Unaj u meyajtoʼon maʼalob «u kiliʼich tʼaan Jajal Dios»
Unaj u meyajtoʼon maʼalob «u kiliʼich tʼaan Jajal Dios»
«Chʼaʼex u kiliʼich tʼaan Jajal Dios bey jeʼel bix le máaskab ku tsʼáaikteʼex le kiliʼich [muukʼoʼ].» (EFE. 6:17)
1, 2. ¿Baʼax unaj k-beetik utiaʼal ka yanak uláakʼ máakoʼob kʼaʼaytik le Reinooʼ?
KA TU yilaj Jesús bukaʼaj máakoʼob kʼaʼabéet u yáantaʼaloʼob u kʼaj óoltoʼob Dioseʼ, tu yaʼalaj tiʼ u disipuloʼob: «Le joochoʼ jach yaʼab, baʼaleʼ le j-meyajoʼoboʼ jach jumpʼíitoʼob. Le oʼolaleʼ kʼáat óolteʼex tiʼ u Yuumil le joochoʼ ka u túuxt j-meyajoʼob utiaʼal jochik». Baʼaleʼ Jesuseʼ maʼ chéen tu yaʼalaj ka kʼáataʼak uláakʼ j-meyajoʼobiʼ. Ka tsʼoʼokeʼ «tu tʼanaj u doce j-kaambaloʼob» ka tu túuxtoʼob «jooch» wa kʼaʼaytaj tu luʼumil Israel (Mat. 9:35-38; 10:1, 5). Yéetel ka máan kʼiineʼ «tu yéeyaj xan uláakʼ setenta j-kaambaloʼob, ka tu túuxtajoʼob kaʼakatúulil» kʼaʼaytaj (Luc. 10:1, 2).
2 Bejlaʼa xaneʼ jach kʼaʼabéet uláakʼ máaxoʼob kʼaʼaytik le Reinooʼ. Tu jaʼabil 2009, 18,168,323 utúulul máakoʼob binoʼob tu Kʼaʼajsajil kíimik Cristo, diez millones u maas yaʼabil tiʼ tuláakal u j-jaajkunajoʼob Jéeoba. Lelaʼ ku yeʼeskeʼ jach yaʼab máakoʼob kʼaʼabéet u yáantaʼaloʼob u kʼaj óoltoʼob Dios (Juan 4:34, 35). Le oʼolal kʼaʼabéet k-kʼáatik tiʼ ka u túuxt uláakʼ máakoʼob áantaj teʼ meeyjil kʼaʼaytajoʼ. Tsʼoʼoleʼ wa jach tu jaajil k-óol k-kʼáatikeʼ, yaan k-ilik k-maas maʼalobkíintik bix k-kʼaʼaytaj yéetel bix k-tsʼáaik xook (Mat. 28:19, 20; Mar. 13:10).
3. Tsol bix u yáantkoʼon le kiliʼich muukʼ teʼ kʼaʼaytajoʼ.
3 Jeʼex t-ilaj teʼ xook máanikoʼ, le kiliʼich muukʼoʼ ku yáantkoʼon k-kʼaʼayt yéetel «x-maʼ saajkilil le baʼax ku yaʼalik Diosoʼ» (Hch. 4:31, NM). Tsʼoʼoleʼ ku yáantkoʼon xan k-beet tubeel le meyajoʼ. ¿Bix u yáantkoʼon? Ku yáantkoʼon utiaʼal ka meyajnaktoʼon tubeel le nuʼukul maas yaan u páajtalil u tsʼaamaj Jéeobaoʼ: le Bibliaoʼ (2 Tim. 3:16). Le baʼax ku yaʼalik le Bibliaoʼ tiʼ Dios u taal, le oʼolal ken tʼaanakoʼon tiʼ le baʼax ku yaʼalikoʼ ku yáantkoʼon le kiliʼich muukʼoʼ. Baʼaleʼ táanil tiʼ k-ilik bix jeʼel k-kʼaʼaytaj tubeeleʼ, koʼoneʼex ilik le nojoch páajtalil yantiʼ u Tʼaan Diosoʼ.
