Xiibeʼex, paakʼáalneneʼex utiaʼal le kiliʼich muukʼoʼ yéetel eʼeseʼex taak a meyajeʼex

«[Le máax] ku pakʼik baʼax uts utiaʼal kiliʼich [muukʼeʼ], tiʼ le kiliʼich [muukʼoʼ] bíin u joch kuxtal minaʼan u xuul.» (GAL. 6:8)

1, 2. ¿Bix u béeytal le baʼax ku yaʼalik Mateo 9:37 yéetel 38, yéetel baʼax jach kʼaʼabéet teʼ múuchʼuliloʼoboʼ?

 TEʼ KʼIINOʼOB kuxlikoʼonaʼ jach táan u béeytal le baʼax tu yaʼalaj Jesucristoaʼ: «Le joochoʼ jach yaʼab, baʼaleʼ le j-meyajoʼoboʼ jach jumpʼíitoʼob. Le oʼolaleʼ kʼáat óolteʼex tiʼ u Yuumil le joochoʼ ka u túuxt j-meyajoʼob utiaʼal jochik» (Mat. 9:37, 38). Jéeobaeʼ jach táan u núukik le payalchiʼob ku beetaʼal tiʼaʼ. Le oʼolal tu jaʼabil meeyjil kʼaʼaytaj 2009, yanchaj 2,031 túumben múuchʼuliloʼob, bey túunoʼ tiʼ tuláakal yóokʼol kaabeʼ tu chukaj 105,298 múuchʼuliloʼob. Yéetel okjaʼanaj 276,233 utúulal máak, lelaʼ óoliʼ 757 utúulal sáamsamal.

² Tumen táan u yaʼabtal le máaxoʼob meyajtik Diosoʼ, jach kʼaʼabéet sukuʼunoʼob noʼojaʼanoʼob utiaʼal nuʼuktaj yéetel kaʼansaj teʼ múuchʼuliloʼoboʼ (Efe. 4:11). Desde úuchileʼ Jéeobaeʼ ku tsʼáaik máaxoʼob nuʼuktik u káajal, yéetel k-ojel yaan u seguer u beetik. Tumen u profecíai Miqueas 5:5 ku yaʼalikeʼ, u kaajal Dios teʼ tu tsʼook kʼiinoʼobaʼ yaan u yantal «siete u nuukiloʼob» yéetel «ocho máakoʼob jach kʼaʼabéetoʼo[biʼ]», u kʼáat u yaʼaleʼ yaan u yantal yaʼab xiiboʼob noʼojaʼanoʼob utiaʼal nuʼuktaj ichil u kaajal.

3. ¿Baʼax u kʼáat u yaʼal u pakʼik máak «baʼax uts utiaʼal kiliʼich [muukʼ]»?

³ ¿Techeʼ tsʼoʼok wa a wokjaʼ? Wa beyoʼ, ¿baʼax jeʼel u yáantkech utiaʼal ka maas tsʼáa a wóol meyaj teʼ múuchʼuliloʼ? Letiʼe ka pakʼ «baʼax uts utiaʼal kiliʼich [muukʼoʼ]», lelaʼ u kʼáat u yaʼaleʼ a chaʼik u nuʼuktik a kuxtal u kiliʼich muukʼ Dios (Gal. 6:8). Unaj a wilik maʼ a «pakʼik baʼax utstutʼaan [a] luʼumkabil wíinklil», lelaʼ u kʼáat u yaʼaleʼ maʼ a bin tu paach chéen baʼaxoʼob utstawich yéetel maʼ a náaysik a wóol tiʼ baʼaloʼob maʼ tu yáantkech a maas meyajt Jéeoba. Kex tuláakal le máaxoʼob meyajtik Dios unaj u pakʼikoʼob «baʼax uts utiaʼal kiliʼich [muukʼoʼ]», lelaʼ maas unaj u beetaʼal tumen le xiiboʼob utiaʼal ka béeyak u tsʼaʼabal meyaj u beetoʼob teʼ múuchʼuliloʼ. Tumen jach kʼaʼabéet siervo ministerialoʼob yéetel ancianoʼobeʼ, le xookaʼ beetaʼan utiaʼal le xiiboʼoboʼ. Le oʼolaleʼ, sukuʼun kʼáat u yáantaj Dios ken a xakʼalxokte.

