Unaj k-paklan líiʼsik k-óol
Unaj k-paklan líiʼsik k-óol
«Líikʼs óolintabaʼex yéetel muʼukʼaʼankíintabaʼex ta baatsileʼex.» (1 TES. 5:11)
1. ¿Baʼax utsiloʼob k-kʼamik ichil u kaajal Jéeoba, baʼaleʼ baʼax talmiloʼob láayliʼ táan aktáantikeʼ?
TOʼONEʼ jach yaʼab utsiloʼob k-kʼamik, tumen tiaʼanoʼon ichil u kaajal Jéeobaeʼ. Yáaxeʼ ku páajtal k-bisikba tu yéetel. Tsʼoʼoleʼ tumen k-beetik le baʼaxoʼob ku yaʼalik le Bibliaoʼ maʼatech k-muʼyajtik le talmiloʼob ku yantal tiʼ le máaxoʼob beetik baʼaloʼob kʼaastakoʼ. Yéetel yaan k-amigoʼob u kʼáatoʼob ka yanaktoʼon kiʼimak óolal. ¿Máasaʼ jach yaʼab le utsiloʼob k-kʼamikoʼ? Baʼaleʼ u maas yaʼabil le sukuʼunoʼob teʼ múuchʼuliloʼ jejeláas talmiloʼob ku aktáantkoʼob, yaneʼeʼ ku talamtal u naʼatik baʼax ku kaʼansik le Bibliaoʼ, yaneʼ kʼojaʼan, lubaʼan u yóol yoʼolal baʼax ku yúuchultiʼ wa yoʼolal baʼax maʼ maʼalob tu beetiʼ. Tsʼoʼoleʼ tuláakloʼon k-muʼyaj yoʼolal le baʼaloʼob ku sen úuchul teʼ kʼasaʼan yóokʼol kaabaʼ.
2. ¿Baʼax unaj k-beetik ken joʼopʼok u aktáantik talmil le sukuʼunoʼoboʼ, yéetel baʼaxten?
2 U jaajileʼ jach ku yaatal k-óol ken k-il baʼaxoʼob ku sen muʼyajtik utúul sukuʼun. Jeʼex tu yaʼalil Pabloeʼ, le múuchʼuliloʼ bey upʼéel wíinklileʼ, le oʼolal «wa junxéetʼ le wíinklil ku mukʼyajoʼ, tuláakal le uláakʼ u xéexetʼaloʼ ku mukʼyajoʼob xan» (1 Cor. 12:12, 26). Ken yanak talmil tiʼ utúul sukuʼuneʼ unaj k-áantik. Le oʼolaleʼ maʼalob ka k-xakʼalt baʼax tu beetaj jujuntúul máaxoʼob meyajt Dios úuchjeakil utiaʼal u yáantkoʼob le máaxoʼob aktáant wa baʼax talmiloʼ. Ken k-il cada upʼéeleʼ maʼalob ka k-tukle: «¿Bix jeʼel u páajtal in beetik xan beyoʼ? ¿Bix jeʼel u páajtal in líiʼsik u yóol le sukuʼunoʼob teʼ múuchʼuliloʼ?».
«Tu bisoʼob jumpáayil»
3, 4. ¿Bix áantaʼabik Apolos tumen Áquila yéetel Priscila?
