Le u Nojchil ichiloʼonoʼ láayliʼ táan u meyajeʼ
Le u Nojchil ichiloʼonoʼ láayliʼ táan u meyajeʼ
«Jóokʼ táan u tsʼáanchaʼataj utiaʼal u náajaltik uláakʼ tsʼáancheʼetajoʼob.» (APO. 6:2)
1, 2. 1) Jeʼex u yaʼalik le Bibliaoʼ, ¿bix u meyaj Jesucristo, yéetel baʼaxoʼob ku beetik desde tu jaʼabil 1914? 2) ¿Baʼaxoʼob tsʼoʼok u beetik Cristo desde tsʼaʼabak u beet u Reyil?
TU JAʼABIL 1914, Jéeobaeʼ tu tsʼáaj Jesús u beet u Reyil. ¿Baʼax k-tuklik ku beetik bejlaʼeʼ? ¿Chéen wa kulukbal yéetel wa baʼax horaeʼ ku paktik le Luʼum utiaʼal u yilik bix yanil le múuchʼuliloʼoboʼ? Wa bey k-tuklikoʼ, unaj k-kʼexik bix k-tuukul, tumen maʼ bey u beetkiʼ. U libroi Salmos yéetel Apocalipsiseʼ ku yeʼeskoʼobeʼ Cristoeʼ utúul Rey jach u tsʼaamaj u yóol meyaj, letiʼeʼ u natʼmaj u tsiimin «táan u tsʼáanchaʼataj utiaʼal u náajaltik uláakʼ tsʼáancheʼetajoʼob», táan u «bin táanil tiʼ tsʼáancheʼetajil» (Apo. 6:2; Sal. 2:6-9; 45:1-4).
2 Le yáax baʼax tu beetaj le ka tsʼoʼok u tsʼaʼabal u beet u Reyiloʼ letiʼe u jóoʼsik «le kaan yéetel u angeloʼob» teʼ kaʼanoʼ. Letiʼ yéetel u angeloʼobeʼ tu puloʼob Satanás yéetel u kʼasaʼan angeloʼob way Luʼumeʼ, desde teʼ kʼiin jeʼeloʼ tu luʼsaj u páajtalil u suutoʼob teʼ kaʼanoʼ (Apo. 12:7-9). Ka máan kʼiineʼ, Jesús, le «j-bisajtʼaan[oʼ]» tu láakʼintaj u Taata utiaʼal ka u yiloʼob baʼax ku beetik le máaxoʼob ku yaʼalikoʼob táan u adorartkoʼoboʼ (Mal. 3:1). Teʼ kʼiin jeʼeloʼ, le máaxoʼob chéen ku yaʼalikoʼob táan u tsaypachtikoʼob Cristo wa le religionoʼob beetik baʼaloʼob kʼaastak yanoʼob ichil «le nojoch Babiloniaoʼ», ilaʼab tiʼ letiʼ yaan u culpai u weʼekel yaʼab kʼiʼikʼ yéetel ku yoksikuba tiʼ baʼaloʼob yaan yil yéetel política (Apo. 18:2, 3, 24).
Tu pʼataj limpioi u palitsil yaan way Luʼumeʼ
3, 4. 1) ¿Baʼax meyajil tu beetaj Cristo, le u «j-bisajtʼaan» Jéeobaoʼ? 2) ¿Baʼax chíikpaj le ka taal Jéeoba yéetel Cristo u yiloʼob baʼax ku beetik le máaxoʼob ku yaʼalikoʼob táan u meyajtkoʼoboʼ? 3) ¿Máax tu tsʼáaj Cristo u kanáant baʼaxoʼob yantiʼ way Luʼumeʼ?
