¿Baʼax jeʼel u núukik a paalaleʼexeʼ?

TAATATSILEʼEX: U Pʼíich Tulumil Kanan 15 tiʼ enero tiʼ 2010 (táan juʼun 16 tak 20) tu yaʼalaj maʼalob ka ensayarnakeʼex yéetel a paalaleʼex. Le xookaʼ yaan u yáantkeʼex a wileʼex bix jeʼel a wáantik a paalaleʼex utiaʼal u aktáantkoʼob le talmiloʼob ku yantaltiʼob tu escuelaʼoboʼ. Junpʼéel kʼiin maʼalob utiaʼal a ensayareʼexeʼ letiʼe ken yanakteʼex le Adoración ich Familiailoʼ.

LE PAALALOʼOB j-jaajkunajoʼob tiʼ Jéeobaoʼ yaʼab baʼaxoʼob ku aktáantikoʼob. U suukileʼ ku kʼáataʼaltiʼob tumen u yéet xookoʼob baʼaxten maʼatech u kʼaykoʼob le himnooʼ, maʼatech u saludarkoʼob le banderaoʼ, maʼatech u beetkoʼob kʼiin kʼaabaʼob yéetel maʼatech u beetkoʼob tareaʼob yaan yil yéetel uláakʼ kʼiinbesajoʼob. ¿Baʼax a tuklik jeʼel u núukik a paalaloʼobeʼ?

Yaan mejen paalaleʼ chéen ku yaʼalikoʼob: «Maʼ tu páajtal in beetik. Maʼ tu chaʼabal tumen in religión». U jaajileʼ jach maʼalob u yilik maʼ u beetkoʼob baʼax maʼ utstutʼaan Diosiʼ. Tsʼoʼoleʼ maʼ xaaneʼ, beyoʼ maʼ kun beetbil uláakʼ kʼáatchiʼtiʼob. Baʼaleʼ le Bibliaoʼ ku yaʼalik tiʼ le máaxoʼob meyajtik Diosoʼ: «Mantatsʼ [nuʼuktabaʼex] utiaʼal a núukikeʼex tiʼ tuláakal ka u kʼáatoʼob a chiʼex tu yoʼolal» baʼax ka creertikeʼex (1 Ped. 3:15). Utiaʼal leloʼ maʼ chéen unaj u yaʼalik máak: «Maʼ tu páajtal in beetik». Kex yaan máax maʼ kun utstaltutʼaaneʼ, yaneʼ utstutʼaanoʼob ka k-aʼal baʼaxten maʼ tu páajtal k-beetik wa baʼax.

Yaʼab mejen paalaloʼob j-Jaajkunajoʼobeʼ, ken kʼaʼabéetchajak u tsolik tiʼ u yéet xookoʼob baʼaxten ku beetikoʼob wa baʼaxten maʼ tu beetikoʼobeʼ, ku meyajtiʼob le baʼax ku kaʼansik le libro Aprendamos del Gran Maestro bey xan uláakʼ jóoʼsaʼaniloʼob. Yantiʼ u yéet xookoʼobeʼ ku jach uʼuyikoʼob le baʼax ku xokikoʼoboʼ yéetel yaan kʼiineʼ ku kʼamikoʼob ka tsʼaʼabak xook tiʼob yéetel le Bibliaoʼ. Baʼaleʼ yaaneʼ séeb u náakal u yóol. Tsʼoʼoleʼ yaan tsikbaliloʼob tiʼ le Biblia ku talamtal u naʼatik le mejen paalal wa maʼ tu tsolaʼaltiʼoboʼ. Tuukulnakoʼon tiʼ le baʼax úuch tiʼ Minhee, juntúul chan x-chʼúupal yaan 11 jaʼaboʼob tiʼ. Ka invitartaʼab tumen u amiga utiaʼal ka xiʼik tu kʼiin u kʼaabaʼeʼ, letiʼeʼ tu yaʼalajtiʼ: «Le Bibliaoʼ maʼ tu yaʼalik wa unaj k-kʼiinbesik kʼiin kʼaabaʼ. Tsʼoʼoleʼ ¿a wojel wa ku yaʼalikeʼ, Juan Bautistaeʼ kíimsaʼab tiʼ junpʼéel kʼiin kʼaabaʼ? U talmileʼ maʼ naʼataʼab tumen u amiga le baʼax tu yaʼaloʼ.