3 Ka bin Apolos kajtal tu kaajil Efesoeʼ, tsʼokaʼaniliʼ u káajal u kʼaʼaytajeʼ, u libroi Beetaʼanoʼobeʼ ku yaʼalik: «Ku tʼaan yéetel chúukaʼan óolal, jach tʼáalkab u kaʼansaj tu yoʼolal Jesús». Baʼaleʼ «chéen u kʼaj óol u tsʼaa okjaʼ Juan», maʼ u yojel wa unaj u tsʼaʼabal u yokjaʼ máak «tu kʼaabaʼ le Taataoʼ, le Paaloʼ yéetel le kiliʼich [muukʼoʼ]». ¿Baʼaxten? Tumen maʼ xaaneʼ chéen le maʼalob péektsil kʼaʼaytaʼab tumen u tsaypachoʼob Juan Bautista tu yuʼuboʼ wa chéen le tu kʼaʼaytaj u disipuloʼob Jesús táanil tiʼ le Pentecostés tiʼ u jaʼabil 33 tiʼ le yáax siglooʼ. Kex jach tu jaajil u yóol ku kʼaʼaytaj kaʼacheʼ, yaʼab baʼaxoʼob maʼ u yojliʼ. Baʼaleʼ áantaʼab tumen uláakʼ u disipuloʼob Jesús. ¿Bix úuchik u beetkoʼob? (Hch. 1:4, 5; 18:25; Mat. 28:19.)
4 Ka uʼuyaʼab u kʼaʼaytaj Apolos teʼ sinagoga tumen Áquila yéetel Priscila, u yatneʼ, tu bisoʼob jumpáayil utiaʼal u maas tsolkoʼob tiʼ le baʼaxoʼob maʼ u yojel kaʼachoʼ (xokaʼak Beetaʼanoʼob 18:24-26). Lelaʼ upʼéel bix úuchik u yeʼesik u yaabilajoʼob tiʼ. Maʼ xaaneʼ letiʼobeʼ tu kanáantoʼob bix úuchik u yaʼalikoʼobtiʼ utiaʼal u yáantkoʼob tubeel yéetel utiaʼal maʼ u yuʼubik bey chéen táan u yaʼalikoʼob baʼal tiʼeʼ. Tumen chéen baʼax maʼ u yojleʼ letiʼe bix káajik le yáax múuchʼuliloʼoboʼ. Maʼ xaaneʼ letiʼeʼ jach tu tsʼáaj u diosboʼotikil úuchik u yáantaʼal u naʼat le baʼaloʼob jach kʼaʼabéetaʼ. Yéetel le baʼaxoʼob túumbentak tu yojéeltoʼ páajchaj u yáantik «jach yaʼab» le sukuʼunoʼob yanoʼob tu kaajil Acayaoʼ yéetel tu kʼaʼaytaj tubeel le maʼalob péektsiloʼ (Hch. 18:27, 28).
5. ¿Baʼax áantajil ku tsʼáaik u millonesi sukuʼunoʼob kʼaʼaytik le Reinooʼ, yéetel baʼax utsiloʼob ku taasik?
5 Bejlaʼeʼ u millonesi u j-jaajkunajoʼob Jéeobaeʼ jach kiʼimak u yóoloʼob úuchik u yáantaʼaloʼob u naʼatoʼob le baʼaxoʼob ku kaʼansik le Bibliaoʼ, le oʼolal maʼ xaaneʼ jach maʼalob u biskubaʼob yéetel le máaxoʼob áantoʼoboʼ. U suukaʼanileʼ, le máaxoʼob áantoʼoboʼ yaʼab utéenel bin u tsʼaʼob xook tiʼob, baʼaleʼ chúukpaj u yóol u beetoʼob, tumen u yojloʼob le baʼax ku beetkoʼoboʼ jeʼel u tsʼáaik u páajtalil u salvartikuba le máax ku xookoʼ (Juan 17:3). Bukaʼaj wal úuchik u kiʼimaktal u yóoloʼob le ka tu yiloʼob bix u kʼaʼamal u jaajil tumen u xoknáaloʼob, bix u tsʼáaikoʼob ichil u kuxtaloʼob le baʼax ku kanikoʼoboʼ yéetel bix úuchik u kʼubik u kuxtaloʼob utiaʼal u beetkoʼob baʼax ku yaʼalik Jéeoba.
«Ku yaʼalikoʼob baʼax uts tu yoʼolal»
6, 7. 1) ¿Baʼaxten yéeyaʼab Timoteo tumen Pablo utiaʼal ka xiʼik kʼaʼaytaj tu yéetel? 2) ¿Baʼax utsiloʼob tu kʼamaj Timoteo úuchik u múul meyaj yéetel le apostoloʼ?
