Jéeobaeʼ k-nojoch Rey
Jéeobaeʼ k-nojoch Rey
«Yuumtsil le Sen kaʼanaloʼ, sajbeʼentsil. Letiʼ u nojoch [Reyil] tuláakal le luʼumaʼ.» (SAL. 47:2)
1. Maʼ xaaneʼ, ¿tiʼ baʼax ku tʼaan kaʼach Pablo tiʼ 1 Corintios 7:31, NM?
APOSTOL Pabloeʼ tu yaʼaleʼ «le baʼaxoʼob ku yúuchul teʼ yóokʼol kaabaʼ táan u kʼexpajal» (1 Cor. 7:31, NM). Lelaʼ ku yeʼeskeʼ, maʼ xaaneʼ tu ketaj le baʼaxoʼob ku yúuchul teʼ kʼasaʼan yóokʼol kaab yéetel upʼéel drama tuʼux ku chíikpajal máakoʼob utsoʼob yéetel kʼasaʼanoʼob, baʼaleʼ ken éemkoʼobeʼ ku naʼakal uláakʼoʼob.
2, 3. 1) ¿Baʼax kettʼaanil jeʼel u yáantkoʼon k-naʼat le baʼax aʼalaʼab tu contra u gobernación Jéeobaoʼ? 2) ¿Baʼax kʼáatchiʼiloʼob ken núuk teʼ xookaʼ?
2 Teʼ kʼiinoʼob xanaʼ bey táan u yúuchul upʼéel drama, tuʼux ku táakpajal tuláakal máak, lelaʼ yaan yil yéetel le derecho yaan tiʼ Jéeoba utiaʼal u gobernaroʼ. Jeʼel u páajtal u keʼetel yéetel kaʼapʼéel gobierno u pʼekmubaʼobeʼ. Le yáax upʼéeloʼ letiʼe gobierno kanáantik ka beetaʼak tuláakal baʼax maʼaloboʼ, le uláakʼoʼ letiʼe máaxoʼob ku muchʼkubaʼob u beetoʼob loob, ookol wa u kíimsoʼob u maasiloʼ. Letiʼobeʼ ku binoʼob tu contra le autoridadoʼ yéetel ku beetkoʼob u xuʼulul u tsʼáaikuba u maasil tu tséel le gobierno kanáantik ka beetaʼak baʼax maʼaloboʼ.
3 ¿Baʼaxten k-aʼalik bey xan u yúuchul way Luʼumoʼ? Táanileʼ tumen yaan utúul máax jach yaan u derechoi u gobernar, Jéeoba (Sal. 71:5). Tsʼoʼoleʼ u kajnáaliloʼob le Luʼumaʼ táan u beetaʼal u muʼyajoʼob tumen Satanás yéetel le máaxoʼob u tsʼaamubaʼob tu tséeloʼ (1 Juan 5:19). Le máaxoʼob u tsʼáamubaʼob tu tséel Satanasoʼ ku binoʼob tu contra u gobierno Dios yéetel ku túulchʼintkoʼob u maasil utiaʼal ka u luʼsubaʼob tu tséel u gobernación Jéeoba. ¿Bix úuchik u káajal lelaʼ? ¿Baʼaxten ku chaʼik Jéeoba u yúuchul? ¿Baʼax yaan k-il tiʼ le baʼax ku yúuchlaʼ?
Le baʼaxoʼob táakaʼanoʼob ichil le dramaoʼ
4. ¿Baʼax ken u yeʼes le dramaoʼ?
4 Le dramaaʼ yaan u yeʼesik kaʼapʼéel baʼal: le derecho yaan tiʼ Dios utiaʼal u gobernaroʼ yéetel wa jeʼel u chúukpajal u yóol máak meyajtikeʼ. Le Bibliaoʼ ku yaʼalikeʼ Jéeobaeʼ letiʼ u maas nojchil tiʼ tuláakal le Luʼumaʼ. Le oʼolal le salmistaoʼ tu yaʼalaj tiʼ Jéeoba: «Tiʼ teech kin taʼakbesikimba» (Sal. 73:28). Bey túunoʼ, jach yaan baʼax oʼolal k-ilik Jéeoba bey k-nojoch Reyeʼ (Dan. 7:22).
