¿Kʼajaʼan wa tech?

¿Ta xokaj wa u tsʼook revistailoʼob U Pʼíich Tulumil Kanan maʼ sen úuch jóoʼsaʼakoʼoboʼ? Wa beyoʼ, ilawil wa jeʼel a núukik le kʼáatchiʼobaʼ:

• ¿Baʼaxten kʼaʼabéetchaj u kíimil le Mesíasoʼ?

Upʼéel baʼax oʼolaleʼ utiaʼal u yeʼesikeʼ utúul máax minaʼan kʼeban tu wíinklileʼ jeʼel u páajtal u chúukpajal u yóol u beet baʼax ku yaʼalik Dios kex ka sen muʼyajnakeʼ. Uláakʼ baʼax oʼolaleʼ utiaʼal u jáalkʼabtikoʼon tiʼ le kʼeban tu máansajtoʼon Adanoʼ yéetel utiaʼal u yantaltoʼon u páajtalil k-kʼamik le kuxtal minaʼan u xuuloʼ (15/12, táan juʼun 22, 23).

• ¿Baʼax táakaʼan ichil u tsikbal máak yéetel u paalal?

Maʼ chéen u tʼaan máak tu yéeteloʼobiʼ. Baʼaxeʼ unaj u beetaʼal kʼáatchiʼtiʼob yéetel u yuʼubaʼal bix ken u núukiloʼob. Yaʼab taatatsiloʼobeʼ tsʼoʼok u yilkoʼobeʼ tu yorai le jaanloʼ jach ku tsʼáaik tuʼux u tsikbaloʼob yéetel u paalaloʼob (15/1, táan juʼun 18, 19).

• ¿Baʼax jeʼel u beetik u tuklik máak unaj u kaʼa okjaʼeʼ?

Maʼalob ka u tukult u kaʼa okjaʼ máak wa ka okjaʼanajeʼ láayliʼ táan u beetik baʼax maʼ maʼalobeʼ wa maʼ tu yaʼalaj wa yaan baʼax maʼ maʼalob u beetmaj jeʼel tak u beetik u jóoʼsaʼal kaʼach ichil u kaajal Jéeobaeʼ (15/2, táan juʼun 22).

• Tu kettʼaanil le trigo yéetel le cizañaoʼ, ¿baʼax ku chíikbesik le u paʼakʼal le maʼalob semillaoʼ?

Jesucristo, le u Paal Máakoʼ, káaj u meyajtik u luʼumil tuʼux kun paakʼáal le ka kʼaʼaytajnaj way Luʼumoʼ. Desde teʼ Pentecostés tiʼ u jaʼabil 33 tiʼ le yáax siglooʼ káaj u pakʼik le maʼalob semilla ikil u yéeyik bey u paalal Dios le máaxoʼob ku yaʼalaʼaltiʼob «u paalaloʼob le reinooʼ» (15/3, táan juʼun 20).

• ¿Baʼax u kʼáat u yaʼal u yoksaʼal teʼ chʼiil le trigo tu yaʼalaj Jesús teʼ kettʼaanoʼ? (Mat. 13:30.)

Jeʼel u páajtal u yaʼalaʼaleʼ tu maas yaʼabil u jaʼabiloʼob u tsʼook kʼiinil le kʼasaʼan yóokʼol kaabaʼ táan u yoksaʼal le trigo teʼ chʼiiloʼ. Tumen u paalal le reino, wa le sukuʼunoʼob yéeyaʼanoʼob utiaʼal u binoʼob kaʼanoʼ, ku yoksaʼaloʼob ichil u kaajal Jéeoba wa ken kaʼa kuxkíintaʼakoʼob teʼ kaʼanoʼ (15/3, táan juʼun 22).

• ¿Máax aʼal baʼax libroiloʼob kun oksbil ichil le Kiliʼich Tsʼíiboʼob ich Griegooʼ?

Le u yilaʼal baʼax libroiloʼob kun tsʼaabil teʼ Nuevo Testamentooʼ, maʼ ilaʼab tumen u maas nojchil le religionoʼoboʼ mix tumen chéen utúul máakiʼ. Le Bibliaoʼ ku yaʼalikeʼ le espíritu santooʼ tu tsʼáaj «jejeláas páajtalil» tiʼ le yáax cristianoʼoboʼ. Lelaʼ tu tsʼáaj u páajtalil utiaʼal u yilkoʼob baʼax kaʼansajil ku taal tiʼ Dios yéetel baʼax maʼ (1 Cor. 12:4; 1/4, táan juʼun 27, 28).