6 Tu kaʼapʼéel viajei u kʼaʼaytaj Pablo tu noj kaajil Listraeʼ bin yéetel Silas. Teʼeloʼ tiʼ tu kʼaj óoltoʼob Timoteoiʼ. «Le sukuʼunoʼob kajakbaloʼob Listra yéetel Iconioeʼ ku yaʼalikoʼob baʼax uts tu yoʼolal», maʼ xaaneʼ Timoteoeʼ yaan kex u pʼíit maas tiʼ 20 jaʼaboʼob tiʼ. Eunice, u maama, yéetel Loida, u abuelaeʼ, ku meyajtkoʼob Dios, baʼaleʼ u taataeʼ maʼatech (2 Tim. 1:5). Maʼ xaaneʼ Pabloeʼ tsʼoʼok kaʼapʼéel jaʼab u kʼaj óoltoʼob, le ka máan tu kaajil Listra teʼ tu yáax viajei u kʼaʼaytajoʼ. Baʼaleʼ le ka tu kaʼa iloʼ, tu yaʼalaj ka xiʼik tu yéetel, tumen tu yilaj jach u tsʼaamaj u yóol u meyajt Dios. Le ancianoʼob teʼ kaajoʼ tu yaʼaloʼob jeʼel u páajtal u láakʼintaʼal Pablo tumen Timoteo utiaʼal u kʼaʼaytikoʼob le maʼalob péektsiloʼ (xokaʼak Beetaʼanoʼob 16:1-3).
7 Timoteo túuneʼ páajchaj u kaambal tiʼ Pablo. Letiʼeʼ jach tu tsʼáaj u yóol kaambal, le oʼolal ka máan kʼiineʼ túuxtaʼab tumen Pablo u xíimbalt le múuchʼuliloʼob xanoʼ. Meyajnaj kex quince jaʼaboʼob yéetel le apostoloʼ, leloʼ tu yáantaj u kan yaʼab baʼaloʼob bey xan ka xuʼuluk u suʼlaktal yéetel ka kʼuchuk u beet u ancianoi (Fili. 2:19-22; 1 Tim. 1:3).
8, 9. ¿Bix jeʼel k-áantik le táankelmoʼoboʼ? Tsikbalt upʼéel bix beetaʼabik.
8 Teʼ kʼiinoʼobaʼ yaʼab táankelmoʼob yéetel x-lóoʼbaynoʼobeʼ jeʼel u páajtal u beetkoʼob yaʼab meyajoʼob ichil u kaajal Dioseʼ. Wa ku líiʼsaʼal u yóoloʼob yéetel wa ku yáantaʼaloʼob tumen le sukuʼunoʼob úuch joʼopʼok u meyajtkoʼob Diosoʼ, jeʼel u chʼaʼatuklikoʼob u maas meyajtkoʼob Jéeobaeʼ. Tuukulnakoʼon tiʼ le yanoʼob t-múuchʼuliloʼ. ¿Yaan wa táankelem yéetel x-lóoʼbayan paalaloʼob jeʼel u maas tsʼáaik u yóol u meyajtoʼob Dios, jeʼex tu beetil Timoteoeʼ? Yéetel u yáantaj le sukuʼunoʼob tsʼoʼok u yantal u jaʼabiloʼoboʼ, maʼ xaaneʼ jeʼel u beetik u precursoriloʼob, u betelitailoʼob, u misioneroiloʼob wa superintendente tiʼ circuito. ¿Bix jeʼel u yáantaʼaloʼob utiaʼal ka u chʼaʼatukloʼob u beetkoʼob lelaʼ?
