Unaj k-eʼesik tsiikil tiʼ le chʼijaʼanoʼoboʼ

TU JÁAL u kʼáaʼnáabil Californiaeʼ yaan ukúul tiʼ le cheʼob maas yaʼab u chʼaʼabal u fotoʼob tiʼ u maasil cheʼob tiʼ le yóokʼol kaabaʼ, u kʼaabaʼeʼ Ciprés Solitario. Ku yaʼalaʼaleʼ yaan maas tiʼ 250 jaʼaboʼob tiʼ. Le nojoch cheʼaʼ kʼaxaʼan yéetel kotaʼan xan u baʼpaach utiaʼal maʼ u lúubul.

Maʼ xaaneʼ le Ciprés Solitariooʼ ku beetik k-tuukul tiʼ le sukuʼunoʼob tsʼoʼok u chʼíijloʼoboʼ, letiʼobeʼ tsʼoʼok u jach chúukpajal u yóoloʼob u meyajtoʼob Dios, jeʼex utiaʼal u kʼaʼaytaʼal le maʼalob péektsiloʼ. Le profeta Joeloʼ tu yaʼaleʼ tu tsʼook kʼiinoʼobeʼ le «nuxiboʼoboʼ» yaan u tsʼáaikoʼob kʼaj óoltbil le baʼaxoʼob ku yaʼalik le Bibliaoʼ (Joel 2:28-32; Hch. 2:16-21). Lelaʼ jach bey u yúuchloʼ. Tuukulnakoʼon tiʼ le bukaʼaj horaʼob ku máanskoʼob táan u kʼaʼaytikoʼob «u maʼalob péektsil[il] le [reinooʼ]» (Mat. 24:14). Yaan tiʼ letiʼobeʼ tsʼoʼok u chúukpajal u yóol u aktáantoʼob chʼaʼapachtajiloʼob yéetel uláakʼ talmiloʼob. Wa chéen ukúul ciprés jach jatsʼuts u yilaʼal yéetel jach kanáantaʼan ikil u kʼaʼaxal bey xan ikil u koʼotol u baʼpacheʼ, le sukuʼunoʼob tsʼoʼok u chʼíijloʼoboʼ maas unaj u yeʼesaʼal tsiikil tiʼob yéetel u tratartaʼaloʼob tubeel.

Jéeobaeʼ tu yaʼalaj tiʼ le israelitaʼob úuchjeakiloʼ: «Waʼalen utiaʼal a tsikik juntúul nuxib» (Lev. 19:32). Ichil le máaxoʼob meyajtik Dios teʼ kʼiinoʼobaʼ yaan xan sukuʼunoʼob tsʼoʼok u chʼíijloʼob úuch joʼopʼok u beetkoʼob baʼax ku yaʼalik Diosiʼ (Miq. 6:8). Tumen ku beetkoʼob le baʼaxoʼob ku yaʼalik le Bibliaoʼ  ku yaʼalaʼaleʼ u sakil u pooloʼobeʼ bey upʼéel «péet [wa corona] yoʼolal tsiikil[eʼ]» (Pro. 16:31).

Pabloeʼ tu yaʼalaj tiʼ Timoteo: «Maʼ a kʼeyik le máax tsʼoʼok u chʼíijiloʼ; baʼaleʼ tsol u xikin bey jeʼel bix a taataeʼ». Tsʼoʼoleʼ tu yaʼalajtiʼ: «Bisaba yéetel le koʼoleloʼob tsʼoʼok u chʼíijloʼoboʼ bey jeʼel bix a maamaeʼ» (1 Tim. 5:1, 2). Úuchik u beetik Timoteo beyoʼ tu yeʼesaj tsiikil tiʼ le máaxoʼob tsʼoʼok u chʼíijloʼoboʼ. Leloʼ ku yeʼeskeʼ Jéeobaeʼ u kʼáat ka k-eʼes tsiikil ken tʼaanakoʼon yéetel le nukuch máakoʼoboʼ.

Romailoʼob 12:10 ku yaʼalik: «Táanilkunteʼex uláakʼoʼob yéetel ka a [tsikabaʼex] ta baatsileʼex». Le ancianoʼob teʼ múuchʼuliloʼoboʼ unaj u yeʼeskoʼob tsiikil tiʼ le nukuch máakoʼoboʼ. Baʼaleʼ u maasiloʼob xanoʼ unaj u beetkoʼob beyoʼ.

Lelaʼ upʼéel baʼax jach unaj u beetik le máaxoʼob tsʼoʼok u chʼíijil u taataʼob wa u abueloʼoboʼ. Wa chéen le Ciprés Solitario jach ku yilaʼal u kanáantaʼaloʼ, ¿maʼ wa maas unaj k-ilik kanáantik k-taataʼob wa k-abueloʼobiʼ? Upʼéel bix jeʼel k-beetkeʼ letiʼe ka k-chʼaʼa en cuentai baʼax ku yaʼalikoʼoboʼ yéetel maʼ k-beetik upʼéel baʼal chéen jeʼel bix k-tuklik maʼalobeʼ (Pro. 23:22; 1 Tim. 5:4).

Jéeoba Dioseʼ jach u yaabiltmaj le sukuʼunoʼob tsʼoʼok u chʼíijloʼoboʼ. Letiʼeʼ mix bikʼin ken u pʼatoʼob (Sal. 71:18). Baʼaxeʼ ku yáantkoʼob utiaʼal ka u yeʼesoʼob chúukaʼan óolal mantatsʼ. Toʼon xaneʼ unaj k-áantkoʼob yéetel k-eʼesik tsiikil tiʼob.

[U tsolajil le oochel teʼ táan juʼun 7]

Jeʼex u kanáantaʼal le Ciprés Solitariooʼ, le sukuʼunoʼob tsʼoʼok u chʼíijloʼoboʼ kʼaʼabéet u yeʼesaʼal tsiikil tiʼob yéetel u tratartaʼaloʼob tubeel

[U tsolajil le oochel teʼ táan juʼun 7]

American Spirit Images/age fotostock