Muʼuchʼoʼob tumen le yaabilajoʼ le baʼaxoʼob kaʼansaʼab teʼ muchʼtáambal ku beetaʼal cada jaʼaboʼ

LE MÁAXOʼOB muchʼukbaloʼob tu Najil Asambleaʼob yaan tu kaajil Jersey City (Nueva Jersey, Estados Unidos) jach kiʼimak u yóoloʼob. Tu jaʼatskabil 3 tiʼ octubre tiʼ 2009, tu muchʼuba maas tiʼ cinco mil sukuʼunoʼob utiaʼal le muchʼtáambal 125 ku beetaʼal cada jaʼab tumen le Watch Tower Bible and Tract Society of Pennsylvania. Tsʼoʼoleʼ, tu yóoxpʼéel najiloʼob Betel yaan Estados Unidos yéetel u najil Betel yaan Canadaeʼ, yaʼab sukuʼunoʼob tu muchʼubaʼob utiaʼal u yuʼuboʼob yéetel u yiloʼob tiʼ video le baʼaxoʼob kaʼansaʼaboʼ. Tuláakal le sukuʼunoʼob uʼuy le baʼaxoʼob kaʼansaʼab ich óoxpʼéel horaoʼ 13,235 utúulaloʼob, letiʼobeʼ tu muchʼubaʼob yoʼolal u yaabilajoʼob tiʼ Jéeoba.

Le muchʼtáambaloʼ káajsaʼab tumen Geoffrey Jackson, ku meyaj ichil le Cuerpo Gobernanteoʼ, letiʼeʼ tu yaʼalaj ka máanak le coro utiaʼal ka u kʼay jujumpʼéel túumben kʼaayoʼoboʼ. Le sukuʼun nuʼukt le corooʼ David Splane, ku meyaj xan ichil le Cuerpo Gobernanteoʼ, letiʼeʼ tu tsolaj ichil u chan súutuk bix u meyaj le kʼaayoʼob ichil le adoración ku tsʼaʼabal tiʼ Jéeobaoʼ. Invitartaʼab tuláakal le muchʼukbaloʼob ka u kʼayoʼob óoxpʼéel tiʼ le túumben kʼaayoʼoboʼ, yáaxeʼ kʼaʼay tumen le corooʼ, tsʼoʼoleʼ ka kʼaʼay tumen tuláakal le muchʼukbaloʼoboʼ. Le corooʼ chéen teʼ muchʼtáambal kʼaaynajaʼ, lelaʼ maʼ unaj u beetaʼal bey teʼ muchʼtáambaloʼoboʼ mix teʼ asambleaʼoboʼ.

Aʼalaʼab bix u bin le meyaj ku beetaʼal tu najiloʼob Beteloʼ

Ka tsʼoʼokeʼ máan cinco sukuʼunoʼob tsolik bix u bin le meyaj ku beetik u najil Betel teʼ luʼumil tuʼux ku meyajoʼoboʼ, cada utúuleʼ táakaʼanoʼob ichil u comitei le u najil Betel tuʼux u taaloʼoboʼ. Le sukuʼun Kenneth Little, tiʼ u luʼumil Canadaoʼ, tu yaʼaleʼ maʼ kun xáantal ken joʼopʼok u jóoʼskoʼob revistaʼob utiaʼal Estados Unidos yéetel Canadá, leloʼ yaan u beetik u maas yaʼabtal diez utéenel le meyaj ku beetkoʼoboʼ. Utiaʼal lelaʼ yaan u meyajtiʼob upʼéel túumben imprenta kun meyaj ich 16 horaʼob sáamsamal.

