Bix u salvarkoʼon le u kuxtal Jesús tu kʼuboʼ
Bix u salvarkoʼon le u kuxtal Jesús tu kʼuboʼ
«Le máax ku yoksik u yóol tiʼ le Paaloʼ yaan kuxtal minaʼan u xuul tiʼ. Baʼaleʼ le máax maʼ u kʼáat u yoksaj óolt le Paaloʼ, maʼ bíin yanak kuxtal tiʼiʼ, baʼaleʼ bíin u kʼam u yaayaj jatsʼ Jajal Dios.» (JUAN 3:36)
1, 2. ¿Baʼax oʼolal káaj u jóoʼsaʼal le revistaaʼ?
LE U kampʼéel revistai U Pʼíich Tulumil Kanan jóoʼsaʼab ich inglés tiʼ u mesil octubre tiʼ 1879, tu yaʼalaj: «Le máaxoʼob xakʼalxoktik le Bibliaoʼ jach nojoch baʼal u yilkoʼob le u kuxtal Cristo tu tsʼáa tu yoʼolal tuláakal máakoʼ». Ka tsʼoʼokeʼ tu yaʼalaj: «Unaj k-náachkuntikba tiʼ le máaxoʼob ku mixbaʼalkúuntikoʼob wa ku yaʼalikoʼob maʼ kʼaʼabéet kaʼach u kʼubik u kuxtal Cristo utiaʼal u tokikoʼon tiʼ le kʼeban yéetel tiʼ le kíimiloʼ» (xokaʼak 1 Juan 2:1, 2).
2 Upʼéel baʼax oʼolal káaj u jóoʼsaʼal le revista tu mesil julio tiʼ 1879 utiaʼal u yeʼesaʼal jach tu jaajil tu tsʼáaj u kuxtal Jesús jeʼex u kaʼansik le Bibliaoʼ. Tu jóokʼbal le siglo 19 joʼopʼ u yaʼabtal religionoʼob kaʼansikeʼ, le u kuxtal Jesús tu kʼuboʼ maʼ tu salvarkoʼon tiʼ le kʼebanoʼ. Le oʼolal le baʼax tu kaʼansaj le revistaʼobaʼ jach tu jaajil meyajnajoʼob tiʼ le palitsil «utiaʼal ka u tsʼáa janal [...] tu yorailoʼ» (Mat. 24:45). Teʼ kʼiinoʼob jeʼeloʼ yaʼab máakoʼob joʼopʼ u creerkoʼob chéen tiʼ evolución taal tuláakal baʼal, lelaʼ ku bin tu contra le baʼax ku kaʼansik le Biblia yoʼolal bix yanchajik le kʼebanoʼ. Joʼopʼ u creerkoʼob wíinikeʼ táan u bin u maas maʼalobtal, le oʼolal maʼ kʼaʼabéet máax boʼotik u kʼeebaniʼ. Le oʼolal jach maʼalob le baʼax tu yaʼalaj Pablo tiʼ Timoteoaʼ: «Kanáant le baʼax tsʼoʼok in kʼubéentik techaʼ. Maʼ a wuʼuyik chéen kunel yéetel luʼumkabiltʼaanoʼob, mix u sakachtʼaaniloʼob le baʼax yéetel tuus ku kʼaabaʼintik kʼaj óolaloʼ. Tumen yaan tsʼeʼetsʼek máaxoʼob ku binoʼob tu paach le kʼaj óolalaʼ tsʼoʼok u tselkubaʼob tiʼ le oksaj óolaloʼ» (1 Tim. 6:20, 21).
3. ¿Baʼax kʼáatchiʼiloʼob kun núukbil teʼ xookaʼ?
3 Mix utúul tiʼ toʼon u kʼáat u «[tseluba] tiʼ le oksaj óolaloʼ». Le oʼolal maʼalob ka tuukulnakoʼon tiʼ le kʼáatchiʼobaʼ: «¿Baʼaxten kʼaʼabéetchaj u tsʼáaik u kuxtal Jesús tin woʼolal? ¿Baʼax yanchaj u muʼyajtik Jéeoba yéetel Jesús utiaʼal u tsʼáaikoʼob le boʼoloʼ? ¿Baʼax kʼaʼabéet in beetik utiaʼal in kʼamik u yutsil le baʼax tu beetaj Dios utiaʼal maʼ in k-kʼamik u yaayaj jaatsʼoʼ?».
