Le bix u meyaj le kiliʼich muukʼ tiʼ Jéeoba utiaʼal u béeykuntik baʼax ku yaʼalikoʼ
Le bix u meyaj le kiliʼich muukʼ tiʼ Jéeoba utiaʼal u béeykuntik baʼax ku yaʼalikoʼ
«Le tʼaan ku jóokʼol tin chiʼoʼ [...], bíin xan u tsʼoʼokbes baʼax kin waʼalik.» (ISA. 55:11)
1. Aʼal u jelaʼanil le baʼax ku tuklik u beetik le kaʼatúul máakoʼoboʼ.
MÁANS ta tuukul kaʼatúul máakeʼ táan u listokíintik u cocheʼob utiaʼal u binoʼob tiʼ upʼéel viaje. Utúuleʼ ku tsʼíibtik jach tiʼ baʼax kaajiloʼob kun máan utiaʼal u kʼuchul tak tuʼux taak u binoʼ. Le uláakʼoʼ tsʼoʼok u chʼaʼatuklik xan tuʼux kun bin, baʼaleʼ u yojel wa ka úuchuk wa baʼaxeʼ, maʼ chéen upʼéeliliʼ bej jeʼel u bisik utiaʼal ka kʼuchkeʼ. Jeʼex túun k-ilkoʼ maʼ upʼéeliliʼ bix u tuukul le kaʼatúul máakoʼobaʼ, le yáax utúuloʼ chéen tiʼ upʼéeliliʼ bej ku tuklik u bin, baʼaleʼ le uláakʼ utúuloʼ ku tuklik baʼax uláakʼ bejiloʼob jeʼel u páajtal u bisik utiaʼal ka kʼuchuk teʼ tuʼux taak u binoʼ.
2, 3. 1) ¿Baʼax u tukulmaj Jéeoba u beetik, yéetel baʼax tu beetaj le ka kʼebanchaj Adán yéetel Evaoʼ? 2) ¿Baʼax unaj k-beetik utiaʼal k-ilik bix ken u béeykuntil Jéeoba le baʼax u tukulmoʼ?
2 Utiaʼal u beetik Jéeoba le baʼax u kʼáatoʼ, maʼatech u tuklik chéen upʼéel bix ken u béeykuntil, baʼaxeʼ ku yilik u beetik tuláakal baʼax kʼaʼabéet utiaʼal u béeykuntik (Efe. 3:11). Letiʼeʼ u kʼáat ka suʼutuk upʼéel Paraísoi tuláakal le Luʼumaʼ yéetel ka kuxlak máak utiaʼal mantatsʼ ich jeetsʼelil, kiʼimak óolal yéetel x-maʼ kʼebanil (Gén. 1:28). Baʼaleʼ ka kʼebanchaj Adán yéetel Evaeʼ, Jéeobaeʼ tu séebaʼanil tu tuklaj baʼax ken u beet utiaʼal u béeykuntik le baʼax u yaʼalmoʼ (xokaʼak Génesis 3:15). Tu yaʼaleʼ u kaajal yaan teʼ kaʼan ku keʼetel yéetel utúul atantsiloʼ, yaan u yantal utúul u «chʼiʼibal», wa u Hijo utiaʼal u xuʼulsik tiʼ Satanás, le máax beet u tsʼáaikuba le yáax máakoʼob tu contra Diosoʼ yéetel yaan u yutskíintik le baʼaxoʼob tu kʼaskúuntoʼ (Heb. 2:14; 1 Juan 3:8).
3 Minaʼan mix baʼal teʼ kaʼan mix way Luʼum jeʼel u beetik u pʼáatal maʼ u béeykuntik Jéeoba le baʼax u tukulmoʼ (Isa. 46:9-11). Le baʼax ku yaʼalikoʼ bíin «u tsʼoʼokbes[e]» (Isa. 55:10, 11). ¿Baʼaxten? Tumen yaan u meyaj tiʼ u kiliʼich muukʼ utiaʼal u béeykuntik. Utiaʼal ka yanaktoʼon le kuxtal minaʼan u xuuloʼ kʼaʼabéet k-ilik jach bix u bin u béeykuntik Jéeoba le baʼax u tukulmoʼ. Tsʼoʼoleʼ, ken k-il bix u meyaj tiʼ u kiliʼich muukʼeʼ ku maas muʼukʼaʼantal k-fe. Le oʼolaleʼ koʼoneʼex ilik le baʼaxoʼob tsʼoʼok u beetik yéetel u kiliʼich muukʼoʼ, le baʼaxoʼob táan u beetkoʼ bey xan le baʼaxoʼob ken u beet utiaʼal u béeykuntik le baʼax u tukulmoʼ.
