Áant a paalaleʼex u maas kʼaj óoltoʼob u kaajal Jéeoba

LE MEJEN paalaloʼoboʼ jach jatsʼuts u yilik u kaambaloʼob. Taatatsileʼex, ¿tsʼoʼok wa a tukultikeʼex baʼax tu kʼáatchiʼitaj le mejen paalal israelitaʼob tu kaajil Egipto le áakʼab ka tu yáax kʼiimbesoʼob le Pascuaoʼ? Maʼ xaaneʼ tu kʼáatoʼob: «¿Baʼaxten kíimsaʼab le chan tamanoʼ?», «¿Baʼaxten táan u paʼapaʼakʼik kʼiʼikʼ in papá teʼ tu marcoi le jool najoʼ?», «¿Tuʼux k-bin?». Ken k-xok le baʼax tu yaʼalaj Jéeoba tiʼ le taatatsil israelitaʼob yoʼolal bix kun seguer u beetkoʼob le Pascuaoʼ, k-ilkeʼ maʼ u pʼeek u beetaʼal le kʼáatchiʼob beyoʼ, tu yaʼalajtiʼob: «Le ken u kʼáatchiʼiteʼex a paalaleʼex[:] ¿Baʼax u kʼáat yaʼal le kiliʼich meyajaʼ? Teʼexeʼ unaj a núukikeʼextiʼob: Le baʼalcheʼaʼ ku kíimsaʼal tu kʼiinil [Pascua], ku kíimsaʼal [utiaʼal kʼubbil tiʼ] Yuumtsil. Le ka tu loobiltaj utiaʼal kíimil le egipcioʼoboʼ, [...] tu tséeltaj u yotoch le israelitaʼob kajnáaloʼob kaʼach Egiptooʼ, ka tu tokaj tiʼ kíimil k-láakʼtsiloʼob» (Éxo. 12:24-27). Ka máan kʼiineʼ Jéeobaeʼ tu kʼaʼajsaj tiʼ le taatatsil israelitaʼob u kʼaʼabéetil u núukikoʼob le kʼáatchiʼob kun beetbiltiʼob tumen  u paalaloʼob yoʼolal «le nuʼukbeʼentʼaanoʼob, le aʼalmajtʼaanoʼob yéetel le kaʼambesajoʼob» u tsʼaamajtiʼoboʼ (Deu. 6:20-25).

Jeʼex túun k-ilkoʼ, Jéeobaeʼ u kʼáat ka tsoʼolok tiʼ le mejen paalal le baʼaxoʼob yaan yil yéetel le adoración ku tsʼaʼabaltiʼoʼ, beyoʼ yaan u yaabiltkoʼob Jéeoba bey u Diosoʼobeʼ yéetel yaan u creerkoʼob letiʼ Salvartoʼob. Bejlaʼeʼ láayliʼ u kʼáat ka tsoʼolok tiʼ le mejen paalaloʼob xanoʼ. Kʼaʼabéet u yáantaʼaloʼob u kʼaj óoltoʼob u kaajal Jéeoba yéetel ka u naʼatoʼob bix u yáantaʼaloʼob tumen le baʼax ku beetik t-oʼolaloʼ, beyoʼ yaan u maas yaabiltkoʼob Dios. Koʼox ilik jujumpʼéel bix jeʼel u yáantaʼal le mejen paalal u maas kʼaj óoltoʼob u kaajal Diosoʼ.

Le múuchʼuliloʼ

Le mejen paalaloʼoboʼ jach unaj u kʼaj óoltkoʼob le múuchʼulil tuʼux ku binoʼoboʼ. Utiaʼal lelaʼ, le taatatsiloʼoboʼ unaj u bisik u mejen paalaloʼob tiʼ tuláakal le muchʼtáambaloʼoboʼ. Beyoʼ ku beetkoʼob le baʼax tu yaʼalaj Jéeoba tiʼ le israelitaʼoboʼ: «[Muchʼabaʼex], jeʼel bix xiiboʼobeʼ, bey koʼoleloʼob, [yéetel] mejen paalal [...], utiaʼal ka u yuʼuboʼob u xoʼokol le aʼalmajtʼaa[noʼ], tu yoʼolal u kanikoʼob u tsikoʼob Yuumtsil a [Dioseʼex] bey xan ka u tsʼoʼokbesoʼob tuláakal baʼax tsʼíibtaʼaniʼ. Beyoʼ a paalaleʼex maʼ u yojeloʼob mix baʼal tiʼ leloʼ, bíin u yuʼuboʼob utiaʼal ka u kanoʼob u tsikoʼob Yuumtsil a [Dioseʼex]» (Deu. 31:12, 13).