3 Le ka taal Jéeoba yéetel u Hijo, le «j-bisajtʼaan», u yiloʼob le baʼax ku beetik le máaxoʼob ku yaʼalikoʼob táan u meyajtkoʼoboʼ, tu yiloʼobeʼ yaan u jaats máakoʼob jach tu jaajil táan u tsaypachtikoʼob Cristo maʼ táakaʼanoʼob ichil u maasil religionoʼob chéen ku yaʼalikoʼob táan u tsaypachtikoʼoboʼ. Baʼaleʼ tak le sukuʼunoʼob yéeyaʼanoʼob utiaʼal u binoʼob kaʼan táakaʼanoʼob ichil «u chʼiʼibaloʼob Leví» maʼ jach limpio yaniloʼob kaʼachiʼ. Unaj u pʼaʼatloʼob limpioi jeʼex u yaʼalik Malaquíaseʼ: «Yuumtsileʼ bíin [u pʼat limpioi] le j-kʼiinoʼob u chʼiʼibaloʼob Leví, jeʼel bix u máaytaʼal oro yéetel plata ich kʼáakʼeʼ. Ku tsʼoʼokoleʼ letiʼobeʼ jeʼel u páajtal u táambesikoʼob u tiʼibil óoloʼob tiʼ Yuumtsil jeʼel bix u najmal u beetikoʼoboʼ» (Mal. 3:3). Utiaʼal u pʼaʼatal limpioi le sukuʼunoʼob yéeyaʼanoʼob tumen Diosoʼ tu túuxtaj Jesucristo «u j-bisaj tʼaanil le núuptʼaan[oʼ]».
4 Cristo túuneʼ tu yileʼ le sukuʼunoʼob yéeyaʼanoʼoboʼ táan u beetkoʼob tuláakal le ku páajtal utiaʼal u tsʼáaikoʼob le kaʼansaj ku keʼetel yéetel janal jach tu yorai tiʼ le máaxoʼob meyajtik Diosoʼ. Yéetel u yáantaj u revistai U Pʼíich Tulumil Kanan káaj u jóoʼsaʼal ich inglés tu jaʼabil 1879, tu tsʼáajoʼob kʼaj óoltbil u jaajil yoʼolal le Reino kex chʼaʼapachtaʼaboʼoboʼ. Jesuseʼ u yaʼalmeʼ «ken suunak» tu kʼiinil «ken xuʼuluk yóokʼol kaab[eʼ]», yaan u yilik utúul palitsil táan u tsʼáaik le «janal [...] tu yorai» tiʼ u maasil máaxoʼob meyajtik Diosoʼ. Tsʼoʼoleʼ yaan u yaʼaliktiʼ jach maʼalob le baʼax ku beetkoʼ yéetel yaan u tsʼáaik «tuláakal baʼax yantiʼ» utiaʼal u kanáante (Mat. 24:3, 45-47). Leloʼ jach bey tsʼoʼok u yúuchloʼ. Cristo, u Poolil le múuchʼuliloʼ, tsʼoʼok u tsʼáaik le «palitsil chúukpajaʼan u yóol yéetel yaan u naʼat» u kanáant tuláakal baʼaxoʼob yantiʼ way Luʼumeʼ. Jesuseʼ ku meyajtiʼ le Cuerpo Gobernante utiaʼal u nuʼuktik le sukuʼunoʼob yéeyaʼanoʼob wa le «otochnáaloʼob[oʼ]» yéetel le «uláakʼ tamanoʼob[oʼ]» (Juan 10:16).
«U joochil yóokʼol kaab»
5. ¿Baʼax meyajil ku beetik le Rey tsʼaʼab u yil Juanoʼ?
5 Apóstol Juaneʼ tsʼaʼab u yil uláakʼ meyaj ken u beet le Rey tu «kʼiinil Yuumtsil» káaj tu jaʼabil 1914, le ka tsʼaʼab u beet u Reyiloʼ. Juaneʼ ku yaʼalik: «Ka paakatnajeneʼ ka tin wilaj jumpʼéel sak múuyal; tu yóokʼol le múuyaloʼ yaan juntúul máax kulukbaliʼ, lelaʼ chíikaʼan tiʼ u Paal Máak. Tu pooleʼ yaan jumpʼéel [corona] beetaʼan yéetel oro, yéetel tu kʼabeʼ jumpʼéel lóobcheʼ jach yaan u yej», u líiʼsmuba utiaʼal u káajsik u jooch (Apo. 1:10; 14:14). Tsʼoʼoleʼ tu yuʼubaj baʼax ku yaʼalik utúul ángel túuxtaʼan tumen Jéeoba u yaʼal tiʼ le Reyoʼ: «Jup a lóobcheʼ, joochnen; [...] u joochil yóokʼol kaabeʼ tsʼoʼok u kʼantal» (Apo. 14:15, 16).
