Kuxlakoʼon yéetel kiliʼich muukʼ utiaʼal maʼ u xuʼulul k-meyajtik Jéeoba
Kuxlakoʼon yéetel kiliʼich muukʼ utiaʼal maʼ u xuʼulul k-meyajtik Jéeoba
«Kuxleneʼex jeʼel bix ku yaʼalik le kiliʼich [muukʼoʼ], beyoʼ maʼ bíin a beeteʼex le kʼaakʼas tsʼíibolaloʼob yaan tiʼ teʼexoʼ.» (GAL. 5:16)
1. ¿Máakalmáak le kaʼapʼéel okjaʼ tsʼaʼab tu kʼiinil le Pentecostesoʼ?
TU KʼIINIL le Pentecostés tiʼ u jaʼabil 33 tiʼ le yáax siglooʼ, u disipuloʼob Jesuseʼ tsʼaʼab u yokjaʼob yéetel le kiliʼich muukʼoʼ, lelaʼ tu tsʼáaj u páajtalil tiʼob u tʼaanoʼob ich jejeláas tʼaaniloʼob (1 Cor. 12:4-10). Ka tsʼoʼokeʼ Pedroeʼ tu máansaj upʼéel tsoltʼaan. ¿Baʼax túun tu beetaj le máaxoʼob uʼuyoʼ? Yaʼab tiʼ letiʼobeʼ «yaachaj u yóol u puksiʼikʼaloʼob», ka tu beetoʼob le baʼax tu yaʼalaj Pedrooʼ, arrepentirnajoʼob yéetel okjaʼanajoʼob. Le Bibliaoʼ ku yaʼalik: «Le máaxoʼob tu yuʼubajoʼob u [kʼaʼaytajeʼ] okjaʼanajoʼob; tiʼ le kʼiinoʼ yanchaj min tres mil máakoʼob tu nupubaʼob tiʼ le oksaj óoloʼoboʼ» (Hch. 2:22, 36-41). Jeʼex aʼalaʼabik tumen Jesuseʼ, okjaʼanajoʼob tu kʼaabaʼ le Taataoʼ, le Paaloʼ bey xan le kiliʼich muukʼoʼ (Mat. 28:19).
2, 3. 1) Tsol baʼax u jelaʼanil u yokjaʼ máak yéetel le kiliʼich muukʼoʼ tiʼ u yokjaʼ máak «tu kʼaabaʼ le [...] kiliʼich [muukʼoʼ]». 2) ¿Baʼaxten unaj u yokjaʼ le máaxoʼob u kʼáat u meyajtoʼob Diosoʼ?
2 ¿Yaan wa u jelaʼanil u yokjaʼ máak yéetel le kiliʼich muukʼ tiʼ le u yokjaʼ máak «tu kʼaabaʼ [...] le kiliʼich [muukʼoʼ]»? Yaan. Le máaxoʼob ku yokjaʼob yéetel le kiliʼich muukʼoʼ ku kaʼa síijloʼob bey u paalaloʼob Dioseʼ (Juan 3:3). Tsʼoʼoleʼ ku yéeyaloʼob utiaʼal ka u beet u reyiloʼob yéetel u j-kʼiiniloʼob tiʼ u Reino Dios yaan teʼ kaʼanoʼ, yéetel ku táakpajloʼob tiʼ u wíinklil Cristo (1 Cor. 12:13; Gal. 3:27; Apo. 20:6). Lelaʼ ku yeʼesikeʼ, desde teʼ Pentecostesoʼ Jéeobaeʼ káaj u tsʼáaik u yokjaʼ le máakoʼob yéetel le kiliʼich muukʼoʼ utiaʼal ka reinarnakoʼob yéetel Cristo (Rom. 8:15-17). Baʼaleʼ ¿baʼax u kʼáat u yaʼal u yokjaʼ máak «tu kʼaabaʼ [...] le kiliʼich [muukʼ]» jeʼex u beetik u j-jaajkunajoʼob Jéeoba teʼ asambleaʼoboʼ?