5. ¿Baʼaxten unaj k-eʼesik chéen tiʼ Jéeoba yaan u derechoi u gobernar?
5 Tumen Jéeoba beetmil tuláakal baʼaleʼ, tiʼ letiʼ yaan u derechoi u gobernartik le Luʼumaʼ bey xan u maasil baʼaloʼob (xokaʼak Apocalipsis 4:11). Tsʼoʼoleʼ letiʼeʼ utúul Juez, Legislador yéetel Rey (Isa. 33:22). Tumen letiʼ tsʼaamil k-kuxtaleʼ kʼaʼabéet k-ilik bey k-Reyeʼ, le oʼolal unaj k-eʼesik minaʼan uláakʼ jeʼex letiʼeʼ. Upʼéel baʼax jeʼel u yáantkoʼon k-beeteʼ letiʼe k-kʼaʼajsik le tʼaanoʼobaʼ: «Yuumtsileʼ u tsʼaamaj u jalaʼach kʼáancheʼ teʼ kaʼanoʼ; u [reinoeʼ] ku tʼonkíinaj tu yóokʼol tuláakal» (Sal. 103:19; Hch. 4:24).
6. ¿Baʼax táakaʼan ichil u yeʼesik máak chúukaʼan óolal?
6 Utiaʼal k-eʼesik chéen tiʼ Jéeoba yaan u derechoi u gobernareʼ kʼaʼabéet u chúukpajal k-óol k-meyajte. Baʼaleʼ ¿baʼax táakaʼan ichil u yeʼesik máak chúukaʼan óolal? Jeʼex u yeʼesik le baʼax úuch tiʼ Joboʼ, u kʼáat u yaʼal maʼ u beetik máak baʼax kʼaas yéetel u bisik upʼéel toj kuxtal (Job 1:1).
Le bix káajik le dramaoʼ
7, 8. ¿Bix úuchik u tsʼáaik naʼatbil Satanás maʼ maʼalob bix u gobernar Jéeobaiʼ?
7 Walajki seis mil jaʼabjeakileʼ, utúul angeleʼ tu tsʼáajuba tu contra Jéeoba. Le baʼaxoʼob tu yaʼalaj yéetel tu beetoʼ, tu tsʼáaj naʼatbil maʼ maʼalob bix u gobernar Jéeobaiʼ. Lelaʼ tu beetaj tumen tu tsʼíiboltaj ka adorartaʼak. Le oʼolal tu beetaj u luʼskuba Adán yéetel Eva tu tséel u gobernación Jéeoba. Tsʼoʼoleʼ tu yóotaj u pʼat kʼaasil u kʼaabaʼ Jéeoba úuchik u yaʼalik chéen táan u tuus (xokaʼak Génesis 3:1-5). Le angelaʼ suunaj u nojoch enemigo Dios. Ka máan kʼiineʼ tsʼaʼab u kʼaabaʼint Satanás, Diablo, kaan yéetel dragón, le kʼaabaʼobaʼ ku yeʼeskeʼ letiʼeʼ u tsʼáamuba tu contra Dios, ku tuus yéetel utúul kíimsaj wíinik (Apo. 12:9).
8 Satanaseʼ líikʼ bey utúul gobernante tu contra Dioseʼ. ¿Baʼax túun ken u beet Jéeoba? ¿Yaan wa u xuʼulsik tiʼ paʼteʼ yéetel Adán yéetel Eva? U jaajileʼ yaan u páajtalil tiʼ utiaʼal u xuʼulsik tiʼ le óoxtúul j-maʼ uʼuyajtʼaanoʼobaʼ. Wa ka u beet kaʼacheʼ tsʼoʼok u yeʼesik yaan tuláakal páajtalil tiʼeʼ. Tsʼoʼoleʼ tsʼoʼok xan u yeʼesik kaʼach maʼ chéen táan u tuus le ka tu yaʼalajtiʼob yaan u castigarkoʼob wa maʼ tu beetkoʼob baʼax ku yaʼalikoʼ. Baʼaleʼ ¿baʼaxten maʼ tu beetiʼ?
