Unaj k-tsʼáaik k-óol k-kaxt u bendición Jéeoba
Unaj k-tsʼáaik k-óol k-kaxt u bendición Jéeoba
«Jajal Dios [...] boʼotik le máaxoʼob kaxtikoʼ.» (HEB. 11:6)
1, 2. 1) ¿Baʼax ku beetik le máakoʼob utiaʼal ka bendecirtaʼakoʼob tumen Diosoʼ? 2) ¿Baʼaxten unaj k-kaxtik u bendición Dios?
YAʼAB tuʼuxeʼ suuk u yaʼalaʼal tiʼ máak: «Ka u bendecirtech Dios», utiaʼal u tsʼáaikoʼob u diosboʼotikil le áantaj ku tsʼaʼabaltiʼoboʼ. U nuuktakil yaʼab religionoʼob xaneʼ ku bendecirkoʼob máakoʼob, baʼalcheʼob bey xan uláakʼ baʼaloʼob. Tsʼoʼoleʼ yaan máakoʼobeʼ ku binoʼob xíimbalil tiʼ iglesiaʼob kex náach yanil utiaʼal u kʼamkoʼob bendición. Yaan tak politicoʼobeʼ ku kʼáatkoʼob tiʼ Dios ka bendecirtaʼak le luʼum tuʼux kajaʼanoʼoboʼ. ¿Maʼalob wa ka u kʼáat máak baʼaloʼob beyaʼ? ¿Ku núukik wa Dios? ¿Máaxoʼob ku bendecirtaʼaloʼob tumen Jéeoba, yéetel baʼaxten?
2 Jéeobaeʼ u yaʼalmeʼ tu tsʼook kʼiinoʼobeʼ yaan u yantal upʼéel kaaj limpio yéetel yaan u yantal jeetsʼelil ichil kex jejeláas tuʼux u taaloʼob, letiʼobeʼ yaan u kʼaʼaytkoʼob le maʼalob péektsil tuláakal tuʼux kex ka pʼektaʼakoʼob yéetel kex ka chʼaʼapachtaʼakoʼob (Isa. 2:2-4; Mat. 24:14; Apo. 7:9, 14). Bejlaʼeʼ táan k-ilik k-kuxtal jeʼex u yaʼalik le profecíaaʼ. Baʼaleʼ utiaʼal lelaʼ kʼaʼabéet u bendecirkoʼon Dios (Sal. 127:1). ¿Baʼax túun unaj k-beetik utiaʼal k-kʼamik?
Le máaxoʼob ku yuʼubikoʼob tʼaanoʼ ku kʼamkoʼob bendición
3. ¿Baʼax ken u kʼam kaʼach le israelitaʼob wa ku beetkoʼob baʼax ku yaʼalik Diosoʼ?
3 (Xokaʼak Proverbios 10:6, 7.) Le jach taʼaytak u yokol le israelitaʼob teʼ luʼum aʼalaʼan u tsʼaʼabaltiʼoboʼ, Jéeobaeʼ tu yaʼalajtiʼob yaan u bin utsil tiʼob yéetel yaan u kanáantkoʼob wa ku beetkoʼob baʼax ku yaʼalik (Deu. 28:1, 2). Letiʼeʼ tu yaʼaleʼ «le kiʼtʼaanoʼobaʼ [wa le bendicionoʼobaʼ] bíin lúubukoʼob ta wóokʼol», lelaʼ ku yeʼesik jach yaan u béeytal.
4. ¿Baʼax unaj u péeksik máak u beet baʼax ku yaʼalik Dios?
