Unaj k-jach tsʼáaik k-óol teʼ joochoʼ
Unaj k-jach tsʼáaik k-óol teʼ joochoʼ
«Meyajneneʼex [maas] yaʼab mantatsʼ tiʼ u meeyjul Yuumtsil.» (1 COR. 15:58)
1. ¿Baʼax tu yaʼalaj Jesús tiʼ u disipuloʼob?
KA MÁAN Jesús naatsʼ tiʼ u noj kaajil Sicar, tiʼ u luʼumil Samaria, tu tsʼoʼokbal u jaʼabil 30 tiʼ le yáax siglooʼ, jeʼel naatsʼ tiʼ upʼéel chʼeʼeneʼ ka tu yaʼalaj tiʼ u disipuloʼob: «Ileʼex, pakteʼex le paakʼáaloʼoboʼ, tumen tsʼoʼok u kʼantaloʼob utiaʼal jochbil» (Juan 4:35). Baʼaleʼ maʼ táan u yaʼaliktiʼob ka jach xiʼikoʼob joochiʼ, baʼaxeʼ táan u yaʼaliktiʼob ka u kaxtoʼob xiiboʼob yéetel koʼoleloʼob uts u puksiʼikʼaloʼob utiaʼal ka u beetubaʼob disipuloi tiʼ letiʼ. U jaajileʼ táan u yaʼaliktiʼob ka u maas tsʼáaj u yóoloʼob teʼ kʼaʼaytajoʼ, tumen jach yaʼab meyaj yaan, baʼaleʼ chéen upʼíit tiempo yantiʼob.
2, 3. 1) ¿Baʼax eʼesik kuxaʼanoʼon tu kʼiinil le joochoʼ? 2) ¿Baʼax ken k-il teʼ xookaʼ?
2 Le baʼax tu yaʼalaj Jesusoʼ maases unaj u beetaʼal bejlaʼeʼ, tumen jach yaʼab máakoʼob taak u kaambaloʼob, bey «tsʼoʼok u kʼantaloʼob utiaʼal jochbil[eʼ]». Cada jaʼabeʼ ku invitartaʼal u millonesi máakoʼob u kʼaj óoltoʼob le baʼaxoʼob ku kaʼansik le Bibliaoʼ, yéetel u milesi tiʼ le máaxoʼob kʼamkoʼ ku yokjaʼob. Bejlaʼeʼ yantoʼon u jatsʼuts páajtalil k-táakpajal teʼ jooch ku nuʼuktik Jéeoba, u Yuumil le joochoʼ. Le oʼolal maʼalob ka k-tukle: «¿Táan wa in jach táakpajal “tiʼ u meeyjul Yuumtsil”?» (1 Cor. 15:58).
3 Ichil le óoxpʼéel jaʼab ka tak táankoch tu máansaj Jesús way Luʼumoʼ, tu kaʼansaj u disipuloʼob utiaʼal ka u yáantoʼob u maasil u kʼaj óoltoʼob Dios. Teʼ xookaʼ yaan k-ilik chéen óoxpʼéel tiʼ le baʼaxoʼob tu kaʼansajtiʼoboʼ. Cada upʼéeleʼ yaan u yeʼesik bix jeʼel k-maas táakpajal teʼ jooch ku beetaʼal bejlaʼaʼ. Koʼoneʼex ilik cada upʼéel.
Jach unaj k-eʼesik kabal óolal
4. ¿Bix tu kaʼansil Jesús u kʼaʼabéetil u yeʼesik máak kabal óolal?