9. ¿Baʼaxoʼob tu tsʼáaj naʼatbil Satanás?
9 Satanaseʼ tu tusaj Adán yéetel Eva utiaʼal u beetik u náachtaloʼob tiʼ Jéeoba, le Máax beetoʼoboʼ. Beyoʼ tu beetaj u tuklaʼal minaʼan u derechoi tiʼ Dios utiaʼal u kʼáatik ka beetaʼak baʼax ku yaʼalik tumen wíinik. Tsʼoʼoleʼ úuchik u beetik u j-maʼ uʼuyajtʼantaʼal tumen le yáax wíinikoʼoboʼ, tu tsʼáaj naʼatbil mix máak, mix le angeloʼob jeʼel u chúukpajal u yóol u meyajtoʼob Diosoʼ. Tu kʼiiniloʼob Job, utúul máax chúukpaj u yóol u meyajt Dioseʼ, le Diablooʼ tu yaʼalaj jeʼel u beetik u xuʼulul u meyajtaʼal Dios tumen tuláakal wíinikeʼ (Job 2:1-5).
10. ¿Baʼaxten tu chaʼaj Jéeoba u máan yaʼab tiempooʼ?
10 Le úuchik u chaʼik Jéeoba u máan le tiempooʼ, tu tsʼáaj u páajtalil tiʼ Satanás utiaʼal u yeʼesik wa jaaj le baʼax tu yaʼaloʼ. Tsʼoʼoleʼ tu tsʼáaj u páajtalil tiʼ wíinik u yeʼesik chúukaʼan óolal. ¿Baʼax tsʼoʼok u beetik Satanás ichil le jaʼaboʼob tsʼoʼok u máanoʼ? Tsʼoʼok u beetik u yaʼabtal máaxoʼob beetik baʼax kʼaas. Baʼaleʼ Dioseʼ yaan u xuʼulsik tiʼ Satanás bey xan tiʼ le máaxoʼob yanoʼob tu tséeloʼ, beyoʼ yaan u chíikpajal chéen tiʼ letiʼ yaan u derechoi u gobernar. Jéeobaeʼ u yojel jach yaan u béeykuntik le baʼax u tukulmoʼ. Le oʼolal chéen pʼelak úuchik u kʼebantal le yáax wíinikoʼob ka tu yaʼalaj bix ken u beetiloʼ (Gén. 3:15).
11. ¿Bix u tsʼoʼok u yeʼesik yaʼab xiiboʼob yéetel koʼoleloʼob maʼ jaaj le baʼax ku yaʼalik Satanasoʼ?
11 Yaʼab máakoʼobeʼ tsʼoʼok u yeʼesik u fejoʼob yéetel tsʼoʼok u chúukpajal u yóol u meyajtoʼob Jéeoba, beyoʼ ku yeʼeskoʼob ku tsʼáaikubaʼob tu tséel u gobernación yéetel ku nojbeʼenkúuntkoʼob u kʼaabaʼ. Ichil le máakoʼobaʼ tiaʼan Abel, Enoc, Noé, Abraham, Sara, Moisés, Rut, David, Jesús, le yáax cristianoʼoboʼ yéetel u millonesi xiiboʼob yéetel koʼoleloʼob meyajtik yéetel chúukaʼan óolal teʼ kʼiinoʼobaʼ. Letiʼobeʼ tsʼoʼok u yáantajoʼob utiaʼal u yilaʼal chéen táan u tuus Satanás. Le chúukaʼan óolal ku yeʼeskoʼoboʼ, ku yeʼesik maʼ jaaj wa jeʼel u náachkuntik tiʼ Dios tuláakal máakeʼ (Pro. 27:11).
Yaan u luʼsaʼal tuláakal baʼax kʼaas
12. ¿Baʼaxten k-creertik maʼ kun xáantal ken luʼsaʼak le baʼaloʼob kʼaastak tumen Diosoʼ?
