Tsʼaʼab u yokjaʼob tu kʼaabaʼ le Taataoʼ, le Paaloʼ yéetel le kiliʼich muukʼoʼ
Tsʼaʼab u yokjaʼob tu kʼaabaʼ le Taataoʼ, le Paaloʼ yéetel le kiliʼich muukʼoʼ
«Xeeneʼex túun [...] ka a beeteʼexoʼob kaambaloʼob; yéetel tsʼaʼex u yokjaʼob tu kʼaabaʼ le Taataoʼ, le Paaloʼ yéetel le kiliʼich muukʼoʼ.» (MAT. 28:19, NM)
1, 2. 1) ¿Baʼax úuch tu kaajil Jerusalén teʼ Pentecostés tiʼ u jaʼabil 33 tiʼ le yáax siglooʼ? 2) ¿Baʼax péeks yaʼabach máakoʼob utiaʼal ka okjaʼanakoʼob?
UPʼÉEL kʼiin tiʼ u jaʼabil 33 tiʼ le yáax siglooʼ, u kaajil Jerusaleneʼ jach chochoʼkil. Tsʼoʼok u kʼuchul yaʼabach máakoʼob tiʼ jejeláas luʼumiloʼob utiaʼal u kʼiimbesajil le Pentecostesoʼ. Baʼaleʼ teʼ kʼiimbesajaʼ úuch upʼéel baʼal mix utéen ilaʼak, ka tsʼoʼokeʼ apóstol Pedroeʼ tu máansaj upʼéel jatsʼuts tsoltʼaan. Le baʼax tu yaʼaloʼ kʼuch tu puksiʼikʼal yaʼab tiʼ le máaxoʼob uʼuyoʼ, bey túunoʼ kex tres mil judíoʼob yéetel uláakʼ máakoʼob maʼ judíoʼobeʼ arrepentirnajoʼobeʼ ka okjaʼanajoʼob, ka ookoʼob ichil le túumben múuchʼuliloʼ (Hch. 2:41). Chéen máans ta tuukul bix úuchik u chuʼupul le tuʼuxoʼob tsʼaʼab u yokjaʼ le bukaʼaj máakoʼoboʼ.
2 ¿Baʼax le úuch mix utéen ilaʼak péeks le yaʼabkach máakoʼob okjaʼoʼ? Le Bibliaoʼ ku yaʼalikeʼ táanil tiʼ lelaʼ uʼuyaʼab «jumpʼéel kʼaʼam juum», ka tsʼoʼokeʼ le ciento veinte disipuloʼob yanoʼob tu kaʼapʼéel pisoi upʼéel najoʼ chuʼupoʼob yéetel kiliʼich muukʼ. Le xiiboʼob yéetel le koʼoleloʼob tu natsʼuba u yiloʼob le baʼax úuchoʼ jaʼakʼ u yóoloʼob ka tu yuʼuboʼob le disipuloʼoboʼ táan u «tʼaanoʼob ichil jejeláas tʼaanoʼob». Ka tsʼoʼokeʼ Pedroeʼ tu máansaj upʼéel tsoltʼaan tuʼux tu yaʼalaj letiʼob beet u kíimsaʼal Jesús. Le máaxoʼob uʼuyoʼ «yaachaj u yóol u puksiʼikʼaloʼob», ka tu kʼáatoʼob baʼax unaj u beetkoʼob, Pedro túuneʼ tu yaʼalajtiʼob: «Kʼex a tuukuleʼex tu táan [...] Jajal Dios, yéetel okjaʼaneneʼex tu jujuntúulileʼex tu kʼaabaʼ Jesucristo, bey túunoʼ [...] bíin u tsʼáateʼex xan le kiliʼich muukʼoʼ» (Hch. 2:1-4, 36-38).
3. ¿Baʼax tu beetaj le judíoʼob bey xan le maʼ judíoʼob tu kʼiinil le Pentecostesoʼ?
