Jach bin utsil tiʼ le kʼaʼaytaj beetaʼab Bulgariaoʼ

«Le joochoʼ jach yaʼab, baʼaleʼ le [j-]meyajoʼoboʼ jach jumpʼíitoʼob. Le oʼolaleʼ kʼáat óolteʼex tiʼ u Yuumil le joochoʼ ka u túuxt [j-]meyajoʼob utiaʼal jochik.» (MAT. 9:37, 38)

LE BAʼAXOʼOB tu yaʼalaj Jesusaʼ jach táan u béeytal tu luʼumil Bulgaria, yaan tu noojol lakʼin Europa. ¿Baʼaxten? Tumen jach kʼaʼabéet máaxoʼob kʼaʼaytik le maʼalob péektsil tiʼ le maas tiʼ 7,000,000 máakoʼob kajaʼanoʼob tu chúumuk u witsil le Balcanoʼoboʼ. Kex yaan 1,700 j-kʼaʼaytajoʼobeʼ, maʼ tu béeytal u kʼaʼaytajoʼob tiʼ tuláakal u mejen kaajiloʼob. Le oʼolal le Cuerpo Gobernanteoʼ tu yaʼaloʼob ka invitartaʼak le j-kʼaʼaytajoʼob u yojloʼob búlgaro tiʼ u luʼumil Europa ka táakpajkoʼob tiʼ le kʼaʼaytaj beetaʼab tu jaʼabil 2009. Le kʼaʼaytajoʼ siete semanaʼob xáanchaji yéetel tsʼoʼok teʼ Asamblea tiʼ Distrito «¡Pʼil ichneneʼex!», yanchaj tu noj kaajil Sofía tu kʼiiniloʼob 14 tak 16 tiʼ agosto teʼ jaʼab jeʼeloʼ.

Yaʼab sukuʼunoʼob táakpajoʼobiʼ

Le sukuʼunoʼob ku meyajoʼob tu najil Betel yaan tu kaajil Sofíaoʼ, joʼopʼ u tuklikoʼob kex jaytúul sukuʼunoʼob tiʼ Alemania, España, Francia, Grecia, Italia yéetel Polonia jeʼel u yóotkoʼob bin teʼ kʼaʼaytajoʼ. Tumen le máaxoʼob kun binoʼoboʼ letiʼob kun boʼotik u pasajeʼob bey xan uláakʼ baʼaxoʼob kun kʼaʼabéetchajaltiʼob yéetel yaan u kʼáatkoʼob vacacionoʼob utiaʼal u binoʼobiʼ. Ka kʼuch le kʼiin u tukulmoʼoboʼ, yaan 292 utúulul tu yaʼaloʼob jeʼel u binoʼobeʼ. Yéetel le jaytúul sukuʼunoʼob tu yaʼalaj u binoʼoboʼ jeʼel u páajtal u yúuchul kʼaʼaytaj tu noj kaajil Kazanlak, Sandanski yéetel Silistra. Le superintendente tiʼ circuitoʼob xanoʼ tu invitartoʼob le j-kʼaʼaytajoʼob yéetel le precursoroʼob kajaʼanoʼob Bulgaria ka táakpajkoʼob teʼ kʼaʼaytajoʼ. Ka tsʼoʼokeʼ tu chukaj 382 sukuʼunoʼob binoʼob kʼaʼaytaj teʼ tuʼuxoʼob óoliʼ maʼatech u yúuchul kʼaʼaytajoʼ.

Túuxtaʼab jujuntúul sukuʼunoʼob teʼ múuchʼuliloʼob yanoʼob naatsʼ utiaʼal u kaxtikoʼob tuʼux kun pʼáatal le sukuʼunoʼoboʼ. Tu alquilartoʼob najoʼob yéetel tu kʼáatoʼob cuartoʼob tiʼ hoteloʼob maʼ jach koʼojtakoʼobiʼ. Tsʼoʼoleʼ ka kʼuch le sukuʼunoʼoboʼ jach tu yáantoʼob utiaʼal u biskoʼob tuʼux kun pʼáatloʼob yéetel tu yáantoʼob tiʼ uláakʼ baʼaloʼob kʼaʼabéetchajtiʼob sáamsamal. Tu alquilartoʼob xan tuʼux kun beetbil muchʼtáambaloʼob tumen le sukuʼunoʼob taaloʼoboʼ. Jach jatsʼuts ilaʼabik u muchʼkuba tak 50 j-kʼaʼaytajoʼob tuʼux minaʼan mix utúul J-jaajkunaj kaʼachiʼ.