Eʼes taak a meyaj

4, 5. 1) ¿Baʼax meyajiloʼob unaj u tsʼáaik u yóol u beet le xiiboʼob tsʼoʼok u yokjaʼoboʼ? 2) ¿Bix jeʼel u yeʼesik máak u kʼáat ka tsʼaʼabak u beet u ancianoi wa u siervo ministerialileʼ?

⁴ Mix utúul xiib ku tsʼaʼabal u beet u ancianoi chéen beyoʼ. Kʼaʼabéet u tsʼáaik u yóol utiaʼal ka páatak u tsʼaʼabaltiʼ le «maʼalob meyaj[aʼ]» (1 Tim. 3:1). Ichil lelaʼ táakaʼan u yilik u yáantik u maasil sukuʼunoʼob tiʼ baʼaxoʼob kʼaʼabéettiʼob (xokaʼak Isaías 32:1, 2). Baʼaleʼ maʼ unaj u beetik chéen utiaʼal u jóoʼsik wa baʼax utsiliʼ mix yéetel uláakʼ tuukuliʼ, baʼaxeʼ unaj u beetik tumen taak u yáantaj.

⁵ Le máax u kʼáat u beet u ancianoi wa u siervo ministerialileʼ, unaj u tsʼáaik u yóol u beet le baʼax ku yaʼalik le Biblia utiaʼal ka tsʼaʼabaktiʼoʼ  (1 Tim. 3:1-10, 12, 13; Tito 1:5-9). Tuláakal le xiiboʼob tsʼoʼok u yokjaʼoboʼ unaj u tuklikoʼob: «¿Kin táakpajal wa mantatsʼ teʼ kʼaʼaytaj, yéetel kin wáantik wa uláakʼ sukuʼunoʼob ka u beetoʼob xan beyoʼ? ¿Kin wáantik wa u maasil tiʼ baʼaxoʼob kʼaʼabéettiʼob yéetel kin líiʼsik wa u yóoloʼob? ¿Kʼaj óolaʼanen wa tumen suuk in xokik le Bibliaoʼ? ¿Kin wilik wa in maas maʼalobkíintik bix in núukik le kʼáatchiʼob ku beetaʼal teʼ muchʼtáambaloʼoboʼ? ¿Kin tsʼáaik wa in wóol in beet le meyajoʼob ku yaʼalikten le ancianoʼoboʼ?» (2 Tim. 4:5). Le kʼáatchiʼobaʼ jach jeʼel u yáantik máakeʼ.

6. ¿Baʼax uláakʼ kʼaʼabéet u beetik le sukuʼunoʼob utiaʼal u tsʼaʼabal u maasil meyajtiʼob teʼ múuchʼuliloʼ?