6. ¿Baʼax tu yaʼalaj Jesús kun úuchul tu kʼiinil le joochoʼ?
6 Le tʼaan «u joochil yóokʼol kaab[oʼ]» ku kʼaʼajsiktoʼon u kettʼaanil le trigo yéetel le kʼaakʼas xíiwoʼ. Teʼ kettʼaanoʼ, Jesuseʼ tu ketuba yéetel utúul máax tu pakʼaj trigo, letiʼeʼ ku páaʼtik ka yaʼabak u yich. Le trigooʼ ku chíikbesik «u paalal le Reinooʼ, NM», wa le sukuʼunoʼob yéeyaʼanoʼob utiaʼal reinar yéetel Cristo teʼ kaʼanoʼ. Baʼaleʼ Jesuseʼ tu yaʼaleʼ ka áakʼabchajeʼ, utúul enemigo wa le «Kʼaasilbaʼal[oʼ]», tu pakʼaj kʼaakʼas xíiw ichil le trigooʼ, le kʼaakʼas xíiwoʼ ku chíikbesik «u paalal le Kʼaasilbaʼaloʼ, NM». Le máax paakʼáalnajoʼ tu yaʼalaj tiʼ u palitsiloʼob ka u chaʼob u múuchʼ nuuktal le trigo yéetel le kʼaakʼas xíiw tak tu kʼiinil le jooch wa «ken xuʼuluk yóokʼol kaab». Teʼ kʼiin jeʼeloʼ yaan u túuxtik u angeloʼob utiaʼal u tsʼáaikoʼob jumpáayil le trigo tiʼ le kʼaakʼas xíiwoʼ (Mat. 13:24-30, 36-41).
7. ¿Bix u beetik Cristo «u joochil yóokʼol kaab»?
7 Jeʼex úuchik u yilik Juanoʼ, Cristoeʼ táan u jooch way «yóokʼol kaabeʼ». Yáaxeʼ táan u muchʼik u yalab le 144,000 «u paalal le Reino» ku chíikbesaʼal tumen le trigo teʼ kettʼaan tu beetaj Jesusoʼ. Ka tsʼoʼok le yáax nojoch baʼateltáambaloʼ, maas chíikpaj máaxoʼob jach tu jaajil táan u meyajtikoʼob Dios. Lelaʼ tsʼoʼok u yáantaj utiaʼal u beetaʼal uláakʼ u jaats le «u joochil yóokʼol kaab», wa u muʼuchʼul le uláakʼ tamanoʼoboʼ. Le sukuʼunoʼobaʼ maʼ táakaʼanoʼob ichil «u paalal le Reinooʼ», baʼaxeʼ tiaʼanoʼob ichil le «yaʼabkach máakoʼob» kun kuxtaloʼob yáanal le Reinooʼ. Yaʼab tiʼ «u kajnáaliloʼob tuláakal le luʼumaʼ» táan u kʼamikoʼob yéetel kiʼimak óolal le Reino, tuʼux kun gobernar Jesús yéetel le 144,000 (Apo. 7:9, 10; Dan. 7:13, 14, 18).
Táan u nuʼuktik le múuchʼuliloʼoboʼ
8, 9. 1) ¿Bix k-ojéeltik Cristoeʼ ku yilik baʼax ku beetik cada utúul sukuʼun teʼ múuchʼuliloʼ? 2) Jeʼex u yeʼesik le foto yaan teʼ táan juʼun 26, ¿máakalmáak jujumpʼéel tiʼ «u taʼakbil baʼaliloʼob Satanás» unaj k-kanáantikba tiʼ?
