Táankelem paal, ¿baʼax ken a beet yéetel a kuxtal?

«Mix táan in baʼateʼel utiaʼal in jatsʼik iikʼiʼ.» (1 COR. 9:26)

1, 2. ¿Baʼax unaj a beetik utiaʼal ka xiʼiktech utsil?

WA TÁAN a tuklik a bin xíimbal tiʼ upʼéel tuʼux maʼ a kʼaj óoleʼ, maʼ xaaneʼ ka tuklik a bisik upʼéel mapa yéetel upʼéel brújula utiaʼal a wojéeltik tuʼux yanech yéetel utiaʼal a wilik tuʼux kan bin utiaʼal a kʼuchliʼ. Baʼaleʼ wa maʼ a wojel tuʼux ka bineʼ maʼ ken u yáantech le mapaoʼ mix le brujulaoʼ. Utiaʼal maʼ a bin chéen minaʼan u nuʼukeʼ, kʼaʼabéet a wojel tuʼux taak a bin.

² Bejlaʼa táan a táankelemtal wa x-lóoʼbayantaleʼ yaan u kʼaʼabéettal a chʼaʼatuklik baʼax ken a beete. Jeʼex t-aʼalaj tu káajbaleʼ, yantech upʼéel jach maʼalob mapa. ¿Máakalmáak? Letiʼe Bibliaoʼ, lelaʼ jach jeʼel u yáantkech a yéey le baʼax maas jeʼel u taasiktech utsiloʼ (Pro. 3:5, 6). Tsʼoʼoleʼ yantech xan upʼéel jach maʼalob brújula: a conciencia. Wa a kaʼansmaj maʼalobeʼ, yaan u yáantkech utiaʼal a pʼáatal teʼ maʼalob bejoʼ (Rom. 2:15). Baʼaleʼ wa a kʼáat ka xiʼiktech utsileʼ, unaj a kanik a chʼaʼatukult baʼax ken a beete.

3. Jeʼex u yaʼalik Pablo tiʼ 1 Corintoiloʼob 9:26, ¿baʼax jeʼel u yáantkoʼon utiaʼal k-chʼaʼatuklik baʼaxoʼob ken k-beete?

³ Le apóstol Pablooʼ tu yaʼalaj bix u yáantaj le u chʼaʼatuklik máak baʼax ken u beet ichil u kuxtaloʼ bey xan u tsʼáaik u yóol u beete, letiʼeʼ tu yaʼalaj: «Teneʼ maʼ táan in wáalkab ich éekʼjochʼeʼeniliʼ, mix táan in baʼateʼel utiaʼal in jatsʼik iikʼiʼ» (1 Cor. 9:26). Wa ka chʼaʼatuklik baʼax ken a beet yéetel a kuxtaleʼ, leloʼ yaan u yáantkech utiaʼal maʼ beetik mix baʼal chéen kunel wa utiaʼal maʼ a wáalkab «ich éekʼjochʼeʼenil». Maʼ kun xáantaleʼ yaan u kʼaʼabéettal a chʼaʼatuklik baʼax ken a beet tiʼ baʼaloʼob yaan yil yéetel a maas meyajtik Dios, baʼax meyajil ken a beete, máax yéetel kun tsʼoʼokol a beel bey xan wa yaan u yantal a paalal. Maʼ xaaneʼ yaan kʼiineʼ maʼ ta kaxtik baʼax jeʼel a beetkeʼ. Baʼaleʼ wa ka chʼaʼatuklik tubeel baʼax ken a beet yéetel wa ka nuʼuktikaba yéetel baʼax ku yaʼalik le Bibliaoʼ, maʼ ken a beet upʼéel baʼax maʼ maʼalobiʼ (2 Tim. 4:4, 5).

4, 5. 1) ¿Baʼax jeʼel u yúuchul wa maʼ ta chʼaʼatuklik baʼax ken a beeteʼ? 2) Táanil tiʼ a chʼaʼatuklik a beetik wa baʼaxeʼ, ¿baʼaxten unaj a tuklik wa utstutʼaan Jéeoba?