⁶ ¿Baʼax uláakʼ kʼaʼabéet u beetik le sukuʼunoʼob utiaʼal u tsʼaʼabal meyaj u beetoʼob teʼ múuchʼuliloʼ? Kʼaʼabéet u yantaltiʼob «páajtalil bey xan [...] muukʼ tu yoʼolal u kiliʼich [muukʼ]» Dios (Efe. 3:16). Mix máak unaj u tsʼíiboltik u beetik u siervo ministeriali wa u ancianoi chéen utiaʼal u taaskuba nojbaʼalil. Baʼaxeʼ unaj u yilik bey upʼéel jatsʼuts meyaj ku tsʼaʼabal chéen tiʼ le máaxoʼob u tsʼaamaj u yóol u meyajtoʼob Diosoʼ. ¿Baʼax túun kʼaʼabéet u beetik le xiiboʼob utiaʼal u muʼukʼaʼankúuntik u fejoʼoboʼ? Kʼaʼabéet u kuxtaloʼob jeʼel bix «u yaʼalik le kiliʼich [muukʼoʼ]» yéetel u yeʼeskoʼob le jatsʼuts modos ku taal tiʼ letiʼoʼ (Gal. 5:16, 22, 23). Le ken a weʼes jeʼel u páajtal a beetik u maasil meyajoʼob teʼ múuchʼulil yéetel le ken a beet le baʼax ku yaʼalaʼaltechoʼ, ku «yilaʼal tumen [tuláakal] bix a bin táanil» (1 Tim. 4:15).

Xupaba yoʼolal u maasil

7. ¿Baʼaxoʼob ku kʼaʼabéettal u beetik máak utiaʼal u yáantik le sukuʼunoʼoboʼ?

⁷ U jaajileʼ yaʼab meyaj kʼaʼabéet u beetik máak utiaʼal u yáantik le sukuʼunoʼoboʼ, le oʼolal ku kʼaʼabéettal u xupkuba máak tu yoʼolaloʼob. Le ancianoʼoboʼ ku yilik u kanáantkoʼob le sukuʼunoʼoboʼ yéetel ku yáantkoʼob ken yanak talmiltiʼob. ¿Bix tu yuʼubiluba le apóstol Pablo úuchik u yáantik le sukuʼunoʼoboʼ?  Letiʼeʼ tu yaʼalaj tiʼ le corintoiloʼoboʼ: «Tin tsʼíibtaj yéetel u jaʼil in wich, tumen tin wuʼuyimba jach okʼom yéetel jach yaj in wóol; baʼaleʼ maʼ tin tsʼíibtaj utiaʼal in tsʼáaikteʼex yaayaj óolaliʼ, baʼaleʼ utiaʼal ka a wojéelteʼexeʼ in yaakunaj tiʼ teʼexeʼ jach nojoch» (2 Cor. 2:4). Lelaʼ ku yeʼeskeʼ Pabloeʼ jach tu xupuba utiaʼal u beetik le meyaj tsʼaʼabtiʼoʼ.

8, 9. Tsikbalt bix úuchik u xupkuba jujuntúul máakoʼob úuchjeakil utiaʼal u yáantkoʼob le máaxoʼob meyajt Diosoʼ.

⁸ Yaʼab xiiboʼobeʼ jach kʼaj óolanoʼob yoʼolal bix u xupkubaʼob utiaʼal u yáantkoʼob le máaxoʼob meyajtik Jéeobaoʼ. Jeʼex Noeiʼ, mix utéen tu yaʼalaj tiʼ u yatan yéetel tiʼ u paalal: «Ken tsʼoʼokok a beetkeʼex le arcaoʼ ka tʼankeneʼex utiaʼal ka okoken ta wéeteleʼexiʼ». Moisés xaneʼ maʼ tu yaʼalaj tiʼ le israelitaʼob kajaʼanoʼob kaʼach Egiptooʼ: «Tiʼ ken k-ilba tu jáal le Chak kʼáaʼnáaboʼ, ilawil a kʼuchleʼexiʼ». Josueiʼ maʼ tu yaʼaliʼ: «Túuxteʼex tʼambilen le ken tsʼoʼokok u lúubul u baʼpakʼiloʼob Jericó». Yéetel Isaíaseʼ maʼ tu yaʼaliʼ: «Jeʼel uláakʼ profetaoʼ, túuxt letiʼ» (Isa. 6:8).