8 Teʼ xook máanikoʼ t-ileʼ Cristoeʼ jach u yojel bix yanil cada upʼéel múuchʼulil teʼ yáax siglooʼ. Bejlaʼeʼ táan u nuʼuktik tuláakal le múuchʼuliloʼoboʼ bey xan le meyaj ku beetik le ancianoʼoboʼ, tumen tsʼoʼok u tsʼaʼabal u beet u Reyil yéetel tsʼaʼantiʼ «tuláakal páajtalil kaʼan yéetel luʼum» (Mat. 28:18; Col. 1:18). Jéeobaeʼ tsʼoʼok u tsʼáaik u Hijo u beet «u pool[il] tuláakal» le sukuʼunoʼob yéeyaʼanoʼoboʼ (Efe. 1:22). Le oʼolal ku yilik tuláakal le baʼaxoʼob ku beetaʼal ichil le maas tiʼ cien mil múuchʼuliloʼoboʼ.
9 Úuchjeakileʼ Jesuseʼ tu yaʼalaj tiʼ le múuchʼulil yaan tu kaajil Tiatiraoʼ: «Bey ku yaʼalik u Paal Jajal Dios, le máax yaan u [yichoʼob] bey u tóochʼbal kʼáakʼeʼ [...]: Teneʼ in wojel tuláakal baʼax ka beetik» (Apo. 2:18, 19). Tu yileʼ jujuntúul tiʼ le sukuʼunoʼoboʼ yaan baʼaloʼob kʼaastak ku beetkoʼob yéetel ku núupkʼebantaloʼob, le oʼolal tu yaʼalajtiʼob: «Teneʼ in kʼaj óol tak u sen taamil le tuukuloʼ, bey xan u sen taamil le puksiʼikʼaloʼ; tiʼ jujuntúul tiʼ teʼexeʼ yaan in boʼotik jeʼel bix a beetmajeʼexeʼ» (Apo. 2:23). Lelaʼ ku yeʼeskeʼ Cristoeʼ maʼ chéen ku yilik baʼax ku beetik cada upʼéel múuchʼuliliʼ, baʼaxeʼ ku yilik baʼax ku beetik cada utúul tiʼ le máaxoʼob yaan ichiloʼ. Jesús xaneʼ tu yaʼaleʼ jach maʼalob le baʼax ku beetik jujuntúul tiʼ le sukuʼunoʼob yaan tu kaajil Tiatiraoʼ tumen maʼ u kʼaj óoloʼob «u taʼakbil baʼaliloʼob Satanas[iʼ]» (Apo. 2:24). Bejlaʼa xaneʼ, jach ku kiʼimaktal u yóol ken u yil le sukuʼunoʼob, kex jeʼel jaypʼéel jaʼab yantiʼobeʼ, ku yilik u náachkuntikubaʼob tiʼ «u taʼakbil baʼaliloʼob Satanás», jeʼex le baʼaloʼob ku yilaʼal tiʼ Internetoʼ, tiʼ videojuegoʼob tuʼux yaʼab u beetaʼal loob wa uláakʼ baʼaloʼob jeʼel u kʼaskúuntik u tuukul máakeʼ. Jesuseʼ jach ku kiʼimaktal u yóol ken u yil le sukuʼunoʼoboʼ ku beetkoʼob tuláakal le ku páajtal utiaʼal u beetkoʼob baʼax maʼalob mantatsʼoʼ.
10. 1) ¿Bix k-ojéeltik le ancianoʼoboʼ tiaʼanoʼob yáanal u nuʼuktaj Cristoeʼ? 2) ¿Bix u yilik le ancianoʼob le máaxoʼob tsʼaʼan tumen Cristo utiaʼal u nuʼuktikoʼob le máaxoʼob meyajtik Diosoʼ?
10 Jesuseʼ u tsʼaamaj ancianoʼob utiaʼal u nuʼuktik yéetel yaabilaj le múuchʼuliloʼoboʼ (Efe. 4:8, 11, 12). Teʼ yáax siglooʼ, le sukuʼunoʼob beet le meyaj beyaʼ keʼetoʼob yéetel eekʼoʼob yanoʼob tu x-noʼoj kʼab Cristo (Apo. 1:16, 20). Teʼ kʼiinoʼob jeʼeloʼ chéen le sukuʼunoʼob yéeyaʼanoʼob ku beetik u ancianoiloʼoboʼ. Kex bejlaʼa u maas yaʼabil le ancianoʼob maʼ yéeyaʼanoʼob utiaʼal u binoʼob kaʼanoʼ, jeʼel u béeytal u yaʼalaʼaleʼ tiaʼanoʼob tu x-noʼoj kʼab Cristoeʼ, tumen ku tsʼáaikubaʼob yáanal u páajtalil, tsʼoʼoleʼ yéeyaʼanoʼob yéetel u yáantaj le kiliʼich muukʼoʼ bey xan yéetel payalchiʼ (Hch. 20:28). Baʼaleʼ tuláakloʼob u yojloʼob Jesuseʼ ku meyajtiʼ le Cuerpo Gobernante utiaʼal u nuʼuktik le máaxoʼob meyajtik Diosoʼ (xokaʼak Beetaʼanoʼob 15:6, 28-30).