3 Koʼoneʼex jáan tuukul tiʼ le judíoʼob yéetel tiʼ le maʼ judíoʼob uʼuy le baʼax tu yaʼalaj Pedrooʼ. Yoʼolal u religionoʼobeʼ ku yilkoʼob Jéeoba bey u Diosoʼobeʼ. Tsʼoʼoleʼ yéetel u yáantaj le Kiliʼich Tsʼíiboʼob ich Hebreooʼ, u yojloʼob letiʼe kiliʼich muukʼ meyajnaj tiʼ Dios utiaʼal u beetik tuláakal baʼax yaan way Luʼumeʼ bey xan u maasil baʼaxoʼob u beetmoʼ (Gén. 1:2; Jue. 14:5, 6; 1 Sam. 10:6; Sal. 33:6). Baʼaleʼ yaan uláakʼ baʼax unaj u beetkoʼob. Unaj u kʼamikoʼob Jesús bey letiʼ le Mesías tsʼaʼan tumen Dios utiaʼal u tsʼáaik salvacionoʼ. Le oʼolal Pedroeʼ tu yaʼalajtiʼob kʼaʼabéet u yokjaʼob «tu kʼaabaʼ Jesucristo». Le maʼ úuch kaʼa kuxlakoʼoʼ, tu yaʼalaj tiʼ le apostoloʼob ka u tsʼaʼob u yokjaʼ le máakoʼob «tu kʼaabaʼ le Taataoʼ, le Paaloʼ yéetel le kiliʼich muukʼoʼ» (Mat. 28:19, 20, NM). Koʼoneʼex ilik bix beetaʼabik le baʼax tu yaʼalaj Jesús teʼ yáax siglooʼ yéetel bix u beetaʼal teʼ kʼiinoʼobaʼ.
Tu kʼaabaʼ le Taataoʼ
4. ¿Baʼax tu beetaj Dios yéetel u kaajil Israel?
4 Jeʼex tsʼoʼok k-ilkoʼ, le máaxoʼob uʼuy le tsoltʼaan tu máansaj Pedrooʼ, ku meyajtkoʼob kaʼach Jéeoba yéetel ku biskubaʼob tu yéetel. Tsʼoʼoleʼ ku yilik u beetkoʼob le baʼax ku yaʼalik le Leyoʼ. Yaʼab tiʼ le máaxoʼob bijaʼanoʼob tu kaajil Jerusalenoʼ bijaʼanoʼob utiaʼal u tsʼoʼokbeskoʼob le baʼax ku yaʼalik le Leyoʼ (Hch. 2:5-11). Baʼaleʼ Dioseʼ xuʼul u kʼamik u kaajil Israel bey u kaajaleʼ. Le oʼolal xuʼul u kʼamik le máaxoʼob beetik chéen le baʼaxoʼob ku yaʼalik le Leyoʼ (Mat. 21:43; Col. 2:14). Bey túunoʼ wa letiʼob u kʼáatoʼob ka seguernak u biskubaʼob yéetel Jéeobaeʼ yaan uláakʼ baʼax kʼaʼabéet u beetkoʼob.
5, 6. ¿Baʼax tu beetaj yaʼab máakoʼob teʼ yáax siglo utiaʼal u natsʼkubaʼob yiknal Diosoʼ?
5 Letiʼobeʼ maʼ unaj u náachtaloʼob tiʼ Jéeobaiʼ tumen letiʼ tsʼaamil u kuxtaloʼob (Hch. 4:24). Tsʼoʼoleʼ yaan u páajtalil u maas naʼatkoʼob bukaʼaj nojchil u yaabilaj Dios. Letiʼeʼ tu túuxtaj le Mesías utiaʼal u salvart yéetel u perdonart u kʼeeban le máaxoʼob aʼalaʼab tumen Pedro tsʼoʼok u yojéeltkoʼob yéetel «x-maʼ kaʼapʼéel óolalil le Jesús [le] máax [...] [tu kíimsoʼob yéetel] beetaʼab Yuumtsil yéetel Cristo tumen Jajal Dios[oʼ]». Le máaxoʼob beet le baʼax tu yaʼalaj Pedrooʼ jach yaan baʼax oʼolal u tsʼáaikoʼob nib óolal tiʼ Jéeoba yoʼolal le baʼaxoʼob tsʼoʼok u beetik utiaʼal u natsʼkuba máak tu yiknaloʼ (Hch. 2:32-35).