Le mejen paalaloʼoboʼ jeʼel u páajtal u kanikoʼob le baʼaxoʼob ku yaʼalik le Biblia desde tu chichniloʼoboʼ. Apóstol Pabloeʼ tu yaʼalaj tiʼ Timoteo: «Ta kʼaj óoltaj ta paalil le Kiliʼich Tsʼíiboʼoboʼ» (2 Tim. 3:15). Le muchʼtáambaloʼob ku yantal teʼ Najil Reinooʼ, ku yáantik le mejen paalal utiaʼal ka káajak u naʼatkoʼob le baʼax ku  kaʼansaʼaloʼ yéetel ka u kanoʼob le kʼaayoʼoboʼ. Ku kanikoʼob xan u kaxtoʼob le tekstoʼob teʼ Bibliaoʼ yéetel ku kanik u xokoʼob le jóoʼsaʼaniloʼoboʼ, tsʼoʼoleʼ ku kanik u kanáantoʼob. Ku béeytal xan u yilkoʼob le yaabilaj chíikbesik jach máaxoʼob tsaypachtik Cristooʼ. Jesuseʼ ku yaʼalik: «Kin tsʼáaik tiʼ teʼex le túumben aʼalmajtʼaanaʼ: Yaabiltabaʼex ta baatsileʼex. Jeʼel bix in yaabiltmaʼexeʼ teʼexeʼ unaj a yaabiltkabaʼex ta baatsileʼex. Wa ka yaabiltkabaʼex ta baatsileʼexeʼ tuláakal yóokʼol kaab kun u kʼaj óolteʼ teʼexeʼ in j-kaambaleʼex» (Juan 13:34, 35). Le mejen paalaloʼoboʼ jeʼel u jatsʼutstal u yilkoʼob bix u yeʼesaʼal yaabilaj teʼ Najil Reinooʼ yéetel jeʼel u suuktal u binoʼob teʼ muchʼtáambaloʼoboʼ.

Taatatsileʼex, wa ku suuktal a séeb kʼuchuleʼex teʼ Najil Reino yéetel ka pʼáatleʼex u súutuk ken tsʼoʼokok le muchʼtáambaloʼoboʼ, a paalaleʼexeʼ yaan u kaxtik u amigoʼobiʼ. Yéetel utiaʼal maʼ u biskubaʼob chéen yéetel uláakʼ mejen paalaloʼobeʼ, áantoʼob u kʼaj óoltoʼob u maasil sukuʼunoʼob. Le sukuʼunoʼob tsʼoʼok u yantal u jaʼabiloʼoboʼ jach yaʼab baʼax u yojloʼob, le oʼolal a paalaleʼ jeʼel u jóoʼskoʼob yaʼab utsil wa ku máanskoʼob tiempo yéeteloʼobeʼ. Jeʼex Zacarías, utúul máax «kaʼambes[ik]» u ley Dios kaʼacheʼ, tu yáantaj Uzías tu táankelmil, u reyil Judá, le sukuʼunoʼob úuch joʼopʼok u meyajtkoʼob Diosoʼ jach jeʼel xan u yáantkoʼob le paalaloʼoboʼ (2 Cró. 26:1, 4, 5). Tsʼoʼoleʼ teʼ tu Najil Reinooʼ, maʼalob ka tsoleʼex tiʼ a mejen paalaleʼex baʼax u meyaj le bibliotecaoʼ, le baʼaxoʼob ku tsʼaʼabal teʼ tablerooʼ yéetel uláakʼ baʼaloʼob yaniʼ.

U kaajal Jéeoba yaan way Luʼumeʼ

Le mejen paalaloʼoboʼ unaj u yojéeltkoʼobeʼ, le múuchʼulil tuʼux ku binoʼoboʼ tiaʼan ichil le maas tiʼ cien mil múuchʼuliloʼob yaan ichil u kaajal Jéeobaoʼ. Tsoleʼextiʼob bix u meyaj u kaajal Jéeoba, baʼax meyajil ku beetik yéetel bix jeʼel u yáantajoʼob ichileʼ. Áanteʼex u naʼatoʼob baʼaxten jach ka tsʼíiboltikeʼex u kʼuchul u kʼiinil le asambleaʼob jeʼex día especial, tiʼ circuito yéetel distrito bey xan u xíimbaltaʼal le múuchʼulil tumen le superintendente tiʼ circuitooʼ (ilaʼak le cuadro «Baʼaxoʼob jeʼel u xakʼalxoktaʼal teʼ Adoración ich Familiailoʼ», táan juʼun 28).

