Maʼ u jach lúubul a wóol ken a kanáant utúul a láakʼtsil kʼojaʼan

UTÚUL kiik ku kʼaabaʼtik Kimeʼ ilaʼab yaan upʼéel tumor tu tʼoʼolol u paach, maʼ úuch tiʼ leloʼ ka ilaʼabeʼ yaan cáncer tiʼ. * Steve, u yíichameʼ ku yaʼalik: «Táanileʼ luʼsaʼab le tumor tiʼoʼ ka tsʼoʼokeʼ beetaʼab radioterapia yéetel quimioterapia tiʼ. Lelaʼ tu beetaj u jach pʼáatal minaʼan u muukʼ yéetel pʼáat istikia u péek».

Chéen tukult bukaʼaj úuchik u yaatal u yóol Steve ka tu yilaj bix u muʼyaj u yatan. Maʼ xaaneʼ techeʼ yaan utúul a láakʼtsil táan u muʼyajtik upʼéel talam kʼojaʼanil wa táan u muʼyaj tumen tsʼoʼok u chʼíijil (Ecl. 12:1-7). Wa beyoʼ jach unaj a kanáantikaba utiaʼal u béeytal a kanáantik xan. Kʼaʼabéet a wilik maʼ u xuʼulul a tsʼáaik a wóol a meyajt Dios, utiaʼal u yantaltech u muukʼil a wáantik. ¿Bix jeʼel u páajtal u seguer u beetik máak le meyajoʼob tsʼaʼantiʼ teʼ múuchʼulil yéetel u kanáantik u láakʼtsil kʼojaʼan wa tsʼoʼok u chʼíijloʼ? ¿Bix jeʼel u yáantaj tuláakal le sukuʼunoʼob teʼ múuchʼuliloʼ?

Le baʼax unaj u beetaʼaloʼ

Utiaʼal maʼ u xuʼulul k-tsʼáaik k-óol k-meyajt Dios ken k-kanáant utúul k-láaʼtsileʼ, unaj k-kanik tsʼáaj u pʼiis baʼax k-beetik utiaʼal maʼ k-jach kaʼanal yéetel k-kʼojaʼantal xan. Jeʼex u yaʼalik Proverbios 11:2, «le ojéelajoʼ tiʼ yaan yéetel le [j-]kabal óoloʼoboʼ», wa le máaxoʼob ku kʼamkoʼob yaan baʼax maʼ tu páajtal u beetkoʼoboʼ. Le oʼolal wa maʼ k-kʼáat ka jach kaʼankoʼoneʼ, unaj k-ilik k-beetik chéen le baʼaxoʼob jach kʼaʼanantakoʼ.

Steveeʼ tu yeʼesaj naʼatil utiaʼal u kʼamik yaan baʼax maʼ tu páajtal u beetik. Letiʼeʼ ku meyaj utiaʼal u tsʼáaik baʼaxoʼob kʼaʼabéet ichil u yotoch, tsʼoʼoleʼ letiʼ u coordinadori le ancianoʼoboʼ yéetel letiʼ u superintendentei tiʼ servicio tiʼ upʼéel tiʼ le múuchʼuliloʼob yaan Irlandaoʼ. Yéetel ku meyaj ichil le Comité tiʼ Enlace yéetel Hospitaloʼob teʼ tuʼux kajaʼanoʼ.  Letiʼeʼ ku yaʼalik: «Kimeʼ mix utéen tu yaʼalaj wa maʼatech in jóoʼsik u súutukil utiaʼal in wantal tu yéetel, baʼaleʼ in wojel jach yaʼab le meyaj tsʼaʼan in beetoʼ. Le oʼolal ka tsʼoʼok in sen payalchiʼeʼ, tin chʼaʼatuklaj in xulik in beetik in coordinadori. Seguernaj in beetik in ancianoi, baʼaleʼ úuchik in pʼatik jujumpʼéel tiʼ le meyajoʼob kin beetik kaʼachoʼ, páajchaj in máansik maas yaʼab tiempo yéetel in watan yéetel páajchaj in maas áantik».