6 Le máakoʼob teʼ kʼiinoʼob jeʼeloʼ tu naʼatoʼobeʼ utiaʼal ka béeyak u natsʼkubaʼob tiʼ Jéeobaeʼ kʼaʼabéet u kʼamkoʼob Jesús, le máax tsʼaʼan tumen Jéeoba utiaʼal u tsʼáaik salvacionoʼ. Le oʼolal kʼaʼabéetchaj u arrepentiroʼob tiʼ baʼaxoʼob u beetmoʼob, maʼ xaaneʼ tak tiʼ úuchik u táakpajloʼob utiaʼal u kíimsaʼal Jesús. Tsʼoʼoleʼ unaj u kʼamkoʼob «le baʼax ku kaʼansikoʼob le apostoloʼoboʼ» (Hch. 2:42). Jeʼex túun k-ilkoʼ yantiʼob u páajtalil u natsʼkubaʼob «yéetel kʼub óolal tu táan u jalaʼach kʼáancheʼ u siibal utsil Jajal Dios» (Heb. 4:16).
7. ¿Baʼax tu beetaj yaʼab máakoʼob táanil tiʼ u yokjaʼob tu kʼaabaʼ le Taataoʼ?
7 Bejlaʼeʼ u millonesi xiiboʼob yéetel koʼoleloʼob tiʼ jejeláas kaajoʼobeʼ, tsʼoʼok u kʼuchul u kʼaj óoltoʼob u jaajil yoʼolal Jéeoba ikil u xokkoʼob le Bibliaoʼ (Isa. 2:2, 3). Yanoʼob kaʼacheʼ maʼatech u creertikoʼob Dios, yanoʼob xaneʼ ku creertikoʼob, baʼaleʼ ku tuklikoʼobeʼ maʼatech u beetik u cuentai baʼax ku yúuchultoʼon, baʼaleʼ kʼuch u naʼatoʼobeʼ yaan utúul Máax beet tuláakal baʼal yéetel jeʼel u páajtal u biskubaʼob tu yéeteleʼ. Yanoʼobeʼ ku creertikoʼob kaʼach le Trinidadoʼ wa ku adorartkoʼob imagenoʼob, baʼaleʼ tu kanoʼobeʼ chéen tiʼ Jéeoba yaan tuláakal páajtalil, ka káaj u tʼankoʼob tu kʼaabaʼ. Leloʼ le áantoʼob utiaʼal u beetkoʼob le baʼax tu yaʼalaj Jesusoʼ yéetel u yokjaʼob tu kʼaabaʼ le Taataoʼ.
8. ¿Baʼax tsʼoʼok u naʼatik le máaxoʼob maʼ u yojloʼob kaʼach u jaajil yoʼolal le kʼebanoʼ?
