Le máaxoʼob yanoʼob ichil u jaajil religionoʼ ku múuchʼ meyajoʼob

«Bíin in muchʼkíintoʼob bey u múuchʼul tamanoʼobeʼ.» (MIQ. 2:12)

1. ¿Baʼaxoʼob eʼesik u naʼat Dios?

LE SALMISTAOʼ tu yaʼalaj: «¡Bukaʼaj baʼaloʼob [a] beetmaj, Yuumtsil! Tuláakal ta beetaj yéetel naʼat; ¡a meyajeʼ tuláakal tuʼux ku yilaʼal!» (Sal. 104:24). U jaajileʼ, u naʼat Dioseʼ ku yilaʼal tiʼ le u millonesi baʼaloʼob kuxaʼanoʼ, jeʼex le xíiwoʼoboʼ, le bacteriaʼoboʼ, le mejen ikʼeloʼoboʼ bey xan le baʼalcheʼoboʼ. Baʼaleʼ tu wíinklil máakeʼ yaan mejen celulaʼob yéetel uláakʼ baʼaloʼob nuuktak ku múuchʼ meyajoʼob utiaʼal maʼ u kʼojaʼantal máak.

2. Jeʼex u chíikpajal teʼ táan juʼun 13, ¿baʼaxten ilaʼab bey upʼéel milagro muchʼlik le yáax cristianoʼoboʼ?

² Ka beetaʼab wíinik tumen Jéeobaeʼ tu tsʼáaj u páajtalil u tuukuloʼob yéetel u kanik u yeʼesoʼob jejeláas modos utiaʼal u paklan áantikubaʼob. Tsʼoʼoleʼ tu beetaj jeʼel bix letiʼeʼ, beyoʼ jeʼel u páajtal u múuchʼ meyajoʼobeʼ (Gén. 1:27; 2:18). Baʼaleʼ tuláakal wíinik náach yanil tiʼ Dios, le oʼolal maʼ béeychajak u múul kuxtaloʼob ich jeetsʼeliliʼ (1 Juan 5:19). Le oʼolal teʼ yáax siglooʼ, ilaʼab bey upʼéel milagro muchʼlik le koʼoleloʼob x-griegaʼob, judíoʼob kaʼansaʼanoʼob tiʼ le leyoʼ, palitsiloʼob yéetel máakoʼob ku adorarkoʼob uláakʼ diosoʼob kaʼachi (Hch. 13:1; 17:4; 1 Tes. 1:9; 1 Tim. 6:1).

3. 1) ¿Yéetel baʼax ku keʼetel ichil le Biblia le bix u múuchʼ meyaj le máaxoʼob meyajtik Diosoʼ? 2) ¿Baʼax kʼáatchiʼiloʼob ken k-núuk teʼ xookaʼ?

³ Le u jaajil religionoʼ ku yáantkoʼon utiaʼal ka múuchʼ meyajnakoʼon jeʼex upʼéel wíinklileʼ (xokaʼak 1 Corintoiloʼob 12:12, 13). Teʼ xookaʼ yaan k-núukik le kʼáatchiʼobaʼ: ¿Bix u yáantkoʼon múuchʼ meyaj le u jaajil religionoʼ? ¿Baʼaxten chéen Jéeoba jeʼel u páajtal u muchʼik u millonesi máakoʼob tiʼ tuláakal kaajoʼobeʼ? ¿Baʼaxoʼob beetik u talamtal k-múuchʼ meyaj yéetel bix u yáantkoʼon Jéeoba utiaʼal k-aktáantik? Yéetel ¿baʼaxten le religionoʼob chéen ku yaʼalikoʼob táan u tsaypachtikoʼob Cristooʼ maʼatech u múuchʼ meyajoʼob?

¿Bix u yáantkoʼon múuchʼ meyaj le u jaajil religionoʼ?

4. ¿Bix u yáantkoʼon le u jaajil religión utiaʼal ka múuchʼ meyajnakoʼonoʼ?