9 Martin, tsʼoʼok veinte jaʼaboʼob joʼopʼok u meyaj Beteleʼ, ku kʼaʼajsik bix áantaʼabik tumen utúul superintendente tiʼ circuito óoliʼ treinta jaʼabjeakil. Upʼéel kʼiin ka múul jóokʼoʼob kʼaʼaytajeʼ, le sukuʼunoʼ tu tsikbaltajtiʼ bix jatsʼutsil le meyaj ku beetaʼal Beteloʼ, letiʼeʼ tu táankelmileʼ xáanchaj tiʼ ku meyajiʼ. Le oʼolal tu líiʼsaj u yóol utiaʼal ka xiʼik xan meyaj tu najil Betel. Le baʼax aʼalaʼabtiʼoʼ le áant utiaʼal ka u chʼaʼatukult baʼax ken u beet ichil u kuxtal. Wa teech ka tsikbal yéetel le táankelmoʼoboʼ maʼ xaaneʼ jeʼel u chʼaʼatuklikoʼob u maas tsʼáaik u yóol u meyajtoʼob Dioseʼ.
«Líikʼseʼex u yóol le máaxoʼob lúubul u yóoloʼoboʼ»
10. ¿Bix tu yuʼubiluba Epafrodito, yéetel baʼaxten?
10 Le ka kʼaʼal Pablo tu kaajil Roma yoʼolal u fe tiʼ Dioseʼ, túuxtaʼab Epafrodito tumen le sukuʼunoʼob yanoʼob Filipos utiaʼal xíimbaltikoʼ yéetel utiaʼal u bis baʼaxoʼob kʼaʼabéettiʼ. Maʼ xaaneʼ letiʼeʼ u kʼáat pʼáatal wa jaypʼéel kʼiinoʼob tu yiknal utiaʼal u yáantik tiʼ baʼaxoʼob kʼaʼabéet. Baʼaleʼ ka kʼuch Romaeʼ kʼojaʼanchaji, «óolak kíimik». Tumen tu tuklaj chéen kunel úuchik u bineʼ, ka jach lúub u yóol wa deprimirnaji (Fili. 2:25-27).
11. 1) ¿Baʼaxoʼob jeʼel u beetik u lúubul u yóol le sukuʼunoʼoboʼ? 2) ¿Bix tu yaʼalil Pablo ka áantaʼak Epafrodito?
11 Bejlaʼeʼ yaʼab máaxoʼob ku lúubul u yóoloʼob yoʼolal le baʼaxoʼob ku yúuchul tiʼoboʼ. Jeʼex u yaʼalik le Organización Mundial de la Saludoʼ, utúul tiʼ cada cinco máakeʼ ku muʼyajtik depresión cada wa baʼax kʼiin. Tak le máaxoʼob meyajtik Diosoʼ yaan kʼiineʼ ku yúuchul xan tiʼob beyoʼ. Maʼ xaaneʼ ku lúubul u yóoloʼob ken u yiloʼob maʼ tu páajtal u tsʼáaikoʼob baʼax kʼaʼabéet ichil u yotochoʼob, yoʼolal upʼéel kʼojaʼanil wa yoʼolal upʼéel baʼax maʼ maʼalob u beetmoʼobiʼ. ¿Bix úuchik u yáantaʼal Epafrodito tumen le sukuʼunoʼob yanoʼob kaʼach Filiposoʼ? Tu beetoʼob le baʼax ku yaʼalik Pabloaʼ: «Kʼameʼex tu kʼaabaʼ Yuumtsil yéetel tuláakal kiʼimak óolal, yéetel tsʼaʼex ta puksiʼikʼaleʼex le máaxoʼob jeʼel bix letiʼoʼ; tumen óolak kíimik tu yoʼolal u meyajtik Cristo. Tu tsʼáajuba tu táan kíimil utiaʼal u beetikten le meyajoʼob maʼ tu páajtal a beetikeʼex teʼexoʼ» (Fili. 2:29, 30).
12. ¿Bix jeʼel k-áantik le sukuʼunoʼob lubaʼan u yóoloʼoboʼ?
