Táankelem yéetel x-lóoʼbayan paal, meyajt Jéeoba
Táankelem yéetel x-lóoʼbayan paal, meyajt Jéeoba
«Kaʼalikil táankelmecheʼ, kʼaʼajak tiʼ teech máax beetech.» (ECL. 12:1)
1. ¿Baʼax aʼalaʼab ka u beet le mejen paalal tiʼ u kaajil Israel úuchjeakiloʼ?
KEX tres mil quinientos jaʼaboʼob bejlaʼeʼ, Moisés, u profeta Jéeobaeʼ, tu yaʼalaj tiʼ u j-kʼiiniloʼob yéetel u ancianoiloʼob u kaajil Israel: «[Muchʼeʼex] tuláakal le kaajoʼ, jeʼel bix xiiboʼobeʼ, bey koʼoleloʼob, [yéetel] mejen paalal [...], utiaʼal ka u yuʼuboʼob u xoʼokol le aʼalmajtʼaan[oʼ], tu yoʼolal u kanikoʼob u tsikoʼob Yuumtsil a [Dioseʼex] bey xan ka u tsʼoʼokbesoʼob tuláakal baʼax tsʼíibtaʼaniʼ» (Deu. 31:12). Táankelem yéetel x-lóoʼbayan paal, ¿ta wilaj wa maʼ chéen le nukuch máakoʼob unaj u muchʼkubaʼob u adorartoʼob Diosoʼ? Tak le mejen paalal unaj u yuʼubikoʼob, u kaambaloʼob yéetel u beetkoʼob baʼax ku yaʼalik Jéeobaoʼ.
2. ¿Bix úuchik u yeʼesik Jéeoba u kʼáat xan ka meyajtaʼak tumen le táankelem yéetel le x-lóoʼbayan paalaloʼob teʼ yáax siglooʼ?
2 Teʼ yáax siglo xanoʼ, Jéeobaeʼ tu yeʼesaj u kʼáat ka meyajtaʼak tumen le táankelem yéetel le x-lóoʼbayan paalaloʼoboʼ. Le oʼolal tu nuʼuktaj apóstol Pablo utiaʼal ka u tsʼíibt baʼax unaj u beetik le paalaloʼob yanoʼob teʼ múuchʼuliloʼoboʼ (xokaʼak Efesoiloʼob 6:1 yéetel Colosailoʼob 3:20). Le paalaloʼob beet le baʼax tu yaʼalaj Pablooʼ jach kʼuch u yaabiltoʼob Jéeoba, u Taataʼob yaan teʼ kaʼanoʼ, yéetel tu kʼamoʼob yaʼab utsiloʼob.
3. ¿Bix u yeʼesik yaʼab táankelem yéetel x-lóoʼbayan paalal u kʼáat u meyajtoʼob Dios?
3 ¿Kux túun bejlaʼeʼ? ¿U kʼáat wa Dios ka adorartaʼak xan tumen le táankelem yéetel le x-lóoʼbayan paalaloʼoboʼ? U kʼáat. Jach ku kiʼimaktal k-óol k-ilik yaʼab xiʼipalaloʼob yéetel x-chʼúupalaloʼob ku binoʼob teʼ muchʼtáambaloʼoboʼ. Lelaʼ ku yeʼeskeʼ táan u beetkoʼob le baʼax tu yaʼalaj Pabloaʼ: «Unaj k-kaxantik bix jeʼel u páajtal k-áantikba t-baatsileʼ utiaʼal ka yanaktoʼon yaakunaj yéetel utiaʼal k-beetik baʼax uts. Maʼ unaj k-ketikba yéetel le máaxoʼob suuktiʼob maʼ u taaloʼob muchʼtal t-éeteliʼ, baʼaleʼ unaj k-líikʼ óoltikba t-baatsil, [maas] unaj k-beetik [bejlaʼeʼ] tumen táan a wilikeʼex u náatsʼal u kʼiinil Yuumtsil» (Heb. 10:24, 25). Tsʼoʼoleʼ yaʼab tiʼ letiʼobeʼ ku jóokʼloʼob u kʼaʼaytoʼob le maʼalob péektsil yéetel u taataʼoboʼ (Mat. 24:14). Yéetel cada jaʼabeʼ, u milesi táankelem yéetel x-lóoʼbayan paalaloʼobeʼ ku yokjaʼob utiaʼal u yeʼeskoʼob u yaabiltmoʼob Jéeoba. Ikil u meyajtkoʼob Dios jeʼex tu beetil Cristoeʼ ku taasik yaʼab utsil tiʼob (Mat. 16:24; Mar. 10:29, 30).
