¿K-pʼektik wa le baʼax kʼaasoʼ?
¿K-pʼektik wa le baʼax kʼaasoʼ?
«Tsʼoʼok a pʼektik le baʼax kʼaasoʼ.» (HEB. 1:9)
1. ¿Baʼax yaabilajil tu yaʼalaj Jesús unaj u yeʼesik u disipuloʼob?
JUNTÉENJEAKEʼ Jesuseʼ tu yaʼalaj tiʼ u disipuloʼob baʼax modosil maas unaj u yeʼeskoʼob: «Kin tsʼáaik tiʼ teʼex le túumben aʼalmaj tʼaanaʼ: Yaabiltabaʼex ta baatsileʼex. Jeʼel bix in yaabiltmeʼexeʼ teʼexeʼ unaj a yaabiltikabaʼex ta baatsileʼex. Wa ka yaabiltikabaʼex ta baatsileʼexeʼ tuláakal yóokʼol kaab kun u kʼaj óolteʼ teʼexeʼ in j-kaanbaleʼex» (Juan 13:34, 35). Yéetel le tʼaanoʼobaʼ táan u yaʼaliktiʼob ka u paklan yaabiltubaʼob, utiaʼal u yilaʼal jach tu jaajil táan u tsaypachtikoʼob Cristo. Tuláakʼ kʼiineʼ tu yaʼalajtiʼob: «Yaabilt [máax pʼekmileʼex], payalchiʼneneʼex tu yoʼolal le máaxoʼob pochʼkeʼexoʼ yéetel ku chʼaʼpachtikeʼexoʼ» (Mat. 5:44).
2. ¿Baʼax unaj k-pʼektik?
2 Baʼaleʼ Jesuseʼ maʼ chéen tu kaʼansaj tiʼ u disipuloʼob baʼax unaj u yaabiltikoʼobiʼ, baʼaxeʼ tu yaʼalaj xan tiʼob baʼax unaj u pʼektikoʼob. Junpʼéel profecíaeʼ tu yaʼalaj tu yoʼolal Cristo: «Tsʼoʼok a yaabiltik le baʼax tojoʼ yéetel tsʼoʼok a pʼektik le baʼax kʼaasoʼ» (Heb. 1:9; Sal. 45:7). Le baʼax tu beetoʼ ku yeʼesikeʼ maʼ chéen unaj k-yaabiltik baʼax tojiʼ, baʼaxeʼ unaj k-pʼektik le baʼax kʼaasoʼ, wa tuláakal le baʼaxoʼob ku bin tu contra u leyoʼob Jéeobaoʼ. Apóstol Juaneʼ tu yaʼalaj xan: «Baʼaleʼ tuláakal le máax ku beetik kʼebaneʼ ku siʼipiltal tiʼ u yaʼalmaj tʼaan Jajal Dios, tumen le kʼebanoʼ u siʼipil máak tiʼ le aʼalmaj tʼaanoʼ» (1 Juan 3:4).
3. ¿Baʼax ken k-il teʼ xookaʼ?
3 Tuláakal máax meyajtik Dioseʼ unaj u tuklik: «¿Kin pʼektik wa le baʼaxoʼob ku bin tu contra u ley Diosoʼ?». Koʼoneʼex ilik bix jeʼel k-eʼesik k-pʼektik le baʼax kʼaas ichil le kanpʼéel baʼaloʼobaʼ: 1) u píitmáan u yukʼik máak, 2) u táakpajal máak tiʼ baʼaloʼob yaan yil yéetel espiritismo, 3) u núupkʼebantal máak, yéetel 4) u biskuba máak yéetel máaxoʼob yaabiltmil baʼax kʼaas.
Unaj k-kanáantik maʼ u píitmáan k-ukʼik
4. ¿Baʼaxten maʼalob úuchik u yaʼalik Jesús maʼ unaj u píitmáan u yukʼik máakiʼ?