«U tʼaan Jajal Dioseʼ [...] yaan u páajtalil»
4. ¿Baʼax jeʼel u yáantkoʼon k-beet le Bibliaoʼ?
4 Le baʼax ku yaʼalik le Bibliaoʼ jach yaan u páajtalil (Heb. 4:12). Maas yaan u yej tiʼ le espadaʼob ku beetik le wíinikoʼoboʼ. Tumen jach yaan u yejeʼ, ku kʼuchul tak tu tsʼuʼ u baakel máak bey xan tu maas taamil u tuukul yéetel u puksiʼikʼal, tsʼoʼoleʼ ku yeʼesik baʼax u kʼáat u beete. Bey túunoʼ le baʼax ku yaʼalik le Bibliaoʼ jeʼel u páajtal u yáantik máak u kʼex u kuxtaleʼ (xokaʼak Colosailoʼob 3:10). Jeʼex túun k-ilkoʼ le Bibliaoʼ jach yaan u páajtalil.
5. ¿Bix u nuʼuktikoʼon le Bibliaoʼ, yéetel baʼax utsiloʼob ku taasik?
5 Le Biblia xanoʼ ku yáantkoʼon k-il bix unaj k-kuxtal teʼ kʼasaʼan yóokʼol kaabaʼ. Jeʼex upʼéel lámpara ku sáasilkúuntik u beel máakeʼ, le baʼax ku yaʼalik le Bibliaoʼ ku yáantkoʼon tiʼ tuláakal súutukil (Sal. 119:105). Ku yáantkoʼon k-il bix unaj k-kuxtal sáamsamal, bix jeʼel k-aktáantik le talmiloʼoboʼ yéetel ku yáantkoʼon k-il máaxoʼob yéetel unaj k-bisikba, tiʼ baʼaxoʼob unaj k-náaysik k-óol, tiʼ baʼax ken meyaj yéetel bix unaj k-vestirtikba (Sal. 37:25; Pro. 13:20; Juan 15:14; 1 Tim. 2:9). Tsʼoʼoleʼ ku yáantkoʼon utiaʼal k-bisikba yéetel u maasil (Mat. 7:12; Fili. 2:3, 4). Le Biblia xanoʼ ku yáantkoʼon k-il le utsiloʼob wa le talmiloʼob jeʼel u taasik le baʼaxoʼob k-beetkoʼ (1 Tim. 6:9). Ku yaʼalik xan baʼax ken u beet Dios maʼ kun xáantal, lelaʼ ku péekskoʼon kuxtal jeʼex utstutʼaaneʼ (Mat. 6:33; 1 Juan 2:17, 18). Jeʼex túun k-ilkoʼ le máaxoʼob ku chaʼik u nuʼuktaʼaloʼob tumen le Bibliaoʼ jach ku yantal u beelal u kuxtaloʼob.
6. ¿Bix u yáantkoʼon le Biblia utiaʼal k-baʼateʼel tu contra le Kʼaasilbaʼaloʼ?
6 Pabloeʼ tu ketaj le baʼax ku yaʼalik le Biblia yéetel upʼéel espadaoʼ, lelaʼ jach jeʼel u yáantkoʼon baʼateʼel tu contra le Kʼaasilbaʼaloʼ (xokaʼak Efesoiloʼob 6:12, 17). Yéetel u yáantajeʼ, jeʼel u béeytal k-áantik le máakoʼob lukʼul yáanal u páajtalil Satanasoʼ. Minaʼan uláakʼ baʼal jeʼex le espadaaʼ, tumen maʼatech u kíimsik máak, baʼaxeʼ ku tsʼáaik kuxtal. Le oʼolal unaj k-ilik u meyajtoʼon tubeel.
Unaj k-ilik u meyajtoʼon tubeel
7. ¿Baʼaxten unaj k-kanik k-manejart tubeel le espada u tsʼaamajtoʼon Jéeobaoʼ?