⁹ Cristoeʼ tu chaʼaj u nuʼuktaʼal mantatsʼ tumen le kiliʼich muukʼoʼ, le beetik tu yóotaj u tsʼáa u kuxtal tu yoʼolal tuláakal máak (Juan 3:16). ¿Máasaʼ unaj k-eʼesik yéetel baʼaxoʼob k-beetik jach k-tsʼáaik nib óolal tiʼ Dios yoʼolal le yaabilaj tu yeʼesaj Jesús yéetel le úuchik u kíimil t-óolaloʼ? Utúul sukuʼun úuch joʼopʼok u beetik u ancianoileʼ ku yaʼalik: «Jach maʼatech u tuʼubulten le baʼax tu yaʼalaj Jesús tiʼ Pedrooʼ: “Kanáant túun in mejen j-tamanoʼob”. Tsʼoʼok in wilkeʼ jach ku yáantaj u tʼaan máak yéetel yaabilaj bey xan u yeʼesik u yutsil. Teneʼ jach utstintʼaan in bin in xíimbalt le sukuʼunoʼob tu yotochoʼoboʼ» (Juan 21:16).

10. ¿Baʼax unaj u péeksik le xiiboʼob u yáant u maasil jeʼex tu beetil Jesusoʼ?

¹⁰ Le xiiboʼob tsʼoʼok u yokjaʼoboʼ unaj u tratarkoʼob le sukuʼunoʼob jeʼex tu beetil Jesusoʼ, letiʼeʼ tu yaʼalaj: «Teen bíin in beet a jeʼeleʼex» (Mat. 11:28). Wa taak a beetik a ancianoileʼ, a fe tiʼ Dios yéetel a yaabilaj tiʼ le sukuʼunoʼob unaj u péekskech a beetoʼ. Maʼ tuklik wa jach talam u beetaʼal. Baʼaleʼ ¿kux túun wa yaan máax maʼ u kʼáat u xupuba yoʼolal u maasiliʼ? ¿Yaan wa baʼax jeʼel u yáantik utiaʼal ka taakchajak u beetkeʼ?

Taakchajak a wáantik u maasil

11. ¿Bix jeʼel u taaktal k-maas meyaj teʼ múuchʼuliloʼ?

¹¹ ¿Ka wuʼuyik wa bey maʼ tu páajtal a beetik uláakʼ meyajoʼob teʼ múuchʼuliloʼ? Wa beyoʼ, kʼáat u kiliʼich muukʼ Dios, tumen jeʼel u yáantkecheʼ (Luc. 11:13). U jaajileʼ Jéeoba péekskoʼon k-tsʼíibolt k-beet uláakʼ meyajoʼob, tumen u kiliʼich muukʼeʼ ku yáantkoʼon yéetel ku tsʼáaiktoʼon chúukaʼan óolal utiaʼal k-meyajtik (Fili. 2:13; 4:13). Le oʼolal kʼaʼabéet k-kʼáatik u yáantaj utiaʼal u taaktal k-maas meyaj teʼ múuchʼuliloʼ (xokaʼak Salmo 25:4, 5).

12. ¿Bix jeʼel u yantaltoʼon le naʼat kʼaʼabéet utiaʼal k-beetik le meyaj ku tsʼáaiktoʼon Jéeobaoʼ?