4 Yaan kʼiineʼ Jesuseʼ tu yukʼaj vino, tumen u yojel Dios tsʼaamil (Sal. 104:14, 15). Baʼaleʼ mix juntéen píitmáan u yukʼik (Pro. 23:29-33). Le oʼolal jach maʼalob úuchik u yaʼalik maʼ u píitmáan u yukʼik máak (xokaʼak Lucas 21:34). U píitmáan u yukʼik máakeʼ jeʼel u beetik u lúubul tiʼ uláakʼ kʼebanoʼobeʼ. Le oʼolal Pabloeʼ tu yaʼalaj: «Maʼ a káaltaleʼex yéetel vino tumen leloʼ ku bisik máak tiʼ saʼatalil; baʼax unajeʼ a chuʼupleʼex yéetel kiliʼich [muukʼ]» (Efe. 5:18). Tsʼoʼoleʼ tu yaʼalaj tiʼ le kiikoʼob tsʼoʼok u yantal u jaʼabiloʼoboʼ maʼ unaj «u káaltaloʼobiʼ» (Tito 2:3).
5. ¿Baʼax kʼáatchiʼiloʼob unaj u beetik le máax suuk u yukʼikoʼ?
5 Wa k-conciencia ku chaʼik k-ukʼikeʼ, unaj k-tuklik: «¿Kin wilik wa maʼ maʼalob u píitmáan u yukʼik máak, jeʼex úuchik u yilik Jesuseʼ? Wa ku kʼaʼabéetchajal in tsolik u nuʼuk tiʼ juntúul sukuʼun yoʼolal lelaʼ, ¿jeʼel wa u páajtal in beetkeʼ? ¿Kin wukʼik wa chéen utiaʼal in tuʼubsik le talamiloʼob yaantenoʼ? ¿Bukaʼaj aguardiente wa cerveza kin wukʼik cada semana? ¿Bix in wuʼuykinba ken aʼalaʼakten táan u píitmáan in wukʼik? ¿Kin waʼalik wa maʼ jaajiʼ, wa kin kʼuuxil?». Wa ku suuktal k-ukʼikeʼ, yaan u taasiktoʼon talamil, tumen yaan u pʼáatal maʼ ken tuukul tubeel yéetel yaan u talamtaltoʼon k-chʼaʼtuklik baʼax maʼalob. Lelaʼ maʼ unaj k-chaʼik u yúuchultoʼoniʼ, baʼaxeʼ mantatsʼ unaj k-kanáantik k-tuukul (Pro. 3:21, 22).
Unaj k-kanáantikba tiʼ baʼaloʼob yaan yil yéetel espiritismo
6, 7. 1) ¿Baʼax tu beetaj Jesús ka túuntaʼab u yóol tumen Satanás yéetel u demonioʼob? 2) ¿Baʼaxten jach yaʼab u beetaʼal baʼaloʼob yaan yil yéetel espiritismo?
6 Le ka taal Jesús way Luʼumeʼ, maʼ tu chʼaʼaj saajkil tiʼ Satanás yéetel u kʼasaʼan angeloʼobiʼ. Le ka túuntaʼab u yóoleʼ, tu yilaj u beetik baʼax uts tu tʼaan Dios (Luc. 4:1-13). Yéetel maʼ tu chaʼaj u kʼaskúuntaʼal u tuukul tumen le Kʼaasilbaʼal utiaʼal maʼ u tsʼoʼokbesik baʼax aʼalaʼantiʼ tumen Diosiʼ (Mat. 16:21-23). Tsʼoʼoleʼ tu luʼsaj yaʼab máakoʼob yáanal u páajtalil le kʼasaʼan angeloʼoboʼ (Mar. 5:2, 8, 12-15; 9:20, 25-27).
7 Ka tsʼoʼok u tsʼaʼabal u beet u Reyil Jesús tu jaʼabil 1914, tu luʼsaj Satanás yéetel u demonioʼob teʼ kaʼanoʼ. Le oʼolal le Kʼaasilbaʼaloʼ táan u maas kaxtik bix jeʼel u «tusik tuláakal yóokʼol kaab[eʼ]» (Apo. 12:9, 10). Le oʼolal tsʼoʼok u jach yaʼabtal u beetaʼal baʼaloʼob yaan yil yéetel espiritismo. Lelaʼ ku keʼetel yéetel junpʼéel kʼaakʼas kʼojaʼanil jach unaj k-kanáantikba tiʼ, tumen tuláakal tuʼux yaan. Baʼaleʼ ¿bix jeʼel u páajtal k-kanáantikba tiʼeʼ?
