¡K-invitartik tuláakal!

PAX ICH

¡K-invitartik tuláakal!

¿BAʼAX tiaʼal? Utiaʼal a xíimbaltikeʼex upʼéel tiʼ le 118 najiloʼob Betel yaan tiʼ u j-jaajkunajoʼob Jéeoba tiʼ tuláakal le Luʼumaʼ. Yaʼab tiʼ le máaxoʼob tsʼoʼok u bin u xíimbaltoʼoboʼ jach jatsʼuts tu yiloʼob.

Utúul xiʼipal ku tsʼaʼabal xook tiʼ yéetel le Bibliaoʼ bin u xíimbalt u najil Betel, tu luʼumil México, letiʼeʼ jach jatsʼuts tu yilil bix kiʼimakil u yóol le sukuʼunoʼob yéetel le kiikoʼob ku meyajoʼoboʼ. Le oʼolal tu kʼáataj: «¿Baʼax unaj in beetik utiaʼal ka meyajnaken wayeʼ?». Ka aʼalaʼabtiʼ: «Yáax unaj a wokjaʼ. Tsʼoʼoleʼ maʼalob ka a beet a precursor regulari». Le xiʼipal túunoʼ tu beetaj le baʼax aʼalaʼabtiʼoʼ, ka máan kaʼapʼéel jaʼabeʼ invitartaʼab meyaj Betel, bejlaʼeʼ tsʼoʼok maas tiʼ veinte jaʼaboʼob káajak u meyajiʼ.

¿Baʼax Betel?

Le kʼaabaʼ Beteloʼ, ich hebreoeʼ u kʼáat yaʼal u «yotoch Dios» (Gén. 28:19). U najiloʼob Beteleʼ ku yáantik le maas tiʼ cien mil múuchʼuliloʼob tiʼ u j-jaajkunajoʼob Jéeoba yaan tiʼ tuláakal le Luʼumaʼ. Tsʼoʼoleʼ, yaan u najiloʼob Beteleʼ ku jóoʼskoʼob bibliaʼob yéetel uláakʼ jóoʼsaʼaniloʼob. Tiʼ tuláakal u najiloʼob Beteleʼ ku meyaj 20,000 sukuʼunoʼob yéetel kiikoʼob tiʼ jejeláas luʼumiloʼob, yéetel jejeláas bix líiʼsaʼaniloʼob, baʼaleʼ ku múuchʼ meyajkoʼob Jéeoba yéetel ku yáantkoʼob u maasil máaxoʼob meyajtik Diosoʼ. Tu najil Beteleʼ yaan sukuʼunoʼob tsʼoʼok u yantal u jaʼabiloʼob ku múuchʼ meyajoʼob yéetel le táankelmoʼoboʼ. Le sukuʼunoʼob ku meyajoʼoboʼ ku jóoʼloʼob kʼaʼaytaj yéetel ku binoʼob muchʼtáambal teʼ múuchʼuliloʼob yaan naatsʼ tiʼ Betel tu jóokʼbal semanaoʼ wa ken tsʼoʼokok u meyajoʼob. Tsʼoʼoleʼ ku jóoʼskoʼob tiempo utiaʼal u xokkoʼob le Bibliaoʼ, utiaʼal u náaysik u yóoloʼob wa utiaʼal u beetkoʼob uláakʼ baʼaxoʼob kʼaʼabéet.