Le baʼaxoʼob tu beetaj le kiliʼich muukʼ úuchjeakiloʼ
4. ¿Bix úuchik u bin u yaʼalik Jéeoba le baʼax u tukulmoʼ?
4 Úuchjeakileʼ Jéeobaeʼ jujumpʼíitil úuchik u bin u yaʼalik bix ken u béeykuntil le baʼax u tukulmoʼ. Tu káajbaleʼ tu pʼataj bey upʼéel «taʼakbil tuukul» máax le Chʼiʼibal aʼalaʼanoʼ (1 Cor. 2:7). Letiʼeʼ tu chaʼaj u máan dos mil jaʼaboʼob utiaʼal u kaʼa tʼaan tiʼ le Chʼiʼibaloʼ. Lelaʼ tu beetaj le ka tʼaanaj yéetel Abrahamoʼ (xokaʼak Génesis 12:7 yéetel 22:15-18). Letiʼeʼ tu yaʼalajtiʼ: «Bíin kiʼtʼantaʼakoʼob tu yoʼolal» «a chʼiʼibal», lelaʼ ku yeʼeskeʼ le máax aʼalaʼanoʼ yaan u taal tiʼ u chʼiʼibal Abraham. Satanaseʼ jach tu yuʼubaj le baʼax tu yaʼalaj Jéeobaaʼ, le oʼolal utiaʼal maʼ u béeytal le baʼax u tukulmoʼ tu yilaj u beetik tuláakal le ku páajtal utiaʼal u xuʼulsik tiʼ u chʼiʼibal Abrahamoʼ. Baʼaleʼ maʼ chaʼab tiʼ tumen le kiliʼich muukʼoʼ. ¿Bix úuchik u beetik?
5, 6. ¿Bix meyajnajik tiʼ Jéeoba u kiliʼich muukʼ utiaʼal u kanáantik le máaxoʼob tuʼux kun taal le Chʼiʼibaloʼ?
5 Jéeobaeʼ meyajnaj tiʼ u kiliʼich muukʼ utiaʼal u kanáantik le máaxoʼob tuʼux kun taal le Chʼiʼibaloʼ. Letiʼeʼ tu yaʼalaj tiʼ Abraham (teʼ kʼiinoʼob jeʼeloʼ u kʼaabaʼeʼ Abram): «Teen [kanáantikech]» (Gén. 15:1). Lelaʼ jach bey tu beetiloʼ. Tuukulnakoʼon tiʼ le baʼax úuch tu jaʼabil 1919 táanil tiʼ u taal Cristooʼ. Ka bin Abraham yéetel Sara, u yatan kajtal tu kaajil Gerareʼ, Abimelec, u reyil le kaajoʼ, tu bisaj Sara tu yotoch, tumen maʼ u yojel wa tsʼokaʼan u beel kaʼachiʼ. Lelaʼ maʼ xaaneʼ Satanás beet utiaʼal maʼ u yantal u hijo Sara yéetel Abraham. U jaajileʼ, le Bibliaoʼ maʼatech u yaʼalik lelaʼ, baʼaleʼ ku yaʼalikeʼ Dioseʼ tu yaʼalaj tiʼ le rey ichil upʼéel náay maʼ u beetik mix baʼal tiʼ Saraoʼ (Gén. 20:1-18).
6 Lelaʼ chéen upʼéel tiʼ le bix úuchik u kanáantaʼal Abraham yéetel u láakʼtsiloʼob tumen Diosoʼ (Gén. 12:14-20; 14:13-20; 26:26-29). Le oʼolal k-aʼalik jach jaaj le baʼax tu tsʼíibtaj le salmistaaʼ: «[Jéeobaeʼ] maʼ tu chaʼaj u loobiltaʼaloʼob tumen mix máakiʼ; bey xan tu yaʼaljilak tiʼ le [reyoʼobaʼ]: Maʼ a tsʼáaikeʼex a kʼabeʼex tu yóokʼol in j-meyajoʼob, mix a beetikeʼex loob tiʼ in [profetaʼob]» (Sal. 105:14, 15).