4 ¿Bix unaj kaʼach u yuʼubaʼal u tʼaan Dios tumen le israelitaʼoboʼ? Le Leyoʼ ku yaʼalikeʼ unaj u beetkoʼob «yéetel kiʼimak óolal», wa maʼeʼ yaan u xuʼulul u kʼaʼamloʼob tumen Jéeoba (xokaʼak Deuteronomio 28:45-47). Letiʼeʼ maʼ u kʼáat ka k-beet baʼax ku yaʼalik chéen tumen k-ojel unaj k-beetkiʼ, tumen tak le baʼalcheʼob yéetel le kʼasaʼan angeloʼoboʼ ku beetkoʼob beyoʼ (Mar. 1:27; Sant. 3:3). Le máaxoʼob beetik baʼax ku yaʼalik Jéeobaoʼ ku beetkoʼob yéetel kiʼimak óolal, tumen u yaabiltmoʼob, letiʼobeʼ u yojloʼob Jéeobaeʼ maʼatech u kʼáatik ka beetaʼak upʼéel baʼax talam yéetel u yojloʼobeʼ «ku boʼotik le máaxoʼob kaxtikoʼ» (Heb. 11:6; 1 Juan 5:3).
5. ¿Baʼax áant le israelitaʼob utiaʼal ka u beetoʼob le baʼax ku yaʼalik Deuteronomio 15:7 yéetel 8?
5 Wa le israelitaʼob ku beetkoʼob yéetel kiʼimak óolal le baʼaxoʼob ku yaʼalik Diosoʼ ku yeʼeskoʼob jach u kʼubmaj u yóoloʼob tiʼ letiʼ. Tuukulnakoʼon tiʼ le baʼax ku yaʼalik Deuteronomio 15:7 yéetel 8 (xokaʼak). U jaajileʼ wa ka obligartaʼakoʼob u yáantoʼob le óotsiloʼoboʼ jeʼel u beetkoʼob kaʼach kex maʼ u kʼáatoʼobeʼ. Baʼaleʼ wa ku beetkoʼob chéen tumen ku obligartaʼaloʼobeʼ, maʼ ken u bisubaʼob tubeel. Tsʼoʼoleʼ ¿jeʼel wa u yeʼeskoʼob jach ku creerkoʼob jeʼel u tsʼaʼabal tuláakal baʼax kʼaʼabéettiʼob tumen Dioseʼ? ¿Jeʼel wa u yeʼeskoʼob jach u kʼáat u yeʼes u yutsiloʼob jeʼex u beetik Dioseʼ? ¿Máasaʼ maʼatan? Letiʼeʼ ku yilik jach baʼax yaan tu puksiʼikʼaloʼob; wa ku yilik letiʼe yaabilaj péekskoʼob u yeʼes u yutsiloʼoboʼ ku bendecirkoʼob (Deu. 15:10). Wa jach ku creerkoʼob yaan u yáantaʼaloʼob tumen Dioseʼ, yaan u yáantkoʼob u maasil, letiʼ túuneʼ yaan u bendecirkoʼob (Pro. 28:20).
6. ¿Baʼax ku yaʼalik Hebreob 11:6?
6 Hebreob 11:6 ku yaʼalik kʼaʼabéet u tsʼáaik u fe máak tiʼ le Dios ku boʼoloʼ, baʼaleʼ yaan uláakʼ baʼax ku yaʼalik kʼaʼabéet u beetik máak utiaʼal u kʼamik u bendición. Ku yaʼalikeʼ Dioseʼ ku bendecirtik «le máaxoʼob kaxtikoʼ». Le tʼaan griego ku suʼutul beyaʼ, ku tsʼáaik naʼatbil u jach tsʼáaik tuláakal u yóol máak u beet wa baʼax. Le oʼolal le baʼax ku yaʼalik le versiculooʼ ku yáantkoʼon k-ileʼ, wa k-jach tsʼáaik k-óol k-beet baʼax ku yaʼalik Dioseʼ, letiʼeʼ yaan u bendecirkoʼon. Lelaʼ letiʼe baʼax ku yaʼalik le «Jajal Dios, máax maʼ tu tuus[oʼ]» (Tito 1:2). Ichil le bukaʼaj jaʼaboʼob tsʼoʼok u máanoʼ, tsʼoʼok u yeʼesik jach ku béeykuntik baʼaxoʼob ku yaʼalik. ¡Mix upʼéel ku pʼáatal maʼ u béeykunskiʼ! (Isa. 55:11.) Le oʼolal wa k-tsʼáaik k-fe tiʼ letiʼeʼ yaan u beetik u bintoʼon utsil.