«¡Koʼoten, Yuumtsil Jesús!»
11. ¿Baʼaxten jach k-tsʼíiboltik ka séeb taalak Jesús?
11 Teʼ náay tsʼaʼab u yil Juanoʼ, Jesuseʼ yaʼab utéenel tu yaʼalaj yaan u séeb taal (Apo. 2:16; 3:11; 22:7, 20). Le baʼax ku yaʼalik le Bibliaoʼ ku yeʼeskeʼ táan u taal u castigart le Nojoch Babiloniaoʼ yéetel utiaʼal u xuʼuls tiʼ u maasil baʼaloʼob kʼaastak yaan tu kʼasaʼan yóokʼol kaab Satanasoʼ (2 Tes. 1:7, 8). Apóstol Juaneʼ jach u kʼáat u yil bix ken u béeykuntil tuláakal le baʼaxoʼob jatsʼutstak tu yilaj teʼ náayoʼ, le oʼolal tu yaʼalaj: «Amén. ¡Koʼoten, Yuumtsil Jesús!». Toʼoneʼ kuxaʼanoʼon tu tsʼook kʼiiniloʼob le kʼasaʼan yóokʼol kaabaʼ, jach k-tsʼíiboltik xan k-ilik bix kun chíikbesbil tumen Jesucristo, k-Nojchil yéetel k-Rey, chéen tiʼ Jéeoba yaan u derechoi utiaʼal u gobernar yéetel utiaʼal u kiliʼichkúuntik u kʼaabaʼ.
12. ¿Baʼax ken u beet Cristo táanil tiʼ u chaʼabal u yiikʼaloʼob le xuʼulsajiloʼ?
12 Táanil tiʼ u xuʼulsik Jesús tiʼ le máaxoʼob yanoʼob tu tséel Satanasoʼ, kʼaʼabéet u láaj sellartaʼal tuláakal le máaxoʼob kun binoʼob kaʼanoʼ. Le Bibliaoʼ ku yaʼalikeʼ le iikʼoʼob kun xuʼulsik tiʼ u kʼasaʼan yóokʼol kaab Satanasoʼ yaan u chaʼabal u máanoʼob ken tsʼoʼokok u láaj sellartaʼal le 144,000 (Apo. 7:1-4).
13. ¿Bix ken u chíikbesuba Cristo ken káajak le «nojoch yaj óolal[oʼ]»?
13 U maas yaʼabil le máakoʼoboʼ maʼ u yojloʼob wa kuxaʼanoʼon tiʼ le kʼiinoʼob way yaan Cristo, káaj tu jaʼabil 1914 (2 Ped. 3:3, 4). Baʼaleʼ maʼ kun xáantal ken u chíikbesuba Jesús. ¿Bix ken u beetil? Letiʼe ken u xuʼuls tiʼ tuláakal baʼaloʼob kʼaastakoʼ. Upʼéel baʼax kun eʼesik way yaneʼ letiʼe ken u xuʼuls tiʼ «u máakil le kʼebanoʼ», wa u nuuktakil le religionoʼob chéen ku yaʼalikoʼob táan u tsaypachtikoʼob Cristooʼ (xokaʼak 2 Tesalonicailoʼob 2:3, 8). Bey ken u yeʼesil táan u juzgar jeʼex u yaʼalmil Jéeobaoʼ (xokaʼak 2 Timoteo 4:1). Ken kʼuchuk u kʼiinil u xuʼulsaʼal tiʼ le Nojoch Babiloniaoʼ yaan u káajal yéetel le religionoʼob chéen ku yaʼalikoʼob táan u tsaypachtikoʼob Cristooʼ, tumen maas kʼaas baʼax ku beetkoʼob, ken tsʼoʼokok túuneʼ ku xuʼulsaʼal tiʼ u maasil religionoʼoboʼ. Jéeobaeʼ yaan u tsʼáaik tu puksiʼikʼal le gobiernoʼob ka u xuʼulsoʼob tiʼ le religionoʼob ku keʼetloʼob yéetel utúul x-kʼeban koʼoleloʼ (Apo. 17:15-18). Le baʼaloʼobaʼ le kun káajsik le «nojoch yaj óolal[oʼ]» (Mat. 24:21, NM).