Salvartaʼaboʼob tiʼ «u yaayaj jaatsʼ Jajal Dios»
4, 5. ¿Baʼax eʼesik le kʼasaʼan yóokʼol kaabaʼ táan u kʼamik u «yaayaj jaatsʼ Jajal Dios»?
4 Le baʼax ku yaʼalik le Biblia yéetel le baʼaxoʼob ku yúuchloʼob bejlaʼoʼ ku yeʼeskoʼobeʼ desde ka kʼebanchaj Adaneʼ, tuláakloʼon táan k-kʼamik «u yaayaj jatsʼ Jajal Dios» (Juan 3:36). Le oʼolal tuláakal máak ku kíimil. Le bix u gobernar Satanás, le máax pʼekmil Diosoʼ, maʼ béeyak u kanáantik máak tiʼ le talmiloʼoboʼ, yéetel mix upʼéel gobierno páajchajak u tsʼáaik baʼaxoʼob kʼaʼabéet tiʼ máak (1 Juan 5:19). Tak teʼ kʼiinoʼobaʼ maʼ xuʼuluk u yantal baʼateltáambaloʼobiʼ, u beetaʼal loob yéetel u muʼyajtaʼal óotsilil.
5 Lelaʼ ku yeʼeskeʼ le kʼasaʼan yóokʼol kaabaʼ náach yanil tiʼ Jéeoba. Le oʼolal Pabloeʼ ku yaʼalik: «U nojoch jaatsʼ Jajal Dioseʼ kaʼan u taal tu yóokʼol tuláakal le máaxoʼob maʼ [toj] u kuxtaloʼob[oʼ]» (Rom. 1:18-20). Bey túunoʼ, le máaxoʼob maʼ tu yóotik u pʼatoʼob le baʼaxoʼob kʼaastakoʼ yaan u muʼyajoʼob. Teʼ kʼiinoʼobaʼ táan u tsʼaʼabal ojéeltbil le yaayaj jaatsʼ ken u taas Diosoʼ; lelaʼ ku chíikbesaʼal tumen le «siete copaʼob» ku weʼekel tu yóokʼol u kʼasaʼan yóokʼol kaab Satanasoʼ. Lelaʼ ku tsʼaʼabal ojéeltbil teʼ jóoʼsaʼaniloʼob ku taal tiʼ le palitsiloʼ (Apo. 16:1).
6, 7. ¿Baʼax táan u beetik le sukuʼunoʼob yéeyaʼanoʼoboʼ, yéetel baʼax jeʼel u páajtal u beetik le máaxoʼob yanoʼob ichil u kʼasaʼan yóokʼol kaab Satanasoʼ?
6 ¿U kʼáat wa túun u yaʼal tsʼoʼok maʼ tu kʼaʼamal le máaxoʼob yanoʼob ichil u kʼasaʼan yóokʼol kaab Satanás taak u natsʼkubaʼob tiʼ Diosoʼ? Maʼatech, letiʼeʼ láayliʼ u kʼáat ka u natsʼuba máak tu yiknaleʼ. Le sukuʼunoʼob yéeyaʼanoʼob utiaʼal u binoʼob kaʼanoʼ táan u tʼaanoʼob «tu kʼaabaʼ Cristo», lelaʼ ku taasik utsil tiʼ tuláakal wíinik. Táan u yaʼalikoʼob tiʼ tuláakal máak: «Bisabaʼex tu kaʼatéen yéetel Jajal Dios» (2 Cor. 5:20, 21).