8. ¿Baʼax kʼáatchiʼiloʼob unaj k-beetik yoʼolal le náaysaj óoloʼob k-yéeyikoʼ?
8 Le Bibliaoʼ ku yaʼalik unaj k-kanáantikba tiʼ tuláakal le baʼaloʼob yaan yil yéetel le espiritismooʼ (xokaʼak Deuteronomio 18:10-12). Tiʼ Satanás yéetel u demonioʼobeʼ ku meyaj le peliculaʼob, libroʼob yéetel videojuegoʼob tuʼux jach ku taasik baʼaloʼob yaan yil yéetel espiritismo utiaʼal u kʼaskúuntik u tuukul máak. Le oʼolal jach unaj k-kanáantik tiʼ baʼaxoʼob k-náaysik k-óol. Unaj k-tuklik: «Teʼ tu tsʼoʼok mesoʼobaʼ, ¿tsʼoʼok wa in náaysik in wóol yéetel peliculaʼob, baʼaxoʼob ku máansaʼal tiʼ televisión, videojuegoʼob, libroʼob wa cuentoʼob yaan yil yéetel magia wa espiritismo? ¿Kin wilik wa in kanáantikinba tiʼ le baʼaloʼob yaan yil yéetel espiritismooʼ, wa kin tuklik maʼ ken u beetten kʼaas? ¿Tsʼoʼok wa in máansik tin tuukul bix u yilik Jéeoba le baʼaxoʼob yéetel kin náaysik in wóoloʼ? ¿Tsʼoʼok wa u pʼáatal maʼatech in jach kanáantikinba tiʼ le baʼaloʼob beyaʼ? Wa beyoʼ, ¿tsʼoʼok wa in chʼaʼtuklik maʼ in náaysik in wóol tu kaʼatéen yéetel le baʼaloʼob bey utiaʼal in weʼesik in yaabiltmaj Jéeoba bey xan le baʼaxoʼob ku yaʼalikoʼ?» (Hch. 19:19, 20).
Unaj k-beetik baʼax tu yaʼalaj Jesús utiaʼal maʼ k-lúubul tiʼ núupkʼeban
9. ¿Bix jeʼel u chaʼik máak u yaabiltaʼal baʼax kʼaas tumen u puksiʼikʼaleʼ?
9 Jesuseʼ tu yaʼalaj baʼax unaj u beetik máak utiaʼal maʼ u lúubul tiʼ núupkʼeban. Tu yaʼalaj: «¿Maʼ wa a xokmajeʼex tiʼ le Kiliʼich Tsʼíiboʼ, le máax beet wíinikoʼob tu [káajbaleʼ] tu beetaj xiib yéetel koʼolel? Tu yaʼalaj xan: Tu yoʼolal lelaʼ juntúul xiibeʼ yaan u pʼatik u taata yéetel [u] maamaeʼ utiaʼal u nupkuba yéetel u yatan, tu kaʼatúulaloʼob bíin junpʼéeliliʼchajkoʼob. Beyoʼ maʼ kaʼatúuloʼobiʼ, baʼaleʼ juntúuliliʼob. Le oʼolaleʼ mix máak unaj u jatsik le baʼax nupaʼan tumen Jajal Dioseʼ» (Mat. 19:4-6). Cristoeʼ u yojel xaneʼ, le baʼax ku chaʼantik máakoʼ ku kʼuchul tu puksiʼikʼal. Le oʼolal teʼ kaʼansaj tu beetaj teʼ puʼukoʼ, tu yaʼalaj: «Teʼexeʼ a wuʼuymajeʼex aʼalaʼab tiʼ le úuchben máakoʼoboʼ: Maʼ a núupkʼebantal. Baʼaleʼ teneʼ kin waʼalik tiʼ teʼexeʼ jeʼel máaxak ku paktik juntúul koʼolel utiaʼal u tsʼíibolteʼ tsʼoʼok u núupkʼebantal tu puksiʼikʼal tu yéetel» (Mat. 5:27, 28). Le máax maʼatech u kanáantkuba jeʼex aʼalaʼabik tumen Jesusoʼ, táan u chaʼik u yaabiltaʼal baʼaloʼob kʼaastak tumen u puksiʼikʼal.