7 Utiaʼal maʼ u kíimsaʼal utúul soldado ken xiʼik baʼateleʼ, unaj u kanik u manejart tubeel u nuʼukulil u baʼateʼel. Lelaʼ bey xan unaj k-beetik yéetel le espada u tsʼaamajtoʼon Jéeobaoʼ. Unaj k-beetik le baʼax ku yaʼalik Pabloaʼ: «Tsʼáa a wóol a wantal tu táan Jajal Dios jeʼel bix juntúul j-meyaj kʼambeʼen, minaʼan baʼax oʼolal u chʼaʼik subtaleʼ, tumen ku tsolik maʼalob u tʼaaniloʼob le jaajoʼ» (2 Tim. 2:15).
8, 9. ¿Baʼax jeʼel u yáantkoʼon k-naʼat le baʼax k-xokik teʼ Bibliaoʼ? Aʼal upʼéel baʼax eʼesik beyoʼ.
8 ¿Baʼax jeʼel u yáantkoʼon utiaʼal k-manejartik tubeel «u tʼaaniloʼob le jaaj» teʼ kʼaʼaytajoʼ? Wa k-kʼáat tsol tubeel le baʼax ku yaʼalik le Bibliaoʼ kʼaʼabéet k-yáax naʼatik tubeel. Utiaʼal lelaʼ yaan uláakʼ baʼax unaj k-chʼaʼik en cuentai ken k-xok le Bibliaoʼ. ¿Baʼax túuniʼ? Unaj k-chʼaʼik en cuentai le baʼax ku yaʼalaʼal táanil tiʼ le baʼax k-xokikoʼ bey xan le baʼax ku yaʼalaʼal ken tsʼoʼokkoʼ, lelaʼ jeʼel u yáantkoʼon k-naʼat tubeel le baʼax ku yaʼalik le tekstooʼ.
9 Jeʼex túun k-ilkoʼ, utiaʼal k-naʼatik le baʼax k-xokikoʼ unaj k-jach ilik tiʼ baʼax ku tʼaan. Utiaʼal k-ilik bix jeʼel k-beetkeʼ tuukulnakoʼon tiʼ le baʼax tu yaʼalaj Pablo tu tsʼíibil Galaciailoʼob 5:13: «Tumen teʼexeʼ, sukuʼuneʼex, tʼanaʼaneʼex utiaʼal jáalkʼabil. Chéen maʼ a chʼaʼikeʼex le jáalkʼabilaʼ bey jeʼel bix jumpʼéel u baʼax oʼolalil a beetikeʼex kʼaakʼas tsʼíibolaloʼobeʼ; meyajtabaʼex ta baatsileʼex yéetel yaakunaj». ¿Tiʼ baʼax tsʼoʼok u jáalkʼabtaʼal le sukuʼunoʼoboʼ? ¿Tiʼ wa le kʼeban yéetel tiʼ le kíimiloʼ? ¿Wa tiʼ le religionoʼob maʼatech u kaʼansik u jaajiloʼ? Maʼatech. Le baʼax tu yaʼalaj Pablo táanil tiʼ u yaʼalik lelaʼ, ku yáantkoʼon k-ileʼ táan u tʼaan tiʼ le úuchik u jáalkʼabtaʼaloʼob tumen Jesús «tiʼ u loolob tʼaanil le aʼalmajtʼaanoʼ» (Gal. 3:13, 19-24; 4:1-5). Le máaxoʼob kiʼimakchaj u yóoloʼob úuchik u jáalkʼabtaʼaloʼoboʼ tu yáantoʼob u maasil yéetel yaabilaj, tsʼoʼoleʼ xuʼul u paklan pʼektikubaʼob (Gal. 5:15).
10. ¿Baʼax uláakʼ unaj k-beetik utiaʼal k-naʼatik le baʼax ku yaʼalik le Bibliaoʼ, yéetel baʼax jóoʼsaʼaniloʼob jeʼel u yáantkoʼoneʼ?