4 Tuukulnakoʼon tiʼ lelaʼ: Le disipuloʼoboʼ táan u baʼateltʼaanoʼob yoʼolal máax u maas nojchil ichiloʼob. Maʼ xaaneʼ chíikaʼan tu táan u yichoʼobeʼ maʼ kiʼimak u yóoloʼobiʼ yéetel kʼuuxoʼob. Jesús túuneʼ tu tʼanaj utúul chan paaleʼ ka tu yaʼalajtiʼ ka waʼalak chúumuk tiʼ letiʼob. Tu paktaj le chan paaloʼ ka tu yaʼalaj: «U [maas] nojochil tu [reinoi] kaʼaneʼ letiʼ le máax ku chichankúuntikubaeʼ yéetel ku béeytal jeʼel bix le chan xiʼipalaʼ» (xokaʼak Mateo 18:1-4). Utiaʼal u máakiloʼob le yóokʼol kaabaʼ, u maas nojchil ichiloʼobeʼ letiʼe máax maas yaan autoridad tiʼ yéetel maas ayikʼaloʼ, baʼaleʼ ichil u disipuloʼob Jesuseʼ maʼ beyiʼ, le máax maas nojoch ichiloʼoboʼ letiʼe máax ku «chichankúuntikuba» tu táan u maasiloʼ. Wa u kʼáatoʼob ka áantaʼakoʼob tumen Jéeoba yéetel ka tsʼaʼabak wa baʼax meyajil u beetoʼobeʼ kʼaʼabéet u yeʼeskoʼob kabal óolal.
5, 6. ¿Bix u yáantkoʼon le kabal óolal utiaʼal k-maas táakpajal teʼ joochoʼ? Aʼal upʼéel baʼax eʼesik leloʼ.
5 Yaʼab máakoʼob xan bejlaʼeʼ ku chʼíikil u kaxtoʼob páajtalil, ayikʼalil yéetel ka ilaʼakoʼob letiʼob u maas nojchil. Le oʼolal ku pʼáatal minaʼan u tiempoi tiʼob utiaʼal u meyajtkoʼob Dios (Mat. 13:22). Baʼaleʼ le máax meyajtik Jéeobaoʼ u yojleʼ utiaʼal ka áantaʼak yéetel ka kʼaʼamak tumen u Yuumil le joochoʼ kʼaʼabéet «u chichankúuntikuba» tu táan u maasil. Le oʼolal ku yilik u yeʼesik kabal óolal (Mat. 6:24; 2 Cor. 11:7; Fili. 3:8).
6 Tuukulnakoʼon tiʼ baʼax tu beetaj Francisco, utúul anciano. Tu táankelmileʼ tu pʼataj u xook tiʼ upʼéel universidad utiaʼal u beetik u precursori. Letiʼeʼ ku yaʼalik: «Ka maan kʼiineʼ tsʼoʼok in beel. Wa in kʼáat kaʼacheʼ tsʼoʼok in kaxtik upʼéel meyaj maʼalob u boʼotaʼaleʼ. Baʼaleʼ t-chʼaʼatuklaj k-kuxtal chéen yéetel upʼíit baʼal utiaʼal maʼ u xuʼulul k-beetik precursori. Le ka yanchaj k-paalaleʼ maas chan talamchaj toʼon. Baʼaleʼ Jéeobaeʼ tu yáantoʼon utiaʼal maʼ u xuʼulul k-beetik precursori. Tsʼoʼok maas tiʼ treinta jaʼaboʼob joʼopʼok in beetik in ancianoi yéetel uláakʼ meyajoʼob ichil u kaajal Jéeoba. Mix utéen yaachajak t-óol ikil k-kuxtal chéen yéetel upʼíit baʼal».
7. ¿Baʼax tsʼoʼok a beetik utiaʼal a tsʼáaik ichil a kuxtal le baʼax ku yaʼalik Romailoʼob 12:16?
7 Wa k-kanáantik maʼ u kaʼantal k-ich yéetel wa k-eʼesik kabal óolaleʼ yaan xan k-kʼamik yaʼab utsiloʼob yéetel yaan k-maas táakpajal teʼ joochoʼ (Rom. 12:16; Mat. 4:19, 20; Luc. 18:28-30).
Le utsiloʼob ku taasik u tsʼáaik u yóol máak teʼ meyajoʼ
8, 9. 1) Tsol u kettʼaanil le talentosoʼ. 2) ¿Máaxoʼob ku líiʼsaʼal u yóoloʼob yéetel le kettʼaanoʼ?