7. ¿Bix jeʼel k-kʼamik u bendición Dios yoʼolal u «chʼiʼibal» Abrahameʼ?
7 Jéeobaeʼ tu yaʼalaj yaan u tsʼáaik yaʼab utsiloʼob yoʼolal u «chʼiʼibal» Abraham, le chʼiʼibalaʼ kaʼajaats yantiʼ: le yáaxoʼ, Jesucristo, le u kaʼapʼéeloʼ, letiʼe sukuʼunoʼob yéeyaʼanoʼob utiaʼal u binoʼob kaʼanoʼ. Tiʼ letiʼob aʼalaʼan ka u tsʼaʼob kʼaj óoltbil «u jakʼbeʼen meyajoʼob Jajal Dios, máax tʼan[oʼob] utiaʼal ka jóokʼok[oʼob] tiʼ le éekʼjochʼeʼeniloʼ utiaʼal ka [oojkoʼob] tiʼ le kiʼichkelem sáasil[oʼ]» (Gal. 3:7-9, 14, 16, 26-29; 1 Ped. 2:9). Maʼ tu páajtal k-bisikba yéetel Jéeoba wa maʼ k-uʼuyik u tʼaan le sukuʼunoʼob yanoʼob ichil «le palitsil chúukpajaʼan u yóol yéetel yaan u naʼat» kanáantik le baʼaxoʼob pʼataʼan tiʼ tumen Jesusoʼ (Mat. 24:45-47). Wa maʼ yoʼolal le áantaj ku tsʼáaikoʼoboʼ maʼ tu béeytal k-naʼatik le baʼax ku kaʼansik le Bibliaoʼ mix bix jeʼel u páajtal k-tsʼáaik ichil k-kuxtaleʼ. Wa k-beetik le baʼax ku yaʼalik le Bibliaoʼ yaan u bendecirkoʼon Dios.
Unaj k-tsʼáaik táanil baʼax ku yaʼalik Dios
8, 9. ¿Baʼaxoʼob tu beetaj Jacob utiaʼal u beetik baʼax u kʼáat Dios?
8 Ken tʼaanakoʼon tiʼ u tsʼáaik u yóol máak u kaxt u bendición Dioseʼ, maʼ xaaneʼ jeʼel u taal t-tuukul upʼéel baʼax úuch tiʼ Jacobeʼ. Letiʼeʼ maʼ u yojel bix kun tsʼaabil le bendición aʼalaʼan tiʼ Abraham, u abuelooʼ, baʼax u yojleʼ Jéeobaeʼ yaan u beetik u yaʼabtal u paalaloʼob ka tak kʼuchuk u beetuba upʼéel nojoch kaajil. Le oʼolal tu jaʼabil 1781 táanil tiʼ u taal Jesuseʼ, Jacobeʼ bin tu noj kaajil Harán utiaʼal u kaxtik u yatan. Baʼaleʼ letiʼeʼ maʼ u kʼáat u kaxt utúul koʼolel chéen utiaʼal u múul máansik u kuxtaliʼ, baʼaxeʼ utúul koʼolel u yaabiltmaj Dios yéetel maʼalob utiaʼal u beetik u maamatsilil.