10 Uláakʼ baʼax jeʼel u yáantkoʼon k-naʼat le baʼax ku yaʼalik le Bibliaoʼ letiʼe ka tuukulnakoʼon tiʼ le máax tsʼíibtoʼ, baʼax kʼiin ka tu tsʼíibtaj, baʼax oʼolal tu tsʼíibtaj yéetel baʼaxoʼob ku yúuchul teʼ kʼiinoʼob ka tu beetoʼ. Tsʼoʼoleʼ maʼalob xan ka k-kʼaj óolt le baʼaxoʼob suukaʼan u beetaʼal teʼ kʼiinoʼob jeʼeloʼ, baʼaxoʼob maʼalob u yilaʼaliʼ, yéetel baʼax religioniloʼob yaan kaʼachiʼ. *
11. ¿Bix unaj k-tsolik le baʼaxoʼob ku kaʼansik le Bibliaoʼ?
11 Wa k-kʼáat ka meyajnaktoʼon tubeel «u tʼaaniloʼob le jaajoʼ», maʼ chéen unaj k-kanik tsol tubeel le baʼax ku yaʼalik le Bibliaoʼ, baʼaxeʼ unaj k-kanáantik bix ken k-aʼalik. Kex ku meyajtoʼon le Biblia utiaʼal k-eʼesik u jaajil, jeʼex tu beetil Jesús le ka túuntaʼab u yóol tumen le Kʼaasilbaʼaloʼ, maʼatech u meyajtoʼon utiaʼal k-suʼlakkúuntik u maasil, mix utiaʼal k-obligartik u kʼamoʼob le baʼax ku yaʼalikoʼ (Deu. 6:16; 8:3; 10:20; Mat. 4:4, 7, 10). Baʼaxeʼ k-beetik le baʼax tu yaʼalaj apóstol Pedroaʼ: «Tsiikilteʼex Cristo jeʼel bix Yuumtsil ta puksiʼikʼaleʼexeʼ. Mantatsʼ nuʼuktabaʼex utiaʼal a núukikeʼex tiʼ tuláakal ka u kʼáatoʼob a chiʼex tu yoʼolal le alab óolal yaan tiʼ teʼexoʼ, baʼaleʼ beeteʼex yéetel kabal óolal bey xan yéetel tsiikil» (1 Ped. 3:15).
12, 13. ¿Baʼax kaʼansajiloʼob jeʼel u pʼatik máak yéetel u yáantaj le Bibliaoʼ? Tsikbalt upʼéel baʼax uchaʼan.
12 ¿Baʼax jeʼel u yúuchul wa ku meyajtoʼon maʼalob le Bibliaoʼ? (Xokaʼak 2 Corintoiloʼob 10:4, 5.) Yáaxeʼ le baʼax ku yaʼalik le Bibliaoʼ ku yáantkoʼon utiaʼal k-xuʼulsik «nukuch pakʼil najoʼob» wa le baʼaxoʼob maʼ jaajtak ku kaʼansaʼaloʼ, le baʼaxoʼob kʼaastak ku beetaʼaloʼ yéetel le kaʼansajoʼob ku taal chéen tiʼ wíinikoʼ. Le Bibliaoʼ jach jeʼel u yáantkoʼon utiaʼal «k-xuʼulsik le tak pooloʼob» ku yaʼalaʼal tu contra Diosoʼ. Unaj k-áantik le máakoʼob u kʼex u tuukuloʼob yéetel le baʼaxoʼob ku yaʼalik le Bibliaoʼ.