Le sukuʼun Reiner Thompson xanoʼ tʼaanaj tiʼ le kʼaʼaytaj ku beetaʼal tu luʼumil República Dominicanaoʼ, yéetel le sukuʼun Albert Olih, tʼaanaj tiʼ le meyajoʼob ku beetaʼal tu luʼumil Nigeriaoʼ. Le sukuʼun Emile Kritzinger, ku meyaj tu luʼumil Mozambiqueoʼ, tu yaʼaleʼ tu jaʼabil 1992 kʼaʼam u j-jaajkunajoʼob Jéeoba bey upʼéel religión teʼ luʼumil jeʼeloʼ, baʼaleʼ táanil tiʼ leloʼ xáanchaj táan u chʼaʼapachtaʼaloʼob. Teʼ tu tsʼook jaʼaboʼobaʼ tsʼoʼok u maas yaʼabtal j-kʼaʼaytajoʼob teʼ óoxpʼéel luʼumiloʼobaʼ. Le sukuʼun Viv Mouritz, tiʼ u luʼumil Australiaoʼ, tʼaanaj tiʼ bix u bin le meyaj ku beetaʼal tu luʼumil Timor Oriental, ku nuʼuktaʼal tumen u najil Betel tiʼ Australia.

Le comiteʼob tiʼ le Cuerpo Gobernanteoʼ

Tu jaʼabil 1976, tuláakal le meyaj ku beetik u j-jaajkunajoʼob Jéeobaoʼ tsʼaʼab yáanal u nuʼuktaj seis comiteʼob tiʼ le Cuerpo Gobernanteoʼ. Ka máan kʼiineʼ tsʼaʼab u páajtalil u yáantaʼaloʼob tumen jujuntúul sukuʼunoʼob maʼ yéeyaʼanoʼob utiaʼal u binoʼob kaʼaniʼ, bejlaʼeʼ 23 utúulul ku meyaj yéeteloʼobiʼ. Kʼáatchiʼitaʼab seis utúulal tiʼ letiʼobiʼ, tuláakloʼobeʼ 341 jaʼaboʼob joʼopʼok u meyajoʼob bey precursori wa betelitai; beyoʼ cada utúuleʼ yaan óoliʼ 57 jaʼaboʼob joʼopʼok u beetik le meyajaʼ.

Le yáax kʼáatchiʼitaʼaboʼ Don Adams, letiʼeʼ káaj u meyaj tu najil Betel tu jaʼabil 1943. Letiʼeʼ tu tsoleʼ ichil le Comité tiʼ Coordinadoroʼ ku táakpajal u coordinadori le uláakʼ cinco comiteʼoboʼ, lelaʼ ku tsʼáaik tuʼux u múuchʼ meyajoʼob. Le comiteaʼ letiʼ nuʼuktik le baʼaxoʼob ku beetaʼal ken yanak chʼaʼapachtajil, baʼaxoʼob yaan yil yéetel autoridadoʼob, ken úuchuk upʼéel nojoch loobil wa uláakʼ baʼaxoʼob beetik u muʼyaj u j-jaajkunajoʼob Jéeoba tiʼ tuláakal le Luʼumaʼ.

 Le sukuʼun Dan Molchan xanoʼ tu yaʼaleʼ, le Comité tiʼ Personaloʼ ku yilik ka yanak tuláakal le baʼax kʼaʼabéet tiʼ le 19,851 betelitaʼob tiʼ tuláakal le Luʼumaʼ. Ka tsʼoʼokeʼ David Sinclair xaneʼ tu tsoleʼ le Comité tiʼ Publicacionoʼ ku yilik u maʼanal le nuʼukuloʼob yéetel le baʼaxoʼob ku meyaj tu najiloʼob Beteloʼ. Ka tsʼoʼokeʼ le sukuʼun Robert Wallen, tsʼoʼok óoliʼ sesenta jaʼaboʼob joʼopʼok u meyaj Beteloʼ, tu yaʼaleʼ le Comité tiʼ Serviciooʼ ku nuʼuktik le kʼaʼaytaj bey xan le múuchʼuliloʼoboʼ. Tsʼoʼoleʼ le sukuʼun William Malenfant xanoʼ tu tsoleʼ le Comité tiʼ Enseñanzaoʼ letiʼ ilik le baʼaxoʼob kun kaʼansbil teʼ asambleaʼob tiʼ distritooʼ. Tu tsʼookeʼ le sukuʼun John Wischuk xanoʼ tu tsoleʼ le Comité tiʼ Redaccionoʼ ku nuʼuktik u tsʼíibtaʼal yéetel u xakʼaltaʼal le xookoʼob kun jóokʼol teʼ jóoʼsaʼaniloʼoboʼ. *