10. Tsikbalt junpʼéel baʼax eʼesik jeʼel u páajtal u pʼatik máak u chaʼantik pornografíaeʼ.
10 Satanaseʼ tsʼoʼok u beetik u yaʼabtal pornografía tuláakal tuʼux utiaʼal u beetik u lúubul máak tiʼ núupkʼeban. Ken chaʼantaʼakoʼobeʼ maʼ tu páajtal u séeb tuʼubsaʼal, yéetel ku suuktal u chaʼantaʼal. Lelaʼ bey úuchik tiʼ juntúul sukuʼun, letiʼeʼ ku yaʼalik: «Kin chaʼantik kaʼach pornografía ken yanaken chéen tin juunal. Bey ka kuxlaken tiʼ yaanal yóokʼol kaabeʼ, tumen kin wilik mix baʼal yaan yil yéetel bix in meyajtik Jéeoba. In wojel le baʼax kin beetik kaʼachoʼ maʼ maʼalobiʼ, baʼaleʼ kex beyoʼ kin tuklikeʼ Dioseʼ láayliʼ ku kʼamik le adoración kin tsʼáaiktiʼoʼ». ¿Baʼax áant u kʼex u tuukul? Letiʼeʼ ku yaʼalik: «Tin chʼaʼtuklaj in waʼalik tiʼ le ancianoʼoboʼ, lelaʼ letiʼe baʼax maas talam tsʼoʼok in chʼaʼtuklik in beetkoʼ». Ka máan kʼiineʼ páajchaj u pʼatik le baʼax kʼaas ku beetik kaʼachoʼ. Letiʼeʼ ku yaʼalik: «Ka tin pʼateʼ, tin wuʼuyaj jach tu jaajil maʼalob yanil in conciencia». Jeʼex túun k-ilkoʼ, chéen jeʼel u béeytal u pʼektik máak le pornografía wa ku pʼektik le baʼax kʼaasoʼ.
11, 12. ¿Bix jeʼel k-eʼesik k-pʼekmaj le baʼax kʼaas ken k-yéey baʼax paaxil ken k-uʼuyoʼ?
11 Le baʼax ku yaʼalaʼal teʼ paaxoʼoboʼ jeʼel u yoksik baʼaloʼob kʼaastak tu tuukul yéetel tu puksiʼikʼal máakeʼ. U jaajileʼ le paaxoʼ junpʼéel baʼax jatsʼuts u tsʼaamaj Dios yéetel úuch joʼopʼok u meyaj utiaʼal u adorartaʼal (Éxo. 15:20, 21; Efe. 5:19). Baʼaleʼ le paaxoʼob ku yuʼubaʼal bejlaʼaʼ maases ku tʼaanoʼob tiʼ le núupkʼebanoʼ (1 Juan 5:19). ¿Bix jeʼel k-ojéeltik wa tsʼoʼok u joʼopʼol u kʼaskúuntaʼal k-tuukul tumen le baʼaxoʼob k-uʼuykoʼ?
12 Maʼalob ka k-tukle: «¿Baʼaxoʼob ku yaʼalaʼal ichil le paaxoʼob kin wuʼuykoʼ? ¿Ku tʼaan wa tiʼ u kíimsaʼal máak, tiʼ le núupkʼebanoʼ yéetel tiʼ uláakʼ baʼaloʼob kʼaastak? Wa ka in xok u yuʼub uláakʼ máak le baʼax ku yaʼalik le kʼaayoʼ, ¿jeʼel wa u tuklik in pʼekmaj le baʼax kʼaasoʼ, wa jeʼel u tuklik tsʼoʼok u joʼopʼol u kʼastal in puksiʼikʼaleʼ?». Maʼ tu páajtal k-aʼalik wa k-pʼekmaj le baʼax kʼaas wa láayliʼ k-uʼuyik paaxoʼob tuʼux ku sen yaʼalaʼaloʼ. Maʼ unaj u tuʼubultoʼon le baʼax tu yaʼalaj Jesusaʼ: «Le baʼax ku jóokʼol tu chiʼ máakeʼ tu puksiʼikʼal u taal, letiʼ túun baʼax kʼaskúuntik máak. Tumen tiʼ le puksiʼikʼal ku jóokʼol kʼaakʼas tuukulil, kíimsaj wíinikil, núupkʼebanil, kʼaakʼas tsʼíibolal, ookolil, tuusil yéetel le aʼalaj baʼaliloʼ» (Mat. 15:18, 19; ket yéetel Santiago 3:10, 11).