12 Toʼon xaneʼ unaj k-líiʼsik u yóol le sukuʼunoʼob lubaʼan u yóoloʼob wa deprimirnajaʼanoʼoboʼ. Jeʼel u páajtal k-aʼaliktiʼob baʼaxoʼob maʼalobtak táan u beetkoʼob utiaʼal u meyajtkoʼob Jéeobaeʼ. Maʼ xaaneʼ kʼaʼabéetchaj u beetkoʼob kʼeexoʼob ichil u kuxtaloʼob utiaʼal ka páajchajak u yokjaʼob wa utiaʼal u beetik u precursoriloʼob. Jeʼel u páajtal k-aʼaliktiʼobeʼ toʼon yéetel Jéeobaeʼ jach nojoch baʼal k-ilik le meyaj ku beetkoʼoboʼ. Kex maʼ tu páajtal u beetkoʼob yaʼab meyaj tumen tsʼoʼok u chʼíijloʼob wa yoʼolal wa baʼax kʼojaʼanil ku muʼyajtikoʼobeʼ, láayliʼ jach k-yaabiltmoʼob yoʼolal le bukaʼaj jaʼaboʼob tsʼoʼok u meyajtikoʼob Jéeobaoʼ. Kex jeʼel baʼalak talmil ka u aktáant le sukuʼunoʼoboʼ unaj k-beetik le baʼax ku yaʼalik Jéeobaaʼ: «Líikʼseʼex u yóol le máaxoʼob luubul u yóoloʼoboʼ ka a wáanteʼex le máaxoʼob luubul u muukʼoʼoboʼ yéetel ka yanakteʼex chowak óolal yéetel tuláakal máak» (1 Tes. 5:14).
«Unaj [...] a [perdonarkeʼex] yéetel a kiʼimakkúuntikeʼex u yóol»
13, 14. 1) ¿Baʼax beetaʼab utiaʼal u luʼsaʼal le baʼax kʼaas ku beetaʼal kaʼach ichil le múuchʼulil yaan Corintooʼ, yéetel baʼaxten? 2) ¿Baʼax utsiloʼob tu taasaj le úuchik u jóoʼsaʼal le máax ku kʼebankúuntikubaoʼ?
13 Le múuchʼulil yaan Corinto teʼ yáax siglooʼ yanchaj utúul máak ku núupkʼebankuntikuba yéetel maʼ arrepentirnajiʼ. Le baʼax ku beetik kaʼachoʼ ku kʼaskúuntik le múuchʼuliloʼ yéetel ku beetik u yaʼalaʼal baʼal tumen le máaxoʼob maʼatech u meyajtkoʼob Diosoʼ. Le oʼolal Pabloeʼ tu yaʼalaj ka jóoʼsaʼak teʼ múuchʼuliloʼ (1 Cor. 5:1, 7, 11-13).
14 Le baʼax tu beetoʼobaʼ tu taasaj utsiloʼob. Xuʼul u beetaʼal le baʼax kʼaas teʼ múuchʼuliloʼ yéetel le máax kʼebanchajoʼ tu yeʼesaj jach tu jaajil u yóol arrepentirnaji. Le oʼolaleʼ, tu kaʼapʼéel tsʼíib Pablo tiʼ le corintoiloʼoboʼ tu yaʼalajtiʼob ka u kʼamoʼob tu kaʼatéen ichil le múuchʼuliloʼ. Baʼaleʼ maʼ chéen le unaj u beetkoʼobiʼ, letiʼeʼ tu yaʼalajtiʼob: «Unaj [...] a [perdonarkeʼex] yéetel a kiʼimakkúuntikeʼex u yóol utiaʼal maʼ u saʼatal u yóol tu yoʼolal yaʼabkach yaayaj óolal» (xokaʼak 2 Corintoiloʼob 2:5-8).
15. ¿Bix unaj k-ilik le máaxoʼob ku kʼaʼamloʼob tu kaʼatéen teʼ múuchʼuliloʼ?