3 Ken okjaʼanak máakeʼ ku yeʼesik tsʼoʼok u kʼubik u kuxtal tiʼ Jéeoba. Lelaʼ ku beetaʼal tumen le máaxoʼob yéeyaʼanoʼob utiaʼal u binoʼob kaʼanoʼ bey xan tumen u millonesi máakoʼob kun pʼáatloʼob kuxtal mantatsʼ way Luʼumeʼ. Bey túunoʼ, kex wa táan u páaʼtik u bin máak teʼ kaʼan wa táan u páaʼtik u pʼáatal kuxtal way Luʼumeʼ, utiaʼal ka kʼaʼamak tumen Dioseʼ unaj u yokjaʼ «tu kʼaabaʼ le Taataoʼ, le Paaloʼ yéetel le kiliʼich [muukʼoʼ]». Baʼaleʼ le ken tsʼoʼokok u yokjaʼ máakeʼ kʼaʼabéet u yilik u seguer u kuxtal «jeʼel bix [u] yaʼalik le kiliʼich [muukʼoʼ]» (xokaʼak Galaciailoʼob 5:16). Le oʼolal maʼalob ka k-tukle: «¿Táan wa in kuxtal jeʼex u yaʼalik le kiliʼich muukʼ utiaʼal in tsʼoʼokbesik le baʼax tin waʼalaj tiʼ Jéeoba ka tin kʼubaj in kuxtal tiʼoʼ?».
Baʼax u kʼáat u yaʼal u kuxtal máak «jeʼel bix [u] yaʼalik le kiliʼich [muukʼoʼ]»
4. ¿Bix jeʼel k-kuxtal «jeʼel bix [u] yaʼalik le kiliʼich [muukʼoʼ]»?
4 U kuxtal máak «jeʼel bix [u] yaʼalik le kiliʼich [muukʼoʼ]» u kʼáat u yaʼal u chaʼik u nuʼuktaʼal u kuxtal tumen le páajtalil yaan tiʼ Diosoʼ. Lelaʼ u kʼáat u yaʼaleʼ k-chaʼik u nuʼuktik k-kuxtal sáamsamal. Teʼ capítulo 5 tiʼ Galaciailoʼoboʼ ku tsolik le baʼaxoʼob ku beetik le máaxoʼob ku chaʼik u nuʼuktaʼaloʼob tumen le kiliʼich muukʼoʼ yéetel ku yeʼesik baʼaxoʼob ku beetik le máaxoʼob ku beetkoʼob chéen baʼax u kʼáatoʼoboʼ (xokaʼak Galaciailoʼob 5:17, 18).
5. ¿Baʼaxoʼob unaj u beetik máak utiaʼal ka nuʼuktaʼak tumen le kiliʼich muukʼoʼ?
5 Le máaxoʼob yanoʼob yáanal u nuʼuktaj le kiliʼich muukʼoʼ ku yilik maʼ u beetkoʼob chéen baʼax u kʼáatoʼob. Maʼatech u beetkoʼob jeʼex le máaxoʼob ku binoʼob tu paach u «kʼaakʼas tsʼíibolaloʼoboʼ. Ku meyajtikoʼob beetbil [diosoʼob] yéetel ku beetikoʼob pulyaʼajiloʼob. Ku chʼaʼapʼektajoʼob, ku baʼateloʼob yéetel ku kʼaakʼas tuukuloʼob. Séebaʼan u pʼuʼujuloʼob, ku beetikoʼob tuláakal baʼal chéen utiaʼal u yutsiloʼob, ku beetikoʼob jatslantáambailoʼob [...]. Yaan loolob tsʼíibolaltiʼob, kíimsaj wíinikoʼob, káaltaloʼob yéetel jach joolokʼoʼob» (Gal. 5:19-21). Jeʼel u páajtal u yaʼalaʼaleʼ le máaxoʼob meyajtik Diosoʼ ku beetkoʼob «u kíimil le baʼax ku beetik le luʼumkabil wíinkliloʼ». ¿Bix u páajtal u beetkoʼob? Ikil u yáantaʼaloʼob tumen «le kiliʼich [muukʼoʼ]» (Rom. 8:5, 13). Tumen ku controlartik u kʼaakʼas tsʼíibolaloʼobeʼ, ku pʼáatal maas maʼ talam u tsʼáaik u tuukuloʼob tiʼ le baʼaxoʼob ku taal tiʼ le kiliʼich muukʼoʼ yéetel ku chaʼik u nuʼuktaʼal u kuxtaloʼob.
6. ¿Baʼax unaj k-beetik utiaʼal k-eʼesik u yich le kiliʼich muukʼoʼ? Kete.