8 Tu kanoʼob xaneʼ tuláakal máak kʼebanchajaʼan yoʼolal le baʼax tu beetaj Adanoʼ (Rom. 5:12). Utiaʼal k-naʼatik le bix yaniloʼob kaʼachoʼ, tuukulnakoʼon tiʼ utúul máak maʼ u yojel wa yaan upʼéel talam kʼojaʼanil tiʼiʼ. Maʼ xaaneʼ ku jáan kʼiʼinam wa baʼax tu wíinklil wa ku jáan uʼuyikuba maʼ maʼalobiʼ, baʼaleʼ tumen maʼ xiʼik yiknal utúul doctoreʼ, ku tuklik mix baʼal yantiʼ. Baʼaleʼ ken xiʼikeʼ ku yilaʼaleʼ yaan upʼéel talam kʼojaʼanil tiʼ (ket yéetel 1 Corintoiloʼob 4:4). ¿Máasaʼ unaj u kaxtik tuʼux jeʼel u páajtal u tsʼaʼakal yéetel ka u beet le baʼax kun aʼalbiltiʼoʼ? Lelaʼ bey xan u yúuchul yéetel le máaxoʼob tsʼoʼok u naʼatkoʼob tuláakal máak kʼebanchajaʼanoʼ. Ku creertikoʼob le baʼax ku yaʼalik le Bibliaoʼ yéetel tsʼoʼok u naʼatkoʼob chéen Dios jeʼel u páajtal «u tsʼakikoʼob» wa u luʼsik le kʼeban yantiʼoboʼ. Bey túunoʼ tuláakal le máaxoʼob náach yaniloʼob tiʼ le Taataoʼ unaj u natsʼkubaʼob tu yiknal utiaʼal ka tsʼaʼakakoʼob (Efe. 4:17-19).
9. ¿Baʼax tsʼoʼok u beetik Jéeoba utiaʼal ka béeyak k-bisikba tu yéetel?
9 Wa tsʼoʼok k-kʼubik k-kuxtal tiʼ Jéeoba yéetel wa tsʼoʼok k-okjaʼeʼ, tsʼoʼok k-naʼatik bukaʼaj jaʼtsil u biskuba máak yéetel Jéeoba, k-Taata yaan teʼ kaʼanoʼ, yéetel tsʼoʼok k-kʼuchul k-naʼat jach u yaabiltmoʼon (xokaʼak Romailoʼob 5:8). Kex Adán yéetel Eva tu beetoʼob baʼax maʼ utstutʼaaneʼ, letiʼeʼ tu tsʼáaj u páajtalil utiaʼal k-bisikba tu yéetel. Baʼaleʼ utiaʼal u béeytal lelaʼ jach muʼyajnaji, tumen tu yilaj u sen muʼyaj yéetel u kíimil u Hijo. K-ojéeltik lelaʼ ku péekskoʼon k-maas yaabilte. Le yaabilajaʼ ku péekskoʼon xan yantal yáanal u páajtalil yéetel ka k-beet baʼax ku yaʼalik. ¿Kux túun teech? ¿Tsʼoʼok wa a kʼubik a kuxtal tiʼ Jéeoba yéetel tsʼoʼok wa a wokjaʼ? Jeʼex tsʼoʼok k-ilkoʼ, jach unaj u beetik máak.
Tu kʼaabaʼ le Paaloʼ
10, 11. 1) ¿Baʼax unaj k-beetik yoʼolal le baʼax tu beetaj Jesús t-oʼolaloʼ? 2) ¿Bix a wuʼuyikaba ikil a wojéeltik Jesuseʼ tu tsʼáaj u kuxtal utiaʼal u salvartikoʼon?