Séeb káajs a meyajtik Dios
4. ¿Jaypʼéel jaʼab unaj u yantal tiʼ máak utiaʼal u béeytal u meyajtik yéetel u adorartik Dios?
4 ¿A wojel wa jaypʼéel jaʼab unaj u yantal tiʼ máak utiaʼal u meyajtik yéetel u adorartik Jéeoba? Le Bibliaoʼ maʼatech u yaʼalik jach jaypʼéel, baʼaxeʼ ku yaʼalik: «Kaʼalikil táankelmecheʼ, kʼaʼajak tiʼ teech máax beetech» (Ecl. 12:1). Le oʼolal maʼ tuklik wa jach chichnech utiaʼal a meyajtik Dios. Jeʼel jaypʼéel jaʼab yantecheʼ, k-líiʼsik a wóol ka séeb káajak a meyajtik.
5. ¿Baʼax ku beetik yaʼab taatatsiloʼob utiaʼal u yáantik u paalaloʼob u meyajtoʼob Dios?
5 Yaʼab paalaloʼobeʼ jach ku yáantaʼaloʼob tumen u taataʼob yéetel u maamaʼob u meyajtoʼob Dios, wa ku yáantaʼaloʼob tumen utúul tiʼ letiʼobiʼ. Le paalaloʼob beyaʼ jeʼel u páajtal u keʼetloʼob yéetel Timoteo, kuxlaj teʼ yáax siglooʼ. Letiʼeʼ kaʼansaʼab desde tu chichnil tumen Eunice, u maama, yéetel Loida, u abuela (2 Tim. 3:14, 15). Maʼ xaaneʼ, a taataʼobeʼ ku xokkoʼob le Biblia ta wéeteloʼ, ku payalchiʼob ta wéetel, ku biskechoʼob teʼ muchʼtáambaloʼoboʼ, teʼ asambleaʼoboʼ yéetel teʼ kʼaʼaytajoʼ. Beyoʼ ku kaʼanskoʼobtech a beet baʼax utstutʼaan Jéeoba, jeʼex u yaʼalmiltiʼoboʼ. ¿Ka tsʼáaik wa cuenta bukaʼaj u yaabiltmailechoʼob yéetel u kʼáatoʼob ka xiʼiktech utsil? (Pro. 23:22.)
6. 1) ¿Bix u kʼáat Jéeoba ka meyajtaʼak utiaʼal u kiʼimaktal u yóol? 2) ¿Baʼax ken k-il teʼ xookaʼ?
6 Baʼaleʼ jeʼex u bin a nojochtaleʼ, Jéeobaeʼ u kʼáat ka kʼuchkech a wil «baʼax [utstutʼaan] yéetel baʼax jach tubeel», jeʼex tu beetil Timoteooʼ (Rom. 12:2). Beyoʼ ken táakpajkech tiʼ le meyajoʼob ku beetaʼal teʼ múuchʼuliloʼ yaan a beetik tumen ku síijil ta puksiʼikʼal, maʼ chéen utiaʼal a kiʼimakkúuntik u yóol a taataʼobiʼ. Wa ka beetik beyoʼ yaan a kiʼimakkúuntik u yóol Dios (Sal. 110:3). Toʼoneʼ k-ojel techeʼ jach a kʼáat a beet baʼax ku yaʼalik. Baʼaleʼ ¿baʼax jeʼel u yáantkech utiaʼal ka maas taakchajak a beetkeʼ? A xook ta juunal, a payalchiʼ yéetel a beetik baʼax maʼalob mantatsʼ. Koʼoneʼex ilik cada upʼéel tiʼ óoxpʼéel baʼaloʼobaʼ.
