajtalil tiʼ tuláakal yóokʼol kaaboʼ, lelaʼ ku yáantkoʼon k-beet baʼax ku yaʼalik Jéeoba. Lelaʼ bey úuchik teʼ yáax siglooʼ, yéetel u yáantaj le kiliʼich muukʼoʼ páajchaj u kʼaʼaytaʼal le maʼalob péektsil «tiʼ tuláakal jejeláas tuʼuxoʼob yóokʼol kaab» tumen le yáax cristianoʼoboʼ (Col. 1:23). Kʼaʼajaktoʼoneʼ letiʼobeʼ «maʼ xooknajaʼanoʼob[iʼ]» yéetel «chéen ichil meyajil máakoʼob u taaloʼob», lelaʼ ku yeʼesiktoʼoneʼ maʼ chéen tiʼ letiʼob taal u páajtalil u beetkoʼobiʼ (Hch. 4:13).

14. ¿Baʼax unaj k-beetik utiaʼal maʼ k-sajaktal kʼaʼaytaj?

¹⁴ Le máaxoʼob meyajtik Diosoʼ unaj u biskoʼob  upʼéel maʼalob kuxtal utiaʼal ka nuʼuktakoʼob tumen le kiliʼich muukʼoʼ, lelaʼ le kun áantkoʼob utiaʼal maʼ u sajaktaloʼob kʼaʼaytaj. Utiaʼal u meyajtkoʼob Jéeoba «yéetel tuláakal [u] puksiʼikʼa[loʼobeʼ]» unaj u kʼáatkoʼob mantatsʼ u kiliʼich muukʼ Dios, u xokkoʼob le Biblia yéetel uláakʼ jóoʼsaʼaniloʼoboʼ, u tuukuloʼob tiʼ le baʼax ku kanikoʼoboʼ yéetel u binoʼob tiʼ tuláakal le muchʼtáambaloʼoboʼ (Rom. 12:11). Lelaʼ bey tu beetil utúul «judío u kʼaabaʼeʼ Apolos, Alejandría u kaajal, [letiʼeʼ] jach maʼalob u [kʼaʼaytaj kaʼachi]». ¿Baʼax áant kʼaʼaytaj yéetel x-maʼ saajkil? Le Bibliaoʼ ku yaʼalik: «Tumen jach chuup yéetel kiliʼich muukʼeʼ táan kaʼach u tsikbaltik yéetel u kaʼansik tubeel tuláakal le baʼaxoʼob yaan yil yéetel Jesusoʼ» (Hch. 18:24, 25, NM). Wa yantoʼon le «kiliʼich muukʼ[oʼ]» maʼ ken sajaktal kʼaʼaytaj joonaj joonai mix kʼaʼaytaj kex maʼ le jokʼaʼanoʼon k-beetiʼ.

15. ¿Baʼax utsiloʼob jeʼel k-kʼamik wa maʼ k-sajaktal kʼaʼaytajeʼ?

¹⁵ Wa k-táakpajal tu jaajil k-óol teʼ kʼaʼaytajoʼ, yaan u bintoʼon utsil. Yáaxeʼ yaan u maʼalobtal k-modos, tumen yaan k-ilik jach tu jaajil ku taasik utsil le meyaj k-beetkoʼ. U kaʼapʼéeleʼ, yaan u jach kiʼimaktal k-óol tumen yaan u maas maʼalobtal bix k-kaʼansaj. Yéetel u yóoxpʼéeleʼ, yaan k-maas tsʼáaik k-óol teʼ kʼaʼaytajoʼ, tumen k-ojel jach kʼaʼabéet k-kʼaʼaytik tu séebaʼanil le maʼalob péektsiloʼ.

16. ¿Baʼax unaj k-beetik wa tsʼoʼok u xuʼulul k-kʼaʼaytaj jeʼex kaʼacheʼ?