⁴ Wa maʼ ta chʼaʼatuklik baʼax ken a beeteʼ, a wéet xookoʼob yéetel a profesoroʼobeʼ yaan u beetkoʼob ta woʼolal, jeʼex ken u tukloʼob maas jeʼel u taasiktech utsileʼ. Baʼaleʼ kex a chʼaʼatukultmaj baʼax ken a beeteʼ, láayliʼ yaan máaxoʼob kun aʼaliktech baʼax unaj a beetkeʼ. Ken a wuʼuy baʼax ku yaʼalikoʼobeʼ, maʼalob ka tukulte: «Le baʼax ku yaʼalikoʼobaʼ, ¿jeʼel wa u yáantken in kʼaʼajs le Máax beetmilenoʼ, wa jeʼel u beetik u xuʼulul in meyajtikeʼ?» (xokaʼak Eclesiastés 12:1).

⁵ Táanil tiʼ a chʼaʼatuklik baʼax ken a beeteʼ, maʼalob ka tukult wa utstutʼaan Jéeoba. ¿Baʼaxten? Tumen letiʼ tsʼaamil tuláakal baʼax yantech (Sant. 1:17). U jaajileʼ, tuláakal máak u pʼaxmuba tiʼ (Apo. 4:11). Upʼéel bix jeʼel k-tsʼáaik nib óolal tiʼeʼ, letiʼe ken k-chʼaʼa en cuentai baʼax utstutʼaan ken k-tukult baʼax ken k-beetoʼ. Le oʼolal teʼ xookaʼ yaan k-ilik baʼax maʼalob ka u beet máak ichil u kuxtal yéetel bix jeʼel u béeykuntikeʼ.

 ¿Baʼaxoʼob maʼalobtak jeʼel u páajtal a chʼaʼatuklik a beetkeʼ?

6. ¿Baʼax maʼalob ka chʼaʼatukult a beetik, yéetel baʼaxten?

⁶ Jeʼex t-ilaj teʼ xook máanikoʼ, upʼéel baʼax maʼalob ka chʼaʼatukult a beetkeʼ letiʼe ka wil baʼaxten jach jaaj le baʼax ku kaʼansik le Bibliaoʼ (Rom. 12:2; 2 Cor. 13:5). A wéet paaliloʼobeʼ maʼ xaaneʼ ku creertikoʼob le evolución wa uláakʼ baʼaxoʼob ku kaʼansik le religionoʼob maʼ jaajtakoʼ, chéen tumen le kaʼansaʼantiʼob. Baʼaleʼ techeʼ maʼ bey unaj a beetkiʼ. Kʼaʼajaktecheʼ Jéeoba, a Taata yaan teʼ kaʼanoʼ, u kʼáat ka meyajt yéetel tuláakal a naʼat (xokaʼak Mateo 22:36, 37). Letiʼeʼ u kʼáat ka yanaktech fe, baʼaleʼ upʼéel fe tiʼ baʼaxoʼob a wojel jach jaaj (Heb. 11:1).

7, 8. 1) ¿Baʼaxoʼob jeʼel u páajtal a chʼaʼatuklik a séeb beetik utiaʼal a muʼukʼaʼankúuntik a fejeʼ? 2) ¿Baʼax utsiloʼob jeʼel a kʼamik wa ka beetkeʼ?