Kʼaj óolt Jéeoba yéetel amigote
7. 1) ¿Baʼaxten k-aʼalik Jesuseʼ jach ku xokik kaʼach le Bibliaoʼ? 2) ¿Máaxoʼob áante?
7 Le yáax baʼax jeʼel u yáantkech utiaʼal ka maas taakchajak a meyajtik Jéeobaoʼ letiʼe ka xok le Biblia sáamsamaloʼ, lelaʼ yaan u yáantkech a maas kʼaj óolt tubeel yéetel yaan a kanik uláakʼ baʼaloʼob jach maʼalobtak (Mat. 5:3). Beyoʼ ka beetik jeʼex tu beetil Jesuseʼ. Utéenjeak le yaan 12 jaʼaboʼob tiʼoʼ, tiʼ kaxtaʼab tumen u taataʼob teʼ templooʼ, «kulukbal ichil u j-kaʼambesajiloʼob le aʼalmajtʼaanoʼ, táan u yuʼubik baʼax ku yaʼalikoʼob yéetel táan u kʼáatchiʼitikoʼob» (Luc. 2:44-46). Le baʼax ku yaʼalik le Bibliaaʼ ku yeʼesikeʼ Jesuseʼ jach utstutʼaan u kaambal tiʼ le baʼax ku yaʼalik le Kiliʼich Tsʼíiboʼoboʼ yéetel jach ku naʼatik baʼax ku yaʼalik. ¿Baʼaxten jach séeb u naʼatik? Tumen jach maʼalob bix kaʼansaʼanik tumen María, u maama, yéetel José, letiʼobeʼ jach chúukpaj u yóoloʼob u meyajtoʼob Jéeoba yéetel tu kaʼansoʼob Jesús desde tu chichnil (Mat. 1:18-20; Luc. 2:41, 51).
8. 1) ¿Baʼax kʼiin unaj u káajal u kaʼansaʼal le paalaloʼob u yaabiltoʼob le baʼax ku yaʼalik le Bibliaoʼ? 2) Tsol upʼéel baʼax eʼesik jach maʼalob ka kaʼansaʼak le paalaloʼob desde tu chichniloʼoboʼ.
8 Bejlaʼa xaneʼ, le taatatsiloʼob meyajtik Jéeobaoʼ u yojloʼob jach kʼaʼanan u kaʼansik u paalaloʼob desde tu chichniloʼob utiaʼal ka u yaabiltoʼob le baʼax ku yaʼalik le Bibliaoʼ (Deu. 6:6-9). Lelaʼ bey tu beetil utúul kiik ku kʼaabaʼtik Rubi utiaʼal u yáantik Joseph, u yáax hijo. Sáamsamaleʼ ku xokik u yuʼub U libroi tsikbaliloʼob tiʼ le Bibliaoʼ. Yéetel ka maas chan nojochchajeʼ tu yáantaj u kan tekstoʼob tiʼ le Bibliaoʼ. A tuklikeʼ, ¿tu yáantaj wa Joseph le baʼax tu beetaj u maamaoʼ? Tu yáantaj, tumen maʼ úuch káajak u tʼaaneʼ, ku béeytal u tsikbaltik baʼaxoʼob tsʼoʼok u kanik tiʼ le librooʼ. Yéetel ka tu tsʼáaj cinco jaʼaboʼob tiʼeʼ káaj u máan tiʼ u muchʼtáambalil Kaambalil utiaʼal Kaʼansaj.
9. ¿Baʼaxten unaj u xokik máak le Biblia yéetel u tuukul tiʼ le baʼax ku yaʼalikoʼ?