6 Dioseʼ ku yáantkoʼon utiaʼal ka yanaktoʼon «u yich le kiliʼich muukʼoʼ», lelaʼ u kʼáat u yaʼaleʼ ku yáantkoʼon k-eʼes jatsʼuts modos (Gal. 5:22, 23, NM). Baʼaleʼ k-ojel xaneʼ unaj k-jach k-tsʼáaik k-óol utiaʼal ka yanaktoʼon. Lelaʼ jeʼel u páajtal k-ketik yéetel le meyaj ku beetik utúul j-kolnáaloʼ. Utiaʼal ka yanak u yich u paakʼáaleʼ kʼaʼabéet jaʼ bey xan kʼiin tiʼ. Wa minaʼan jaʼ mix kʼiineʼ maʼ kun béeytal le baʼaxoʼob ku pakʼikoʼ. Jeʼel u páajtal k-aʼalikeʼ le kiliʼich muukʼoʼ bey jeʼex le kʼiinoʼ, tumen ku yáantkoʼon utiaʼal ka k-eʼes u yich. Baʼaleʼ utiaʼal ka yanak u yich u paakʼáal le j-kolnáaloʼ kʼaʼabéet u jach tsʼáaik u yóol u meyajte (Pro. 10:4). Bey túun xanoʼ, wa k-kʼáat ka yanak u yich le kiliʼich muukʼ ichil k-kuxtaloʼ unaj k-kaʼansik k-puksiʼikʼal u beet baʼax maʼalob jeʼex u péeksaʼal le luʼum tumen le j-kolnáaloʼ. Le oʼolaleʼ maʼalob ka k-tukle: «¿Kin chaʼik wa u yáantken le kiliʼich muukʼ utiaʼal ka in weʼes jatsʼuts modos ichil in kuxtaloʼ?».
7. ¿Baʼaxten kʼaʼabéet k-jóoʼsik u tiempoi utiaʼal k-xook yéetel k-tuukul tiʼ le baʼax k-kanikoʼ?
7 Utiaʼal ka yanak u yich u paakʼáal máakeʼ, jach kʼaʼabéet xan jaʼ tiʼ. Leloʼ bey xan u yúuchul yéetel le kiliʼich muukʼoʼ, jach kʼaʼabéet u kʼamik máak le baʼax ku kaʼansik le Bibliaoʼ bey xan le baʼaxoʼob ku kaʼansaʼal teʼ múuchʼuliloʼ, lelaʼ ku keʼetel yéetel le jaʼoʼ (Isa. 55:1). Maʼ xaaneʼ yaʼab utéenel tsʼoʼok k-tsolik tiʼ wa máax, le Bibliaoʼ tsʼíibtaʼab yáanal u nuʼuktaj le kiliʼich muukʼoʼ, le oʼolal ku páajtal k-naʼatik yéetel u yáantaj le jóoʼsaʼaniloʼob ku taal tiʼ le palitsil «chúukpajaʼan u yóol yéetel yaan u naʼat[oʼ]» (Mat. 24:45-47; 2 Tim. 3:16). Lelaʼ ku yeʼesiktoʼoneʼ, utiaʼal ka áantaʼakoʼon tumen le kiliʼich muukʼoʼ kʼaʼabéet k-xokik le Bibliaoʼ yéetel k-tuukul tiʼ le baʼax ku kaʼansikoʼ. Beyoʼ k-beetik jeʼex le profetaʼob meyajt Dios úuchjeakiloʼ, letiʼobeʼ «tu xakʼaltajoʼob» u Kiliʼich Tʼaan Dios yaan teʼ kʼiinoʼob jeʼeloʼ. Tsʼoʼoleʼ yaan xan k-beetik jeʼex tu beetil le angeloʼoboʼ, letiʼobeʼ jach taakchaj u yojéeltikoʼob le baʼaxoʼob aʼalaʼab yoʼolal le Chʼiʼibaloʼ bey xan yoʼolal le sukuʼunoʼob yéeyaʼanoʼob utiaʼal u binoʼob kaʼanoʼ (xokaʼak 1 Pedro 1:10-12).
¿Bix u yáantkoʼon le kiliʼich muukʼoʼ?
8. ¿Baʼaxten unaj k-kʼáatik u kiliʼich muukʼ Jéeoba?
