Kʼáatchiʼob ku beetaʼal

¿Baʼaxten kʼuuxilnaj Moisés tiʼ Eleazar yéetel tiʼ Itamar, u paalal Aarón, ka tsʼoʼok u kíimil Nadab yéetel Abihú, u sukuʼunoʼob, yéetel bix úuchik u xuʼulul u kʼuuxil? (Lev. 10:16-20.)

Le maʼ úuch yéeyaʼak le máaxoʼob ken u beet u j-kʼiiniloʼob teʼ tabernaculooʼ, Jéeobaeʼ tu beetaj u kíimil Nadab yéetel Abihú, u paalal Aarón, tumen tu kʼuboʼob «jelaʼan kʼáakʼ» (Lev. 10:1, 2). Moiseseʼ tu yaʼalaj tiʼ Eleazar yéetel tiʼ Itamar, maʼ u yaatal u yóoloʼob yoʼolal u sukuʼunoʼob. Maʼ úuch tiʼ leloʼ kʼuuxilnaj tu yéeteloʼob tumen maʼ tu jaantoʼob u bakʼel le chan chivo kʼuʼub tu yoʼolal le kʼebanoʼ (Lev. 9:3). ¿Baʼaxten kʼuuxilnaji?

Le Ley tu tsʼáaj Jéeoba tiʼ Moisesoʼ ku yaʼalikeʼ le j-kʼiin kʼubik le siibal yoʼolal le kʼebanoʼ, unaj u jaantik u xéetʼ u bakʼel tu táankabil le tabernaculooʼ. Beyoʼ ku yeʼesik táan u tʼaan yoʼolal u kʼeban le máax kʼubik le siibaloʼ. Baʼaleʼ maʼ unaj u jaantik mix junpʼíit u bakʼel le baʼalcheʼ ku bisaʼal u kʼiʼikʼel teʼ Kiliʼich kúuchiloʼ. Le siibaloʼob beyoʼ unaj u láaj tóokaʼal (Lev. 6:24-26, 30).

Yoʼolal le baʼaxoʼob tsʼoʼok u yúuchloʼ, Moiseseʼ tu yilaj wa beetaʼab tuláakal le baʼaxoʼob u yaʼalmaj Jéeobaoʼ. Ka tu yojéeltaj láaj tóokbil beetaʼabik le chan chivo kʼuʼub yoʼolal le kʼebanoʼ, kʼuuxilnajeʼ ka tu kʼáataj tiʼ Eleazar yéetel tiʼ Itamar baʼaxten maʼ tu beetoʼob jeʼex aʼalaʼaniloʼ, yéetel baʼaxten maʼ tu jaantoʼob junpʼíit tiʼ le siibaloʼ, tumen maʼ bisaʼab u kʼiʼikʼel kʼubbil tiʼ Jéeoba teʼ Kiliʼich kúuchiloʼ (Lev. 10:17, 18).

Lelaʼ Aarón núuk tiʼ Moisés, tumen maʼ xaaneʼ letiʼ aʼal tiʼ Eleazar yéetel tiʼ Itamar ka u beetoʼob beyoʼ. Tumen tsʼoʼok u kíimil kaʼatúul u paalaloʼobeʼ, maʼ xaaneʼ tu tukleʼ maʼ maʼalob ka jaantaʼak le siibal tumen le j-kʼiinoʼoboʼ. Maʼ xaaneʼ tu tukleʼ maʼ kun utstal tu tʼaan Jéeoba ka u jaantoʼob, kex maʼ tiʼ letiʼob yanchaj u culpail le baʼax tu beetaj Nadab yéetel Abihuoʼ (Lev. 10:19).

Maʼ xaaneʼ Aaroneʼ tu tukleʼ, tumen letiʼe yáax kʼiin kun kʼubbil siibaloʼob tumen le máaxoʼob yaan ichil u chʼiʼibaloʼ, unaj u yilik u beetkoʼob kaʼach jach jeʼex aʼalaʼabiktiʼob tumen Diosoʼ. Baʼaleʼ Nadab yéetel Abihueʼ maʼ tu yeʼesoʼob tsiikil tiʼ u kʼaabaʼ Jéeobaiʼ, le oʼolal beetaʼab u kíimloʼob. Maʼ xaaneʼ Aaroneʼ tu tukleʼ, u maasil j-kʼiinoʼoboʼ maʼ tu páajtal u jaantkoʼob u jaats tiʼ le siibaloʼob kʼuʼuboʼ, tumen ichil u láakʼtsiloʼob yaan le máaxoʼob beet baʼax maʼ maʼaloboʼ.

Moiseseʼ tu kʼamaj le baʼax aʼalaʼab tumen Aaronoʼ, tumen le Bibliaoʼ ku yaʼalik: «Ka tu yuʼubaj Moisés le baʼalaʼ, kiʼimaʼakchaj u yóol» (Lev. 10:20). Yéetel Jéeoba xaneʼ kiʼimakchaj u yóol yéetel le baʼax tu yaʼalaj Aaronoʼ.