⁷ Wa a kʼáat ka muʼukʼaʼanchajak a fejeʼ, unaj a chʼaʼatuklik a beetik baʼaloʼob maʼ náachkʼin jeʼel a béeykuntikeʼ. Upʼéel baʼax maʼalob ka beeteʼ letiʼe ka payalchiʼinakech sáamsamaloʼ. Le baʼax jeʼel u yáantkech utiaʼal ka payalchiʼinakech tiʼ Jéeobaoʼ letiʼe ka tukult wa ka tsʼíibt le baʼaxoʼob úuchtech teʼ kʼiinoʼ. Baʼaleʼ maʼ chéen le baʼaxoʼob talamtak ka aktáantik unaj a waʼalik tiʼoʼ, baʼaxeʼ unaj a waʼalik tiʼ baʼaxoʼob beetik u kiʼimaktal a wóol (Fili. 4:6). Uláakʼ baʼax maʼalob ka beeteʼ letiʼe ka xok sáamsamal le Bibliaoʼ. Wa ka xokik tak kampʼéel táan juʼun sáamsamaleʼ, jeʼel u béeytal a láaj xokik ichil u jaʼabeʼ. * Salmo 1:1 yéetel 2 ku yaʼalik: «Kiʼ u yóol le máak [...] u yaabilajeʼ tiʼ u tsʼaamaj tiʼ u yaʼalmajtʼaan Yuumtsileʼ, ku tsʼáaik [tu] tuukul bulkʼiin, yéetel bul áakʼab».

⁸ U yóoxpʼéel baʼax maʼalob ka chʼaʼatukult a séeb káajsik a beetkeʼ, letiʼe a líiʼskaba utiaʼal a núukik upʼéel kʼáatchiʼ tiʼ cada upʼéel muchʼtáambaloʼ. Maʼ xaaneʼ ken káajkeʼ jeʼel u páajtal a xokik upʼéel tekstoeʼ, wa u chan xóotʼ tiʼ le  baʼax ku yaʼalik le xóotʼoloʼ. Baʼaleʼ ken máanak kʼiineʼ jeʼel u páajtal a tsolik baʼax ta naʼateʼ. Maʼ u tuʼubultecheʼ, cada ken a núuk upʼéel kʼáatchiʼeʼ táan a tsʼáaik nojbeʼenil tiʼ Jéeoba (Heb. 13:15). Ken a beet jujumpʼéel tiʼ le baʼaxoʼob tsʼoʼok k-aʼalikaʼ, yaan a wuʼuyik jeʼel u páajtal a beetik uláakʼ baʼaloʼobeʼ, yaan a maas tsʼáaik nib óolal tiʼ Jéeoba yéetel yaan u béeytal a chukpachtik uláakʼ baʼaloʼob a tukultmaj utiaʼal náachkʼin.

9. Wa maʼ káajak a jóokʼol kʼaʼaytajeʼ, ¿baʼax maʼalob ka chʼaʼatukult a beetik?

⁹ ¿Baʼax uláakʼ jeʼel u páajtal a chʼaʼatukultik a beetkeʼ? Wa maʼ káajak a jóokʼol kʼaʼaytajeʼ, maʼalob ka chʼaʼatukult a beetik. Ken káajak a beetkeʼ, maʼalob ka wil maʼ u máan mix upʼéel mes maʼ a jóokʼol kʼaʼaytaj. Tsʼoʼoleʼ unaj a wilik a maas maʼalobkíintik bix a kʼaʼaytaj yéetel u meyajtech tubeel le Bibliaoʼ, leloʼ jeʼel u yáantkech utiaʼal ka kiʼimakchajak a wóol ikil a táakpajleʼ. Maʼalob xan ka wil a maas táakpajal teʼ kʼaʼaytaj joonaj joonailoʼ bey xan ka tsʼáa xook tiʼ wa máax yéetel le Bibliaoʼ. Ken káajak a jóokʼol kʼaʼaytajeʼ, jeʼel u páajtal a chʼaʼatuklik a kʼubik a kuxtal tiʼ Jéeoba yéetel a beetik le baʼaxoʼob ku kʼáataʼal utiaʼal ka okjaʼanakechoʼ.

10, 11. ¿Baʼax unaj u chʼaʼatuklik u beetik le táankelem paalaloʼob tsʼoʼok u yokjaʼoboʼ?