12 Maʼ kun xáantaleʼ, Jéeobaeʼ yaan u yeʼesik chéen tiʼ letiʼ yaan u derechoi u gobernar. ¿Baʼaxten k-ojel jach yaan u beetik? Yáaxeʼ tumen maʼ tu béeytal u chaʼik u yantal baʼax kʼaas utiaʼal mantatsʼ. Tsʼoʼoleʼ le baʼaloʼob ku yúuchloʼoboʼ ku yeʼesik kuxaʼanoʼon tu tsʼook kʼiinoʼob. Úuchjeakileʼ tu xuʼulsaj tiʼ le kʼasaʼan máakoʼob teʼ Búulkabaloʼ, tu xuʼulsaj xan tiʼ u kaajil Sodoma yéetel Gomorra bey xan u faraonil Egipto yéetel u soldadoʼob. Tsʼoʼoleʼ tu xuʼulsaj tiʼ Sísara yéetel u soldadoʼob bey xan tiʼ Senaquerib, u emperador le asirioʼoboʼ (Gén. 7:1, 23; 19:24, 25; Éxo. 14:30, 31; Jue. 4:15, 16; 2 Rey. 19:35, 36). Le oʼolal k-ojel Jéeobaeʼ maʼ ken u chaʼa u yaʼalaʼal baʼax kʼaas tiʼ u kʼaabaʼ utiaʼal mantatsʼ mix u beetaʼal u muʼyaj u J-jaajkunajoʼob utiaʼal mantatsʼ. Toʼoneʼ k-ojel maʼ kun xáantal ken u beete, tumen kuxaʼanoʼon tu kʼiiniloʼob way yaan Cristoeʼ yéetel tu tsʼook u kʼiinil le kʼasaʼan yóokʼol kaabaʼ (Mat. 24:3).
13. ¿Baʼax unaj k-beetik utiaʼal maʼ k-xuʼulsaʼal paʼteʼ yéetel le máaxoʼob pʼekmil Jéeobaoʼ?
13 Wa maʼ k-kʼáat ka xuʼulsaʼaktoʼon paʼteʼ yéetel le máaxoʼob pʼekmil Jéeobaoʼ, unaj k-tsʼáaikba tu tséel u gobernación. Baʼaleʼ ¿bix jeʼel u páajtal k-beetkeʼ? Letiʼe k-náachkuntikba tiʼ le máaxoʼob yaan tu tséel Satanasoʼ yéetel maʼ k-chaʼik u sajakkúuntkoʼonoʼob (Isa. 52:11; Juan 17:16; Hch. 5:29). Chéen bey jeʼel k-eʼesik tiaʼanoʼon tu tséel u gobernación Diosoʼ yéetel beyoʼ maʼ ken u xuʼulstoʼon ken u kiliʼichkúunt u kʼaabaʼ yéetel ken u yeʼes chéen tiʼ letiʼ yaan u derechoi u gobernartik tuláakal baʼal.
14. ¿Baʼaxoʼob k-kanik ichil le Bibliaoʼ?
14 Ichil tuláakal le Bibliaoʼ k-ilik bix u tʼaan tiʼ wíinik yéetel tiʼ le derecho yaan tiʼ Jéeoba utiaʼal u gobernaroʼ. Le yáax óoxpʼéel capituloʼoboʼ ku tʼaanoʼob tiʼ bix beetaʼabik tuláakal baʼal yéetel bix yanchajik le kʼebanoʼ, le u tsʼook óoxpʼéeloʼ ku tʼaanoʼob tiʼ bix kun utskíintbil tuláakal baʼal. U maasil capituloʼoboʼ ku yaʼalik baʼaxoʼob tsʼoʼok u beetik Jéeoba utiaʼal u béeykuntik le baʼax u tukultmaj utiaʼal wíinik, utiaʼal le Luʼumaʼ bey xan utiaʼal u maasil baʼaloʼoboʼ. U libroi Genesiseʼ ku yaʼalik bix káajik u yantal baʼax kʼaas way Luʼumeʼ, u libroi Apocalipsiseʼ ku yeʼesik bix kun luʼsbil le baʼaloʼob kʼaastakoʼ, bix kun xuʼulsbil tiʼ le Diablooʼ yéetel bix kun beetbil baʼax u kʼáat Dios way Luʼum, jeʼex u beetaʼal teʼ kaʼanoʼ. Jeʼex túun k-ilkoʼ, le Bibliaoʼ ku yeʼesik baʼaxten yaan le kʼeban yéetel le kíimiloʼ yéetel ku yaʼalik bix kun luʼsbiloʼob teʼ túumben luʼum utiaʼal ka yanak kiʼimak óolal mantatsʼoʼ.
