Baʼax jeʼel u yáantaj ken tuʼusuk máak tumen u núup yéetel yaanaleʼ

MARGARITA yéetel Raúl, u yíichameʼ, úuch joʼopʼ u meyajtkoʼob Jéeoba bey precursorileʼ. * Baʼaleʼ maʼ úuch síijik u yáax hijoeʼ, Rauleʼ joʼopʼ u náachtal tiʼ Jéeoba, káaj u beetik baʼax kʼaas, ka tak jóoʼsaʼab teʼ múuchʼuliloʼ. Margaritaeʼ ku yaʼalik: «Ka úuch leloʼ tin wuʼuyaj óolak kíimken. Jach yaachaj in wóol, maʼ in wojel baʼax unaj in beetik kaʼachiʼ».

Jane xaneʼ yaanal bix úuchik u beetaʼal u muʼyaj tumen u yíicham. Maʼ úuch tsʼoʼokok u beeloʼobeʼ ka káaj u maltratartaʼal. Letiʼeʼ ku yaʼalik: «Le kʼiin ka tu yáax loxenoʼ, tin wuʼuyaj bey síischaj in wíinklileʼ, tin wuʼuyaj tu mixbaʼalkúunten yéetel jach tu suʼlakkúunten. Ka tu kʼáatajten ka in perdonarteʼ tin perdonartaj. Leloʼ bey seguernajik in beetik cada utéen ken u loxenoʼ, kin tuklik kaʼacheʼ tumen táan in meyajtik Dioseʼ unaj in perdonartik yéetel in tuʼubsik baʼax ku beetikten. Tsʼoʼoleʼ kin tuklik kaʼacheʼ wa kin tsikbaltik tiʼ wa máax, tak tiʼ le ancianoʼob, baʼax ku beetiktenoʼ bey ka in traicionarteʼ. Le oʼolaleʼ ich yaʼab jaʼaboʼobeʼ tin perdonartaj le baʼaxoʼob tu beetajtenoʼ. Kin tuklik kaʼacheʼ yaan baʼax kʼaʼabéet in beetik utiaʼal u maas yaabiltiken. Ka tu pʼaten yéetel in chan hijaeʼ, tin wuʼuyaj bey yaan baʼax maʼ maʼalob tsʼoʼok in beetkeʼ, tin tukleʼ unaj kaʼach in waʼalik wa in beetik wa baʼax utiaʼal maʼ u pʼatken».

 Maʼ xaaneʼ, jeʼex úuchik tiʼ Margarita yéetel Janeeʼ, techeʼ táan a máansik wa baʼax talmil yoʼolal baʼax tu beetaj a wíicham. Wa maʼ xaaneʼ jach yaachajaʼan a wóol tumen a watneʼ tsʼoʼok u tuskech yéetel yaanal. Jach jeʼex u yaʼalik upʼéel profecía tiʼ le Bibliaoʼ kuxaʼanoʼon tu tsʼook kʼiinoʼob. Yéetel ku yaʼalikeʼ jach yaan u yantal talmil ichil le familiaoʼ, tumen maʼ kun eʼesbil yaabilajiʼ yéetel u maas yaʼabil le máakoʼoboʼ yaan u chíikbeskoʼob yéetel le baʼaxoʼob kʼaastak ku beetkoʼob maʼ táan u meyajtikoʼob Diosiʼ (2 Tim. 3:1-5). Tak le máaxoʼob meyajtik Diosoʼ yaan u muʼyajoʼob yoʼolal le baʼaloʼobaʼ. Le oʼolal ¿baʼax jeʼel u yáantkech utiaʼal ka jóoʼkech táanil wa tsʼoʼok a tuʼusul tumen a núup yéetel yaanaleʼ?

Paktaba jeʼex u paktikech Jéeobaeʼ

Maʼ xaaneʼ tu káajbaleʼ maʼ ta creertik wa jeʼel u beetaʼaltech upʼéel nojoch kʼaas tumen utúul máax jach a yaabiltmeʼ. Maʼ xaaneʼ jeʼel tak a tuklik tiʼ teech yaan u culpai baʼax tsʼoʼok u beetik a núupeʼ.