⁴ Toʼoneʼ k-ojel Jéeoba Beetmil tuláakal baʼal, le oʼolal chéen tiʼ letiʼ yaan u derechoi u Gobernartik (Apo. 4:11). Le oʼolal kex maʼ upʼéeliliʼ tuʼux k-taal yéetel jejeláas baʼaxoʼob k-aktáantikeʼ, tuláakloʼon k-ilik k-beetik le baʼax ku yaʼalikoʼ. Tuláakloʼon k-aʼalik Jéeobaeʼ «k-Taata» (Isa. 64:8; Mat. 6:9, NM). Tuláakloʼon k-ilikba sukuʼuntsilil yéetel k-kuxtal jeʼex u yaʼalik le salmistaaʼ: «Ilawileʼex bukaʼaj maʼalobil yéetel jatsʼutsil ka múuchʼ kajlak sukuʼuntsiloʼob bey juntúuliliʼobeʼ» (Sal. 133:1).

5. ¿Baʼax modosi áantik múuchʼ meyaj le máaxoʼob adorartik Diosoʼ?

⁵ Kex láaj kʼebanoʼoneʼ k-múuchʼ meyajtik Dios, tumen táan k-kanik k-eʼes yaabilaj. Jéeoba kaʼanskoʼon, toʼoneʼ k-ojel chéen letiʼ jeʼel u páajtal u beetik tubeeleʼ (xokaʼak 1 Juan 4:7, 8). Letiʼeʼ ku yaʼaliktoʼon: «Yanakteʼex yaakunaj yéetel chʼaʼa óotsilil ta baatsileʼex, yéetel [perdonartabaʼex] ta baatsileʼex jeʼel bix Jajal Dios tu [perdonarteʼex] tiʼ Cristoeʼ» (Efe. 4:32). Tsʼoʼoleʼ le Bibliaoʼ ku yaʼaliktoʼon: «Yanakteʼex yaakunaj, tumen lelaʼ [...] ku nupik yéetel ku chúukbesik tuláakal baʼal» (Col. 3:14). Jeʼex túun  k-ilkoʼ, le yaabilaj, le modos chíikbesik máaxoʼob meyajtik Diosoʼ, ku yáantkoʼon múuchʼ meyaj. ¿Máasaʼ yaʼab utéenel tsʼoʼok k-ilik bix u yáantkoʼon le jatsʼuts modosaʼ? (Juan 13:35.)

6. ¿Bix u yáantkoʼon múuchʼ meyaj le k-kʼubik k-óol tiʼ le Reinooʼ?

⁶ Uláakʼ baʼax áantkoʼon múuchʼ meyajeʼ, letiʼe k-kʼamik chéen u Reino Dios kun utskíintik le talmiloʼob k-aktáantikoʼ. K-ojel le Reinoaʼ yaan u luʼsik u jejeláasil gobierno tsʼaʼan tumen wíinik yéetel yaan u tsʼáaik le kuxtal minaʼan u xuul tiʼ le máaxoʼob beetik baʼax ku yaʼalik Diosoʼ (Isa. 11:4-9; Dan. 2:44). Le oʼolal k-beetik le baʼax tu yaʼalaj Jesusaʼ: «Jeʼel bix maʼ yóokʼol kabileneʼ bey xan [in disipuloʼobeʼ] maʼ yóokʼol kabiloʼobiʼ» (Juan 17:16). Tumen maʼatech k-táakbesikba tiʼ u baʼalubaʼob le yóokʼol kaabaʼ, ku béeytal k-múuchʼ meyaj kex yaan talmiloʼob yéetel baʼateltáambaloʼobiʼ.

Chéen upʼéel tuʼux k-kaʼansaʼal k-meyajt Dios

7, 8. ¿Bix u yáantkoʼon múuchʼ meyaj le kaʼansaj k-kʼamikoʼ?

