Maʼ u náayal a wóol beyoʼ jeʼel u bintech utsileʼ

¿KA WILIK wa maʼ u náayal a wóol utiaʼal a kʼaʼaytaj tiʼ u maasil máakoʼob teʼ tuʼux ku kʼaʼaytaj a múuchʼuliloʼ? Le sukuʼunoʼob kajaʼanoʼob tu noj kaajil Turku, yaan tu jáal u kʼáaʼnáabil u luʼumil Finlandiaeʼ, ku yilik maʼ u náayal u yóoloʼob utiaʼal u kʼaʼaytajoʼob tiʼ u maasil, le oʼolal tsʼoʼok u bin utsil tiʼob.

Maʼ jach úucheʼ le sukuʼunoʼob kajaʼanoʼob Turkuoʼ, tu yiloʼob tsʼoʼok u kʼuchul u jaats máakoʼob tiʼ u luʼumil Asia utiaʼal u beetkoʼob u tsʼook meyajoʼob ku bineltik tiʼ upʼéel nojoch barco beetaʼab tiʼ upʼéel astillero yaan teʼ kaajoʼ. Utúul tiʼ le j-kʼaʼaytajoʼoboʼ tu yojéeltaj tiʼ ku pʼáatloʼob tu hoteliloʼob u kʼíiwikil le noj kaajoʼ yéetel sáamsamal jaʼatskabeʼ ku bisaʼaloʼob tiʼ autobusoʼob tak teʼ tuʼux ku meyajoʼoboʼ. Tu séebaʼanileʼ tu yaʼalaj tiʼ le sukuʼunoʼob tiʼ le múuchʼulil inglés yaan Turkuoʼ.

Le ancianoʼob tiʼ le múuchʼuliloʼ tu chʼaʼatukloʼob u kʼaʼaytikoʼob le maʼalob péektsil tiʼ le yaʼabkach máakoʼob bijaʼanoʼob meyajoʼ. Le domingo tiʼ le semana jeʼeloʼ, diez sukuʼunoʼobeʼ jóokʼoʼob las siete jaʼatskab teʼ tuʼux ku chʼaʼabal le autobús tumen le j-meyajoʼoboʼ. Tumen mix máak tu yiloʼobeʼ joʼopʼ u tuklikoʼob: «¿Tsʼoʼok wa ta tʼaan u binoʼob teʼ meyajoʼ? ¿Wa tsʼoʼok u suutoʼob tu kaajaloʼob?». Baʼaleʼ chéen ka tu yiloʼob u tíipʼil utúul yéetel u nookʼil u meyajiʼ. Jujumpʼíitileʼ ka joʼopʼ u kʼuchul u maasil. Maʼ xáanchaj ka yaʼabchajoʼobiʼ. Le sukuʼunoʼob túunoʼ joʼopʼ u kʼaʼaytikoʼob le jóoʼsaʼaniloʼob ich inglés tiʼoboʼ. U maʼalobileʼ le autobusoʼoboʼ upʼéel hora máanak u tiempoi ka jóokʼoʼob, lelaʼ tu tsʼáaj tuʼux u maas tsikbaloʼob yéetel le j-meyajoʼoboʼ. Ka tsʼoʼokeʼ le sukuʼunoʼoboʼ tu pʼatoʼob 126 folletoʼob yéetel 329 revistaʼob tiʼ le j-meyajoʼoboʼ.

Tumen jach bin utsil tiʼobeʼ, tu chʼaʼatukloʼob u kaʼa jóoʼloʼob kʼaʼaytaj bey teʼ tuláakʼ semana le ken xíimbaltaʼakoʼob tumen le superintendente tiʼ circuitooʼ. Ka tu tsʼáaj seisimedia jaʼatskabeʼ, táan tóosaʼ, baʼaleʼ le superintendenteoʼ tu beetaj u muchʼtáambalil le kʼaʼaytajoʼ, ka tsʼoʼokeʼ veinticuatro j-kʼaʼaytajoʼobeʼ binoʼob teʼ tuʼux ku chʼaʼabal le autobús tumen le j-meyajoʼoboʼ. Tu bisoʼob yaʼab jóoʼsaʼaniloʼob ich tagalo, tumen le ka yáax binoʼob kʼaʼaytajeʼ tu yiloʼob yaʼab filipinoiloʼobiʼ. Ka bin le autobusoʼob teʼ jaʼatskab jeʼeloʼ, le sukuʼunoʼoboʼ tsʼoʼok u pʼatkoʼob 7 libroʼob, 69 folletoʼob yéetel 479 revistaʼob tiʼ le j-meyajoʼoboʼ. Le sukuʼunoʼob yéetel le kiikoʼob táakpajoʼob teʼ kʼaʼaytajoʼ jach kiʼimakchaj u yóoloʼob.

Táanil tiʼ u suut le j-meyajoʼob tu kaajaloʼoboʼ, le sukuʼunoʼoboʼ páajchaj u xíimbalkoʼob jujuntúul tiʼ letiʼob teʼ hoteloʼoboʼ, lelaʼ tu tsʼáaj u páajtalil u maas tsolkoʼob u maʼalob péektsilil le Reino tiʼoboʼ. Yaʼab tiʼ le j-meyajoʼoboʼ tu yaʼaloʼobeʼ tsʼoʼok u yáax tsikbaloʼob yéetel uláakʼ u j-jaajkunajoʼob Jéeoba tiʼ uláakʼ luʼumiloʼob, yéetel tu tsʼáajoʼob u diosboʼotikil tiʼ le sukuʼunoʼob úuchik u binoʼob tsikbal tu yéeteloʼob teʼ kʼiinoʼob tiaʼanoʼob Finlandiaoʼ.

¿Kux túun teech? ¿Ka wilik wa maʼ u náayal a wóol utiaʼal a kʼaʼaytaj tiʼ le máakoʼob ku kʼuchloʼob teʼ tuʼux ku kʼaʼaytaj a múuchʼuliloʼ? ¿Ka wilik wa a kʼaʼaytaj tiʼ uláakʼ máakoʼob ku taaloʼob táanxel luʼumiloʼob? Wa ka beetik beyoʼ yaan u bintech utsil jeʼex úuchik tiʼ le sukuʼunoʼob tiʼ u kaajil Turkuoʼ.

[U tsolajil le oochel teʼ táan juʼun 32]

FINLANDIA

[U tsolajil le oochel teʼ táan juʼun 32]

Turku

[U tsolajil le oochel teʼ táan juʼun 32]

HELSINKI

[U tsolajil le oochel teʼ táan juʼun 32]

STX Europa