Kʼáatchiʼob ku beetaʼal

Tumen kʼebanoʼoneʼ, ¿bix jeʼel k-beetik le baʼax tu yaʼalaj Jesusaʼ: «Chúukaʼanchajak a wutsileʼex jeʼel bix a Taataʼex yaan teʼ kaʼanoʼ chúukaʼan u yutsil»? (Mat. 5:48).

Utiaʼal k-núukik le kʼáatchiʼaʼ, kʼaʼabéet k-naʼatik baʼax u kʼáat u yaʼal le tʼaan «chúukaʼan utsil» yéetel «x-maʼ kʼebaniloʼ». Maʼ tuláakal le baʼax uts ku yaʼalik le Biblia jach «chúukaʼan u yutsiloʼ». Tumen chéen Jéeoba chúukaʼan u yutsil. Baʼaleʼ wíinik yéetel u maasil baʼaloʼobeʼ chéen jeʼel u páajtal u yaʼalaʼal utsoʼobeʼ. Le tʼaan hebreo yéetel griego ku suʼutul «chúukaʼan utsiloʼ» ku meyaj utiaʼal u yaʼalaʼal chúukaʼan upʼéel baʼal, utiaʼal u yaʼalaʼal kʼan upʼéel wa baʼax bey xan utiaʼal u yaʼalaʼal minaʼan mix upʼéel baʼal kʼaas tiʼ.

Tu káajbaleʼ Adán yéetel Evaeʼ, jach uts baʼax ku tuklikoʼob, uts bix u meyajtikoʼob Dios yéetel uts yanik u wíinkliloʼob, tumen ku páajtal u beetkoʼob tuláakal baʼax ku yaʼalik Dios. Baʼaleʼ úuchik u beetkoʼob baʼax maʼ utstutʼaan Dioseʼ, pʼáat maʼ uts yanikoʼob tu táaniʼ, le oʼolal kʼebanchajoʼob, lelaʼ tu beetaj u pʼáatal maʼ uts yanil xan u paalaloʼob tu táan Diosiʼ. Bey úuchik u máansik toʼon Adán le kʼeban yéetel le kíimiloʼ, tumen pʼáat maʼ uts yanikoʼon tu táan Diosiʼ (Rom. 5:12).

Baʼaleʼ ka kaʼansajnaj teʼ puʼukoʼ, Jesuseʼ tu yaʼalaj le máaxoʼob kʼebanoʼoboʼ jeʼel u páajtal u yeʼesik u yutsiloʼobeʼ. Tʼaanaj tiʼ bix upʼéel yaabilaj chúukaʼan, jeʼex le ku yeʼesik Dios tiʼ wíinikoʼ. Letiʼeʼ tu yaʼalaj: «Yaabilt [le máaxoʼob pʼekmileʼexoʼ], payalchiʼineneʼex tu yoʼolal le máaxoʼob pochʼikeʼexoʼ yéetel ku chʼaʼapachtikeʼexoʼ. Beyoʼ teʼexeʼ bíin paalaltaʼakeʼex tumen a Taataʼex yaan teʼ kaʼanoʼ, tumen letiʼ beetik u jóokʼol kʼiin tu yóokʼol kʼaakʼas máakoʼob yéetel tu yóokʼol utsil máakoʼob; ku túuxtik cháak tu yóokʼol máaxoʼob toj u kuxtaloʼob yéetel tu yóokʼol máaxoʼob maʼ toj u kuxtaloʼobiʼ» (Mat. 5:44, 45). Le máaxoʼob tsaypachtik Jesusoʼ, ku beetkoʼob jeʼex Dios ken u yeʼesoʼob le yaabilaj beyaʼ.

U j-jaajkunajoʼob Jéeoba teʼ kʼiinoʼobaʼ ku yeʼesikoʼob yaabilaj tiʼ tuláakal máak. Le oʼolal k-ilik k-áantkoʼob utiaʼal u kʼaj óoltkoʼob u jaajil, kex jeʼel tuʼuxak u taaloʼob yéetel kex yaanal u religionoʼobeʼ. Le beetik k-tsʼáaik maas tiʼ siete millones xookoʼob yéetel le Biblia ich 236 luʼumiloʼoboʼ.

Jesuseʼ tu yaʼalaj: «Wa teʼex ka yaabiltikeʼex chéen le máaxoʼob yaabiltikeʼexoʼ, ¿baʼax boʼolil bíin a kʼameʼex tu yoʼolal leloʼ? Tak le j-kʼam [impuestoʼoboʼ] bey u beetikoʼoboʼ. Wa ka tsikikeʼex xan chéen a sukuʼuneʼexeʼ, ¿baʼax maʼalobil ka beetikeʼex? Tak le máaxoʼob [maʼatech u meyajtikoʼob Dios] ku beetikoʼob beyoʼ» (Mat. 5:46, 47). Le máaxoʼob meyajtik Diosoʼ maʼatech u yeʼesik u yutsiloʼob chéen tiʼ le máaxoʼob kaʼanchajaʼan u xookoʼob wa yoʼolal tuʼux u taaloʼoboʼ. Mix tech xan u yeʼesik u yaabilajoʼob chéen tiʼ máaxoʼob yaabiltkoʼob. Ken u beetoʼob beyoʼ ku yeʼesik u yaabilajoʼob yéetel u yutsiloʼob jeʼex Jéeobaeʼ.

¿Yaan wa u kʼuchul u kʼiinil u pʼáatal máak jeʼex Adán táanil tiʼ u kʼebantal kaʼacheʼ? Yaan. Tuláakal le máaxoʼob beetik baʼax ku yaʼalik Dios yéetel ku tsʼáaik u fejoʼob tiʼ u kuxtal Jesús tu kʼuboʼ, yaan u chúukaʼanchajal u yutsiloʼob ichil le Mil Jaʼaboʼob kun reinar Cristooʼ, tumen letiʼeʼ yaan u «mixbaʼalkunt[ik] le baʼax u beetmaj Kʼaasilbaʼaloʼ» (1 Juan 3:8).