Baʼaleʼ maʼ unaj u tuʼubultecheʼ tak Jesús, kex maʼ kʼebaneʼ, traicionartaʼab tumen utúul máax jach u yaabiltmaj. Táanil tiʼ u yéeyik u doce apostoloʼobeʼ tu kʼáataj u yáantaj Dios ich payalchiʼ, yéetel le doce máaxoʼob tu yéeyoʼ jach u tsʼaamaj u yóol u meyajtoʼob Jéeoba kaʼachi. Le oʼolal maʼ xaaneʼ jach yaachaj tu yóol úuchik u traicionartaʼal tumen Judas (Luc. 6:12-16). Jéeobaeʼ maʼ tu yaʼalaj wa tiʼ u Hijo yanchaj u culpai le baʼax tu beetaj Judasoʼ.

U jaajileʼ minaʼan utúul íichamtsil wa atantsil beetik tuláakal baʼax jach maʼalob. Tu kaʼatúulal ku beetik baʼax maʼ jach maʼalobiʼ. Utúul salmistaeʼ tu yaʼalaj: «Yuumtsil, wa ka tsʼáa a wich tiʼ le kʼasaʼaniloʼ, ¿máax jeʼel u pʼáatal waʼalakbal ta táaneʼ?» (Sal. 130:3). Le oʼolal le íichamtsil yéetel le atantsiloʼ unaj u paklan perdonartkubaʼob, jeʼex u beetik Jéeobaeʼ (1 Ped. 4:8).

Baʼaleʼ «cada juntúul tiʼ toʼoneʼ yaan u tsolik tiʼ Jajal Dios baʼax u beetmaj» (Rom. 14:12). Wa le íichamtsil wa le atantsil ku joʼopʼol u beetik kʼaas yéetel baʼaxoʼob ku beetik wa baʼaxoʼob ku yaʼalikeʼ yaan u kʼubik cuenta tiʼ Jéeoba. Letiʼeʼ u pʼeek u beetaʼal loob yéetel u yaʼalaʼal baʼax kʼaas, minaʼan baʼax oʼolal ka pʼáatak maʼ u yeʼesik tsiikil yéetel yaabilaj máak tiʼ u núup (Sal. 11:5; Efe. 5:33; Col. 3:6-8). Tuláakal le máaxoʼob meyajtik Dios, le xiib wa le koʼolel, ku suuktal u jáan pʼuʼujul yéetel maʼ tu yóotik u maʼalobkíintik u modoseʼ jeʼel tak u jóoʼsaʼal teʼ múuchʼuliloʼ (Gal. 5:19-21; 2 Juan 9, 10). Le íichamtsil wa le atantsil traicionartaʼanoʼ maʼ unaj u tuklik wa kʼaas ka u yaʼal tiʼ le ancianoʼob le baʼax maʼ maʼalob ku beetik u núupoʼ. Jéeobaeʼ ku chʼaʼik óotsilil tiʼ le máaxoʼob táan u muʼyajoʼob yoʼolal bix u tratartaʼaloʼoboʼ.

Ken lúubuk máak tiʼ núupkʼebaneʼ ku kʼebantal tu táan u núup bey xan tu táan Jéeoba (Mat. 19:4-9; Heb. 13:4). Wa le máax ku traicionartaʼal ku beetik le baʼax ku yaʼalik le Bibliaoʼ minaʼan baʼax oʼolal u yuʼubik tiʼ letiʼ yaan u culpai baʼax tu beetaj u núup.

Kʼaʼajaktecheʼ Jéeobaeʼ u yojel bix a wuʼuykaba. Ichil le Bibliaoʼ letiʼeʼ ku ketikuba yéetel utúul íichamtsil utiaʼal u kaajil Israel, yéetel yaʼab tekstoʼob eʼesik bix úuchik u muʼyaj ka pʼaʼat tumen le kaajoʼ (Isa. 54:5, 6; Jer. 3:1, 6-10). Jéeobaeʼ u yojel bukaʼaj muʼyaj yéetel okʼol tsʼoʼok a beetik yoʼolal le baʼax tu beetaj a núupoʼ (Mal. 2:13, 14). Yéetel u yojel kʼaʼabéet a wáantaʼal yéetel u líiʼsaʼal a wóol.