¹⁰ Baʼaleʼ wa tsʼoʼok a wokjaʼeʼ, jeʼel u páajtal a chʼaʼatuklik a maas meyajtik Jéeobaeʼ. Maʼ xaaneʼ jeʼel u páajtal a bin áantaj wa baʼax kʼiin tiʼ upʼéel múuchʼulil kʼaʼabéet j-kʼaʼaytajoʼobeʼ. Jeʼel xan u páajtal a beetik a precursor auxiliari wa regulari beora yantech u muukʼil yéetel maʼ kʼojaʼanechaʼ. U milesi sukuʼunoʼobeʼ táan u beetik u precursoriloʼob. Letiʼobeʼ jeʼel u yaʼalikoʼobtech le utsiloʼob ku taasik tiʼ máak u beetik le meyajaʼ yéetel leloʼ upʼéel bix jeʼel a kʼaʼajsik ta táankelmil le Máax beetmilechoʼ. Tuláakal lelaʼ jeʼel u páajtal a beetik bejlaʼa tiʼ kajaʼanech yiknal a taataʼobeʼ. Wa ka beetkeʼ jach yaan a wáantaj teʼ múuchʼuliloʼ.

¹¹ Baʼaleʼ jeʼel xan u páajtal a chʼaʼatuklik a bin áantaj tuláakʼ múuchʼulileʼ. Maʼ xaaneʼ jeʼel a chʼaʼatuklik a bin áantaj tuʼux kʼaʼabéet teʼ luʼumil tuʼux kajaʼanechoʼ wa táanxelil. Jeʼel xan u páajtal a chʼaʼatuklik a bin meyaj utiaʼal u líiʼsaʼal u Najiloʼob Reino wa u najiloʼob Betel táanxel luʼumileʼ. Wa maʼ xaaneʼ jeʼel a chʼaʼatuklik a bin meyaj Betel wa a beetik a misioneroileʼ. Baʼaleʼ jeʼex tsʼoʼok k-ilkoʼ, táanileʼ kʼaʼabéet a wokjaʼ. Wa maʼ okjaʼanakecheʼ maʼalob ka tuukulnakech tiʼ le baʼaxoʼob jeʼel u páajtal u beetik le máaxoʼob okjaʼanajaʼanoʼoboʼ.

Chʼaʼatukult a wokjaʼ

12. ¿Baʼax oʼolal ku yokjaʼ jujuntúul táankelem paalaloʼob, yéetel baʼaxten maʼ maʼalob ka beetaʼak beyoʼ?

¹² A tuklikeʼ, ¿baʼaxten unaj u yokjaʼ máak? Yaan táankelem paalaloʼobeʼ ku tuklikoʼobeʼ, beyoʼ maas maʼ kun jáan lúubloʼob tiʼ kʼeban, yanoʼob xaneʼ chéen ku beetkoʼob tumen tsʼoʼok u yokjaʼ u amigoʼob wa chéen utiaʼal u kiʼimakkúuntik u yóol u taataʼob. Baʼaleʼ le okjaʼoʼ maʼ ken u yáantech utiaʼal maʼ a beetik baʼax kʼaas wa letiʼe baʼax ka tsʼíiboltikoʼ. Maʼ unaj xan a wokjaʼ chéen tumen táan u sen aʼalaʼaltech tumen u maasil ka beetiʼ. Baʼaxeʼ unaj a beetik le ken a naʼat baʼax táakaʼan ichil a beetkaba j-jaajkunajil tiʼ Jéeoba yéetel ken a wuʼuy jeʼel u páajtal a beetik baʼax ku yaʼalikeʼ (Ecl. 5:4, 5).

13. ¿Baʼaxten unaj a wokjaʼ?