8 Uláakʼ baʼax jach kʼaʼabéeteʼ letiʼe ka k-jach tsʼáa k-óol táakpajal teʼ kʼaʼaytajoʼ. Lelaʼ bey úuchik u yeʼesik Jesús tiʼ upʼéel kettʼaan. * Tu yaʼaleʼ táanil tiʼ u bin utúul tsʼuul táanxel luʼumileʼ, tu pʼataj talentos, wa yaʼab taakʼin, tiʼ óoxtúul palitsiloʼob. Tiʼ le yáaxoʼ tu tsʼáaj cinco talentos; tiʼ le u kaʼatúuloʼ, kaʼapʼéel, yéetel tiʼ le u yóoxtúuloʼ tu tsʼáaj upʼéeliʼ. Ka bin le tsʼuuloʼ, le yáax kaʼatúuloʼ «meyajnaj yéetel» le taakʼin tsʼaʼabtiʼoboʼ. Baʼaleʼ le u yóoxtúuloʼ tu mukaj, tumen letiʼeʼ utúul «maʼakʼóol palitsil». Ka suunaj le tsʼuuloʼ tu tsʼáaj le yáax kaʼatúul palitsil «tu yóokʼol u yaʼabil» baʼaxoʼob yantiʼ. Baʼaleʼ tiʼ le u yóoxtúuloʼ tu luʼsaj le talento u tsʼaamaj kaʼach tiʼoʼ ka tu tojolchʼintaj (Mat. 25:14-30).
9 Toʼoneʼ k-kʼáat k-beet jeʼex le yáax kaʼatúul palitsiloʼ, le oʼolal k-jach tsʼáaik k-óol k-kaʼans uláakʼ máakoʼob. Baʼaleʼ ¿kux túun wa maʼ tu páajtal k-jach táakpajliʼ? Maʼ xaaneʼ tumen óotsiloʼoneʼ ku kʼaʼabéetchajal k-meyaj bulkʼiin utiaʼal k-tsʼáaik baʼaxoʼob kʼaʼabéet ichil k-otoch. Wa maʼ xaaneʼ tsʼoʼok u pʼáatal minaʼan k-muukʼ wa kʼojaʼanoʼon, le oʼolal maʼ tu páajtal k-beetik jeʼex t-táankelmil kaʼacheʼ. Wa beyoʼ jach jeʼel u líiʼsik k-óol le baʼax tu yaʼalaj Jesús teʼ tu kettʼaanil le talentosoʼ.
10. ¿Bix úuchik u yeʼesik le tsʼuul teʼ kettʼaan ku chʼaʼik en cuentai bukaʼaj ku páajtal u beetik cada utúul teʼ meyajoʼ, yéetel baʼaxten ku líiʼsik k-óol k-ojéeltik leloʼ?
10 Le tsʼuul teʼ kettʼaanoʼ u yojel cada utúul tiʼ le óoxtúul palitsiloʼoboʼ maʼ upʼéeliliʼ baʼax jeʼel u páajtal u beetkeʼ, le oʼolal tu tsʼáaj le taakʼin tiʼ cada utúul «jeʼel bix ku páajtal u meyajtikeʼ» (Mat. 25:15). Le yáaxoʼ maas yaʼab taakʼin tu náajaltaj tiʼ le u kaʼatúuloʼ. Kex beyoʼ le tsʼuuloʼ tu yilaj tu kaʼatúulal tu tsʼáaj u yóoloʼob teʼ meyajoʼ, letiʼeʼ tu yaʼalaj tiʼ cada utúul: «Techeʼ juntúul palitsil utsech yéetel chúukaʼan a wóol», le oʼolal upʼéeliliʼ bix úuchik u boʼotik tu kaʼatúulal (Mat. 25:21, 23). Jéeoba, u Yuumil le joochoʼ, u yojel xan bukaʼaj ku páajtal u beetik cada utúul teʼ meyaj u tsʼaamajtoʼonoʼ. U yojel bix k-tsʼáaik k-óol utiaʼal k-meyajtik, le oʼolal maʼ kun pʼáatal maʼ u yeʼesiktoʼon u yutsil (Mar. 14:3-9; xokaʼak Lucas 21:1-4).