U tekstoi u jaʼabil 2010 ku tʼaan tiʼ le yaabilajoʼ

Le uláakʼ tsoltʼaanoʼobaʼ máansaʼab tumen óoxtúul sukuʼunoʼob ku meyajoʼob ichil le Cuerpo Gobernanteoʼ. Le yáax máanoʼ Gerrit Lösch, letiʼeʼ tu káajsaj u tsoltʼaan yéetel le kʼáatchiʼaʼ: «¿A kʼáat wa ka yaabiltaʼakech?». Letiʼeʼ tu tsoleʼ le yaabilajoʼ upʼéel baʼax jach kʼaʼabéet tiʼ tuláakal máak yéetel jach nojoch bix u yáantaj ichil u kuxtal máak. Tu yaʼalaj xaneʼ letiʼe yaabilaj péeks Jéeoba ka u beetoʼonoʼ. Yéetel k-yaabilaj tiʼ Jéeobaeʼ ku péekskoʼon k-kʼaʼayt le maʼalob péektsiloʼ yéetel ka k-kaʼans uláakʼ máakoʼob.

Le yaabilajaʼ ku nuʼuktaʼal tumen le baʼaxoʼob ku yaʼalik le Bibliaoʼ, le oʼolal k-eʼesik tiʼ tuláakal máak, tak tiʼ le máaxoʼob pʼekmiloʼonoʼ (Mat. 5:43-45). Teʼ tsoltʼaanaʼ beetaʼab u tuukul le muchʼukbaloʼob tiʼ le baʼaxoʼob tu muʼyajtaj Jesús t-oʼolaloʼ. Kex jaʼajatsʼaʼab, pʼaʼat kʼaasil, túubaʼab yéetel loʼomeʼ tu kʼáataj ich payalchiʼ ka perdonartaʼak le soldadoʼob baj teʼ cheʼoʼ. ¿Máasaʼ leloʼ ku maas péekskoʼon k-yaabilte? Ka tsʼoʼokeʼ le sukuʼun Lösch xanoʼ tu yaʼaleʼ u tekstoi u jaʼabil 2010, chʼaʼan tiʼ 1 Corintoiloʼob 13:7 yéetel 8: Le yaakunajoʼ tuláakal ku mukʼyajtik. Le yaakunajoʼ mix bikʼin ku kíimil. Jeʼex túun k-ilkoʼ maʼ chéen yantoʼon u páajtalil k-kuxtal utiaʼal minaʼan u xuuliʼ, baʼaxeʼ yantoʼon u páajtalil k-eʼesik yaabilaj yéetel k-yaabiltaʼal.

¿Táan wa u xuʼupultoʼon gasolina?

Le sukuʼun Samuel Herd xanoʼ tu káajsaj u tsoltʼaan yéetel le kettʼaanaʼ. Koʼox tuklikeʼ utúul k-amigoeʼ táan u biskoʼon tu coche k-xíimbalt upʼéel kúuchil kex 12 leguas u náachil (óoliʼ 50 kilómetros). Desde tuʼux kulukbaloʼoneʼ k-ilkeʼ maʼ yaʼab gasolina yantiʼ. K-aʼaliktiʼ, baʼaleʼ letiʼeʼ ku yaʼalik maʼ k-chiʼichnaktal, tumen yaan kex cuatro litros pʼaatliʼ. Chéen u súutuk tiʼ leloʼ ku jeʼelel le cocheoʼ. ¿Máasaʼ chéen kunel úuchik u káajsik u bin chéen yéetel upʼíit gasolina? Maas maʼalob kaʼach ka u chup u tanquei. Lelaʼ bey xan jeʼel u yúuchul tiʼ le máaxoʼob meyajtik Diosoʼ, le oʼolal kʼaʼabéet xan u chupkoʼob u «tanqueʼob» yéetel le naʼat ku taal tiʼ Jéeobaoʼ.