¹³ Upʼéel baʼax oʼolal unaj u yokjaʼ máakeʼ, tumen Jesuseʼ tu yaʼalaj tiʼ u disipuloʼob: «Beeteʼexoʼob j-kaambaloʼob; yéetel tsʼaʼex u yokjaʼob». Tak letiʼeʼ okjaʼanaj utiaʼal u yeʼesik bey unaj k-beetkoʼ (xokaʼak Mateo 28:19, 20 yéetel Marcos 1:9). Uláakʼ baʼax oʼolal unaj k-beetkeʼ tumen upʼéel baʼax kʼaʼabéet utiaʼal k-salvartikba. Le ka tsʼoʼok u yaʼalik Pedro beetaʼab upʼéel arca tumen Noé utiaʼal u salvarkuba yéetel u láakʼtsiloʼob ka taal le Búulkabaloʼ, tu yaʼalaj: «Le jaʼoʼ ku keʼetel yéetel u jaʼil le okjaʼoʼ, tu yoʼolal baʼax [k-salvartaʼal] bejlaʼeʼ [...] yéetel u kaʼapúut kuxtal Jesucristo» (1 Ped. 3:20, 21). Baʼaleʼ maʼ unaj a wilik le okjaʼ bey upʼéel baʼax kun kanáantkech utiaʼal maʼ u yúuchultech loobiʼ, baʼaxeʼ unaj a beetik tumen a yaabiltma Jéeoba yéetel tuláakal  a puksiʼikʼal, tuláakal a kuxtal, tuláakal a tuukul yéetel tuláakal a muukʼ (Mar. 12:29, 30).

14. ¿Baʼaxten yaan táankelem paalaloʼobeʼ maʼ taak u yokjaʼobiʼ, baʼaleʼ baʼax maʼ unaj u tuʼubultiʼobiʼ?

¹⁴ Yaan máaxeʼ maʼ tu yokjaʼ tumen sajak u jóoʼsaʼal ichil u kaajal Jéeoba wa ka u beet baʼax kʼaas. ¿Bey wa a tuukul xanoʼ? U jaajileʼ maʼ kʼaas ka tuukulnakech beyoʼ. Maʼ xaaneʼ leloʼ ku yeʼesik ka naʼatik baʼax táakaʼan ichil u beetkuba máak j-jaajkunajil tiʼ Jéeoba. Baʼaleʼ ¿yaan wa uláakʼ baʼax oʼolal ka tuukul beyoʼ? Maʼ xaaneʼ maʼ a jach naʼat baʼaxten maas maʼalob u meyajtaʼal Diosiʼ. Wa bey u yúuchultechoʼ, jeʼel u yáantkech ka wil bix u bin tiʼ le máaxoʼob maʼatech u beetkoʼob baʼax ku yaʼalik le Bibliaoʼ. Maʼ xaaneʼ táan a beetik baʼax ku yaʼalik Dios, baʼaleʼ saajkech a beetik baʼax maʼ utstutʼaaniʼ. U jaajileʼ maʼ kʼaas ka a wuʼuyaba beyoʼ, tumen ku yeʼesik yantech kabal óolal. Le Bibliaoʼ ku yaʼalikeʼ le puksiʼikʼaloʼ jach kʼasaʼan yéetel séeb jeʼel u tusik máakeʼ (Jer. 17:9). Baʼaleʼ maʼ u tuʼubultecheʼ jeʼel u béeytal a beetik baʼax ku yaʼalik Dioseʼ. ¿Bix jeʼel a beetkeʼ? Letiʼeʼ ku yaʼalik: «Kuxla[kech] táan [a] tsʼoʼokbesik [in] waʼalmajtʼaan» (xokaʼak Salmo 119:9). Le oʼolal ilawil a naʼatik tuláakal le baʼaxoʼob chiʼichnakkúuntkech yoʼolal le okjaʼoʼ. *

15, 16. ¿Bix jeʼel a wojéeltik wa jeʼel u páajtal a wokjaʼeʼ?