U jaajileʼ le tsikbaliloʼob yéetel le dibujoʼob ku taasik le libroʼoboʼ jach jeʼel u yáantkoʼob máakeʼ. Baʼaleʼ yaan escuelaʼobeʼ maʼatech u chaʼabal tiʼ le paalaloʼob ka u yeʼesoʼob tiʼ u yéet xookoʼob libroʼob ku tʼaanoʼob tiʼ le Bibliaoʼ. Teʼ tuʼuxoʼob beyoʼ, ¿jeʼel wa u páajtal u tʼaan a paalaleʼex tiʼ u fejoʼob kex maʼ u chaʼabal u jóoʼsik u libroʼobeʼ? ¿Bix jeʼel a wáantkeʼexoʼob utiaʼal u beetkoʼobeʼ?

Ensayarneneʼex

Jach unaj a ensayareʼex ta wotocheʼex. Taatatsileʼex, teʼexeʼ jeʼel u páajtal a beetikeʼex bey u yéet xook a paalaleʼexeʼ. Jach ilawileʼex bix u tsʼáaik u yóol a paalaleʼex u tsoloʼob baʼax ku creertikoʼob yéetel aʼaleʼextiʼob jach maʼalob bix u beetkoʼob. Tsʼoʼoleʼ eʼeseʼextiʼob bix jeʼel u maas maʼalobkíintikoʼob le baʼax ku yaʼalikoʼoboʼ bey xan le utsil jeʼel u taasik ka u beetoʼob beyoʼ. Junpʼéel bixeʼ, letiʼe a kaʼanskeʼex ka meyajnaktiʼob tʼaanoʼob séeb u naʼataʼaloʼ. Joshua, yaan nueve jaʼaboʼob tiʼeʼ, ku yaʼalikeʼ u yéet xookoʼobeʼ maʼatech u jach naʼatikoʼob tʼaanoʼob jeʼex  conciencia yéetel kʼub óolal, le oʼolaleʼ tu yilaj u meyajtiʼ uláakʼ tʼaanoʼob séebaʼan u naʼatkoʼob utiaʼal u tsolik baʼax ku creertik (1 Cor. 14:9).

Yaan mejen paalaloʼobeʼ ku beetkoʼob kʼáatchiʼob, baʼaleʼ wa ku xáantal táan u núukaʼaltiʼobeʼ ku náakal u yóoloʼob u yuʼuboʼob. Le oʼolal le mejen paalal j-Jaajkunajoʼoboʼ unaj u yilik u chaʼik u tʼaanoʼob yéetel u tsikbal tu yéeteloʼob. Lelaʼ bey u beetik Haneul, juntúul chan x-chʼúupal yaan 10 jaʼaboʼob tiʼ, letiʼeʼ ku yaʼalik: «In wéet xookoʼobeʼ utstutʼaan u yaʼalikoʼob baʼax ku tuklikoʼob, maʼ ka xáanak táan u tsoʼololtiʼob wa baʼaxiʼ». Utiaʼal u yúuchul junpʼéel tsikbaleʼ unaj u beetaʼal kʼáatchiʼob yéetel unaj u jach chʼenxikintaʼal bix u núukaʼal utiaʼal u yojéeltaʼal baʼax ku tuklaʼal yoʼolal wa baʼax.

Le tsikbaloʼob yaan teʼ cuadrooʼ ku yeʼesik bix jeʼel u tsikbal a paalaleʼex yéetel u yéet xookoʼobeʼ. Lelaʼ maʼ u kʼáat u yaʼal wa jach bey unaj u yaʼalikoʼobiʼ. Tumen maʼ junpʼéeliliʼ bix u tuukul le mejen paalaloʼoboʼ yéetel maʼ junpʼéeliliʼ baʼax ku aktáantkoʼobiʼ. Le baʼax maas kʼaʼabéetoʼ letiʼe ka u naʼatoʼob le baʼax ku yaʼalikoʼ yéetel ka u yaʼaloʼob u tuukulil ken tʼaanakoʼob yéetel jeʼel máaxakeʼ wa  jeʼel baʼaxak súutukileʼ. Le taatatsiloʼob yaan u paalaloʼob ku binoʼob xookoʼ jach maʼalob ka u ensayartoʼob le tsikbaloʼobaʼ.

U jaajileʼ yaʼab tiempo ku bisik yéetel maʼ chéen chʼaʼabil u kaʼansaʼal le paalaloʼob u tsoloʼob tubeel baʼax ku creertikoʼoboʼ. Le taatatsiloʼob meyajtik Diosoʼ ku yilik u kaʼansik tiʼ u paalaloʼob le baʼaxoʼob ku yaʼalik le Bibliaoʼ yéetel ka u tsʼaʼob ichil u kuxtaloʼob mantatsʼ (Deu. 6:7; 2 Tim. 3:14).