11. Tsikbalt upʼéel baʼax eʼesik le utsiloʼob ku kʼamik le máaxoʼob jach ku tsʼáaik u yóoloʼob u meyajtoʼob Dios kex talam yaniloʼoboʼ.
11 Tuukulnakoʼon tiʼ baʼax tu beetaj Selmira, utúul kiik kajaʼan Brasil. Lelaʼ ku yeʼeskeʼ, kex yantoʼon talmiloʼobeʼ jeʼel u béeytal k-tsʼáaik k-óol k-meyajt Jéeobaeʼ. Letiʼeʼ tsʼoʼok maas tiʼ veinte jaʼaboʼob kíimsaʼak u yíicham le táan u yoklaʼaloʼ, ka pʼáat chéen tu juunal u líiʼs óoxtúul u mejen hijas. Yoʼolal lelaʼ kʼaʼabéetchaj u meyaj óoliʼ bulkʼiin yéetel yanchaj u viajar sáamsamal utiaʼal u biniʼ. Letiʼeʼ jach ku kaʼanal kaʼachi, kex beyoʼ tu yilaj u beetik u precursora regulari, yéetel ka máan kʼiineʼ kaʼatúul tiʼ u hijaseʼ joʼopʼ u beetik u precursorailoʼob xan. Letiʼeʼ ku yaʼalik: «Ichil le jaʼaboʼob tsʼoʼok u máanoʼ, tsʼoʼok in tsʼáaik xook tiʼ maas tiʼ veinte utúulal máakoʼob, letiʼobeʼ kin wilkoʼob bey in “láakʼtsiloʼobeʼ”. Tak bejlaʼeʼ jach ku biskubaʼob tin wéetel, yéetel jach kin tsʼáaik u diosboʼotikil tiʼob yoʼolal le yaabilaj ku yeʼeskoʼobtoʼonoʼ. Lelaʼ upʼéel baʼax maʼ tu páajtal u maʼanal yéetel tuláakal le oro yaan teʼ yóokʼol kaabaʼ». Jeʼex túun k-ilkoʼ, u Yuumil le joochoʼ tsʼoʼok u yáantik Selmira yoʼolal bix u jach tsʼáaik u yóol teʼ meyajoʼ.
12. ¿Bix jeʼel k-eʼesik jach k-tsʼáaik k-óol teʼ kʼaʼaytajoʼ?
12 U jaajileʼ maʼ tuláakloʼon jeʼel u páajtal k-máansik yaʼab tiempo teʼ joochoʼ. Baʼaleʼ jeʼel u páajtal k-maas tsʼáaik k-óol k-beeteʼ. Wa k-beetik le baʼaxoʼob ku kaʼansaʼal tu Muchʼtáambalil Kʼaʼaytajoʼ, yaan k-maas kanik bix unaj k-beetik yéetel yaan k-kaxtik bix jeʼel k-maas kʼaʼaytik le maʼalob péektsiloʼ (2 Tim. 2:15). Maʼ xaaneʼ utiaʼal k-táakpajal teʼ kʼaʼaytaj yéetel le sukuʼunoʼob teʼ múuchʼuliloʼ yaan u kʼaʼabéettal k-pʼatik uláakʼ meyajoʼob maʼ jach kʼaʼanantakiʼ (Col. 4:5).
13. ¿Baʼax jeʼel u yáantkoʼon utiaʼal k-maas tsʼáaik k-óol meyajt Dioseʼ?