7 Apóstol Pabloeʼ tu yaʼaleʼ Jesús «tokikoʼon tiʼ le yaayaj jaatsʼ ku taaloʼ» (1 Tes. 1:10). Jéeobaeʼ yaan u xuʼulsik tiʼ tuláakal le máaxoʼob maʼ tu arrepentiroʼoboʼ (2 Tes. 1:6-9). ¿Máaxoʼob túun ken u salvartubaʼob? Le Bibliaoʼ ku yaʼalik: «Le máax ku yoksik u yóol tiʼ le Paaloʼ yaan kuxtal minaʼan u xuul tiʼ. Baʼaleʼ le máax maʼ u kʼáat u yoksaj óolt le Paaloʼ, maʼ bíin yanak kuxtal tiʼiʼ, baʼaleʼ bíin u kʼam u yaayaj jatsʼ Jajal Dios» (Juan 3:36). Jeʼex túun k-ilkoʼ, ken kʼuchuk u kʼiinil u xuʼulsaʼal tiʼ u kʼasaʼan yóokʼol kaab Satanaseʼ, chéen le máaxoʼob u tsʼaamaj u fejoʼob tiʼ Jesús yéetel tiʼ u kuxtal tu kʼubaj ken u salvartubaʼoboʼ.
Bix u salvarkoʼon le u kuxtal Jesús tu kʼuboʼ
8. 1) ¿Bix le kuxtal kun yantal tiʼ Adán yéetel Eva wa maʼ u kʼebantaloʼob kaʼachoʼ? 2) ¿Bix úuchik u chíikpajal Jéeobaeʼ mantatsʼ ku beetik baʼax toj?
8 Dioseʼ jach maʼalob úuchik u beetik Adán yéetel Eva. Wa ka u beetoʼob baʼax ku yaʼalik kaʼacheʼ, bejlaʼa upʼéel Paraíso le Luʼumaʼ yéetel kiʼimak u yóoloʼob yéetel u paalaloʼobeʼ. Baʼaleʼ letiʼobeʼ tu chʼaʼatukloʼob maʼ u beetkoʼob baʼax ku yaʼalik Dios, le oʼolal jóoʼsaʼaboʼob teʼ tu jardinil Edenoʼ yéetel kíimoʼob. Tumen kʼebanchajoʼobeʼ tuláakal u paalaloʼobeʼ láaj kʼebanoʼob xan. Ka tsʼoʼokeʼ chʼíijoʼob yéetel kíimoʼob, lelaʼ tu yeʼesaj Jéeobaeʼ ku beetik baʼax ku yaʼalik yéetel ku beetik baʼax toj. Letiʼeʼ tu yaʼalaj tiʼ Adán wa ku jaantkoʼob u yich le cheʼoʼ yaan u kíimloʼob, le oʼolal le ka tu jaantoʼobeʼ kíimoʼob.
9, 10. 1) ¿Baʼaxten ku kíimil u paalaloʼob Adán? 2) ¿Baʼax unaj k-beetik utiaʼal k-salvartikba tiʼ le kíimiloʼ?
9 Toʼoneʼ kʼebanoʼon xan, tumen u paalaloʼon Adán, le oʼolal k-kíimil. Tumen le ka kʼebanchaj Adaneʼ maʼ yanak mix utúul u paalaliʼ. Bey túunoʼ, wa ku beetik Jéeoba u xuʼulul u chʼíijil máak chéen beyoʼ, yaan kaʼach u bin tu contra u justicia. Le oʼolal tiʼ tuláakloʼon ku béeychajal le baʼax tu yaʼalaj Pabloaʼ: «Toʼoneʼ k-oojleʼ le Leyoʼ tiʼ Dios u taal; baʼaleʼ teneʼ chéen juntúul wíiniken konaʼanen tiʼ le kʼebanoʼ. ¡Jach óotsilen! ¿Máax kun jáalkʼabtiken tiʼ le wíinklil táan u bisken tiʼ le kíimiloʼ?» (Rom. 7:14, 24, NM).