¹² Yaan sukuʼunoʼobeʼ ku yilkoʼob bey jach yaʼab áantaj kʼaʼabéet tiʼ le sukuʼunoʼoboʼ yéetel bey jach talam u beetaʼaleʼ. Wa ku tuklikoʼob maʼ u yojeloʼob bix jeʼel u yáantkoʼobeʼ. Wa beyoʼ, unaj u tsʼáaik u yóol u xokoʼob le Biblia yéetel le jóoʼsaʼaniloʼob utiaʼal u kanikoʼob bix unaj u beetkoʼoboʼ. Le oʼolal maʼalob ka k-tukle: «¿Suuk wa in xokik le Biblia yéetel kin kʼáatik wa tiʼ Dios ka u tsʼáaten naʼat?». Lelaʼ jach bey tu yaʼalil le disipulo Santiagooʼ: «Wa juntúul tiʼ teʼex ku bineltik naʼat tiʼeʼ, u kʼáat tiʼ Jajal Dios, Jajal Dioseʼ bíin u tsʼáa tiʼ; tumen letiʼeʼ ku tsʼáaik tiʼ tuláakal x-maʼ pʼiisil yéetel maʼ táan u chʼinik tu yich mix máak» (Sant. 1:5). ¿Ka creertik wa le baʼax ku yaʼalikoʼ? Kʼaʼajaktoʼoneʼ rey Salomoneʼ payalchiʼinaj tiʼ Dios, le oʼolal tsʼaʼab «kʼaj óolalil yéetel naʼatil [tiʼ]» utiaʼal u yojéeltik bix jeʼel u juzgartik tubeel u kaajil Israeleʼ (1 Rey. 3:7-14). Kex Jéeoba maʼatech u tsʼáaiktoʼon le bukaʼaj naʼat tu tsʼáaj tiʼ Salomonoʼ, baʼaleʼ k-ojel letiʼeʼ yaan u tsʼáaik le naʼat kʼaʼabéet tiʼ le máaxoʼob nuʼuktik le múuchʼuliloʼ (Pro. 2:6).

13, 14. 1) ¿Baʼax péeksaʼab u beet Pablo yoʼolal le yaabilaj tu yeʼesaj Cristooʼ? 2) ¿Baʼax unaj u péekskoʼon k-beet «u yaakunaj Cristo»?

 ¹³ Uláakʼ baʼax jeʼel u beetik u taaktal k-maas meyaj teʼ múuchʼuliloʼ, letiʼe ka tuukulnakoʼon tiʼ le baʼaxoʼob tsʼoʼok u beetik Jéeoba yéetel u Hijo t-óolaloʼ. Koʼoneʼex xakʼaltik baʼax ku yaʼalik 2 Corintoiloʼob 5:14 yéetel 15, NM. ¿Baʼaxten ku yaʼalaʼal «u yaakunaj Cristoeʼ ku péekskoʼon»? Tumen yoʼolal u nojoch yaabilajeʼ tu yuʼubaj u tʼaan u Taata yéetel tu kʼubaj u kuxtal t-óolal, lelaʼ ku péekskoʼon k-beet xan beyoʼ. Jeʼex Pabloeʼ, u yaabilaj Cristo nuʼukt u kuxtal, le oʼolal maʼ tu kaxtaj chéen u yutsiliʼ, baʼaxeʼ tu maas tsʼáa u yóol u meyajt Dios yéetel tu yáantaj uláakʼ máakoʼob bey xan le sukuʼunoʼoboʼ.

¹⁴ Le ken tuukulnakoʼon tiʼ le yaabilaj tu yeʼesaj Cristo tiʼ wíinikoʼ, ku péekskoʼon k-tsʼáa nib óolal tiʼ Dios. Toʼoneʼ k-naʼatik maʼ maʼalob ka k-pakʼ «baʼax utstutʼaan [...] [k-]luʼumkabil wíinklil» wa ka xiʼikoʼon tu paach chéen baʼaxoʼob k-tsʼíiboltkiʼ le oʼolal maʼatech k-kaxtik chéen k-utsil. Baʼaxeʼ k-tsʼáaik táanil ichil k-kuxtal le meyaj u tsʼaamajtoʼon Diosoʼ. Le yaabilajoʼ ku péekskoʼon k-meyajt le sukuʼunoʼoboʼ (xokaʼak Galaciailoʼob 5:13). Yéetel le kabal óolaloʼ ku péekskoʼon k-eʼes tsiikiltiʼob mantatsʼ yéetel maʼ k-aʼalik baʼaloʼob maʼ jaajtak tu contraʼobiʼ, tumen le baʼaloʼob beyaʼ tiʼ Satanás u taal (Apo. 12:10).