13 Tuukulnakoʼon tiʼ le baʼax úuch tiʼ utúul koʼolel tu luʼumil India, letiʼeʼ yaan 93 jaʼaboʼob tiʼ. U hijo kajaʼan táanxel luʼumileʼ joʼopʼ u tsʼáaik xook tiʼ yéetel cartaʼob, letiʼ túuneʼ káaj u creertik u jaajil yoʼolal Jéeoba bey xan yoʼolal le baʼaxoʼob ku yaʼalik u beetkoʼ. Baʼaleʼ desde tu chichnileʼ kaʼansaʼantiʼ le ken kíimik máakeʼ ku kaʼa síijil bey utúul máak wa bey utúul baʼalcheʼiʼ. Le oʼolal le ka tsʼíibtaʼab tiʼ tumen u hijo yoʼolal bix yanik le kimenoʼoboʼ, letiʼeʼ tu yaʼalaj: «Teneʼ jach talam in wilik in creertik le baʼax ku yaʼalik a Bibliaoʼ. Tuláakal le religionoʼoboʼ ku yaʼalikoʼob yaan upʼéel baʼax ku pʼáatal kuxaʼanil tiʼ máak ken kíimik. Teneʼ kin creertikeʼ le ken kíimik máakeʼ, le baʼax ku pʼáatal kuxaʼaniloʼ yaan u páajtalil u kaʼa síijil 8,400,000 utéenel. ¿Bix ken a waʼalten wa maʼ jaajiʼ? ¿A kʼáat wa túun a waʼal maʼ maʼalob le baʼax ku kaʼansik u maasil religionoʼoboʼ?». Jeʼex k-ilkoʼ, le koʼoleloʼ jach ku creertik le kaʼansajaʼ. ¿Jeʼel wa u páajtal u luʼsaʼal tu puksiʼikʼal le baʼax maʼ jaaj ku creertik tumen le espada ku meyajtoʼonoʼ? Ka máan wa jaypʼéel semanaʼob táan u xakʼalxoktik le baʼaxoʼob ku yaʼalik le Bibliaoʼ, letiʼeʼ tu tsʼíibtaj: «Táan u káajal in naʼatik u jaajil yoʼolal bix yanik le kimenoʼoboʼ. Maʼ a wojel bukaʼaj kiʼimakil in wóol ikil in wojéeltik yaan u kaʼa kuxtal le k-láakʼtsiloʼob tsʼoʼok u kíimloʼoboʼ. Jach kin tsʼíiboltik ka séeb kʼuchuk u Reino Dios».
Eʼes yéetel le Biblia jach jaaj le baʼax ka waʼalikoʼ
14. ¿Bix jeʼel k-áantik le máakoʼob u kʼamoʼob le baʼax ku kaʼansik le Bibliaoʼ?
14 Wa k-kʼáat ka meyajnaktoʼon tubeel le Biblia teʼ kʼaʼaytajoʼ, maʼ chéen unaj k-xokik le tekstoʼob tiʼ u yuumil najoʼ. Jeʼex tu beetil Pabloeʼ kʼaʼabéet k-áantik u maasil u creertoʼob le baʼax ku yaʼalik le Bibliaoʼ (xokaʼak Beetaʼanoʼob 19:8, 9). Lelaʼ upʼéel baʼax jach kʼaʼabéet k-beetik utiaʼal k-áantik wa máax u creert le baʼax k-kaʼansiktiʼoʼ. Baʼaleʼ ¿bix jeʼel k-áantik wa máax u kʼam le baʼax ku kaʼansik le Bibliaoʼ? Unaj k-kʼuchul tu puksiʼikʼal utiaʼal ka u yil jach jaaj le baʼax k-kaʼansiktiʼoʼ. ¿Bix jeʼel u páajtal k-beetkeʼ?
15. ¿Bix jeʼel k-áantik le máakoʼob u yeʼesoʼob tsiikil tiʼ le Bibliaoʼ?
15 Le baʼaxoʼob ka waʼalikoʼ unaj u péeksik u maasil u yeʼes tsiikil tiʼ le Bibliaoʼ. Táanil tiʼ a xokik upʼéel tekstoeʼ aʼal baʼaxten maʼalob u yojéeltik máak baʼax ku tuklik Jéeoba yoʼolal le baʼax ka waʼalikoʼ. Ken tsʼoʼokok a beetik upʼéel kʼáatchiʼ yéetel ken tsʼoʼokok a wuʼuyik baʼax ken u núukeʼ, jeʼel u páajtal a waʼalikeʼ: «Koʼox ilik baʼax ku tuklik Dios yoʼolal lelaʼ» wa «¿Baʼax ka tuklik ku yaʼalik Dios yoʼolal lelaʼ?». Ken a waʼal bey táanil tiʼ a xokik upʼéel tekstooʼ, ku yáantaj utiaʼal ka ilaʼak le Bibliaoʼ tiʼ Dios u taal yéetel ku yáantaj utiaʼal ka kʼaʼamak le baʼax ku kaʼansik tumen le máax yéetel ka tsikbaloʼ. Lelaʼ maases bey unaj k-beetik ken tsikbalnakoʼon yéetel utúul máax ku creertik baʼax ku yaʼalik le Bibliaoʼ baʼaleʼ maʼ u jach kʼaj óol tubeeliʼ (Sal. 19:7-10).