14. 1) ¿Baʼaxten yaan u kóomkintaʼal u kʼiinil le nojoch yaj óolaloʼ? 2) ¿Baʼax ken u beet u kaajal Jéeoba ken chíikpajak «u Paal Máak»?
14 Jesuseʼ tu yaʼaleʼ bíin «kóomkin[taʼak]» u kʼiiniloʼob le nojoch yaj óolalil tu yoʼolal «le máaxoʼob u yéeymajoʼ», wa le sukuʼunoʼob yéeyaʼanoʼob pʼáatloʼob way Luʼumaʼ (Mat. 24:22). Le ken xuʼulsaʼak tiʼ le maʼ jaajil religionoʼob tumen le gobiernoʼoboʼ, Jéeobaeʼ maʼ ken u chaʼa u xuʼulsaʼal tiʼ u yalab le sukuʼunoʼob kun binoʼob kaʼanoʼ mix tiʼ le uláakʼ tamanoʼoboʼ. Jesuseʼ tu yaʼalaj «ken máanak u kʼiiniloʼob le mukʼyajoʼ» yaan u yantal nojoch chíikulaloʼob teʼ Kʼiinoʼ, teʼ Lunaoʼ yéetel teʼ eekʼoʼoboʼ, «letiʼ túun ken ilaʼak teʼ kaʼanoʼ u chíikulal u Paal Máak». Ken úuchuk lelaʼ, le kaajoʼoboʼ «bíin okʼolnakoʼob». Baʼaleʼ maʼ bey kun úuchul tiʼ le sukuʼunoʼob táan u paʼatik u binoʼob kaʼanoʼ, mix tiʼ le uláakʼ tamanoʼob táan u paʼatik u kuxtaloʼob way Luʼumeʼ. Baʼaxeʼ yaan u beetkoʼob le baʼax tu yaʼalaj Jesusaʼ: «Líikʼes a pooleʼex tumen séebaʼan kan jáalkʼabtbileʼex» (Mat. 24:29, 30; Luc. 21:25-28).
15. ¿Baʼax uláakʼ ken u beet Cristo ken u chíikbesuba?
15 Baʼaleʼ táanil tiʼ u xuʼulsik tiʼ u kʼasaʼan yóokʼol kaab Satanaseʼ, Jesucristo, u Paal Máakeʼ, yaan uláakʼ bix ken u chíikbesuba. Letiʼeʼ tu yaʼalaj: «Ken nojbeʼenkúuntaʼak u Paal máak yéetel ken yanak yéetel tuláakal le angeloʼoboʼ, yaan u kutal tu kiʼichkelem trono. U máakiloʼob tuláakal kaajoʼobeʼ yaan u muchʼkíintaʼaloʼob tu táan, letiʼ túuneʼ yaan u jatsik le máakoʼob jeʼex u beetik le j-kanan taman ku jatsik le tamanoʼob tiʼ le chivoʼoboʼ. Yaan u tsʼáaik le tamanoʼob tu x-noʼojoʼ, baʼaleʼ le chivoʼoboʼ tu x-tsʼíik» (Mat. 25:31-33, NM). Lelaʼ ku yeʼesikeʼ, ken u beet u Juezil Cristoeʼ yaan u jóoʼsik kaʼajaats tiʼ «u máakiloʼob tuláakal kaajoʼob». U jaatseʼ letiʼe «tamanoʼob» áantik u sukuʼunoʼob Jesús pʼáatloʼob way Luʼumeʼ, yéetel uláakʼ jaatsoʼ letiʼe «chivoʼob» maʼatech u «yuʼubikoʼob u maʼalob péektsil k-Yuumtsil Jesucristo[oʼ]» (2 Tes. 1:7, 8). Le tamanoʼob, wa le máaxoʼob «toj u kuxtaloʼoboʼ», yaan u tsʼaʼabaltiʼob le «kuxtal minaʼan u xuul» way Luʼumeʼ, baʼaleʼ le chivoʼoboʼ «bíin xiʼikoʼob tiʼ le mukʼyaj minaʼan u xuuloʼ», wa tiʼ le xuʼulsajiloʼ (Mat. 25:34, 40, 41, 45, 46).