7. ¿Bix úuchik u kanáantik Jéeoba u kaajil Israel?
7 Jéeobaeʼ meyajnaj tiʼ xan u kiliʼich muukʼ utiaʼal u kanáantik u yúuchben kaajil Israel, le tuʼux kun síijil le Chʼiʼibal aʼalaʼanoʼ. Táanileʼ tu tsʼáaj u Ley utiaʼal u yeʼesik bix unaj u adorartaʼal yéetel utiaʼal u kanáantik u kaajal tiʼ le kaʼansajoʼob yéetel tiʼ uláakʼ baʼaloʼob maʼ maʼalobtak ku beetaʼaloʼ (Éxo. 31:18; 2 Cor. 3:3). Tsʼoʼoleʼ tu kʼiinil le juezoʼoboʼ, tu tsʼáaj u kiliʼich muukʼ tiʼ jujuntúul máakoʼob utiaʼal u jáalkʼabtik u kaajil Israel tiʼ le máaxoʼob pʼekmiloʼoboʼ (Jue. 3:9, 10). Yéetel teʼ jaʼaboʼob máan tak le ka kʼuch u kʼiinil u síijil Jesús, le Chʼiʼibal aʼalaʼanoʼ, tu kanáantaj u kaajil Jerusalén, Belén, le templooʼ bey xan uláakʼ kaajoʼob ku chʼaʼachiʼitaʼaloʼob ichil le profecíaʼob ku tʼaanoʼob tiʼ le Mesíasoʼ.
8. ¿Bix úuchik u meyaj le kiliʼich muukʼ ichil u kuxtal Jesusoʼ?
8 Le kiliʼich muukʼ xanoʼ meyajnaj ichil u kuxtal Cristo. Yáaxeʼ béeychaj u máansik u kuxtal Jesús tu jobnel María, utúul x-chʼúupal maʼ tsʼokaʼan u beeliʼ, le oʼolal kex yaan kʼeban tu wíinklileʼ béeychaj u yantal utúul u hijo minaʼan u kʼeban yéetel maʼ tu náajmatik u kíimil (Luc. 1:26-31, 34, 35). Tsʼoʼoleʼ tu kanáantaj Jesús utiaʼal maʼ u kíimsaʼal tu chichnil, tumen maʼ kʼuchuk le kʼiin aʼalaʼanoʼ (Mat. 2:7, 8, 12, 13). Le ka tu tsʼáaj 30 jaʼaboʼob tiʼeʼ tsʼaʼab kiliʼich muukʼ tiʼ utiaʼal u yéeyaʼal u beet u reyil, beyoʼ tsʼaʼabtiʼ u derechoi u kutal tu trono David bey xan utiaʼal ka u kʼaʼayt le Reinooʼ (Luc. 1:32, 33; 4:16-21). Yéetel u yáantaj le kiliʼich muukʼoʼ béeychaj u tsʼakik kʼojaʼanoʼob, u tsʼáaik baʼal u jaant yaʼab máakoʼob yéetel u kaʼa kuxkíintik le kimenoʼoboʼ. Le baʼaxoʼob tu beetoʼ ku yeʼesik le utsiloʼob kun ilbil ken káajak u reinaroʼ.
9, 10. 1) ¿Baʼaxoʼob eʼesik tsʼaʼab kiliʼich muukʼ tiʼ le sukuʼunoʼob teʼ yáax siglooʼ? 2) ¿Baʼax tu kʼexaj Jéeoba teʼ yáax siglooʼ?
9 Teʼ Pentecostés tiʼ u jaʼabil 33 tiʼ le yáax siglooʼ, meyajnaj tiʼ Jéeoba u kiliʼich muukʼ utiaʼal u yéeyik le uláakʼ u jaats máakoʼob táakpajaʼanoʼob ichil u chʼiʼibal Abrahamoʼ, ichil le máakoʼobaʼ táakaʼan tak le máaxoʼob maʼ tiʼ u chʼiʼibal Abraham u taaloʼoboʼ (Rom. 8:15-17; Gal. 3:29). Letiʼob xaneʼ nuʼuktaʼaboʼob tumen le kiliʼich muukʼoʼ, le oʼolal jach tu tsʼáaj u yóoloʼob teʼ kʼaʼaytajoʼ yéetel tu beetoʼob milagroʼob (Hch. 1:8; 2:1-4; 1 Cor. 12:7-11). Tuláakal le baʼaloʼobaʼ tu chíikbeseʼ Jéeobaeʼ tsʼoʼok u beetik upʼéel nojoch kʼeex: Kex yaʼab jaʼaboʼob tu kʼamaj le adoración ku tsʼaʼabaltiʼ teʼ templo yaan tu kaajil Jerusalenoʼ, tu kʼexaj yéetel le adoración ku tsʼaʼabaltiʼ tumen le sukuʼunoʼob yéeyaʼanoʼob utiaʼal u binoʼob kaʼan, utiaʼal u tsʼoʼokbesik le baʼax u tukulmoʼ.