⁷ Le cristianoʼob teʼ yáax siglooʼ múuchʼ meyajnajoʼob tumen upʼéeliliʼ tuʼux u taal le kaʼansaj tu kʼamoʼoboʼ. Letiʼobeʼ tu kʼamoʼob le kaʼansaj yéetel le nuʼuktaj tu tsʼáaj le apostoloʼob yéetel uláakʼ ancianoʼob yanoʼob kaʼach Jerusalén, tsʼaʼaboʼob tumen Jesús utiaʼal u nuʼuktoʼob le múuchʼuliloʼ. Le u múuchʼ máakoʼobaʼ tu chʼaʼajoʼob en cuentai baʼax ku yaʼalik le Kiliʼich Tsʼíiboʼob utiaʼal u chʼaʼatuklikoʼob baʼax unaj u beetaʼal yéetel tu túuxtoʼob ancianoʼob utiaʼal u tsʼáaikoʼob u yojéelt le múuchʼuliloʼoboʼ. Le Bibliaoʼ ku yaʼalik: «Tuláakal le kaajoʼob tuʼux máanoʼoboʼ tu yaʼalajoʼob tiʼ le sukuʼunoʼob le tsolxikinoʼob tu tsʼáaj le apostoloʼob yéetel le ancianoʼob yanoʼob Jerusalenoʼ utiaʼal ka u tsʼoʼokbesoʼob» (Hch. 15:6, 19-22; 16:4).

⁸ Teʼ kʼiinoʼob xanaʼ, u múuchʼ tiʼ le sukuʼunoʼob yéeyaʼanoʼob utiaʼal u binoʼob kaʼanoʼ táakaʼanoʼob ichil le Cuerpo Gobernanteoʼ, letiʼobeʼ ku yilkoʼob ka múuchʼ meyajnak le máaxoʼob meyajtik Dios tiʼ tuláakal le yóokʼol kaabaʼ. Le oʼolal ku beetkoʼob jóoʼsaʼaniloʼob utiaʼal u muʼukʼaʼantal u fe tuláakal. Tumen le baʼax ku kaʼanskoʼob teʼ Biblia u taaloʼ, jeʼel u béeytal u yaʼalaʼaleʼ tiʼ Jéeoba u taal, maʼ chéen tiʼ wíinikoʼobiʼ (Isa. 4:13).

9. ¿Bix u yáantkoʼon múuchʼ le kʼaʼaytajoʼ?

⁹ Le ancianoʼob xanoʼ ku yáantajoʼob utiaʼal u múuchʼ meyaj tuláakal. ¿Bix u beetkoʼob? Letiʼe u tsʼáaik u yóoloʼob teʼ kʼaʼaytajoʼ. Le baʼax péekskoʼon múuchʼ meyajoʼ maas nojoch tiʼ le baʼax péeksik u muchʼuba le máakoʼob maʼatech u meyajtkoʼob Diosoʼ. Le múuchʼuliloʼ maʼ chéen upʼéel kúuchil utiaʼal u náaysik u yóol máakiʼ, baʼaxeʼ utiaʼal u tsʼaʼabal nojbeʼenil tiʼ Jéeoba yéetel utiaʼal u beetaʼal baʼax ku yaʼalik: u kʼaʼaytaʼal le maʼalob péektsiloʼ, u kaʼansaʼal u maasil u kʼaj óolt Dios yéetel utiaʼal u líiʼsaʼal u yóol le máaxoʼob meyajtkoʼ (Rom. 1:11, 12; 1 Tes. 5:11; Heb. 10:24, 25). Le oʼolal apóstol Pabloeʼ tu yaʼalaj tiʼ le sukuʼunoʼoboʼ: «Teʼexeʼ jeetsʼel a wanileʼex tiʼ jumpʼéeliliʼ óol, táan a múuchʼ baʼateleʼex tuláakaleʼex tu yoʼolal u yoksaj óolalil le maʼalob péektsiloʼ» (Fili. 1:27).

10. ¿Baʼaxoʼob áantik múuchʼ meyaj le máaxoʼob meyajtik Diosoʼ?