16. ¿Bix jeʼel u páajtal k-tsolik tubeel le tekstoʼob k-xokikoʼ?
16 Maʼ chéen unaj a xokik upʼéel tekstoiʼ, baʼaxeʼ kʼaʼabéet a tsolik. Unaj a beetik jeʼex tu beetil Pabloeʼ, letiʼeʼ maʼ chéen tu xokaj le tekstoʼoboʼ, baʼaxeʼ tu tsolaj baʼax u kʼáat u yaʼaloʼob (Hch. 17:3). Baʼaleʼ tumen upʼéel teksto tiʼ yaʼab baʼax ku tʼaaneʼ, maʼalob ka u yeʼes máak chéen le tʼaanoʼob yaan baʼax u yil yéetel le baʼax ku tsikbaltikoʼ. Upʼéel bix jeʼel u beetik máakeʼ letiʼe ka u kaʼa aʼal le tʼaanoʼob eʼesik jach jaaj le baʼax ku yaʼalikoʼ, wa u beetik kʼáatchiʼob tiʼ utiaʼal u yilik le tʼaanoʼob eʼesik jach jaaj le baʼax ku yaʼalik le Bibliaoʼ. Ken tsʼoʼokokeʼ tsol baʼax u kʼáat u yaʼal le tekstooʼ yéetel eʼes bix jeʼel u beetik le baʼax ku yaʼalikoʼ.
17. ¿Baʼax unaj u beetik máak utiaʼal u yeʼesik jach jaaj le baʼax ku yaʼalik le Bibliaoʼ?
17 Eʼes jach jaaj le baʼaxoʼob ku yaʼalik le Bibliaoʼ. Pabloeʼ «tsikbalnaj tu yéeteloʼob tiʼ le baʼax ku yaʼalik le Kiliʼich Tsʼíiboʼob» utiaʼal u kʼuchul tu puksiʼikʼaloʼob le baʼax ku yaʼalikoʼ (Hch. 17:2, 4, NM). Teech xaneʼ unaj a wilik a kʼuchul tu puksiʼikʼal le máakoʼoboʼ. Wa ka beetik kʼáatchiʼob tiʼ u yuumil najeʼ jeʼel a kʼuchul a wojéelt jach baʼax yaan tu puksiʼikʼaleʼ (Pro. 20:5). Maʼ chéen unaj u yaʼalik máak jach jaaj le baʼax ku yaʼalik le Bibliaoʼ, baʼaxeʼ kʼaʼabéet u meyaj uláakʼ baʼaloʼob tiʼ utiaʼal u yeʼesik jach jaaj. Maas maʼalob ka k-xok upʼéel teksto yéetel ka k-tsol tubeel baʼax ku yaʼalik ke ka k-jáajan xok kaʼapʼéel wa óoxpʼéel tekstoʼob. U meyajtoʼon uláakʼ «tʼaanoʼobeʼ ku beetik» u creertaʼal le baʼax k-aʼalikoʼ (Pro. 16:23). Baʼaleʼ yaan kʼiineʼ, utiaʼal k-eʼesik jach jaaj le baʼax k-aʼalikoʼ yaan u kʼaʼabéettal k-kaxtik áantaj tiʼ uláakʼ jóoʼsaʼaniloʼob. Le koʼolel tsʼoʼok k-yáax tʼaan tiʼeʼ, kʼaʼabéet u naʼatik kaʼach baʼaxten yaʼab máakoʼob creertik yaan upʼéel baʼax ku pʼáatal kuxaʼanil tiʼ máak ken kíimik. Baʼaleʼ ka kʼuch u naʼat bix úuchik u káajal u kaʼansaʼal tumen u maasil religionoʼoboʼ kʼuch u creert le baʼax ku kaʼansik le Bibliaoʼ. *
Maʼ u xuʼulul u meyajtoʼon tubeel
18, 19. ¿Baʼaxten kʼaʼabéet u seguer k-tsʼáaik k-óol utiaʼal ka meyajnaktoʼon tubeel le espada ku tsʼáaiktoʼon Jéeobaoʼ?