Le ken yanakteʼex tu kaʼatéen le Adoración ich Familiailoʼ ensayarteʼex le baʼaxoʼob ku yaʼalik le cuadroaʼ, wa ka beetkeʼexeʼ yaan a wilkeʼexeʼ jach maʼalob le baʼax ku yaʼalikoʼ. Baʼaleʼ maʼ u tuʼubulteʼexeʼ maʼ utiaʼal u kanik a mejen paalaleʼex jach jeʼex tsʼíibtaʼaniloʼ. Maʼ xaaneʼ jeʼel u páajtal a ensayarkeʼex kex kaʼatéen jeʼel máakalmáak tiʼ le baʼax ku yaʼalik le cuadroaʼ, baʼaleʼ ilawil a núukikeʼex yaanal bix utiaʼal a wilkeʼex baʼax jeʼel u núukik a paalaleʼexeʼ. Yéetel ken a wileʼex taak u tsolikoʼob wa baʼaxeʼ áanteʼexoʼob utiaʼal u beetkoʼob maʼalob yéetel ka u chʼaʼob en cuentail bix u tuukul u maasil. Beyoʼ yaan a wilkeʼexeʼ, ken máanak kʼiineʼ yaan u kankoʼob u tsoloʼob baʼax ku creertikoʼob tu táan u yéet xookoʼob, u maestroʼob yéetel uláakʼ máakoʼob.

[U tsolajil le oochel teʼ táan juʼun 4]

LE KʼIIN KʼAABAʼOBOʼ

Melisa: Julio, ¿jeʼel wa a taal tiʼ junpʼéel kʼiinbesaj kun beetbil tin wotocheʼ?

Julio: Diosboʼotik ikil a invitarken. Baʼaleʼ ¿baʼax ken a kʼiinbeseʼex?

Melisa: U kʼiin in kʼaabaʼ.

Julio: Jach diosboʼotik. Baʼaleʼ teneʼ maʼatech in kʼiinbesik le kʼiin kʼaabaʼoboʼ.

Melisa: ¿Baʼaxten túun? Tuláakal máak ku kʼiinbesik. In taataʼobeʼ kiʼimakchaj u yóoloʼob le kʼiin ka síijenoʼ.

Julio: Bey xan in taataʼob. Baʼaleʼ maʼatech k-kʼiinbesik. Yaan horaeʼ, le máax ku kʼiinbesik u kʼiin u kʼaabaʼoʼ ku yuʼubkuba bey minaʼan uláakʼ máak jeʼex letiʼeʼ. Baʼaleʼ chéen Dios minaʼan uláakʼ jeʼex letiʼeʼ, ¿maʼ wa bey a tuklikiʼ? A tuklikeʼ, ¿maʼ wa unaj k-tsʼáaiktiʼ u nib óolalil le kuxtal u tsʼaamajtoʼonoʼ?

Melisa: Baʼaleʼ ¿a kʼáat wa túun a waʼal maʼ unaj in kʼiinbesik u kʼiin in kʼaabaʼiʼ?

Julio: Leloʼ teech kan chʼaʼatuklik. Techeʼ a wojel yaʼab máakeʼ utstutʼaan u siʼibil wa baʼax tiʼ tu kʼiin u kʼaabaʼ, baʼaleʼ le Bibliaoʼ ku yaʼalikeʼ yaan maas kiʼimak óolal u tsʼaʼabal wa baʼax tiʼ u kʼaʼamal wa baʼax. Teneʼ kin wilik maas kʼaʼanaʼan u tsʼaʼabal nib óolal tiʼ Dios yéetel u yáantaʼal u maasil ke u kʼamik máak wa baʼax siibalil.

Melisa: Mix juntéen máanak tin tuukul leloʼ. ¿A kʼáat wa túun a waʼaleʼ maʼatech u siʼibiltech mix baʼal tumen a taataʼob?

Julio: Maʼatech, letiʼobeʼ ku síikoʼobten yaʼab baʼaloʼob. Baʼaleʼ maʼatech u páaʼtkoʼob tu kʼiin in kʼaabaʼ. Ku tsʼáaikoʼobten le kʼiin ku síijil tu puksiʼikʼaloʼobeʼ. Baʼaleʼ ¿a wojel wa bix úuchik u káajal u kʼiinbesaʼal le kʼiin kʼaabaʼoboʼ?

Melisa: ¿A wojel wa teech?

Julio: Wa a kʼáateʼ sáamaleʼ kin tsikbaltiktech junpʼéel kʼiin kʼaabaʼ beetaʼab úuchjeakil.