¹⁶ Baʼaleʼ ¿baʼax unaj k-beetik wa tsʼoʼok u xuʼulul k-kʼaʼaytaj jeʼex kaʼacheʼ? Yáaxeʼ unaj k-ilik baʼax k-beetik yéetel k-kuxtal, Pabloeʼ ku yaʼalik: «Pʼis óoltabaʼex tu juunal a wóoleʼex, utiaʼal ka a wileʼex wa jeetsʼel a wanileʼex tiʼ le oksaj óolaloʼ» (2 Cor. 13:5). Maʼalob ka k-tukle: «¿Láayliʼ wa yanten le kiliʼich muukʼoʼ? ¿Kin kʼáatik wa tiʼ Jéeoba ka u tsʼáaten u kiliʼich muukʼ? Le payalchiʼob kin beetkoʼ, ¿ku yeʼesik wa kin creertik jeʼel u yáantken Dios in beet baʼax ku yaʼalikeʼ? ¿Kin tsʼáaik wa u nib óolalil tiʼ tumen ku tsʼáaikten u páajtalil in jóokʼol kʼaʼaytaj? ¿Suuk wa in jóoʼsik u súutukil utiaʼal in xook? ¿Bukaʼaj tiempo kin jóoʼsik utiaʼal in tuukul tiʼ le baʼax kin xokik yéetel kin wuʼuyikoʼ? ¿Kin táakpajal wa mantatsʼ teʼ muchʼtáambaloʼoboʼ?». K-tuukul tiʼ le kʼáatchiʼobaʼ jeʼel u yáantkoʼon k-il baʼax talmil yantoʼoneʼ yéetel baʼax kʼaʼabéet k-beetik utiaʼal k-utskíintik.

Unaj k-chaʼik u yáantkoʼon le kiliʼich muukʼ utiaʼal maʼ chʼaʼik saajkiloʼ

17, 18. 1) ¿Baʼax eʼesik tsʼoʼok u yaʼabtal máaxoʼob kʼaʼaytik le maʼalob péektsiloʼ? 2) ¿Baʼax jeʼel u yáantkoʼon kʼaʼaytaj yéetel «x-maʼ saajkil[eʼ]»?

¹⁷ Ka tsʼoʼok u kaʼa kuxtal Jesuseʼ tu yaʼalaj tiʼ u disipuloʼob: «Le ken taalak le kiliʼich [muukʼ] ta wóokʼoleʼexeʼ, yaan a kʼamikeʼex páajtalil utiaʼal ka jóokʼokeʼex a [kʼaʼayteʼex] in kʼaabaʼ Jerusalén, tiʼ tuláakal Judea yéetel Samaria, tak [teʼ] kúuchiloʼob yaan tu xuul yóokʼol kaaboʼ» (Hch. 1:8). Le meyaj tu káajsaj le disipuloʼob teʼ kʼiinoʼob jeʼeloʼ, bejlaʼeʼ tsʼoʼok u maas yaʼabtal. Tsʼoʼok u chukik maas tiʼ siete millones J-jaajkunajoʼob kʼaʼaytik u Reino Dios tiʼ maas tiʼ doscientos treinta luʼumiloʼob yéetel uláakʼ mejen kaajoʼob. Yéetel cada jaʼabeʼ ku máanskoʼob óoliʼ mil quinientos millones horaʼob teʼ kʼaʼaytajoʼ. ¿Máasaʼ jach jatsʼuts k-ilik k-táakpajal tiʼ le meyaj maʼ kun kaʼa beetbilaʼ?

¹⁸ Jeʼex teʼ yáax siglooʼ, le kʼaʼaytaj ku beetaʼal tuláakal yóokʼol kaaboʼ táan u nuʼuktaʼal tumen le kiliʼich muukʼoʼ. Wa k-chaʼik u nuʼuktikoʼoneʼ yaan u páajtal k-kʼaʼaytaj yéetel «x-maʼ saajkil» (Hch. 28:31). Le oʼolaleʼ unaj k-chaʼik u nuʼuktikoʼon le kiliʼich muukʼ utiaʼal ka seguernak k-kʼaʼaytik u maʼalob péektsilil le Reinooʼ.

[Tsolajiloʼob]

¿Baʼax ta kanaj?

• ¿Baʼaxten maʼ unaj u sajaktal máak u kʼaʼayt baʼax ku yaʼalik Diosiʼ?

• ¿Baʼax áant le yáax cristianoʼob utiaʼal maʼ u sajaktaloʼob kʼaʼaytajoʼ?

• ¿Baʼax jeʼel u yáantkoʼon utiaʼal maʼ k-sajaktal kʼaʼaytajeʼ?

• ¿Baʼax utsiloʼob ku taasik le maʼ k-sajaktal kʼaʼaytajoʼ?

[U kʼáatchiʼiloʼob le xookoʼ]

[U tsolajil le oochel teʼ táan juʼun 7]

¿Bix jeʼel k-áantik k-paalal utiaʼal maʼ u chʼaʼikoʼob saajkileʼ?

[U tsolajil le oochel teʼ táan juʼun 8]

K-jáan payalchiʼeʼ jeʼel u yáantkoʼon teʼ kʼaʼaytajoʼ