10 Jeʼex tsʼoʼok k-ilkoʼ, tiʼ Jéeobaeʼ ku meyaj u kiliʼich muukʼ utiaʼal u kanáantik le máaxoʼob meyajtikoʼ, utiaʼal u páajtal u beetkoʼob milagroʼob yéetel utiaʼal u yéeyik le máaxoʼob kun binoʼob kaʼanoʼ. Bey úuchik u bin u beetik le baʼaxoʼob kʼaʼabéet utiaʼal u béeykuntik le baʼax u tukulmoʼ. ¿Kux túun teʼ kʼiinoʼobaʼ? ¿Bix u meyajtiʼ le kiliʼich muukʼ utiaʼal u béeykuntik le baʼax u tukulmoʼ? Maʼalob ka k-ojéelt u núukil utiaʼal u béeytal k-múul meyaj tu yéetel. Le oʼolaleʼ koʼoneʼex ilik kampʼéel bix u meyaj tiʼ Dios u kiliʼich muukʼ bejlaʼeʼ.
Le bix u meyaj le kiliʼich muukʼ teʼ kʼiinoʼobaʼ
11. ¿Baʼaxoʼob eʼesik le kiliʼich muukʼoʼ ku yáantik le máaxoʼob meyajtik Dios utiaʼal u beetkoʼob baʼax maʼaloboʼ, yéetel bix u yeʼesik le cristianoʼob ku chaʼik u nuʼuktaʼaloʼob tumen le kiliʼich muukʼoʼ?
11 Yáaxeʼ, le kiliʼich muukʼoʼ ku yáantik le máaxoʼob meyajtik Dios utiaʼal ka u beetoʼob baʼax maʼaloboʼ. Le sukuʼunoʼob yéetel le kiikoʼoboʼ ku yilik u biskoʼob upʼéel toj kuxtal utiaʼal u beetkoʼob baʼax utstutʼaan Jéeoba (xokaʼak 1 Corintoiloʼob 6:9-11). Yaan máaxeʼ, táanil tiʼ u kʼaj óoltik baʼax ku yaʼalik Jéeobaeʼ ku beetik baʼaloʼob kʼaastak, jeʼex le núupkʼebanoʼ, ku tusik u núup yéetel yaanal, ku chital yéetel u yéet xiibil wa yéetel u yéet koʼolelil wa ku beetik uláakʼ baʼaloʼob kʼaastak (Sant. 1:14, 15). Baʼaleʼ tsʼoʼok u kʼexik bix u kuxtaloʼob utiaʼal u lúubloʼob utsil tiʼ Jéeoba, le oʼolal ku yaʼalaʼaleʼ «tsʼoʼok [u] pʼoʼob[loʼob]». ¿Baʼax áantkoʼob u náachkuntubaʼob tiʼ le baʼaloʼob kʼaastakoʼ? Yáax tiʼ Corintoiloʼob 6:11 ku yaʼalikeʼ «u kiliʼich [muukʼ] k-Yuum Jajal Dios». Tumen táan u yilik u beetkoʼob baʼaloʼob maʼalobtakeʼ ku yeʼeskoʼob táan u chaʼik u nuʼuktaʼaloʼob tumen le kiliʼich muukʼoʼ.
12. 1) Jeʼex tsʼaʼabik u yil Ezequieleʼ, ¿bix u nuʼuktik Jéeoba u kaajal? 2) ¿Bix jeʼel k-eʼesik táan k-chaʼik u nuʼuktikoʼon le kiliʼich muukʼoʼ?