BANDERA YÉETEL HIMNO

Gisela: Carla, ¿baʼaxten maʼatech a saludartik le bandera yéetel maʼatech a kʼayik le himnooʼ?

Carla: Maʼalob le kʼáatchiʼ ta beetoʼ. Baʼaleʼ táanileʼ in kʼáat in wojéelt baʼaxten techeʼ ka beetik.

Gisela: Tumen in yaabiltmaj le luʼum tuʼux síijenaʼ.

Carla: Baʼaleʼ ¿máasaʼ kex jach a yaabiltmaj a maamaeʼ maʼatech a tsʼáaik a kʼab ta tseem utiaʼal a saludartik yéetel maʼatech a kʼayik himnoʼob tiʼ?

Gisela: Jaaj, leloʼ maʼatech. Baʼaleʼ teneʼ bey in beetik utiaʼal in weʼesik tsiikil tiʼ le luʼum tuʼux síijenaʼ. ¿Techeʼ maʼatech a weʼesik tsiikil tiʼ?

Carla: Kin weʼesik tsiikil tiʼ, baʼaleʼ maʼ bey k-saludartik tuláakal le baʼaloʼob yéetel le máaxoʼob k-eʼesik tsiikil tiʼoboʼ, ¿máasaʼ?

Gisela: Jaaj a tʼaan. U jaajileʼ teneʼ maʼ in wojel baʼaxten kin beetkiʼ. Maʼ xaaneʼ tumen tuláakal máak beetik beyoʼ.

Carla: ¿A wojel wa baʼaxten yaʼab máak beetik beyoʼ? Tumen le bandera yéetel le himnooʼ ku chíikbesik le luʼumil tuʼux síijoʼoboʼ. Le oʼolal jeʼel tak u tsʼáaik u kuxtaloʼob tu yoʼolaleʼ. Baʼaleʼ teneʼ maʼ bey in tuukuliʼ. Maʼ tu páajtal in tsʼáaik in kuxtal yoʼolal le luʼum tuʼux síijenoʼ, tumen Dios tsʼaamilten. Le oʼolal kex kin weʼesik tsiikil tiʼ le banderaoʼ, maʼatech in saludartik yéetel maʼatech in kʼayil le himnooʼ.

Gisela: Áan, tsʼoʼok in naʼatik.

Carla: ¿A wojel wa junpʼéel baʼal? Jach utstintʼaan úuchik a kʼáatikten. Ken taakchajak a wojéeltik baʼaxten kin beetik wa baʼaxten maʼatech in beetik wa baʼaxeʼ kʼáatten. ¿A wojel wa le Bibliaoʼ ku yaʼalikeʼ juntúul rey úuchjeakileʼ tu yaʼalaj ka chinlak le máakoʼob tu táan junpʼéel nojoch imagenoʼ? Baʼaleʼ yaan máaxoʼob maʼ tu beetoʼob kex aʼalaʼab yaan u kíimsaʼaloʼob.

Gisela: ¿Jach jaaj? ¿Baʼax túun úuchtiʼob?

Carla: Ken jóoʼkoʼon recreoeʼ kin tsikbaltiktech.

U VOTAR MÁAK

Miguel: Diego, ¿máax ka tuklik maas maʼalob ka u beet u presidenteil?

Diego: Teneʼ, mix juntúul kin waʼalik maʼalobiʼ.

Miguel: ¿Baʼaxten?

Diego: Tumen tsʼoʼok in yéeyik juntúul máax maas maʼalob. Teneʼ tsʼoʼok in waʼalik yaan in tsaypachtik Jesús mantatsʼ. Le oʼolal maʼ tu béeytal in yéeyik uláakʼ. Techeʼ, ¿a wojel wa baʼaxten kin tuklik Jesuseʼ letiʼe máax maas maʼalob jeʼel u nuʼuktikoʼonoʼ?

Miguel: Maʼatech, yéetel u jaajileʼ maʼ in kʼáat in wojéeltiʼ.

Diego: Maʼalob, le kʼiin ku taaktal a wojéeltkeʼ, jeʼel in tsoliktech yéetel kiʼimak óolaleʼ.

[U tsolajil le oochel teʼ táan juʼun 3]

«¿Baʼaxten maʼatech a saludartik le banderaoʼ yéetel maʼatech a kʼayik le himnooʼ?»

[U tsolajil le oochel teʼ táan juʼun 4]

«Julio, ¿jeʼel wa a taal tiʼ junpʼéel kʼiinbesaj kun beetbil tin wotocheʼ?»