10 Chéen Jéeoba jeʼel u páajtal u jáalkʼabtikoʼon tiʼ le kʼeban yéetel tiʼ le kíimil, jeʼex u yaʼalik u justiciaoʼ. ¿Baʼax túun tu beetaj? Tu túuxtaj Jesús, le u Hijo jach u yaabiltmaj utiaʼal ka u tsʼáa u kuxtal t-oʼolaloʼ. Letiʼeʼ maʼ kʼebanchaj jeʼex Adaneʼ. Le oʼolal Bibliaoʼ ku yaʼalik: «Letiʼeʼ maʼ tu beetaj mix junpʼéel kʼebaniʼ» (1 Ped. 2:22). Le beetik Jesuseʼ jeʼel u páajtal kaʼach u yantal u paalal minaʼan u kʼeebanoʼobeʼ. Baʼaleʼ tu chaʼaj u kíimsaʼal tumen le máaxoʼob pʼekmil Diosoʼ, utiaʼal u tsʼáaik kuxtal minaʼan u xuul tiʼ u paalaloʼob Adán ken u tsʼáa u fejoʼob tiʼoʼ. Le Bibliaoʼ ku yaʼalik: «Yaan chéen juntúuliliʼ [...] Jajal Dios, juntúuliliʼ xan máax ku páajtal u tsʼáaik maʼalobil tuláakal máak tu táan Yuum Jajal Dios: Jesucristo [...]. Jesucristoeʼ tu kʼubjuba tiʼ kíimil utiaʼal u boʼotik u tojol u [salvación] tuláakal máak» (1 Tim. 2:5, 6).
11. 1) ¿Yéetel baʼax jeʼel u páajtal k-ketik le boʼol tu tsʼáaj Jéeobaoʼ? 2) ¿Máaxoʼob kun kʼamik u yutsil le boʼol tu tsʼáajoʼ?
11 Utiaʼal k-naʼatik le baʼax tu beetaj Jéeobaoʼ, koʼoneʼex ketik beyaʼ. Utúul máakeʼ ku tsʼaʼabal taakʼin u líiʼse, baʼaleʼ ku yoklik. Le oʼolal ku kʼaʼalal cárcel. Baʼaleʼ ¿kux túun u yuumil le taakʼinoʼ? Utiaʼal ka suʼutuk u taakʼineʼ, kʼaʼabéet u jóokʼol utúul máak ayikʼal jeʼel u yóotik u sut le bajux oklaʼab tiʼoʼ. Jéeoba yéetel Jesuseʼ tsʼoʼok u kaʼa manikoʼob u paalal Adán yéetel yoʼolal u kʼiʼikʼel Jesús tu wekoʼ tsʼoʼok u perdonarkoʼob le kʼebanoʼ. Le oʼolal Juan Bautistaeʼ tu yaʼalaj yoʼolal Jesús: «Ileʼex, lelaʼ u j-taman Jajal Dios, máax ku lukʼesik u kʼeban yóokʼol kaab» (Juan 1:29). Le yóokʼol kaab ku luʼsaʼal u kʼebanoʼ letiʼe wíinikoʼob kuxaʼanoʼoboʼ yéetel le tsʼoʼok u kíimloʼoboʼ.
Le bukaʼaj úuchik u muʼyajoʼoboʼ
12, 13. ¿Baʼax k-kanik tiʼ le bix úuchik u muʼyaj Abraham le ka tu yóotaj u kʼub Isaacoʼ?
12 U jaajileʼ maʼ tu béeytal k-naʼatik jach bukaʼaj úuchik u muʼyaj Jéeoba yéetel Jesús yoʼolal le baʼax tu beetoʼob t-oʼolaloʼ, baʼaleʼ jujumpʼéel tsikbaliloʼob yaan teʼ Bibliaoʼ jeʼel u yáantkoʼon k-naʼat bix tu yuʼubilubaʼobeʼ. Koʼoneʼex kʼaʼajsik u tsikbalil Abraham. Tuukulnakoʼon tiʼ bix tu yuʼubiluba teʼ óoxpʼéel kʼiinoʼob táan u bin tu luʼumil Moria utiaʼal u beetik le baʼax aʼalaʼabtiʼaʼ: «Chʼaʼa Isaac le a [juntúuliliʼ] paal máax a sen yaabilmajoʼ, xeen tu luʼumil Moria. Le ken kʼuchukech teʼeloʼ, kʼub Isaac láaj tóokbil, yóokʼol le joʼol luʼum kin in weʼestechoʼ» (Gén. 22:2-4).