12 U kaʼapʼéeleʼ, Jéeobaeʼ ku meyajtiʼ u kiliʼich muukʼ utiaʼal u nuʼuktik u kaajal, le yaan way Luʼumoʼ bey xan le yaan teʼ kaʼanoʼ. Teʼ náay tsʼaʼab u yil Ezequieloʼ, tu yileʼ u kaajal Jéeoba yaan teʼ kaʼanoʼ ku keʼetel yéetel upʼéel carro jach chich u bin utiaʼal u béeykuntik baʼax u kʼáat Dios. ¿Baʼax péeksik le carro utiaʼal u kʼexik tuʼux ku binoʼ? U kiliʼich muukʼ Dios (Eze. 1:20, 21). Le kiliʼich muukʼ xanoʼ letiʼ nuʼuktik u kaajal Jéeoba yaan way Luʼumeʼ. Le oʼolaleʼ ken k-beet tuláakal le baʼaxoʼob ku yaʼalikoʼ k-eʼesik táan k-bin tuʼux ku nuʼuktik u carro Jéeoba yéetel táan k-chaʼik u nuʼuktikoʼon u kiliʼich muukʼ (Heb. 13:17).
13, 14. 1) ¿Máaxoʼob táakaʼanoʼob ichil le «generación» aʼalaʼab tumen Jesusoʼ? 2) Aʼal upʼéel tiʼ le baʼaxoʼob tsʼoʼok u yáantkoʼon k-naʼat le kiliʼich muukʼoʼ (ilaʼak le cuadro «¿K-naʼatik wa le baʼaxoʼob túumben tsolaʼaniloʼoboʼ?»).
13 U yóoxpʼéeleʼ, le kiliʼich muukʼoʼ ku yáantaj utiaʼal u maas naʼataʼal le baʼax ku yaʼalik le Bibliaoʼ (Pro. 4:18). Desde úuchjeakileʼ u revistai U Pʼíich Tulumil Kanan ku jóoʼsik le «palitsil chúukpajaʼan u yóol yéetel yaan u naʼat[oʼ]» tsʼoʼok u yáantkoʼon utiaʼal k-maas naʼatik le baʼaxoʼob ku yaʼalik le Bibliaoʼ (Mat. 24:45). Tuukulnakoʼon tiʼ bix tsolaʼabik máax le «generación» aʼalaʼab tumen Jesusoʼ (Mat. 24:32-34, NM). ¿Máaxoʼob táakaʼanoʼob ichil «le generacionaʼ»? Jeʼex tsolaʼabik teʼ xook ku kʼaabaʼtik «¿Ka naʼatik wa baʼax u kʼáat u yaʼal way yaan Cristoeʼ?», Jesuseʼ maʼ táan u tʼaan tiʼ le kʼasaʼan máakoʼoboʼ, baʼaxeʼ táan u tʼaan tiʼ le máaxoʼob tsaypachtik kun yéeybiloʼob utiaʼal u binoʼob kaʼanoʼ. * Bey túunoʼ, desde teʼ yáax siglo tak teʼ kʼiinoʼobaʼ, chéen le máaxoʼob tsaypachtik Cristo ku tsʼáaikoʼob cuenta táan u béeytal le profecíaoʼ yéetel ku naʼatkoʼobeʼ Cristoeʼ «tiʼ yaan tu jool najeʼ».
14 ¿Baʼax u kʼáat u yaʼal lelaʼ? Kex maʼ tu páajtal u naʼataʼal bukaʼaj ku xáantal u kuxtal «le generacionaʼ» maʼ unaj u tuʼubultoʼoneʼ le tʼaan generacionoʼ táan u tʼaan tiʼ máakoʼob jejeláas u jaʼabiloʼob ku kuxtaloʼob tiʼ upʼéeliliʼ tiempo maʼ jach nojchiʼ yéetel ku kʼuchul u xuul (Éxo. 1:6). Le oʼolaleʼ, ¿bix unaj k-naʼatik le baʼax tu yaʼalaj Jesús yoʼolal «le generacionaʼ»? Jeʼex tsʼoʼok k-ilkoʼ, le sukuʼunoʼob yéeyaʼanoʼob il u káajal u béeytal le baʼaxoʼob eʼesik way yaan Cristo tu jaʼabil 1914, kuxlajoʼob yéetel uláakʼ sukuʼunoʼob yéeyaʼanoʼob kun ilik u káajal le nojoch muʼyajiloʼ. «Le generacionaʼ» yanchaj u káajbal yéetel yaan xan u kʼuchul u kʼiinil u tsʼoʼokol. Le bix u bin u béeychajal le baʼaxoʼob aʼalaʼanoʼ ku yeʼeskeʼ jach natsʼaʼan u kʼiinil le nojoch muʼyajiloʼ. Bejlaʼeʼ u kʼiinil k-kanáantik maʼ u náayal k-óol yéetel k-beetik tu séebaʼanil baʼax u kʼáat Dios (Mar. 13:37). Wa k-beetkeʼ k-eʼesik táan k-chaʼik u yáantkoʼon le kiliʼich muukʼ utiaʼal k-naʼatik u jaajiloʼ.