Maʼ unaj k-bisikba yéetel le máaxoʼob yaabiltmil baʼax kʼaasoʼ
13. ¿Bix tu yilil Jesús le máaxoʼob maʼ tu yóotaj u pʼatoʼob le baʼaxoʼob kʼaastakoʼ?
13 Jesuseʼ tu yaʼaleʼ taal u yaʼal tiʼ le máaxoʼob beetik baʼaloʼob kʼaastak ka arrepentirnakoʼoboʼ (Luc. 5:30-32). Baʼaleʼ ¿bix tu yilil le máaxoʼob maʼ tu yóotaj u pʼatoʼob le baʼaxoʼob kʼaastakoʼ? Tu yaʼaleʼ le máakoʼob beyoʼ jeʼel u kʼaskúuntkoʼob u tuukul u maasileʼ (Mat. 23:15, 23-26). Tu yaʼalaj xaneʼ: «Maʼ tuláakal le máaxoʼob ku yaʼalikoʼobten: Yuumtsil, Yuumtsil, bíin ookkoʼob tu [reinoil] kaʼan[iʼ], baʼaleʼ chéen le máaxoʼob ku beetkoʼob [baʼax uts tu tʼaan] in Taata yaan teʼ kaʼanoʼ. Le ken kʼuchuk le kʼiinoʼ, yaʼab máaxoʼob bíin u yaʼaloʼobten: Yuumtsil, Yuumtsil, toʼoneʼ tʼaanajoʼon ta kʼaabaʼ, ta kʼaabaʼ xan t-jóoʼsaj kʼaakʼas pixanoʼob, ta kʼaabaʼ xan t-mentaj yaʼab chíikulaloʼob». Le máakoʼob maʼ tu arrepentiroʼob mix tu pʼatkoʼob u beetkoʼob baʼaxoʼob kʼaastakeʼ yaan u yaʼalaʼaltiʼob tumen Cristo: «Tselabaʼex tin táan» (Mat. 7:21-23). ¿Baʼaxten yaan u yaʼaliktiʼob beyoʼ? Tumen maʼ tu yeʼesoʼob tsiikil tiʼ Diosiʼ yéetel tu beetoʼob baʼaloʼob kʼaastak tiʼ u yéet máakiloʼob.
14. ¿Baʼaxten ku jóoʼsaʼal ichil le múuchʼulil le máax maʼ tu arrepentiroʼ?
14 Le Bibliaoʼ ku yaʼalikeʼ unaj u jóoʼsaʼal teʼ múuchʼulil le máaxoʼob maʼatech u arrepentiroʼoboʼ (xokaʼak 1 Corintoiloʼob 5:9-13). Lelaʼ jach kʼaʼabéet u beetaʼal yoʼolal óoxpʼéel baʼal: 1) utiaʼal maʼ u kʼaskúuntaʼal u kʼaabaʼ Jéeoba, 2) utiaʼal u pʼáatal limpioil le múuchʼuliloʼ yéetel 3) utiaʼal u yáantaʼal arrepentir le máax beet baʼax kʼaasoʼ.
15. ¿Tiʼ baʼax kʼáatchiʼiloʼob maʼalob ka tuukulnak le máaxoʼob u kʼáat u meyajtoʼob Jéeoba yéetel chúukaʼan óolaloʼ?