13 Maʼ u tuʼubultoʼoneʼ k-puksiʼikʼal péekskoʼon maas táakpajal teʼ meyajoʼ (Sal. 40:8). Le u yóoxtúul palitsil tiʼ le kettʼaanoʼ sajak tiʼ u tsʼuulil yéetel ku tuklikeʼ jach yaʼab baʼax ku kʼáatik. Le oʼolal maʼ meyajnaj utiaʼal u maas yaʼabkúuntik le taakʼin tsʼaʼabtiʼoʼ, baʼaxeʼ tu mukaj. Upʼéel baʼax jeʼel u yáantkoʼon utiaʼal maʼ k-tuukul jeʼex le palitsilaʼ letiʼe ka k-bisba yéetel Jéeoba, u Yuumil le joochoʼ. Wa k-jóoʼsik u súutukil utiaʼal k-xook yéetel k-tuukul tiʼ le yaabilaj, le chúukaʼan óolal, le chʼaʼa óotsil yéetel uláakʼ u jatsʼuts modos Dioseʼ, k-puksiʼikʼaleʼ yaan u péekskoʼon k-beet tuláakal le ku páajtal utiaʼal k-maas meyajtik (Luc. 6:45; Fili. 1:9-11).
«Kuxleneʼex ich kiliʼichil»
14. ¿Bix unaj u pʼáatal tuláakal le máaxoʼob ku táakpajloʼob teʼ joochoʼ?
14 Apóstol Pedroeʼ tu chʼaʼachiʼitaj le Kiliʼich Tsʼíiboʼob ich Hebreo utiaʼal u tsolik baʼax u kʼáat Dios tiʼ le máaxoʼob meyajtikoʼ: «Kuxleneʼex ich kiliʼichil tumen Jajal Dios máax tʼaneʼexeʼ kiliʼich; tumen le Kiliʼich Tsʼíiboʼ ku yaʼalik: Kiliʼichchajkeʼex, tumen teneʼ kiliʼichen» (1 Ped. 1:15, 16; Lev. 19:2; Deu. 18:13). Le tekstoaʼ ku yeʼeskeʼ kʼaʼabéet k-ilik maʼ k-beetik baʼaloʼob kʼaastak utiaʼal k-pʼáatal limpioi tu táan Dios. Utiaʼal lelaʼ unaj k-beetik tuláakal le baʼax kʼaʼabéet utiaʼal u pʼoʼobol k-kuxtaloʼ. ¿Baʼax túun jeʼel u pʼáatkoʼon limpioileʼ? U tʼaan Dios.
15. ¿Baʼax páajtalil yaan tiʼ u tʼaan Dios?
15 Le Bibliaoʼ ku ketik u tʼaan Dios yéetel upʼéel jaʼ ku limpiokíintik u kuxtal máak. Apóstol Pabloeʼ tu yaʼaleʼ Cristoeʼ tu pʼataj limpioi u novia wa le sukuʼunoʼob yéeyaʼanoʼob «úuchik u pʼoʼik yéetel jaʼ, tu yoʼolal le tʼaanoʼ» utiaʼal u pʼáatal «kiliʼich yéetel x-maʼ siʼipilil», le oʼolal tu táan Jéeobaeʼ limpio yaniloʼob (Efe. 5:25-27). Jesuseʼ tu yaʼaleʼ le u tʼaan Dios tu kʼaʼaytoʼ jach yaan u páajtalil u limpiokíintik u kuxtal máak. Letiʼeʼ tu yaʼalaj tiʼ u disipuloʼob: «Teʼexeʼ lukʼesaʼan a kʼaasileʼex tu yoʼolal le kaʼansajoʼob in tsʼaamaj teʼexoʼ» (Juan 15:3). Jeʼex túun k-ilkoʼ, u tʼaan Dioseʼ yaan u páajtalil u pʼatik limpioi k-kuxtal. Wa k-kʼáat ka kʼaʼamak tumen Dios le meyaj k-beetkoʼ kʼaʼabéet k-chaʼik u limpiokíintkoʼon u tʼaan.
16. ¿Baʼax unaj k-beetik utiaʼal k-pʼáatal limpioi tu táan Dios?