8 Baʼaleʼ maʼ chéen unaj u xokik máak le Biblia yéetel u tuukul tiʼ le baʼax ku yaʼalikoʼ. Baʼaxeʼ kʼaʼabéet u kʼáatik máak ich payalchiʼ u yáantaj yéetel u nuʼuktaj Dios, tumen letiʼeʼ «yaan páajtalil tiʼ utiaʼal u beetik [...] maas [yaʼab] tiʼ le baʼax k-kʼáatikoʼ wa k-tukultikoʼ» (Efe. 3:20; Luc. 11:13). Maʼ xaaneʼ yaan máax jeʼel u tuklikeʼ: «¿Baʼaxten unaj k-kʼáatik le baʼaxoʼob kʼaʼabéettoʼon wa “le Taataoʼ u yojel baʼax kʼaʼabéet[toʼon] maʼiliʼ [k-kʼáattiʼeʼ]”?» (Mat. 6:8). Tumen ken kʼáat u kiliʼich muukʼeʼ k-eʼesik k-kʼubik k-óol tiʼ letiʼ. Maʼalob ka k-tukult baʼax péekskoʼon k-áant wa máax. ¿Máasaʼ yaan kʼiineʼ k-áantik tumen kiʼimak k-óol úuchik u kʼáatiktoʼon? (Ket yéetel Proverbios 3:27.) Jéeoba xaneʼ ku kiʼimaktal u yóol ken k-kʼáat u kiliʼich muukʼ, le oʼolal ku tsʼáaiktoʼon (Pro. 15:8).
9. ¿Bix u yáantkoʼon le muchʼtáambaloʼob utiaʼal k-kʼamik u kiliʼich muukʼ Diosoʼ?
9 Le muchʼtáambaloʼob yéetel le asambleaʼob xanoʼ ku yáantaj utiaʼal k-kʼamik u kiliʼich muukʼ Dios. Le oʼolal jach unaj k-bin tiʼ tuláakal le muchʼtáambaloʼoboʼ yéetel unaj k-jach uʼuyik le baʼaxoʼob ku kaʼansaʼaloʼ. Beyoʼ yaan u páajtal k-naʼatik tubeel «u jach taʼakbil baʼaloʼob Jajal Dios» (1 Cor. 2:10). Jach maʼalob ka suukchajak k-núukik le kʼáatchiʼob ku beetaʼaloʼ. Maʼalob ka k-tukle: «¿Teʼ tu tsʼook mesaʼ jaytéen tin tichʼaj in kʼab utiaʼal in núukik le kʼáatchiʼob ku beetaʼaloʼ? ¿Jeʼel wa u páajtal in maas táakpajal teʼ muchʼtáambaloʼoboʼ?». Wa k-ilik kʼaʼabéeteʼ, maʼalob ka k-il bix jeʼel k-maas táakpajal ken xiʼikoʼon teʼ muchʼtáambaloʼoboʼ. Beyoʼ Jéeobaeʼ yaan u yilik jach k-kʼáat táakpajliʼ yéetel yaan u yáantkoʼon utiaʼal ka k-maas jóoʼs u yutsil le baʼaxoʼob ku kaʼansaʼaloʼ.
10. ¿Baʼax invitacionil ku bisik le máaxoʼob ku nuʼuktaʼaloʼob tumen le kiliʼich muukʼoʼ?
10 Le máaxoʼob ku chaʼik u nuʼuktaʼaloʼob tumen le kiliʼich muukʼoʼ ku beetkoʼob le baʼax ku yaʼalik Apocalipsis 22:17: «Le kiliʼich [muukʼ] yéetel le atantsiloʼ ku yaʼalikoʼob: Koʼoten. Le máax ku yuʼubajeʼ u yaʼal: Koʼoten. Le máax ukʼajeʼ yéetel u kʼáateʼ, taalak ka u yukʼ x-maʼ boʼolileʼ u jaʼil le kuxtaloʼ». Le kiliʼich muukʼ nuʼuktik le «atantsil» (wa le sukuʼunoʼob yéeyaʼanoʼob utiaʼal u binoʼob kaʼanoʼ), ku invitartik tuláakal máak ka taalak u yukʼ u jaʼi le kuxtaloʼ. ¿Kux túun teech? ¿Tsʼoʼok wa a kʼamik le invitacionoʼ, yéetel tsʼoʼok wa a chʼaʼatuklik a bisik xan tiʼ u maasil máakoʼob? U jaajileʼ, unaj k-ilik jach nojoch baʼal k-táakpajal teʼ meyajaʼ.