Ka chan maʼalobchaj Kimeʼ, letiʼobeʼ tu yiloʼob bix jeʼel u maas áantajoʼob teʼ múuchʼuliloʼ. Yéetel u yáantaj Kimeʼ, Steveeʼ páajchaj u kaʼa beetik le meyajoʼob ku beetik kaʼachoʼ. Letiʼeʼ ku yaʼalik: «Tu kaʼatúulaloʼoneʼ tsʼoʼok k-kanik k-il yaan baʼaxoʼob maʼ tu páajtal k-beetik yoʼolal le kʼojaʼaniloʼ. Jach kiʼimak in wóol yoʼolal le áantaj ku tsʼáaikten Jéeobaoʼ yéetel yoʼolal le áantaj ku tsʼáaikten in watnoʼ, tumen kex chan kʼojaʼaneʼ maʼatech u yaʼalik wa maʼatech in máansik tiempo tu yéetel, tsʼoʼoleʼ jach ku yáantken».

Beoraaʼ tuukulnakoʼon tiʼ baʼax tu beetaj utúul superintendente tiʼ circuito, ku kʼaabaʼtik Jerry yéetel Mary, u yatan, letiʼobeʼ yanchaj u pʼatkoʼob le meyaj ku beetkoʼob kaʼach utiaʼal u kanáantik u taataʼoboʼ, tumen tsʼoʼok u chʼíijloʼob. Marieʼ ku yaʼalik: «Toʼoneʼ  k-kʼáat k-beet k-misioneroi kaʼach táanxel luʼumil, baʼaleʼ tumen in wíicham minaʼan u sukuʼunoʼob mix u yíitsʼnoʼobeʼ, kʼaʼabéetchaj k-pʼáatal k-áant u taataʼob. Ka t-chʼaʼatuklaj k-pʼáatal Irlanda utiaʼal k-kanáantkoʼob. T-kanáantaj u papá Jerry tuláakal le kʼiinoʼob tu máansaj teʼ hospital tak ka kíimoʼ. Bejlaʼeʼ sáamsamal k-tʼanik in suegra yéetel maʼ náach yaniloʼon tiʼ utiaʼal u béeytal k-áantik tiʼ baʼaxoʼob kʼaʼabéettiʼ. Le sukuʼunoʼob teʼ múuchʼulil tuʼux yanoʼ jach ku yáantkoʼonoʼob utiaʼal k-kanáantik, lelaʼ ku tsʼáaik u páajtalil u seguer k-beetik le meyaj tsʼaʼantoʼonoʼ».

Bix jeʼel u yáantaj u maasileʼ

Le ka tʼaanaj Pablo tiʼ bix unaj u yáantaʼal le kiikoʼob kimen u yíichamoʼoboʼ, tu yaʼalaj: «Wa yaan máax maʼ tu táan óoltik u láakʼtsiloʼobeʼ, [maases] le u yotochnáaloʼoboʼ, tsʼoʼok u mixbaʼalkuntik le oksaj óolaloʼ yéetel [maas] kʼaas yanil tiʼ le máax maʼ tu yoksaj óoloʼ». Pabloeʼ tu yaʼalaj jach unaj u tsʼaʼabal le baʼaxoʼob kʼaʼabéet tiʼ le taatatsiloʼob tsʼoʼok u chʼíijloʼoboʼ yéetel tiʼ le abuelotsiloʼoboʼ, tumen leloʼ maʼalob u yilik Dios (1 Tim. 5:4, 8). Baʼaleʼ u maasil sukuʼunoʼob teʼ múuchʼuliloʼ unaj u yáantajoʼob xan.

Beoraaʼ tuukulnakoʼon tiʼ Hakan yéetel Inger, u yatan, letiʼobeʼ tsʼoʼok u chʼíijloʼob yéetel tiʼ kajaʼanoʼob Sueciaeʼ. Hakaneʼ ku yaʼalik: «Ka t-ojéeltaj yaan cáncer tiʼ in watneʼ jach tu péeksaj k-óol. Ingereʼ tʼaʼaj yéetel maʼatech u jach kʼojaʼantal kaʼachi. Baʼaleʼ bejlaʼeʼ unaj k-bin sáamsamal teʼ hospital utiaʼal k-chʼaʼik u tsʼaakoʼ. Tsʼoʼoleʼ le tsʼaak ku tsʼaʼabaltiʼoʼ jach ku beetik u pʼáatal minaʼan u muukʼ. Teʼ kʼiinoʼob jach kʼojaʼanoʼ maʼ béeychaj u jóokʼol mix tuʼuxiʼ, le oʼolal yanchaj in pʼáatal in kanáante». ¿Baʼax tu beetaj le sukuʼunoʼob teʼ múuchʼulil utiaʼal u yáantkoʼoboʼ?