 ¹⁰ Jeʼex tsʼoʼok k-ilkoʼ, toʼoneʼ k-múuchʼ meyaj tumen k-creertik chéen tiʼ Jéeoba yaan u derechoi u Gobernar, k-paklan yaabiltikba, k-kʼubik k-óol tiʼ u Reino yéetel k-uʼuyik u tʼaan le máaxoʼob u tsʼaamaj u nuʼukt le múuchʼuliloʼ. Baʼaleʼ yoʼolal le kʼebanoʼ k-eʼesik modos jeʼel u beetik u xuʼulul k-múuchʼ meyajeʼ. Koʼoneʼex ilik máakalmáakoʼobiʼ yéetel bix u yáantkoʼon Jéeoba utiaʼal k-aktáantkoʼob (Rom. 12:2).

Maʼ u kaʼantal k-ich mix k-pʼektik u maasil yoʼolal baʼax yantiʼob

11. ¿Baʼaxten maʼ maʼalob u kaʼantal u yich máakiʼ, yéetel bix u yáantkoʼon Jéeoba utiaʼal k-pʼatik?

¹¹ Le kaʼanal ichiloʼ maʼ maʼalobiʼ, tumen ku beetik u taaskuba máak noj baʼalil. Maʼ tu yáantaj utiaʼal ka seguernak u múuchʼ meyaj tuláakal, tumen jeʼel u beetik u pʼektik máak yoʼolal baʼax yantiʼobeʼ. Disipulo Santiagoeʼ tu yaʼalaj: «Tuláakal le kaʼanal ichil beyaʼ kʼaas» (Sant. 4:16). U taasik máak bey mix baʼalil u maasileʼ ku beetik maʼ u yeʼesaʼal yaabilaj. Jéeobaeʼ ku kaʼansiktoʼon bix unaj k-eʼesik kabal óolal, tumen kex kʼebanoʼoneʼ u yaabilmoʼon. Davideʼ tu yaʼalaj tiʼ Dios: «A wutsileʼ [wa a kabal óolaleʼ] tsʼoʼok u beetik u binten [...] utsil» (2 Sam. 22:36). Le Bibliaoʼ ku yáantkoʼon k-luʼs t-tuukul le kaʼanal ichiloʼ yéetel ka k-il tuláakal jeʼex unajeʼ. Pabloeʼ tu kʼáataj: «¿Máax [maas] maʼalobkíintech tu yóokʼol uláakʼ? ¿Baʼax yaan tiʼ tech wa maʼ Jajal Dios tsʼáa tiʼ techiʼ? Wa Jajal Dios tsʼáa tiʼ techeʼ ¿baʼaxten ku kaʼanaltal a wich bey maʼ kʼambil ta beetilakeʼ?» (1 Cor. 4:7).

12, 13. 1) ¿Baʼaxten jach séeb jeʼel k-pʼektik u maasil yoʼolal baʼax yantiʼobeʼ? 2) ¿Baʼax utsil ku taasik k-ilik le sukuʼunoʼob jeʼex u yilaʼaloʼob tumen Jéeobaoʼ?

¹² Uláakʼ baʼax talamkúuntik k-múuchʼ meyajeʼ letiʼe k-pʼektik u maasil yoʼolal baʼax yantiʼoboʼ. Le kʼebanoʼ ku beetik k-pʼektik u maasil yoʼolal baʼax meyajil tsʼaʼan u beete wa yoʼolal baʼax u yojel u beete (Gén. 6:5). Lelaʼ jeʼel tak u yúuchul tiʼ le sukuʼunoʼob úuch joʼopʼok u meyajtkoʼob Diosoʼ. Jeʼex utúul taatatsileʼ jeʼel u pʼektik utúul sukuʼun yoʼolal le meyaj ku beetik ichil u kaajal Diosoʼ, baʼaleʼ maʼ u yojel wa ku pʼektaʼal tumen le sukuʼun tumen yaan u paalaliʼ. ¿Baʼax unaj k-beetik utiaʼal maʼ u xuʼulul k-múuchʼ meyaj yoʼolal le baʼaloʼob beyaʼ?