11, 12. ¿Bix u yáantkoʼon le kiliʼich muukʼ teʼ kʼaʼaytajoʼ?
11 Le meyajaʼ táan u beetaʼal yáanal u nuʼuktaj le kiliʼich muukʼ, jeʼex beetaʼabik teʼ yáax siglooʼ. Teʼ kʼiinoʼob jeʼeloʼ le kiliʼich muukʼoʼ áantajnaj utiaʼal u bisaʼal le maʼalob péektsil tak tuláakʼ luʼumiloʼoboʼ. Baʼaleʼ utéenjeakileʼ «maʼ tu chaʼaj tiʼob [Pablo ka u kʼaʼaytoʼob] le maʼalob péektsil tu luʼumil Asia[oʼ]»; yéetel maʼ tu chaʼaj u yookloʼob kʼaʼaytaj Bitiniaiʼ. Kex maʼ k-jach ojel bix úuchik u beetik lelaʼ, k-ojel tu nuʼuktaj Pablo utiaʼal ka xiʼik kʼaʼaytaj tu luʼumil Europa, letiʼeʼ tu yilaj tiʼ upʼéel náay táan u tʼaʼanal tumen utúul máak ka máanak tu luʼumil Macedonia utiaʼal u yáantoʼob (Hch. 16:6-10).
12 Jéeobaeʼ táan u nuʼuktik yéetel u kiliʼich muukʼ le kʼaʼaytaj ku beetaʼal tuláakal yóokʼol kaaboʼ. Kex maʼatech u nuʼuktikoʼon yéetel upʼéel náayeʼ, ku nuʼuktik yéetel u kiliʼich muukʼ le sukuʼunoʼob yéeyaʼanoʼoboʼ. Tsʼoʼoleʼ ku yáantik le sukuʼunoʼob yéetel le kiikoʼob utiaʼal ka u maas tsʼáaj u yóoloʼob teʼ kʼaʼaytajoʼ bey xan utiaʼal u kaʼanskoʼob u maasil máakoʼoboʼ. Kex táan k-beetik xan le meyajaʼ, baʼaleʼ maʼ xaaneʼ jeʼel u páajtal k-maas táakpajleʼeʼ.
13. Tʼaanen tiʼ upʼéel baʼax uchaʼan utiaʼal a weʼesik bix jeʼel k-chaʼik k-nuʼuktaʼal tumen le kiliʼich muukʼoʼ.
13 Uláakʼ bix k-tsʼáaikba yáanal u nuʼuktaj le kiliʼich muukʼoʼ letiʼe ken k-beet le baʼax ku yaʼalik le palitsiloʼ. Tuukulnakoʼon tiʼ Mihoko, utúul x-chʼúupal kajaʼan tu luʼumil Japón. Ka káaj u beetik u precursoraileʼ, ku yuʼubik kaʼach maʼ tu béeytal u kaʼa xíimbaltik le máaxoʼob yéetel tsʼoʼok u yáax tsikbaloʼ, tumen ku yuʼubik maʼ tu kaxtik baʼax u tsikbalttiʼob. Baʼaleʼ tu xokaj le baʼaxoʼob ku yaʼalik K-meeyjil tiʼ le Reinooʼ, maases le tuʼux ku yeʼesik bix jeʼel u kaʼa xíimbaltaʼal le máaxoʼob tsʼoʼok u yáax tʼaan máak tu yéeteloʼoboʼ, yéetel meyajnajtiʼ le folleto Cómo lograr una vida llena de satisfacción, lelaʼ tsʼoʼok u yáantaj utiaʼal u kʼaʼaytaʼal le maʼalob péektsil tiʼ le japoniloʼoboʼ. Le kiik túunoʼ joʼopʼ u meyajtiʼ le folleto jeʼex u yaʼalik le palitsiloʼ, yéetel káaj u xíimbaltik le máakoʼob chéen ichil u chan súutukoʼ. Letiʼeʼ tu yileʼ yaʼab máakoʼobeʼ ku yóotkoʼob xook tu yéetel kex maʼ u kʼáatoʼob kaʼachiʼ. Ka tsʼoʼokeʼ le kiikoʼ tu yaʼalaj: «Bejlaʼeʼ tiʼ yaʼab máakoʼob kin tsʼáaik xook, yaan kʼiineʼ ku chukik tak doce utúulal, ku kʼaʼabéetchajal tak in waʼaliktiʼob ka u páaʼtoʼob u yantalten u súutukil utiaʼal in tsʼáaik xook tiʼob». Jeʼex túun k-ilkoʼ, ken k-beet le baʼaxoʼob ku yaʼalaʼaltoʼonoʼ, k-eʼesik táan k-chaʼik u nuʼuktikoʼon le kiliʼich muukʼoʼ, lelaʼ jach yaʼab utsiloʼob ku taasik.