9 Utiaʼal a maas tsʼáaik a wóol a meyajt Dioseʼ unaj u suuktal a xokik le Biblia sáamsamal tuláakal u kʼiinil a kuxtaloʼ (Sal. 71:17). ¿Bix jeʼel u yáantkech lelaʼ? Yaan u yáantkech a maas kʼaj óolt Jéeoba, jeʼex úuchik u yaʼalik Jesusaʼ: «Le kuxtal minaʼan u xuuloʼ letiʼ lelaʼ: ka u kʼaj óoltoʼob teech chéen juntúuliliʼ Jajal Dios» (Juan 17:3). Wa ka maas kʼaj óoltikeʼ, yaan a maas creertik jach tu jaajil yaan, yéetel yaan a maas yaabiltik (Heb. 11:27). Le oʼolal cada utéen ken a xok le Bibliaoʼ ilawil a kanik upʼéel baʼax túumben tu yoʼolal Jéeoba. Maʼalob ka tukle: «Le baʼax tsʼoʼok in xokikaʼ, ¿baʼax ku kaʼansikten yoʼolal Jéeoba? ¿Bix u yáantken in wil letiʼeʼ u yaabiltmen yéetel u kʼáat ka xiʼikten utsil?». Wa ka tuukul tiʼ le kʼáatchiʼobaʼ yaan a maas naʼatik bix u tuukul Dios, baʼax ku yuʼubik yoʼolal baʼaxoʼob ka beetik yéetel baʼax ku páaʼtik ka beete (xokaʼak Proverbios 2:1-5). Jeʼex Timoteoeʼ, yaan a «[w]oksik ta tuukul» le baʼaxoʼob ku yaʼalik le Bibliaoʼ yéetel yaan u taaktal a meyajtik Jéeoba yéetel tuláakal a puksiʼikʼal (2 Tim. 3:14).
Le payalchiʼoʼ jeʼel u yáantkech a maas yaabilt Dioseʼ
10, 11. ¿Bix jeʼel u yáantkech le payalchiʼ utiaʼal ka maas taakchajak a meyajtik Diosoʼ?
10 U kaʼapʼéel baʼax jeʼel u yáantkech utiaʼal ka maas taakchajak a meyajtik Jéeobaeʼ letiʼe payalchiʼoʼ. Salmo 65:2 ku yaʼalik yoʼolal Jéeoba: «Tumen ka wuʼuyik payal[chiʼeʼ] tuláakal yóokʼol kaab ku taal tiʼ teech». Tu kʼiinil táan u meyajtaʼal Jéeoba tumen le israelitaʼoboʼ, tak le j-táanxel luʼumiloʼob jeʼel u béeytal u binoʼob tu temploi Jerusalén utiaʼal u payalchiʼob tiʼ Jéeobaeʼ (1 Rey. 8:41, 42). Letiʼeʼ u yaabiltmaj tuláakal máak yéetel ku yuʼubik u payalchiʼ tuláakal le máaxoʼob ku beetkoʼob baʼax utstutʼaanoʼ (Pro. 15:8). Le ken u yaʼal «tuláakal yóokʼol kaab[oʼ]» tak teech táakaʼanechiʼ.
11 Le máaxoʼob jach ku biskubaʼoboʼ mantatsʼ ku tsikbaloʼob. ¿Máasaʼ jach jatsʼuts u yilik máak u tsikbal yéetel máax ku naʼatik bix u yuʼubikuba, bix u tuukul yéetel baʼaxoʼob chiʼichnakkúuntik? Jéeobaeʼ bey u beetkoʼ, le oʼolal unaj a tsikbal tu yéetel ich payalchiʼ (Fili. 4:6, 7). Aʼaltiʼ jach baʼax ka wuʼuyik ta puksiʼikʼal, jeʼex a beetik ken tsikbalnakech yéetel a taata wa a maama, wa yéetel utúul máax jach ka biskaba. Le baʼaxoʼob ka waʼalik ken payalchiʼinakechoʼ ku yeʼesik baʼax ka wuʼuyik yoʼolal Jéeoba. Yaan a wilkeʼ wa maas ka biskaba tu yéeteleʼ maas yaan a waʼaliktiʼ jach baʼaxoʼob ka wuʼuyik ta puksiʼikʼal.