¹⁵ Baʼaleʼ ¿bix jeʼel a wojéeltik wa jeʼel u páajtal a wokjaʼeʼ? Maʼalob ka beet kʼáatchiʼob jeʼex leloʼobaʼ: «¿Jeʼel wa u páajtal in tsolik le yáax baʼaloʼob kʼaʼabéet u kanik máak teʼ Bibliaoʼ? ¿Kin jóokʼol wa kʼaʼaytaj kex maʼ u jóokʼol in taataʼob? ¿Kin wilik wa in bin tiʼ tuláakal le muchʼtáambaloʼoboʼ? ¿Jeʼel wa u páajtal in kʼaʼajsik baʼax tin beetaj utiaʼal maʼ in beetik baʼax ku yaʼalik in wéet paaliloʼobeʼ? ¿Jeʼel wa u seguer in meyajtik Jéeoba kex ka xuʼuluk u meyajtaʼal tumen in taataʼob wa tumen in amigoʼobeʼ? ¿Tsʼoʼok wa in waʼalik tiʼ Jéeoba jach ku taasikten kiʼimak óolal in biskimba tu yéetel? ¿Tsʼoʼok wa in waʼaliktiʼ ich payalchiʼ in kʼáat in kʼub tuláakal in kuxtal tiʼ utiaʼal in meyajtik?».

¹⁶ Le okjaʼoʼ upʼéel baʼax jach unaj u beetik máak. Maʼ unaj u yilaʼal chéen bey upʼéel báaxleʼeʼ. ¿Bix jeʼel a wilik wa tsʼoʼok u yiijtal a tuukul utiaʼal a chʼaʼatuklik a beetkeʼ? Lelaʼ maʼ chéen ku chíikpajal yoʼolal bix a máansik a tsoltʼaan wa le bix a líiʼskaba utiaʼal a núukik le kʼáatchiʼob ku beetaʼal teʼ muchʼtáambaloʼoboʼ. Baʼaxeʼ táakaʼan a chʼaʼik en cuentai le baʼax ku yaʼalik le Biblia ken a beet wa baʼaxoʼ (xokaʼak Hebreob 5:14). Wa tsʼoʼok u yiijtal a tuukul utiaʼal a wokjaʼeʼ, jeʼel u béeytal a beetik le baʼax maas jatsʼutsoʼ: a meyajtik Jéeoba yéetel tuláakal a puksiʼikʼal, yéetel a weʼesik sáamsamal a kʼubmaj a kuxtal tiʼ.

17. ¿Baʼax jeʼel u yáantkech a aktáant le talmiloʼob ken tsʼoʼokok a wokjaʼoʼ?

 ¹⁷ Maʼ xaaneʼ ken tsʼoʼokok a wokjaʼeʼ maas yaan a meyajtik Dios yéetel kiʼimak óolal. Baʼaleʼ yaan u yantal baʼaloʼob kun túuntik a fe, le oʼolal yaan u kʼaʼabéettal a weʼesik chúukaʼan óolal (2 Tim. 3:12). Maʼ tuklik wa chéen ta juunal ken a aktáantoʼob. Kʼáat áantaj tiʼ a taataʼob. Yéetel kʼáat áantaj tiʼ le sukuʼunoʼob úuch joʼopʼok u meyajtkoʼob Diosoʼ. Bisaba xan yéetel le máaxoʼob jeʼel u yáantkechoʼob ka chúukpajak a wóol a meyajt Diosoʼ. Maʼ u tuʼubultech yaabiltaʼanech tumen Jéeoba yéetel yaan u tsʼáaiktech u muukʼil utiaʼal a aktáantik jeʼel baʼaxak talmileʼ (1 Ped. 5:6, 7).

¿Bix jeʼel a béeykuntik le baʼax ka chʼaʼatuklikoʼ?

18, 19. ¿Baʼaxten jach kʼaʼabéet u yilik máak baʼax ku tsʼáaik táanil ichil u kuxtal?