Ken páajchajkeʼ, invitarteʼex janal le superintendente viajanteʼoboʼ, le misioneroʼoboʼ, le betelitaʼoboʼ yéetel uláakʼ máaxoʼob u tsʼaamaj u yóol u meyajtoʼob Dios. Maʼ tuklikeʼex wa minaʼan tiempo tiʼob utiaʼal u máansoʼob yéetel a mejen paalaleʼex. Letiʼobeʼ ku yilik u beetkoʼob jeʼex Jesuseʼ, letiʼeʼ tu kʼamaj yéetel kiʼimak óolal le mejen paalaloʼoboʼ yéetel tsikbalnaj tu yéeteloʼob (Mar. 10:13-16). Le ken u yuʼub a paalaleʼex le baʼax uchaʼan tiʼ le sukuʼunoʼob yéetel le ken u yiloʼob bix kiʼimakil u yóoloʼob ikil u meyajtkoʼob Dioseʼ, maʼ xaaneʼ jeʼel xan u taaktal u beetkoʼob beyoʼ.

¿Baʼax uláakʼ jeʼel u páajtal a beetkeʼex utiaʼal a wáantik a paalaleʼex u maas kʼaj óoltoʼob u kaajal Jéeobaeʼ? Maʼ xaaneʼ jach jeʼel u yáantkeʼex ka xokeʼex ich familiai le libro Los testigos de Jehová, proclamadores del Reino de Dios, áanteʼex u yiloʼob bix úuchik u chúukpajal u yóol u meyajtoʼob Dios le sukuʼunoʼoboʼ yéetel bix úuchik u yeʼeskoʼob kabal óolal bey xan bix úuchik u kʼaʼaytkoʼob le maʼalob péektsiloʼ. Jeʼel xan u páajtal u meyajteʼex le videoʼob utiaʼal a weʼesikeʼextiʼob le baʼaxoʼob tsʼoʼok u beetik yéetel táan u beetik u kaajal Jéeoba teʼ kʼiinoʼobaʼ. Yéetel wa ku páajtaleʼ, maʼalob ka xíimbalteʼex u najil Betel teʼ luʼumil tuʼux kajaʼanexoʼ wa tiʼ uláakʼ luʼumiloʼob. Lelaʼ jeʼel u yáantik a paalaleʼex u yiloʼobeʼ, le palitsil chúukpajaʼan u yóol yéetel yaan u naʼatoʼ letiʼ nuʼuktik u kaajal Jéeoba yéetel ku tsʼáaik le kaʼansaj ku keʼetel yéetel janal jach tu yorai, jeʼex beetaʼabik tumen le yáax cristianoʼoboʼ (Mat. 24:45-47; Hch. 15:22-31).

Áant cada utúul a paalaleʼex jeʼex kʼaʼabéettiʼobeʼ

Ken a kaʼans a paalaleʼexeʼ, kʼaʼajakteʼex bix kaʼansaʼabik le apostoloʼob tumen Jesusoʼ. Utéenjeakeʼ tu yaʼalajtiʼob: «Yaʼab uláakʼ baʼaloʼob yaan utiaʼal in waʼalteʼex, baʼaleʼ  maʼatan u páajtal a naʼatikeʼex beoraaʼ» (Juan 16:12). Jesuseʼ maʼ tu beetaj u náakal u yóoloʼob le táan u kaʼanskoʼoboʼ, jujumpʼíitil úuchik u kaʼanskoʼob utiaʼal u naʼatkoʼob tubeel. Teʼex xaneʼ, ilawileʼex maʼ a náaksikeʼex u yóol a paalaleʼex. Áanteʼexoʼob u kʼaj óoltoʼob jujumpʼíitil u kaajal Jéeoba. Beyoʼ yaan u jatsʼutstal u yilik u kʼaj óoltkoʼob. Jeʼex u bin u nuuktaloʼobeʼ, kʼaʼajseʼextiʼob le baʼax tsʼoʼok u yáax kanikoʼoboʼ yéetel maas tsoleʼextiʼob uláakʼ baʼax kʼaʼabéet u kʼaj óoltikoʼob.