Unaj k-chaʼik u yáantkoʼon u kiliʼich muukʼ Dios
14, 15. 1) ¿Bix jeʼel u chúukpajal k-óol meyajt Jéeoba kex kʼebanoʼoneʼ? 2) ¿Bix jeʼel k-kaxtik u maas maʼalobil amigoʼobeʼ?
14 Toʼoneʼ unaj k-ilik k-tsʼoʼokbesik le meyaj u tsʼaamajtoʼon Diosoʼ (Rom. 10:14). Maʼ xaaneʼ k-uʼuyik bey maʼ tu páajtal k-beetkeʼ, baʼaleʼ Dioseʼ jeʼel u yáantkoʼoneʼ, kex yéeyaʼanoʼon utiaʼal k-bin kaʼan wa maʼ (xokaʼak 2 Corintoiloʼob 3:5). Wa k-beetik tuláakal le ku páajtal yéetel wa k-chaʼik u nuʼuktikoʼon le kiliʼich muukʼoʼ yaan u béeytal k-meyajtik Dios jeʼex úuchik k-aʼalik tiʼ ka t-kʼubaj k-kuxtal tiʼoʼ.
15 Tumen kʼebanoʼoneʼ, maʼ chéen chʼaʼabil k-beetik le baʼax t-aʼalaj tiʼ Jéeobaoʼ. Maʼ xaaneʼ jujuntúul tiʼ le máaxoʼob yéetel k-bisikba kaʼachoʼ ku kʼuuxiloʼob ken u yiloʼob tsʼoʼok k-kʼexik bix k-kuxtal, yoʼolal leloʼ «ku tʼaanoʼob kʼaas» tiʼ toʼon (1 Ped. 4:4). Baʼaleʼ maʼ unaj u tuʼubultoʼoneʼ, bejlaʼeʼ maas yaʼab k-amigoʼob yaan, tsʼoʼoleʼ yantoʼon u jatsʼuts páajtalil k-bisikba yéetel Jéeoba bey xan yéetel Jesucristo (xokaʼak Santiago 2:21-23). Yéetel kʼaʼabéet k-ilik k-maas bisikba yéetel k-sukuʼunoʼob teʼ múuchʼuliloʼ bey xan yéetel «le sukuʼunoʼob» tiʼ tuláakal yokʼol kaaboʼ (1 Ped. 2:17; Pro. 17:17). Jéeobaeʼ ku nuʼuktikoʼon yéetel u kiliʼich muukʼ utiaʼal k-kaxtik maʼalob amigoʼob.
16. ¿Baʼaxten jeʼel u páajtal k-aʼalik jeʼex úuchik u yaʼalik Pablo: «Ku kiʼimakchajal in wóol tu yoʼolal le x-maʼ muukʼiloʼ»?
16 Baʼaleʼ kex k-áantaʼal tumen le sukuʼunoʼoboʼ, maʼ chéen chʼaʼabil k-aktáantik le talmiloʼob ku yantaltoʼon sáamsamaloʼ. Yaan kʼiineʼ maʼ k-ojel baʼax jeʼel k-beetik ken k-aktáant upʼéel talmileʼ. Lelaʼ bey jeʼex ka saʼatak máak tiʼ upʼéel áaktun maʼ tu kaxtik tuʼux u jóoʼleʼ. Teʼ súutukiloʼob beyoʼ, maas unaj k-natsʼikba tiʼ Jéeoba yéetel k-kʼáatik u kiliʼich muukʼ. Tuukulnakoʼon tiʼ Pablo, letiʼeʼ tu yaʼalaj: «Kaʼalikil [maas] minaʼan in muukʼeʼ, [maas] muʼukʼaʼan in wuʼuyikimba» (xokaʼak 2 Corintoiloʼob 4:7-10 yéetel 12:10). Letiʼeʼ u yojel le kiliʼich muukʼoʼ ku yáantkoʼon teʼ kʼiinoʼob jach lubaʼan k-óoloʼ. Baʼaleʼ ¿baʼaxten tu yaʼalaj: «Ku kiʼimakchajal in wóol tu yoʼolal le x-maʼ muukʼiloʼ»? Tumen ken pʼáatak minaʼan u muukʼeʼ ku yilik bix u yáantaʼal tumen le kiliʼich muukʼoʼ. Toʼon xaneʼ jeʼel u páajtal k-ilik bix u yáantkoʼoneʼ (Rom. 15:13).