¹³ Upʼéel baʼax jeʼel u yáantkoʼon utiaʼal maʼ k-pʼektik u maasil yoʼolal baʼax yantiʼobeʼ, letiʼe k-kʼaʼajsik le Bibliaoʼ ku ketik tuláakal le sukuʼunoʼob yéeyaʼanoʼob yéetel upʼéel wíinkliloʼ (xokaʼak 1 Corintoiloʼob 12:14-18). Tuukulnakoʼon tiʼ le ich yéetel le puksiʼikʼaloʼ, le ichoʼ ku béeytal u yilaʼal, baʼaleʼ le puksiʼikʼaloʼ maʼ chíikaʼan u yilaʼaliʼ. Kex beyoʼ, ¿máasaʼ jach kiʼimak k-óol yaniltoʼon tu kaʼapʼéelal? Jéeobaeʼ bey xan u yilik le máaxoʼob meyajtikoʼ, kex yaan kʼiin maʼ chíikaʼan u yilaʼal tumen u maasil baʼax ku beetkoʼobiʼ. Le oʼolal unaj k-ilik le sukuʼunoʼob jeʼex u yilik letiʼoʼ. Unaj k-kaxtik u yutsiloʼob, maʼ unaj k-pʼektikoʼob yoʼolal baʼax yantiʼobiʼ. Beyoʼ yaan k-áantaj utiaʼal u maas chíikpajal máaxoʼob meyajtik Dios tiʼ u maasil religionoʼob chéen ku yaʼalikoʼob táan u tsaypachtikoʼob Cristooʼ.

Le religionoʼob maʼatech u múuchʼ meyajoʼoboʼ

14, 15. ¿Bix úuchik u yantal u maasil religionoʼob?

¹⁴ Le religionoʼob chéen ku yaʼalikoʼob táan u tsaypachtikoʼob Cristooʼ maʼatech u múuchʼ meyajoʼob. Le religionoʼobaʼ káaj u yantaloʼob tu Imperioi Roma teʼ siglo 4, le ka káaj u nuʼuktaʼaloʼob tumen utúul emperador maʼatech u meyajtik Diosoʼ; teʼ kʼiinoʼob jeʼeloʼ tsʼoʼokaʼaniliʼ u yaʼabtal le religionoʼob maʼatech u kaʼansik u jaajiloʼ. Ka máan kʼiineʼ,  le máaxoʼob chéen ku yaʼalikoʼob táan u tsaypachtikoʼob Cristooʼ, tu luʼsubaʼob yáanal u páajtalil Roma, ka tu káajsaj u religionoʼob.

¹⁵ Ichil yaʼab jaʼaboʼobeʼ, yaʼab tiʼ le máakoʼob tu luʼsubaʼob yáanal u páajtalil Romaoʼ paklan baʼatelnajoʼob. Teʼ siglo 17 yéetel 18, Gran Bretaña, Francia yéetel Estados Unidoseʼ káaj u yaʼalikoʼob ka nojbeʼenkúunsaʼak le luʼum tuʼux u taal máakoʼ, lelaʼ jeʼel u páajtal u yaʼalaʼaleʼ upʼéel túumben religión. Teʼ siglo 19 yéetel 20, bin u maas yaʼabtal tuʼuxoʼob beetaʼab beyoʼ. Yoʼolal jejeláas baʼaloʼobeʼ, jóokʼ uláakʼ religionoʼob tiʼ le yanoʼob kaʼachoʼ, u maas yaʼabil tiʼ letiʼobeʼ ku tsʼáaikoʼob nojbeʼenil tiʼ le luʼumil tuʼux u taaloʼoboʼ. Yaʼab tiʼ le máaxoʼob yanoʼob ichil le religionoʼob beyaʼ tsʼoʼok u táakpajloʼob tiʼ baʼateltáambaloʼob, tsʼoʼok tak u kíimskoʼob u yéet religioniloʼob. Le oʼolal bejlaʼeʼ, le religionoʼob chéen ku yaʼalikoʼob táan u tsaypachtikoʼob Cristooʼ jaatsloʼob yoʼolal le baʼaxoʼob ku kaʼanskoʼoboʼ bey xan yoʼolal bix u nojbeʼenkúuntik u luʼumoʼob.