9 Jeʼex k-ojlileʼ, Jacobeʼ tu kʼaj óoltaj Raquel, utúul u láakʼtsilil, ka utschaj tu yich. Baʼaleʼ utiaʼal u tsʼoʼokol u beel yéeteleʼ, yanchaj u meyaj siete jaʼaboʼob yiknal Labán, u taata le x-chʼúupaloʼ. Baʼaleʼ lelaʼ maʼ chéen upʼéel tsikbal tuʼux ku yaʼalaʼal bix úuchik u yaabiltkubaʼobiʼ. Jacobeʼ u yojel le baʼax u yaʼalmaj Jéeoba tiʼ Abraham, u abuelooʼ, bey xan le baʼax u yaʼalmaj xan tiʼ Isaac, u taataoʼ (Gén. 18:18; 22:17, 18; 26:3-5, 24, 25). Ka máan kʼiineʼ Isaakeʼ tu yaʼalaj tiʼ Jacob: «Le [Dios] yaan tuláakal páajtalil tiʼoʼ u kiʼtʼantech yéetel ka u yaʼabkunt a chʼiʼibaloʼob utiaʼal [...] ka jóokʼoktech yaʼabkach múuchʼ kaajoʼob. Ka u tsʼáa tiʼ tech, bey xan tiʼ a chʼiʼibaloʼob, le kiʼtʼaan tu [yaʼalaj] tiʼ Abrahameʼ, utiaʼal [...] ka u tiaʼalintoʼob le luʼum tuʼux kajakbaloʼon beyoʼon táanxel luʼumileʼ, tumen bey tu [yaʼalil] tiʼ Abraham» (Gén. 28:3, 4). Bey túunoʼ, le úuchik u tsʼáaik u yóol Jacob u kaxt utúul koʼolel u yaabiltmaj Dios utiaʼal u tsʼoʼokol u beeloʼ, ku yeʼesik jach ku creertik le baʼax u yaʼalmoʼ.
10. ¿Baʼaxten bendecirtaʼab Jacob tumen Jéeoba?
10 Ka tsʼoʼok u beel Jacobeʼ, maʼ tu tsʼáaj u yóol u kaxt ayikʼaliloʼobiʼ, baʼaxeʼ tu tsʼáaj u yóol u kaxt le bendición aʼalaʼan kun tsʼaabiltiʼoʼ. Letiʼeʼ tu tsʼáaj táanil u meyajtik Dios. Utiaʼal u kʼamik le bendicionoʼ tu yilaj u beetik tuláakal le ku páajtal utiaʼal u aktáantik le talmiloʼob yanchajtiʼoʼ. Lelaʼ bey úuchik u beetik tak ka chʼíijoʼ, le oʼolal bendecirtaʼab tumen Jéeoba (xokaʼak Génesis 32:24-29).
11. ¿Baʼax jach unaj k-tsʼáaik k-óol k-beete?
11 Jeʼex Jacobeʼ, toʼoneʼ maʼ k-jach ojel bix kun láaj béeychajal le baʼaxoʼob u yaʼalmaj Dios u beetkoʼ. Baʼaleʼ jeʼex u bin k-xokik le Bibliaoʼ k-maas naʼatik baʼaxoʼob kun úuchul tu «kʼiinil Yuumtsil» (2 Ped. 3:10, 17). Toʼoneʼ maʼ k-ojel jach baʼax kʼiin ken kʼuchkiʼ, baʼaleʼ k-ojel tsʼoʼok u náatsʼal. Tsʼoʼoleʼ k-ojel wa ku chúukpajal k-óol k-kʼaʼayt le maʼalob péektsil teʼ tu tsʼook kʼiinoʼobaʼ, yaan k-salvartikba bey xan le máaxoʼob kun kʼamikoʼ (1 Tim. 4:16).
12. ¿Baʼax k-jach ojel ken u beet Jéeoba?
12 Toʼoneʼ k-ojel chéen ken jáan kʼuchuk le xuʼulsajiloʼ. Dioseʼ u tukulmaj baʼax kʼiin ken u taase, yéetel maʼatan u páaʼtik ka k-kʼaʼayt le maʼalob péektsil tiʼ cada utúul tiʼ u kajnáaliloʼob le Luʼumaʼ (Mat. 10:23). Baʼaleʼ Jéeobaeʼ ku yaʼalik bix jeʼel u páajtal k-maas kʼaʼaytaj tubeeleʼ. Toʼoneʼ k-táakpajal yéetel tuláakal k-fe teʼ kʼaʼaytajoʼ yéetel ku meyajtoʼon tuláakal baʼaxoʼob yantoʼon utiaʼal k-beetik. ¿Yaʼab máakoʼob wa kun kʼamik le maʼalob péektsil teʼ tuʼux k-kʼaʼaytajoʼ? U jaajileʼ maʼ k-oojliʼ (xokaʼak Eclesiastés 11:5, 6). Baʼax unaj k-beetkeʼ, k-tsʼáaik ojéeltbil le baʼax ku taal u kʼiinoʼ, k-ojel Jéeobaeʼ yaan u yáantkoʼon utiaʼal k-beetik (1 Cor. 3:6, 7). K-ojel letiʼeʼ jach ku yilik bix k-tsʼáaik k-óol teʼ kʼaʼaytajoʼ, le oʼolal ken u yil kʼaʼabéeteʼ ku nuʼuktikoʼon yéetel ku tsʼáaiktoʼon u kiliʼich muukʼ (Sal. 32:8).