16 Jeʼex túun k-ilkoʼ, le máax u kʼáat táakpajal teʼ meyaj ku tsʼáaik Diosoʼ táanileʼ unaj u xuʼulul u beetik baʼaloʼob kʼaastak. Yéetel wa u kʼáat u beet le meyaj mantatsʼoʼ unaj u bisik upʼéel maʼalob kuxtal yéetel unaj u beetik mantatsʼ baʼaxoʼob ku yaʼalik Jéeoba (xokaʼak 1 Pedro 1:14-16). Jeʼex le baʼaxoʼob ku beetik máak utiaʼal u pʼáatal limpioi u wíinkliloʼ, utiaʼal u pʼáatal máak limpioi tu táan Dioseʼ unaj u chaʼik u nuʼuktaʼal u kuxtal tumen u tʼaaniloʼob le jaajoʼ. Lelaʼ k-beetik ken k-xok le Bibliaoʼ, ken xiʼikoʼon teʼ muchʼtáambaloʼoboʼ yéetel ken k-tsʼáa ichil k-kuxtal le baʼaxoʼob ku yaʼalik Diosoʼ. Lelaʼ jeʼel u yáantkoʼon utiaʼal maʼ k-lúubul tiʼ upʼéel kʼebaneʼ bey xan tiʼ uláakʼ baʼaloʼob ku tsʼáaik le yóokʼol kaabaʼ (Sal. 119:9; Sant. 1:21-25). ¿Máasaʼ jach ku líiʼsik k-óol k-ojéeltik u tʼaan Dioseʼ jeʼel u páajtal u pʼoʼikoʼon tak tiʼ le nukuch kʼebanoʼoboʼ? (1 Cor. 6:9-11.)
17. ¿Baʼaxoʼob ku yaʼalik le Biblia jeʼel u yáantkoʼon pʼáatal limpioi tu táan Diosoʼ?
17 ¿K-chaʼik wa tiʼ u tʼaan Dios ka seguernak u limpiokíintik k-kuxtal? Tuukulnakoʼon tiʼ le baʼaloʼobaʼ. ¿Baʼax k-beetik ken aʼalaʼaktoʼon unaj k-kanáantik tiʼ baʼaxoʼob k-náaysik k-óol? (Sal. 101:3.) ¿K-ilik wa maʼ k-jach bisikba yéetel k-éet meyajoʼob wa k-éet xookoʼob maʼatech u meyajtkoʼob Dios? (1 Cor. 15:33.) ¿K-ilik wa k-pʼatik baʼaxoʼob maʼ maʼalob k-beetik utiaʼal ka pʼáatkoʼon limpioi tu táan Jéeobaiʼ? (Col. 3:5.) ¿K-náachkuntikba wa tiʼ baʼaloʼob yaan yil yéetel política yéetel k-ilik maʼ k-tuukul jeʼex le máakoʼob ku taaskubaʼob nojbaʼalil yoʼolal u luʼumoʼoboʼ? (Sant. 4:4.)
18. ¿Baʼax utsil jeʼel k-kʼamik wa k-chaʼik u pʼoʼikoʼon Dioseʼ?
18 Wa k-beetik le baʼaloʼobaʼ yaan k-kʼamik yaʼab utsiloʼob. Ka tu ketaj Jesús u disipuloʼob yéetel u kʼaboʼob ukúul uvaeʼ, tu yaʼalaj: «Jeʼel máakalmáak tiʼ in kʼaboʼob maʼ tu yichankileʼ [in Taataeʼ] ku lukʼesik; baʼaleʼ ku pʼéepʼik u kʼaasil le in kʼaboʼob ku yichankiloʼoboʼ, utiaʼal ka maas yaʼabak u yich» (Juan 15:2). Bey túunoʼ wa k-chaʼik u pʼoʼikoʼon Dios yéetel u tʼaanil le jaajoʼ yaan k-maas ichankil.
Le utsiloʼob k-kʼamik teʼ kʼiinoʼobaʼ yéetel le ku taal u kʼiinoʼ
19. ¿Baʼax utsiloʼob tu kʼamaj u disipuloʼob Jesús úuchik u tsʼáaik u yóoloʼob teʼ joochoʼ?