Le múuchʼuliloʼ jach ku yáantkoʼon utiaʼal ka muʼukʼaʼanchajak k-fe. Le oʼolal wa ku táakpajal le táankelem paalaloʼob teʼ meyajoʼob ku beetaʼal ichiloʼ, maʼ kun lúubloʼob tiʼ le baʼaloʼob kʼaastak ku beetik u yóokʼol kaab Satanasoʼ (Rom. 12:2). Wa ka wáantik a paalal u kʼaj óoltoʼob u kaajal Jéeobaeʼ jach yaan u taasik yaʼab utsil tiʼob. K-tsʼíiboltik ka áantaʼak a paalaleʼex tumen Jéeoba utiaʼal ka chúukpajak u yóol u meyajtoʼob yéetel maʼ u náachtaloʼob tiʼ u kaajal.

[U tsolajil le oochel teʼ táan juʼun 28]

Baʼaxoʼob jeʼel u xakʼalxoktaʼal teʼ Adoración ich Familiailoʼ

Teʼ jaatsaʼ ku taasik jujumpʼéel baʼaxoʼob yaan yil yéetel u kaajal Jéeoba jach jeʼel u yáantkeʼexeʼ.

▪ Aʼaleʼextiʼob jaypʼéel jaʼab káajak le múuchʼulil tuʼux ka bineʼexoʼ. Tsikbaltiʼob baʼax kʼiin yéetel bix úuchik u káajal, yéetel aʼaltiʼob baʼax Najiloʼob Reino tsʼoʼok u meyaj tiʼ le múuchʼuliloʼ. Teʼ kʼiin jeʼeloʼ jeʼel u páajtal a invitarkeʼex utúul sukuʼun úuch joʼopʼok u meyaj teʼ múuchʼulil utiaʼal u núukik le kʼáatchiʼob ken u beet a paalaleʼexoʼ.

▪ Tsoleʼextiʼob baʼax u beelal le muchʼtáambaloʼob yéetel le asambleaʼoboʼ bey xan le utsiloʼob jeʼel u kʼamikoʼoboʼ.

▪ Tsoleʼextiʼob baʼax u beelal le u jejeláasil escuelaʼob yaan ichil u kaajal Jéeobaoʼ. Tsikbalteʼex jujumpʼéel baʼaxoʼob ku beetik le sukuʼunoʼob tsʼoʼok u binoʼob xook teʼ escuelaʼobaʼ.

▪ Áanteʼex a mejen paalaleʼex u yiloʼob u kʼaʼabéetil u táakpajloʼob teʼ kʼaʼaytaj cada mesoʼ. Kaʼanseʼextiʼob bix jeʼel u táakpajloʼob tiʼ le bukaʼaj meyaj ku beetik u kaajal Jéeoba ku chíikpajal teʼ Anuario de los testigos de Jehová.

▪ Tʼaaneneʼex tiʼ le jejeláas meyajoʼob jeʼel u páajtal u beetik le táankelmoʼob ichil u kaajal Jéeobaoʼ. Jeʼel u páajtal a wilkeʼex le baʼax ku yaʼalik K-meeyjil tiʼ le Reinooʼ, tiʼ marzo tiʼ 2007, táan juʼun 3 tak 6.

▪ Áanteʼex a mejen paalaleʼex u naʼatoʼob baʼax oʼolal ku beetaʼal wa baʼax meyajiloʼob teʼ múuchʼuliloʼ. Tsoleʼextiʼob baʼaxten maʼ unaj u beetkoʼob chéen baʼax u kʼáatoʼob tak tiʼ baʼaloʼob mejentakiʼ. Eʼeseʼextiʼob wa ku beetkoʼob le baʼax ku yaʼalik le ancianoʼoboʼ yaan u yáantajoʼob utiaʼal ka múuchʼ meyajnak tuláakal.

[U tsolajil le oochel teʼ táan juʼun 28]

Jach jeʼel u yáantik a paalal u biskubaʼob yéetel le sukuʼunoʼob úuch joʼopʼok u meyajtkoʼob Jéeobaoʼ

[U tsolajil le oochel teʼ táan juʼun 26]

Jeʼex tu úuchben kaajil Israeleʼ, ken kʼáataʼak tumen le mejen paalal baʼaloʼob yaan yil yéetel u kaajal Jéeobaeʼ, le taatatsiloʼoboʼ ku yilik u tsoliktiʼob tubeel