Le sukuʼunoʼob ku meyajoʼob Beteloʼ ku yáantaʼaloʼob yéetel upʼíit taakʼin utiaʼal u manikoʼob le baʼax kʼaʼabéettiʼoboʼ. Tsʼoʼoleʼ ku tsʼaʼabal yoʼochoʼob yéetel upʼéel cuarto limpio utiaʼal u jeʼelsikubaʼob. U najiloʼob Beteleʼ maʼ jeʼex le nukuch hoteloʼob utiaʼal ayikʼaloʼoboʼ, baʼaleʼ beetaʼanoʼob tubeel utiaʼal u páajtal u beetaʼal le meyajoʼob kʼaʼabéetoʼ. Le máaxoʼob xíimbaltik Beteloʼ jach jatsʼuts u yilkoʼob bix u múuchʼ meyaj le sukuʼunoʼoboʼ, bix u biskubaʼob bey xan bix u paklan áantkubaʼob yéetel bix limpioi tuláakal le kúuchiloʼ. Kex tuláakloʼob jach yaʼab meyaj ku beetkoʼobeʼ, yaan u tiempoi utiaʼal u yeʼeskoʼob yaabilaj. Tu najil Beteleʼ mix máak ku taaskuba nojbaʼalil yoʼolal le meyaj ku beetkoʼ mix yoʼolal u luʼumil. Tuláakal le meyajoʼob ku beetaʼaloʼ jach kʼaʼanan, kex tiʼ limpieza, beet janal, tiʼ jardinería, u beetaʼal libroʼob yéetel revistaʼob wa u meyaj máak tiʼ oficina. Le sukuʼunoʼob ku meyajoʼob Beteloʼ (kʼaj óoltaʼanoʼob bey betelitaʼobeʼ), ku múuchʼ meyajoʼob utiaʼal u béeytal u kʼaʼaytaʼal le maʼalob péektsiloʼ (Col. 3:23).

Koʼox kʼaj óoltik jujuntúul betelitaʼob

Koʼoneʼex kʼaj óoltik jujuntúul tiʼ le sukuʼunoʼob yanoʼob Beteloʼ. ¿Baʼax péeksoʼob utiaʼal ka xiʼikoʼob meyajiʼ? Koʼox tʼaan tiʼ Mario, letiʼeʼ yaan kaʼach upʼéel meyaj tiʼ jach maʼalob u boʼotaʼal. Ku meyaj kaʼach tiʼ upʼéel u fabricai camionoʼob, yéetel yaan kaʼach u tsʼaʼabaltiʼ upʼéel meyaj maas maʼalob. Maʼ úuch tiʼ leloʼ bin meyaj upʼéel semana tu najil Betel yaan tu luʼumil Alemania, ka tsʼaʼab meyaj teʼ imprentaoʼ. Letiʼeʼ séebaʼan úuchik u yilik u jelaʼanil u yéet meyajoʼob tiʼ le sukuʼunoʼob ku meyajoʼob Beteloʼ, ka tu chupaj u solicitud utiaʼal u yokol meyajiʼ. Kex u láakʼtsiloʼob yéetel u yéet meyajoʼob maʼ tu naʼatoʼob baʼaxten tu pʼataj le meyaj ku beetik kaʼachoʼ, Marioeʼ jach kiʼimak u yóol ikil u meyaj Betel.

Yaʼab tiʼ le sukuʼunoʼob ku binoʼob Beteloʼ maʼ u yojeloʼob kaʼach u beetoʼob le meyajoʼob ku beetkoʼob bejlaʼoʼ. Lelaʼ bey úuchik tiʼ Abel, tsʼoʼok maas tiʼ 15 jaʼaboʼob joʼopʼok u meyaj Betel tiʼ u luʼumil México. Letiʼeʼ ku yaʼalik: «Teneʼ kin wilik Betel bey upʼéel escuelaeʼ. Tsʼoʼok in kanik in manejart nukuch rotativaʼob tuʼux ku beetaʼal le jóoʼsaʼaniloʼoboʼ. In wojel jeʼel u béeytal in náajaltik yaʼab taakʼin táanxelil yéetel le meyaj kin beetkoʼ, baʼaleʼ maʼ ken in kʼam le utsiloʼob kin wilik tu najil Beteloʼ, minaʼanten chiʼichnakiloʼob, kiʼimak in wóol, tsʼoʼoleʼ yéetel mix máak kin ketlan meyaj, jeʼex u beetik le máaxoʼob maʼatech u meyajtkoʼob Diosoʼ. In tiaʼal teneʼ letiʼe maas maʼalob kaʼansaj tsʼoʼok in kʼamkoʼ, tumen ku yáantken utiaʼal in maas meyajtik Dios yéetel utiaʼal in kanik yaʼab baʼaloʼob. Mix tuʼux jeʼel u béeytal in kanik le baʼaloʼobaʼ, mix tak teʼ tu maas maʼalobil universidadoʼoboʼ».