¹⁸ Kex ka tsʼáaik a wóol a beet baʼax tsʼoʼok a chʼaʼatuklikeʼ, ¿ka wilik wa bey minaʼantech u tiempoi utiaʼal a beetkeʼ? Wa beyoʼ maʼalob ka wil baʼaxoʼob ka tsʼáaik táanil ichil a kuxtal. Jeʼel u páajtal k-ketik beyaʼ. Wa ka yáax butʼik tuunich ichil upʼéel chʼóoy, tsʼoʼoleʼ ka láalik arena ichil tak ken chuʼupkeʼ, yaan a wilkeʼ bey maas yaʼab baʼax ku chʼaʼikeʼ. Baʼaleʼ ¿baʼax jeʼel u yúuchul wa ka tsʼáaik táanil le arena ichil le chʼóoyoʼ? Yaan a wilkeʼ maʼ kun láaj okol le tuunich ichiloʼ.

¹⁹ Leloʼ bey xan u yúuchul yéetel u tiempo máak. Wa ka tsʼáaik táanil le náaysaj óolaloʼoboʼ, maʼ kun yantaltech u tiempoi utiaʼal a beetik le baʼax maas kʼaʼananoʼ, a meyajtik Dios. Baʼaleʼ ¿baʼax jeʼel u yúuchul wa ka «yéey[ik] mantatsʼ baʼax [maas] maʼalob[eʼ]»? (Fili. 1:10). Yaan u yantaltech u súutukil utiaʼal a meyajtik Dios bey xan utiaʼal a náaysik a wóol cada wa baʼax kʼiin.

20. ¿Baʼax unaj a beetik wa ka chiʼichnaktal ken joʼopʼok a wilik a béeykuntik le baʼax a chʼaʼatukultmaj a beetkoʼ?

²⁰ Ken joʼopʼok a wilik a béeykuntik upʼéel baʼax a chʼaʼatukultmaj a beetik jeʼex le okjaʼoʼ, maʼ jelaʼan ka chiʼichnakchajkech yoʼolal baʼax ken a beetiʼ. Teʼ súutukiloʼob beyoʼ «pʼat a yaayam óolaloʼob tiʼ Yuumtsil, letiʼ túuneʼ yaan u tsʼáaiktech jeetsʼel[il]» (Sal. 55:22). Bejlaʼeʼ yantech u jatsʼuts páajtalil a táakpajal teʼ meyaj maas jatsʼuts táan u beetaʼaloʼ: u kʼaʼaytaʼal le maʼalob péektsiloʼ yéetel u kaʼansaʼal uláakʼ máakoʼob (Hch. 1:8). ¿Baʼax ken a beete? ¿Yaan wa a pʼáatal a chéen chaʼant baʼax ku yúuchul, wa yaan a táakpajliʼ? Le baʼax maas maʼalob jeʼel a chʼaʼatuklik a beetkoʼ, letiʼe a tsʼáaik táanil ichil a kuxtal u Reino Diosoʼ. Wa ka beetik beyoʼ, mix bikʼin kun yaatal ta wóol úuchik a meyajtik le «máax beetech, maʼiliʼ chúunuk kʼiinoʼob talamoʼobiʼ», wa ta táankelmil (Ecl. 12:1).

[Tsolajiloʼob]

¿Baʼax jeʼel a núukikeʼ?

• ¿Baʼaxten unaj a chʼaʼatuklik baʼax ken a beete?

• ¿Baʼaxoʼob maʼalob ka chʼaʼatukult a beetik?

• ¿Baʼaxoʼob unaj a beetik utiaʼal a wokjaʼ?

• ¿Baʼaxten unaj a wilik baʼaxoʼob ka tsʼáaik táanil ichil a kuxtal?

[U kʼáatchiʼiloʼob le xookoʼ]

[U tsolajil le oochel teʼ táan juʼun 13]

¿A chʼaʼatukultmaj wa a xokik le Biblia sáamsamaloʼ?

[U tsolajil le oochel teʼ táan juʼun 15]

¿Baʼax jeʼel u yáantkech utiaʼal ka okjaʼanakecheʼ?

[U tsolajil le oochel teʼ táan juʼun 16]

¿Baʼax ku kaʼansiktech lelaʼ?