15 Koʼoneʼex ilik baʼax jeʼel k-kanik tiʼ lelaʼ. U jaajileʼ ku yaatal t-óol ken jóoʼsaʼak wa máax ichil le múuchʼuliloʼ. Tumen maʼ xaaneʼ tu beetaj u yaʼalaʼal baʼal tiʼ u kʼaabaʼ Dios bey xan tiʼ le múuchʼuliloʼ. Wa maʼ xaaneʼ tiʼ toʼon tu beetaj kʼaas. ¿Baʼax unaj k-beetik wa ku arrepentir yéetel ku kʼáatik ka kʼaʼamak tu kaʼatéen ichil le múuchʼuliloʼ? Le ancianoʼoboʼ ku xakʼaltkoʼob baʼax ku yaʼalik le Biblia utiaʼal yilkoʼob baʼax unaj u beetkoʼoboʼ. Wa ku yilkoʼob tsʼoʼok u arrepentir yéetel maʼalob ka kʼaʼamak tu kaʼatéen ichil le múuchʼuliloʼ, leloʼ ku yeʼesik tsʼoʼok u perdonartaʼal tumen Jéeoba (Mat. 18:17-20). Le oʼolal wa tsʼoʼok u chʼaʼabal óotsilil tiʼ tumen Dioseʼ, ¿maʼ wa unaj xan k-perdonarkiʼ? U jaajileʼ wa maʼ k-óotik perdonarteʼ táan k-tsʼáaikba tu contra Jéeoba. Toʼoneʼ k-kʼáat ka múuchʼ meyajnak tuláakal teʼ múuchʼuliloʼ yéetel ka yanak jeetsʼeliliʼ, beyoʼ yaan k-beetik baʼax u kʼáat Dios. Le oʼolal unaj k-eʼesik yaabilaj tiʼ le máax tsʼoʼok u arrepentir yéetel tsʼoʼok u kʼaʼamal tu kaʼatéen teʼ múuchʼuliloʼ (Mat. 6:14, 15; Luc. 15:7).
«Ku páajtal u yáantiken»
16. ¿Baʼaxten kʼuuxilnaj Pablo tiʼ Marcos?
16 Le baʼax úuch tiʼ Juan Marcos yéetel Pablooʼ ku yeʼesik u kʼaʼabéetil k-tuʼubsik le baʼaxoʼob maʼ maʼalobtak ku beetaʼaltoʼonoʼ. Ka jóokʼ Pablo yéetel Bernabé tiʼ u yáax viajei u kʼaʼaytajoʼobeʼ tu bisoʼob Marcos utiaʼal áantkoʼob. Baʼaleʼ upʼéel kʼiin, maʼ k-ojel baʼaxteneʼ, Marcoseʼ suunaj tu yotoch. Pabloeʼ jach kʼuuxilnaj ka tu yilaj baʼax tu beetaj. Le oʼolal le táan u líiʼskubaʼob utiaʼal u binoʼob tu kaʼapʼéel viajei u kʼaʼaytajoʼobeʼ baʼateltʼaanajoʼob, tumen maʼ u kʼáat ka xiʼik Marcos tu yéeteloʼobiʼ. Letiʼeʼ maʼ tuʼubuktiʼ kaʼach le baʼax tu beetaj Marcosoʼ (xokaʼak Beetaʼanoʼob 13:1-5, 13 yéetel 15:37, 38).
17, 18. ¿Bix k-ojéeltik Pablo yéetel Marcoseʼ tu yutskíintoʼob le talmil yanchajtiʼoboʼ, yéetel baʼax ku kaʼansiktoʼon leloʼ?