Jach ku líikʼil u yóol máak ken xiʼik xíimbaliʼ

Le máaxoʼob ku binoʼob xíimbal Beteloʼ jach ku líikʼil u yóoloʼob. Lelaʼ bey úuchik tiʼ Omar, kajaʼan tu luʼumil México. Letiʼeʼ desde tu chichnil kaʼansaʼabtiʼ le baʼax ku yaʼalik le Biblia tumen u maamaoʼ, baʼaleʼ ka tu tsʼáaj 17 jaʼaboʼob tiʼeʼ xuʼul u bin muchʼtáambal bey xan u jóokʼol kʼaʼaytaj. Lúub tiʼ yaʼab vicioʼob yéetel joʼopʼ u bin tu paach chéen ayikʼaliloʼob. Ka máan kʼiin, le táan u meyaj tiʼ upʼéel empresaoʼ, yéeyaʼab yéetel u jaatsʼ u yéet meyajoʼob utiaʼal ka xiʼik u yeʼesoʼob tu najil Betel bix u meyaj jujumpʼéel maquinaʼob. Omareʼ ku yaʼalik: «Ka tsʼoʼokeʼ máansaʼaboʼon xíimbaliʼ. Le baʼax tin wilaj yéetel le yaabilaj eʼesaʼabtoʼonoʼ tu beetaj in tuukul tiʼ baʼax kin beetik yéetel in kuxtal. Ka joʼopʼ in kaʼa bin teʼ muchʼtáambaloʼoboʼ yéetel in xokik le Bibliaoʼ. Seis meses xiʼiken Beteleʼ ka okjaʼanajen. Jach kin tsʼáaik nib óolal tiʼ Jéeoba úuchik u líiʼsik in wóol le ka binen xíimbal Beteloʼ».

Masahiko, utúul japonileʼ, líikʼ ichil upʼéel familia ku meyajtik Jéeoba. Baʼaleʼ kʼuch u tukulteʼ jach yaʼab baʼaloʼob maʼatech u chaʼabal u beetik ikil u meyajtik Dios. Joʼopʼ u maas tsʼáaik u yóol xook ka xuʼul u bin muchʼtáambal bey xan u jóokʼol kʼaʼaytaj. Letiʼeʼ ku yaʼalik: «Upʼéel kʼiineʼ, in láakʼtsiloʼob yéetel uláakʼ sukuʼunoʼobeʼ tu chʼaʼatuklaj u binoʼob xíimbal Betel. In láakʼtsiloʼobeʼ tu sen aʼaloʼobten ka xiʼiken tu yéeteloʼob, ka binen. Le táan k-máansaʼal k-kʼaj óoltoʼ jach maʼalob tin wuʼuyilimba. Mix utéen in wuʼuyimba yéetel in amigoʼob jeʼex le úuchik in wuʼuykimba yéetel le sukuʼunoʼob ka binoʼon Beteloʼ. Ka lukʼoʼoneʼ tsʼoʼok in chʼaʼatuklik in meyajtik Dios jeʼex unajeʼ, ka tin kʼáataj ka tsʼaʼabakten xook». Bejlaʼeʼ Masahikoeʼ utúul precursor regular tu múuchʼulil.