Jesuseʼ yaan u láaj tsʼáancheʼetikoʼob
16. ¿Bix ken u náajalt uláakʼ tsʼáancheʼetajoʼob Jesús, le k-Nojchiloʼ?
16 Le ken tsʼoʼokok u láaj sellartaʼal le sukuʼunoʼob ken u beet u reyiloʼob yéetel u j-kʼiiniloʼob, bey xan ken tsʼoʼokok u yantal tuláakal le tamanoʼob tu x-noʼoj kʼab Jesús utiaʼal u salvartaʼaloʼoboʼ, yaan «u náajaltik uláakʼ tsʼáancheʼetajoʼob» (Apo. 5:9, 10; 6:2). Le ken taalak yéetel u angeloʼob bey xan yéetel le sukuʼunoʼob tsʼoʼok u binoʼob kaʼanoʼ, yaan u xuʼulsik tiʼ le jejeláas gobiernoʼob tsʼaʼan tumen wíinikoʼ, tiʼ le baʼateltáambaloʼoboʼ yéetel le uláakʼ baʼaloʼob yaan yáanal u páajtalil Satanasoʼ (Apo. 2:26, 27; 19:11-21). Bey túun ken u tsʼáancheʼetil le kʼasaʼan yóokʼol kaabaʼ. Le ken tsʼoʼokkeʼ yaan u kʼalik Satanás yéetel u kʼasaʼan angeloʼob ichil mil jaʼaboʼob (Apo. 20:1-3).
17. ¿Tak tuʼux ken u bis Cristo le uláakʼ tamanoʼob ichil le Mil Jaʼaboʼoboʼ, yéetel baʼax unaj k-chʼaʼatuklik k-beetik?
17 Le apóstol Juanoʼ tu yaʼalaj yoʼolal le «yaʼabkach máakoʼob» ken u salvartubaʼob tiʼ le nojoch yaj óolaloʼ: «Le taman yaan chúumuk tiʼ le jalaʼach kʼáancheʼoʼ letiʼ bíin u kanáantoʼob yéetel bíin u bisoʼob tiʼ u sayabiloʼob u jaʼil kuxtal» (Apo. 7:9, 17). Jeʼex túun k-ilkoʼ, le ken Reinarnak ichil le Mil Jaʼaboʼoboʼ, Cristoeʼ yaan u seguer u nuʼuktik le uláakʼ tamanoʼoboʼ, letiʼobeʼ yaan u yuʼubikoʼob u tʼaan, yéetel yaan u tsʼaʼabaltiʼob le kuxtal minaʼan u xuuloʼ (xokaʼak Juan 10:16, 26-28). Le oʼolal maʼ unaj u xuʼulul k-tsaypachtik k-Rey, le u Nojchil ichiloʼon kun biskoʼon teʼ túumben luʼumoʼ.
Kʼaʼajsaj
• ¿Baʼax káaj u beetik Cristo ka tsʼoʼok u tsʼaʼabal u beet u Reyil?
• ¿Bix u nuʼuktik Jesús le múuchʼuliloʼoboʼ?
• ¿Bix ken u chíikbesuba le u Nojchil ichiloʼonoʼ?
• ¿Bix kun seguer u nuʼuktikoʼon Cristo teʼ túumben luʼumoʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 29]
Jesuseʼ yaan u chíikbeskuba ken u xuʼuls tiʼ u kʼasaʼan yóokʼol kaab Satanás