Bix u líiʼsaʼal k-óol tumen Jéeoba

Upʼéel tiʼ le baʼaxoʼob ku meyaj tiʼ Jéeoba utiaʼal u líiʼsik u yóol máakoʼ letiʼe múuchʼuliloʼ. Janeʼ ku yaʼalik: «Le superintendente tiʼ circuitooʼ taal u xíimbalten teʼ kʼiinoʼob jach lubaʼan in wóoloʼ. Letiʼeʼ u yojel jach lubaʼan in wóol tumen in wíichameʼ tsʼoʼok u kʼáatik ka k-divorciartba. Le oʼolal tu jóoʼsaj u súutukil utiaʼal u tsikbal tin wéetel, letiʼeʼ tu yáanten tuukul tiʼ baʼax ku yaʼalik 1 Corintoiloʼob 7:15. Le tekstoʼob tu xokaj in wuʼuy yéetel le baʼaxoʼob tu yaʼalajtenoʼ, tu yáantenoʼob utiaʼal ka xuʼuluk  in wuʼuyik tiʼ teen yaan u culpai baʼax tu beetaj in wíicham yéetel tu yáanten utiaʼal ka yanakten jeetsʼelil». *

Margaritaeʼ ku kʼaʼajsik bix úuchik u yáantaʼal tumen Jéeoba teʼ múuchʼuliloʼ: «Ka tin wilaj in wíicham maʼ arrepentirnajaʼaneʼ, binen yéetel in mejen paalal kajtal yaanal kaaj. Tin kaxtaj upʼéel naj yaan kaʼapʼéel u cuartoi utiaʼal k-kajtal. Ka sáaschaj tuláakʼ kʼiineʼ, jach yaachajaʼan in wóol táan in jóoʼsik k-nuʼukuloʼob. Chéen ka joʼopʼ u kʼoʼopol le joonajoʼ. Tin tuklaj u yuumil le naj ku tʼaanoʼ, tumen tiʼ kajaʼan tu tséelikeʼ. Baʼaleʼ maʼ letiʼiʼ. Letiʼe kiik tsʼaamil xook tiʼ in maama yéetel tu yáantaj u maasil in láakʼtsiloʼob utiaʼal k-kʼaj óoltik u jaajiloʼ. Letiʼeʼ maʼ u yojel wa tiʼ kajaʼanen teʼ naj jeʼeloʼ, chéen tʼaanajiʼ tumen u yuumil le najoʼ tsʼoʼok u yaʼalik jeʼel u xook tu yéeteleʼ. Ka tin wileʼ jach kiʼimakchaj in wóol. Ka joʼopʼ in wokʼol. Tin waʼalajtiʼ le baʼax ku yúuchultenoʼ ka joʼopʼ u yokʼol tin wéetel. Tu séebaʼanileʼ tu yilaj bix jeʼel u páajtal k-bin tu yéetel teʼ muchʼtáambal teʼ kʼiin jeʼeloʼ. Le sukuʼunoʼob teʼ múuchʼuliloʼ tu kʼamoʼon yéetel kiʼimak óolal, yéetel le ancianoʼoboʼ tu yiloʼob ka tsʼaʼabaktoʼon le áantaj kʼaʼabéet utiaʼal u seguer k-meyajtik Diosoʼ».

Bix jeʼel u yáantaj u maasil sukuʼunoʼoboʼ

Tuláakal le sukuʼunoʼob teʼ múuchʼuliloʼ jejeláas bix jeʼel u yáantajoʼobeʼ. Jeʼex le ka ook meyaj Margaritaeʼ, aʼalaʼabtiʼ tumen upʼéel familia teʼ múuchʼulil jeʼel u kanáantaʼal u paalal ken suunakoʼob tu xookoʼob wa ku kʼaʼabéettaleʼ.

Margaritaeʼ ku yaʼalik: «Baʼax maas utschaj tin tʼaaneʼ letiʼe u yaʼaliktoʼon le sukuʼunoʼob yéetel le kiikoʼob ka múul jóoʼkoʼon tu yéeteloʼob teʼ kʼaʼaytajoʼ». Le máaxoʼob beetik beyaʼ táan u beetkoʼob le baʼax ku yaʼalik le tekstoaʼ: «Áantabaʼex ta baatsileʼex utiaʼal a bisikeʼex a kuucheʼex, tsʼoʼokbeseʼex beyoʼ u yaʼalmajtʼaan Cristo» (Gal. 6:2).