10 Tuukulnakoʼon tu kaʼatéen tiʼ le tsoltʼaan tu máansaj Pedrooʼ. Letiʼeʼ tu yaʼaleʼ kʼaʼabéet u kʼamik máak Jesús, tumen yaan baʼax u yil yéetel u yokjaʼ máak «tu kʼaabaʼ [...] le Paaloʼ». ¿Baʼaxten unaj u beetaʼal úuchjeakil bey xan bejlaʼeʼ? Tumen u kʼamik máak Jesús yéetel u yokjaʼ tu kʼaabaʼeʼ ku yeʼesik ku naʼatik chéen bey jeʼel u páajtal u biskuba yéetel le Máax beetmil tuláakal baʼaloʼ. Tuukulnakoʼon tiʼ le utsiloʼob tu taasaj le úuchik u kíimil teʼ cheʼoʼ. Yáaxeʼ tu salvartoʼon «tiʼ u loolobtʼaanil le aʼalmajtʼaan» tsʼaʼan kaʼach tiʼ le judíoʼoboʼ (Gal. 3:13). Tsʼoʼoleʼ tu tsʼáaj le boʼol kʼaʼabéet utiaʼal u jáalkʼabtaʼal tuláakal máak tiʼ le kʼebanoʼ (Efe. 2:15, 16; Col. 1:20; 1 Juan 2:1, 2). Utiaʼal lelaʼ jach muʼyajnaji, aʼalaʼab baʼaloʼob tu contra, jaʼajaʼatsʼaʼabi yéetel kíimsaʼabi. ¿Ka tsʼáaik wa u nib óolalil tiʼ Jesús yoʼolal le nojoch baʼax tu beetoʼ? Utiaʼal k-maas naʼatik le baʼax tu beetoʼ, koʼoneʼex tʼaan tiʼ upʼéel baʼax úuchi: tu jaʼabil 1912, utúul paal yaan 12 jaʼaboʼob tiʼeʼ tiaʼan kaʼach ichil le barco ku kʼaabaʼtik Titanicoʼ. * Baʼaleʼ le nojoch barcooʼ tu jatsʼuba tiʼ upʼéel nojoch hielo yaan ichil le jaʼoʼ ka káaj u búulul. Le chan paaloʼ tu yóotaj naʼakal tiʼ upʼéel bote salvavidas, baʼaleʼ maʼ yanchaj tuʼuxiʼ. Utúul tiʼ le máaxoʼob yanoʼoboʼ tu tsʼuʼutsʼaj u yatan utiaʼal u despedirkuba tiʼ, ka líikʼeʼ ka tu kukíintaj le chan paal tuʼux kulukbal kaʼachoʼ. Wa teech kaʼach le chan paaloʼ, ¿bix jeʼel a wuʼuykabaeʼ? ¿Máasaʼ jach yaan a tsʼáaik u diosboʼotikil tiʼ le máax beetoʼ? Jesuseʼ maas nojoch le baʼax tu beetaj ta woʼolaloʼ, letiʼeʼ tu tsʼáaj u kuxtal utiaʼal ka páatak a kuxtal minaʼan u xuul, maʼ chéen utiaʼal ka kuxlakech wa jaypʼéel jaʼaboʼobiʼ.
11 ¿Bix ta wuʼuyilaba le ka ta kanaj le baʼax tu beetaj Jesús ta woʼolaloʼ? (Xokaʼak 2 Corintoiloʼob 5:14, 15.) ¿Máasaʼ jach kiʼimakchaj a wóol? Maʼ xaaneʼ le péeksech a kʼub a kuxtal tiʼ Jéeoba yéetel utiaʼal ka kuxlakech yoʼolal le «máax kíim yéetel kaʼa púut kuxlaj» ta woʼolaloʼ. U yokjaʼ máak tu kʼaabaʼ le Paaloʼ u kʼáat u yaʼaleʼ u tsʼáaik u fe tiʼ u kuxtal tu tsʼáaj tu yoʼolal tuláakal máakoʼ yéetel u tsʼáaikuba máak yáanal u páajtalil «le máax ku tsʼáaik kuxtaloʼ» (Hch. 3:15; 5:31). Táanil tiʼ k-okjaʼeʼ maʼatech k-bisikba yéetel Jéeoba yéetel maʼatech k-páaʼtik kʼamik le kuxtal minaʼan u xuuloʼ. Baʼaleʼ bejlaʼeʼ, yoʼolal le fe k-tsʼáaik tiʼ u kʼiʼikʼel Jesusoʼ ku páajtal k-bisikba yéetel Jéeoba (Efe. 2:12, 13). Jeʼex aʼalaʼabik tumen Pabloeʼ: «Teʼex kaʼacheʼ táanxel luʼumileʼex yéetel enemigoʼex tiʼ Jajal Dios [...], tu yoʼolal le baʼaloʼob kʼaastak ka beetikeʼex kaʼachoʼ; baʼaleʼ beoraaʼ Jajal Dioseʼ tsʼoʼok u tsʼáaikeʼex tiʼ jéetsʼel óolal tu yéetel, tu yoʼolal le kíimil tu mukʼyajtaj Cristo tiʼ u luʼumkabil wíinkliloʼ. Lelaʼ tu beetajeʼ utiaʼal u tsʼáaikeʼex tu táaneʼ bey máaxeʼex jach a kʼubmaj a wóoleʼexeʼ, minaʼanteʼex kʼaasil mix siʼipil» (Col. 1:21, 22).