Le sukuʼunoʼob taaloʼoboʼ jach tu tsʼáaj u yóoloʼob kʼaʼaytaj. Mix baʼal béeychaj u jeʼelsikoʼob, mix le jach ooxol ku beetik teʼ kʼiinoʼob jeʼeloʼ, yaan kʼiineʼ ku chukik tak 40 °C. Óoxpʼéel semana káajak le kʼaʼaytaj ka láaj xíimbaltaʼab le 50,000 máakoʼob kajaʼanoʼob Silistra, yaan naatsʼ tiʼ u áalkab jaʼi Danubio. Le j-kʼaʼaytajoʼob túunoʼ tu chʼaʼatuklaj u binoʼob kʼaʼaytaj teʼ kaajoʼob naatsʼtakoʼ ka kʼuchoʼob tak Tutrakan, kex 55 kilómetros (óoliʼ 14 leguas) yanil tu chiikʼin Silistra. U suukileʼ ku káajsik u kʼaʼaytajoʼob las nueve y media jaʼatskab, ku jeʼeleloʼob janal, tsʼoʼoleʼ ku seguer u kʼaʼaytajoʼob tak las siete áakʼab. Tu kaajil Kazanlak  yéetel Sandanski xaneʼ jach tu tsʼáaj u yóol le sukuʼunoʼob kʼaʼaytajoʼ, le oʼolal páajchaj u binoʼob kʼaʼaytaj tuláakʼ mejen kaajoʼob yanoʼob naatsʼoʼ.

¿Baʼax utsiloʼob tu kʼamoʼob?

Ichil le siete semanaʼob kʼaʼaytajnajoʼoboʼ yaʼab máakoʼob uʼuy le maʼalob péektsiloʼ. Teʼ yáax siglooʼ, le apostoloʼoboʼ tu chupoʼob Jerusalén yéetel u kaʼansajoʼob. Lelaʼ bey xan aʼalaʼabik teʼ kaajoʼob tuʼux kʼaʼaytajnaj le sukuʼunoʼoboʼ (Hch. 5:28). Tu pʼatoʼob 50,000 revistaʼob tiʼ le máakoʼoboʼ yéetel tu káajsoʼob 482 xookoʼob. Tsʼoʼoleʼ tu kʼiinil 1 tiʼ septiembre tiʼ 2009, káaj le yáax múuchʼulil tu kaajil Silistraoʼ, yéetel tsʼoʼok u káajal u beetaʼal muchʼtáambaloʼob Kazanlak yéetel Sandanski. Jach ku taasik kiʼimak óolal u yilaʼal yaʼab tiʼ le máaxoʼob yáax u yuʼubikoʼob le maʼalob péektsiloʼ táan u maas tsʼáaik u yóoloʼob kaambal.

Teʼ yáax semanaoʼ, utúul precursora especial tiʼ España, ku tʼanik búlgaroeʼ, tu yilaj Karina teʼ bej táan u konik periódico tu kaajil Silistraoʼ. Karinaeʼ jach tu yuʼubaj le maʼalob péektsiloʼ yéetel bin tiʼ upʼéel muchʼtáambal, ka tsʼoʼokeʼ tu yóotaj ka tsʼaʼabak xook tiʼ. Baʼaleʼ tumen u yíicham maʼatech u creertik Dioseʼ ku bin tu yéetel xook tiʼ upʼéel parque. Letiʼeʼ ku xook u múuchʼ yéetel kaʼatúul u hijas, Daniela, le u maas nojchiloʼ jach jatsʼuts u yilik le baʼaxoʼob ku kanikoʼ. Letiʼeʼ chéen ichil upʼéel semana ka tu láaj xokaj le libro ¿Baʼax ku kaʼansik le Bibliaoʼ?, ka tu pʼataj u adorartik beetbil diosoʼob jeʼex u yaʼalik le Bibliaoʼ. Tsʼoʼoleʼ káaj u tsolik tiʼ u amigoʼob le baʼax ku kanikoʼ. Chéen óoxpʼéel semana káajak u bin teʼ muchʼtáambaloʼ, tu yaʼalaj tiʼ le kiik tsʼáaik xook tiʼoʼ: «Kin wuʼuyik bey u j-jaajkunajen Jéeoba xaneʼ. ¿Baʼax unaj in beetik utiaʼal ka jóoʼken kʼaʼaytaj ta wéeteleʼex?». Daniela, u maama yéetel u yíitsʼneʼ, táan u maas kaambaloʼob xan.