15 ¿K-xulik wa k-bisikba yéetel le máaxoʼob maʼatech u yóotkoʼob u pʼatoʼob le baʼaxoʼob kʼaastak ku beetkoʼob, jeʼex tu beetil Jesusoʼ? Maʼalob ka k-tukle: «Wa ka jóoʼsaʼak juntúul máak ichil le múuchʼulil bey xan wa letiʼ chʼaʼtuklik u jóokʼoleʼ, ¿yaan wa u seguer in biskinba tu yéetel? ¿Kux túun wa juntúul in láakʼtsil maʼ tin wotoch kajaʼaniʼ?». Le baʼaloʼob beyaʼ ku tsʼáaik tuʼux k-eʼesik wa k-yaabiltmaj baʼax toj yéetel wa chúukaʼan k-óol k-meyajt Jéeoba. *
16, 17. ¿Baʼax talamchaj u yilik juntúul kiik, yéetel baʼax áant u kʼam le baʼax chʼaʼtuklaʼaboʼ?
16 Tuukulnakoʼon tiʼ baʼax úuch tiʼ juntúul kiik. Letiʼeʼ tu yilaj bix úuchik u xuʼulul u yaabiltaʼal Jéeoba tumen u hijo yéetel bix úuchik u joʼopʼol u beetik baʼaloʼob kʼaastak, tumen maʼ arrepentirnajeʼ, jóoʼsaʼab ichil le múuchʼuliloʼ. Le kiikoʼ u yaabiltmaj Jéeoba, baʼaleʼ u yaabiltmaj xan u hijo, le oʼolal talamchaj tiʼ u xulik u biskuba tu yéetel, jeʼex u yaʼalik le Bibliaoʼ.
17 ¿Baʼax jeʼel k-aʼalik kaʼach tiʼ le kiikaʼ? Letiʼeʼ áantaʼab u yil tumen juntúul anciano, Jéeobaeʼ ku naʼatik bix u yuʼubkuba. Tu yaʼalaj xan tiʼ ka tuukulnak tiʼ bix úuchik u muʼyaj Dios le ka xuʼul u meyajtaʼal tumen u paalaloʼob yanoʼob teʼ kaʼanoʼ. Tu yaʼalaj tiʼeʼ, kex Jéeoba u yojel ku yaatal t-óoleʼ, ku yaʼalik ka jóoʼsaʼak ichil le múuchʼulil le máaxoʼob maʼ tu arrepentiroʼoboʼ. Le kiikoʼ tu kʼamaj le baʼax aʼalaʼabtiʼoʼ yéetel tu yeʼesaj ku kʼamik le baʼax chʼaʼtuklaʼab u beetaʼaloʼ. * U beetik máak beyoʼ ku kiʼimakkúuntik u yóol Jéeoba (Pro. 27:11).
18, 19. 1) Ken xuʼuluk k-bisikba yéetel le máax beetik baʼax kʼaasoʼ, ¿baʼax k-eʼesik k-pʼekmaj? 2) ¿Baʼax utsiloʼob ku taasik u chúukpajal k-óol k-beet baʼax ku yaʼalik Jéeoba?
18 Wa ku yúuchultoʼon xan beyoʼ, maʼ u tuʼubultoʼoneʼ Jéeobaeʼ ku chʼaʼiktoʼon óotsilil ken u yil bix k-muʼyaj. Ken k-xul k-bisikba yéetel le máax ku jóoʼsaʼal teʼ múuchʼuliloʼ, k-eʼesik k-pʼektik le baʼaxoʼob kʼaastak ku beetkoʼ. Tsʼoʼoleʼ k-eʼesik xan yaabilaj tiʼ le máax kʼebanchajoʼ, tumen k-ojel utiaʼal u yutsil le baʼax chʼaʼtuklaʼaboʼ. Wa k-beetik le baʼax ku yaʼalik Jéeobaoʼ, maʼ xaaneʼ maas jeʼel u arrepentir utiaʼal ka suunak teʼ múuchʼuliloʼ.