15. ¿Bix k-ojéeltik táan u yáantkoʼon le kiliʼich muukʼ utiaʼal k-kʼaʼaytik le maʼalob péektsiloʼ?
15 U kampʼéeleʼ, le kiliʼich muukʼoʼ ku yáantik le máaxoʼob kʼaʼaytik le maʼalob péektsiloʼ (Hch. 1:8). Wa maʼ yoʼolal u yáantaj le kiliʼich muukʼoʼ, ¿jeʼel wa u páajtal u bisaʼal le maʼalob péektsil tuláakal tuʼuxoʼ? Tuukulnakoʼon tiʼ bix u yáantkoʼon. Maʼ xaaneʼ jach suʼlakoʼon wa chan saajkoʼon kaʼachi, maʼ xaaneʼ t-aʼalaj xan: «Teneʼ maʼ kun béeytal in jóokʼol kʼaʼaytaj joonaj joonai». Baʼaleʼ bejlaʼeʼ k-táakpajal yéetel kiʼimak óolal teʼ kʼaʼaytajoʼ. * Tsʼoʼoleʼ yaʼab sukuʼunoʼobeʼ tsʼoʼok u chúukpajal u yóoloʼob teʼ kʼaʼaytaj kex ku chʼaʼapachtaʼaloʼob yéetel ku pʼektaʼaloʼoboʼ. Chéen letiʼe kiliʼich muukʼ áantkoʼob utiaʼal u aktáantkoʼob le talmiloʼoboʼ yéetel utiaʼal u beetkoʼob uláakʼ meyajoʼob maʼ tu páajtal u beetkoʼob chéen tu juunaloʼob (Miq. 3:8; Mat. 17:20). Le oʼolaleʼ ken k-beet tuláakal le ku páajtal utiaʼal k-táakpajal teʼ kʼaʼaytajoʼ k-eʼesik táan k-múul meyaj yéetel le kiliʼich muukʼoʼ.
Le baʼaxoʼob ken u beet le kiliʼich muukʼ maʼ kun xáantaloʼ
16. ¿Baʼaxten k-jach oksaj óoltik Jéeobaeʼ yaan u kanáantik u kaajal tu kʼiinil le nojoch muʼyajiloʼ?
16 Teʼ kʼiinoʼob ku taaloʼ, Jéeobaeʼ yaan u meyaj u kiliʼich muukʼ tiʼ utiaʼal u béeykuntik le baʼax u tukulmoʼ. Yáaxeʼ yaan u meyajtiʼ utiaʼal u kanáantik le máaxoʼob meyajtikoʼ. Úuchjeakileʼ meyajnajtiʼ utiaʼal u kanáantik jujuntúul tiʼ le máaxoʼob meyajtoʼ bey xan utiaʼal u kanáantik u kaajil Israel. Le oʼolal k-creertik yaan u kaʼa meyajtiʼ utiaʼal u kanáantik u kaajal tu kʼiinil le nojoch muʼyajiloʼ. Toʼoneʼ maʼatech k-chiʼichnakkúuntikba yoʼolal bix ken u kanáantiloʼon teʼ kʼiin jeʼeloʼ. K-jach kʼubik k-óol tiʼ Jéeoba, le oʼolal maʼ saajkoʼon tiʼ le baʼax ku taal u kʼiinoʼ, tumen k-ojel mix baʼal jeʼel u beetik k-náachtal tiʼ letiʼ yéetel tiʼ u kiliʼich muukʼeʼ (2 Cró. 16:9; Sal. 139:7-12).
17. ¿Bix kun meyaj tiʼ Jéeoba u kiliʼich muukʼ teʼ túumben yóokʼol kaaboʼ?