18 Jeʼex u yaʼalik le Kiliʼich Tsʼíiboʼoboʼ «le yóokʼol kaab k-ilikaʼ» táan u jelpajal, yéetel táan u bin u maas yaʼabtal u beetaʼal baʼaloʼob kʼaastakiʼ (1 Cor. 7:31; 2 Tim. 3:13). Le oʼolal maas jach kʼaʼabéet u meyajtoʼon le Biblia wa le espada utiaʼal k-xuʼulsik «nukuch pakʼil najoʼob» wa le baʼaxoʼob maʼ jaajtak ku kaʼansaʼaloʼ.
19 Jach kiʼimak k-óol yaniltoʼon le Bibliaoʼ yéetel u meyajtoʼon utiaʼal k-áantik le máaxoʼob taak u kankoʼob u jaajil utiaʼal u pʼatkoʼob le kaʼansajoʼob maʼ jaajtakoʼ. Mix upʼéel tiʼ le baʼaxoʼob jach úuch joʼopʼok u creertaʼaloʼob maas yaan u páajtalil tiʼ le baʼax ku yaʼalik u Tʼaan Diosoʼ. Bey túunoʼ, koʼoneʼex jach tsʼáaik k-óol utiaʼal ka meyajnaktoʼon tubeel le espada u tsʼaamajtoʼon Jéeoba utiaʼal u seguer k-kʼaʼaytik le Reinooʼ.
[Tsolajiloʼob]
^ xóot’ol 10 Ichil le jóoʼsaʼaniloʼob jeʼel u yáantkoʼonoʼ tiaʼan le libro “Toda Escritura es inspirada de Dios y provechosa”, Perspicacia para comprender las Escrituras yéetel U Pʼíich Tulumil Kanan, jeʼex le jaats ku kʼaabaʼtik «U Tʼaan Jéeobaeʼ kuxaʼan».
^ xóot’ol 17 Ilaʼak le folleto ¿Qué nos sucede cuando morimos?, táan juʼun 5 tak 16.
¿Baʼax t-kanaj?
• ¿Bukaʼaj páajtalil yaan tiʼ u Tʼaan Dios?
• ¿Baʼax jeʼel u yáantkoʼon utiaʼal ka meyajnaktoʼon tubeel «u tʼaaniloʼob le jaajoʼ»?
• Le baʼax ku yaʼalik le Bibliaoʼ, ¿bix u xuʼulsik «nukuch pakʼil najoʼob» wa le baʼaxoʼob maʼ jaajtak ku kaʼansaʼaloʼ?
• ¿Bix jeʼel k-áantik u maasil u creertoʼob le baʼax ku yaʼalik le Biblia teʼ kʼaʼaytajoʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 12]
Bix jeʼel k-áantik u maasil u creertoʼob le baʼax ku yaʼalik le Bibliaoʼ
▪ Áant u maasil u yeʼes tsiikil tiʼ le Bibliaoʼ
▪ Tsol le tekstoʼob ka xokikoʼ
▪ Meyajnaktech uláakʼ baʼaloʼob ku yáantaj utiaʼal a kʼuchul tu puksiʼikʼal le máakoʼoboʼ
[U tsolajil le oochel teʼ táan juʼun 11]
Unaj u meyajtoʼon tubeel le espada u tsʼaamajtoʼon Jéeobaoʼ