19 Juntúul kiik jóoʼsaʼab ichil le múuchʼulil yéetel suunaj tu kaʼatéeneʼ, ku yaʼalik: «Teneʼ jach kiʼimak in wóol yoʼolal le yaabilaj ku yeʼesik Jéeoba tiʼ le máaxoʼob yanoʼob ichil u kaajaloʼ, tumen ku kanáantik maʼ u pʼáatal máaxoʼob beetik baʼax kʼaas ichil. Maʼ xaaneʼ yaan máakeʼ, ku yilik bey maʼ maʼalob le baʼax ku beetaʼaloʼ, baʼaleʼ leloʼ junpʼéel baʼax kʼaʼabéet yéetel junpʼéel bix u yeʼesaʼal yaabilaj». Wa ka seguernak u biskuba le sukuʼunoʼob tu yéetel bey xan u láakʼtsiloʼob kex tsʼoʼok u jóoʼsaʼal ichil le múuchʼuliloʼ, ¿jeʼel wa kaʼach u tuukul beyoʼ? Wa k-kʼamik le baʼaxoʼob ku yaʼalik le Biblia ken jóoʼsaʼak máak ichil u kaajal Jéeobaoʼ, k-eʼesik k-yaabiltmaj baʼax toj yéetel k-kʼamik chéen tiʼ Jéeoba yaan u derechoil u yaʼalik baʼax unaj k-beetik.
Unaj k-pʼektik baʼax kʼaas
20, 21. ¿Baʼaxten jach unaj k-pʼektik le baʼax kʼaasoʼ?
20 Apóstol Pedroeʼ ku yaʼalik: «Ilawileʼex maʼalob baʼax ka beetkeʼex yéetel pʼil ichneneʼex». ¿Baʼaxten? Tumen k-enemigo, «le Kʼaasilbaʼaloʼ, táan u máan jeʼel bix león ku yáakameʼ, táan u kaxantik máax u lukʼe» (1 Ped. 5:8). ¿Yaan wa u beetik k-lúubul? Wa k-pʼektik le baʼax kʼaasoʼ maʼatan.
21 U jaajileʼ maʼ chéen chʼaʼabil u pʼektaʼal baʼax kʼaasiʼ. Tumen kʼebanoʼon yéetel kuxaʼanoʼon tiʼ junpʼéel kʼasaʼan yóokʼol kaab ku beetik u bin máak chéen tu paach baʼaxoʼob ku tsʼíiboltik (1 Juan 2:15-17). Baʼaleʼ wa k-beetik jeʼex tu beetil Jesucristo yéetel wa k-ilik k-maas yaabiltik Jéeobaeʼ, yaan u béeytal k-pʼektik le baʼaloʼob kʼaastakoʼ. Unaj u pʼektaʼal baʼax kʼaas tumen tuláakal le máaxoʼob meyajtik Diosoʼ. Lelaʼ unaj k-chʼaʼtuklik k-beetik, tumen k-ojel Jéeobaeʼ yaan u «kanáantik le máaxoʼob u kʼubmaj u yóoloʼob tiʼoʼ; maʼ táan u chaʼik u lúubloʼob tu kʼab le loolob máakoʼoboʼ» (Sal. 97:10).
[Tsolajiloʼob]
^ xóot’ol 15 Lelaʼ ku maas tsoʼolol teʼ revista La Atalaya 15 tiʼ noviembre tiʼ 1981, táan juʼun 20 tak 25.
^ xóot’ol 17 Ilaʼak xan La Atalaya 15 tiʼ enero tiʼ 2007, táan juʼun 17 tak 20.
¿Baʼax jeʼel k-núukikeʼ?
• ¿Baʼax jeʼel u yáantkoʼon k-il wa maʼatech u píitmáan k-ukʼikeʼ?
• ¿Baʼax unaj k-beetik utiaʼal maʼ k-táakpajal tiʼ espiritismo?
• ¿Baʼaxten maʼ maʼalob ka u chaʼant máak pornografíaiʼ?
• ¿Bix jeʼel k-eʼesik k-pʼekmaj le baʼax kʼaas wa ka jóoʼsaʼak juntúul k-láakʼtsil teʼ múuchʼuliloʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 29]
¿Baʼaxoʼob unaj u chʼaʼik en cuentail le máax ku chʼaʼtuklik u yukʼikoʼ?
[U tsolajil le oochel teʼ táan juʼun 30]
Unaj k-kanáantikba tiʼ le baʼaxoʼob yaan yil yéetel espiritismo ken k-náays k-óoloʼ
[U tsolajil le oochel teʼ táan juʼun 31]
¿Baʼax táan u yoksik tu puksiʼikʼal le máax chaʼantik pornografíaoʼ?