12, 13. Wa tsʼoʼok k-okjaʼ tu kʼaabaʼ le Paaloʼ, 1) ¿baʼax unaj k-beetik ken aʼalaʼaktoʼon baʼal?, 2) ¿Baʼax uláakʼ unaj k-beetik?
12 Kex tsʼoʼok k-okjaʼ tu kʼaabaʼ le Paaloʼ k-ojel yaan kʼiineʼ jeʼel k-beetik baʼax maʼ maʼalobeʼ. K-ojéeltik lelaʼ ku yáantkoʼon utiaʼal k-kanáantik bix k-kuxtal sáamsamal. ¿Baʼax unaj u beetik utúul máax meyajtik Dios wa ku yaʼalaʼal baʼal tiʼ tumen wa máax? Unaj u kʼaʼajskeʼ letiʼ yéetel le máax aʼalik baʼal tiʼoʼ kʼebanoʼob, le oʼolal kʼaʼabéet u perdonartaʼaloʼob yéetel u kankoʼob perdonar (Mar. 11:25). Jesuseʼ bey tu yeʼesil le ka tu yaʼalaj tiʼ upʼéel kettʼaan utúul máakeʼ tu perdonartaj sesenta millones denarios (diez mil talentos) pʼaxaʼan tiʼ tumen utúul u palitsil. Baʼaleʼ le palitsilaʼ maʼ tu yóotaj u perdonar cien denarios pʼaxaʼan tiʼ tumen uláakʼ utúul palitsiliʼ. Yéetel lelaʼ Jesuseʼ táan u kaʼansikeʼ wa maʼ k-perdonartik k-sukuʼunoʼobeʼ, Jéeobaeʼ maʼ ken u perdonartoʼon xan (Mat. 18:23-35). Le máaxoʼob ku yokjaʼob tu kʼaabaʼ le Paaloʼ maʼ chéen ku tsʼáaikubaʼob yáanal u páajtaliliʼ, baʼaxeʼ ku yilik u kuxtaloʼob jeʼex kuxlajikoʼ yéetel ku perdonartkubaʼob jeʼex kaʼansaʼabik tiʼoboʼ (1 Ped. 2:21; 1 Juan 2:6).
13 Kex kʼebanoʼon yéetel maʼ tu béeytal k-beetik jach jeʼex beetaʼabik tumen Jesuseʼ, unaj k-beetik tuláakal le ku páajtal utiaʼal k-tsʼáaik ichil k-kuxtal le baʼaxoʼob tu yaʼaloʼ utiaʼal u béeytal k-tsʼoʼokbesik le baʼax t-aʼalaj tiʼ Jéeoba le ka t-kʼubaj k-kuxtal tiʼoʼ. Le oʼolal sáamsamal unaj k-ilik náachtal tiʼ baʼaloʼob maʼ maʼalobtakiʼ, yéetel k-ilik k-beetik baʼaloʼob maʼalobtak (xokaʼak Efesoiloʼob 4:20-24). U suukaʼanileʼ, k-beetik le baʼaxoʼob k-ilik u beetaʼal tumen le máax yéetel k-bisikbaoʼ. Le oʼolal maas unaj k-kaambal tiʼ Cristo yéetel k-beetik jeʼex tu beetiloʼ
14. ¿Bix uláakʼ jeʼel k-eʼesik k-tsʼáaikba yáanal u páajtalil Jesús, le máax tsʼaʼan u beet u Reyiloʼ?