16. ¿Baʼax beetik u jatskuba le religionoʼob chéen ku yaʼalikoʼob táan u tsaypachtikoʼob Cristooʼ?

¹⁶ Teʼ siglo 20, jujumpʼéel religionoʼobeʼ káaj u muchʼkubaʼob adorar utiaʼal upʼéeliliʼchajloʼob tu kaʼatéen. Baʼaleʼ ichil le jaʼaboʼob tsʼoʼok u máanoʼ, chéen upʼíit religionoʼob tsʼoʼok upʼéeliliʼchajloʼob, kex beyoʼ le máaxoʼob yanoʼob ichiloʼ láayliʼ maʼ upʼéeliliʼ baʼax ku tuklikoʼob yoʼolal le evolucionoʼ, u kíimsaʼal le mejen chaambal maʼ síijkoʼoboʼ, u tsʼoʼokol u beel xiib yéetel u yéet xiibil wa koʼolel yéetel u yéet koʼolelil bey xan u tsʼaʼabal le koʼoleloʼob kaʼansajoʼ. Yaan tiʼ u nuuktakil le religionoʼoboʼ ku tsʼáaikoʼob juntséelil le kaʼansajoʼob beet u jatskubaʼoboʼ utiaʼal u kaʼa pʼéeliliʼchajloʼob. Baʼaleʼ lelaʼ ku beetik u pʼáatal maʼ muʼukʼaʼan u fe le máakoʼob yaan ichiloʼoboʼ. U jaajileʼ maʼ béeyak u múuchʼ meyaj le religionoʼob chéen ku yaʼalikoʼob táan u tsaypachtikoʼob Cristooʼ.

Maʼatech u pʼektikubaʼob yoʼolal tuʼux u taaloʼob

17. ¿Baʼax profecíai eʼesik bix kun múuchʼ meyaj le máaxoʼob yanoʼob ichil u jaajil religión teʼ tu tsʼook kʼiinoʼobaʼ?

¹⁷ Kex u maasil máakoʼob maʼ u múuchʼ yaniloʼobeʼ, le máaxoʼob meyajtik Diosoʼ u múuchʼ yaniloʼob. Dioseʼ bey u yaʼalmiloʼ: «Bíin in muchʼkíintoʼob bey u múuchʼul tamanoʼobeʼ» (Miq. 2:12). Le profeta Miqueas xanoʼ tu yaʼaleʼ le u jaajil religionoʼ yaan u pʼáatal maas kaʼanal yanil tiʼ u maasil religionoʼob ku adorarkoʼob beetbil diosoʼoboʼ bey xan le ku adorarkoʼob le luʼumil tuʼux u taaloʼoboʼ. Letiʼeʼ ku yaʼalik: «Tiʼ u pachalil le kʼiinoʼoboʼ bíin pʼáatak maʼalob jeetsʼelil le puʼuk tuʼux yaan u [templo] Yuumtsiloʼ. Letiʼ bíin u beet u [maas] kaʼanal witsil tiʼ uláakʼ witsoʼob. Tuláakal múuchʼ kaajoʼob bíin taalak tu yiknal». Ka tsʼoʼokeʼ tu yaʼalaj: «U chuukan kaajoʼoboʼ ku yuʼubajtʼantikoʼob u [diosoʼob], baʼaleʼ toʼoneʼ mantatsʼ bíin k-uʼuyajtʼant Yuumtsil [k-Dios]» (Miq. 4:1, 5).

18. ¿Baʼaxoʼob tsʼoʼok u yáantkoʼon k-beet le u jaajil religionoʼ?