Utúul kiik kajaʼan kaʼach Franciaeʼ bin meyaj tu noj kaajil Moscú. Bey túunoʼ, joʼopʼ u náachtal tiʼ u kaajal Dios. Ka máan kʼiineʼ káaj u beetik baʼax kʼaas bey xan tsʼoʼok u beel yéetel utúul máax maʼatech u meyajtik Dios. Upʼéel kʼiineʼ bin xíimbaltbil tumen utúul kiik kajakbal tu luʼumil Francia, ka binoʼob tu noj kaajil San Petersburgo utiaʼal u xíimbaltkoʼob u najil Betel. Letiʼeʼ tu tsʼíibtaj tiʼ upʼéel carta bix tu yuʼubiluba: «Ka binoʼon Beteleʼ jach líikʼ in wóol yoʼolal le bix úuchik k-kʼaʼamloʼ. Jach jatsʼuts úuchik in wilik le jeetsʼelil yanoʼ. Tin wuʼuyaj bix u yáantken le kiliʼich muukʼoʼ. ¿Baʼaxten náachchajen tiʼ u kaajal Dios? Ka lukʼoʼoneʼ, tin kʼáataj tiʼ Jéeoba ka u yáanten yéetel joʼopʼ in kaʼansik le baʼax ku yaʼalik le Biblia tin in mejen paalaloʼ». Kex áantaʼab tumen uláakʼ sukuʼunoʼobeʼ, jach líikʼ u yóol le ka bin u xíimbalt Beteloʼ. Desde teʼ kʼiin jeʼeloʼ jach tu tsʼáaj u yóol u meyajt Dios.

¿Bix u yuʼubikuba le máaxoʼob maʼatech u meyajtkoʼob Dios le ken u xíimbaltoʼob Beteloʼ? Tu jaʼabil 1988, Alberto, utúul máax jach u yoksmuba tiʼ politicaeʼ, bin u xíimbalt Betel tu luʼumil Brasil. Jach jatsʼuts úuchik u yilik bix limpioi, bix u múuchʼ meyaj le sukuʼunoʼoboʼ yéetel tumen mix baʼal ku taʼakikoʼob. Táanil tiʼ u bin Beteleʼ, tsʼokaʼaniliʼ u xíimbaltik upʼéel seminario tuʼux ku beetik u j-kʼiinil u cuñadoiʼ, letiʼeʼ tu yilaj tuláakal le baʼaxoʼob ku beetaʼaloʼ maʼatech u tsʼaʼabal u yojéelt u maasil». Ka tsʼoʼok u xíimbaltik Beteleʼ tu yóotaj ka tsʼaʼabak xook tiʼ yéetel le Bibliaoʼ, xuʼul u yokskuba tiʼ política; bejlaʼeʼ táan u meyaj bey ancianoi tu múuchʼulileʼ.

¡Koʼoten a xíimbaltoʼon!

Yaʼab sukuʼunoʼobeʼ ku beetkoʼob tuláakal le ku páajtal utiaʼal u bin u xíimbaltoʼob u najil Betel yaan tu luʼumiloʼoboʼ. Jeʼex Paulo yéetel Eugeniaeʼ, ich kampʼéel jaʼaboʼob táan u líiʼsik u taakʼinoʼob utiaʼal u bin u xíimbaltoʼob Betel, tu luʼumil Brasil, tu bisaj kaʼapʼéel kʼiin táan u binoʼob tiʼ autobús tumen 750 leguas (3,000 kilómetros) yanil teʼ tuʼux kajaʼanoʼoboʼ. ¿Bix tu yuʼubilubaʼob úuchik u binoʼobiʼ? Letiʼobeʼ ku yaʼalikoʼob: «Jach tu líiʼsaj k-óol. Bejlaʼeʼ maas k-ojel bix le meyaj ku yúuchul Beteloʼ. Kaʼacheʼ ken k-tsol tiʼ le máaxoʼob k-tsʼáaik xook bix le meyaj ku beetaʼaloʼ, yaan kʼiineʼ ku kʼáatkoʼob: “¿teʼexeʼ tsʼoʼok wa a bineʼexiʼ?”. Bejlaʼeʼ jeʼel u páajtal k-aʼaliktiʼob tsʼoʼokeʼ».

¿Yaan wa upʼéel u najil Betel naatsʼ teʼ tuʼux kajaʼanechoʼ? Wa yaneʼ k-invitarkech ka xiʼikech a xíimbalte. Wa ka xiʼikecheʼ le sukuʼunoʼob ku meyajoʼoboʼ jeʼel u kʼamkechoʼob yéetel kiʼimak óolaleʼ tsʼoʼoleʼ yaan a kʼamik yaʼab utsiloʼob.