14 Uláakʼ bix jeʼel k-eʼesik tsʼoʼok k-naʼatik baʼax táakaʼan ichil u yokjaʼ máak tu kʼaabaʼ le Paaloʼ, letiʼe ka k-creert Dioseʼ «tu tsʼáaj tuláakal baʼal yáanal u yook Cristo, yéetel Cristoeʼ tsʼaʼab tiʼ le [múuchʼuliloʼ] jeʼel bix u pool tuláakal baʼaleʼ» (Efe. 1:22). Lelaʼ u kʼáat u yaʼaleʼ unaj k-uʼuyik u tʼaan le máaxoʼob nuʼuktikoʼonoʼ. Tiʼ cada upʼéel múuchʼulileʼ u tsʼaamaj ancianoʼobiʼ, letiʼobeʼ kex kʼebanoʼobeʼ ku yilik u beetkoʼob baʼax utstutʼaan Dios. Letiʼobeʼ tsʼaʼanoʼob tumen Cristo utiaʼal u yáantkoʼob «le máaxoʼob utiaʼaloʼoboʼ utiaʼal ka meyajnakoʼob, utiaʼal ka chʼíijik u wíinklil Cristo» (Efe. 4:11, 12). Wa utúul tiʼ letiʼob ku beetik baʼax maʼ maʼalobeʼ, Jesús, le Rey yéeyaʼanoʼ, yaan u yutskíintik teʼ súutukil ku tuklik maas maʼaloboʼ. ¿K-creertik wa jach tu jaajil yaan u beetik?
15. ¿Baʼax utsiloʼob ku yaʼalik le Biblia ken u kʼam le máaxoʼob ku yokjaʼoboʼ?
15 Jeʼex tsʼoʼok k-ilkoʼ, yaan máaxoʼob maʼ u kʼub u kuxtaloʼob tiʼ Jéeobaiʼ yéetel maʼ okjaʼanakoʼobiʼ. Wa maʼ a beeteʼ, maʼ xaaneʼ le baʼaxoʼob tsʼoʼok k-ilkoʼ jeʼel u yáantkech a naʼat baʼaxten maʼalob ka okjaʼanakech tu kʼaabaʼ le Paaloʼ. Beyoʼ ka weʼesik jach nojoch baʼal a wilik le baʼax tu beetaj Jesusoʼ, wa ka beetik beyoʼ yaan a kʼamik yaʼab utsiloʼob (xokaʼak Juan 10:9-11).
Tu kʼaabaʼ le kiliʼich muukʼoʼ
16, 17. ¿Baʼax u kʼáat u yaʼal u yokjaʼ máak tu kʼaabaʼ le kiliʼich muukʼoʼ?
16 ¿Baʼax u kʼáat u yaʼal u yokjaʼ máak tu kʼaabaʼ le kiliʼich muukʼoʼ? Jeʼex t-ilaj tu káajbal le xookaʼ, le máaxoʼob uʼuy le baʼax tu yaʼalaj Pedro tu kʼiinil le Pentecostesoʼ u yojloʼob baʼax le kiliʼich muukʼoʼ. Tsʼoʼoleʼ tu yiloʼobeʼ Pedro yéetel uláakʼ disipuloʼoboʼ «chuʼupoʼob yéetel kiliʼich muukʼeʼ, ka joʼopʼ u tʼaanoʼob ichil jejeláas tʼaanoʼob» (Hch. 2:4, 8). Yaan máaxeʼ ku yaʼalikeʼ le ken aʼalaʼak «tu kʼaabaʼ [...] le kiliʼich muukʼoʼ» ku tsʼáaik naʼatbileʼ táan u tʼaan tiʼ utúul máak, baʼaleʼ maʼ jaaj le baʼax ku yaʼalikoʼobaʼ. Jeʼex yaan kʼiineʼ ku yaʼalaʼal yaan u beetaʼal upʼéel wa baʼax «tu kʼaabaʼ le gobiernooʼ», baʼaleʼ leloʼ maʼatech u tsʼáaik naʼatbil wa le gobiernooʼ utúul máak, lelaʼ bey xan u yúuchul yéetel le kiliʼich muukʼoʼ. Tuláakal le máaxoʼob ku yokjaʼob tu kʼaabaʼoʼ tsʼoʼok u naʼatikoʼob maʼ utúul máakiʼ, baʼaxeʼ u muukʼil u meyaj Dios, yéetel tsʼoʼok u naʼatikoʼob bix u meyaj tiʼ utiaʼal u béeykuntik baʼaxoʼob ku yaʼalik.