Le ancianoʼob teʼ múuchʼuliloʼ tu yiloʼob u yuʼubkoʼob le muchʼtáambal tiʼ telefonooʼ. Tsʼoʼoleʼ bin xíimbaltbiloʼob tumen le sukuʼunoʼoboʼ, tʼaʼanoʼob tiʼ teléfono yéetel túuxtaʼab carta yéetel mejen tarjeta tiʼob. Hakaneʼ ku yaʼalik: «T-ilaj jach tu yáantoʼon Jéeoba bey xan le sukuʼunoʼoboʼ. Wa maʼ úuchik u yáantkoʼonoʼobeʼ bejlaʼa tsʼoʼok u lúubul k-fejeʼ. U maʼalobileʼ Ingereʼ tsʼoʼok u chan utstal, le oʼolal tsʼoʼok u joʼopʼol k-bin teʼ muchʼtáambaloʼob tu kaʼatéenoʼ». Le sukuʼunoʼob beetik tuláakal le ku páajtal utiaʼal u yáantik le kʼojaʼanoʼob yéetel le tsʼoʼok u chʼíijloʼob teʼ múuchʼuliloʼ ku yeʼeskoʼob «uts u [bisikubaʼob] mantatsʼ [...], tu kʼiiniloʼob yaj óoleʼ [beyoʼob] juntúul [...] sukuʼuneʼ» (Pro. 17:17).

Jéeobaeʼ jach maʼalob u yilik le áantaj k-tsʼáaikoʼ

Kex jach talam u kanáantaʼal utúul kʼojaʼaneʼ, ku taasik kiʼimak óolal u beetaʼal. Rey Davideʼ ku yaʼalikeʼ «kiʼ yóol le máax [áantik] le óotsil» yéetel le máaxoʼob muʼyajtik upʼéel talam kʼojaʼaniloʼ (Sal. 41:1).

¿Jach wa tu jaajil jeʼel u páajtal u kiʼimaktal u yóol le máaxoʼob kanáantik utúul u láakʼtsiloʼob kʼojaʼanoʼ? Jach tu jaajil, tumen Proverbios 19:17 ku yaʼalik: «Tsʼaa majnil tiʼ óotsileʼ, tiʼ Yuumtsil ku tsʼaʼabal. Yuumtsil xan bíin u boʼote». Jéeoba Dioseʼ maas jach ku yilik u yáantik le máaxoʼob meyajtik táan u muʼyajtikoʼob wa baʼax kʼojaʼaniloʼ yéetel ku yáantik le máaxoʼob kanáantkoʼoboʼ. Davideʼ tu yaʼalaj: «Yuumtsil[eʼ] ku tsʼáaik muukʼ tiʼ [le kʼojaʼan] tu kʼiinil chʼuyukbal tu kʼaan táan u mukʼya[joʼ]; ¡u kʼojaʼanileʼ yaan u suʼutul toj óolalil!» (Sal. 41:3). Tsʼoʼoleʼ wa ku joʼopʼol u aktáantik wa baʼax talmil le máax kanáantik le kʼojaʼanoʼ, yaan xan u yáantaʼal tumen Jéeoba.

¿Máasaʼ jach ku líiʼsik k-óol k-ojéeltik Jéeobaeʼ jach maʼalob u yilik k-kanáantik le k-láakʼtsiloʼob táan u muʼyajtkoʼob upʼéel kʼojaʼaniloʼ? Kex ku kʼaʼabéettal k-xupikba utiaʼal k-beetkeʼ, le Bibliaoʼ ku yaʼalikeʼ «leloʼobaʼ letiʼ le siibaloʼob utstutʼaan Jajal Diosoʼ» (Heb. 13:16).

[Tsolajiloʼob]

[U tsolajil le oochel teʼ táan juʼun 18]

Maʼ u xuʼulul a meyajtik Dios yéetel chaʼa a wáantaʼal