Unaj u yáantaj tuláakal ichil le familiaoʼ

15, 16. ¿Bix u yáantaj le familia utiaʼal u tsʼaʼabal u beet u siervo ministeriali wa u ancianoi le íichamtsiloʼ?

¹⁵ Ken ilaʼak wa jeʼel u páajtal u beetik u siervo ministeriali wa u ancianoi utúul taatatsileʼ, ku chʼaʼabal en cuentai baʼaxoʼob ku beetik u yatan yéetel u paalal. Le bix u tsʼaamil u yóoloʼob u meyajtoʼob Dios yéetel le bix kʼaj óolaʼaniloʼoboʼ, ku chʼaʼabal en cuentai utiaʼal u yilaʼal wa yaan u tsʼaʼabal u beete wa maʼ. Lelaʼ ku yeʼesik u kʼaʼabéetil u yáantaʼal tumen u yatan yéetel u paalal utiaʼal ka béeyak u meyaj teʼ múuchʼulil bey siervo ministeriali wa ancianoiloʼ (xokaʼak 1 Timoteo 3:4, 5, 12).

¹⁶ Jéeobaeʼ ku kiʼimaktal u yóol ken u yil táan u yáantaj tuláakal ichil le familiaoʼ (Efe. 3:14, 15). Le oʼolal kex yaʼab meyaj ku beetik utúul sukuʼun teʼ múuchʼuliloʼ unaj u nuʼuktik «tubeel u yotoch». Le ancianoʼob yéetel le siervo ministerialoʼoboʼ unaj u yantaltiʼob cada semana le adoración ich familiailoʼ. Tsʼoʼoleʼ unaj u jóokʼol xan tu yéeteloʼob teʼ kʼaʼaytajoʼ. Tuláakal ichil le familia unaj u yáantkoʼob le taatatsil tiʼ baʼaxoʼob ku chʼaʼatuklik u beetkoʼ.

¿A kʼáat wa ka tsʼaʼabaktech tu kaʼatéen le meyaj ka beetik kaʼachoʼ?

17, 18. 1) ¿Baʼax unaj u beetik utúul sukuʼun wa tsʼoʼok u xuʼulul u beetik u siervo ministeriali wa u ancianoi? 2) ¿Baʼax tuukulil unaj u yantal tiʼ le sukuʼun tsʼoʼok u xuʼulul u beetik u siervo ministeriali wa u ancianoiloʼ?

¹⁷ Maʼ xaaneʼ techeʼ a yáax beetmaj a siervo ministeriali wa a ancianoi. Baʼaleʼ wa láayliʼ a yaabiltmaj Jéeobaeʼ, letiʼeʼ láayliʼ jach u yaabiltmech xaneʼ (1 Ped. 5:6, 7). Maʼ xaan xaneʼ áantaʼabech a wil u kʼaʼabéetil a kʼexik jujumpʼéel baʼaloʼob maʼ maʼalobtak ka beetkiʼ. Wa beyoʼ, beet le baʼax aʼalaʼabtechoʼ yéetel chaʼa u yáantkech Dios utiaʼal a wutskíintik. Maʼ a kʼuuxil yoʼolal le baʼax úuchoʼ. Baʼaxeʼ eʼes  naʼatil yéetel tsʼáa a wóol a wutskíinte. Utúul sukuʼun úuch joʼopʼok u beetik u ancianoileʼ, ku yaʼalik baʼax tu beetaj le ka xuʼul u beetkoʼ: «Tin wilaj maʼ u xuʼulul in bin muchʼtáambal, in jóokʼol kʼaʼaytaj yéetel in xokik le Biblia jeʼex táan in beetik in ancianoi kaʼachoʼ. Tin kanaj in weʼes chúukaʼan óolal, tumen kex kin tuklik kaʼach yaan in tsʼaʼabal in beet in ancianoi chéen ichil upʼéel wa kaʼapʼéel jaʼabeʼ, máan óoliʼ siete jaʼaboʼob ka kaʼa tsʼaʼabten. Upʼéel baʼax áanten teʼ kʼiinoʼob jeʼeloʼ letiʼe u yaʼalaʼalten maʼ u xuʼulul in tsʼáaik in wóoloʼ».