19 Tu kʼiinil le Pentecostés tiʼ u jaʼabil 33 tiʼ le yáax siglooʼ, u disipuloʼob Jesuseʼ tu kʼamoʼob le kiliʼich muukʼoʼ, lelaʼ tu tsʼáaj u páajtalil tiʼob u biskoʼob le maʼalob péektsil «tak [teʼ] kúuchiloʼob yaan tu xuul yóokʼol kaaboʼ» (Hch. 1:8). Letiʼobeʼ yaʼab meyaj tu beetoʼob utiaʼal u biskoʼob le maʼalob péektsil «tuláakal jejeláas tuʼuxoʼob yóokʼol kaab[oʼ]», yéetel yaan tiʼ letiʼobeʼ táakpajoʼob ichil le Cuerpo Gobernanteoʼ, tu beetaj u misioneroiloʼob yéetel u superintendenteiloʼob (Col. 1:23). ¿Máasaʼ jach yaʼab utsiloʼob tu kʼamoʼob? Le baʼaxoʼob tu beetoʼoboʼ tu taasaj kiʼimak óolal tiʼ le máakoʼoboʼ.
20. 1) ¿Baʼax utsiloʼob tsʼoʼok a kʼamik ikil a táakpajal teʼ jooch ku beetaʼal teʼ kʼiinoʼobaʼ? 2) ¿Baʼax unaj k-chʼaʼatuklik k-beetik mantatsʼ?
20 Wa k-eʼesik kabal óolal, k-tsʼáaik k-óol teʼ meyaj yéetel k-kuxtal jeʼex utstutʼaan Dioseʼ yaan u seguer k-táakpajal teʼ jooch ku beetaʼal teʼ kʼiinoʼobaʼ. Le kʼasaʼan yóokʼol kaabaʼ chʼiikil chéen tu paach náaysaj óoloʼob yéetel ayikʼalil, baʼaleʼ toʼoneʼ maʼ chiʼichnakoʼon jeʼex letiʼoboʼ, baʼaxeʼ kiʼimak k-óol tumen táan k-meyajtik Dios (Sal. 126:6). Tsʼoʼoleʼ k-ojel le meyaj k-beetik «junmúuchʼ yéetel Yuumtsi[loʼ] maʼ chéen kuneliʼ» (1 Cor. 15:58). Jéeoba, u Yuumil le joochoʼ, yaan u tsʼáaiktoʼon le kuxtal minaʼan u xuul yoʼolal le meyaj k-beetkoʼ, «maʼ bíin u tuʼubs [...] le yaakunaj tsʼoʼok» k-eʼesik tiʼoʼ (Heb. 6:10-12).
[Tsolajiloʼob]
^ xóot’ol 8 Kex le kettʼaan táan u yeʼesik le bix u biskuba Jesús yéetel le sukuʼunoʼob yéeyaʼanoʼob utiaʼal u binoʼob kaʼanoʼ, le baʼax tu yaʼaloʼ ku yáantik u maasil máaxoʼob meyajtik Dios bejlaʼeʼ.
¿Tsʼoʼok wa k-naʼatik baʼax u kʼáat u yaʼale?
• ¿Baʼaxten kʼaʼabéet k-eʼesik kabal óolal utiaʼal k-táakpajal teʼ joochoʼ?
• ¿Baʼax jeʼel u yáantkoʼon utiaʼal k-jach tsʼáaik k-óol teʼ joochoʼ?
• ¿Baʼaxten le máaxoʼob ku joochoʼoboʼ kʼaʼabéet u biskoʼob upʼéel kuxtal limpio tu táan Dios?
[U kʼáatchiʼiloʼob le xookoʼ]
[U tsolajil le oochel teʼ táan juʼun 17]
Le kabal óolaloʼ ku yáantkoʼon kuxtal chéen yéetel upʼíit baʼal utiaʼal k-tsʼáaik táanil le Reinooʼ