¹⁸ Miqueas xaneʼ tu yaʼaleʼ le u jaajil religionoʼ yaan u  muchʼik tak le máaxoʼob u pʼekmubaʼob kaʼachoʼ: «[U kajnáalil] yaʼabkach kaajoʼob[eʼ] bíin kʼuchukoʼob táan u yaʼalikoʼob: Koʼoteneʼex utiaʼal ka naʼakakoʼoneʼex tu witsil Yuumtsil, tu [templo u Dios] Jacob, utiaʼal ka u kaʼambes tiʼ toʼon u beeloʼob utiaʼal ka páatak [k-]xíimbal tu beeloʼob. [...] Letiʼobeʼ bíin u yiboʼob u máaskabil u baʼateloʼobeʼ utiaʼal u sutikoʼob [u] nuʼukulil u meyajtaʼal luʼum bey xan bíin u sutoʼob lóobcheʼiloʼob u [lanzaʼob]. Mix jumpʼéel kaaj bíin u kaʼa mach u nuʼukul u baʼateʼel utiaʼal u bin u baʼatelt uláakʼ kaaj, mix xan bíin nuʼuktaʼak [...] baʼateliʼ» (Miq. 4:2, 3). Lelaʼ jach bey u yúuchul bejlaʼaʼ. Tiʼ tuláakal le yóokʼol kaabaʼ, yaan máaxoʼob ku adorarkoʼob kaʼach le luʼumil tuʼux u taaloʼob wa ku adorarkoʼob beetbil diosoʼobeʼ tsʼoʼok u joʼopʼol a adorarkoʼob Jéeoba. Tuláakloʼobeʼ u múuchʼ yaniloʼob, tumen ku kaʼansaloʼob u yaabiltubaʼob tumen Jéeoba.

19. ¿Baʼax ku chíikbesik le bix u múuchʼ meyaj le máaxoʼob meyajtik Diosoʼ?

¹⁹ Le bix u múuchʼ meyaj le máaxoʼob meyajtik Diosoʼ ku chíikbesik Jéeoba nuʼuktikoʼob yéetel u kiliʼich muukʼ. Bejlaʼeʼ yaʼab máakoʼob tiʼ jejeláas luʼumil táan u múuchʼ meyajtkoʼob Dios. Jach táan u béeytal le baʼax ku yaʼalik Apocalipsis 7:9 yéetel 14, leloʼ ku yeʼeskeʼ maʼ kun xáantal ken xuʼulsaʼak tiʼ le kʼasaʼan yóokʼol kaab tumen u angeloʼob Diosoʼ (xokaʼak Apocalipsis 7:1-4, 9, 10, 14). ¿Máasaʼ jach ku taasiktoʼon kiʼimak óolal yantal ichil u jaajil religionoʼ? Baʼaleʼ ¿baʼax unaj k-beetik utiaʼal maʼ u xuʼulul k-múuchʼ meyaj? Lelaʼ le ken k-il teʼ tuláakʼ xookoʼ.

¿Baʼax jeʼel a núukikeʼ?

• ¿Bix u muʼuchʼul le máakoʼob tumen u jaajil religionoʼ?

• ¿Baʼax unaj k-beetik utiaʼal maʼ k-pʼektik u maasil yoʼolal baʼax yantiʼob?

• ¿Baʼaxten le máaxoʼob meyajtik Diosoʼ maʼatech u xuʼulul u múuchʼ meyajoʼob yoʼolal tuʼux u taaloʼob?

[U kʼáatchiʼiloʼob le xookoʼ]

[U tsolajil le oochel teʼ táan juʼun 13]

Le máaxoʼob meyajt Dios teʼ yáax siglooʼ jejeláas tuʼux u taaloʼob

[U tsolajil le oochel teʼ táan juʼun 15]

¿Bix u yáantkoʼon múuchʼ meyaj le k-táakpajal tiʼ le meyajoʼob ku beetaʼal teʼ Najil Reinooʼ?