Le maʼalob baʼaloʼob u beetmajoʼ pʼáat tu yéetel

THEODORE JARACZ, ku meyaj kaʼach ichil le Cuerpo Gobernante tiʼ u J-jaajkunajoʼob Jéeobaoʼ, kíim tu jaʼatskabil miércoles 9 tiʼ junio tiʼ 2010, letiʼeʼ 84 jaʼaboʼob kuxlaji. Melita, u yatneʼ láayliʼ kuxaʼaneʼ, letiʼobeʼ cincuentaitres jaʼaboʼob tu múul máansaj u kuxtaloʼob, yéetel kuxaʼan utúul u kiik, utúul u sobrino bey xan kaʼatúul u sobrinaʼob.

Le sukuʼunoʼ síij tu kʼiinil 28 tiʼ septiembre tiʼ 1925, tu kaajil Pike County (Kentucky, Estados Unidos). Tu kʼiinil 10 tiʼ agosto tiʼ 1941, le yaan 15 jaʼaboʼob tiʼoʼ, okjaʼanaj utiaʼal u kʼubik u kuxtal tiʼ Jéeoba. Letiʼeʼ 17 jaʼaboʼob yantiʼ ka káaj u beetik u precursor regulari, óoliʼ sesentaisiete jaʼaboʼob tu beetaj le meyajaʼ.

Tu jaʼabil 1946, ka tu tsʼáaj 20 jaʼaboʼob tiʼeʼ, bin tu siete xookil le Escuela Bíblica tiʼ Galaad tiʼ le Watchtoweroʼ. Ka tsʼoʼok le xookaʼ, túuxtaʼab bey superintendente viajantei tu luʼumil Cleveland (Ohio, Estados Unidos). Tu jaʼabil 1951, invitartaʼab utiaʼal ka xiʼik meyaj tu najil Betel yaan tu luʼumil Australia. Le Anuario de los testigos de Jehová para 1983, ku yaʼalikeʼ «jach tu líiʼsaj u yóol le sukuʼunoʼob yanoʼob Australiaoʼ, tumen tu beetaj le baʼax ku yaʼalik u kaajal Jéeobaoʼ yéetel jach maʼalob bix úuchik u nuʼuktik le kʼaʼaytajoʼ».

Ka suunaj Estados Unidoseʼ, tsʼoʼok u beel yéetel Melita Lasko tu kʼiinil 10 tiʼ diciembre tiʼ 1956. Ka tsʼoʼokeʼ tu beetaj u superintendentei tiʼ circuito yéetel distrito teʼ luʼumiloʼ. Tu jóokʼbal u jaʼabil 1974, invitartaʼab meyaj ichil le Cuerpo Gobernanteoʼ.

Le sukuʼun Jaraczoʼ maʼ kun tuʼubsbil yoʼolal le bix úuchik u tsʼáaik u yóol u meyajt Jéeobaoʼ. Letiʼeʼ jach tu yaabiltaj u yatan yéetel tu tsʼáaj táanil u meyajtik Jéeoba bey xan u yáantik u maasil (1 Cor. 13:4, 5). Letiʼeʼ tu yilaj ka tratartaʼak maʼalob tuláakal yéetel ka eʼesaʼak utsil tiʼob. Le yaabilaj tu yuʼubaj yoʼolal u maasiloʼ le péeks u maas tsʼáa u yóol teʼ kʼaʼaytajoʼ.

Kex yaaj t-óol kíimik utúul máax jach meeyjil yéetel yaabiltaʼan tu najil Betel bey xan tumen u maasil sukuʼunoʼobeʼ, ku kiʼimaktal k-óol úuchik u chúukpajal u yóol u meyajt Dios tuláakal u kʼiinil u kuxtal. K-ojel letiʼeʼ chúukpaj u yóol «tak tu kʼiinil [u] kíimil» yéetel tsʼoʼok u kʼamik «u [coronai] kuxtal» (Apo. 2:10). Yéetel k-ojel xaneʼ «le maʼalob baʼaloʼob [tu beetoʼ] ku pʼáatal tu yéetel» (Apo. 14:13).