Kʼáatchiʼob ku beetaʼal

Wa Jéeoba u pʼeek u adorartaʼal yaanal diosoʼobeʼ, ¿baʼaxten túun maʼ tu castigartaj Aarón le ka tu beetaj le chan wakax de orooʼ?

Jeʼex u yaʼalik u libroi Éxodo capítulo 32, Aaroneʼ tu beetaj utúul chan wakax de oro, lelaʼ upʼéel baʼax ku bin tu contra le leyoʼ, tumen ku yaʼalik maʼ unaj u adorartkoʼob uláakʼ diosoʼobiʼ (Éxo. 20:3-5). Le oʼolal «sen kʼuuxilnaj xan [Jéeoba] yéetel Aarón, u kʼáat kaʼach u kíimse». Baʼaleʼ Moiseseʼ payalchiʼinaj yoʼolal u sukuʼun (Deu. 9:19, 20). Beyoʼ béeychaj le baʼax ku yaʼalik le Bibliaaʼ: «Le payalchiʼ ku beetaʼal [...] tumen juntúul máak utseʼ jach nojoch u páajtalil» (Sant. 5:16). Lelaʼ ku yeʼesik baʼax oʼolal maʼ castigartaʼab Aarón tumen Jéeobaiʼ. Baʼaleʼ yaan uláakʼ kaʼapʼéel baʼax oʼolal maʼ tu castigartiʼ.

Le yáaxoʼ, tumen Aaroneʼ úuch joʼopʼok u chúukpajal u yóol u meyajt Jéeoba. Le ka túuxtaʼab Moisés tu táan faraoneʼ, Jéeobaeʼ tu túuxtaj Aarón utiaʼal láakʼintik yéetel utiaʼal u tʼaan tu yoʼolal (Éxo. 4:10-16). Tu kaʼatúulaloʼob túuneʼ binoʼob tʼaan yéetel le reyoʼ, baʼaleʼ letiʼeʼ maʼ tu kʼamoʼobiʼ tumen jach chich u puksiʼikʼal. Le oʼolal le ka jóokʼoʼob tu luʼumil Egiptooʼ, Aaroneʼ úuch joʼopʼok u beetik baʼax ku yaʼalik Dios yéetel chúukaʼan óolal (Éxo. 4:21).

Le u kaʼapʼéeloʼ, letiʼe baʼax péeks u beet le chan wakax de orooʼ. Kʼaʼajaktoʼoneʼ Moiseseʼ tsʼoʼok cuarenta kʼiinoʼob naʼakak tu witsil Sinaí. Le Bibliaoʼ ku yaʼalikeʼ ilaʼab «tumen le israelitaʼob táan kaʼach u xáantal u yéemel Moisés tiʼ le puʼukoʼ», ka tu sen aʼaloʼob tiʼ Aarón ka u beet utúul dios, letiʼ túuneʼ tu beetaj le baʼax tu yaʼaloʼoboʼ (Éxo. 32:1-6). Baʼaleʼ le baʼax tu beetaj ka tsʼoʼokoʼ ku yeʼeskeʼ maʼ upʼéeliliʼ u tuukul yéetel le máaxoʼob adorart le beetbil diosoʼ, baʼaxeʼ chéen tumen sen aʼalaʼabtiʼeʼ ka tu beetaj. Le oʼolal le ka líikʼ Moisés utiaʼal u xuʼuls tiʼ le j-maʼ uʼuyajtʼaanoʼoboʼ, tuláakal u paalal Leví, ichiloʼobeʼ tiaʼan Aaroniʼ, tu tsʼáajubaʼob tu tséel Jéeoba. Ka tsʼoʼokeʼ láaj xuʼulsaʼab tiʼ le máaxoʼob péeks u maasil u adorartoʼob le chan wakaxoʼ, tuláakloʼobeʼ tres mil utúulaloʼob (Éxo. 32:25-29).

Ka tsʼoʼokeʼ Moiseseʼ tu yaʼalaj tiʼ le israelitaʼoboʼ: «Teʼexeʼ tsʼoʼok a sen kʼebantaleʼex» (Éxo. 32:30). Lelaʼ ku yeʼeskeʼ maʼ chéen Aarón kʼebanchajiʼ. Bey túunoʼ letiʼ yéetel u maasil israelitaʼoboʼ perdonartaʼaboʼob yéetel chʼaʼab óotsilil tiʼob tumen Jéeoba.

Ka máan kʼiineʼ, Jéeobaeʼ tu yaʼalaj tiʼ Moisés ka u tsʼáa Aarón u beet u nojoch j-kʼiinil, tu yaʼalajtiʼ: «Aaroneʼ u búukint le nookʼ beetaʼan chéen utiaʼaloʼ. Ku tsʼoʼokoleʼ wek le aceite tu yóokʼoloʼ, ka jumpáaykunt bey in j-kʼiineʼ» (Éxo. 40:12, 13). Lelaʼ ku yeʼeskeʼ tsʼoʼok u perdonartik, tumen tu yilaj jach baʼax yaan tu puksiʼikʼal, tu yileʼ maʼ u kʼáat u adorart yaanal diosoʼobiʼ.