17 Baʼaleʼ kex kʼuuxilnaj Pabloeʼ, Marcoseʼ maʼ tu chaʼaj u lúubul u yóoliʼ, baʼaxeʼ seguernaj u tsʼáaik u yóol u yáant Bernabé (Hch. 15:39). Letiʼeʼ jach tu tsʼáaj u yóol teʼ meyajoʼ yéetel jach chúukpaj u yóol, le oʼolal ka máan kʼiineʼ Pabloeʼ tʼaanaj maʼalob tiʼ letiʼ. Le kʼalaʼan Pablo tu kaajil Romaoʼ, tu tsʼíibtaj tiʼ Timoteo: «Kaxant Marcos ka a taas ta wéetel, tumen ku páajtal u yáantiken tiʼ le meyajoʼ» (2 Tim. 4:11). Lelaʼ ku yeʼeskeʼ Pabloeʼ jach kʼuch u yaabilt Marcos.
18 Le baʼax úuchtiʼobaʼ yaʼab baʼax jeʼel u kaʼansiktoʼoneʼ. Marcoseʼ maʼ tu chaʼaj u lúubul u yóol ka tu yilaj maʼ tu yóotaj Pablo ka xiʼik tu yéeteloʼobiʼ, baʼaxeʼ tu yilaj u yeʼesik jatsʼuts modos jeʼel u yáantik u beet u misioneroileʼ. Letiʼobeʼ maʼ seguernaj u kʼuuxiloʼobiʼ beyoʼ tu yeʼesoʼob tu kaʼatúulaloʼob yiijchajaʼan u tuukuloʼob. Le oʼolal ka máan kʼiineʼ Pabloeʼ tu yaʼaleʼ jach maʼalob le meyaj ku beetik Marcosoʼ. Teʼ kʼiinoʼob xanaʼ, ¿baʼax unaj k-beetik ken tsʼoʼokok k-utskíintik le talmiloʼob ku yantaltoʼon yéetel utúul sukuʼunoʼ? Unaj k-tuʼubsik le baʼax úuchoʼ yéetel unaj k-áantik u maasil u maas meyajtoʼob Jéeoba. Wa k-eʼesik maʼalob modoseʼ jeʼel k-líiʼsik u yóol le sukuʼunoʼob teʼ múuchʼuliloʼ.
Unaj k-paklan áantikba teʼ múuchʼuliloʼ
19. ¿Bix unaj k-paklan áantikba?
19 Teʼ «talam kʼiinoʼob[aʼ]» jach kʼaʼabéettoʼon le áantaj ku tsʼáaik le sukuʼunoʼob teʼ múuchʼuliloʼ yéetel jach kʼaʼabéet k-áantkoʼob xan (2 Tim. 3:1). Kex wa utúul sukuʼun maʼ u yojel bix jeʼel u aktáantik upʼéel talmileʼ Jéeobaeʼ u yojel. Yéetel letiʼeʼ ku meyajtiʼ le sukuʼunoʼob teʼ múuchʼulil utiaʼal u yáantkechoʼoboʼ (Isa. 30:20, 21; 32:1, 2). Le oʼolal tuláakloʼon unaj k-tsʼáaik k-óol k-beet le baʼax ku yaʼalik Pabloaʼ: «Líikʼs óolintabaʼex yéetel muʼukʼaʼankíintabaʼex ta baatsileʼex, jach jeʼel bix táan a beetikeʼexoʼ» (1 Tes. 5:11).
¿Baʼax jeʼel a núukikeʼ?
• ¿Baʼaxten unaj k-paklan líiʼsik k-óol teʼ múuchʼuliloʼ?
• ¿Baʼax talmiloʼob ku muʼyajtik le sukuʼunoʼob jeʼel u béeytal k-áantkoʼob u aktáantoʼobeʼ?
• ¿Baʼaxten kʼaʼabéettoʼon u yáantaj u maasil sukuʼunoʼob?
[U kʼáatchiʼiloʼob le xookoʼ]
[U tsolajil le oochel teʼ táan juʼun 11]
Unaj k-paklan áantikba ken aktáant jeʼel baʼalak talmileʼ
[U tsolajil le oochel teʼ táan juʼun 12]
Yaʼab táankelem yéetel x-lóoʼbayan paalal jeʼel u páajtal u maas meyajtkoʼob Jéeobaeʼ