Utiaʼal maʼ u xuʼupultoʼon «gasolinaeʼ» kʼaʼabéet k-chupik «k-tanque» mantatsʼ. Lelaʼ kampʼéel bix jeʼel u páajtal k-beetkeʼ. Yáaxeʼ, letiʼe ka k-il k-xokik le Biblia teʼ kʼiin k-jóoʼsmoʼ. Baʼaleʼ maʼ chéen unaj k-xookiʼ, kʼaʼabéet k-ilik k-kʼaj óoltik tubeel le Bibliaoʼ  yéetel k-naʼatik baʼax ku kaʼansik. U kaʼapʼéeleʼ, letiʼe ka yanaktoʼon le Adoración ich familiailoʼ. ¿K-jóoʼsik wa u súutukil utiaʼal k-chupik tubeel «k-tanque» cada semana, wa chéen upʼíit «gasolina» k-tsʼáaikiʼ? U yóoxpʼéeleʼ, k-bin tiʼ tuláakal le muchʼtáambaloʼob tuʼux k-xokik le Biblia yéetel u maasil sukuʼunoʼoboʼ. Yéetel, u kampʼéeleʼ, letiʼe k-kaxtik upʼéel kúuchil maʼalob utiaʼal k-tuukul tiʼ le baʼaxoʼob ku yaʼalik Jéeobaoʼ. Toʼoneʼ k-kʼáat k-beet jeʼex le salmistaaʼ, letiʼeʼ tu yaʼalaj: «Ku kʼaʼajalten le kʼiinoʼob úuch máankoʼoboʼ yéetel kin tuklik tuláakal le baʼax a beetmajoʼ» (Sal. 143:5).

Le máaxoʼob meyajtik Diosoʼ «yaan u léembaloʼob»

Le sukuʼun John Barr máans le u tsʼook tsoltʼaanoʼ tu tsolaj baʼax u kʼáat u yaʼal le trigo yéetel le kʼaakʼas xíiwoʼ (Mat. 13:24-30, 38, 43). Le kettʼaan tu beetaj Jesusaʼ ku tʼaan tiʼ le «jooch» ku beetaʼal utiaʼal u muchʼaʼal «u paalal le reinooʼ» yéetel ku jumpáaykuntaʼal le kʼaakʼas xíiw utiaʼal tóokbiloʼ.

Le sukuʼunoʼ tu yaʼaleʼ le joochoʼ yaan u kʼuchul u kʼiinil u xuʼulul. Tu chʼaʼachiʼitaj Mateo 24:34, NM, tuʼux ku yaʼalik: «le generacionaʼ jumpuliʼ maʼ kun xuʼulultiʼ táanil tiʼ u yúuchul tuláakal le baʼaloʼobaʼ». Ka tu xokaj kaʼatéen le tʼaanoʼobaʼ: «Lelaʼ ku yeʼeskeʼ Jesuseʼ táan u tʼaan tiʼ u kuxtal le sukuʼunoʼob yéeyaʼanoʼob utiaʼal u binoʼob kaʼan pʼaatloʼob way Luʼum tu jaʼabil 1914, le ka káaj u yilaʼal le chíikulaloʼob eʼesik tsʼoʼok u káajal u reinaroʼ, yaan u kuxtaloʼob tiʼ upʼéeliliʼ tiempo yéetel le kun ilik u káajal le nojoch muʼyajiloʼ». Maʼ k-ojel jaypʼéel jaʼab ku xáantal u kuxtal le «generacionaʼ», baʼaleʼ táan u tʼaan tiʼ le kaʼa jaats sukuʼunoʼob ku múuchʼ kuxtaloʼob tiʼ upʼéeliliʼ tiempooʼ. Kex jejeláas u jaʼabil le sukuʼunoʼob yéeyaʼanoʼoboʼ, tuláakloʼobeʼ ku múuchʼ kuxtaloʼob tiʼ upʼéeliliʼ tiempo teʼ tu tsʼook kʼiinoʼobaʼ. Lelaʼ ku yáantkoʼon k-ileʼ, le ken káajak le nojoch muʼyajiloʼ yaan tiʼ le sukuʼunoʼob yéeyaʼanoʼob pʼaatloʼob way Luʼumoʼ, jeʼex le maas táankelmoʼob kuxlajoʼob tu kʼiinil kuxaʼan le máaxoʼob il u káajal le baʼaxoʼob aʼalaʼan tu jaʼabil 1914.