15. ¿Baʼax unaj k-beetik utiaʼal k-kʼamik le utsiloʼob ku yaʼalik le Biblia ku taal u kʼiinoʼ?
15 Maʼ kun xáantaleʼ yaan u kʼexpajal le baʼaloʼob ku beetaʼal way Luʼumaʼ. Bey túunoʼ yaan u yéemsaʼal le telón utiaʼal u tsʼoʼokol le drama úuch káajak yaan yil yéetel le derecho yaan tiʼ Jéeoba utiaʼal u gobernaroʼ. Satanaseʼ yaan u kʼaʼalal, yéetel ken máanak kʼiineʼ yaan u xuʼulsaʼaltiʼ. Bey kun béeytal túun le baʼax u tukulmaj Diosoʼ. Wa k-kʼáat k-il bix ken u beetil bey xan wa k-kʼáat k-il le utsiloʼob ku yaʼalik le Biblia ku taal u kʼiinoʼ, unaj k-tsʼáaikba tu tséel u gobernación Jéeoba. Maʼ tu páajtal k-meyajtik kaʼatúul tsʼuul. Chéen jeʼel u páajtal k-aʼalik «Yuumtsileʼ tin wéetel yaan» wa tiaʼanoʼon tu yiknaleʼ (Sal. 118:6, 7).
Jeʼel u béeytal u chúukpajal k-óol k-meyajt Dioseʼ
16. ¿Bix k-ojéeltik jeʼel u béeytal u chúukpajal k-óol k-meyajt Dioseʼ?
16 Toʼoneʼ jeʼel u páajtal u chúukpajal k-óol k-eʼes chéen tiʼ Jéeoba yaan u derechoi u gobernareʼ, apóstol Pabloeʼ ku yaʼalik: «Le túuntaj óolaloʼob ka mukʼyajtikeʼexoʼ keet yéetel le ku mukʼyajtik tuláakal máakoʼ. Baʼaleʼ teʼexeʼ ku páajtal a alab óoltikeʼex Jajal Dios, tumen letiʼeʼ maʼ bíin [u] pʼat u túuntaʼal a wóoleʼex maas tiʼ le ku páajtal a mukʼyajtikeʼexoʼ. Baʼaleʼ le ken taalak le túuntaj óolaloʼ Jajal Dios túuneʼ bíin u tsʼáa xan bix jeʼel u páajtal a jóokʼoleʼexiʼ, [...] utiaʼal ka páatak a mukʼyajtikeʼex» (1 Cor. 10:13). ¿Baʼax jeʼel u túuntik k-óol, jeʼex úuchik u yaʼalik Pablooʼ, yéetel bix jeʼel u yáantkoʼon Dios utiaʼal k-aktáantikeʼ?
17-19. 1) ¿Tiʼ baʼax túuntaj óolalil lúub le israelitaʼob teʼ desiertooʼ? 2) ¿Baʼaxten k-aʼalik jeʼel u béeytal u chúukpajal k-óol k-meyajt Jéeobaeʼ?
17 Jeʼex u yeʼesik le baʼaxoʼob tu beetaj le israelitaʼob teʼ desierto úuchjeakiloʼ, «le túuntaj óolaloʼob[oʼ]» jeʼel u biskoʼon k-beet baʼax maʼ utstutʼaan Dioseʼ (xokaʼak 1 Corintoiloʼob 10:6-10). Le israelitaʼoboʼ jeʼel kaʼach u páajtal u chúukpajal u yóoloʼob tu táan le túuntaj óolaloʼ, baʼaleʼ maʼ tu beetoʼobiʼ tumen joʼopʼ u «tsʼíiboltik[oʼob] kʼaakʼas baʼaloʼob». Leloʼ bey úuchik le ka tsʼaʼab beechʼ u jaantoʼob ichil u mesoʼ. U jaajileʼ kex úuch u jaantoʼob bakʼeʼ, jach yaan baʼal u jaantoʼob, tumen sáamsamal u tsʼaʼabal maná tiʼob. Baʼaleʼ tumen maʼ tu tsʼáaj u pʼiis u molikoʼob le chʼíichʼoʼoboʼ tu yeʼesoʼob maʼ maʼalob baʼax yaan tu puksiʼikʼaloʼobiʼ (Núm. 11:19, 20, 31-35).