Unaj k-kʼáatik kiliʼich muukʼ
13, 14. ¿Bix u meyajtiʼ Dios u kiliʼich muukʼ utiaʼal u yáantik le máaxoʼob meyajtikoʼ?
13 Baʼaleʼ ¿kux túun wa k-uʼuyik maʼ tu páajtal k-beetik upʼéel meyaj ku tsʼaʼabaltoʼon teʼ múuchʼulil bey xan wa k-tuklik maʼ tu páajtal k-táakpajal teʼ kʼaʼaytajoʼ? Wa beyoʼ, unaj k-kʼáatik tiʼ Jéeoba ka u tsʼáatoʼon u kiliʼich muukʼ utiaʼal u béeytal k-beetik (xokaʼak Lucas 11:13). Yéetel u kiliʼich muukʼeʼ ku yáantik le máaxoʼob meyajtik utiaʼal ka u beetoʼob le meyaj ku tsʼaʼabaltiʼoboʼ, kex maʼ u jach ojel u beetoʼobiʼ wa kex maʼ kaʼanchajaʼan u xookoʼobiʼ. Jeʼex le maʼ úuch jóokʼok le israelitaʼob tu kaajil Egiptooʼ, le kiliʼich muukʼoʼ tu yáantaj le máakoʼob chéen kanan taman ku beetkoʼob kaʼach yéetel chéen palitsiloʼoboʼ, le oʼolal kex maʼ u yojloʼob baʼateʼeleʼ tu ganartoʼob le máaxoʼob chʼaʼapachtikoʼoboʼ (Éxo. 17:8-13). Ka máan kʼiin xaneʼ le kiliʼich muukʼoʼ tu yáantaj Bezaleel yéetel Oholiab utiaʼal ka u beetoʼob le nuʼukuloʼob meyajnaj teʼ tabernáculo tu yaʼalaj Dios ka beetaʼakoʼ (Éxo. 31:2-6; 35:30-35).
14 Le kiliʼich muukʼ xanoʼ tu yáantaj jujuntúul máaxoʼob meyajtik Dios utiaʼal ka u kan u beetoʼob jujumpʼéel meyajoʼob le ka káaj u beetaʼal jóoʼsaʼaniloʼob tumen u kaajal Diosoʼ. Upʼéel carta jóoʼsaʼab tu jaʼabil 1927, Robert J. Martin, u superintendentei le imprentaoʼ, tu yaʼalaj: «Yuumtsileʼ tu jeʼekʼabtaj toʼon upʼéel joonaj jach teʼ kʼiin kʼaʼabéetoʼ, tumen t-manaj upʼéel nojoch rotativa, baʼaleʼ maʼ kʼaj óol yéetel maʼ k-ojel bix u beetaʼal u meyajiʼ. Baʼaleʼ Yuumtsileʼ u yojel u yajs u tuukul le máaxoʼob jach u kʼubmubaʼob u meyajtoʼ. [...] Ka máan wa jaypʼéel semanaʼobeʼ tsʼoʼok u káajal u meyaj le maquinaoʼ; tak bejlaʼeʼ láayliʼ táan u meyajeʼ, táan u beetik meyajoʼob mix tak le máaxoʼob beet u yojloʼob wa jeʼel u páajtal u beetik kaʼachoʼ». Bejlaʼa xaneʼ láayliʼ bey xan u yáantik le máaxoʼob meyajtkoʼ.
15. ¿Bix u líiʼsik k-óol Romailoʼob 8:11 ken joʼopʼok u túuntaʼal k-óol?