13 Tuukulnakoʼon xan bix tu yuʼubiluba le ka kʼuch teʼ tuʼux aʼalaʼabtiʼoʼ, tu beetaj upʼéel altar, tu kʼaxaj u yook bey xan u kʼab u hijoeʼ ka tu chikúuntiʼ. Beoraaʼ tuukulnakoʼon bix tu yuʼubiluba le ka tu machaj le cuchillo yéetel le ka tu chʼúuya u kʼab utiaʼal u kíimskoʼ. Tuukulnakoʼon xan tiʼ Isaac. ¿Bix tu yuʼubiluba le ka chilaj teʼ altar táan u páaʼtik u xoʼotol yéetel u kíimsaʼal yéetel le cuchillooʼ? Kex u ángel Jéeoba maʼ tu chaʼa u kíimsaʼal Isaac tumen Abrahameʼ, le baʼax tu beetoʼoboʼ ku yáantkoʼon k-naʼat bukaʼaj úuchik u muʼyaj Jéeoba le ka tu yilaj bix u kíimsaʼal u Hijo tumen le máaxoʼob yanoʼob tu tséel Satanasoʼ. Le úuchik u yóotik Isaac ka kíimsaʼakoʼ tu yeʼesaj le baʼax tu beetaj Jesús utiaʼal u kʼubik u kuxtal t-oʼolaloʼ (Heb. 11:17-19).
14. ¿Baʼax tu muʼyajtaj Jacob jeʼel u yáantkoʼon k-naʼat le bix tu yuʼubiluba Jéeoba le ka kíim u Hijo t-oʼolaloʼ?
14 Uláakʼ upʼéel tsikbalil ku yáantkoʼon k-naʼat le bukaʼaj úuchik u muʼyaj Jéeobaoʼ letiʼe baʼax úuch tiʼ Jacoboʼ. Letiʼeʼ jach u yaabiltmaj José, baʼaleʼ Joseiʼ pʼektaʼab tumen u sukuʼunoʼob. Upʼéel kʼiineʼ Jacobeʼ tu túuxtaj José u yil bix yanil u sukuʼunoʼob, letiʼobeʼ tiaʼanoʼob tu luʼumil Hebrón, kex 25 leguas (100 kilómetros) yanil tu yotochoʼobeʼ, teʼeloʼ tiʼ ku kanáantik u taamanoʼobiʼ. Kex José u yojel pʼektaʼan tumen u sukuʼunoʼobeʼ, tu beetaj le baʼax aʼalaʼabtiʼoʼ. Chéen máans ta tuukul bix tu yuʼubiluba Jacob le ka tsʼaʼabtiʼ u nookʼ José papaʼ kʼiʼikʼoʼ. Ka tu yileʼ tu yaʼalaj: «¡Lelaʼ letiʼ u búuk in paal! Juntúul kʼáaxil baʼalcheʼ xeʼexeʼetʼe, ka tu jaantaj». Leloʼ tu beetaj u jach yaatal u yóol ich yaʼab kʼiinoʼob (Gén. 37:33, 34). U jaajileʼ Jéeobaeʼ maʼatech u yuʼubikuba jeʼex u yuʼubikuba máakeʼ. Baʼaleʼ le tsikbaliloʼobaʼ ku yáantkoʼon k-naʼat bix tu yuʼubiluba le ka tu yilaj bix u beetaʼal u sen muʼyaj yéetel u kíimsaʼal u Hijo jach u yaabiltmoʼ.
Baʼax utsiloʼob ku taasik le úuchik u kʼubik u kuxtal Jesusoʼ
15, 16. 1) ¿Bix úuchik u yeʼesik Jéeoba tsʼoʼok u kʼamik le boʼol tu beetaj Cristooʼ? 2) ¿Baʼax utsil tsʼoʼok a kʼamik yoʼolal le boʼol tu tsʼáaj Cristooʼ?