12. 1) ¿Bix unaj u payalchiʼ máak? 2) ¿Baʼax jeʼel u yáantkech a wil wa naatsʼ yanil Jéeoba tiʼ techeʼ?
12 Kʼaʼajaktecheʼ maʼ chéen unaj a payalchiʼiʼ. Aʼal tiʼ Dios bix a wuʼuyikaba. Aʼaltiʼ jach a yaabiltmaj, jach ka weʼesik tsiikiltiʼ yéetel jach ka kʼubik a wóol tiʼ. Ken a wil bix u núukik a payalchiʼeʼ yaan a tsʼáaik cuentaeʼ Jéeobaeʼ «naatsʼ yanil tiʼ máaxoʼob tʼanik» (Sal. 145:18). Bey túunoʼ, yaan u natsʼkuba ta wiknal yéetel yaan u yáantkech utiaʼal maʼ a lúubul tiʼ le baʼaxoʼob ku taal tiʼ le Kʼaasilbaʼaloʼ, tsʼoʼoleʼ yaan u yáantkech a chʼaʼatukult a beetik baʼax maʼalob (xokaʼak Santiago 4:7, 8).
13. 1) ¿Baʼax tu beetaj utúul x-chʼúupal utiaʼal u maas biskuba yéetel Dios? 2) A biskaba yéetel Jéeobaeʼ, ¿bix u yáantkech utiaʼal maʼ a beetik le baʼaxoʼob ku yaʼalik a wéet xookoʼoboʼ?
13 Koʼoneʼex ilik baʼax tu beetaj utúul x-lóoʼbayan chʼúupal ku kʼaabaʼtik Cherie utiaʼal u maas biskuba yéetel Jéeoba. Letiʼeʼ tsʼaʼab yaʼab premioʼob tiʼ, tumen jach maʼalob u xook yéetel jach chich u yáalkab, le oʼolal aʼalaʼab u tsʼaʼabal upʼéel beca tiʼ utiaʼal ka okok xook tiʼ upʼéel universidad. Letiʼeʼ ku yaʼalik: «Jach talam úuchik in wilik. Tumen le entrenadoroʼob yéetel in wéet xookoʼoboʼ joʼopʼ u jach aʼalikoʼobten ka in kʼam le becaoʼ». Baʼaleʼ Cherieeʼ tu tsʼáaj cuenta wa ku kʼamikeʼ yaan u máansik yaʼab tiempo utiaʼal u xook bey xan utiaʼal u beetik ejercicioʼob; tuláakal lelaʼ jeʼel u beetik u pʼáatal óoliʼ minaʼan tiempo tiʼ utiaʼal u meyajtik Dioseʼ. ¿Baʼax túun tu beetaj? Letiʼeʼ ku yaʼalik: «Ka tsʼoʼok in beetik in payalchiʼ tiʼ Jéeobaeʼ tin waʼalaj maʼ ken in kʼam le becaoʼ ka káaj in beetik in precursora regulari». Ka tsʼoʼok u máan cinco jaʼaboʼob káajak u beetik u precursoraileʼ tu yaʼalaj: «Maʼ tu yaatal tin wóol le baʼax tin beetoʼ. In wojel leloʼ tu beetaj u kiʼimaktal u yóol Jéeoba, lelaʼ jach ku beetik u kiʼimaktal in wóol. Tsʼoʼok in wilkeʼ, wa ku tsʼáaik máak táanil u Reino Dios ichil u kuxtaleʼ, letiʼeʼ yaan u tsʼáaik u maasil baʼaxoʼob kʼaʼabéet tiʼ máakoʼ» (Mat. 6:33).
A beetik baʼax maʼalobeʼ ku kanáantik a puksiʼikʼal
14. ¿Baʼaxten unaj u beetik máak baʼaloʼob maʼalobtak?