17 Yéetel u yáantaj le Bibliaoʼ tsʼoʼok k-naʼatik baʼax le kiliʼich muukʼoʼ. Tsʼoʼok k-kanikeʼ letiʼe kiliʼich muukʼ meyajnaj tiʼ Dios utiaʼal u tsʼíibtaʼal le Bibliaoʼ (2 Tim. 3:16). Jeʼex úuchik u bin k-maas kaambaleʼ, bey úuchik u bin k-maas naʼatik le baʼax tu yaʼalaj Jesusaʼ: «A Taataʼex yaan teʼ kaʼanoʼ bíin u tsʼáa le kiliʼich [muukʼ] tiʼ le máaxoʼob kʼáatik tiʼeʼ» (Luc. 11:13). Maʼ xaaneʼ tsʼoʼok k-ilik bix u yáantkoʼon ichil k-kuxtal. ¿Kux túun wa maʼ okjaʼanakech tu kʼaabaʼ le kiliʼich muukʼoʼ? Kʼaʼajaktecheʼ wa ka beetkeʼ yaan a wilik u béeytal le baʼax tu yaʼalaj Jesusoʼ, yaan a kʼamik le kiliʼich muukʼoʼ bey xan yaʼab utsiloʼob.
18. ¿Baʼax utsiloʼob ku kʼamik le máaxoʼob ku yokjaʼob tu kʼaabaʼ le kiliʼich muukʼoʼ?
18 Jach chíikaʼan u yilaʼaleʼ Jéeobaeʼ táan u nuʼuktik u kaajal, jeʼex tu beetil úuchjeakiloʼ. Le kiliʼich muukʼ xanoʼ ku nuʼuktik cada utúul máax meyajtik Dios sáamsamal. Tumen tsʼoʼok k-okjaʼ tu kʼaabaʼeʼ, unaj k-eʼesik jach nojoch baʼal k-ilik le bix u yáantkoʼon ichil k-kuxtaloʼ, yéetel unaj k-chaʼik u nuʼuktikoʼon. Teʼ tuláakʼ xookoʼ yaan k-ilik baʼax unaj k-beetik utiaʼal maʼ u xuʼulul k-meyajtik Dios yéetel bix jeʼel u yáantkoʼon le kiliʼich muukʼ utiaʼal u béeytal k-beetkoʼ.
[Tsolajiloʼob]
^ xóot’ol 10 Ilaʼak ¡Despertad! 22 tiʼ abril tiʼ 1982, táan juʼun 3 tak 8.
¿Kʼajaʼan wa tech?
• ¿Baʼax u kʼáat u yaʼal u yokjaʼ máak tu kʼaabaʼ le Taataoʼ?
• ¿Baʼax u kʼáat u yaʼal u yokjaʼ máak tu kʼaabaʼ le Paaloʼ?
• ¿Bix jeʼel k-eʼesik k-naʼatik baʼax u kʼáat u yaʼal u yokjaʼ máak tu kʼaabaʼ le Taata yéetel tu kʼaabaʼ le Paaloʼ?
• ¿Baʼax u kʼáat u yaʼal u yokjaʼ máak tu kʼaabaʼ le kiliʼich muukʼoʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 10]
Chaʼab u jóoʼsaʼal tumen u Museoi Israel (Jerusalén)
[U tsolajil le oochel teʼ táan juʼun 10]
¿Baʼax úuch teʼ Pentecostés tiʼ u jaʼabil 33 tiʼ le yáax siglooʼ?