18 Táanil tiʼ u yúuchul lelaʼ, le táan u tsʼaʼabal tiʼ Moisés le Ley tu witsil Sinaíoʼ, le israelitaʼoboʼ joʼopʼ u adorartkoʼob utúul chan wakax yéetel joʼopʼ u yóokʼotoʼob tu baʼpach. Letiʼobeʼ jach séeb lúubikoʼob tiʼ le túuntaj óolaloʼ, tumen minaʼan tu yiknaloʼob le máax nuʼuktikoʼob kaʼachoʼ (Éxo. 32:1, 6). Ka máan kʼiineʼ, le taʼaytak u yookloʼob teʼ Luʼum Aʼalaʼan u Tsʼaʼabloʼ, u milesi xiiboʼobeʼ tu chaʼaj u táabsaʼaloʼob tumen u koʼoleliloʼob Moab, ka tu núupkʼebankúuntubaʼob tu yéeteloʼob, le oʼolal xuʼulsaʼabtiʼob (Núm. 25:1, 9). Tsʼoʼoleʼ le kaajoʼ yaʼab utéenel tʼaanaj tu contra Jéeoba. Jeʼex le ka tʼaanajoʼob tu contra Moiseseʼ, u jaajileʼ tu contra Jéeoba tʼaanajoʼob (Núm. 21:5). Joʼopʼ tak u yaʼalikoʼob maʼ maʼalob úuchik u xuʼulsaʼal tiʼ Coré, Datán, Abiram yéetel uláakʼ máaxoʼob tu tsʼáajubaʼob tu contra Jéeobaoʼ. Yoʼolal le baʼax tu beetoʼoboʼ, Jéeobaeʼ tu xuʼulsaj tiʼ 14,700 israelitaʼob (Núm. 16:41, 49).
19 Le israelitaʼoboʼ jeʼel u páajtal u kanáantkoʼob kaʼach maʼ u lúubloʼob tiʼ le túuntaj óolaloʼ. Baʼaleʼ lúuboʼob, tumen pʼáat minaʼan u fejoʼob tiʼ Jéeoba yéetel tuʼubtiʼob le bix úuchik u kanáantaʼaloʼoboʼ bey xan le baʼax ku yaʼalik Jéeoba unaj u beetkoʼoboʼ. Tsʼoʼoleʼ tuláakal le túuntaj óoloʼob tu aktáantoʼoboʼ, letiʼe baʼaloʼob suuk u yilaʼal tumen wíinikoʼ. Le oʼolal wa k-kʼáatik u yáantaj Jéeoba utiaʼal maʼ k-lúubul tiʼ le baʼaloʼob beyaʼ, yaan u béeytal u chúukpajal k-óol k-meyajte. Lelaʼ k-ojel jach jeʼel u béeytaleʼ, tumen Dioseʼ maʼ ken u chaʼa «u túuntaʼal [k-óol] maas tiʼ le ku páajtal» k-muʼyajtikoʼ. Letiʼeʼ maʼ ken u pʼatoʼon mix bikʼin yéetel maʼ ken u chaʼa u túuntaʼal k-óol yéetel upʼéel baʼal u yojel maʼ tu béeytal k-muʼyajtik (Sal. 94:14).
20, 21. ¿Bix u yáantkoʼon Dios utiaʼal k-jóokʼol tiʼ le túuntaj óolaloʼ?