14 U yóoxpʼéel bix jeʼel a weʼesik tiʼ Jéeoba taak a maas meyajtik tu jaajil a wóoleʼ letiʼe ka beet baʼax maʼaloboʼ. Maʼ u tuʼubultecheʼ Dioseʼ ku beetik u bin utsil tiʼ le táankelem yéetel le x-lóoʼbayan paalaloʼob beetik baʼax maʼaloboʼ (xokaʼak Salmo 24:3-5). Tuukulnakoʼon tiʼ baʼax tu beetaj Samuel, letiʼeʼ tu yilaj maʼ u beetik jeʼex u kʼasaʼan paalaloʼob Elí, u nojchil le j-kʼiinoʼob tiʼ u kaajil Israel kaʼachoʼ. Le Bibliaoʼ ku yaʼalikeʼ u paalaleʼ joʼopʼ u beetkoʼob baʼaloʼob kʼaastak, baʼaleʼ «chan Samueleʼ, xiʼik u bin u nojochtal, u kuxtaleʼ uts u yilaʼal tumen [Dios] bey xan tumen le máakoʼoboʼ» (1 Sam. 2:26). Jeʼex k-ilkoʼ, le baʼaxoʼob tu beetaj Samueloʼ ilaʼab tumen Dios bey xan tumen le máakoʼoboʼ.
15. ¿Baʼaxten unaj a wilik a kuxtal jeʼex utstutʼaan Dioseʼ?
15 Jeʼex tu yaʼalil Pabloeʼ, le máakoʼob bejlaʼaʼ jach tsʼuʼutoʼob, noj baʼaloʼob, maʼatech u yuʼubik u tʼaan u taataʼob, maʼatech u tsʼáaikoʼob u diosboʼotikil mix baʼal, jach tsʼíikoʼob, jach kʼasaʼanoʼob, kaʼanal u yichoʼob, maas u yaabiltmoʼob chéen náaysaj óolaloʼob ke ka u yaabiltoʼob Dios (2 Tim. 3:1-5). K-ojel maʼ chéen chʼaʼabil a beetik baʼax maʼalobiʼ, tumen jach kʼasaʼan le yóokʼol kaabaʼ. Baʼaleʼ cada ken a wil maʼ a beetik baʼax kʼaaseʼ ka weʼesik a kʼáat ka nuʼuktaʼak a kuxtal tumen Jéeoba, u Noj Jalaʼachil tuláakal baʼal yéetel le Máax aʼalik baʼax unaj u beetik máakoʼ (Job 2:3, 4). Tsʼoʼoleʼ yaan u kiʼimaktal a wóol tumen táan a beetik le baʼax ku yaʼalikaʼ: «In xibil paal, yanak a wojéelajil utiaʼal a beetik u kiʼimaktal in wóol; beyoʼ bíin yanak baʼax in waʼal tiʼ máaxoʼob u kʼáatoʼob u pajoʼob in subtal» (Pro. 27:11). Baʼaleʼ maʼ chéen leloʼ. Yaan a lúubul utsil tiʼ Dios, leloʼ yaan u maas tsʼáaiktech u muukʼil utiaʼal a meyajtik.
16. ¿Baʼax tu beetaj utúul x-chʼúupal utiaʼal u kiʼimakkúuntik u yóol Jéeoba?