¹⁸ Wa bey xan u yúuchultechaʼ, maʼ u lúubul a wóol. Tuukulnen tiʼ bix u yáantkech Jéeoba teʼ kʼaʼaytajoʼ bey xan ichil a wotoch. Líiʼs u yóol a familia, xíimbalt le kʼojaʼanoʼoboʼ yéetel líiʼs u yóol le lubaʼan u yóoloʼoboʼ. Tsʼoʼoleʼ ilawil a táakpajal mantatsʼ teʼ kʼaʼaytajoʼ yéetel tsʼáa nojbeʼenil tiʼ Jéeoba jeʼex u beetik u maasil u J-jaajkunajoʼobeʼ (Sal. 145:1, 2; Isa. 43:10-12). *

Jach ilawil wa jeʼel u béeytal a beetik u maasil meyajeʼ

19, 20. 1) ¿Baʼax ku yaʼalaʼal ka u beet tuláakal le xiiboʼob okjaʼanajaʼanoʼoboʼ? 2) ¿Baʼax ken k-il teʼ tuláakʼ xookoʼ?

¹⁹ Bejlaʼeʼ jach kʼaʼabéet u maasil ancianoʼob yéetel siervo ministerialoʼob. Le oʼolal k-aʼalik tiʼ le xiiboʼob okjaʼanajaʼanoʼoboʼ ka u yiloʼob wa jeʼel u páajtal u beetkoʼobeʼ, maʼalob ka u tukloʼob: «¿Baʼax ku bineltikten utiaʼal ka tsʼaʼabakten le meyajoʼobaʼ?». Jach kʼaʼabéet u kʼáatkoʼob u yáantaj le kiliʼich muukʼoʼ. Beyoʼ jeʼel u páajtal u yilkoʼob u kʼaʼananil u beetkoʼobeʼ.

²⁰ Tuláakal le sukuʼunoʼob teʼ múuchʼuliloʼ jach ku kiʼimaktal u yóoloʼob yoʼolal le meyaj ku beetik le siervo ministerialoʼob yéetel le ancianoʼoboʼ. Jeʼex tsʼoʼok k-ilkoʼ, ken k-beet baʼaloʼob maʼalobtak utiaʼal k-áantik u maasileʼ ku taasiktoʼon kiʼimak óolal, tsʼoʼoleʼ beyoʼ táan k-paakʼáal utiaʼal le kiliʼich muukʼoʼ. Baʼaleʼ kʼaʼabéet k-kanáantik maʼ k-beetik u yaatal u yóol le kiliʼich muukʼoʼ. Teʼ tuláakʼ xookoʼ yaan k-ilik bix jeʼel k-kanáantik maʼ k-beetkeʼ.

[Tsolajiloʼob]

¿Baʼax jeʼel a núukikeʼ?

• ¿Baʼax ku yaʼalik u profecíai Miqueas 5:5?

• ¿Baʼax táakaʼan ichil u xupkuba máak yoʼolal u maasil?

• ¿Bix jeʼel u tsʼíiboltik máak u maas meyaj tu yoʼolal le sukuʼunoʼoboʼ?

• ¿Baʼaxten kʼaʼabéet u yáantaj tuláakal ichil le familia utiaʼal ka u beet u siervo ministeriali wa u ancianoi le íichamtsiloʼ?

[U kʼáatchiʼiloʼob le xookoʼ]

[U tsolajil le oochel teʼ táan juʼun 25]

¿Bix jeʼel a weʼesik a kʼáat ka tsʼaʼabaktech u maasil meyaj teʼ múuchʼuliloʼ?