Orlin, utúul sukuʼun búlgaro kajaʼan Italiaeʼ, túuxtaʼab kʼaʼaytaj Kazanlak. Upʼéel kʼiin táan u bin teʼ naj tuʼux pʼaatloʼ, tu yilaj kaʼatúul táankelem paalal kulukbaloʼob tiʼ upʼéel parque, ka náatsʼ u tsikbaltiʼob le maʼalob péektsiloʼ. Tu pʼatajtiʼob le libro ¿Baʼax ku kaʼansik le Bibliaoʼ?, yéetel tu yaʼalajtiʼob yaan u máan u xíimbaltoʼob ken sáasak tuláakʼ kʼiin. Le ka suunajoʼ Svetomir, utúul tiʼ letiʼobeʼ, tu yóotaj ka tsʼaʼabak xook tiʼ. Letiʼ túuneʼ kaʼa xooknaj ka sáaschaj tuláakʼ kʼiin, chéen ich nueve kʼiinoʼobeʼ, Svetomireʼ xooknaj ocho utéenel. Letiʼeʼ tu yaʼalaj tiʼ Orlin: «Kaʼapʼéel kʼiin táanil tiʼ a tʼanken teʼ parqueoʼ, tin waʼalaj tiʼ Dios in kʼáat in kʼaj óolte yéetel wa ka u yáanteneʼ yaan in kʼubik in kuxtal utiaʼal in meyajteʼ». Ka suunaj Orlin Italiaeʼ, le sukuʼunoʼob kajaʼanoʼob teʼeloʼ seguernaj u yáantkoʼob Svetomir, letiʼeʼ jach u tsʼaamaj u yóol u maas kʼaj óolt Dios.

 Le baʼaxoʼob taasik yaʼab utsiloʼoboʼ

¿Baʼax ku tuklik le sukuʼunoʼob tu kʼáatoʼob vacacionoʼob yéetel tu xupaj u taakʼinoʼob utiaʼal u binoʼob kʼaʼaytaj tu luʼumil Bulgariaoʼ? Utúul sukuʼun ku beetik u ancianoi Españaeʼ tu tsʼíibtaj: «Le kʼaʼaytaj beetaʼaboʼ tu muchʼaj le sukuʼunoʼob ku tʼankoʼob búlgaro kajaʼanoʼob Españaoʼ. Lelaʼ jach tu taasaj kiʼimak óolaltiʼob». Utúul sukuʼun yéetel u yatan kajaʼanoʼob Italiaeʼ tu tsʼíibtoʼob: «¡Letiʼe mes maas jatsʼuts tsʼoʼok k-ilik ichil k-kuxtaloʼ! [...] Le kʼaʼaytajoʼ jach tu yáantoʼon. Jach tu kʼexaj k-kuxtal». Le sukuʼun yéetel u yatnaʼ táan u tuklik u binoʼob kajtal tu luʼumil Bulgaria utiaʼal u yáantajoʼob tuʼux maas kʼaʼabéet. Carina, utúul precursora regular maʼ tsʼokaʼan u beel kajaʼan Españaeʼ, bin kʼaʼaytaj xan tu noj kaajil Silistra. Ka tsʼoʼok le kʼaʼaytajoʼ tu pʼataj le tuʼux ku meyajoʼ ka suunaj Silistra utiaʼal u yáantaj teʼ túumben múuchʼuliloʼ. Letiʼeʼ u líiʼsmaj u taakʼin utiaʼal u kuxtal ich u jaʼab tu luʼumil Bulgaria. ¿Bix u yuʼubikuba yoʼolal le baʼax tu beetoʼ? Letiʼeʼ ku yaʼalik: «Jach kiʼimak in wóol úuchik u chaʼik Jéeoba in taal tu luʼumil Bulgaria; kin tsʼíiboltik ka béeyak in pʼáatal maas yaʼab kʼiinoʼob wayeʼ. Kin tsʼáaik xook tiʼ cinco utúulal máakoʼob, óoxtúul tiʼ letiʼobeʼ ku binoʼob muchʼtáambal».

Utúul kiik kajaʼan Italiaeʼ u kʼáat táakpajal teʼ kʼaʼaytajoʼ, baʼaleʼ tumen maʼ úuch okok meyajeʼ maʼ tu páajtal u jáan kʼáatik vacacionoʼob. Baʼaleʼ tu chʼaʼatuklaj u kʼáatik u mes kex maʼ u boʼotaʼal, yéetel tu chʼaʼatukleʼ yaan u pʼatik le meyaj wa maʼ u tsʼaʼabaltiʼoʼ. U nojchil le tuʼux ku meyajoʼ tu yaʼalajtiʼ: «Jeʼel u páajtal a bineʼ, baʼaleʼ yaan a túuxtikten upʼéel u foto u luʼumil Bulgaria». Le kiikoʼ u yojel Jéeoba núuk u payalchiʼ.