15 Jéeobaeʼ tu kaʼa kuxkíintaj u Hijo bey utúul angeleʼ (1 Ped. 3:18). Ka tsʼoʼokeʼ, Jesuseʼ tu chíikbesuba ich cuarenta kʼiinoʼob tiʼ u disipuloʼob, tu líiʼsaj u yóoloʼob yéetel tu yaʼalajtiʼob le meyaj ken u beetoʼob utiaʼal u tsʼáaikoʼob kʼaj óoltbil le maʼalob péektsiloʼ. Ka tsʼoʼokeʼ suunaj teʼ kaʼanoʼ, ka tu kʼubaj u tojol u kuxtal tu táan Dios, utiaʼal ka perdonartaʼak u kʼeeban le máaxoʼob ku tsʼáaik u fejoʼob tiʼoʼ. Jéeobaeʼ tu kʼamaj le boʼol tu beetaj Cristooʼ, leloʼ chíikpaj le ka tu tsʼáaj u páajtalil tiʼ utiaʼal u tsʼáaik le kiliʼich muukʼ yóokʼol u disipuloʼob yanoʼob tu kaajil Jerusalén teʼ Pentecostés tiʼ u jaʼabil 33 tiʼ le yáax siglooʼ (Hch. 2:33).
16 Tu séebaʼanileʼ le disipuloʼob kʼam le kiliʼich muukʼoʼ joʼopʼ u yaʼalikoʼob tiʼ u maasil ka okjaʼanakoʼob tu kʼaabaʼ Jesucristo utiaʼal ka perdonartaʼak u kʼeebanoʼob yéetel utiaʼal ka púutsʼkoʼob tiʼ «u yaayaj jaatsʼ Jajal Dios» (xokaʼak Beetaʼanoʼob 2:38-40). Desde teʼ kʼiinoʼ, Dioseʼ tsʼoʼok u natsʼik u millonesi máakoʼob tiʼ jejeláas kaajoʼob tu yiknal, tumen ku tsʼáaik u fejoʼob tiʼ u kuxtal Cristooʼ (Juan 6:44). Beoraaʼ koʼoneʼex ilik u núukil le kʼáatchiʼobaʼ: ¿Yoʼolal wa le baʼaloʼob maʼalobtak ku beetik máak kun tsʼaʼabaltiʼ le kuxtal minaʼan u xuuloʼ? ¿Jeʼel wa u luʼsaʼal tiʼ máak u páajtalil u kuxtal minaʼan u xuuleʼ?
17. ¿Bix unaj k-ilik le u páajtalil k-bisikba yéetel Diosoʼ?
17 U jaajileʼ mix máak ku náajaltik ka u tsʼáa u kuxtal Cristo tu yoʼolal. Baʼaleʼ le máaxoʼob ku tsʼáaik u fejoʼob tiʼoʼ ku biskubaʼob yéetel Dios yéetel yaan u kuxtaloʼob utiaʼal minaʼan u xuul tiʼ upʼéel Paraíso way Luʼumeʼ. Baʼaleʼ yaan baʼax jeʼel u beetik u xuʼulul u biskuba máak yéetel Jéeobaeʼ. Wa k-kʼáat ka u salvartoʼon ken u taas le xuʼulsajiloʼ, kʼaʼabéet k-eʼesik sáamsamal nojoch baʼal k-ilik le boʼol tu tsʼáa «yoʼolal Cristo[oʼ]» (Rom. 3:24; xokaʼak Filiposiloʼob 2:12).
Maʼ u xuʼulul k-tsʼáaik k-fe tiʼ le boʼol tu tsʼáaj Cristooʼ
18. ¿Bix u yeʼesik máak yaan u fe tiʼ le boʼol tu tsʼáaj Cristooʼ?