«U paalaloʼob le reinooʼ» táan u páaʼtikoʼob u binoʼob kuxtal kaʼan. Baʼaleʼ kex táan k-páaʼtik k-bin kaʼan wa k-pʼáatal kuxtal way Luʼumeʼ unaj u chúukpajal k-óol k-meyajt Dios yéetel k-chaʼik u juul k-sáasil tak tu xuul. Toʼoneʼ jach kiʼimak k-óol kuxlikoʼon tu kʼiinil táan u joʼochol le «trigooʼ».

Ka tsʼoʼok le u tsʼook kʼaayoʼ, le payalchiʼoʼ beetaʼab tumen Theodore Jaracz, ku meyaj xan ichil le Cuerpo Gobernanteoʼ. ¿Máasaʼ jach jatsʼuts le baʼaxoʼob kaʼansaʼab teʼ muchʼtáambalaʼ?

[Tsolajiloʼob]

[U tsolajil le oochel teʼ táan juʼun 5]

XOOK UTIAʼAL ANCIANOʼOB

Teʼ muchʼtáambal ku yantal cada jaʼabaʼ, le sukuʼun Anthony Morris, ku meyaj xan ichil le Cuerpo Gobernanteoʼ, tu tsʼáaj ojéeltbileʼ le ancianoʼoboʼ yaan u kʼamkoʼob uláakʼ upʼéel áantaj. Tu yookbal u jaʼabil 2008, káaj u tsʼaʼabal le xook tiʼ le ancianoʼob tu oficinailoʼob Patterson (Nueva York), tu luʼumil Estados Unidos. Le xook 72 maʼ úuch tsʼoʼokokiʼ, tak bejlaʼeʼ tsʼoʼok u táakpajal 6,720 utúulul ancianoʼobiʼ. Baʼaleʼ yaʼab u bin, tumen chéen tu luʼumil Estados Unidoseʼ yaan maas tiʼ 86,000 ancianoʼobiʼ. Le oʼolal le Cuerpo Gobernanteoʼ tu yaʼalaj ka beetaʼak xan upʼéel xook Brooklyn (Nueva York), lelaʼ yaan u káajal 7 tiʼ diciembre tiʼ 2009.

Ich kaʼapʼéel meseʼ yaan u kaʼansaʼal kantúul superintendente viajante Patterson, ken tsʼoʼokkeʼ yaan u binoʼob Brooklyn u tsʼaʼob le xookoʼ. Tsʼoʼoleʼ yaan u kaʼansaʼal uláakʼ kantúul sukuʼunoʼob utiaʼal u kaʼansajoʼob tu jeel le yáax kantúuloʼ, tumen letiʼobeʼ yaan u binoʼob u tsʼaʼob le xook tu Najiloʼob Asambleaʼob yéetel tu Najiloʼob Reino. Lelaʼ bey kun beetbil tak ken u chuk doce utúulul máaxoʼob kun tsʼáaik xook tiʼ seis jejeláas tuʼuxoʼob cada semana ich inglés tu luʼumil Estados Unidosoʼ. Tsʼoʼoleʼ yaan u kaʼansaʼal uláakʼ kantúul sukuʼunoʼob utiaʼal ka u tsʼaʼob le xook ich kastlanoʼ. Le xookaʼ maʼ tu kʼexik le xook ku kʼaabaʼtik Escuela del Ministerio del Reino. Baʼaxeʼ le xookaʼ beetaʼan utiaʼal u yáantaʼal le ancianoʼob utiaʼal ka u beetoʼob tubeel le meyaj tsʼaʼantiʼoboʼ. U maasil najiloʼob Betel tiʼ tuláakal le yóokʼol kaabaʼ yaan u káajal u tsʼáaikoʼob le xook teʼ tu Najiloʼob Reino yéetel tu Najiloʼob Asambleaʼob tu jaʼabil kʼaʼaytaj 2011.

[U tsolajil le oochel teʼ táan juʼun 4]

Le muchʼtáambal ku beetaʼal cada jaʼaboʼ káaj yéetel kʼaayoʼob chʼaʼanoʼob tiʼ le túumben libro Kʼaaynakoʼon tiʼ Jéeoba