20 ¿Bix u tsʼáaik Jéeoba «u páajtalil k-jóokʼol» tiʼ upʼéel túuntaj óol? Ku tsʼáaiktoʼon u muukʼil utiaʼal maʼ lúubliʼ. Tuukulnakoʼon tiʼ le chʼaʼapachtajiloʼ. Maʼ xaaneʼ le máaxoʼob pʼekmiloʼonoʼ jeʼel u beetkoʼob k-muʼyaj utiaʼal ka xuʼuluk k-meyajtik Dioseʼ. Ken joʼopʼok k-muʼyajeʼ, maʼ xaaneʼ jeʼel k-xulik k-meyajtik Dios utiaʼal maʼ u seguer u beetaʼaltoʼon loob wa utiaʼal maʼ k-kíimsaʼaleʼ. Baʼaleʼ jeʼex u yaʼalik Pablo tiʼ 1 Corintoiloʼob 10:13, k-ojel le túuntaj óolaloʼ maʼ kun xáantal utiaʼal mantatsʼ. Jéeobaeʼ maʼ ken u chaʼa u túuntaʼal k-óol yéetel baʼaloʼob u yojel jeʼel u beetik u xuʼulul k-meyajtikeʼ. Letiʼeʼ jeʼel u muʼukʼaʼankúuntik k-fe utiaʼal ka béeyak u chúukpajal k-óol k-meyajteʼ.
21 Jéeobaeʼ ku tsʼáaiktoʼon u kiliʼich muukʼ. Le kiliʼich muukʼ túunoʼ ku yáantkoʼon k-kʼaʼajs le baʼax ku yaʼalik le Biblia utiaʼal k-aktáantik le túuntaj óolaloʼ (Juan 14:26). Beyoʼ maʼ ken k-chaʼa k-tuʼusul utiaʼal k-beetik baʼax maʼ maʼalobiʼ. Jeʼex tsʼoʼok k-ilkoʼ, Satanaseʼ u yaʼalmaj minaʼan tiʼ Jéeoba u derechoi u gobernar yéetel mix máak jeʼel u chúukpajal u yóol u meyajteʼ. Yaʼab sukuʼunoʼobeʼ tsʼoʼok u chúukpajal u yóol u meyajtoʼob Dios tak tu kíimbaloʼob, tumen u yojeloʼob lelaʼ bey xan tu yoʼolal le áantaj tu kʼamoʼob tiʼoʼ. ¿Bix túun páajchajik u jóokʼloʼob tiʼ le túuntaj óolaloʼ? Maʼ letiʼe úuchik u kíimloʼoboʼ. Baʼaxeʼ Jéeoba áantoʼob utiaʼal maʼ u lúubloʼob tiʼ kʼeban tak ka kíimoʼob. Bejlaʼeʼ bey xan u yáantkoʼonoʼ. Letiʼeʼ ku túuxtik u angeloʼob «utiaʼal u yáantoʼob le máaxoʼob bíin u kʼamoʼob le [salvacionoʼ]» (Heb. 1:14). Jeʼex ken k-il teʼ tuláakʼ xookoʼ, yantoʼon u jatsʼuts páajtalil k-eʼesik mantatsʼ chéen tiʼ Jéeoba yaan u derechoi u gobernar. Baʼaleʼ chéen jeʼel u béeytal k-beetik wa ku chúukpajal k-óol k-meyajteʼ yéetel wa k-ilik Jéeoba bey k-nojoch Reyeʼ.
¿Baʼax jeʼel k-núukikeʼ?
• ¿Baʼaxten unaj k-ilik Jéeoba bey k-nojoch Reyeʼ?
• ¿Baʼax táakaʼan ichil u yeʼesik máak chúukaʼan óolal?
• ¿Bix k-ojéeltik maʼ kun xáantal ken u yeʼes Jéeoba chéen tiʼ letiʼ yaan u derechoi u gobernar?
• ¿Bix u yeʼesik 1 Corintoiloʼob 10:13 jeʼel u páajtal u chúukpajal k-óol k-meyajt Dioseʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 24]
Satanaseʼ tu beetaj u xuʼulul u meyajtaʼal Jéeoba tumen Adán yéetel Eva
[U tsolajil le oochel teʼ táan juʼun 26]
Unaj k-chʼaʼatuklik k-eʼesik chéen tiʼ Jéeoba yaan u derechoi u gobernar