Le máaxoʼob ku muʼyajoʼob yoʼolal le baʼaxoʼob beetaʼab tumen u núupoʼoboʼ jach ku líikʼil u yóoloʼob yoʼolal le yaabilaj ku yeʼesaʼaltiʼoboʼ. Ka pʼaʼat Monique yéetel kantúul u paalaleʼ pʼaʼat xan 15,000 dolaroʼob u boʼote, letiʼeʼ ku yaʼalik: «Le sukuʼunoʼob yéetel le kiikoʼob teʼ múuchʼuliloʼ jach tu yáantenoʼob. Maʼ in wojel baʼax jeʼel in beetik wa maʼ úuchik u yáantkenoʼobeʼ. Jéeobaeʼ tsʼoʼok u tsʼáaik máaxoʼob áantkoʼon, letiʼobeʼ ku jóoʼskoʼob u súutukil utiaʼal u yáantkoʼob in paalal. Yoʼolal lelaʼ, in paalaleʼ tsʼoʼok u maas tsʼáaik u yóol u meyajtoʼob Jéeoba. Cada ken in kʼáat áantajeʼ, le  ancianoʼoboʼ ku tsʼáaikoʼobten. Ken kʼaʼabéetchajak in tsikbaltik baʼax ku yúuchulteneʼ, letiʼobeʼ ku yuʼubikoʼob baʼax kin waʼalik» (Mar. 10:29, 30).

Baʼaleʼ le maʼalob amigoʼoboʼ u yojloʼob maas maʼalob maʼ u kʼaʼajskoʼob le baʼax uchaʼanoʼ (Ecl. 3:7). Margaritaeʼ ku yaʼalik: «Teneʼ maas utstintʼaan in tsikbal yéetel le kiikoʼob teʼ túumben múuchʼulil yoʼolal le kʼaʼaytaj, le xookoʼob k-tsʼáaikoʼ yéetel yoʼolal le paalaloʼoboʼ..., maʼ in kʼáat tʼaan tiʼ le talmiloʼob yantenoʼ. Teneʼ utstintʼaan maʼ u kʼaʼajskoʼob ten».

Maʼ sutik u jeel le baʼax beetaʼabtechoʼ

Yaan kʼiineʼ le íichamtsil wa atantsil traicionartaʼanoʼ u yojel maʼ tiʼ letiʼ yanchaj u culpailiʼ. Baʼaleʼ jach ku yaatal u yóol ikil u muʼyaj yoʼolal le baʼax tu beetaj u núupoʼ. Le oʼolal wa maʼ a luʼsik ta tuukul le baʼax tu beetoʼ, jeʼel u taaktal a sutik u jeeleʼ. Baʼaleʼ leloʼ jeʼel u beetik u xuʼulul a tsʼáaik a wóol a meyajt Jéeobaeʼ.

Wa ku joʼopʼol u yantal tiʼ máak le tuukul beyoʼ, maʼalob ka u kʼaʼajs le baʼax tu beetaj Josué yéetel Caleboʼ. Letiʼobeʼ tu tsʼáaj u kuxtaloʼob tu chiʼ kíimil le ka bin u yiloʼob bix le luʼum kun tsʼaabiltiʼob tumen Jéeobaoʼ. Baʼaleʼ u maasil máakoʼob bin u yiloʼob le luʼumoʼ maʼ tu yeʼesoʼob fejiʼ yéetel tu beetoʼob maʼ u yuʼubaʼal u tʼaan Jéeoba tumen u maasil israelitaʼoboʼ. Yaan tak jujuntúul tiʼ letiʼobeʼ tu yóotaj u muruxtuntoʼob Josué yéetel Caleb, tumen letiʼobeʼ tu yaʼaloʼob tiʼ le kaaj ka chúukpajak u yóol u beetoʼob le baʼax ku yaʼalik Jéeobaoʼ (Núm. 13:25–14:10). Kex tu kaʼatúulaloʼob tu beetoʼob baʼax maʼalobeʼ, yanchaj u máanoʼob xan cuarenta jaʼaboʼob teʼ desierto yéetel u maasil israelitaʼob beet baʼax maʼ maʼaloboʼ.