17. ¿Bix u yáantkoʼon le kiliʼich muukʼ utiaʼal ka kʼuchkoʼon teʼ kuxtal minaʼan u xuuloʼ?
17 Jeʼex túun k-ilkoʼ, jach kʼaʼabéettoʼon u yáantaj Dios utiaʼal u chúukpajal k-óol k-meyajt, jeʼex úuchik k-aʼaliktiʼ ka t-kʼubaj k-kuxtal tiʼoʼ. Toʼoneʼ beyoʼon jeʼex u capitanil upʼéel barco taak u kʼuchul tak teʼ kuxtal minaʼan u xuul, tuʼux jeʼel u páajtal k-meyajtik Jéeoba utiaʼal mantatsʼoʼ. Le iikʼ kun áantkoʼon utiaʼal k-kʼuchloʼ letiʼe kiliʼich muukʼoʼ. Baʼaleʼ kʼaʼabéet k-kaxtik le iikʼaʼ yéetel k-chaʼik u nuʼuktikoʼon. Toʼoneʼ maʼ k-kʼáat ka u bisoʼon u yiikʼal u kʼasaʼan yóokʼol kaab Satanasiʼ (1 Cor. 2:12). Yéetel u yáantaj le Biblia bey xan yéetel u yáantaj u kaajal Jéeobaeʼ, jeʼel u béeytal k-kʼuchul tak tuʼux ku yaʼalik Jéeobaoʼ.
18. ¿Baʼax kʼaʼabéet k-chʼaʼatuklik k-beetik, yéetel baʼaxten?
18 ¿Tsʼoʼok wa u xáantal joʼopʼok a xook yéetel u j-jaajkunajoʼob Jéeoba yéetel a bin teʼ muchʼtáambaloʼoboʼ, baʼaleʼ maʼ a kʼub a kuxtal tiʼ Jéeoba yéetel maʼ okjaʼanakechiʼ? Wa tsʼoʼokeʼ, maʼalob ka tukult baʼaxten maʼ okjaʼanakechiʼ. Wa ka naʼatik bix u yáantaj le kiliʼich muukʼ utiaʼal u béeykuntik Jéeoba baʼax u yaʼalmaj u beetik yéetel wa ka tsʼáaik nib óolal tiʼeʼ, kʼub a kuxtal tiʼ utiaʼal a meyajtik. Jéeobaeʼ yaan u yáantkech utiaʼal ka xiʼiktech utsil. Yaan u tsʼáaiktech u kiliʼich muukʼ. Baʼaleʼ wa úuch okjaʼanakecheʼ, maʼ xaaneʼ tsʼoʼok a wilik bix u yáantkech Dios yéetel u kiliʼich muukʼ. Le áantajaʼ jeʼel u páajtal a kʼamik mantatsʼeʼ. Le oʼolaleʼ, maʼ u xuʼulul a chaʼik u nuʼuktaʼal a kuxtal tumen le kiliʼich muukʼoʼ.
¿T-naʼataj wa le tʼaanoʼobaʼ?
• ¿Baʼax u kʼáat u yaʼal «[k-kuxtal] jeʼel bix [u] yaʼalik le kiliʼich [muukʼoʼ]»?
• ¿Baʼax jeʼel u yáantkoʼon utiaʼal maʼ u xuʼulul «[k-kuxtal] jeʼel bix [u] yaʼalik le kiliʼich [muukʼoʼ]»?
• ¿Bix jeʼel k-tsʼoʼokbesik le baʼax t-aʼalaj tiʼ Jéeoba le ka t-kʼubaj k-kuxtal tiʼoʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 15]
Unaj k-tsʼáaik k-óol péeks u luʼumil k-puksiʼikʼal
[U tsolajil le oochel teʼ táan juʼun 17]
¿K-chaʼik wa u nuʼuktik k-kuxtal u kiliʼich muukʼ Dios?