Stanislava, utúul kiik kajaʼan Varna, tiʼ u luʼumil Bulgariaeʼ, yaan upʼéel meyajtiʼ jach maʼalob u boʼotaʼal, letiʼeʼ tu kʼáataj ka chaʼabak u bin kʼaʼaytaj tu kaajil Silistra. Ka kʼuch teʼ kaajoʼ tu yilaj jach kiʼimak u yóol le precursoroʼob bijaʼanoʼob kʼaʼaytajoʼ, ka tak okʼolnaji. Ka joʼopʼ u tuklik baʼax táan u beetik yéetel u kuxtal, le oʼolal kaʼapʼéel semana suunak tu yotocheʼ tu pʼataj le meyaj ku beetik kaʼachoʼ ka tu káajsaj u beetik u precursora regulari. Bejlaʼeʼ Stanislavaeʼ jach kiʼimak u yóol, tumen u yojel táan u meyajtik Dios tu x-lóoʼbaynil (Ecl. 12:1).

Le máaxoʼob meyajtik Jéeoba tu jaajil u yóoloʼoboʼ jach ku kʼamikoʼob yaʼab utsiloʼob. Le baʼax maas maʼalob jeʼel k-beetik yéetel k-kuxtaloʼ letiʼe u meyajtoʼon k-tiempo yéetel k-muukʼ utiaʼal k-kʼaʼaytaj yéetel k-kaʼansik uláakʼ máakoʼoboʼ. ¿Jeʼel wa u béeytal a maas táakpajal teʼ meyaj ku tsʼáaik salvacionaʼ? Maʼ xaaneʼ teʼ luʼumil tuʼux kajaʼanechoʼ yaan tuʼux maas kʼaʼabéet áantajiʼ. ¿Tsʼoʼok wa a tuklik a biniʼ? Wa maʼ xaaneʼ jeʼel u páajtal a kanik uláakʼ tʼaanil utiaʼal a wáantik uláakʼ máakoʼob u kʼaj óoltoʼob le baʼax ku kaʼansik le Bibliaoʼ. Jeʼel baʼalak kʼeexil ka yanak a beetik ichil a kuxtaleʼ, maʼ u tuʼubultecheʼ Jéeobaeʼ yaan u beetik u bintech utsil (Pro. 10:22).

[U tsolajil le oochel teʼ táan juʼun 32]

Upʼéel kʼiin maʼ kun tuʼubsbil

[U tsolajil le oochel teʼ táan juʼun 32]

Le sukuʼunoʼob binoʼob teʼ kʼaʼaytajoʼ binoʼob xan teʼ Asamblea tiʼ Distrito «¡Pʼil ichneneʼex!» yanchaj tu kaajil Sofíaoʼ. Le sukuʼunoʼoboʼ jach kiʼimakchaj u yóoloʼob úuchik u kʼaj óoltikoʼob uláakʼ sukuʼunoʼob ku taaloʼob tiʼ jejeláas luʼumiloʼob tiʼ Europa. Tsʼoʼoleʼ, tu kʼiinil vierneseʼ, le sukuʼun Geoffrey Jackson, ku meyaj ichil le Cuerpo Gobernanteoʼ, tu yeʼesajtiʼob le Biblia Traducción del Nuevo Mundo de las Santas Escrituras sutaʼan ich búlgaro. Le 2,039 muchʼukbaloʼoboʼ jach kiʼimakchaj u yóoloʼob yéetel sen papaxkʼabnajoʼob utiaʼal u tsʼáaikoʼob nib óolal. Yaan tak tiʼ letiʼobeʼ okʼolnajoʼob. Le Bibliaoʼ jach maʼalob sutaʼanil yéetel séeb u naʼataʼal, le oʼolal jach yaan u yáantik le máakoʼob u kʼaj óoltoʼob Jéeoba kajaʼanoʼob Bulgariaoʼ.

[U tsolajil le oochel teʼ táan juʼun 31]

BULGARIA

Silistra

Kazanlak

Sandanski

SOFÍA

[U tsolajil le oochel teʼ táan juʼun 31]

Ich siete semanaʼobeʼ kʼaʼaytaʼab le maʼalob péektsil tiʼ yaʼab máakoʼoboʼ