Maʼ xaaneʼ Josué yéetel Calebeʼ jach yaachaj tu yóoloʼob yoʼolal le baʼax tu beetaj u maasil israelitaʼoboʼ, baʼaleʼ maʼ tu chaʼaj u lúubul u yóoloʼobiʼ. Baʼaxeʼ tu yiloʼob maʼ u xuʼulul u meyajtkoʼob Jéeoba. Tu tsʼoʼokbal le cuarenta jaʼaboʼob tu máansoʼob teʼ desiertooʼ, chéen letiʼob yéetel le levitaʼob béeychaj u yookloʼob teʼ Luʼum Aʼalaʼan u Tsʼaʼabloʼ (Núm. 14:28-30; Jos. 14:6-12).

Maʼ xaaneʼ yaan u xáantal táan a muʼyaj yoʼolal le baʼax tu beetaj a núupoʼ. Yéetel maʼ xaaneʼ yaan a pʼatik a núup, tuláakal lelaʼ jeʼel u beetik a jach chiʼichnaktaleʼ wa a máansik óotsilileʼ. Baʼaleʼ maʼ chaʼik u kʼastal a tuukul yoʼolal le baʼaxoʼob ka muʼyajtikoʼ, baʼaxeʼ kʼaʼajaktecheʼ Jéeobaeʼ yaan u castigartik le máax beetik baʼax maʼ maʼalob, jeʼex tu beetil yéetel le israelitaʼob teʼ desiertooʼ (Heb. 10:30, 31; 13:4).

¡Jeʼel u páajtal a jóokʼol táanileʼ!

Maʼ chaʼik u kʼastal a tuukul yoʼolal le baʼaxoʼob ku yúuchultechoʼ. Baʼaxeʼ ilawil a tuukul tiʼ le baʼaxoʼob ku yaʼalik Jéeobaoʼ. Janeʼ ku yaʼalik: «In wuʼuyik u xookil U Pʼíich Tulumil Kanan yéetel ¡Despertad! tu yáanten jóokʼol táanil. Le muchʼtáambaloʼoboʼ jach ku yáantkenoʼob xan. Kin wilik in núukik le kʼáatchiʼob ku beetaʼaloʼ, lelaʼ ku yáantken utiaʼal maʼ in jach chʼíikil tuukul tiʼ le baʼaxoʼob ku yúuchultenoʼ. Le kʼaʼaytajoʼ jach ku yáanten xan. Ken in wáant u maasil u tsʼáa u fejoʼob tiʼ Jéeobaeʼ ku muʼukʼaʼantal xan in fe. Yéetel in tsʼáaik xook tiʼ wa máax yéetel le Bibliaoʼ ku yáantken tuukul tiʼ le baʼaxoʼob maas kʼaʼanantakoʼ».

Moniqueʼ ku yaʼalik: «In bin mantatsʼ teʼ muchʼtáambaloʼob yéetel in táakpajal teʼ kʼaʼaytajoʼ tsʼoʼok u yáantken in aktáant le baʼaxoʼob ku yúuchultenoʼ. Bejlaʼeʼ teen yéetel in paalaleʼ jach k-bisikba tubeel bey xan yéetel le sukuʼunoʼoboʼ. Le baʼaxoʼob tin muʼyajtoʼ jach yaʼab baʼax tu kaʼansajten. Jach talam tin wilaj, baʼaleʼ yéetel u yáantaj Jéeobaeʼ tsʼoʼok u páajtal in jóokʼol táanil».

Teech xaneʼ jeʼel u páajtal a jóokʼol táanil ken a aktáan upʼéel talmil beyaʼ. Kex jach yaachajaʼan a wóol yoʼolal le baʼax beetaʼabtechoʼ ilawil a beetik le baʼax tu yaʼalaj Pabloaʼ: «Maʼ unaj k-kaʼanal k-beet utsiʼ, tumen wa maʼ tu lúubul k-óoleʼ tu kʼiinil bíin joochnakoʼon» (Gal. 6:9).

[Tsolajiloʼob]

[U tsolajil le oochel teʼ táan juʼun 31]

Le máaxoʼob tsʼoʼok u pʼaʼatloʼob tumen u núupoʼoboʼ jach ku kiʼimaktal u yóoloʼob ken áantaʼakoʼob teʼ kʼaʼaytajoʼ