U kʼaabaʼ Dioseʼ tiaʼan teʼ kʼóomoʼ

SAINT MORITZ. ¿Tsʼoʼok wa a yáax uʼuyik u yaʼalaʼal le kʼaabaʼaʼ? Maʼ xaaneʼ tsʼoʼoki, tumen yaʼab j-táanxel luʼumiloʼob tiʼ tuláakal yóokʼol kaab ku binoʼob xíimbaliʼ. Le kaajaʼ tiʼ yaan tu noojol-lakʼin Suiza, naatsʼ tiʼ u jáal u luʼumil Italiaeʼ, le máakoʼoboʼ ku bin u chaʼantoʼob u kʼóom luʼumil Engadina yaan tu chúumuk u witsiloʼob Alpes. Ku binoʼob xan u chaʼantoʼob le jatsʼuts cheʼob, looloʼob yéetel le baʼalcheʼob yanoʼob teʼ Parque Nacional Suizooʼ; lelaʼ jach ku tsʼáaik nojbeʼenil tiʼ Jéeoba, le Máax beetmiloʼoboʼ (Sal. 148:7-10). Baʼaleʼ desde teʼ siglo diecisieteoʼ yanchaj uláakʼ baʼax tsʼáaik nojbeʼenil tiʼ.

Lelaʼ letiʼe baʼax tsʼíibtaʼan teʼ najoʼoboʼ. Yaʼabeʼ tsʼíibtaʼan u kʼaabaʼ Diosiʼ. Desde úuchjeakileʼ suuk u tsʼíibtaʼal, u chʼaʼakal tu tuunichiloʼob, wa u joʼochaʼal letraʼob tu táan le  najoʼoboʼ. Teʼ fotooʼ jeʼel u páajtal a wilik junpʼéel naj yaan tu kaajil Bever tsʼíibtaʼan le tʼaanoʼobaʼ: «Tu jaʼabil 1715. Jéeobaeʼ letiʼ u káajbal yéetel Jéeoba u tsʼoʼokbal. Tuláakal baʼal yaan yoʼolal Dios, mix baʼal yaan wa maʼ tu yoʼolaliʼ». Jeʼex túun k-ilkoʼ le úuchben tsʼíibaʼ ku chʼaʼchiʼitik kaʼatéen u kʼaabaʼ Dios.

Wa ka xiʼikoʼon xan tu kaajil Madulaineʼ, yaan k-ilik junpʼéel tsʼíib maas úuchben ku yaʼalik: «Salmo 127. Wa maʼ Jéeoba beetik le najoʼ, chéen kunel le meyaj ku beetik le albañiloʼoboʼ. Lucio Rumedio. Tu jaʼabil 1654».

¿Baʼaxten jach yaʼab tuʼux tsʼíibtaʼan u kʼaabaʼ Diosiʼ? Tu kʼiiniloʼob le Reforma protestanteoʼ, le Bibliaoʼ jóoʼsaʼab ich romanche, junpʼéel tʼaan ku taal tiʼ le latinoʼ. Lelaʼ letiʼe yáax libro jóoʼsaʼab ichil le tʼaan jeʼeloʼ. Le baʼax ku yaʼalik le Bibliaoʼ jach pʼáat tu tuukul le máakoʼoboʼ. Le oʼolal le ka tu tsʼíibtoʼob le tʼaanoʼob tu jool u yotochoʼoboʼ maʼ chéen tu tsʼíibtoʼob u kʼaabaʼ Diosiʼ, baʼaxeʼ tak tiʼ baʼax tekstoil tu chʼaʼajoʼob.

Tak bejlaʼeʼ láayliʼ táan u tsʼáaik nojbeʼenil tiʼ u kʼaabaʼ Dios le baʼaxoʼob tsʼíibtaʼaboʼoboʼ. Wa tiʼ kajaʼanech, wa chéen ka bin a xíimbalteʼ, k-invitarkech ka kʼuchkech teʼ tu Najil Reino tiʼ u j-jaajkunajoʼob Jéeoba yaan tu kaajil Bever, utiaʼal a maas kanik yoʼolal le Dios sen tsʼíibtaʼan u kʼaabaʼ teʼ najoʼoboʼ.

[U tsolajil le oochel teʼ táan juʼun 7]

© Stähli Rolf A/age fotostock