15 Le kiliʼich muukʼoʼ jejeláas bix u yáantaj. Ku yáantkoʼon ken k-aktáant nukuch talmiloʼob yéetel ken joʼopʼok u túuntaʼal k-óol. ¿Baʼax unaj k-beetik wa k-uʼuyik maʼ tu páajtal k-aktáantik? Maʼalob ka tuukulnakoʼon tiʼ le baʼax ku yaʼalik apóstol Pablo tu tsʼíibil Romailoʼob 7:21 yéetel 25, bey xan 8:11. Teʼ versiculoʼobaʼ ku yaʼalikeʼ «u kiliʼich [muukʼ] le máax tu kaʼapúut kuxkintaj Cristo Jesús tiʼ le kíimiloʼ», jeʼel u páajtal u yáantkoʼoneʼ yéetel jeʼel u páajtal u tsʼáaiktoʼon u muukʼil utiaʼal maʼ k-lúubul tiʼ le kʼebanoʼ. Kex le baʼax ku yaʼalik le versiculoʼob aʼalaʼab tiʼ le sukuʼunoʼob yéeyaʼanoʼoboʼ, le baʼax ku yaʼalikoʼ ku líiʼsik u yóol u maasil máaxoʼob meyajtik Jéeobaoʼ. Tuláakloʼon jeʼel k-kʼamik le kiliʼich muukʼ wa k-tsʼáaik k-fe tiʼ Cristooʼ, wa k-ilik k-luʼsik t-puksiʼikʼal baʼaloʼob kʼaastak yéetel wa k-chaʼik u nuʼuktikoʼon.
16. ¿Baʼax unaj k-beetik utiaʼal u tsʼáaiktoʼon u kiliʼich muukʼ Dios?
16 Baʼaleʼ wa k-kʼáat ka u tsʼáatoʼon u kiliʼich muukʼ Dioseʼ, unaj k-sen kʼáatiktiʼ. Tsʼoʼoleʼ unaj k-tsʼáaik k-óol xok le Bibliaoʼ (Pro. 2:1-6). Yéetel tumen le múuchʼulil ku meyaj yáanal u nuʼuktaj le kiliʼich muukʼoʼ, unaj k-bin tiʼ tuláakal le muchʼtáambaloʼoboʼ. Beyoʼ k-eʼesik taak k-uʼuyik «baʼax ku yaʼalik [le] kiliʼich [muukʼ] tiʼ le» múuchʼuliloʼ (Apo. 3:6). Tsʼoʼoleʼ kʼaʼabéet k-kʼamik yéetel kabal óolal tuláakal le baʼaxoʼob ku kaʼansaʼaloʼ. Jéeobaeʼ ku yaʼalik tiʼ Proverbios 1:23: «Uʼuyeʼex in nuʼuktʼaanoʼobiʼ, teen túuneʼ bíin in chupeʼex yéetel in [muukʼ]». Jeʼex túun k-ilkoʼ, Dioseʼ mantatsʼ ku tsʼáaik u kiliʼich muukʼ «tiʼ tuláakal le máaxoʼob ku yuʼubikoʼob u tʼaanoʼ» (Hch. 5:32).