16 Tu paalil Caroleʼ ku chaʼik u nuʼuktaʼal tumen u conciencia yéetel ku beetik le baʼax ku yaʼalik le Bibliaoʼ. U yéet xookoʼob kaʼacheʼ jach ku yilkoʼob baʼax ku beetik, kex yantiʼ letiʼob ku yaʼalikoʼob baʼaloʼob kʼaastak tiʼ tumen maʼatech u saludartik le banderaoʼ mix tech u táakpajal tiʼ u maasil kʼiimbesajoʼob. Baʼaleʼ yaan kʼiineʼ ku páajtal u tsoliktiʼob baʼaxten maʼatech u beetik le baʼaloʼob beyoʼ. Maʼ sen úucheʼ túuxtaʼab upʼéel carta tiʼ tumen utúul tiʼ u yéet xookoʼob kaʼachi, u xóotʼ tiʼ le cartaoʼ ku yaʼalik: «Úuch taakak in kaʼa ilkech utiaʼal in tsʼáaiktech u diosboʼotikil yoʼolal le baʼaxoʼob maʼalobtak ka beetkoʼ yéetel bix a tsolik baʼaxten maʼatech a táakpajal tiʼ le kʼiimbesajoʼoboʼ. Teech le yáax x-jaajkunaj tiʼ Jéeoba tin kʼaj óoltajoʼ». Letiʼeʼ jach maʼalob u yilik kaʼach le baʼaxoʼob ku beetik Caroloʼ ka joʼopʼ u xokik xan le Bibliaoʼ. Le ka tu túuxtaj le carta tiʼoʼ tsʼoʼok maas tiʼ cuarenta jaʼaboʼob okjaʼanak. Wa ka beetik baʼaloʼob maʼalobtak yéetel wa maʼ a sajaktal a tsol baʼaxoʼob ka creertik, jeʼex tu beetil Caroleʼ, maʼ xaaneʼ jeʼel a wáantik wa máax uts u puksiʼikʼal utiaʼal ka taakchajak u kʼaj óoltik Jéeobaeʼ.
Táankelmoʼob yéetel x-lóoʼbaynoʼob nojbeʼenkúuntik Jéeoba
17, 18. 1) ¿Baʼax k-tuklik yoʼolal le táankelem yéetel le x-lóoʼbayan paalaloʼob teʼ múuchʼulilaʼ? 2) ¿Baʼax táan u páaʼtik le táankelem yéetel le x-lóoʼbayan paalaloʼob meyajtik Dios yéetel chúukaʼan óolaloʼ?
17 Jach kiʼimak k-óol k-ilik yaʼab táankelem yéetel x-lóoʼbayan paalaloʼob táan u meyajtikoʼob Dios yéetel tuláakal u puksiʼikʼaloʼob. ¿Baʼax áantkoʼob utiaʼal maʼ u xuʼulul u beetkoʼob? U xokikoʼob le Biblia sáamsamaloʼ, u payalchiʼob yéetel u beetkoʼob baʼax maʼalob utiaʼal u kiʼimakkúuntkoʼob u yóol Jéeoba. Tuláakal le táankelem yéetel le x-lóoʼbayan paalaloʼobaʼ jach ku kiʼimakkúuntkoʼob u yóol u taataʼob bey xan u maasil sukuʼunoʼob teʼ múuchʼuliloʼ (Pro. 23:24, 25).
18 Le táankelem yéetel le x-lóoʼbayan paalaloʼob meyajtik Dios yéetel chúukaʼan óolalaʼ, yaan u pʼáatloʼob kuxtal yéetel u maasil máaxoʼob meyajtik Dios teʼ túumben Luʼum u yaʼalmaj u tsʼáaikoʼ (Apo. 7:9, 14). Teʼeloʼ yaan u kʼamikoʼob yaʼab utsiloʼob, tsʼoʼoleʼ sáamsamaleʼ yaan u maas kʼaj óoltkoʼob Jéeoba yéetel yaan u páajtal u tsʼáaikoʼob nojbeʼenil tiʼ mantatsʼ (Sal. 148:12, 13).
¿Jeʼel wa u páajtal a tsolkeʼ?
• ¿Baʼax meyajiloʼob jeʼel u páajtal u beetik le táankelem yéetel le x-lóoʼbayan paalaloʼob teʼ múuchʼuliloʼ?
• ¿Baʼaxten unaj k-xokik le Biblia yéetel k-tuukul tiʼ le baʼax ku yaʼalikoʼ?
• ¿Bix u yáantkoʼon le payalchiʼ utiaʼal k-maas natsʼikba tiʼ Jéeobaoʼ?
• ¿Baʼax utsiloʼob ku taasik le baʼax ku beetik le táankelem yéetel le x-lóoʼbayan paalaloʼob meyajtik Diosoʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 5]
¿Suuk wa a xokik le Biblia sáamsamaloʼ?