17 ¿Bix kun meyaj tiʼ Jéeoba u kiliʼich muukʼ teʼ túumben yóokʼol kaaboʼ? Yaan u meyajtiʼ utiaʼal u beetik u tsʼíibtaʼal le túumben libroʼob kun beetbiloʼoboʼ (Apo. 20:12). ¿Baʼaxoʼob ken u taas le túumben libroʼoboʼ? Maʼ xaaneʼ, yaan u taasik le leyoʼob kun meyaj tu yáamil le Mil Jaʼaboʼoboʼ. Toʼoneʼ jach k-kʼáat ka séeb kʼuchuk u kʼiinil k-ilik le baʼaxoʼob ken u taasoʼ yéetel k-kʼamik uláakʼ utsiloʼob kun ilbil teʼ Paraísooʼ. Bejlaʼeʼ maʼ tu béeytal k-jach naʼatik bix le kuxtal kun ilbil yéetel u yáantaj le kiliʼich muukʼ utiaʼal u béeytal le baʼax u tukulmaj Dios utiaʼal le Luʼumaʼ bey xan utiaʼal le máaxoʼob kun kajtaloʼoboʼ.
18. ¿Baʼax unaj k-chʼaʼatuklik k-beetik?
18 Maʼ u tuʼubultoʼoneʼ, le baʼax u tukulmaj u beetik Jéeobaoʼ yaan u béeykuntik, tumen yaan u meyajtiʼ u kiliʼich muukʼ utiaʼal u beetik. Tumen táakaʼanoʼon ichil le baʼax u tukulmaj u beetik Jéeobaoʼ, unaj k-kʼáatik u kiliʼich muukʼ yéetel k-chaʼik u nuʼuktikoʼon (Luc. 11:13). Beyoʼ jeʼel u páajtal k-ilik u béeytal le baʼax u tukulmaj utiaʼal wíinikoʼ, le kuxtal minaʼan u xuul teʼ Paraísooʼ.
[Tsolajiloʼob]
^ xóot’ol 15 Teʼ revista La Atalaya 15 tiʼ septiembre tiʼ 1993, táan juʼun 19, ku taasik upʼéel xook tuʼux ku tsikbaltik baʼax áant utúul kiik jach suʼlak kaʼachi yéetel bix úuchik u beetik u precursorai.
¿T-naʼataj wa?
• ¿Úuchjeakileʼ bix meyajnajik tiʼ Jéeoba u kiliʼich muukʼ utiaʼal u béeykuntik le baʼax u tukulmoʼ?
• ¿Bix u meyaj tiʼ Jéeoba u kiliʼich muukʼ teʼ kʼiinoʼobaʼ?
• ¿Bix kun meyaj tiʼ Jéeoba u kiliʼich muukʼ utiaʼal u béeykuntik le baʼax u tukulmoʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 10]
¿K-naʼatik wa le baʼaxoʼob túumben tsolaʼaniloʼoboʼ?
Jéeobaeʼ láayliʼ táan u yáantik u kaajal u naʼat le baʼax ku yaʼalik le Bibliaoʼ. ¿Baʼaxoʼob tsʼoʼok u tsoʼolol tiʼ U Pʼíich Tulumil Kanan teʼ tu tsʼook jaʼaboʼobaʼ?
▪ ¿Baʼaxten ku keʼetel u nojochtal u kaajal Jéeoba yéetel le levaduraoʼ? (Mat. 13:33; 15 tiʼ julio tiʼ 2008, táan juʼun 19, 20.)
▪ ¿Baʼax kʼiin ken xuʼuluk u yéeyik Jéeoba le máaxoʼob kun binoʼob teʼ kaʼanoʼ? (15 tiʼ enero tiʼ 2008, táan juʼun 22, 23.)
▪ ¿Baʼax ku kaʼansiktoʼon u kettʼaanil le mostazaoʼ? (15 tiʼ julio tiʼ 2008, táan juʼun 17, 18.)
▪ ¿Baʼax ku chíikbesik u kettʼaanil le u kʼáanil chuk kayoʼ? (15 tiʼ julio tiʼ 2008, táan juʼun 20, 21.)
▪ ¿Baʼax u kʼáat u yaʼal u kettʼaanil le trigo yéetel le kʼaakʼas xíiwoʼ? (15 tiʼ marzo tiʼ 2010, táan juʼun 19-22.)