17. Ket bix jeʼel k-kʼamik le bendición ku tsʼáaiktoʼon Diosoʼ.
17 U jaajileʼ, kʼaʼabéet k-beetik tuláakal le ku páajtal utiaʼal k-kʼamik u kiliʼich muukʼ Diosoʼ. Maʼ tuláakal le baʼaxoʼob maʼalobtak yantoʼon ku taal chéen yoʼolal bix k-tsʼáaik k-óol meyajiʼ. Lelaʼ jeʼel u páajtal k-ketik yéetel le baʼaxoʼob k-jaantikoʼ. Jeʼex k-wíinklil ku jóoʼsik u yutsil le baʼaxoʼob k-jaantikoʼ, toʼon xaneʼ k-jóoʼsik u yutsil ken u bendecirt Dios le baʼaxoʼob k-beetkoʼ. Le wíinklil u tsʼaamajtoʼonoʼ ku yáantkoʼon utiaʼal ka k-uʼuy jach kiʼ le baʼaxoʼob k-jaantikoʼ yéetel ka u chʼaʼa u vitaminasi. Maʼ k-ojel bix u chʼaʼabal le vitaminas tumen k-wíinkliloʼ mix le bix u tsʼáaiktoʼon muukʼoʼ. Baʼax k-ojleʼ ku meyaj tubeel, le oʼolal k-beetik tuláakal le ku páajtal utiaʼal k-tséentikbaoʼ. Wa maas maʼalob le baʼax k-jaantikoʼ, maas maʼalob bix u yáantkoʼon. Jéeoba xaneʼ ku yaʼalik baʼax unaj k-beetik utiaʼal ka yanaktoʼon le kuxtal minaʼan u xuuloʼ yéetel ku yáantkoʼon utiaʼal ka k-beete. U jaajileʼ Dios beetik u maas yaʼabil le meyajoʼ, le oʼolal unaj u k-tsʼáaik u nib óolalil tiʼ. Baʼaleʼ unaj k-beetik tuláakal le ku páajtal utiaʼal k-beetik baʼax utstutʼaanoʼ; chéen bey jeʼel u tsʼáaiktoʼon u bendicionoʼ (Ageo 2:18, 19).
18. ¿Baʼax tsʼoʼok k-chʼaʼatuklik k-beetik, yéetel baʼaxten?
18 Bey túunoʼ, jach unaj k-tsʼáaik k-óol k-beet le meyajoʼob ku tsʼaʼabaltoʼonoʼ yéetel unaj k-kʼubik k-óol tiʼ Dios utiaʼal u béeytal k-beetik (Mar. 11:23, 24). Maʼ u tuʼubultoʼoneʼ le «máax ku kaxaneʼ» ku kʼuchul yiknal baʼax ku kaxtik (Mat. 7:8). Le sukuʼunoʼob yéeyaʼanoʼoboʼ yaan u tsʼaʼabaltiʼob «le kuxtal» teʼ kaʼanoʼ (Sant. 1:12). Yéetel le «uláakʼ j-tamanoʼob», táan u kaxtikoʼob u bendición Dios yoʼolal u chʼiʼibal Abrahamoʼ, yaan u kiʼimaktal u yóoloʼob le ken aʼalaʼaktiʼob tumen Jesucristo, le máax Kanáantikoʼoboʼ: «Koʼoteneʼex teʼex máaxeʼex kiʼikiʼtʼantaʼaneʼex tumen in Taata, kʼameʼex le [reino] nuʼuktaʼan atiaʼaleʼex le ka tu beetaj Jajal Dios yóokʼol kaaboʼ» (Juan 10:16; Mat. 25:34). Bey túunoʼ, «le máakoʼob ku yutsiltʼantaʼaloʼob [wa ku bendecirtaʼaloʼob] tumen [Jéeobaoʼ] bíin utiaʼalintoʼob le luʼumaʼ [...]; tiʼ bíin kajlakoʼob utiaʼal jaʼaboʼob minaʼan u xuul[iʼ]» (Sal. 37:22, 29).
¿Baʼax jeʼel u páajtal k-tsolkeʼ?
• ¿Baʼax táakaʼan ichil u yuʼubik máak tʼaan?
• ¿Baʼax unaj k-beetik utiaʼal k-kʼamik u bendición Dios?
• ¿Bix jeʼel k-kʼamik le kiliʼich muukʼoʼ, yéetel bix u yáantkoʼon?
[U kʼáatchiʼiloʼob le xookoʼ]
[U tsolajil le oochel teʼ táan juʼun 9]
Jacobeʼ mukʼulmuukʼnaj yéetel utúul ángel utiaʼal u bendecirtaʼal tumen Jéeoba.
[U tsolajil le oochel teʼ táan juʼun 9]
¿K-beetik wa tuláakal le ku páajtal utiaʼal ka u bendecirtoʼon xan?
[U tsolajil le oochel teʼ táan juʼun 10]
Le kiliʼich muukʼoʼ tu yáantaj Bezaleel yéetel Oholiab u beetoʼob meyajoʼob maʼalobtak yéetel jatsʼutstak