18 Juan 3:36, u tekstoi le xookaʼ, ku yeʼeskeʼ upʼéel bix jeʼel k-tsʼáaik k-fe tiʼ Jesucristoeʼ letiʼe ka k-beet baʼax tu yaʼaloʼ. Le úuchik u kʼubik u kuxtal t-oʼolaloʼ, unaj u péekskoʼon k-beet baʼax maʼalob, jeʼex tu kaʼansiloʼ (Mar. 7:21-23). Le máaxoʼob maʼ tu pʼatkoʼob le baʼaloʼob kʼaastak, jeʼex «le núupkʼebanoʼ», u yaʼalik máak «baʼaloʼob subtsiloʼob» yéetel «baʼaloʼob chéen kuneloʼob wa kʼaas» ku beetik le máaxoʼob ku suuktal u chaʼantkoʼob pornografíaoʼ, yaan u kʼamkoʼob «u yaayaj jaatsʼ Jajal Dios» (Efe. 5:3-6).
19. ¿Bix jeʼel u yeʼesik máak ku tsʼáaik u fe tiʼ le boʼol tsʼaʼab t-oʼolaloʼ?
19 Utiaʼal k-tsʼáaik u nib óolalil le boʼol tsʼaʼab t-oʼolaloʼ unaj k-ilik k-bisik upʼéel kuxtal kiliʼich tu táan Dios (2 Ped. 3:11). Jach unaj k-jóoʼsik tiempo utiaʼal k-xokik le Bibliaoʼ, utiaʼal k-payalchiʼ, utiaʼal k-bin teʼ muchʼtáambaloʼoboʼ, utiaʼal u yantaltoʼon le adoración ich familiailoʼ yéetel utiaʼal k-jóokʼol teʼ kʼaʼaytajoʼ. Tsʼoʼoleʼ unaj k-ilik k-beetik le baʼax ku yaʼalik le Bibliaaʼ: «Maʼ u tuʼubulteʼex a beetikeʼex uts yéetel a paklan áantikabaʼex; tumen leloʼobaʼ letiʼ le siibaloʼob utstutʼaan Jajal Diosoʼ» (Heb. 13:15, 16).
20. ¿Baʼax utsiloʼob ken u kʼam le máaxoʼob kun chúukpajal u yóol u yeʼes u fejoʼob tiʼ le boʼol tu tsʼáaj Jéeoba yéetel Cristooʼ?
20 Le ken xuʼulsaʼak tiʼ le kʼasaʼan yóokʼol kaabaʼ, jach yaan u kiʼimaktal k-óol úuchik k-tsʼáaik fe yéetel úuchik k-ilik jach nojoch le boʼol tu tsʼáaj Jéeoba yéetel Cristo t-oʼolaloʼ. Teʼ túumben luʼum ku yaʼalik Dios u tsʼáaikoʼ yaan u yantaltoʼon kuxtal minaʼan u xuul yoʼolal le boʼol tu tsʼáaj utiaʼal u jáalkʼabtikoʼon tiʼ le «yaayaj jaatsʼ» ken u taasoʼ (xokaʼak Juan 3:16 yéetel Apocalipsis 7:9, 10, 13, 14).
Koʼoneʼex núukik jujumpʼéel kʼáatchiʼob
• ¿Baʼaxten kʼaʼabéetchaj u tsʼaʼabal le boʼoloʼ?
• ¿Bukaʼaj muʼyajnajik Jéeoba yéetel Jesús utiaʼal u tsʼáaikoʼob le boʼoloʼ?
• ¿Baʼax utsiloʼob ku taasik le boʼoloʼ?
• ¿Bix k-eʼesik yaan k-fe tiʼ le u kuxtal Jesús tu kʼubaj t-oʼolaloʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 13]
Jéeobaeʼ láayliʼ táan u kʼamik le máaxoʼob u kʼáat u bisubaʼob tu yéeteloʼ
[U tsolajil le oochel teʼ táan juʼun 15]
Ken tuukulnakoʼon tiʼ bix tu yuʼubiluba Abraham, Isaac yéetel Jacobeʼ, k-maas naʼatik bix tu yuʼubiluba Jéeoba le ka tu yilaj u kíimil u Hijo t-oʼolal